{"id":"an11.11","title":"With Mahānāma (1st)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an11.11","title":"With Mahānāma (1st)","units":[{"id":"an11.11:0","sourceIds":["an11.11:0.1","an11.11:0.2","an11.11:0.3"],"kind":"text","text":{"pi":"Aṅguttara Nikāya 11.11\n2. Anussativagga\nPaṭhamamahānāmasutta","en":"Numbered Discourses 11.11\n2. Recollection\nWith Mahānāma (1st)"}},{"id":"an11.11:1","sourceIds":["an11.11:1.1","an11.11:1.2","an11.11:1.3","an11.11:1.4","an11.11:1.5","an11.11:1.6"],"kind":"text","text":{"pi":"Ekaṁ samayaṁ bhagavā sakkesu viharati kapilavatthusmiṁ nigrodhārāme.\nTena kho pana samayena sambahulā bhikkhū bhagavato cīvarakammaṁ karonti:\n“niṭṭhitacīvaro bhagavā temāsaccayena cārikaṁ pakkamissatī”ti.\nAssosi kho mahānāmo sakko:\n“sambahulā kira bhikkhū bhagavato cīvarakammaṁ karonti:\n‘niṭṭhitacīvaro bhagavā temāsaccayena cārikaṁ pakkamissatī’”ti.","en":"At one time the Buddha was staying in the land of the Sakyans, near Kapilavatthu in the Banyan Tree Monastery.\nAt that time several mendicants were making a robe for the Buddha, thinking that\nwhen his robe was finished and the three months of the rains residence had passed the Buddha would set out wandering.\nMahānāma the Sakyan heard about this."}},{"id":"an11.11:2","sourceIds":["an11.11:2.1","an11.11:2.2","an11.11:2.3","an11.11:2.4","an11.11:2.5"],"kind":"text","text":{"pi":"Atha kho mahānāmo sakko yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho mahānāmo sakko bhagavantaṁ etadavoca:\n“sutaṁ metaṁ, bhante:\n‘sambahulā kira bhikkhū bhagavato cīvarakammaṁ karonti—\nniṭṭhitacīvaro bhagavā temāsaccayena cārikaṁ pakkamissatī’ti.\nTesaṁ no, bhante, nānāvihārehi viharataṁ kenassa vihārena vihātabban”ti?","en":"He went up to the Buddha, bowed, sat down to one side, and said to him:\n“Sir, I have heard that\nseveral mendicants are making a robe for the Buddha, thinking that\nwhen his robe was finished and the three months of the rains residence had passed the Buddha would set out wandering.\nNow, we spend our life in various ways. Which of these should we practice?”"}},{"id":"an11.11:3","sourceIds":["an11.11:3.1","an11.11:3.2","an11.11:3.3","an11.11:3.4","an11.11:3.5","an11.11:3.6","an11.11:3.7","an11.11:3.8","an11.11:3.9","an11.11:3.10","an11.11:3.11","an11.11:3.12","an11.11:3.13","an11.11:3.14","an11.11:3.15","an11.11:3.16"],"kind":"text","text":{"pi":"“Sādhu sādhu, mahānāma.\nEtaṁ kho, mahānāma, tumhākaṁ patirūpaṁ kulaputtānaṁ, yaṁ tumhe tathāgataṁ upasaṅkamitvā puccheyyātha:\n‘tesaṁ no, bhante, nānāvihārehi viharataṁ kenassa vihārena vihātabban’ti?\nSaddho kho, mahānāma, ārādhako hoti, no assaddho;\nāraddhavīriyo ārādhako hoti, no kusīto;\nupaṭṭhitassati ārādhako hoti, no muṭṭhassati;\nsamāhito ārādhako hoti, no asamāhito;\npaññavā ārādhako hoti, no duppañño.\nImesu kho tvaṁ, mahānāma, pañcasu dhammesu patiṭṭhāya cha dhamme uttari bhāveyyāsi.\nIdha tvaṁ, mahānāma, tathāgataṁ anussareyyāsi:\n‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.\nYasmiṁ, mahānāma, samaye ariyasāvako tathāgataṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;\nujugatamevassa tasmiṁ samaye cittaṁ hoti tathāgataṁ ārabbha.\nUjugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.\nPamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.\nAyaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno buddhānussatiṁ bhāveti.","en":"“Good, good, Mahānāma!\nIt’s appropriate that gentlemen such as you come to me and ask:\n‘We spend our life in various ways. Which of these should we practice?’\nThe faithful succeed, not the faithless.\nThe energetic succeed, not the lazy.\nThe mindful succeed, not the unmindful.\nThose with immersion succeed, not those without immersion.\nThe wise succeed, not the witless.\nWhen you’re grounded on these five things, go on to develop six further things.\nFirstly, you should recollect the Realized One:\n‘That Blessed One is perfected, a fully awakened Buddha, accomplished in knowledge and conduct, holy, knower of the world, supreme guide for those fit for training, teacher of gods and humans, awakened, blessed.’\nWhen a noble disciple recollects the Realized One their mind is not full of greed, hate, and delusion.\nAt that time their mind is quite unswerving, based on the Realized One.\nA noble disciple whose mind is unswerving finds inspiration in the meaning and the teaching, and finds joy connected with the teaching.\nWhen they’re joyful, rapture springs up. When the mind is full of rapture, the body becomes tranquil. When the body is tranquil, they feel bliss. And when they’re blissful, the mind becomes immersed in samādhi.\nThis is called a noble disciple who lives in balance among people who are unbalanced, and lives untroubled among people who are troubled. They’ve entered the stream of the teaching and developed the recollection of the Buddha."}},{"id":"an11.11:4","sourceIds":["an11.11:4.1","an11.11:4.2","an11.11:4.3","an11.11:4.4","an11.11:4.5","an11.11:4.6","an11.11:4.7"],"kind":"text","text":{"pi":"Puna caparaṁ tvaṁ, mahānāma, dhammaṁ anussareyyāsi:\n‘svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhī’ti.\nYasmiṁ, mahānāma, samaye ariyasāvako dhammaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;\nujugatamevassa tasmiṁ samaye cittaṁ hoti dhammaṁ ārabbha.\nUjugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.\nPamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.\nAyaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno dhammānussatiṁ bhāveti.","en":"Furthermore, you should recollect the teaching:\n‘The teaching is well explained by the Buddha—apparent in the present life, immediately effective, inviting inspection, relevant, so that sensible people can know it for themselves.’\nWhen a noble disciple recollects the teaching their mind is not full of greed, hate, and delusion. …\nThis is called a noble disciple who lives in balance among people who are unbalanced, and lives untroubled among people who are troubled. They’ve entered the stream of the teaching and developed the recollection of the teaching."}},{"id":"an11.11:5","sourceIds":["an11.11:5.1","an11.11:5.2","an11.11:5.3","an11.11:5.4","an11.11:5.5","an11.11:5.6","an11.11:5.7"],"kind":"text","text":{"pi":"Puna caparaṁ tvaṁ, mahānāma, saṅghaṁ anussareyyāsi:\n‘suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā, esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassā’ti.\nYasmiṁ, mahānāma, samaye ariyasāvako saṅghaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;\nujugatamevassa tasmiṁ samaye cittaṁ hoti saṅghaṁ ārabbha.\nUjugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.\nPamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.\nAyaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno saṅghānussatiṁ bhāveti.","en":"Furthermore, you should recollect the Saṅgha:\n‘The Saṅgha of the Buddha’s disciples is practicing the way that’s good, direct, systematic, and proper. It consists of the four pairs, the eight individual persons. This is the Saṅgha of the Buddha’s disciples that is worthy of offerings dedicated to the gods, worthy of hospitality, worthy of a religious donation, worthy of greeting with cupped palms, and is the supreme field of merit for the world.’\nWhen a noble disciple recollects the Saṅgha their mind is not full of greed, hate, and delusion. …\nThis is called a noble disciple who lives in balance among people who are unbalanced, and lives untroubled among people who are troubled. They’ve entered the stream of the teaching and developed the recollection of the Saṅgha."}},{"id":"an11.11:6","sourceIds":["an11.11:6.1","an11.11:6.2","an11.11:6.3","an11.11:6.4","an11.11:6.5","an11.11:6.6"],"kind":"text","text":{"pi":"Puna caparaṁ tvaṁ, mahānāma, attano sīlāni anussareyyāsi akhaṇḍāni acchiddāni asabalāni akammāsāni bhujissāni viññuppasatthāni aparāmaṭṭhāni samādhisaṁvattanikāni.\nYasmiṁ, mahānāma, samaye ariyasāvako sīlaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;\nujugatamevassa tasmiṁ samaye cittaṁ hoti sīlaṁ ārabbha.\nUjugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.\nPamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.\nAyaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno sīlānussatiṁ bhāveti.","en":"Furthermore, you should recollect your own ethical conduct, which is intact, impeccable, spotless, and unmarred, liberating, praised by sensible people, not mistaken, and leading to immersion.\nWhen a noble disciple recollects their ethical precepts their mind is not full of greed, hate, and delusion. …\nThis is called a noble disciple who lives in balance among people who are unbalanced, and lives untroubled among people who are troubled. They’ve entered the stream of the teaching and developed the recollection of their ethical conduct."}},{"id":"an11.11:7","sourceIds":["an11.11:7.1","an11.11:7.2","an11.11:7.3","an11.11:7.4","an11.11:7.5","an11.11:7.6","an11.11:7.7","an11.11:7.8"],"kind":"text","text":{"pi":"Puna caparaṁ tvaṁ, mahānāma, attano cāgaṁ anussareyyāsi:\n‘lābhā vata me, suladdhaṁ vata me,\nyohaṁ maccheramalapariyuṭṭhitāya pajāya vigatamalamaccherena cetasā agāraṁ ajjhāvasāmi muttacāgo payatapāṇi vossaggarato yācayogo dānasaṁvibhāgarato’ti.\nYasmiṁ, mahānāma, samaye ariyasāvako cāgaṁ anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;\nujugatamevassa tasmiṁ samaye cittaṁ hoti cāgaṁ ārabbha.\nUjugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.\nPamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.\nAyaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno cāgānussatiṁ bhāveti.","en":"Furthermore, you should recollect your own generosity:\n‘I’m so fortunate, so very fortunate.\nAmong people full of the stain of stinginess I live at home with heart rid of stinginess, freely generous, open-handed, loving to let go, committed to charity, loving to give and to share.’\nWhen a noble disciple recollects their generosity their mind is not full of greed, hate, and delusion. …\nThis is called a noble disciple who lives in balance among people who are unbalanced, and lives untroubled among people who are troubled. They’ve entered the stream of the teaching and developed the recollection of generosity."}},{"id":"an11.11:8","sourceIds":["an11.11:8.1","an11.11:8.2","an11.11:8.3","an11.11:8.4","an11.11:8.5","an11.11:8.6","an11.11:8.7","an11.11:8.8","an11.11:8.9","an11.11:8.10","an11.11:8.11","an11.11:8.12","an11.11:8.13"],"kind":"text","text":{"pi":"Puna caparaṁ tvaṁ, mahānāma, devatā anussareyyāsi:\n‘santi devā cātumahārājikā, santi devā tāvatiṁsā, santi devā yāmā, santi devā tusitā, santi devā nimmānaratino, santi devā paranimmitavasavattino, santi devā brahmakāyikā, santi devā tatuttari.\nYathārūpāya saddhāya samannāgatā tā devatā ito cutā tatthūpapannā, mayhampi tathārūpā saddhā saṁvijjati.\nYathārūpena sīlena samannāgatā tā devatā ito cutā tatthūpapannā, mayhampi tathārūpaṁ sīlaṁ saṁvijjati.\nYathārūpena sutena samannāgatā tā devatā ito cutā tatthūpapannā, mayhampi tathārūpaṁ sutaṁ saṁvijjati.\nYathārūpena cāgena samannāgatā tā devatā ito cutā tatthūpapannā, mayhampi tathārūpo cāgo saṁvijjati.\nYathārūpāya paññāya samannāgatā tā devatā ito cutā tatthūpapannā, mayhampi tathārūpā paññā saṁvijjatī’ti.\nYasmiṁ, mahānāma, samaye ariyasāvako attano ca tāsañca devatānaṁ saddhañca sīlañca sutañca cāgañca paññañca anussarati, nevassa tasmiṁ samaye rāgapariyuṭṭhitaṁ cittaṁ hoti, na dosapariyuṭṭhitaṁ cittaṁ hoti, na mohapariyuṭṭhitaṁ cittaṁ hoti;\nujugatamevassa tasmiṁ samaye cittaṁ hoti devatā ārabbha.\nUjugatacitto kho pana, mahānāma, ariyasāvako labhati atthavedaṁ, labhati dhammavedaṁ, labhati dhammūpasaṁhitaṁ pāmojjaṁ.\nPamuditassa pīti jāyati, pītimanassa kāyo passambhati, passaddhakāyo sukhaṁ vediyati, sukhino cittaṁ samādhiyati.\nAyaṁ vuccati, mahānāma, ariyasāvako visamagatāya pajāya samappatto viharati, sabyāpajjāya pajāya abyāpajjo viharati, dhammasotasamāpanno devatānussatiṁ bhāvetī”ti.\nPaṭhamaṁ.","en":"Furthermore, you should recollect the deities:\n‘There are the gods of the four great kings, the gods of the thirty-three, the gods of Yama, the joyful gods, the gods who love to create, the gods who control what is created by others, the gods of the Divinity’s host, and gods even higher than these.\nWhen those deities passed away from here, they were reborn there because of their faith, ethics, learning, generosity, and wisdom. I, too, have the same kind of faith, ethics, learning, generosity, and wisdom.’\nWhen a noble disciple recollects the faith, ethics, learning, generosity, and wisdom of both themselves and the deities their mind is not full of greed, hate, and delusion.\nAt that time their mind is quite unswerving, based on the deities.\nA noble disciple whose mind is unswerving finds inspiration in the meaning and the teaching, and finds joy connected with the teaching.\nWhen they’re joyful, rapture springs up. When the mind is full of rapture, the body becomes tranquil. When the body is tranquil, they feel bliss. And when they’re blissful, the mind becomes immersed in samādhi.\nThis is called a noble disciple who lives in balance among people who are unbalanced, and lives untroubled among people who are troubled. They’ve entered the stream of the teaching and developed the recollection of the deities.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an11.11/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}