{"id":"an4.46","title":"With Rohitassa (2nd)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an4.46","title":"With Rohitassa (2nd)","units":[{"id":"an4.46:0","sourceIds":["an4.46:0.1","an4.46:0.2","an4.46:0.3"],"kind":"text","text":{"pi":"Aṅguttara Nikāya 4.46\n5. Rohitassavagga\nDutiyarohitassasutta","en":"Numbered Discourses 4.46\n5. With Rohitassa\nWith Rohitassa (2nd)"}},{"id":"an4.46:1","sourceIds":["an4.46:1.1","an4.46:1.2","an4.46:1.3","an4.46:1.4","an4.46:1.5","an4.46:1.6","an4.46:1.7","an4.46:1.8","an4.46:1.9"],"kind":"text","text":{"pi":"Atha kho bhagavā tassā rattiyā accayena bhikkhū āmantesi:\n“imaṁ, bhikkhave, rattiṁ rohitasso devaputto abhikkantāya rattiyā abhikkantavaṇṇo kevalakappaṁ jetavanaṁ obhāsetvā yenāhaṁ tenupasaṅkami; upasaṅkamitvā maṁ abhivādetvā ekamantaṁ aṭṭhāsi. Ekamantaṁ ṭhito kho, bhikkhave, rohitasso devaputto maṁ etadavoca:\n‘yattha nu kho, bhante, na jāyati na jīyati na mīyati na cavati na upapajjati, sakkā nu kho so, bhante, gamanena lokassa anto ñātuṁ vā daṭṭhuṁ vā pāpuṇituṁ vā’ti?\nEvaṁ vutte, ahaṁ, bhikkhave, rohitassaṁ devaputtaṁ etadavocaṁ:\n‘yattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyanti vadāmī’ti.\nEvaṁ vutte, bhikkhave, rohitasso devaputto maṁ etadavoca:\n‘acchariyaṁ, bhante, abbhutaṁ, bhante.\nYāva subhāsitamidaṁ, bhante, bhagavatā—\nyattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyanti vadāmi’.","en":"Then, when the night had passed, the Buddha addressed the mendicants:\n“Tonight, the glorious godling Rohitassa, lighting up the entire Jeta’s Grove, came to me, bowed, stood to one side, and said to me:\n‘Sir, is it possible to know or see or reach the end of the world by traveling to a place where there’s no being born, growing old, dying, passing away, or being reborn?’ …”"}},{"id":"an4.46:2","sourceIds":["an4.46:2.1","an4.46:2.2","an4.46:2.3","an4.46:2.4","an4.46:2.5","an4.46:2.6"],"kind":"text","text":{"pi":"Bhūtapubbāhaṁ, bhante, rohitasso nāma isi ahosiṁ bhojaputto iddhimā vehāsaṅgamo.\nTassa mayhaṁ, bhante, evarūpo javo ahosi, seyyathāpi nāma daḷhadhammā dhanuggaho sikkhito katahattho katūpāsano lahukena asanena appakasirena tiriyaṁ tālacchāyaṁ atipāteyya.\nTassa mayhaṁ, bhante, evarūpo padavītihāro ahosi, seyyathāpi nāma puratthimā samuddā pacchimo samuddo.\nTassa mayhaṁ, bhante, evarūpena javena samannāgatassa evarūpena ca padavītihārena evarūpaṁ icchāgataṁ uppajji:\n‘ahaṁ gamanena lokassa antaṁ pāpuṇissāmī’ti.\nSo kho ahaṁ, bhante, aññatreva asitapītakhāyitasāyitā aññatra uccārapassāvakammā aññatra niddākilamathapaṭivinodanā vassasatāyuko vassasatajīvī vassasataṁ gantvā appatvāva lokassa antaṁ antarāyeva kālaṅkato."}},{"id":"an4.46:3","sourceIds":["an4.46:3.1","an4.46:3.2","an4.46:3.3","an4.46:3.4"],"kind":"text","text":{"pi":"Acchariyaṁ, bhante, abbhutaṁ, bhante.\nYāva subhāsitamidaṁ, bhante, bhagavatā:\n‘yattha kho, āvuso, na jāyati na jīyati na mīyati na cavati na upapajjati, nāhaṁ taṁ gamanena lokassa antaṁ ñāteyyaṁ daṭṭheyyaṁ patteyyanti vadāmī’ti.\nEvaṁ vutte, ahaṁ, bhikkhave, rohitassaṁ devaputtaṁ etadavocaṁ:"}},{"id":"an4.46:4","sourceIds":["an4.46:4.1","an4.46:4.2","an4.46:4.3"],"kind":"text","text":{"pi":"‘Yattha kho, āvuso, na jāyati na jīyati na mīyati na cavati na upapajjati, nāhaṁ, taṁ gamanena lokassa antaṁ ñāteyyaṁ daṭṭheyyaṁ patteyyanti vadāmī’ti.\nNa cāhaṁ, āvuso, appatvāva lokassa antaṁ dukkhassantakiriyaṁ vadāmi.\nApi cāhaṁ, āvuso, imasmiṁyeva byāmamatte kaḷevare sasaññimhi samanake lokañca paññāpemi lokasamudayañca lokanirodhañca lokanirodhagāminiñca paṭipadanti."}},{"id":"an4.46:5","sourceIds":["an4.46:5.1","an4.46:5.2","an4.46:5.3","an4.46:5.4"],"kind":"text","text":{"pi":"Gamanena na pattabbo,\nlokassanto kudācanaṁ;\nNa ca appatvā lokantaṁ,\ndukkhā atthi pamocanaṁ."}},{"id":"an4.46:6","sourceIds":["an4.46:6.1","an4.46:6.2","an4.46:6.3","an4.46:6.4","an4.46:6.5"],"kind":"text","text":{"pi":"Tasmā have lokavidū sumedho,\nLokantagū vusitabrahmacariyo;\nLokassa antaṁ samitāvi ñatvā,\nNāsīsatī lokamimaṁ parañcā”ti.\nChaṭṭhaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an4.46/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}