{"id":"an5.166","title":"Cessation","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an5.166","title":"Cessation","units":[{"id":"an5.166:0","sourceIds":["an5.166:0.1","an5.166:0.2","an5.166:0.3"],"kind":"text","text":{"pi":"Aṅguttara Nikāya 5.166\n17. Āghātavagga\nNirodhasutta","en":"Numbered Discourses 5.166\n17. Resentment\nCessation"}},{"id":"an5.166:1","sourceIds":["an5.166:1.1","an5.166:1.2","an5.166:1.3","an5.166:1.4","an5.166:1.5"],"kind":"text","text":{"pi":"Tatra kho āyasmā sāriputto bhikkhū āmantesi …pe…\n“idhāvuso, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānaṁ.\nNo ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānan”ti.","en":"There Venerable Sāriputta addressed the mendicants:\n“Reverends, take a mendicant who is accomplished in ethics, immersion, and wisdom. They might enter into and emerge from the cessation of perception and feeling.\nThat is possible.\nIf they don’t reach enlightenment in this very life, then, surpassing the company of gods that consume edible food, they’re reborn in a certain host of mind-made gods. There they might enter into and emerge from the cessation of perception and feeling.\nThat is possible.”"}},{"id":"an5.166:2","sourceIds":["an5.166:2.1","an5.166:2.2","an5.166:2.3"],"kind":"text","text":{"pi":"Evaṁ vutte, āyasmā udāyī āyasmantaṁ sāriputtaṁ etadavoca:\n“aṭṭhānaṁ kho etaṁ, āvuso sāriputta, anavakāso yaṁ so bhikkhu atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—\nnatthetaṁ ṭhānan”ti.","en":"When he said this, Venerable Udāyī said to him,\n“This is not possible, Reverend Sāriputta, it cannot happen!”"}},{"id":"an5.166:3","sourceIds":["an5.166:3.1","an5.166:3.2","an5.166:3.3","an5.166:3.4","an5.166:3.5"],"kind":"text","text":{"pi":"Dutiyampi kho …pe… tatiyampi kho āyasmā sāriputto bhikkhū āmantesi:\n“idhāvuso, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānaṁ.\nNo ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānan”ti.","en":"But for a second … and a third time Sāriputta repeated his statement."}},{"id":"an5.166:4","sourceIds":["an5.166:4.1","an5.166:4.2","an5.166:4.3"],"kind":"text","text":{"pi":"Tatiyampi kho āyasmā udāyī āyasmantaṁ sāriputtaṁ etadavoca:\n“aṭṭhānaṁ kho etaṁ, āvuso sāriputta, anavakāso yaṁ so bhikkhu atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—\nnatthetaṁ ṭhānan”ti.","en":"And for a third time, Udāyī said to him,\n“This is not possible, Reverend Sāriputta, it cannot happen!”"}},{"id":"an5.166:5","sourceIds":["an5.166:5.1","an5.166:5.2","an5.166:5.3","an5.166:5.4","an5.166:5.5","an5.166:5.6","an5.166:5.7","an5.166:5.8","an5.166:5.9"],"kind":"text","text":{"pi":"Atha kho āyasmato sāriputtassa etadahosi:\n“yāvatatiyakampi kho me āyasmā udāyī paṭikkosati, na ca me koci bhikkhu anumodati.\nYannūnāhaṁ yena bhagavā tenupasaṅkameyyan”ti.\nAtha kho āyasmā sāriputto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi.\nEkamantaṁ nisinno kho āyasmā sāriputto bhikkhū āmantesi:\n“idhāvuso, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānaṁ.\nNo ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānan”ti.","en":"Then Venerable Sāriputta thought,\n“Venerable Udāyī disagrees with me three times, and not one mendicant agrees with me.\nWhy don’t I go to see the Buddha?”\nThen Sāriputta went up to the Buddha, bowed, sat down to one side,\nand said to the mendicants:\n“Reverends, take a mendicant who is accomplished in ethics, immersion, and wisdom. They might enter into and emerge from the cessation of perception and feeling.\nThat is possible.\nIf they don’t reach enlightenment in this very life, they’re reborn in the company of a certain host of mind-made gods, who surpass the gods that consume edible food. There they might enter into and emerge from the cessation of perception and feeling.\nThat is possible.”"}},{"id":"an5.166:6","sourceIds":["an5.166:6.1","an5.166:6.2","an5.166:6.3"],"kind":"text","text":{"pi":"Evaṁ vutte, āyasmā udāyī āyasmantaṁ sāriputtaṁ etadavoca:\n“aṭṭhānaṁ kho etaṁ, āvuso sāriputta, anavakāso yaṁ so bhikkhu atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—\nnatthetaṁ ṭhānan”ti.","en":"When he said this, Udāyī said to him,\n“This is not possible, Reverend Sāriputta, it cannot happen!”"}},{"id":"an5.166:7","sourceIds":["an5.166:7.1","an5.166:7.2","an5.166:7.3","an5.166:7.4","an5.166:7.5"],"kind":"text","text":{"pi":"Dutiyampi kho …pe… tatiyampi kho āyasmā sāriputto bhikkhū āmantesi:\n“idhāvuso, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānaṁ.\nNo ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānan”ti.","en":"But for a second … and a third time Sāriputta repeated his statement."}},{"id":"an5.166:8","sourceIds":["an5.166:8.1","an5.166:8.2","an5.166:8.3"],"kind":"text","text":{"pi":"Tatiyampi kho āyasmā udāyī āyasmantaṁ sāriputtaṁ etadavoca:\n“aṭṭhānaṁ kho etaṁ, āvuso sāriputta, anavakāso yaṁ so bhikkhu atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—\nnatthetaṁ ṭhānan”ti.","en":"And for a third time, Udāyī said to him,\n“This is not possible, Reverend Sāriputta, it cannot happen!”"}},{"id":"an5.166:9","sourceIds":["an5.166:9.1","an5.166:9.2","an5.166:9.3","an5.166:9.4"],"kind":"text","text":{"pi":"Atha kho āyasmato sāriputtassa etadahosi:\n“bhagavatopi kho me sammukhā āyasmā udāyī yāvatatiyakaṁ paṭikkosati, na ca me koci bhikkhu anumodati.\nYannūnāhaṁ tuṇhī assan”ti.\nAtha kho āyasmā sāriputto tuṇhī ahosi.","en":"Then Venerable Sāriputta thought,\n“Even in front of the Buddha Venerable Udāyī disagrees with me three times, and not one mendicant agrees with me.\nI’d better stay silent.”\nThen Sāriputta fell silent."}},{"id":"an5.166:10","sourceIds":["an5.166:10.1","an5.166:10.2","an5.166:10.3","an5.166:10.4","an5.166:10.5"],"kind":"text","text":{"pi":"Atha kho bhagavā āyasmantaṁ udāyiṁ āmantesi:\n“kaṁ pana tvaṁ, udāyi, manomayaṁ kāyaṁ paccesī”ti?\n“Ye te, bhante, devā arūpino saññāmayā”ti.\n“Kiṁ nu kho tuyhaṁ, udāyi, bālassa abyattassa bhaṇitena.\nTvampi nāma bhaṇitabbaṁ maññasī”ti.","en":"Then the Buddha said to Venerable Udāyī,\n“But Udāyī, do you believe in a mind-made body?”\n“For those gods, sir, who are formless, made of perception.”\n“Udāyī, what has an incompetent fool like you got to say?\nHow on earth could you imagine you’ve got something worth saying!”"}},{"id":"an5.166:11","sourceIds":["an5.166:11.1","an5.166:11.2","an5.166:11.3"],"kind":"text","text":{"pi":"Atha kho bhagavā āyasmantaṁ ānandaṁ āmantesi:\n“atthi nāma, ānanda, theraṁ bhikkhuṁ vihesiyamānaṁ ajjhupekkhissatha.\nNa hi nāma, ānanda, kāruññampi bhavissati theramhi bhikkhumhi vihesiyamānamhī”ti.","en":"Then the Buddha said to Venerable Ānanda,\n“Ānanda! How can you just watch while a senior mendicant is being harassed?\nDon’t you have any compassion for a senior mendicant who is being harassed?”"}},{"id":"an5.166:12","sourceIds":["an5.166:12.1","an5.166:12.2","an5.166:12.3","an5.166:12.4","an5.166:12.5","an5.166:12.6","an5.166:12.7"],"kind":"text","text":{"pi":"Atha kho bhagavā bhikkhū āmantesi:\n“idha, bhikkhave, bhikkhu sīlasampanno samādhisampanno paññāsampanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānaṁ.\nNo ce diṭṭheva dhamme aññaṁ ārādheyya, atikkammeva kabaḷīkārāhārabhakkhānaṁ devānaṁ sahabyataṁ aññataraṁ manomayaṁ kāyaṁ upapanno saññāvedayitanirodhaṁ samāpajjeyyāpi vuṭṭhaheyyāpi—\natthetaṁ ṭhānan”ti.\nIdamavoca bhagavā.\nIdaṁ vatvāna sugato uṭṭhāyāsanā vihāraṁ pāvisi.","en":"Then the Buddha addressed the mendicants:\n“Mendicants, take a mendicant who is accomplished in ethics, immersion, and wisdom. They might enter into and emerge from the cessation of perception and feeling.\nThat is possible.\nIf they don’t reach enlightenment in this very life, they’re reborn in the company of a certain host of mind-made gods, who surpass the gods that consume edible food. There they might enter into and emerge from the cessation of perception and feeling.\nThat is possible.”\nThat is what the Buddha said.\nWhen he had spoken, the Holy One rose from his seat and entered his dwelling."}},{"id":"an5.166:13","sourceIds":["an5.166:13.1","an5.166:13.2","an5.166:13.3","an5.166:13.4","an5.166:13.5","an5.166:13.6"],"kind":"text","text":{"pi":"Atha kho āyasmā ānando acirapakkantassa bhagavato yenāyasmā upavāṇo tenupasaṅkami; upasaṅkamitvā āyasmantaṁ upavāṇaṁ etadavoca:\n“idhāvuso upavāṇa, aññe there bhikkhū vihesenti.\nMayaṁ tena na muccāma.\nAnacchariyaṁ kho, panetaṁ āvuso upavāṇa, yaṁ bhagavā sāyanhasamayaṁ paṭisallānā vuṭṭhito etadeva ārabbha udāhareyya yathā āyasmantaṁyevettha upavāṇaṁ paṭibhāseyya.\nIdāneva amhākaṁ sārajjaṁ okkantan”ti.\nAtha kho bhagavā sāyanhasamayaṁ paṭisallānā vuṭṭhito yena upaṭṭhānasālā tenupasaṅkami; upasaṅkamitvā paññatte āsane nisīdi. Nisajja kho bhagavā āyasmantaṁ upavāṇaṁ etadavoca:","en":"Then, not long after the Buddha had left, Venerable Ānanda went to Venerable Upavāṇa and said to him,\n“Reverend Upavāṇa, they’ve been harassing other senior mendicants,\nbut I didn’t question them.\nI wouldn’t be surprised if the Buddha brings this up when he comes out of retreat later this afternoon. He might even call upon Venerable Upavāṇa himself.\nAnd right now I feel insecure.”\nThen in the late afternoon, the Buddha came out of retreat and went to the assembly hall. He sat down on the seat spread out and said to Upavāṇa,"}},{"id":"an5.166:14","sourceIds":["an5.166:14.1","an5.166:14.2","an5.166:14.3","an5.166:14.4","an5.166:14.5","an5.166:14.6","an5.166:14.7","an5.166:14.8","an5.166:14.9"],"kind":"text","text":{"pi":"“Katihi nu kho, upavāṇa, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti?\n“Pañcahi, bhante, dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.\nKatamehi pañcahi?\nIdha, bhante, thero bhikkhu sīlavā hoti …pe… samādāya sikkhati sikkhāpadesu;\nbahussuto hoti …pe… diṭṭhiyā suppaṭividdhā;\nkalyāṇavāco hoti kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā;\ncatunnaṁ jhānānaṁ ābhicetasikānaṁ diṭṭhadhammasukhavihārānaṁ nikāmalābhī hoti akicchalābhī akasiralābhī;\nāsavānaṁ khayā …pe… sacchikatvā upasampajja viharati.\nImehi kho, bhante, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo cā”ti.","en":"“Upavāṇa, how many qualities should a senior mendicant have to be dear and beloved to their spiritual companions, respected and admired?”\n“Sir, a senior mendicant with five qualities is dear and beloved to their spiritual companions, respected and admired.\nWhat five?\nIt’s when a mendicant is ethical, restrained in the monastic code, conducting themselves well and resorting for alms in suitable places. Seeing danger in the slightest fault, they keep the rules they’ve undertaken.\nThey’re very learned, remembering and keeping what they’ve learned. These teachings are good in the beginning, good in the middle, and good in the end, meaningful and well-phrased, describing a spiritual practice that’s totally full and pure. They are very learned in such teachings, remembering them, reciting them, mentally scrutinizing them, and penetrating them theoretically.\nThey’re a good speaker who enunciates well, with a polished, clear, and articulate voice that expresses the meaning.\nThey get the four absorptions—blissful meditations in this life that belong to the higher mind—when they want, without trouble or difficulty.\nThey realize the undefiled freedom of heart and freedom by wisdom. And they live having realized it with their own insight in this very life due to the ending of defilements.\nA senior mendicant with these five qualities is dear and beloved to their spiritual companions, respected and admired.”"}},{"id":"an5.166:15","sourceIds":["an5.166:15.1","an5.166:15.2","an5.166:15.3","an5.166:15.4","an5.166:15.5"],"kind":"text","text":{"pi":"“Sādhu sādhu, upavāṇa.\nImehi kho, upavāṇa, pañcahi dhammehi samannāgato thero bhikkhu sabrahmacārīnaṁ piyo ca hoti manāpo ca garu ca bhāvanīyo ca.\nIme ce, upavāṇa, pañca dhammā therassa bhikkhuno na saṁvijjeyyuṁ, taṁ sabrahmacārī na sakkareyyuṁ na garuṁ kareyyuṁ na māneyyuṁ na pūjeyyuṁ khaṇḍiccena pāliccena valittacatāya.\nYasmā ca kho, upavāṇa, ime pañca dhammā therassa bhikkhuno saṁvijjanti, tasmā taṁ sabrahmacārī sakkaronti garuṁ karonti mānenti pūjentī”ti.\nChaṭṭhaṁ.","en":"“Good, good, Upavāṇa!\nA senior mendicant with these five qualities is dear and beloved to their spiritual companions, respected and admired.\nIf these five qualities are not found in a senior mendicant, why would their spiritual companions honor, respect, revere, or venerate them? Because of their broken teeth, gray hair, and wrinkled skin?\nBut since these five qualities are found in a senior mendicant, their spiritual companions honor, respect, revere, or venerate them.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an5.166/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}