{"id":"an10.27","title":"The Great Questions (1st)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an10.27","title":"The Great Questions (1st)","units":[{"id":"an10.27:0","sourceIds":["an10.27:0.1","an10.27:0.2","an10.27:0.3"],"kind":"text","text":{"pi":"Aṅguttara Nikāya 10.27\n3. Mahāvagga\nPaṭhamamahāpañhāsutta","en":"Numbered Discourses 10.27\n3. The Great Chapter\nThe Great Questions (1st)"}},{"id":"an10.27:1","sourceIds":["an10.27:1.1","an10.27:1.2","an10.27:1.3","an10.27:1.4","an10.27:1.5"],"kind":"text","text":{"pi":"Ekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.\nAtha kho sambahulā bhikkhū pubbaṇhasamayaṁ nivāsetvā pattacīvaramādāya sāvatthiṁ piṇḍāya pavisiṁsu.\nAtha kho tesaṁ bhikkhūnaṁ etadahosi:\n“atippago kho tāva sāvatthiyaṁ piṇḍāya carituṁ;\nyannūna mayaṁ yena aññatitthiyānaṁ paribbājakānaṁ ārāmo tenupasaṅkameyyāmā”ti.","en":"At one time the Buddha was staying near Sāvatthī in Jeta’s Grove, Anāthapiṇḍika’s monastery.\nThen several mendicants robed up in the morning and, taking their bowls and robes, entered Sāvatthī for alms.\nThen it occurred to him,\n“It’s too early to wander for alms in Sāvatthī.\nWhy don’t we visit the monastery for the wanderers of other religions?”"}},{"id":"an10.27:2","sourceIds":["an10.27:2.1","an10.27:2.2"],"kind":"text","text":{"pi":"Atha kho te bhikkhū yena aññatitthiyānaṁ paribbājakānaṁ ārāmo tenupasaṅkamiṁsu; upasaṅkamitvā tehi aññatitthiyehi paribbājakehi saddhiṁ sammodiṁsu.\nSammodanīyaṁ kathaṁ sāraṇīyaṁ vītisāretvā ekamantaṁ nisīdiṁsu. Ekamantaṁ nisinne kho te bhikkhū te aññatitthiyā paribbājakā etadavocuṁ:","en":"Then they went to the monastery for the wanderers of other religions and exchanged greetings with the wanderers there.\nWhen the greetings and polite conversation were over, they sat down to one side. The wanderers said to them:"}},{"id":"an10.27:3","sourceIds":["an10.27:3.1","an10.27:3.2","an10.27:3.3","an10.27:3.4","an10.27:3.5"],"kind":"text","text":{"pi":"“Samaṇo, āvuso, gotamo sāvakānaṁ evaṁ dhammaṁ deseti:\n‘etha tumhe, bhikkhave, sabbaṁ dhammaṁ abhijānātha, sabbaṁ dhammaṁ abhiññāya viharathā’ti;\nmayampi kho, āvuso, sāvakānaṁ evaṁ dhammaṁ desema:\n‘etha tumhe, āvuso, sabbaṁ dhammaṁ abhijānātha, sabbaṁ dhammaṁ abhiññāya viharathā’ti.\nIdha no, āvuso, ko viseso ko adhippayāso kiṁ nānākaraṇaṁ samaṇassa vā gotamassa amhākaṁ vā, yadidaṁ dhammadesanāya vā dhammadesanaṁ anusāsaniyā vā anusāsanin”ti?","en":"“Reverends, the ascetic Gotama teaches his disciples like this:\n‘Please, mendicants, directly know all things. Meditate having directly known all things.’\nWe too teach our disciples:\n‘Please, reverends, directly know all things. Live having directly known all things.’\nWhat, then, is the difference between the ascetic Gotama’s teaching and instruction and ours?”"}},{"id":"an10.27:4","sourceIds":["an10.27:4.1","an10.27:4.2","an10.27:4.3"],"kind":"text","text":{"pi":"Atha kho te bhikkhū tesaṁ aññatitthiyānaṁ paribbājakānaṁ bhāsitaṁ neva abhinandiṁsu nappaṭikkosiṁsu.\nAnabhinanditvā appaṭikkositvā uṭṭhāyāsanā pakkamiṁsu:\n“bhagavato santike etassa bhāsitassa atthaṁ ājānissāmā”ti.","en":"Those mendicants neither approved nor rejected that statement of the wanderers of other religions.\nThey rose from their seats, thinking,\n“We will learn the meaning of this statement from the Buddha himself.”"}},{"id":"an10.27:5","sourceIds":["an10.27:5.1"],"kind":"text","text":{"pi":"Atha kho te bhikkhū sāvatthiyaṁ piṇḍāya caritvā pacchābhattaṁ piṇḍapātapaṭikkantā yena bhagavā tenupasaṅkamiṁsu; upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ:","en":"Then, after the meal, when they returned from almsround, they went up to the Buddha, bowed, sat down to one side, and told him what had happened."}},{"id":"an10.27:6","sourceIds":["an10.27:6.1","an10.27:6.2","an10.27:6.3","an10.27:6.4","an10.27:6.5","an10.27:6.6"],"kind":"text","text":{"pi":"“Idha mayaṁ, bhante, pubbaṇhasamayaṁ nivāsetvā pattacīvaramādāya sāvatthiṁ piṇḍāya pavisimhā.\nTesaṁ no, bhante, amhākaṁ etadahosi:\n‘atippago kho tāva sāvatthiyaṁ piṇḍāya carituṁ;\nyannūna mayaṁ yena aññatitthiyānaṁ paribbājakānaṁ ārāmo tenupasaṅkameyyāmā’ti.\nAtha kho mayaṁ, bhante, yena aññatitthiyānaṁ paribbājakānaṁ ārāmo tenupasaṅkamimhā; upasaṅkamitvā tehi aññatitthiyehi paribbājakehi saddhiṁ sammodimhā.\nSammodanīyaṁ kathaṁ sāraṇīyaṁ vītisāretvā ekamantaṁ nisīdimhā. Ekamantaṁ nisinne kho, bhante, aññatitthiyā paribbājakā amhe etadavocuṁ:"}},{"id":"an10.27:7","sourceIds":["an10.27:7.1","an10.27:7.2","an10.27:7.3","an10.27:7.4","an10.27:7.5"],"kind":"text","text":{"pi":"‘Samaṇo, āvuso, gotamo sāvakānaṁ evaṁ dhammaṁ deseti—\netha tumhe, bhikkhave, sabbaṁ dhammaṁ abhijānātha, sabbaṁ dhammaṁ abhiññāya viharathāti;\nmayampi kho, āvuso, sāvakānaṁ evaṁ dhammaṁ desema—\netha tumhe, āvuso, sabbaṁ dhammaṁ abhijānātha, sabbaṁ dhammaṁ abhiññāya viharathāti.\nIdha no, āvuso, ko viseso ko adhippayāso kiṁ nānākaraṇaṁ samaṇassa vā gotamassa amhākaṁ vā, yadidaṁ dhammadesanāya vā dhammadesanaṁ anusāsaniyā vā anusāsanin’ti?"}},{"id":"an10.27:8","sourceIds":["an10.27:8.1","an10.27:8.2","an10.27:8.3"],"kind":"text","text":{"pi":"Atha kho mayaṁ, bhante, tesaṁ aññatitthiyānaṁ paribbājakānaṁ bhāsitaṁ neva abhinandimhā nappaṭikkosimhā.\nAnabhinanditvā appaṭikkositvā uṭṭhāyāsanā pakkamimhā:\n‘bhagavato santike etassa bhāsitassa atthaṁ ājānissāmā’”ti."}},{"id":"an10.27:9","sourceIds":["an10.27:9.1","an10.27:9.2","an10.27:9.3","an10.27:9.4","an10.27:9.5","an10.27:9.6"],"kind":"text","text":{"pi":"“Evaṁvādino, bhikkhave, aññatitthiyā paribbājakā evamassu vacanīyā:\n‘eko, āvuso, pañho eko uddeso ekaṁ veyyākaraṇaṁ, dve pañhā dve uddesā dve veyyākaraṇāni, tayo pañhā tayo uddesā tīṇi veyyākaraṇāni, cattāro pañhā cattāro uddesā cattāri veyyākaraṇāni, pañca pañhā pañcuddesā pañca veyyākaraṇāni, cha pañhā cha uddesā cha veyyākaraṇāni, satta pañhā sattuddesā satta veyyākaraṇāni, aṭṭha pañhā aṭṭhuddesā aṭṭha veyyākaraṇāni, nava pañhā navuddesā nava veyyākaraṇāni, dasa pañhā dasuddesā dasa veyyākaraṇānī’ti.\nEvaṁ puṭṭhā, bhikkhave, aññatitthiyā paribbājakā na ceva sampāyissanti, uttari ca vighātaṁ āpajjissanti.\nTaṁ kissa hetu?\nYathā taṁ, bhikkhave, avisayasmiṁ.\nNāhaṁ taṁ, bhikkhave, passāmi sadevake loke samārake sabrahmake sassamaṇabrāhmaṇiyā pajāya sadevamanussāya yo imesaṁ pañhānaṁ veyyākaraṇena cittaṁ ārādheyya, aññatra tathāgatena vā tathāgatasāvakena vā ito vā pana sutvā.","en":"“Mendicants, when wanderers of other religions say this, you should say to them:\n‘One thing: question, summary recital, and answer. Two … Three … Four … Five … Six … Seven … Eight … Nine … Ten things: question, summary recital, and answer.’\nQuestioned like this, the wanderers of other religions would be stumped, and, in addition, would get frustrated.\nWhy is that?\nBecause they’re out of their element.\nI don’t see anyone in this world—with its gods, Māras, and divinities, this population with its ascetics and brahmins, its gods and humans—who could provide a satisfying answer to these questions except the Realized One or his disciple or someone who has heard it from them."}},{"id":"an10.27:10","sourceIds":["an10.27:10.1","an10.27:10.2","an10.27:10.3","an10.27:10.4","an10.27:10.5","an10.27:10.6","an10.27:10.7","an10.27:10.8"],"kind":"text","text":{"pi":"‘Eko pañho eko uddeso ekaṁ veyyākaraṇan’ti,\niti kho panetaṁ vuttaṁ. Kiñcetaṁ paṭicca vuttaṁ?\nEkadhamme, bhikkhave, bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamasmiṁ ekadhamme?\n‘Sabbe sattā āhāraṭṭhitikā’—\nimasmiṁ kho, bhikkhave, ekadhamme bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\n‘Eko pañho eko uddeso ekaṁ veyyākaraṇan’ti,\niti yaṁ taṁ vuttaṁ idametaṁ paṭicca vuttaṁ.","en":"‘One thing: question, summary recital, and answer.’\nThat’s what I said, but why did I say it?\nBecoming completely disillusioned, dispassionate, and freed regarding one thing, seeing its limits and fully comprehending its meaning, a mendicant makes an end of suffering in this very life.\nWhat one thing?\n‘All sentient beings are sustained by food.’\nBecoming completely disillusioned, dispassionate, and freed regarding this one thing, seeing its limits and fully comprehending its meaning, a mendicant makes an end of suffering in this very life.\n‘One thing: question, summary recital, and answer.’\nThat’s what I said, and this is why I said it."}},{"id":"an10.27:11","sourceIds":["an10.27:11.1","an10.27:11.2","an10.27:11.3","an10.27:11.4","an10.27:11.5","an10.27:11.6","an10.27:11.7"],"kind":"text","text":{"pi":"‘Dve pañhā dve uddesā dve veyyākaraṇānī’ti, iti kho panetaṁ vuttaṁ.\nKiñcetaṁ paṭicca vuttaṁ?\nDvīsu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamesu dvīsu?\nNāme ca rūpe ca—\nimesu kho, bhikkhave, dvīsu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\n‘Dve pañhā dve uddesā dve veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.","en":"What two?\nName and form. …"}},{"id":"an10.27:12","sourceIds":["an10.27:12.1","an10.27:12.2","an10.27:12.3","an10.27:12.4","an10.27:12.5","an10.27:12.6","an10.27:12.7"],"kind":"text","text":{"pi":"‘Tayo pañhā tayo uddesā tīṇi veyyākaraṇānī’ti, iti kho panetaṁ vuttaṁ.\nKiñcetaṁ paṭicca vuttaṁ?\nTīsu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamesu tīsu?\nTīsu vedanāsu—\nimesu kho, bhikkhave, tīsu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\n‘Tayo pañhā tayo uddesā tīṇi veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.","en":"What three?\nThree feelings. …"}},{"id":"an10.27:13","sourceIds":["an10.27:13.1","an10.27:13.2","an10.27:13.3","an10.27:13.4","an10.27:13.5","an10.27:13.6","an10.27:13.7"],"kind":"text","text":{"pi":"‘Cattāro pañhā cattāro uddesā cattāri veyyākaraṇānī’ti, iti kho panetaṁ vuttaṁ.\nKiñcetaṁ paṭicca vuttaṁ?\nCatūsu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamesu catūsu?\nCatūsu āhāresu—\nimesu kho, bhikkhave, catūsu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\n‘Cattāro pañhā cattāro uddesā cattāri veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.","en":"What four?\nThe four foods. …"}},{"id":"an10.27:14","sourceIds":["an10.27:14.1","an10.27:14.2","an10.27:14.3","an10.27:14.4","an10.27:14.5","an10.27:14.6","an10.27:14.7"],"kind":"text","text":{"pi":"‘Pañca pañhā pañcuddesā pañca veyyākaraṇānī’ti, iti kho panetaṁ vuttaṁ.\nKiñcetaṁ paṭicca vuttaṁ?\nPañcasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamesu pañcasu?\nPañcasu upādānakkhandhesu—\nimesu kho, bhikkhave, pañcasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\n‘Pañca pañhā pañcuddesā pañca veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.","en":"What five?\nThe five grasping aggregates. …"}},{"id":"an10.27:15","sourceIds":["an10.27:15.1","an10.27:15.2","an10.27:15.3","an10.27:15.4","an10.27:15.5","an10.27:15.6","an10.27:15.7"],"kind":"text","text":{"pi":"‘Cha pañhā cha uddesā cha veyyākaraṇānī’ti, iti kho panetaṁ vuttaṁ.\nKiñcetaṁ paṭicca vuttaṁ?\nChasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamesu chasu?\nChasu ajjhattikesu āyatanesu—\nimesu kho, bhikkhave, chasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\n‘Cha pañhā cha uddesā cha veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.","en":"What six?\nThe six interior sense fields. …"}},{"id":"an10.27:16","sourceIds":["an10.27:16.1","an10.27:16.2","an10.27:16.3","an10.27:16.4","an10.27:16.5","an10.27:16.6","an10.27:16.7"],"kind":"text","text":{"pi":"‘Satta pañhā sattuddesā satta veyyākaraṇānī’ti, iti kho panetaṁ vuttaṁ.\nKiñcetaṁ paṭicca vuttaṁ?\nSattasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamesu sattasu?\nSattasu viññāṇaṭṭhitīsu—\nimesu kho, bhikkhave, sattasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\n‘Satta pañhā sattuddesā satta veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.","en":"What seven?\nThe seven planes of consciousness. …"}},{"id":"an10.27:17","sourceIds":["an10.27:17.1","an10.27:17.2","an10.27:17.3","an10.27:17.4","an10.27:17.5","an10.27:17.6","an10.27:17.7"],"kind":"text","text":{"pi":"‘Aṭṭha pañhā aṭṭhuddesā aṭṭha veyyākaraṇānī’ti, iti kho panetaṁ vuttaṁ.\nKiñcetaṁ paṭicca vuttaṁ?\nAṭṭhasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamesu aṭṭhasu?\nAṭṭhasu lokadhammesu—\nimesu kho, bhikkhave, aṭṭhasu dhammesu bhikkhu sammā nibbindamāno …pe… dukkhassantakaro hoti.\n‘Aṭṭha pañhā aṭṭhuddesā aṭṭha veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.","en":"What eight?\nThe eight worldly conditions. …"}},{"id":"an10.27:18","sourceIds":["an10.27:18.1","an10.27:18.2","an10.27:18.3","an10.27:18.4","an10.27:18.5","an10.27:18.6","an10.27:18.7"],"kind":"text","text":{"pi":"‘Nava pañhā navuddesā nava veyyākaraṇānī’ti, iti kho panetaṁ vuttaṁ.\nKiñcetaṁ paṭicca vuttaṁ?\nNavasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamesu navasu?\nNavasu sattāvāsesu—\nimesu kho, bhikkhave, navasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\n‘Nava pañhā navuddesā nava veyyākaraṇānī’ti, iti yaṁ taṁ vuttaṁ idametaṁ paṭicca vuttaṁ.","en":"What nine?\nThe nine abodes of sentient beings. …"}},{"id":"an10.27:19","sourceIds":["an10.27:19.1","an10.27:19.2","an10.27:19.3","an10.27:19.4","an10.27:19.5","an10.27:19.6","an10.27:19.7","an10.27:19.8","an10.27:19.9"],"kind":"text","text":{"pi":"‘Dasa pañhā dasuddesā dasa veyyākaraṇānī’ti,\niti kho panetaṁ vuttaṁ. Kiñcetaṁ paṭicca vuttaṁ?\nDasasu, bhikkhave, dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\nKatamesu dasasu?\nDasasu akusalesu kammapathesu—\nimesu kho, bhikkhave, dasasu dhammesu bhikkhu sammā nibbindamāno sammā virajjamāno sammā vimuccamāno sammā pariyantadassāvī sammadatthaṁ abhisamecca diṭṭheva dhamme dukkhassantakaro hoti.\n‘Dasa pañhā dasuddesā dasa veyyākaraṇānī’ti,\niti yaṁ taṁ vuttaṁ idametaṁ paṭicca vuttan”ti.\nSattamaṁ.","en":"‘Ten things: question, summary recital, and answer.’\nThat’s what I said, but why did I say it?\nBecoming completely disillusioned, dispassionate, and freed regarding ten things, seeing their limits and fully comprehending their meaning, a mendicant makes an end of suffering in this very life.\nWhat ten?\nThe ten ways of performing unskillful deeds.\nBecoming completely disillusioned, dispassionate, and freed regarding these ten things, seeing their limits and fully comprehending their meaning, a mendicant makes an end of suffering in this very life.\n‘Ten things: question, summary recital, and answer.’\nThat’s what I said, and this is why I said it.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an10.27/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}