{"id":"an3.68","title":"Followers of Other Religions","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an3.68","title":"Followers of Other Religions","units":[{"id":"an3.68:0","sourceIds":["an3.68:0.1","an3.68:0.2","an3.68:0.3"],"kind":"text","text":{"pi":"Aṅguttara Nikāya 3.68\n7. Mahāvagga\nAññatitthiyasutta","en":"Numbered Discourses 3.68\n7. The Great Chapter\nFollowers of Other Religions"}},{"id":"an3.68:1","sourceIds":["an3.68:1.1","an3.68:1.2","an3.68:1.3","an3.68:1.4","an3.68:1.5","an3.68:1.6","an3.68:1.7","an3.68:1.8","an3.68:1.9","an3.68:1.10","an3.68:1.11"],"kind":"text","text":{"pi":"“Sace, bhikkhave, aññatitthiyā paribbājakā evaṁ puccheyyuṁ:\n‘tayome, āvuso, dhammā.\nKatame tayo?\nRāgo, doso, moho—\nime kho, āvuso, tayo dhammā.\nImesaṁ, āvuso, tiṇṇaṁ dhammānaṁ ko viseso ko adhippayāso kiṁ nānākaraṇan’ti?\nEvaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ kinti byākareyyāthā”ti?\n“Bhagavaṁmūlakā no, bhante, dhammā bhagavaṁnettikā bhagavaṁpaṭisaraṇā. Sādhu vata, bhante, bhagavantaṁyeva paṭibhātu etassa bhāsitassa attho. Bhagavato sutvā bhikkhū dhāressantī”ti.\n“Tena hi, bhikkhave, suṇātha, sādhukaṁ manasi karotha, bhāsissāmī”ti.\n“Evaṁ, bhante”ti kho te bhikkhū bhagavato paccassosuṁ.\nBhagavā etadavoca:","en":"“Mendicants, if wanderers of other religions were to ask:\n‘There are these three things.\nWhat three?\nGreed, hate, and delusion.\nThese are the three things.\nWhat’s the difference between them?’\nHow would you answer them?”\n“Our teachings are rooted in the Buddha. He is our guide and our refuge. Sir, may the Buddha himself please clarify the meaning of this. The mendicants will listen and remember it.”\n“Well then, mendicants, listen and apply your mind well, I will speak.”\n“Yes, sir,” they replied.\nThe Buddha said this:"}},{"id":"an3.68:2","sourceIds":["an3.68:2.1","an3.68:2.2","an3.68:2.3","an3.68:2.4","an3.68:2.5","an3.68:2.6","an3.68:2.7","an3.68:2.8"],"kind":"text","text":{"pi":"“Sace, bhikkhave, aññatitthiyā paribbājakā evaṁ puccheyyuṁ:\n‘tayome, āvuso, dhammā.\nKatame tayo?\nRāgo, doso, moho—\nime kho, āvuso, tayo dhammā;\nimesaṁ, āvuso, tiṇṇaṁ dhammānaṁ ko viseso ko adhippayāso kiṁ nānākaraṇan’ti?\nEvaṁ puṭṭhā tumhe, bhikkhave, tesaṁ aññatitthiyānaṁ paribbājakānaṁ evaṁ byākareyyātha:\n‘rāgo kho, āvuso, appasāvajjo dandhavirāgī, doso mahāsāvajjo khippavirāgī, moho mahāsāvajjo dandhavirāgī’ti.","en":"“Mendicants, if wanderers of other religions were to ask:\n‘There are these three things.\nWhat three?\nGreed, hate, and delusion.\nThese are the three things.\nWhat’s the difference between them?’\nYou should answer them:\n‘Greed, reverends, is mildly blameworthy, but slow to fade away. Hate is very blameworthy, but quick to fade away. Delusion is very blameworthy, and slow to fade away.’"}},{"id":"an3.68:3","sourceIds":["an3.68:3.1","an3.68:3.2","an3.68:3.3","an3.68:3.4"],"kind":"text","text":{"pi":"‘Ko panāvuso, hetu ko paccayo yena anuppanno vā rāgo uppajjati uppanno vā rāgo bhiyyobhāvāya vepullāya saṁvattatī’ti?\n‘“Subhanimittan”tissa vacanīyaṁ.\nTassa subhanimittaṁ ayoniso manasi karoto anuppanno vā rāgo uppajjati uppanno vā rāgo bhiyyobhāvāya vepullāya saṁvattati.\nAyaṁ kho, āvuso, hetu ayaṁ paccayo yena anuppanno vā rāgo uppajjati uppanno vā rāgo bhiyyobhāvāya vepullāya saṁvattatī’ti.","en":"And if they ask: ‘What is the cause, what is the reason why greed arises, and once arisen it increases and grows?’\nYou should say: ‘The feature of beauty.\nWhen you apply the mind irrationally to the feature of beauty, greed arises, and once arisen it increases and grows.\nThis is the cause, this is the reason why greed arises, and once arisen it increases and grows.’"}},{"id":"an3.68:4","sourceIds":["an3.68:4.1","an3.68:4.2","an3.68:4.3","an3.68:4.4"],"kind":"text","text":{"pi":"‘Ko panāvuso, hetu ko paccayo yena anuppanno vā doso uppajjati uppanno vā doso bhiyyobhāvāya vepullāya saṁvattatī’ti?\n‘“Paṭighanimittan”tissa vacanīyaṁ.\nTassa paṭighanimittaṁ ayoniso manasi karoto anuppanno vā doso uppajjati uppanno vā doso bhiyyobhāvāya vepullāya saṁvattati.\nAyaṁ kho, āvuso, hetu ayaṁ paccayo yena anuppanno vā doso uppajjati uppanno vā doso bhiyyobhāvāya vepullāya saṁvattatī’ti.","en":"And if they ask: ‘What is the cause, what is the reason why hate arises, and once arisen it increases and grows?’\nYou should say: ‘The feature of aversion.\nWhen you apply the mind irrationally to the feature of aversion, hate arises, and once arisen it increases and grows.\nThis is the cause, this is the reason why hate arises, and once arisen it increases and grows.’"}},{"id":"an3.68:5","sourceIds":["an3.68:5.1","an3.68:5.2","an3.68:5.3","an3.68:5.4"],"kind":"text","text":{"pi":"‘Ko panāvuso, hetu ko paccayo yena anuppanno vā moho uppajjati uppanno vā moho bhiyyobhāvāya vepullāya saṁvattatī’ti?\n‘“Ayoniso manasikāro”tissa vacanīyaṁ.\nTassa ayoniso manasi karoto anuppanno vā moho uppajjati uppanno vā moho bhiyyobhāvāya vepullāya saṁvattati.\nAyaṁ kho, āvuso, hetu ayaṁ paccayo yena anuppanno vā moho uppajjati uppanno vā moho bhiyyobhāvāya vepullāya saṁvattatī’ti.","en":"And if they ask: ‘What is the cause, what is the reason why delusion arises, and once arisen it increases and grows?’\nYou should say: ‘Irrational application of mind.\nWhen you apply the mind irrationally, delusion arises, and once arisen it increases and grows.\nThis is the cause, this is the reason why delusion arises, and once arisen it increases and grows.’"}},{"id":"an3.68:6","sourceIds":["an3.68:6.1","an3.68:6.2","an3.68:6.3","an3.68:6.4"],"kind":"text","text":{"pi":"‘Ko panāvuso, hetu ko paccayo yena anuppanno ceva rāgo nuppajjati uppanno ca rāgo pahīyatī’ti?\n‘“Asubhanimittan”tissa vacanīyaṁ.\nTassa asubhanimittaṁ yoniso manasi karoto anuppanno ceva rāgo nuppajjati uppanno ca rāgo pahīyati.\nAyaṁ kho, āvuso, hetu ayaṁ paccayo yena anuppanno ceva rāgo nuppajjati uppanno ca rāgo pahīyatī’ti.","en":"And if they ask, ‘What is the cause, what is the reason why greed doesn’t arise, or if it’s already arisen it’s given up?’\nYou should say: ‘The feature of ugliness.\nWhen you apply the mind rationally on the ugly feature of things, greed doesn’t arise, or if it’s already arisen it’s given up.\nThis is the cause, this is the reason why greed doesn’t arise, or if it’s already arisen it’s given up.’"}},{"id":"an3.68:7","sourceIds":["an3.68:7.1","an3.68:7.2","an3.68:7.3","an3.68:7.4"],"kind":"text","text":{"pi":"‘Ko panāvuso, hetu ko paccayo yena anuppanno ceva doso nuppajjati uppanno ca doso pahīyatī’ti?\n‘“Mettā cetovimuttī”tissa vacanīyaṁ.\nTassa mettaṁ cetovimuttiṁ yoniso manasi karoto anuppanno ceva doso nuppajjati uppanno ca doso pahīyati.\nAyaṁ kho, āvuso, hetu ayaṁ paccayo yena anuppanno ceva doso nuppajjati uppanno ca doso pahīyatī’ti.","en":"And if they ask, ‘What is the cause, what is the reason why hate doesn’t arise, or if it’s already arisen it’s given up?’\nYou should say: ‘The heart’s release by love.\nWhen you apply the mind rationally on the heart’s release by love, hate doesn’t arise, or if it’s already arisen it’s given up.\nThis is the cause, this is the reason why hate doesn’t arise, or if it’s already arisen it’s given up.’"}},{"id":"an3.68:8","sourceIds":["an3.68:8.1","an3.68:8.2","an3.68:8.3","an3.68:8.4","an3.68:8.5"],"kind":"text","text":{"pi":"‘Ko panāvuso, hetu ko paccayo yena anuppanno ceva moho nuppajjati uppanno ca moho pahīyatī’ti?\n‘“Yonisomanasikāro”tissa vacanīyaṁ.\nTassa yoniso manasi karoto anuppanno ceva moho nuppajjati uppanno ca moho pahīyati.\nAyaṁ kho, āvuso, hetu ayaṁ paccayo yena anuppanno vā moho nuppajjati uppanno ca moho pahīyatī’”ti.\nAṭṭhamaṁ.","en":"And if they ask, ‘What is the cause, what is the reason why delusion doesn’t arise, or if it’s already arisen it’s given up?’\nYou should say: ‘Rational application of mind.\nWhen you apply the mind rationally, delusion doesn’t arise, or if it’s already arisen it’s given up.\nThis is the cause, this is the reason why delusion doesn’t arise, or if it’s already arisen it’s given up.’”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an3.68/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}