{"id":"an5.76","title":"Warriors (2nd)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an5.76","title":"Warriors (2nd)","units":[{"id":"an5.76:0","sourceIds":["an5.76:0.1","an5.76:0.2","an5.76:0.3"],"kind":"text","text":{"pi":"Aṅguttara Nikāya 5.76\n8. Yodhājīvavagga\nDutiyayodhājīvasutta","en":"Numbered Discourses 5.76\n8. Warriors\nWarriors (2nd)"}},{"id":"an5.76:1","sourceIds":["an5.76:1.1","an5.76:1.2","an5.76:1.3","an5.76:1.4","an5.76:1.5","an5.76:1.6","an5.76:1.7"],"kind":"text","text":{"pi":"“Pañcime, bhikkhave, yodhājīvā santo saṁvijjamānā lokasmiṁ.\nKatame pañca?\nIdha, bhikkhave, ekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.\nSo tasmiṁ saṅgāme ussahati vāyamati.\nTamenaṁ ussahantaṁ vāyamantaṁ pare hananti pariyāpādenti.\nEvarūpopi, bhikkhave, idhekacco yodhājīvo hoti.\nAyaṁ, bhikkhave, paṭhamo yodhājīvo santo saṁvijjamāno lokasmiṁ.","en":"“Mendicants, these five warriors are found in the world.\nWhat five?\nFirstly, one warrior dons his sword and shield, fastens his bow and arrows, and plunges into the thick of battle.\nHe strives and struggles in the battle,\nbut his foes kill him and finish him off.\nSome warriors are like that.\nThis is the first warrior found in the world."}},{"id":"an5.76:2","sourceIds":["an5.76:2.1","an5.76:2.2","an5.76:2.3","an5.76:2.4","an5.76:2.5","an5.76:2.6","an5.76:2.7"],"kind":"text","text":{"pi":"Puna caparaṁ, bhikkhave, idhekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.\nSo tasmiṁ saṅgāme ussahati vāyamati.\nTamenaṁ ussahantaṁ vāyamantaṁ pare upalikkhanti, tamenaṁ apanenti;\napanetvā ñātakānaṁ nenti.\nSo ñātakehi nīyamāno appatvāva ñātake antarāmagge kālaṁ karoti.\nEvarūpopi, bhikkhave, idhekacco yodhājīvo hoti.\nAyaṁ, bhikkhave, dutiyo yodhājīvo santo saṁvijjamāno lokasmiṁ.","en":"Furthermore, one warrior dons his sword and shield, fastens his bow and arrows, and plunges into the thick of battle.\nHe strives and struggles in the battle,\nbut his foes wound him.\nHe’s carried off and taken to his relatives,\nbut he dies on the road before he reaches them.\nSome warriors are like that.\nThis is the second warrior found in the world."}},{"id":"an5.76:3","sourceIds":["an5.76:3.1","an5.76:3.2","an5.76:3.3","an5.76:3.4","an5.76:3.5","an5.76:3.6","an5.76:3.7","an5.76:3.8"],"kind":"text","text":{"pi":"Puna caparaṁ, bhikkhave, idhekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.\nSo tasmiṁ saṅgāme ussahati vāyamati.\nTamenaṁ ussahantaṁ vāyamantaṁ pare upalikkhanti, tamenaṁ apanenti;\napanetvā ñātakānaṁ nenti.\nTamenaṁ ñātakā upaṭṭhahanti paricaranti.\nSo ñātakehi upaṭṭhahiyamāno paricariyamāno teneva ābādhena kālaṁ karoti.\nEvarūpopi, bhikkhave, idhekacco yodhājīvo hoti.\nAyaṁ, bhikkhave, tatiyo yodhājīvo santo saṁvijjamāno lokasmiṁ.","en":"Furthermore, one warrior dons his sword and shield, fastens his bow and arrows, and plunges into the thick of battle.\nHe strives and struggles in the battle,\nbut his foes wound him.\nHe’s carried off and taken to his relatives,\nwho nurse him and care for him.\nBut he dies of his injuries while in their care.\nSome warriors are like that.\nThis is the third warrior found in the world."}},{"id":"an5.76:4","sourceIds":["an5.76:4.1","an5.76:4.2","an5.76:4.3","an5.76:4.4","an5.76:4.5","an5.76:4.6","an5.76:4.7","an5.76:4.8"],"kind":"text","text":{"pi":"Puna caparaṁ, bhikkhave, idhekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.\nSo tasmiṁ saṅgāme ussahati vāyamati.\nTamenaṁ ussahantaṁ vāyamantaṁ pare upalikkhanti, tamenaṁ apanenti;\napanetvā ñātakānaṁ nenti.\nTamenaṁ ñātakā upaṭṭhahanti paricaranti.\nSo ñātakehi upaṭṭhahiyamāno paricariyamāno vuṭṭhāti tamhā ābādhā.\nEvarūpopi, bhikkhave, idhekacco yodhājīvo hoti.\nAyaṁ, bhikkhave, catuttho yodhājīvo santo saṁvijjamāno lokasmiṁ.","en":"Furthermore, one warrior dons his sword and shield, fastens his bow and arrows, and plunges into the thick of battle.\nHe strives and struggles in the battle,\nbut his foes wound him.\nHe’s carried off and taken to his relatives,\nwho nurse him and care for him.\nAnd while in their care, he recovers from his injuries.\nSome warriors are like that.\nThis is the fourth warrior found in the world."}},{"id":"an5.76:5","sourceIds":["an5.76:5.1","an5.76:5.2","an5.76:5.3","an5.76:5.4","an5.76:5.5"],"kind":"text","text":{"pi":"Puna caparaṁ, bhikkhave, idhekacco yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati.\nSo taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati.\nEvarūpopi, bhikkhave, idhekacco yodhājīvo hoti.\nAyaṁ, bhikkhave, pañcamo yodhājīvo santo saṁvijjamāno lokasmiṁ.\nIme kho, bhikkhave, pañca yodhājīvā santo saṁvijjamānā lokasmiṁ.","en":"Furthermore, one warrior dons his sword and shield, fastens his bow and arrows, and plunges into the thick of battle.\nHe wins victory in battle, establishing himself as foremost in battle.\nSome warriors are like that.\nThis is the fifth warrior found in the world.\nThese are the five warriors found in the world."}},{"id":"an5.76:6","sourceIds":["an5.76:6.1","an5.76:6.2","an5.76:6.3","an5.76:6.4","an5.76:6.5","an5.76:6.6","an5.76:6.7"],"kind":"text","text":{"pi":"Evamevaṁ kho, bhikkhave, pañcime yodhājīvūpamā puggalā santo saṁvijjamānā bhikkhūsu.\nKatame pañca?\nIdha, bhikkhave, bhikkhu aññataraṁ gāmaṁ vā nigamaṁ vā upanissāya viharati.\nSo pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.\nSo tattha passati mātugāmaṁ dunnivatthaṁ vā duppārutaṁ vā.\nTassa taṁ mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.\nSo rāgānuddhaṁsitena cittena sikkhaṁ apaccakkhāya dubbalyaṁ anāvikatvā methunaṁ dhammaṁ paṭisevati.","en":"In the same way, these five individuals similar to warriors are found among the monks.\nWhat five?\nFirstly, a mendicant lives supported by a town or village.\nHe robes up in the morning and, taking his bowl and robe, enters a village or town for alms without guarding body, speech, and mind, without establishing mindfulness, and without restraining the sense faculties.\nThere he sees a lady scantily clad, with revealing clothes.\nLust infects his mind,\nand, without resigning the training and declaring his inability to continue, he indulges in sex."}},{"id":"an5.76:7","sourceIds":["an5.76:7.1","an5.76:7.2"],"kind":"text","text":{"pi":"Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so tasmiṁ saṅgāme ussahati vāyamati, tamenaṁ ussahantaṁ vāyamantaṁ pare hananti pariyāpādenti; tathūpamāhaṁ, bhikkhave, imaṁ puggalaṁ vadāmi. Evarūpopi, bhikkhave, idhekacco puggalo hoti.\nAyaṁ, bhikkhave, paṭhamo yodhājīvūpamo puggalo santo saṁvijjamāno bhikkhūsu.","en":"I say that this individual is like the warrior who is killed and finished off by his foes. Some individuals are like that.\nThis is the first individual similar to a warrior found among the monks."}},{"id":"an5.76:8","sourceIds":["an5.76:8.1","an5.76:8.2","an5.76:8.3","an5.76:8.4","an5.76:8.5","an5.76:8.6","an5.76:8.7","an5.76:8.8","an5.76:8.9","an5.76:8.10"],"kind":"text","text":{"pi":"Puna caparaṁ, bhikkhave, bhikkhu aññataraṁ gāmaṁ vā nigamaṁ vā upanissāya viharati.\nSo pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.\nSo tattha passati mātugāmaṁ dunnivatthaṁ vā duppārutaṁ vā.\nTassa taṁ mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.\nSo rāgānuddhaṁsitena cittena pariḍayhateva kāyena pariḍayhati cetasā.\nTassa evaṁ hoti:\n‘yannūnāhaṁ ārāmaṁ gantvā bhikkhūnaṁ āroceyyaṁ—\nrāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;\nsikkhādubbalyaṁ āvikatvā sikkhaṁ paccakkhāya hīnāyāvattissāmī’ti.\nSo ārāmaṁ gacchanto appatvāva ārāmaṁ antarāmagge sikkhādubbalyaṁ āvikatvā sikkhaṁ paccakkhāya hīnāyāvattati.","en":"Furthermore, a mendicant lives supported by a town or village.\nHe robes up in the morning and, taking his bowl and robe, enters a village or town for alms without guarding body, speech, and mind, without establishing mindfulness, and without restraining the sense faculties.\nThere he sees a lady scantily clad, with revealing clothes.\nLust infects his mind,\nand his body and mind burn with it.\nHe thinks:\n‘Why don’t I visit the monastery and tell the monks:\n“Reverends, I am overcome with lust, mired in lust. I am unable to keep up the spiritual life.\nI declare my inability to continue training. I resign it and will return to a lesser life.”’\nBut while traveling on the road, before he reaches the monastery he declares his inability to continue training. He resigns and returns to a lesser life."}},{"id":"an5.76:9","sourceIds":["an5.76:9.1","an5.76:9.2"],"kind":"text","text":{"pi":"Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so tasmiṁ saṅgāme ussahati vāyamati, tamenaṁ ussahantaṁ vāyamantaṁ pare upalikkhanti, tamenaṁ apanenti; apanetvā ñātakānaṁ nenti. So ñātakehi nīyamāno appatvāva ñātake antarāmagge kālaṁ karoti; tathūpamāhaṁ, bhikkhave, imaṁ puggalaṁ vadāmi. Evarūpopi, bhikkhave, idhekacco puggalo hoti.\nAyaṁ, bhikkhave, dutiyo yodhājīvūpamo puggalo santo saṁvijjamāno bhikkhūsu.","en":"I say that they are like the warrior who is taken to his relatives for care, but he dies on the road before he reaches them. Some individuals are like that.\nThis is the second individual similar to a warrior found among the monks."}},{"id":"an5.76:10","sourceIds":["an5.76:10.1","an5.76:10.2","an5.76:10.3","an5.76:10.4","an5.76:10.5","an5.76:10.6","an5.76:10.7","an5.76:10.8","an5.76:10.9","an5.76:10.10","an5.76:10.11","an5.76:10.12"],"kind":"text","text":{"pi":"Puna caparaṁ, bhikkhave, bhikkhu aññataraṁ gāmaṁ vā nigamaṁ vā upanissāya viharati.\nSo pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.\nSo tattha passati mātugāmaṁ dunnivatthaṁ vā duppārutaṁ vā.\nTassa taṁ mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.\nSo rāgānuddhaṁsitena cittena pariḍayhateva kāyena pariḍayhati cetasā.\nTassa evaṁ hoti:\n‘yannūnāhaṁ ārāmaṁ gantvā bhikkhūnaṁ āroceyyaṁ—\nrāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;\nsikkhādubbalyaṁ āvikatvā sikkhaṁ paccakkhāya hīnāyāvattissāmī’ti.\nSo ārāmaṁ gantvā bhikkhūnaṁ āroceti:\n‘rāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;\nsikkhādubbalyaṁ āvikatvā sikkhaṁ paccakkhāya hīnāyāvattissāmī’ti.","en":"Furthermore, a mendicant lives supported by a town or village.\nHe robes up in the morning and, taking his bowl and robe, enters a village or town for alms without guarding body, speech, and mind, without establishing mindfulness, and without restraining the sense faculties.\nThere he sees a lady scantily clad, with revealing clothes.\nLust infects his mind,\nand his body and mind burn with it.\nHe thinks:\n‘Why don’t I visit the monastery and tell the monks:\n“Reverends, I am overcome with lust, mired in lust. I am unable to keep up the spiritual life.\nI declare my inability to continue training. I resign and will return to a lesser life.”’\nHe goes to the monastery and tells the monks:\n‘Reverends, I am overcome with lust, mired in lust. I am unable to keep up the spiritual life.\nI declare my inability to continue training. I disavow it and will return to a lesser life.’"}},{"id":"an5.76:11","sourceIds":["an5.76:11.1","an5.76:11.2","an5.76:11.3","an5.76:11.4","an5.76:11.5","an5.76:11.6","an5.76:11.7","an5.76:11.8","an5.76:11.9","an5.76:11.10","an5.76:11.11","an5.76:11.12","an5.76:11.13","an5.76:11.14"],"kind":"text","text":{"pi":"Tamenaṁ sabrahmacārī ovadanti anusāsanti:\n‘appassādā, āvuso, kāmā vuttā bhagavatā bahudukkhā bahupāyāsā, ādīnavo ettha bhiyyo.\nAṭṭhikaṅkalūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nMaṁsapesūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nTiṇukkūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nAṅgārakāsūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nSupinakūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nYācitakūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nRukkhaphalūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nAsisūnūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nSattisūlūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nSappasirūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nAbhiramatāyasmā brahmacariye;\nmāyasmā sikkhādubbalyaṁ āvikatvā sikkhaṁ paccakkhāya hīnāyāvattī’ti.","en":"His spiritual companions advise and instruct him:\n‘Reverend, the Buddha says that sensual pleasures give little gratification and much suffering and distress, and they are all the more full of drawbacks.\nWith the similes of a skeleton …\na scrap of meat …\na grass torch …\na pit of glowing coals …\na dream …\nborrowed goods …\nfruit on a tree …\na butcher’s knife and chopping board …\nswords and spears …\na cobra’s head, the Buddha says that sensual pleasures give little gratification and much suffering and distress, and they are all the more full of drawbacks.\nBe happy with the spiritual life.\nVenerable, please don’t declare your inability to continue training, resign it and return to a lesser life.’"}},{"id":"an5.76:12","sourceIds":["an5.76:12.1","an5.76:12.2","an5.76:12.3","an5.76:12.4"],"kind":"text","text":{"pi":"So sabrahmacārīhi evaṁ ovadiyamāno evaṁ anusāsiyamāno evamāha:\n‘kiñcāpi, āvuso, appassādā kāmā vuttā bhagavatā bahudukkhā bahupāyāsā, ādīnavo ettha bhiyyo;\natha kho nevāhaṁ sakkomi brahmacariyaṁ sandhāretuṁ, sikkhādubbalyaṁ āvikatvā sikkhaṁ paccakkhāya hīnāyāvattissāmī’ti.\nSo sikkhādubbalyaṁ āvikatvā sikkhaṁ paccakkhāya hīnāyāvattati.","en":"When thus advised and instructed by his spiritual companions, he says:\n‘Reverends, even though the Buddha says that sensual pleasures give little gratification and much suffering and distress, and they are all the more full of drawbacks,\nI am unable to keep up the spiritual life. I declare my inability to continue training. I resign it and will return to a lesser life.’\nDeclaring his inability to continue training, he resigns it and returns to a lesser life."}},{"id":"an5.76:13","sourceIds":["an5.76:13.1","an5.76:13.2"],"kind":"text","text":{"pi":"Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so tasmiṁ saṅgāme ussahati vāyamati, tamenaṁ ussahantaṁ vāyamantaṁ pare upalikkhanti, tamenaṁ apanenti; apanetvā ñātakānaṁ nenti, tamenaṁ ñātakā upaṭṭhahanti paricaranti. So ñātakehi upaṭṭhahiyamāno paricariyamāno teneva ābādhena kālaṁ karoti; tathūpamāhaṁ, bhikkhave, imaṁ puggalaṁ vadāmi. Evarūpopi, bhikkhave, idhekacco puggalo hoti.\nAyaṁ, bhikkhave, tatiyo yodhājīvūpamo puggalo santo saṁvijjamāno bhikkhūsu.","en":"I say that they are like the warrior who dies of his injuries while in the care of his relatives. Some individuals are like that.\nThis is the third individual similar to a warrior found among the monks."}},{"id":"an5.76:14","sourceIds":["an5.76:14.1","an5.76:14.2","an5.76:14.3","an5.76:14.4","an5.76:14.5","an5.76:14.6","an5.76:14.7","an5.76:14.8","an5.76:14.9","an5.76:14.10","an5.76:14.11","an5.76:14.12"],"kind":"text","text":{"pi":"Puna caparaṁ, bhikkhave, bhikkhu aññataraṁ gāmaṁ vā nigamaṁ vā upanissāya viharati.\nSo pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati arakkhiteneva kāyena arakkhitāya vācāya arakkhitena cittena anupaṭṭhitāya satiyā asaṁvutehi indriyehi.\nSo tattha passati mātugāmaṁ dunnivatthaṁ vā duppārutaṁ vā.\nTassa taṁ mātugāmaṁ disvā dunnivatthaṁ vā duppārutaṁ vā rāgo cittaṁ anuddhaṁseti.\nSo rāgānuddhaṁsitena cittena pariḍayhateva kāyena pariḍayhati cetasā.\nTassa evaṁ hoti:\n‘yannūnāhaṁ ārāmaṁ gantvā bhikkhūnaṁ āroceyyaṁ—\nrāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;\nsikkhādubbalyaṁ āvikatvā sikkhaṁ paccakkhāya hīnāyāvattissāmī’ti.\nSo ārāmaṁ gantvā bhikkhūnaṁ āroceti:\n‘rāgapariyuṭṭhitomhi, āvuso, rāgapareto, na sakkomi brahmacariyaṁ sandhāretuṁ;\nsikkhādubbalyaṁ āvikatvā sikkhaṁ paccakkhāya hīnāyāvattissāmī’ti.","en":"Furthermore, a mendicant lives supported by a town or village.\nHe robes up in the morning and, taking his bowl and robe, enters a village or town for alms without guarding body, speech, and mind, without establishing mindfulness, and without restraining the sense faculties.\nThere he sees a lady scantily clad, with revealing clothes.\nLust infects his mind,\nand his body and mind burn with it.\nHe thinks:\n‘Why don’t I visit the monastery and tell the monks:\n“Reverends, I am overcome with lust, mired in lust. I am unable to keep up the spiritual life.\nI declare my inability to continue training. I resign it and will return to a lesser life.”’\nHe goes to the monastery and tells the monks:\n‘Reverends, I am overcome with lust, mired in lust. I am unable to keep up the spiritual life.\nI declare my inability to continue training. I resign it and will return to a lesser life.’"}},{"id":"an5.76:15","sourceIds":["an5.76:15.1","an5.76:15.2","an5.76:15.3","an5.76:15.4","an5.76:15.5","an5.76:15.6"],"kind":"text","text":{"pi":"Tamenaṁ sabrahmacārī ovadanti anusāsanti:\n‘appassādā, āvuso, kāmā vuttā bhagavatā bahudukkhā bahupāyāsā, ādīnavo ettha bhiyyo.\nAṭṭhikaṅkalūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nMaṁsapesūpamā kāmā vuttā bhagavatā …pe… tiṇukkūpamā kāmā vuttā bhagavatā … aṅgārakāsūpamā kāmā vuttā bhagavatā … supinakūpamā kāmā vuttā bhagavatā … yācitakūpamā kāmā vuttā bhagavatā … rukkhaphalūpamā kāmā vuttā bhagavatā … asisūnūpamā kāmā vuttā bhagavatā … sattisūlūpamā kāmā vuttā bhagavatā … sappasirūpamā kāmā vuttā bhagavatā bahudukkhā bahupāyāsā, ādīnavo ettha bhiyyo.\nAbhiramatāyasmā brahmacariye;\nmāyasmā sikkhādubbalyaṁ āvikatvā sikkhaṁ paccakkhāya hīnāyāvattī’ti.","en":"His spiritual companions advise and instruct him:\n‘Reverend, the Buddha says that sensual pleasures give little gratification and much suffering and distress, and they are all the more full of drawbacks.\nWith the simile of a skeleton …\na scrap of meat … a grass torch … a pit of glowing coals … a dream … borrowed goods … fruit on a tree … a butcher’s knife and chopping board … swords and spears … a cobra’s head, the Buddha says that sensual pleasures give little gratification and much suffering and distress, and they are all the more full of drawbacks.\nBe happy with the spiritual life.\nVenerable, please don’t declare your inability to continue training, resign it and return to a lesser life.’"}},{"id":"an5.76:16","sourceIds":["an5.76:16.1","an5.76:16.2","an5.76:16.3"],"kind":"text","text":{"pi":"So sabrahmacārīhi evaṁ ovadiyamāno evaṁ anusāsiyamāno evamāha:\n‘ussahissāmi, āvuso, vāyamissāmi, āvuso, abhiramissāmi, āvuso.\nNa dānāhaṁ, āvuso, sikkhādubbalyaṁ āvikatvā sikkhaṁ paccakkhāya hīnāyāvattissāmī’ti.","en":"When thus advised and instructed by his spiritual companions, he says:\n‘I’ll make an attempt, reverends, I’ll struggle, I’ll be happy.\nI won’t now declare my inability to continue training, resign it and return to a lesser life.’"}},{"id":"an5.76:17","sourceIds":["an5.76:17.1","an5.76:17.2","an5.76:17.3"],"kind":"text","text":{"pi":"Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so tasmiṁ saṅgāme ussahati vāyamati, tamenaṁ ussahantaṁ vāyamantaṁ pare upalikkhanti, tamenaṁ apanenti; apanetvā ñātakānaṁ nenti, tamenaṁ ñātakā upaṭṭhahanti paricaranti. So ñātakehi upaṭṭhahiyamāno paricariyamāno vuṭṭhāti tamhā ābādhā; tathūpamāhaṁ, bhikkhave, imaṁ puggalaṁ vadāmi.\nEvarūpopi, bhikkhave, idhekacco puggalo hoti.\nAyaṁ, bhikkhave, catuttho yodhājīvūpamo puggalo santo saṁvijjamāno bhikkhūsu.","en":"I say that this individual is like the warrior who recovers from his injuries while in the care of his relatives.\nSome individuals are like that.\nThis is the fourth individual similar to a warrior found among the monks."}},{"id":"an5.76:18","sourceIds":["an5.76:18.1","an5.76:18.2","an5.76:18.3","an5.76:18.4","an5.76:18.5","an5.76:18.6","an5.76:18.7","an5.76:18.8","an5.76:18.9","an5.76:18.10","an5.76:18.11","an5.76:18.12","an5.76:18.13","an5.76:18.14","an5.76:18.15"],"kind":"text","text":{"pi":"Puna caparaṁ, bhikkhave, bhikkhu aññataraṁ gāmaṁ vā nigamaṁ vā upanissāya viharati.\nSo pubbaṇhasamayaṁ nivāsetvā pattacīvaramādāya tameva gāmaṁ vā nigamaṁ vā piṇḍāya pavisati rakkhiteneva kāyena rakkhitāya vācāya rakkhitena cittena upaṭṭhitāya satiyā saṁvutehi indriyehi.\nSo cakkhunā rūpaṁ disvā na nimittaggāhī hoti nānubyañjanaggāhī.\nYatvādhikaraṇamenaṁ cakkhundriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati cakkhundriyaṁ; cakkhundriye saṁvaraṁ āpajjati.\nSotena saddaṁ sutvā …\nghānena gandhaṁ ghāyitvā …\njivhāya rasaṁ sāyitvā …\nkāyena phoṭṭhabbaṁ phusitvā …\nmanasā dhammaṁ viññāya na nimittaggāhī hoti nānubyañjanaggāhī.\nYatvādhikaraṇamenaṁ manindriyaṁ asaṁvutaṁ viharantaṁ abhijjhādomanassā pāpakā akusalā dhammā anvāssaveyyuṁ, tassa saṁvarāya paṭipajjati; rakkhati manindriyaṁ; manindriye saṁvaraṁ āpajjati.\nSo pacchābhattaṁ piṇḍapātapaṭikkanto\nvivittaṁ senāsanaṁ bhajati araññaṁ rukkhamūlaṁ pabbataṁ kandaraṁ giriguhaṁ susānaṁ vanapatthaṁ abbhokāsaṁ palālapuñjaṁ.\nSo araññagato vā rukkhamūlagato vā suññāgāragato vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ upaṭṭhapetvā.\nSo abhijjhaṁ loke pahāya …pe… so ime pañca nīvaraṇe pahāya cetaso upakkilese paññāya dubbalīkaraṇe\nvivicceva kāmehi …pe… catutthaṁ jhānaṁ upasampajja viharati.","en":"Furthermore, a mendicant lives supported by a town or village.\nHe robes up in the morning and, taking his bowl and robe, enters a village or town, guarding body, speech, and mind, establishing mindfulness, and restraining the sense faculties.\nSeeing a sight with his eyes, he doesn’t get caught up in the features and details.\nIf the faculty of sight were left unrestrained, bad unskillful qualities of covetousness and displeasure would become overwhelming. For this reason, he practices restraint, protecting the faculty of sight, and achieving its restraint.\nHearing a sound with his ears …\nSmelling an odor with his nose …\nTasting a flavor with his tongue …\nEncountering a touch with his body …\nKnowing an idea with his mind, he doesn’t get caught up in the features and details.\nIf the faculty of mind were left unrestrained, bad unskillful qualities of covetousness and displeasure would become overwhelming. For this reason, he practices restraint, protecting the faculty of mind, and achieving its restraint.\nThen after the meal, on his return from almsround,\nhe frequents a secluded lodging—a wilderness, the root of a tree, a hill, a ravine, a mountain cave, a charnel ground, a forest, the open air, a heap of straw.\nGone to a wilderness, or to the root of a tree, or to an empty hut, he sits down cross-legged, sets his body straight, and brings mindfulness to the present.\nHe gives up these five hindrances, corruptions of the heart that weaken wisdom.\nThen, quite secluded from sensual pleasures, secluded from unskillful qualities, he enters and remains in the first absorption … second absorption … third absorption … fourth absorption."}},{"id":"an5.76:19","sourceIds":["an5.76:19.1","an5.76:19.2","an5.76:19.3"],"kind":"text","text":{"pi":"So evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṁ khayañāṇāya cittaṁ abhininnāmeti.\nSo ‘idaṁ dukkhan’ti yathābhūtaṁ pajānāti …pe…\nnāparaṁ itthattāyāti pajānāti.","en":"When his mind has become immersed in samādhi like this—purified, bright, flawless, rid of corruptions, pliable, workable, steady, and imperturbable—he extends it toward knowledge of the ending of defilements.\nHe truly understands: ‘This is suffering’ … ‘This is the origin of suffering’ … ‘This is the cessation of suffering’ … ‘This is the practice that leads to the cessation of suffering’. He truly understands: ‘These are defilements’ … ‘This is the origin of defilements’ … ‘This is the cessation of defilements’ … ‘This is the practice that leads to the cessation of defilements’. Knowing and seeing like this, his mind is freed from the defilements of sensuality, desire to be reborn, and ignorance. When he’s freed, he knows he’s freed.\nHe understands: ‘Rebirth is ended, the spiritual journey has been completed, what had to be done has been done, there is nothing further for this place.’"}},{"id":"an5.76:20","sourceIds":["an5.76:20.1","an5.76:20.2","an5.76:20.3","an5.76:20.4","an5.76:20.5"],"kind":"text","text":{"pi":"Seyyathāpi so, bhikkhave, yodhājīvo asicammaṁ gahetvā dhanukalāpaṁ sannayhitvā viyūḷhaṁ saṅgāmaṁ otarati, so taṁ saṅgāmaṁ abhivijinitvā vijitasaṅgāmo tameva saṅgāmasīsaṁ ajjhāvasati; tathūpamāhaṁ, bhikkhave, imaṁ puggalaṁ vadāmi.\nEvarūpopi, bhikkhave, idhekacco puggalo hoti.\nAyaṁ, bhikkhave, pañcamo yodhājīvūpamo puggalo santo saṁvijjamāno bhikkhūsu.\nIme kho, bhikkhave, pañca yodhājīvūpamā puggalā santo saṁvijjamānā bhikkhūsū”ti.\nChaṭṭhaṁ.","en":"I say that this individual is like the warrior who dons his sword and shield, fastens his bow and arrows, and plunges into the thick of battle. He wins victory in battle, establishing himself as foremost in battle.\nSome individuals are like that.\nThis is the fifth individual similar to a warrior found among the monks.\nThese five individuals similar to warriors are found among the monks.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an5.76/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}