{"id":"an4.245","title":"The Benefits of Training","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an4.245","title":"The Benefits of Training","units":[{"id":"an4.245:0","sourceIds":["an4.245:0.1","an4.245:0.2","an4.245:0.3"],"kind":"text","text":{"pi":"Aṅguttara Nikāya 4.245\n25. Āpattibhayavagga\nSikkhānisaṁsasutta","en":"Numbered Discourses 4.245\n25. Perils of Offenses\nThe Benefits of Training"}},{"id":"an4.245:1","sourceIds":["an4.245:1.1","an4.245:1.2","an4.245:1.3","an4.245:1.4"],"kind":"text","text":{"pi":"“Sikkhānisaṁsamidaṁ, bhikkhave, brahmacariyaṁ vussati paññuttaraṁ vimuttisāraṁ satādhipateyyaṁ.\nKathañca, bhikkhave, sikkhānisaṁsaṁ hoti?\nIdha, bhikkhave, mayā sāvakānaṁ ābhisamācārikā sikkhā paññattā appasannānaṁ pasādāya pasannānaṁ bhiyyobhāvāya.\nYathā yathā, bhikkhave, mayā sāvakānaṁ ābhisamācārikā sikkhā paññattā appasannānaṁ pasādāya pasannānaṁ bhiyyobhāvāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.","en":"“Mendicants, this spiritual life is lived with training as its benefit, with wisdom as its overseer, with freedom as its core, and with mindfulness as its ruler.\nAnd how is training its benefit?\nFirstly, I laid down for my disciples the training that deals with supplementary regulations in order to inspire confidence in those without it and to increase confidence in those who have it.\nThey undertake whatever supplementary regulations I have laid down, keeping them intact, impeccable, spotless, and unmarred."}},{"id":"an4.245:2","sourceIds":["an4.245:2.1","an4.245:2.2","an4.245:2.3"],"kind":"text","text":{"pi":"Puna caparaṁ, bhikkhave, mayā sāvakānaṁ ādibrahmacariyikā sikkhā paññattā sabbaso sammā dukkhakkhayāya.\nYathā yathā, bhikkhave, mayā sāvakānaṁ ādibrahmacariyikā sikkhā paññattā sabbaso sammā dukkhakkhayāya tathā tathā so tassā sikkhāya akhaṇḍakārī hoti acchiddakārī asabalakārī akammāsakārī, samādāya sikkhati sikkhāpadesu.\nEvaṁ kho, bhikkhave, sikkhānisaṁsaṁ hoti.","en":"Furthermore, I laid down for my disciples the training that deals with the fundamentals of the spiritual life in order to rightly end suffering in every way.\nThey undertake whatever training that deals with the fundamentals of the spiritual life I have laid down, keeping it intact, impeccable, spotless, and unmarred.\nThat’s how training is its benefit."}},{"id":"an4.245:3","sourceIds":["an4.245:3.1","an4.245:3.2","an4.245:3.3","an4.245:3.4"],"kind":"text","text":{"pi":"Kathañca, bhikkhave, paññuttaraṁ hoti?\nIdha, bhikkhave, mayā sāvakānaṁ dhammā desitā sabbaso sammā dukkhakkhayāya.\nYathā yathā, bhikkhave, mayā sāvakānaṁ dhammā desitā sabbaso sammā dukkhakkhayāya tathā tathāssa te dhammā paññāya samavekkhitā honti.\nEvaṁ kho, bhikkhave, paññuttaraṁ hoti.","en":"And how is wisdom its overseer?\nI taught the Dhamma to my disciples in order to rightly end suffering in every way.\nThey examine with wisdom any teachings I taught them.\nThat’s how wisdom is its overseer."}},{"id":"an4.245:4","sourceIds":["an4.245:4.1","an4.245:4.2","an4.245:4.3","an4.245:4.4"],"kind":"text","text":{"pi":"Kathañca, bhikkhave, vimuttisāraṁ hoti?\nIdha, bhikkhave, mayā sāvakānaṁ dhammā desitā sabbaso sammā dukkhakkhayāya.\nYathā yathā, bhikkhave, mayā sāvakānaṁ dhammā desitā sabbaso sammā dukkhakkhayāya tathā tathāssa te dhammā vimuttiyā phusitā honti.\nEvaṁ kho, bhikkhave, vimuttisāraṁ hoti.","en":"And how is freedom its core?\nI taught the Dhamma to my disciples in order to rightly end suffering in every way.\nThey experience through freedom any teachings I taught them.\nThat’s how freedom is its core."}},{"id":"an4.245:5","sourceIds":["an4.245:5.1","an4.245:5.2","an4.245:5.3","an4.245:5.4","an4.245:5.5","an4.245:5.6","an4.245:5.7","an4.245:5.8","an4.245:5.9"],"kind":"text","text":{"pi":"Kathañca, bhikkhave, satādhipateyyaṁ hoti?\n‘Iti aparipūraṁ vā ābhisamācārikaṁ sikkhaṁ paripūressāmi, paripūraṁ vā ābhisamācārikaṁ sikkhaṁ tattha tattha paññāya anuggahessāmī’ti—ajjhattaṁyeva sati sūpaṭṭhitā hoti.\n‘Iti aparipūraṁ vā ādibrahmacariyikaṁ sikkhaṁ paripūressāmi, paripūraṁ vā ādibrahmacariyikaṁ sikkhaṁ tattha tattha paññāya anuggahessāmī’ti—ajjhattaṁyeva sati sūpaṭṭhitā hoti.\n‘Iti asamavekkhitaṁ vā dhammaṁ paññāya samavekkhissāmi, samavekkhitaṁ vā dhammaṁ tattha tattha paññāya anuggahessāmī’ti—ajjhattaṁyeva sati sūpaṭṭhitā hoti.\n‘Iti aphusitaṁ vā dhammaṁ vimuttiyā phusissāmi, phusitaṁ vā dhammaṁ tattha tattha paññāya anuggahessāmī’ti—ajjhattaṁyeva sati sūpaṭṭhitā hoti.\nEvaṁ kho, bhikkhave, satādhipateyyaṁ hoti.\n‘Sikkhānisaṁsamidaṁ, bhikkhave, brahmacariyaṁ vussati paññuttaraṁ vimuttisāraṁ satādhipateyyan’ti,\niti yaṁ taṁ vuttaṁ idametaṁ paṭicca vuttan”ti.\nTatiyaṁ.","en":"And how is mindfulness its ruler?\nMindfulness is well established in oneself: ‘In this way I’ll fulfill the training dealing with supplementary regulations, or support with wisdom in every situation the training dealing with supplementary regulations I’ve already fulfilled.’\nMindfulness is well established in oneself: ‘In this way I’ll fulfill the training dealing with the fundamentals of the spiritual life, or support with wisdom in every situation the training dealing with the fundamentals of the spiritual life I’ve already fulfilled.’\nMindfulness is well established in oneself: ‘In this way I’ll examine with wisdom the teaching that I haven’t yet examined, or support with wisdom in every situation the teaching I’ve already examined.’\nMindfulness is well established in oneself: ‘In this way I’ll experience through freedom the teaching that I haven’t yet experienced, or support with wisdom in every situation the teaching I’ve already experienced.’\nThat’s how mindfulness is its ruler.\n‘This spiritual life is lived with training as its benefit, with wisdom as its overseer, with freedom as its core, and with mindfulness as its ruler.’\nThat’s what I said, and this is why I said it.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an4.245/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}