{"id":"an3.99","title":"Jute","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an3.99","title":"Jute","units":[{"id":"an3.99:0","sourceIds":["an3.99:0.1","an3.99:0.2","an3.99:0.3"],"kind":"text","text":{"pi":"Aṅguttara Nikāya 3.99\n10. Loṇakapallavagga\nPotthakasutta","en":"Numbered Discourses 3.99\n10. A Lump of Salt\nJute"}},{"id":"an3.99:1","sourceIds":["an3.99:1.1","an3.99:1.2","an3.99:1.3","an3.99:1.4"],"kind":"text","text":{"pi":"“Navopi, bhikkhave, potthako dubbaṇṇo ca hoti dukkhasamphasso ca appaggho ca;\nmajjhimopi, bhikkhave, potthako dubbaṇṇo ca hoti dukkhasamphasso ca appaggho ca;\njiṇṇopi, bhikkhave, potthako dubbaṇṇo ca hoti dukkhasamphasso ca appaggho ca.\nJiṇṇampi, bhikkhave, potthakaṁ ukkhaliparimajjanaṁ vā karonti saṅkārakūṭe vā naṁ chaḍḍenti.","en":"“Jute canvas is ugly, unpleasant to touch, and worthless whether it’s new, worn in, or worn out.\nThey use worn out jute canvas for scrubbing cauldrons, or else they just throw it away on the rubbish heap."}},{"id":"an3.99:2","sourceIds":["an3.99:2.1","an3.99:2.2","an3.99:2.3","an3.99:2.4","an3.99:2.5","an3.99:2.6","an3.99:2.7","an3.99:2.8","an3.99:2.9","an3.99:2.10","an3.99:2.11","an3.99:2.12","an3.99:2.13","an3.99:2.14","an3.99:2.15","an3.99:2.16","an3.99:2.17","an3.99:2.18"],"kind":"text","text":{"pi":"Evamevaṁ kho, bhikkhave, navo cepi bhikkhu hoti dussīlo pāpadhammo.\nIdamassa dubbaṇṇatāya vadāmi.\nSeyyathāpi so, bhikkhave, potthako dubbaṇṇo tathūpamāhaṁ, bhikkhave, imaṁ puggalaṁ vadāmi.\nYe kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ ahitāya dukkhāya.\nIdamassa dukkhasamphassatāya vadāmi.\nSeyyathāpi so, bhikkhave, potthako dukkhasamphasso tathūpamāhaṁ, bhikkhave, imaṁ puggalaṁ vadāmi.\nYesaṁ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṁ, tesaṁ taṁ na mahapphalaṁ hoti na mahānisaṁsaṁ.\nIdamassa appagghatāya vadāmi.\nSeyyathāpi so, bhikkhave, potthako appaggho tathūpamāhaṁ, bhikkhave, imaṁ puggalaṁ vadāmi.\nMajjhimo cepi, bhikkhave, bhikkhu hoti …pe…\nthero cepi, bhikkhave, bhikkhu hoti dussīlo pāpadhammo, idamassa dubbaṇṇatāya vadāmi.\nSeyyathāpi so, bhikkhave, potthako dubbaṇṇo tathūpamāhaṁ, bhikkhave, imaṁ puggalaṁ vadāmi.\nYe kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ ahitāya dukkhāya.\nIdamassa dukkhasamphassatāya vadāmi.\nSeyyathāpi so, bhikkhave, potthako dukkhasamphasso tathūpamāhaṁ, bhikkhave, imaṁ puggalaṁ vadāmi.\nYesaṁ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṁ, tesaṁ taṁ na mahapphalaṁ hoti na mahānisaṁsaṁ.\nIdamassa appagghatāya vadāmi.\nSeyyathāpi so, bhikkhave, potthako appaggho tathūpamāhaṁ, bhikkhave, imaṁ puggalaṁ vadāmi.","en":"In the same way, if a junior mendicant is unethical, of bad character,\nthis is how they’re ugly, I say.\nThat individual is just as ugly as jute canvas.\nIf you associate with, accompany, and attend to them, following their example, it’ll be for your lasting harm and suffering.\nThis is how they’re unpleasant to touch, I say.\nThat individual is just as unpleasant to touch as jute canvas.\nAny robes, almsfood, lodgings, and medicines and supplies for the sick that they receive are not very fruitful or beneficial for the donor.\nThis is how they’re worthless, I say.\nThat individual is just as worthless as jute canvas.\nIf a middle mendicant is unethical, of bad character, this is how they’re ugly, I say. …\nIf a senior mendicant is unethical, of bad character, this is how they’re ugly, I say. …\nIf you associate with, accompany, and attend to them, following their example, it’ll be for your lasting harm and suffering. …"}},{"id":"an3.99:3","sourceIds":["an3.99:3.1","an3.99:3.2","an3.99:3.3","an3.99:3.4","an3.99:3.5"],"kind":"text","text":{"pi":"Evarūpo cāyaṁ, bhikkhave, thero bhikkhu saṅghamajjhe bhaṇati.\nTamenaṁ bhikkhū evamāhaṁsu:\n‘kiṁ nu kho tuyhaṁ bālassa abyattassa bhaṇitena,\ntvampi nāma bhaṇitabbaṁ maññasī’ti.\nSo kupito anattamano tathārūpiṁ vācaṁ nicchāreti yathārūpāya vācāya saṅgho taṁ ukkhipati, saṅkārakūṭeva naṁ potthakaṁ.","en":"If such a senior mendicant speaks among the Saṅgha,\nthe mendicants say:\n‘What’s an incompetent fool like you got to say?\nHow on earth could you imagine you’ve got something worth saying!’\nThey become angry and upset, and blurt out things that make the Saṅgha throw them out, as if they were throwing jute canvas away on the rubbish heap."}},{"id":"an3.99:4","sourceIds":["an3.99:4.1","an3.99:4.2"],"kind":"text","text":{"pi":"Navampi, bhikkhave, kāsikaṁ vatthaṁ vaṇṇavantañceva hoti sukhasamphassañca mahagghañca; majjhimampi, bhikkhave, kāsikaṁ vatthaṁ vaṇṇavantañceva hoti sukhasamphassañca mahagghañca; jiṇṇampi, bhikkhave, kāsikaṁ vatthaṁ vaṇṇavantañceva hoti sukhasamphassañca mahagghañca.\nJiṇṇampi, bhikkhave, kāsikaṁ vatthaṁ ratanapaliveṭhanaṁ vā karoti gandhakaraṇḍake vā naṁ pakkhipanti.","en":"Cloth from Kāsi is beautiful, pleasant to touch, and valuable whether it’s new, worn in, or worn out.\nThey use worn out cloth from Kāsi for wrapping, or else they place it in a fragrant casket."}},{"id":"an3.99:5","sourceIds":["an3.99:5.1","an3.99:5.2","an3.99:5.3","an3.99:5.4","an3.99:5.5","an3.99:5.6","an3.99:5.7","an3.99:5.8","an3.99:5.9","an3.99:5.10"],"kind":"text","text":{"pi":"Evamevaṁ kho, bhikkhave, navo cepi bhikkhu hoti sīlavā kalyāṇadhammo, idamassa suvaṇṇatāya vadāmi.\nSeyyathāpi taṁ, bhikkhave, kāsikaṁ vatthaṁ vaṇṇavantaṁ tathūpamāhaṁ, bhikkhave, imaṁ puggalaṁ vadāmi.\nYe kho panassa sevanti bhajanti payirupāsanti diṭṭhānugatiṁ āpajjanti, tesaṁ taṁ hoti dīgharattaṁ hitāya sukhāya.\nIdamassa sukhasamphassatāya vadāmi.\nSeyyathāpi taṁ, bhikkhave, kāsikaṁ vatthaṁ sukhasamphassaṁ tathūpamāhaṁ, bhikkhave, imaṁ puggalaṁ vadāmi.\nYesaṁ kho pana so paṭiggaṇhāti cīvarapiṇḍapātasenāsanagilānappaccayabhesajjaparikkhāraṁ, tesaṁ taṁ mahapphalaṁ hoti mahānisaṁsaṁ.\nIdamassa mahagghatāya vadāmi.\nSeyyathāpi taṁ, bhikkhave, kāsikaṁ vatthaṁ mahagghaṁ tathūpamāhaṁ, bhikkhave, imaṁ puggalaṁ vadāmi.\nMajjhimo cepi, bhikkhave, bhikkhu hoti …pe…\nthero cepi, bhikkhave, bhikkhu hoti …pe… puggalaṁ vadāmi.","en":"In the same way, if a junior mendicant is ethical, of good character, this is how they’re beautiful, I say.\nThat individual is just as beautiful as cloth from Kāsi.\nIf you associate with, accompany, and attend to such an individual, following their example, it will be for your lasting welfare and happiness.\nThis is how they’re pleasant to touch, I say.\nThat individual is just as pleasant to touch as cloth from Kāsi.\nAny robes, almsfood, lodgings, and medicines and supplies for the sick that they receive are very fruitful and beneficial for the donor.\nThis is how they’re valuable, I say.\nThat individual is just as valuable as cloth from Kāsi.\nIf a middle mendicant is ethical, of good character, this is how they’re beautiful, I say. …\nIf a senior mendicant is ethical, of good character, this is how they’re beautiful, I say. …"}},{"id":"an3.99:6","sourceIds":["an3.99:6.1","an3.99:6.2","an3.99:6.3","an3.99:6.4","an3.99:6.5","an3.99:6.6","an3.99:6.7"],"kind":"text","text":{"pi":"Evarūpo cāyaṁ, bhikkhave, thero bhikkhu saṅghamajjhe bhaṇati.\nTamenaṁ bhikkhū evamāhaṁsu:\n‘appasaddā āyasmanto hotha, thero bhikkhu dhammañca vinayañca bhaṇatī’ti.\nTasmātiha, bhikkhave, evaṁ sikkhitabbaṁ:\n‘kāsikavatthūpamā bhavissāma, na potthakūpamā’ti.\nEvañhi vo, bhikkhave, sikkhitabban”ti.\nAṭṭhamaṁ.","en":"If such a senior mendicant speaks in the midst of the Saṅgha,\nthe mendicants say:\n‘Venerables, be quiet! The senior mendicant is speaking on the teaching and training.’\nSo you should train like this:\n‘We will be like cloth from Kāsi, not like jute canvas.’\nThat’s how you should train.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an3.99/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}