{"id":"an5.135","title":"Aspiration (1st)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an5.135","title":"Aspiration (1st)","units":[{"id":"an5.135:0","sourceIds":["an5.135:0.1","an5.135:0.2","an5.135:0.3"],"kind":"text","text":{"pi":"Aṅguttara Nikāya 5.135\n14. Rājavagga\nPaṭhamapatthanāsutta","en":"Numbered Discourses 5.135\n14. Kings\nAspiration (1st)"}},{"id":"an5.135:1","sourceIds":["an5.135:1.1","an5.135:1.2","an5.135:1.3","an5.135:1.4","an5.135:1.5","an5.135:1.6","an5.135:1.7"],"kind":"text","text":{"pi":"“Pañcahi, bhikkhave, aṅgehi samannāgato rañño khattiyassa muddhāvasittassa jeṭṭho putto rajjaṁ pattheti.\nKatamehi pañcahi?\nIdha, bhikkhave, rañño khattiyassa muddhāvasittassa jeṭṭho putto ubhato sujāto hoti mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena;\nabhirūpo hoti dassanīyo pāsādiko paramāya vaṇṇapokkharatāya samannāgato;\nmātāpitūnaṁ piyo hoti manāpo;\nnegamajānapadassa piyo hoti manāpo;\nyāni tāni raññaṁ khattiyānaṁ muddhāvasittānaṁ sippaṭṭhānāni hatthismiṁ vā assasmiṁ vā rathasmiṁ vā dhanusmiṁ vā tharusmiṁ vā tattha sikkhito hoti anavayo.","en":"“Mendicants, an anointed aristocratic king’s eldest son with five factors aspires to kingship.\nWhat five?\nIt’s when an anointed aristocratic king’s eldest son is well born on both his mother’s and father’s side, stemming from a clean vessel, with irrefutable and impeccable genealogy back to the seventh paternal generation.\nHe is attractive, good-looking, lovely, of surpassing beauty.\nHe is dear and beloved to his parents.\nHe is dear and beloved to the people of town and country.\nHe is trained and skilled in the arts of anointed aristocratic kings, such as elephant riding, horse riding, driving a chariot, archery, and swordsmanship."}},{"id":"an5.135:2","sourceIds":["an5.135:2.1","an5.135:2.2","an5.135:2.3","an5.135:2.4","an5.135:2.5","an5.135:2.6","an5.135:2.7","an5.135:2.8","an5.135:2.9","an5.135:2.10","an5.135:2.11","an5.135:2.12"],"kind":"text","text":{"pi":"Tassa evaṁ hoti:\n‘ahaṁ khomhi ubhato sujāto mātito ca pitito ca, saṁsuddhagahaṇiko, yāva sattamā pitāmahayugā akkhitto anupakkuṭṭho jātivādena.\nKasmāhaṁ rajjaṁ na pattheyyaṁ.\nAhaṁ khomhi abhirūpo dassanīyo pāsādiko paramāya vaṇṇapokkharatāya samannāgato.\nKasmāhaṁ rajjaṁ na pattheyyaṁ.\nAhaṁ khomhi mātāpitūnaṁ piyo manāpo.\nKasmāhaṁ rajjaṁ na pattheyyaṁ.\nAhaṁ khomhi negamajānapadassa piyo manāpo.\nKasmāhaṁ rajjaṁ na pattheyyaṁ.\nAhaṁ khomhi yāni tāni raññaṁ khattiyānaṁ muddhāvasittānaṁ sippaṭṭhānāni hatthismiṁ vā assasmiṁ vā rathasmiṁ vā dhanusmiṁ vā tharusmiṁ vā, tattha sikkhito anavayo.\nKasmāhaṁ rajjaṁ na pattheyyan’ti.\nImehi kho, bhikkhave, pañcahi aṅgehi samannāgato rañño khattiyassa muddhāvasittassa jeṭṭho putto rajjaṁ pattheti.","en":"He thinks:\n‘I’m well born on both my mother’s and father’s side, stemming from a clean vessel, with irrefutable and impeccable genealogy back to the seventh paternal generation.\nWhy shouldn’t I aspire to kingship?\nI’m attractive, good-looking, lovely, of surpassing beauty.\nWhy shouldn’t I aspire to kingship?\nI’m dear and beloved to my parents.\nWhy shouldn’t I aspire to kingship?\nI’m dear and beloved to the people of town and country.\nWhy shouldn’t I aspire to kingship?\nI’m trained and skilled in the arts of anointed aristocratic kings, such as elephant riding, horse riding, driving a chariot, archery, and swordsmanship.\nWhy shouldn’t I aspire to kingship?’\nAn anointed aristocratic king’s eldest son with these five factors aspires to kingship."}},{"id":"an5.135:3","sourceIds":["an5.135:3.1","an5.135:3.2","an5.135:3.3","an5.135:3.4","an5.135:3.5","an5.135:3.6","an5.135:3.7","an5.135:3.8"],"kind":"text","text":{"pi":"Evamevaṁ kho, bhikkhave, pañcahi dhammehi samannāgato bhikkhu āsavānaṁ khayaṁ pattheti.\nKatamehi pañcahi?\nIdha, bhikkhave, bhikkhu saddho hoti, saddahati tathāgatassa bodhiṁ:\n‘itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavā’ti.\nAppābādho hoti appātaṅko, samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya;\nasaṭho hoti amāyāvī, yathābhūtaṁ attānaṁ āvikattā satthari vā viññūsu vā sabrahmacārīsu;\nāraddhavīriyo viharati akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu;\npaññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.","en":"In the same way, a mendicant with five qualities aspires to end the defilements.\nWhat five?\nIt’s when a mendicant has faith in the Realized One’s awakening:\n‘That Blessed One is perfected, a fully awakened Buddha, accomplished in knowledge and conduct, holy, knower of the world, supreme guide for those fit for training, teacher of gods and humans, awakened, blessed.’\nThey are rarely ill or unwell. Their stomach digests well, being neither too hot nor too cold, but just right, and fit for meditation.\nThey’re not devious or deceitful. They reveal themselves honestly to the Teacher or sensible spiritual companions.\nThey live with energy roused up for giving up unskillful qualities and embracing skillful qualities. They’re strong, staunchly vigorous, not slacking off when it comes to developing skillful qualities.\nThey’re wise. They have the wisdom of arising and passing away which is noble, penetrative, and leads to the complete ending of suffering."}},{"id":"an5.135:4","sourceIds":["an5.135:4.1","an5.135:4.2","an5.135:4.3","an5.135:4.4","an5.135:4.5","an5.135:4.6","an5.135:4.7","an5.135:4.8","an5.135:4.9","an5.135:4.10","an5.135:4.11","an5.135:4.12","an5.135:4.13","an5.135:4.14"],"kind":"text","text":{"pi":"Tassa evaṁ hoti:\n‘ahaṁ khomhi saddho, saddahāmi tathāgatassa bodhiṁ:\n“itipi so bhagavā arahaṁ sammāsambuddho …pe… satthā devamanussānaṁ buddho bhagavā”ti.\nKasmāhaṁ āsavānaṁ khayaṁ na pattheyyaṁ.\nAhaṁ khomhi appābādho appātaṅko samavepākiniyā gahaṇiyā samannāgato nātisītāya nāccuṇhāya majjhimāya padhānakkhamāya.\nKasmāhaṁ āsavānaṁ khayaṁ na pattheyyaṁ.\nAhaṁ khomhi asaṭho amāyāvī yathābhūtaṁ attānaṁ āvikattā satthari vā viññūsu vā sabrahmacārīsu.\nKasmāhaṁ āsavānaṁ khayaṁ na pattheyyaṁ.\nAhaṁ khomhi āraddhavīriyo viharāmi akusalānaṁ dhammānaṁ pahānāya, kusalānaṁ dhammānaṁ upasampadāya, thāmavā daḷhaparakkamo anikkhittadhuro kusalesu dhammesu.\nKasmāhaṁ āsavānaṁ khayaṁ na pattheyyaṁ.\nAhaṁ khomhi paññavā udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.\nKasmāhaṁ āsavānaṁ khayaṁ na pattheyyan’ti.\nImehi kho, bhikkhave, pañcahi dhammehi samannāgato bhikkhu āsavānaṁ khayaṁ patthetī”ti.\nPañcamaṁ.","en":"They think:\n‘I am a person of faith; I have faith in the Realized One’s awakening …\nWhy shouldn’t I aspire to end the defilements?\nI’m rarely ill or unwell. My stomach digests well, being neither too hot nor too cold, but just right, and fit for meditation.\nWhy shouldn’t I aspire to end the defilements?\nI’m not devious or deceitful. I reveal myself honestly to the Teacher or sensible spiritual companions.\nWhy shouldn’t I aspire to end the defilements?\nI live with energy roused up for giving up unskillful qualities and embracing skillful qualities. I’m strong, staunchly vigorous, not slacking off when it comes to developing skillful qualities.\nWhy shouldn’t I aspire to end the defilements?\nI’m wise. I have the wisdom of arising and passing away which is noble, penetrative, and leads to the complete ending of suffering.\nWhy shouldn’t I aspire to end the defilements?’\nA mendicant with these five qualities aspires to end the defilements.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an5.135/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}