{"id":"an3.116","title":"Imperturbable","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an3.116","title":"Imperturbable","units":[{"id":"an3.116:0","sourceIds":["an3.116:0.1","an3.116:0.2","an3.116:0.3"],"kind":"text","text":{"pi":"Aṅguttara Nikāya 3.116\n12. Āpāyikavagga\nĀneñjasutta","en":"Numbered Discourses 3.116\n12. Bound for Loss\nImperturbable"}},{"id":"an3.116:1","sourceIds":["an3.116:1.1","an3.116:1.2","an3.116:1.3","an3.116:1.4","an3.116:1.5","an3.116:1.6","an3.116:1.7","an3.116:1.8"],"kind":"text","text":{"pi":"“Tayome, bhikkhave, puggalā santo saṁvijjamānā lokasmiṁ.\nKatame tayo?\nIdha, bhikkhave, ekacco puggalo sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ‘ananto ākāso’ti ākāsānañcāyatanaṁ upasampajja viharati.\nSo tadassādeti taṁ nikāmeti tena ca vittiṁ āpajjati, tatra ṭhito tadadhimutto tabbahulavihārī aparihīno kālaṁ kurumāno ākāsānañcāyatanūpagānaṁ devānaṁ sahabyataṁ upapajjati.\nĀkāsānañcāyatanūpagānaṁ, bhikkhave, devānaṁ vīsati kappasahassāni āyuppamāṇaṁ.\nTattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.\nBhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.\nAyaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā.","en":"“Mendicants, these three individuals are found in the world.\nWhat three?\nFirst, an individual, going totally beyond perceptions of form, with the disappearance of perceptions of impingement, not focusing on perceptions of diversity, aware that ‘space is infinite’, enters and remains in the dimension of infinite space.\nThey enjoy it and like it and find it rewarding. If they’re set on that, committed to it, and meditate on it often without losing it, when they die they’re reborn in the company of the gods of the dimension of infinite space.\nThe lifespan of the gods of infinite space is twenty thousand eons.\nAn ordinary person stays there until the lifespan of those gods is spent, then they go to hell or the animal realm or the ghost realm.\nBut a disciple of the Buddha stays there until the lifespan of those gods is spent, then they’re extinguished in that very life.\nThis is the difference between a learned noble disciple and an unlearned ordinary person as regards their place of rebirth."}},{"id":"an3.116:2","sourceIds":["an3.116:2.1","an3.116:2.2","an3.116:2.3","an3.116:2.4","an3.116:2.5","an3.116:2.6"],"kind":"text","text":{"pi":"Puna caparaṁ, bhikkhave, idhekacco puggalo sabbaso ākāsānañcāyatanaṁ samatikkamma ‘anantaṁ viññāṇan’ti viññāṇañcāyatanaṁ upasampajja viharati.\nSo tadassādeti taṁ nikāmeti tena ca vittiṁ āpajjati, tatra ṭhito tadadhimutto tabbahulavihārī aparihīno kālaṁ kurumāno viññāṇañcāyatanūpagānaṁ devānaṁ sahabyataṁ upapajjati.\nViññāṇañcāyatanūpagānaṁ, bhikkhave, devānaṁ cattārīsaṁ kappasahassāni āyuppamāṇaṁ.\nTattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.\nBhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.\nAyaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā.","en":"Furthermore, an individual, going totally beyond the dimension of infinite space, aware that ‘consciousness is infinite’, enters and remains in the dimension of infinite consciousness.\nThey enjoy it and like it and find it rewarding. If they’re set on that, committed to it, and meditate on it often without losing it, when they die they’re reborn in the company of the gods of the dimension of infinite consciousness.\nThe lifespan of the gods of infinite consciousness is forty thousand eons.\nAn ordinary person stays there until the lifespan of those gods is spent, then they go to hell or the animal realm or the ghost realm.\nBut a disciple of the Buddha stays there until the lifespan of those gods is spent, then they’re extinguished in that very life.\nThis is the difference between a learned noble disciple and an unlearned ordinary person as regards their place of rebirth."}},{"id":"an3.116:3","sourceIds":["an3.116:3.1","an3.116:3.2","an3.116:3.3","an3.116:3.4","an3.116:3.5","an3.116:3.6","an3.116:3.7","an3.116:3.8"],"kind":"text","text":{"pi":"Puna caparaṁ, bhikkhave, idhekacco puggalo sabbaso viññāṇañcāyatanaṁ samatikkamma ‘natthi kiñcī’ti ākiñcaññāyatanaṁ upasampajja viharati.\nSo tadassādeti taṁ nikāmeti tena ca vittiṁ āpajjati, tatra ṭhito tadadhimutto tabbahulavihārī aparihīno kālaṁ kurumāno ākiñcaññāyatanūpagānaṁ devānaṁ sahabyataṁ upapajjati.\nĀkiñcaññāyatanūpagānaṁ, bhikkhave, devānaṁ saṭṭhi kappasahassāni āyuppamāṇaṁ.\nTattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.\nBhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.\nAyaṁ kho, bhikkhave, viseso, ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā.\nIme kho, bhikkhave, tayo puggalā santo saṁvijjamānā lokasmin”ti.\nCatutthaṁ.","en":"Furthermore, an individual, going totally beyond the dimension of infinite consciousness, aware that ‘there is nothing at all’, enters and remains in the dimension of nothingness.\nThey enjoy it and like it and find it rewarding. If they’re set on that, committed to it, and meditate on it often without losing it, when they die they’re reborn in the company of the gods of the dimension of nothingness.\nThe lifespan of the gods of nothingness is sixty thousand eons.\nAn ordinary person stays there until the lifespan of those gods is spent, then they go to hell or the animal realm or the ghost realm.\nBut a disciple of the Buddha stays there until the lifespan of those gods is spent, then they’re extinguished in that very life.\nThis is the difference between a learned noble disciple and an unlearned ordinary person as regards their place of rebirth.\nThese are the three individuals found in the world.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an3.116/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}