{"id":"an4.123","title":"Difference (1st)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an4.123","title":"Difference (1st)","units":[{"id":"an4.123:0","sourceIds":["an4.123:0.1","an4.123:0.2","an4.123:0.3"],"kind":"text","text":{"pi":"Aṅguttara Nikāya 4.123\n13. Bhayavagga\nPaṭhamanānākaraṇasutta","en":"Numbered Discourses 4.123\n13. Fears\nDifference (1st)"}},{"id":"an4.123:1","sourceIds":["an4.123:1.1","an4.123:1.2","an4.123:1.3","an4.123:1.4","an4.123:1.5","an4.123:1.6","an4.123:1.7","an4.123:1.8","an4.123:1.9"],"kind":"text","text":{"pi":"“Cattārome, bhikkhave, puggalā santo saṁvijjamānā lokasmiṁ.\nKatame cattāro?\nIdha, bhikkhave, ekacco puggalo vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.\nSo tadassādeti, taṁ nikāmeti, tena ca vittiṁ āpajjati.\nTattha ṭhito tadadhimutto tabbahulavihārī aparihīno kālaṁ kurumāno brahmakāyikānaṁ devānaṁ sahabyataṁ upapajjati.\nBrahmakāyikānaṁ, bhikkhave, devānaṁ kappo āyuppamāṇaṁ.\nTattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.\nBhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.\nAyaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.","en":"“Mendicants, these four individuals are found in the world.\nWhat four?\nTake an individual who, quite secluded from sensual pleasures, secluded from unskillful qualities, enters and remains in the first absorption, which has the rapture and bliss born of seclusion, while placing the mind and keeping it connected.\nThey enjoy it and like it and find it rewarding.\nIf they abide in that, are committed to it, and meditate on it often without losing it, when they die they’re reborn in the company of the gods of the Divinity’s host.\nThe lifespan of the gods of the Divinity’s host is one eon.\nAn ordinary person stays there until the lifespan of those gods is spent, then they go to hell or the animal realm or the ghost realm.\nBut a disciple of the Buddha stays there until the lifespan of those gods is spent, then they’re extinguished in that very life.\nThis is the difference between a learned noble disciple and an unlearned ordinary person, that is, when there is a place of rebirth."}},{"id":"an4.123:2","sourceIds":["an4.123:2.1","an4.123:2.2","an4.123:2.3","an4.123:2.4","an4.123:2.5","an4.123:2.6","an4.123:2.7"],"kind":"text","text":{"pi":"Puna caparaṁ, bhikkhave, idhekacco puggalo vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati.\nSo tadassādeti, taṁ nikāmeti, tena ca vittiṁ āpajjati.\nTattha ṭhito tadadhimutto tabbahulavihārī aparihīno kālaṁ kurumāno ābhassarānaṁ devānaṁ sahabyataṁ upapajjati.\nĀbhassarānaṁ, bhikkhave, devānaṁ dve kappā āyuppamāṇaṁ.\nTattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.\nBhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.\nAyaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.","en":"Furthermore, take an individual who, as the placing of the mind and keeping it connected are stilled, enters and remains in the second absorption, which has the rapture and bliss born of immersion, with internal clarity and mind at one, without placing the mind and keeping it connected.\nThey enjoy it and like it and find it rewarding.\nIf they abide in that, are committed to it, and meditate on it often without losing it, when they die they’re reborn in the company of the gods of sublime luminosity.\nThe lifespan of the gods of sublime luminosity is two eons.\nAn ordinary person stays there until the lifespan of those gods is spent, then they go to hell or the animal realm or the ghost realm.\nBut a disciple of the Buddha stays there until the lifespan of those gods is spent, then they’re extinguished in that very life.\nThis is the difference between a learned noble disciple and an unlearned ordinary person, that is, when there is a place of rebirth."}},{"id":"an4.123:3","sourceIds":["an4.123:3.1","an4.123:3.2","an4.123:3.3","an4.123:3.4","an4.123:3.5","an4.123:3.6","an4.123:3.7"],"kind":"text","text":{"pi":"Puna caparaṁ, bhikkhave, idhekacco puggalo pītiyā ca virāgā upekkhako ca viharati sato ca sampajāno sukhañca kāyena paṭisaṁvedeti yaṁ taṁ ariyā ācikkhanti: ‘upekkhako satimā sukhavihārī’ti tatiyaṁ jhānaṁ upasampajja viharati.\nSo tadassādeti, taṁ nikāmeti, tena ca vittiṁ āpajjati.\nTattha ṭhito tadadhimutto tabbahulavihārī aparihīno, kālaṁ kurumāno subhakiṇhānaṁ devānaṁ sahabyataṁ upapajjati.\nSubhakiṇhānaṁ, bhikkhave, devānaṁ cattāro kappā āyuppamāṇaṁ.\nTattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.\nBhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.\nAyaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.","en":"Furthermore, take an individual who, with the fading away of rapture, enters and remains in the third absorption, where they meditate with equanimity, mindful and aware, experiencing for themselves the bliss of which the noble ones declare, ‘Equanimous and mindful, one meditates in bliss.’\nThey enjoy it and like it and find it rewarding.\nIf they abide in that, are committed to it, and meditate on it often without losing it, when they die they’re reborn in the company of the gods of universal beauty.\nThe lifespan of the gods of universal beauty is four eons.\nAn ordinary person stays there until the lifespan of those gods is spent, then they go to hell or the animal realm or the ghost realm.\nBut a disciple of the Buddha stays there until the lifespan of those gods is spent, then they’re extinguished in that very life.\nThis is the difference between a learned noble disciple and an unlearned ordinary person, that is, when there is a place of rebirth."}},{"id":"an4.123:4","sourceIds":["an4.123:4.1","an4.123:4.2","an4.123:4.3","an4.123:4.4","an4.123:4.5","an4.123:4.6","an4.123:4.7","an4.123:4.8","an4.123:4.9"],"kind":"text","text":{"pi":"Puna caparaṁ, bhikkhave, idhekacco puggalo sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.\nSo tadassādeti, taṁ nikāmeti, tena ca vittiṁ āpajjati.\nTattha ṭhito tadadhimutto tabbahulavihārī aparihīno kālaṁ kurumāno vehapphalānaṁ devānaṁ sahabyataṁ upapajjati.\nVehapphalānaṁ, bhikkhave, devānaṁ pañca kappasatāni āyuppamāṇaṁ.\nTattha puthujjano yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi gacchati tiracchānayonimpi gacchati pettivisayampi gacchati.\nBhagavato pana sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ taṁ sabbaṁ khepetvā tasmiṁyeva bhave parinibbāyati.\nAyaṁ kho, bhikkhave, viseso ayaṁ adhippayāso idaṁ nānākaraṇaṁ sutavato ariyasāvakassa assutavatā puthujjanena, yadidaṁ gatiyā upapattiyā sati.\nIme kho, bhikkhave, cattāro puggalā santo saṁvijjamānā lokasmin”ti.\nTatiyaṁ.","en":"Furthermore, take an individual who, with the giving up of pleasure and pain, and the disappearance of former happiness and sadness, enters and remains in the fourth absorption, without pleasure or pain, with pure equanimity and mindfulness.\nThey enjoy it and like it and find it rewarding.\nIf they abide in that, are committed to it, and meditate on it often without losing it, when they die they’re reborn in the company of the gods of abundant fruit.\nThe lifespan of the gods of abundant fruit is five hundred eons.\nAn ordinary person stays there until the lifespan of those gods is spent, then they go to hell or the animal realm or the ghost realm.\nBut a disciple of the Buddha stays there until the lifespan of those gods is spent, then they’re extinguished in that very life.\nThis is the difference between a learned noble disciple and an unlearned ordinary person, that is, when there is a place of rebirth.\nThese are the four individuals found in the world.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an4.123/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}