{"id":"an3.140","title":"A Wild Colt","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an3.140","title":"A Wild Colt","units":[{"id":"an3.140:0","sourceIds":["an3.140:0.1","an3.140:0.2","an3.140:0.3"],"kind":"text","text":{"pi":"Aṅguttara Nikāya 3.140\n14. Yodhājīvavagga\nAssakhaḷuṅkasutta","en":"Numbered Discourses 3.140\n14. A Warrior\nA Wild Colt"}},{"id":"an3.140:1","sourceIds":["an3.140:1.1","an3.140:1.2","an3.140:1.3","an3.140:1.4"],"kind":"text","text":{"pi":"“Tayo ca, bhikkhave, assakhaḷuṅke desessāmi tayo ca purisakhaḷuṅke.\nTaṁ suṇātha, sādhukaṁ manasi karotha, bhāsissāmī”ti.\n“Evaṁ, bhante”ti kho te bhikkhū bhagavato paccassosuṁ.\nBhagavā etadavoca:","en":"“Mendicants, I will teach you about three wild colts and three wild people.\nListen and apply your mind well, I will speak.”\n“Yes, sir,” they replied.\nThe Buddha said this:"}},{"id":"an3.140:2","sourceIds":["an3.140:2.1","an3.140:2.2","an3.140:2.3","an3.140:2.4","an3.140:2.5"],"kind":"text","text":{"pi":"“Katame ca, bhikkhave, tayo assakhaḷuṅkā?\nIdha, bhikkhave, ekacco assakhaḷuṅko javasampanno hoti; na vaṇṇasampanno, na ārohapariṇāhasampanno.\nIdha pana, bhikkhave, ekacco assakhaḷuṅko javasampanno ca hoti vaṇṇasampanno ca; na ārohapariṇāhasampanno.\nIdha pana, bhikkhave, ekacco assakhaḷuṅko javasampanno ca hoti vaṇṇasampanno ca ārohapariṇāhasampanno ca.\nIme kho, bhikkhave, tayo assakhaḷuṅkā.","en":"“What are the three wild colts?\nOne wild colt is fast, but not beautiful or well proportioned.\nAnother wild colt is fast and beautiful, but not well proportioned.\nWhile another wild colt is fast, beautiful, and well proportioned.\nThese are the three wild colts."}},{"id":"an3.140:3","sourceIds":["an3.140:3.1","an3.140:3.2","an3.140:3.3","an3.140:3.4"],"kind":"text","text":{"pi":"Katame ca, bhikkhave, tayo purisakhaḷuṅkā?\nIdha, bhikkhave, ekacco purisakhaḷuṅko javasampanno hoti; na vaṇṇasampanno, na ārohapariṇāhasampanno.\nIdha pana, bhikkhave, ekacco purisakhaḷuṅko javasampanno ca hoti vaṇṇasampanno ca; na ārohapariṇāhasampanno.\nIdha pana, bhikkhave, ekacco purisakhaḷuṅko javasampanno ca hoti vaṇṇasampanno ca ārohapariṇāhasampanno ca.","en":"And what are the three wild people?\nOne wild person is fast, but not beautiful or well proportioned.\nAnother wild person is fast and beautiful, but not well proportioned.\nWhile another wild person is fast, beautiful, and well proportioned."}},{"id":"an3.140:4","sourceIds":["an3.140:4.1","an3.140:4.2","an3.140:4.3","an3.140:4.4","an3.140:4.5","an3.140:4.6","an3.140:4.7","an3.140:4.8"],"kind":"text","text":{"pi":"Kathañca, bhikkhave, purisakhaḷuṅko javasampanno hoti; na vaṇṇasampanno na ārohapariṇāhasampanno?\nIdha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.\nIdamassa javasmiṁ vadāmi.\nAbhidhamme kho pana abhivinaye pañhaṁ puṭṭho saṁsādeti, no vissajjeti.\nIdamassa na vaṇṇasmiṁ vadāmi.\nNa kho pana lābhī hoti cīvarapiṇḍapātasenāsanagilānappaccayabhesajjaparikkhārānaṁ.\nIdamassa na ārohapariṇāhasmiṁ vadāmi.\nEvaṁ kho, bhikkhave, purisakhaḷuṅko javasampanno hoti; na vaṇṇasampanno, na ārohapariṇāhasampanno.","en":"And how is a wild person fast, but not beautiful or well proportioned?\nIt’s when a mendicant truly understands: ‘This is suffering’ … ‘This is the origin of suffering’ … ‘This is the cessation of suffering’ … ‘This is the practice that leads to the cessation of suffering’.\nThis is how they’re fast, I say.\nBut when asked a question about the teaching or training, they falter without answering.\nThis is how they’re not beautiful, I say.\nAnd they don’t receive robes, almsfood, lodgings, and medicines and supplies for the sick.\nThis is how they’re not well proportioned, I say.\nThis is how a wild person is fast, but not beautiful or well proportioned."}},{"id":"an3.140:5","sourceIds":["an3.140:5.1","an3.140:5.2","an3.140:5.3","an3.140:5.4","an3.140:5.5","an3.140:5.6","an3.140:5.7","an3.140:5.8"],"kind":"text","text":{"pi":"Kathañca, bhikkhave, purisakhaḷuṅko javasampanno ca hoti vaṇṇasampanno ca; na ārohapariṇāhasampanno?\nIdha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.\nIdamassa javasmiṁ vadāmi.\nAbhidhamme kho pana abhivinaye pañhaṁ puṭṭho vissajjeti, no saṁsādeti.\nIdamassa vaṇṇasmiṁ vadāmi.\nNa pana lābhī hoti cīvarapiṇḍapātasenāsanagilānappaccayabhesajjaparikkhārānaṁ.\nIdamassa na ārohapariṇāhasmiṁ vadāmi.\nEvaṁ kho, bhikkhave, purisakhaḷuṅko javasampanno ca hoti vaṇṇasampanno ca; na ārohapariṇāhasampanno.","en":"And how is a wild person fast and beautiful, but not well proportioned?\nIt’s when a mendicant truly understands: ‘This is suffering’ … ‘This is the origin of suffering’ … ‘This is the cessation of suffering’ … ‘This is the practice that leads to the cessation of suffering’.\nThis is how they’re fast, I say.\nWhen asked a question about the teaching or training, they answer without faltering.\nThis is how they’re beautiful, I say.\nBut they don’t receive robes, almsfood, lodgings, and medicines and supplies for the sick.\nThis is how they’re not well proportioned, I say.\nThis is how a wild person is fast and beautiful, but not well proportioned."}},{"id":"an3.140:6","sourceIds":["an3.140:6.1","an3.140:6.2","an3.140:6.3","an3.140:6.4","an3.140:6.5","an3.140:6.6","an3.140:6.7","an3.140:6.8","an3.140:6.9","an3.140:6.10"],"kind":"text","text":{"pi":"Kathañca, bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca?\nIdha, bhikkhave, bhikkhu ‘idaṁ dukkhan’ti yathābhūtaṁ pajānāti …pe… ‘ayaṁ dukkhanirodhagāminī paṭipadā’ti yathābhūtaṁ pajānāti.\nIdamassa javasmiṁ vadāmi.\nAbhidhamme kho pana abhivinaye pañhaṁ puṭṭho vissajjeti, no saṁsādeti.\nIdamassa vaṇṇasmiṁ vadāmi.\nLābhī kho pana hoti cīvarapiṇḍapātasenāsanagilānappaccayabhesajjaparikkhārānaṁ.\nIdamassa ārohapariṇāhasmiṁ vadāmi.\nEvaṁ kho, bhikkhave, purisakhaḷuṅko javasampanno ca hoti vaṇṇasampanno ca ārohapariṇāhasampanno ca.\nIme kho, bhikkhave, tayo purisakhaḷuṅkā”ti.\nAṭṭhamaṁ.","en":"And how is a wild person fast, beautiful, and well proportioned?\nIt’s when a mendicant truly understands: ‘This is suffering’ … ‘This is the origin of suffering’ … ‘This is the cessation of suffering’ … ‘This is the practice that leads to the cessation of suffering’.\nThis is how they’re fast, I say.\nWhen asked a question about the teaching or training, they answer without faltering.\nThis is how they’re beautiful, I say.\nThey receive robes, almsfood, lodgings, and medicines and supplies for the sick.\nThis is how they’re well proportioned, I say.\nThis is how a wild person is fast, beautiful, and well proportioned.\nThese are the three wild people.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an3.140/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}