{"id":"an2.1-10","title":"The Chapter on Punishments","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an2.1-10","title":"The Chapter on Punishments","units":[{"id":"an2.1:0","sourceIds":["an2.1:0.1","an2.1:0.2"],"kind":"text","text":{"pi":"Aṅguttara Nikāya 2\n1. Kammakaraṇavagga","en":"Numbered Discourses 2.1–10\nThe Chapter on Punishments"}},{"id":"an2.1:1","sourceIds":["an2.1:1.0","an2.1:1.1","an2.1:1.2","an2.1:1.3","an2.1:1.4","an2.1:1.5","an2.1:1.6"],"kind":"text","text":{"pi":"1. Vajjasutta\nEvaṁ me sutaṁ—\nekaṁ samayaṁ bhagavā sāvatthiyaṁ viharati jetavane anāthapiṇḍikassa ārāme.\nTatra kho bhagavā bhikkhū āmantesi:\n“bhikkhavo”ti.\n“Bhadante”ti te bhikkhū bhagavato paccassosuṁ.\nBhagavā etadavoca:","en":"1. Faults\nSo I have heard.\nAt one time the Buddha was staying near Sāvatthī in Jeta’s Grove, Anāthapiṇḍika’s monastery.\nThere the Buddha addressed the mendicants,\n“Mendicants!”\n“Venerable sir,” they replied.\nThe Buddha said this:"}},{"id":"an2.1:2","sourceIds":["an2.1:2.1","an2.1:2.2","an2.1:2.3","an2.1:2.4","an2.1:2.5","an2.1:2.6"],"kind":"text","text":{"pi":"“Dvemāni, bhikkhave, vajjāni.\nKatamāni dve?\nDiṭṭhadhammikañca vajjaṁ samparāyikañca vajjaṁ.\nKatamañca, bhikkhave, diṭṭhadhammikaṁ vajjaṁ?\nIdha, bhikkhave, ekacco passati coraṁ āgucāriṁ rājāno gahetvā vividhā kammakāraṇā kārente;\nkasāhipi tāḷente, vettehipi tāḷente, addhadaṇḍakehipi tāḷente, hatthampi chindante, pādampi chindante, hatthapādampi chindante, kaṇṇampi chindante, nāsampi chindante, kaṇṇanāsampi chindante, bilaṅgathālikampi karonte, saṅkhamuṇḍikampi karonte, rāhumukhampi karonte, jotimālikampi karonte, hatthapajjotikampi karonte, erakavattikampi karonte, cīrakavāsikampi karonte, eṇeyyakampi karonte, baḷisamaṁsikampi karonte, kahāpaṇikampi karonte, khārāpatacchikampi karonte, palighaparivattikampi karonte, palālapīṭhakampi karonte, tattenapi telena osiñcante, sunakhehipi khādāpente, jīvantampi sūle uttāsente, asināpi sīsaṁ chindante.","en":"“There are, mendicants, these two faults.\nWhat two?\nThe fault apparent in this life, and the fault to do with lives to come.\nWhat is the fault apparent in this life?\nIt’s when someone sees that kings have arrested a bandit, a criminal, and subjected them to various punishments—\nwhipping, caning, and clubbing; cutting off hands or feet, or both; cutting off ears or nose, or both; the ‘porridge pot’, the ‘shell-shave’, the ‘Rāhu’s mouth’, the ‘garland of fire’, the ‘burning hand’, the ‘bulrush twist’, the ‘bark dress’, the ‘antelope’, the ‘meat hook’, the ‘coins’, the ‘caustic pickle’, the ‘twisting bar’, the ‘straw mat’; being splashed with hot oil, being fed to the hounds, being impaled alive, and being beheaded."}},{"id":"an2.1:3","sourceIds":["an2.1:3.1","an2.1:3.2","an2.1:3.3","an2.1:3.4","an2.1:3.5","an2.1:3.6","an2.1:3.7"],"kind":"text","text":{"pi":"Tassa evaṁ hoti:\n‘yathārūpānaṁ kho pāpakānaṁ kammānaṁ hetu coraṁ āgucāriṁ rājāno gahetvā vividhā kammakāraṇā kārenti;\nkasāhipi tāḷenti, vettehipi tāḷenti, addhadaṇḍakehipi tāḷenti, hatthampi chindanti, pādampi chindanti, hatthapādampi chindanti, kaṇṇampi chindanti, nāsampi chindanti, kaṇṇanāsampi chindanti, bilaṅgathālikampi karonti, saṅkhamuṇḍikampi karonti, rāhumukhampi karonti, jotimālikampi karonti, hatthapajjotikampi karonti, erakavattikampi karonti, cīrakavāsikampi karonti, eṇeyyakampi karonti, baḷisamaṁsikampi karonti, kahāpaṇikampi karonti, khārāpatacchikampi karonti, palighaparivattikampi karonti, palālapīṭhakampi karonti, tattenapi telena osiñcanti, sunakhehipi khādāpenti, jīvantampi sūle uttāsenti, asināpi sīsaṁ chindanti.\nAhañceva kho pana evarūpaṁ pāpakammaṁ kareyyaṁ, mampi rājāno gahetvā evarūpā vividhā kammakāraṇā kāreyyuṁ;\nkasāhipi tāḷeyyuṁ …pe… asināpi sīsaṁ chindeyyun’ti.\nSo diṭṭhadhammikassa vajjassa bhīto na paresaṁ pābhataṁ vilumpanto carati.\nIdaṁ vuccati, bhikkhave, diṭṭhadhammikaṁ vajjaṁ.","en":"It occurs to them:\n‘If I were to commit the kinds of bad deeds for which the kings arrested that bandit, that criminal,\nthe rulers would arrest me and subject me to the same punishments.’\nAfraid of the fault apparent in this life, they do not steal the belongings of others.\nThis is called the fault apparent in this life."}},{"id":"an2.1:4","sourceIds":["an2.1:4.1","an2.1:4.2","an2.1:4.3","an2.1:4.4","an2.1:4.5","an2.1:4.6","an2.1:4.7","an2.1:4.8","an2.1:4.9","an2.1:4.10","an2.1:4.11","an2.1:4.12","an2.1:4.13"],"kind":"text","text":{"pi":"Katamañca, bhikkhave, samparāyikaṁ vajjaṁ?\nIdha, bhikkhave, ekacco iti paṭisañcikkhati:\n‘kāyaduccaritassa kho pana pāpako dukkho vipāko abhisamparāyaṁ, vacīduccaritassa pāpako dukkho vipāko abhisamparāyaṁ, manoduccaritassa pāpako dukkho vipāko abhisamparāyaṁ.\nAhañceva kho pana kāyena duccaritaṁ careyyaṁ, vācāya duccaritaṁ careyyaṁ, manasā duccaritaṁ careyyaṁ.\nKiñca taṁ yāhaṁ na kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjeyyan’ti.\nSo samparāyikassa vajjassa bhīto kāyaduccaritaṁ pahāya kāyasucaritaṁ bhāveti, vacīduccaritaṁ pahāya vacīsucaritaṁ bhāveti, manoduccaritaṁ pahāya manosucaritaṁ bhāveti, suddhaṁ attānaṁ pariharati.\nIdaṁ vuccati, bhikkhave, samparāyikaṁ vajjaṁ.\nImāni kho, bhikkhave, dve vajjāni.\nTasmātiha, bhikkhave, evaṁ sikkhitabbaṁ:\n‘diṭṭhadhammikassa vajjassa bhāyissāma, samparāyikassa vajjassa bhāyissāma, vajjabhīruno bhavissāma vajjabhayadassāvino’ti.\nEvañhi vo, bhikkhave, sikkhitabbaṁ.\nVajjabhīruno, bhikkhave, vajjabhayadassāvino etaṁ pāṭikaṅkhaṁ yaṁ parimuccissati sabbavajjehī”ti.\nPaṭhamaṁ.","en":"What is the fault to do with lives to come?\nIt’s when someone reflects:\n‘Bad conduct of body, speech, or mind has a bad, painful result in the next life.\nIf I conduct myself badly,\nthen, when my body breaks up, after death, won’t I be reborn in a place of loss, a bad place, the underworld, hell?’\nAfraid of the fault to do with lives to come, they give up bad conduct by way of body, speech, and mind, and develop good conduct by way of body, speech, and mind, keeping themselves pure.\nThis is called the fault to do with lives to come.\nThese are the two faults.\nSo you should train like this:\n‘We will fear the fault apparent in this life, and we will fear the fault to do with lives to come. We will fear faults, seeing the danger in faults.’\nThat’s how you should train.\nIf you fear faults, seeing the danger in faults, you can expect to be freed from all faults.”"}},{"id":"an2.2:1","sourceIds":["an2.2:1.0","an2.2:1.1","an2.2:1.2","an2.2:1.3","an2.2:1.4"],"kind":"text","text":{"pi":"2. Padhānasutta\n“Dvemāni, bhikkhave, padhānāni durabhisambhavāni lokasmiṁ.\nKatamāni dve?\nYañca gihīnaṁ agāraṁ ajjhāvasataṁ cīvarapiṇḍapātasenāsanagilānapaccayabhesajjaparikkhārānuppadānatthaṁ padhānaṁ, yañca agārasmā anagāriyaṁ pabbajitānaṁ sabbūpadhipaṭinissaggatthaṁ padhānaṁ.\nImāni kho, bhikkhave, dve padhānāni durabhisambhavāni lokasmiṁ.","en":"2. Endeavor\n“These two endeavors are challenging in the world.\nWhat two?\nThe endeavor of laypeople staying in a home to provide robes, almsfood, lodgings, and medicines and supplies for the sick. And the endeavor of those gone forth from the lay life to homelessness to let go of all attachments.\nThese are the two endeavors that are challenging in the world."}},{"id":"an2.2:2","sourceIds":["an2.2:2.1","an2.2:2.2","an2.2:2.3","an2.2:2.4","an2.2:2.5"],"kind":"text","text":{"pi":"Etadaggaṁ, bhikkhave, imesaṁ dvinnaṁ padhānānaṁ yadidaṁ sabbūpadhipaṭinissaggatthaṁ padhānaṁ.\nTasmātiha, bhikkhave, evaṁ sikkhitabbaṁ:\n‘sabbūpadhipaṭinissaggatthaṁ padhānaṁ padahissāmā’ti.\nEvañhi vo, bhikkhave, sikkhitabban”ti.\nDutiyaṁ.","en":"The better of these two endeavors is the effort to let go of all attachments.\nSo you should train like this:\n‘We shall endeavor to let go of all attachments.’\nThat’s how you should train.”"}},{"id":"an2.3:1","sourceIds":["an2.3:1.0","an2.3:1.1","an2.3:1.2","an2.3:1.3","an2.3:1.4","an2.3:1.5","an2.3:1.6","an2.3:1.7","an2.3:1.8","an2.3:1.9","an2.3:1.10"],"kind":"text","text":{"pi":"3. Tapanīyasutta\n“Dveme, bhikkhave, dhammā tapanīyā.\nKatame dve?\nIdha, bhikkhave, ekaccassa kāyaduccaritaṁ kataṁ hoti, akataṁ hoti kāyasucaritaṁ;\nvacīduccaritaṁ kataṁ hoti, akataṁ hoti vacīsucaritaṁ;\nmanoduccaritaṁ kataṁ hoti, akataṁ hoti manosucaritaṁ.\nSo ‘kāyaduccaritaṁ me katan’ti tappati, ‘akataṁ me kāyasucaritan’ti tappati;\n‘vacīduccaritaṁ me katan’ti tappati, ‘akataṁ me vacīsucaritan’ti tappati;\n‘manoduccaritaṁ me katan’ti tappati, ‘akataṁ me manosucaritan’ti tappati.\nIme kho, bhikkhave, dve dhammā tapanīyā”ti.\nTatiyaṁ.","en":"3. Mortifying\n“These two things, mendicants, are mortifying.\nWhat two?\nIt’s when someone has done bad things and not done good things, by way of body, speech, and mind.\nThinking, ‘I’ve done bad things by way of body, speech, and mind’, they’re mortified. Thinking, ‘I haven’t done good things by way of body, speech, and mind’, they’re mortified.\nThese are the two things that are mortifying.”"}},{"id":"an2.4:1","sourceIds":["an2.4:1.0","an2.4:1.1","an2.4:1.2","an2.4:1.3","an2.4:1.4","an2.4:1.5","an2.4:1.6","an2.4:1.7","an2.4:1.8","an2.4:1.9","an2.4:1.10"],"kind":"text","text":{"pi":"4. Atapanīyasutta\n“Dveme, bhikkhave, dhammā atapanīyā.\nKatame dve?\nIdha, bhikkhave, ekaccassa kāyasucaritaṁ kataṁ hoti, akataṁ hoti kāyaduccaritaṁ;\nvacīsucaritaṁ kataṁ hoti, akataṁ hoti vacīduccaritaṁ;\nmanosucaritaṁ kataṁ hoti, akataṁ hoti manoduccaritaṁ.\nSo ‘kāyasucaritaṁ me katan’ti na tappati, ‘akataṁ me kāyaduccaritan’ti na tappati;\n‘vacīsucaritaṁ me katan’ti na tappati, ‘akataṁ me vacīduccaritan’ti na tappati;\n‘manosucaritaṁ me katan’ti na tappati, ‘akataṁ me manoduccaritan’ti na tappati.\nIme kho, bhikkhave, dve dhammā atapanīyā”ti.\nCatutthaṁ.","en":"4. Not Mortifying\n“These two things, mendicants, are not mortifying.\nWhat two?\nIt’s when someone has done good things and not done bad things, by way of body, speech, and mind.\nThinking, ‘I’ve done good things by way of body, speech, and mind’, they’re not mortified. Thinking, ‘I haven’t done bad things by way of body, speech, and mind’, they’re not mortified.\nThese are the two things that are not mortifying.”"}},{"id":"an2.5:1","sourceIds":["an2.5:1.0","an2.5:1.1","an2.5:1.2","an2.5:1.3","an2.5:1.4","an2.5:1.5","an2.5:1.6","an2.5:1.7","an2.5:1.8","an2.5:1.9","an2.5:1.10","an2.5:1.11","an2.5:1.12","an2.5:1.13"],"kind":"text","text":{"pi":"5. Upaññātasutta\n“Dvinnāhaṁ, bhikkhave, dhammānaṁ upaññāsiṁ—\nyā ca asantuṭṭhitā kusalesu dhammesu, yā ca appaṭivānitā padhānasmiṁ.\nAppaṭivānī sudāhaṁ, bhikkhave, padahāmi:\n‘kāmaṁ taco ca nhāru ca aṭṭhi ca avasissatu, sarīre upassussatu maṁsalohitaṁ, yaṁ taṁ purisathāmena purisavīriyena purisaparakkamena pattabbaṁ na taṁ apāpuṇitvā vīriyassa saṇṭhānaṁ bhavissatī’ti.\nTassa mayhaṁ, bhikkhave, appamādādhigatā sambodhi, appamādādhigato anuttaro yogakkhemo.\nTumhe cepi, bhikkhave, appaṭivānaṁ padaheyyātha:\n‘kāmaṁ taco ca nhāru ca aṭṭhi ca avasissatu, sarīre upassussatu maṁsalohitaṁ, yaṁ taṁ purisathāmena purisavīriyena purisaparakkamena pattabbaṁ na taṁ apāpuṇitvā vīriyassa saṇṭhānaṁ bhavissatī’ti, tumhepi, bhikkhave, nacirasseva—\nyassatthāya kulaputtā sammadeva agārasmā anagāriyaṁ pabbajanti, tadanuttaraṁ—brahmacariyapariyosānaṁ diṭṭheva dhamme sayaṁ abhiññā sacchikatvā upasampajja viharissatha.\nTasmātiha, bhikkhave, evaṁ sikkhitabbaṁ:\n‘appaṭivānaṁ padahissāma.\nKāmaṁ taco ca nhāru ca aṭṭhi ca avasissatu, sarīre upassussatu maṁsalohitaṁ, yaṁ taṁ purisathāmena purisavīriyena purisaparakkamena pattabbaṁ na taṁ apāpuṇitvā vīriyassa saṇṭhānaṁ bhavissatī’ti.\nEvañhi vo, bhikkhave, sikkhitabban”ti.\nPañcamaṁ.","en":"5. Learned for Myself\n“Mendicants, I have learned these two things for myself—\nto never be content with skillful qualities, and to never stop trying.\nI never stopped trying, thinking:\n‘Gladly, let only skin, sinews, and bones remain! Let the flesh and blood waste away in my body! I will not stop trying until I have achieved what is possible by human strength, energy, and vigor.’\nIt was by diligence that I achieved awakening, and by diligence that I achieved the supreme sanctuary from the yoke.\nIf you too never stop trying, thinking:\n‘Gladly, let only skin, sinews, and bones remain! Let the flesh and blood waste away in my body! I will not stop trying until I have achieved what is possible by human strength, energy, and vigor.’\nYou will soon realize the supreme culmination of the spiritual path in this very life. You will live having achieved with your own insight the goal for which gentlemen rightly go forth from the lay life to homelessness.\nSo you should train like this:\n‘We will never stop trying, thinking:\n“Gladly, let only skin, sinews, and bones remain! Let the flesh and blood waste away in my body! I will not stop trying until I have achieved what is possible by human strength, energy, and vigor.”’\nThat’s how you should train.”"}},{"id":"an2.6:1","sourceIds":["an2.6:1.0","an2.6:1.1","an2.6:1.2","an2.6:1.3","an2.6:1.4","an2.6:1.5","an2.6:1.6"],"kind":"text","text":{"pi":"6. Saṁyojanasutta\n“Dveme, bhikkhave, dhammā.\nKatame dve?\nYā ca saṁyojaniyesu dhammesu assādānupassitā, yā ca saṁyojaniyesu dhammesu nibbidānupassitā.\nSaṁyojaniyesu, bhikkhave, dhammesu assādānupassī viharanto rāgaṁ na pajahati, dosaṁ na pajahati, mohaṁ na pajahati.\nRāgaṁ appahāya, dosaṁ appahāya, mohaṁ appahāya na parimuccati jātiyā jarāya maraṇena sokehi paridevehi dukkhehi domanassehi upāyāsehi.\n‘Na parimuccati dukkhasmā’ti vadāmi.","en":"6. Fetters\n“There are, mendicants, these two things.\nWhat two?\nSeeing things that tighten the fetters as gratifying, and seeing things that tighten the fetters as boring.\nWhen you keep seeing things that tighten the fetters as gratifying, you don’t give up greed, hate, and delusion.\nWhen these are not given up, you’re not freed from rebirth, old age, and death, from sorrow, lamentation, pain, sadness, and distress.\nYou’re not freed from suffering, I say."}},{"id":"an2.6:2","sourceIds":["an2.6:2.1","an2.6:2.2","an2.6:2.3","an2.6:2.4","an2.6:2.5"],"kind":"text","text":{"pi":"Saṁyojaniyesu, bhikkhave, dhammesu nibbidānupassī viharanto rāgaṁ pajahati, dosaṁ pajahati, mohaṁ pajahati.\nRāgaṁ pahāya, dosaṁ pahāya, mohaṁ pahāya, parimuccati jātiyā jarāya maraṇena sokehi paridevehi dukkhehi domanassehi upāyāsehi.\n‘Parimuccati dukkhasmā’ti vadāmi.\nIme kho, bhikkhave, dve dhammā”ti.\nChaṭṭhaṁ.","en":"When you keep seeing things that tighten the fetters as boring, you give up greed, hate, and delusion.\nWhen these are given up, you’re freed from rebirth, old age, and death, from sorrow, lamentation, pain, sadness, and distress.\nYou’re freed from suffering, I say.\nThese are the two things.”"}},{"id":"an2.7:1","sourceIds":["an2.7:1.0","an2.7:1.1","an2.7:1.2","an2.7:1.3","an2.7:1.4","an2.7:1.5"],"kind":"text","text":{"pi":"7. Kaṇhasutta\n“Dveme, bhikkhave, dhammā kaṇhā.\nKatame dve?\nAhirikañca anottappañca.\nIme kho, bhikkhave, dve dhammā kaṇhā”ti.\nSattamaṁ.","en":"7. Dark\n“These two things, mendicants, are dark.\nWhat two?\nLack of conscience and prudence.\nThese are the two things that are dark.”"}},{"id":"an2.8:1","sourceIds":["an2.8:1.0","an2.8:1.1","an2.8:1.2","an2.8:1.3","an2.8:1.4","an2.8:1.5"],"kind":"text","text":{"pi":"8. Sukkasutta\n“Dveme, bhikkhave, dhammā sukkā.\nKatame dve?\nHirī ca ottappañca.\nIme kho, bhikkhave, dve dhammā sukkā”ti.\nAṭṭhamaṁ.","en":"8. Bright\n“These two things, mendicants, are bright.\nWhat two?\nConscience and prudence.\nThese are the two things that are bright.”"}},{"id":"an2.9:1","sourceIds":["an2.9:1.0","an2.9:1.1","an2.9:1.2","an2.9:1.3","an2.9:1.4","an2.9:1.5","an2.9:1.6","an2.9:1.7"],"kind":"text","text":{"pi":"9. Cariyasutta\n“Dveme, bhikkhave, dhammā sukkā lokaṁ pālenti.\nKatame dve?\nHirī ca ottappañca.\nIme kho, bhikkhave, dve sukkā dhammā lokaṁ na pāleyyuṁ, nayidha paññāyetha mātāti vā mātucchāti vā mātulānīti vā ācariyabhariyāti vā garūnaṁ dārāti vā.\nSambhedaṁ loko agamissa, yathā ajeḷakā kukkuṭasūkarā soṇasiṅgālā.\nYasmā ca kho, bhikkhave, ime dve sukkā dhammā lokaṁ pālenti tasmā paññāyati mātāti vā mātucchāti vā mātulānīti vā ācariyabhariyāti vā garūnaṁ dārāti vā”ti.\nNavamaṁ.","en":"9. Conduct\n“These two bright things, mendicants, protect the world.\nWhat two?\nConscience and prudence.\nIf these two bright things did not protect the world, there would be no recognition of the status of mother, aunts, or wives and partners of tutors and respected people.\nThe world would become dissolute, like goats and sheep, chickens and pigs, and hounds and jackals.\nBut because the two bright things protect the world, there is recognition of the status of mother, aunts, and wives and partners of tutors and respected people.”"}},{"id":"an2.10:1","sourceIds":["an2.10:1.0","an2.10:1.1","an2.10:1.2","an2.10:1.3","an2.10:1.4","an2.10:1.5","an2.10:1.6"],"kind":"text","text":{"pi":"10. Vassūpanāyikasutta\n“Dvemā, bhikkhave, vassūpanāyikā.\nKatamā dve?\nPurimikā ca pacchimikā ca.\nImā kho, bhikkhave, dve vassūpanāyikā”ti.\nDasamaṁ.\nKammakaraṇavaggo paṭhamo.","en":"10. Entering the Rainy Season\n“There are, mendicants, these two entries to the rainy season.\nWhat two?\nEarlier and later.\nThese are the two entries to the rainy season.”"}},{"id":"an2.10:2","sourceIds":["an2.10:2.0","an2.10:2.1","an2.10:2.2","an2.10:2.3","an2.10:2.4"],"kind":"text","text":{"pi":"Tassuddānaṁ\nVajjā padhānā dve tapanīyā,\nUpaññātena pañcamaṁ;\nSaṁyojanañca kaṇhañca,\nSukkaṁ cariyā vassūpanāyikena vaggo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an2.1-10/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}