{"id":"an5.72","title":"Freedom of Heart is the Fruit (2nd)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an5.72","title":"Freedom of Heart is the Fruit (2nd)","units":[{"id":"an5.72:0","sourceIds":["an5.72:0.1","an5.72:0.2","an5.72:0.3"],"kind":"text","text":{"pi":"Aṅguttara Nikāya 5.72\n8. Yodhājīvavagga\nDutiyacetovimuttiphalasutta","en":"Numbered Discourses 5.72\n8. Warriors\nFreedom of Heart is the Fruit (2nd)"}},{"id":"an5.72:1","sourceIds":["an5.72:1.1","an5.72:1.2","an5.72:1.3","an5.72:1.4","an5.72:1.5","an5.72:1.6"],"kind":"text","text":{"pi":"“Pañcime, bhikkhave, dhammā bhāvitā bahulīkatā cetovimuttiphalā ca honti cetovimuttiphalānisaṁsā ca, paññāvimuttiphalā ca honti paññāvimuttiphalānisaṁsā ca.\nKatame pañca?\nAniccasaññā, anicce dukkhasaññā, dukkhe anattasaññā, pahānasaññā, virāgasaññā—\nime kho, bhikkhave, pañca dhammā bhāvitā bahulīkatā cetovimuttiphalā ca honti cetovimuttiphalānisaṁsā ca, paññāvimuttiphalā ca honti paññāvimuttiphalānisaṁsā ca.\nYato kho, bhikkhave, bhikkhu cetovimutto ca hoti paññāvimutto ca—\nayaṁ vuccati, bhikkhave, ‘bhikkhu ukkhittapaligho itipi, saṅkiṇṇaparikho itipi, abbūḷhesiko itipi, niraggaḷo itipi, ariyo pannaddhajo pannabhāro visaṁyutto itipi’”.","en":"“Mendicants, these five things, when developed and cultivated, have freedom of heart and freedom by wisdom as their fruit and benefit.\nWhat five?\nThe perception of impermanence, the perception of suffering in impermanence, the perception of not-self in suffering, the perception of giving up, and the perception of fading away.\nThese five things, when developed and cultivated, have freedom of heart and freedom by wisdom as their fruit and benefit.\nWhen a mendicant has freedom of heart and freedom by wisdom,\nsuch a mendicant is one who is called ‘one who has lifted the cross-bar’, ‘one who has filled in the moat’, ‘one who has pulled up the pillar’, ‘one who is unimpeded’, and also ‘a noble one with banner lowered and burden dropped, detached’. …”"}},{"id":"an5.72:2","sourceIds":["an5.72:2.1","an5.72:2.2","an5.72:2.3"],"kind":"text","text":{"pi":"“Kathañca, bhikkhave, bhikkhu ukkhittapaligho hoti?\nIdha, bhikkhave, bhikkhuno avijjā pahīnā hoti ucchinnamūlā tālāvatthukatā anabhāvaṅkatā āyatiṁ anuppādadhammā.\nEvaṁ kho, bhikkhave, bhikkhu ukkhittapaligho hoti."}},{"id":"an5.72:3","sourceIds":["an5.72:3.1","an5.72:3.2","an5.72:3.3"],"kind":"text","text":{"pi":"Kathañca, bhikkhave, bhikkhu saṅkiṇṇaparikho hoti?\nIdha, bhikkhave, bhikkhuno ponobhaviko jātisaṁsāro pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.\nEvaṁ kho, bhikkhave, bhikkhu saṅkiṇṇaparikho hoti."}},{"id":"an5.72:4","sourceIds":["an5.72:4.1","an5.72:4.2","an5.72:4.3"],"kind":"text","text":{"pi":"Kathañca, bhikkhave, bhikkhu abbūḷhesiko hoti?\nIdha, bhikkhave, bhikkhuno taṇhā pahīnā hoti ucchinnamūlā tālāvatthukatā anabhāvaṅkatā āyatiṁ anuppādadhammā.\nEvaṁ kho, bhikkhave, bhikkhu abbūḷhesiko hoti."}},{"id":"an5.72:5","sourceIds":["an5.72:5.1","an5.72:5.2","an5.72:5.3"],"kind":"text","text":{"pi":"Kathañca, bhikkhave, bhikkhu niraggaḷo hoti?\nIdha, bhikkhave, bhikkhuno pañcorambhāgiyāni saṁyojanāni pahīnāni honti ucchinnamūlāni tālāvatthukatāni anabhāvaṅkatāni āyatiṁ anuppādadhammāni.\nEvaṁ kho, bhikkhave, bhikkhu niraggaḷo hoti."}},{"id":"an5.72:6","sourceIds":["an5.72:6.1","an5.72:6.2","an5.72:6.3","an5.72:6.4"],"kind":"text","text":{"pi":"Kathañca, bhikkhave, bhikkhu ariyo pannaddhajo pannabhāro visaṁyutto hoti?\nIdha, bhikkhave, bhikkhuno asmimāno pahīno hoti ucchinnamūlo tālāvatthukato anabhāvaṅkato āyatiṁ anuppādadhammo.\nEvaṁ kho, bhikkhave, bhikkhu ariyo pannaddhajo pannabhāro visaṁyutto hotī”ti.\nDutiyaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an5.72/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}