{"id":"an1.306-315","title":"Chapter Two","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an1.306-315","title":"Chapter Two","units":[{"id":"an1.306:0","sourceIds":["an1.306:0.1","an1.306:0.2"],"kind":"text","text":{"pi":"Aṅguttara Nikāya 1\n25. Dutiyavagga","en":"Numbered Discourses 1.306–315\nChapter Two"}},{"id":"an1.306:1","sourceIds":["an1.306:1.0","an1.306:1.1","an1.306:1.2"],"kind":"text","text":{"pi":"306\n“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā uppajjanti uppannā vā akusalā dhammā bhiyyobhāvāya vepullāya saṁvattanti yathayidaṁ, bhikkhave, micchādiṭṭhi.\nMicchādiṭṭhikassa, bhikkhave, anuppannā ceva akusalā dhammā uppajjanti uppannā ca akusalā dhammā bhiyyobhāvāya vepullāya saṁvattantī”ti.","en":"306\n“Mendicants, I do not see a single thing that gives rise to unskillful qualities, or, when they have arisen, makes them increase and grow like wrong view.\nWhen you have wrong view, unskillful qualities arise or, when they have arisen, they increase and grow.”"}},{"id":"an1.307:1","sourceIds":["an1.307:1.0","an1.307:1.1","an1.307:1.2"],"kind":"text","text":{"pi":"307\n“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā uppajjanti uppannā vā kusalā dhammā bhiyyobhāvāya vepullāya saṁvattanti yathayidaṁ, bhikkhave, sammādiṭṭhi.\nSammādiṭṭhikassa, bhikkhave, anuppannā ceva kusalā dhammā uppajjanti uppannā ca kusalā dhammā bhiyyobhāvāya vepullāya saṁvattantī”ti.","en":"307\n“Mendicants, I do not see a single thing that gives rise to skillful qualities, or, when they have arisen, makes them increase and grow like right view.\nWhen you have right view, unarisen skillful qualities arise or, when they have arisen, they increase and grow.”"}},{"id":"an1.308:1","sourceIds":["an1.308:1.0","an1.308:1.1","an1.308:1.2"],"kind":"text","text":{"pi":"308\n“Nāhaṁ, bhikkhave, aññaṁ ekadhammampi samanupassāmi yena anuppannā vā kusalā dhammā nuppajjanti uppannā vā kusalā dhammā parihāyanti yathayidaṁ, bhikkhave, micchādiṭṭhi.\nMicchādiṭṭhikassa, bhikkhave, anuppannā ceva kusalā dhammā nuppajjanti uppannā ca kusalā dhammā parihāyantī”ti.","en":"308\n“Mendicants, I do not see a single thing that gives rise to unskillful qualities, or makes skillful qualities decline like wrong view.\nWhen you have wrong view, unskillful qualities arise and skillful qualities decline.”"}},{"id":"an1.309:1","sourceIds":["an1.309:1.0","an1.309:1.1","an1.309:1.2"],"kind":"text","text":{"pi":"309\n“Nāhaṁ, bhikkhave, aññaṁ ekadhammampi samanupassāmi yena anuppannā vā akusalā dhammā nuppajjanti uppannā vā akusalā dhammā parihāyanti yathayidaṁ, bhikkhave, sammādiṭṭhi.\nSammādiṭṭhikassa, bhikkhave, anuppannā ceva akusalā dhammā nuppajjanti uppannā ca akusalā dhammā parihāyantī”ti.","en":"309\n“Mendicants, I do not see a single thing that gives rise to skillful qualities, or makes unskillful qualities decline like right view.\nWhen you have right view, skillful qualities arise and unskillful qualities decline.”"}},{"id":"an1.310:1","sourceIds":["an1.310:1.0","an1.310:1.1","an1.310:1.2"],"kind":"text","text":{"pi":"310\n“Nāhaṁ, bhikkhave, aññaṁ ekadhammampi samanupassāmi yena anuppannā vā micchādiṭṭhi uppajjati uppannā vā micchādiṭṭhi pavaḍḍhati yathayidaṁ, bhikkhave, ayonisomanasikāro.\nAyoniso, bhikkhave, manasi karoto anuppannā ceva micchādiṭṭhi uppajjati uppannā ca micchādiṭṭhi pavaḍḍhatī”ti.","en":"310\n“Mendicants, I do not see a single thing that gives rise to wrong view, and once arisen, makes it grow like irrational application of mind.\nWhen you apply the mind irrationally, wrong view arises, and once arisen it grows.”"}},{"id":"an1.311:1","sourceIds":["an1.311:1.0","an1.311:1.1","an1.311:1.2"],"kind":"text","text":{"pi":"311\n“Nāhaṁ, bhikkhave, aññaṁ ekadhammampi samanupassāmi yena anuppannā vā sammādiṭṭhi uppajjati uppannā vā sammādiṭṭhi pavaḍḍhati yathayidaṁ, bhikkhave, yonisomanasikāro.\nYoniso, bhikkhave, manasi karoto anuppannā ceva sammādiṭṭhi uppajjati uppannā ca sammādiṭṭhi pavaḍḍhatī”ti.","en":"311\n“Mendicants, I do not see a single thing that gives rise to right view, or, once it has already arisen, makes it grow like rational application of mind.\nWhen you apply the mind rationally, right view arises, and once arisen it grows.”"}},{"id":"an1.312:1","sourceIds":["an1.312:1.0","an1.312:1.1","an1.312:1.2"],"kind":"text","text":{"pi":"312\n“Nāhaṁ, bhikkhave, aññaṁ ekadhammampi samanupassāmi yena sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ uppajjanti yathayidaṁ, bhikkhave, micchādiṭṭhi.\nMicchādiṭṭhiyā, bhikkhave, samannāgatā sattā kāyassa bhedā paraṁ maraṇā apāyaṁ duggatiṁ vinipātaṁ nirayaṁ uppajjantī”ti.","en":"312\n“Mendicants, I do not see a single thing that causes sentient beings to be reborn, when their body breaks up, after death, in a place of loss, a bad place, the underworld, hell like wrong view.\nIt is because they have wrong view that sentient beings, when their body breaks up, after death, are reborn in a place of loss, a bad place, the underworld, hell.”"}},{"id":"an1.313:1","sourceIds":["an1.313:1.0","an1.313:1.1","an1.313:1.2"],"kind":"text","text":{"pi":"313\n“Nāhaṁ, bhikkhave, aññaṁ ekadhammampi samanupassāmi yena sattā kāyassa bhedā paraṁ maraṇā sugatiṁ saggaṁ lokaṁ uppajjanti yathayidaṁ, bhikkhave, sammādiṭṭhi.\nSammādiṭṭhiyā, bhikkhave, samannāgatā sattā kāyassa bhedā paraṁ maraṇā sugatiṁ saggaṁ lokaṁ uppajjantī”ti.","en":"313\n“Mendicants, I do not see a single thing that causes sentient beings to be reborn, when their body breaks up, after death, in a good place, a heavenly realm like right view.\nIt is because they have right view that sentient beings, when their body breaks up, after death, are reborn in a good place, a heavenly realm.”"}},{"id":"an1.314:1","sourceIds":["an1.314:1.0","an1.314:1.1","an1.314:1.2","an1.314:1.3","an1.314:1.4","an1.314:1.5","an1.314:1.6","an1.314:1.7","an1.314:1.8","an1.314:1.9"],"kind":"text","text":{"pi":"314\n“Micchādiṭṭhikassa, bhikkhave, purisapuggalassa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …pe… yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṁvattanti.\nTaṁ kissa hetu?\nDiṭṭhi hissa, bhikkhave, pāpikā.\nSeyyathāpi, bhikkhave, nimbabījaṁ vā kosātakibījaṁ vā tittakālābubījaṁ vā allāya pathaviyā nikkhittaṁ yañceva pathavirasaṁ upādiyati yañca āporasaṁ upādiyati sabbaṁ taṁ tittakattāya kaṭukattāya asātattāya saṁvattati.\nTaṁ kissa hetu?\nBījañhissa, bhikkhave, pāpakaṁ.\nEvamevaṁ kho, bhikkhave, micchādiṭṭhikassa purisapuggalassa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …pe… yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṁvattanti.\nTaṁ kissa hetu?\nDiṭṭhi hissa, bhikkhave, pāpikā”ti.","en":"314\n“Mendicants, when an individual has wrong view, whatever bodily, verbal, or mental deeds they undertake in line with that view, their intentions, aims, wishes, and choices all lead to what is unlikable, undesirable, disagreeable, harmful, and suffering.\nWhy is that?\nBecause their view is bad.\nSuppose a seed of neem, angled gourd, or bitter gourd was planted in moist earth. Whatever nutrients it takes up from the earth and water would lead to its bitter, acerbic, and unpleasant taste.\nWhy is that?\nBecause the seed is bad.\nIn the same way, when an individual has wrong view, whatever bodily, verbal, or mental deeds they undertake in line with that view, their intentions, aims, wishes, and choices all lead to what is unlikable, undesirable, disagreeable, harmful, and suffering.\nWhy is that?\nBecause their view is bad.”"}},{"id":"an1.315:1","sourceIds":["an1.315:1.0","an1.315:1.1","an1.315:1.2","an1.315:1.3","an1.315:1.4","an1.315:1.5","an1.315:1.6","an1.315:1.7","an1.315:1.8","an1.315:1.9","an1.315:1.10"],"kind":"text","text":{"pi":"315\n“Sammādiṭṭhikassa, bhikkhave, purisapuggalassa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …pe… yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṁvattanti.\nTaṁ kissa hetu?\nDiṭṭhi hissa, bhikkhave, bhaddikā.\nSeyyathāpi, bhikkhave, ucchubījaṁ vā sālibījaṁ vā muddikābījaṁ vā allāya pathaviyā nikkhittaṁ yañceva pathavirasaṁ upādiyati yañca āporasaṁ upādiyati sabbaṁ taṁ madhurattāya sātattāya asecanakattāya saṁvattati.\nTaṁ kissa hetu?\nBījaṁ hissa, bhikkhave, bhaddakaṁ.\nEvamevaṁ kho, bhikkhave, sammādiṭṭhikassa purisapuggalassa yañceva kāyakammaṁ yathādiṭṭhi samattaṁ samādinnaṁ yañca vacīkammaṁ …pe… yañca manokammaṁ yathādiṭṭhi samattaṁ samādinnaṁ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṁvattanti.\nTaṁ kissa hetu?\nDiṭṭhi hissa, bhikkhave, bhaddikā”ti.\nVaggo dutiyo.","en":"315\n“Mendicants, when an individual has right view, whatever bodily, verbal, or mental deeds they undertake in line with that view, their intentions, aims, wishes, and choices all lead to what is likable, desirable, agreeable, beneficial, and pleasant.\nWhy is that?\nBecause their view is good.\nSuppose a seed of sugarcane, fine rice, or grape was planted in moist earth. Whatever nutrients it takes up from the earth and water would lead to its sweet, pleasant, delectable flavor.\nWhy is that?\nBecause the seed is good.\nIn the same way, when an individual has right view, whatever bodily, verbal, or mental deeds they undertake in line with that view, their intentions, aims, wishes, and choices all lead to what is likable, desirable, agreeable, beneficial, and pleasant.\nWhy is that?\nBecause their view is good.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an1.306-315/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}