{"id":"an6.62","title":"Knowledge of the Faculties of Persons","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an6.62","title":"Knowledge of the Faculties of Persons","units":[{"id":"an6.62:0","sourceIds":["an6.62:0.1","an6.62:0.2","an6.62:0.3"],"kind":"text","text":{"pi":"Aṅguttara Nikāya 6.62\n6. Mahāvagga\nPurisindriyañāṇasutta","en":"Numbered Discourses 6.62\n6. The Great Chapter\nKnowledge of the Faculties of Persons"}},{"id":"an6.62:1","sourceIds":["an6.62:1.1","an6.62:1.2","an6.62:1.3","an6.62:1.4"],"kind":"text","text":{"pi":"Evaṁ me sutaṁ—\nekaṁ samayaṁ bhagavā kosalesu cārikaṁ caramāno mahatā bhikkhusaṅghena saddhiṁ yena daṇḍakappakaṁ nāma kosalānaṁ nigamo tadavasari.\nAtha kho bhagavā maggā okkamma aññatarasmiṁ rukkhamūle paññatte āsane nisīdi.\nTe ca bhikkhū daṇḍakappakaṁ pavisiṁsu āvasathaṁ pariyesituṁ.","en":"So I have heard.\nAt one time the Buddha was wandering in the land of the Kosalans together with a large Saṅgha of mendicants when he arrived at a town of the Kosalans named Daṇḍakappaka.\nThe Buddha left the road and sat at the root of a tree on the seat spread out.\nThe mendicants entered Daṇḍakappaka to look for a guest house."}},{"id":"an6.62:2","sourceIds":["an6.62:2.1","an6.62:2.2","an6.62:2.3","an6.62:2.4","an6.62:2.5","an6.62:2.6"],"kind":"text","text":{"pi":"Atha kho āyasmā ānando sambahulehi bhikkhūhi saddhiṁ yena aciravatī nadī tenupasaṅkami gattāni parisiñcituṁ.\nAciravatiyā nadiyā gattāni parisiñcitvā paccuttaritvā ekacīvaro aṭṭhāsi gattāni pubbāpayamāno.\nAtha kho aññataro bhikkhu yenāyasmā ānando tenupasaṅkami; upasaṅkamitvā āyasmantaṁ ānandaṁ etadavoca:\n“kiṁ nu kho, āvuso ānanda, sabbaṁ cetaso samannāharitvā nu kho devadatto bhagavatā byākato:\n‘āpāyiko devadatto nerayiko kappaṭṭho atekiccho’ti, udāhu kenacideva pariyāyenāti?\nEvaṁ kho panetaṁ, āvuso, bhagavatā byākatan”ti.","en":"Then Venerable Ānanda together with several mendicants went to the Aciravatī River to bathe.\nWhen he had bathed and emerged from the water he stood in one robe drying his limbs.\nThen a certain mendicant went up to Venerable Ānanda, and said to him,\n“Reverend Ānanda, when the Buddha declared that Devadatta was\ngoing to a place of loss, to hell, there to remain for an eon, irredeemable, did he do so after wholeheartedly deliberating, or was this just a way of speaking?”\n“You’re right, reverend, that’s how the Buddha declared it.”"}},{"id":"an6.62:3","sourceIds":["an6.62:3.1","an6.62:3.2","an6.62:3.3","an6.62:3.4","an6.62:3.5","an6.62:3.6","an6.62:3.7","an6.62:3.8"],"kind":"text","text":{"pi":"Atha kho āyasmā ānando yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho āyasmā ānando bhagavantaṁ etadavoca:\n“idhāhaṁ, bhante, sambahulehi bhikkhūhi saddhiṁ yena aciravatī nadī tenupasaṅkamiṁ gattāni parisiñcituṁ.\nAciravatiyā nadiyā gattāni parisiñcitvā paccuttaritvā ekacīvaro aṭṭhāsiṁ gattāni pubbāpayamāno.\nAtha kho, bhante, aññataro bhikkhu yenāhaṁ tenupasaṅkami; upasaṅkamitvā maṁ etadavoca:\n‘kiṁ nu kho, āvuso ānanda, sabbaṁ cetaso samannāharitvā nu kho devadatto bhagavatā byākato—\nāpāyiko devadatto nerayiko kappaṭṭho atekicchoti, udāhu kenacideva pariyāyenā’ti?\nEvaṁ vutte, ahaṁ, bhante, taṁ bhikkhuṁ etadavocaṁ:\n‘evaṁ kho panetaṁ, āvuso, bhagavatā byākatan’”ti.","en":"Then Venerable Ānanda went up to the Buddha, bowed, sat down to one side, and told him what had happened."}},{"id":"an6.62:4","sourceIds":["an6.62:4.1","an6.62:4.2","an6.62:4.3","an6.62:4.4","an6.62:4.5","an6.62:4.6","an6.62:4.7","an6.62:4.8","an6.62:4.9"],"kind":"text","text":{"pi":"“So vā kho, ānanda, bhikkhu navo bhavissati acirapabbajito, thero vā pana bālo abyatto.\nKathañhi nāma yaṁ mayā ekaṁsena byākataṁ tattha dvejjhaṁ āpajjissati.\nNāhaṁ, ānanda, aññaṁ ekapuggalampi samanupassāmi, yo evaṁ mayā sabbaṁ cetaso samannāharitvā byākato, yathayidaṁ devadatto.\nYāvakīvañcāhaṁ, ānanda, devadattassa vālaggakoṭinittudanamattampi sukkadhammaṁ addasaṁ;\nneva tāvāhaṁ devadattaṁ byākāsiṁ:\n‘āpāyiko devadatto nerayiko kappaṭṭho atekiccho’ti.\nYato ca kho ahaṁ, ānanda, devadattassa vālaggakoṭinittudanamattampi sukkadhammaṁ na addasaṁ;\nathāhaṁ devadattaṁ byākāsiṁ:\n‘āpāyiko devadatto nerayiko kappaṭṭho atekiccho’ti.","en":"“Ānanda, that mendicant must be junior, recently gone forth, or else a foolish, incompetent senior mendicant.\nHow on earth can he take something that I have declared categorically to be ambiguous?\nI do not see a single other individual about whom I have given such whole-hearted deliberation before making a declaration as I did in the case of Devadatta.\nAs long as I saw even a fraction of a hair’s tip of goodness in Devadatta\nI did not declare that he was\ngoing to a place of loss, to hell, there to remain for an eon, irredeemable.\nBut when I saw that there was not even a fraction of a hair’s tip of goodness in Devadatta\nI declared that he was\ngoing to a place of loss, to hell, there to remain for an eon, irredeemable."}},{"id":"an6.62:5","sourceIds":["an6.62:5.1","an6.62:5.2","an6.62:5.3","an6.62:5.4","an6.62:5.5","an6.62:5.6","an6.62:5.7","an6.62:5.8"],"kind":"text","text":{"pi":"Seyyathāpi, ānanda, gūthakūpo sādhikaporiso pūro gūthassa samatittiko.\nTatra puriso sasīsako nimuggo assa.\nTassa kocideva puriso uppajjeyya atthakāmo hitakāmo yogakkhemakāmo tamhā gūthakūpā uddharitukāmo.\nSo taṁ gūthakūpaṁ samantānuparigacchanto neva passeyya tassa purisassa vālaggakoṭinittudanamattampi gūthena amakkhitaṁ, yattha taṁ gahetvā uddhareyya.\nEvamevaṁ kho ahaṁ, ānanda, yato devadattassa vālaggakoṭinittudanamattampi sukkadhammaṁ na addasaṁ;\nathāhaṁ devadattaṁ byākāsiṁ:\n‘āpāyiko devadatto nerayiko kappaṭṭho atekiccho’ti.\nSace tumhe, ānanda, suṇeyyātha tathāgatassa purisindriyañāṇāni vibhajissāmī”ti?","en":"Suppose there was a sewer deeper than a man’s height, full to the brim with feces,\nand someone was sunk into it over their head.\nThen along comes a person who wants to help make them safe, who wants to lift them out of that sewer.\nBut circling all around the sewer they couldn’t see even a fraction of a hair’s tip of that person that was not smeared with feces.\nIn the same way, when I saw that there was not even a fraction of a hair’s tip of goodness in Devadatta\nI declared that he was\ngoing to a place of loss, to hell, there to remain for an eon, irredeemable.\nIf you would all listen, Ānanda, I will analyze the Realized One’s knowledges of the faculties of persons.”"}},{"id":"an6.62:6","sourceIds":["an6.62:6.1","an6.62:6.2","an6.62:6.3","an6.62:6.4","an6.62:6.5"],"kind":"text","text":{"pi":"“Etassa, bhagavā, kālo; etassa, sugata, kālo\nyaṁ bhagavā purisindriyañāṇāni vibhajeyya. Bhagavato sutvā bhikkhū dhāressantī”ti.\n“Tenahānanda, suṇāhi, sādhukaṁ manasi karohi; bhāsissāmī”ti.\n“Evaṁ, bhante”ti kho āyasmā ānando bhagavato paccassosi.\nBhagavā etadavoca:","en":"“Now is the time, Blessed One! Now is the time, Holy One!\nLet the Buddha analyze the faculties of persons. The mendicants will listen and remember it.”\n“Well then, Ānanda, listen and apply your mind well, I will speak.”\n“Yes, sir,” Ānanda replied.\nThe Buddha said this:"}},{"id":"an6.62:7","sourceIds":["an6.62:7.1","an6.62:7.2","an6.62:7.3","an6.62:7.4","an6.62:7.5","an6.62:7.6","an6.62:7.7","an6.62:7.8","an6.62:7.9","an6.62:7.10","an6.62:7.11","an6.62:7.12","an6.62:7.13","an6.62:7.14","an6.62:7.15","an6.62:7.16","an6.62:7.17","an6.62:7.18"],"kind":"text","text":{"pi":"“Idhāhaṁ, ānanda, ekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘imassa kho puggalassa kusalā dhammā antarahitā, akusalā dhammā sammukhībhūtā.\nAtthi ca khvassa kusalamūlaṁ asamucchinnaṁ, tamhā tassa kusalā kusalaṁ pātubhavissati.\nEvamayaṁ puggalo āyatiṁ aparihānadhammo bhavissatī’ti.\nSeyyathāpi, ānanda, bījāni akhaṇḍāni apūtīni avātātapahatāni sāradāni sukhasayitāni sukhette suparikammakatāya bhūmiyā nikkhittāni.\nJāneyyāsi tvaṁ, ānanda, imāni bījāni vuddhiṁ virūḷhiṁ vepullaṁ āpajjissantī”ti?\n“Evaṁ, bhante”.\n“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘imassa kho puggalassa kusalā dhammā antarahitā, akusalā dhammā sammukhībhūtā.\nAtthi ca khvassa kusalamūlaṁ asamucchinnaṁ, tamhā tassa kusalā kusalaṁ pātubhavissati.\nEvamayaṁ puggalo āyatiṁ aparihānadhammo bhavissatī’ti.\nEvampi kho, ānanda, tathāgatassa purisapuggalo cetasā ceto paricca vidito hoti.\nEvampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.\nEvampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.","en":"“Ānanda, when I’ve comprehended the mind of an individual, I understand:\n‘Both skillful and unskillful qualities are found in this individual.’\nAfter some time I encompass their mind and understand:\n‘The skillful qualities of this individual have vanished, but the unskillful qualities are still present.\nNevertheless, their skillful root is unbroken, and from that the skillful will appear.\nSo this individual is not liable to decline in the future.’\nSuppose some seeds were intact, unspoiled, not weather-damaged, fertile, and well-kept. And they were sown in a well-prepared, productive field.\nWouldn’t you know that those seeds would grow, increase, and mature?”\n“Yes, sir.”\n“In the same way, when I’ve comprehended the mind of an individual, I understand …\nThis individual is not liable to decline in the future …\nThis is how another individual is known to the Realized One by encompassing their mind.\nAnd this is how the Realized One knows a person’s faculties by encompassing their mind.\nAnd this is how the Realized One knows the future origination of a person’s qualities by encompassing their mind."}},{"id":"an6.62:8","sourceIds":["an6.62:8.1","an6.62:8.2","an6.62:8.3","an6.62:8.4","an6.62:8.5","an6.62:8.6","an6.62:8.7","an6.62:8.8","an6.62:8.9","an6.62:8.10","an6.62:8.11","an6.62:8.12","an6.62:8.13","an6.62:8.14","an6.62:8.15","an6.62:8.16","an6.62:8.17","an6.62:8.18"],"kind":"text","text":{"pi":"Idha panāhaṁ, ānanda, ekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘imassa kho puggalassa akusalā dhammā antarahitā, kusalā dhammā sammukhībhūtā.\nAtthi ca khvassa akusalamūlaṁ asamucchinnaṁ, tamhā tassa akusalā akusalaṁ pātubhavissati.\nEvamayaṁ puggalo āyatiṁ parihānadhammo bhavissatī’ti.\nSeyyathāpi, ānanda, bījāni akhaṇḍāni apūtīni avātātapahatāni sāradāni sukhasayitāni puthusilāya nikkhittāni.\nJāneyyāsi tvaṁ, ānanda, nayimāni bījāni vuddhiṁ virūḷhiṁ vepullaṁ āpajjissantī”ti?\n“Evaṁ, bhante”.\n“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘imassa kho puggalassa akusalā dhammā antarahitā, kusalā dhammā sammukhībhūtā.\nAtthi ca khvassa akusalamūlaṁ asamucchinnaṁ, tamhā tassa akusalā akusalaṁ pātubhavissati.\nEvamayaṁ puggalo āyatiṁ parihānadhammo bhavissatī’ti.\nEvampi kho, ānanda, tathāgatassa purisapuggalo cetasā ceto paricca vidito hoti.\nEvampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.\nEvampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.","en":"When I’ve comprehended the mind of an individual, I understand:\n‘Both skillful and unskillful qualities are found in this individual.’\nAfter some time I encompass their mind and understand:\n‘The unskillful qualities of this individual have vanished, but the skillful qualities are still present.\nNevertheless, their unskillful root is unbroken, and from that the unskillful will appear.\nSo this individual is still liable to decline in the future.’\nSuppose some seeds were intact, unspoiled, not weather-damaged, fertile, and well-kept. And they were sown on a broad rock.\nWouldn’t you know that those seeds would not grow, increase, and mature?”\n“Yes, sir.”\n“In the same way, when I’ve comprehended the mind of an individual, I understand …\nThis individual is still liable to decline in the future …\nThis is how another individual is known to the Realized One …"}},{"id":"an6.62:9","sourceIds":["an6.62:9.1","an6.62:9.2","an6.62:9.3","an6.62:9.4","an6.62:9.5","an6.62:9.6","an6.62:9.7","an6.62:9.8","an6.62:9.9","an6.62:9.10","an6.62:9.11","an6.62:9.12","an6.62:9.13","an6.62:9.14"],"kind":"text","text":{"pi":"Idha panāhaṁ, ānanda, ekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘natthi imassa puggalassa vālaggakoṭinittudanamattopi sukko dhammo, samannāgatoyaṁ puggalo ekantakāḷakehi akusalehi dhammehi, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjissatī’ti.\nSeyyathāpi, ānanda, bījāni khaṇḍāni pūtīni vātātapahatāni sukhette suparikammakatāya bhūmiyā nikkhittāni.\nJāneyyāsi tvaṁ, ānanda, nayimāni bījāni vuddhiṁ virūḷhiṁ vepullaṁ āpajjissantī”ti?\n“Evaṁ, bhante”.\n“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘natthi imassa puggalassa vālaggakoṭinittudanamattopi sukko dhammo, samannāgatoyaṁ puggalo ekantakāḷakehi akusalehi dhammehi, kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjissatī’ti.\nEvampi kho, ānanda, tathāgatassa purisapuggalo cetasā ceto paricca vidito hoti.\nEvampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.\nEvampi kho, ānanda, tathāgatassa āyatiṁ dhammasamuppādo cetasā ceto paricca vidito hotī”ti.","en":"When I’ve comprehended the mind of an individual, I understand:\n‘Both skillful and unskillful qualities are found in this individual.’\nAfter some time I encompass their mind and understand:\n‘This individual has not even a fraction of a hair’s tip of goodness. They have absolutely dark, unskillful qualities. When their body breaks up, after death, they will be reborn in a place of loss, a bad place, the underworld, hell.’\nSuppose some seeds were broken, spoiled, weather-damaged. And they were sown in a well-prepared, productive field.\nWouldn’t you know that those seeds would not grow, increase, and mature?”\n“Yes, sir.”\n“In the same way, when I’ve comprehended the mind of an individual, I understand …\n‘This individual has not even a fraction of a hair’s tip of goodness. They have absolutely dark, unskillful qualities. When their body breaks up, after death, they will be reborn in a place of loss, a bad place, the underworld, hell.’ …”"}},{"id":"an6.62:10","sourceIds":["an6.62:10.1","an6.62:10.2","an6.62:10.3","an6.62:10.4","an6.62:10.5","an6.62:10.6","an6.62:10.7","an6.62:10.8","an6.62:10.9","an6.62:10.10","an6.62:10.11","an6.62:10.12","an6.62:10.13","an6.62:10.14","an6.62:10.15","an6.62:10.16","an6.62:10.17","an6.62:10.18","an6.62:10.19","an6.62:10.20","an6.62:10.21","an6.62:10.22","an6.62:10.23","an6.62:10.24","an6.62:10.25"],"kind":"text","text":{"pi":"Evaṁ vutte, āyasmā ānando bhagavantaṁ etadavoca:\n“sakkā nu kho, bhante, imesaṁ tiṇṇaṁ puggalānaṁ aparepi tayo puggalā sappaṭibhāgā paññāpetun”ti?\n“Sakkā, ānandā”ti bhagavā avoca:\n“idhāhaṁ, ānanda, ekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘imassa kho puggalassa kusalā dhammā antarahitā, akusalā dhammā sammukhībhūtā.\nAtthi ca khvassa kusalamūlaṁ asamucchinnaṁ, tampi sabbena sabbaṁ samugghātaṁ gacchati.\nEvamayaṁ puggalo āyatiṁ parihānadhammo bhavissatī’ti.\nSeyyathāpi, ānanda, aṅgārāni ādittāni sampajjalitāni sajotibhūtāni puthusilāya nikkhittāni.\nJāneyyāsi tvaṁ, ānanda, nayimāni aṅgārāni vuddhiṁ virūḷhiṁ vepullaṁ āpajjissantī”ti?\n“Evaṁ, bhante”.\n“Seyyathāpi vā pana, ānanda, sāyanhasamayaṁ sūriye ogacchante, jāneyyāsi tvaṁ, ānanda, āloko antaradhāyissati andhakāro pātubhavissatī”ti?\n“Evaṁ, bhante”.\n“Seyyathāpi vā, panānanda, abhido addharattaṁ bhattakālasamaye, jāneyyāsi tvaṁ, ānanda, āloko antarahito andhakāro pātubhūto”ti?\n“Evaṁ, bhante”.\n“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘imassa kho puggalassa kusalā dhammā antarahitā, akusalā dhammā sammukhībhūtā.\nAtthi ca khvassa kusalamūlaṁ asamucchinnaṁ, tampi sabbena sabbaṁ samugghātaṁ gacchati.\nEvamayaṁ puggalo āyatiṁ parihānadhammo bhavissatī’ti.\nEvampi kho, ānanda, tathāgatassa purisapuggalo cetasā ceto paricca vidito hoti.\nEvampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.\nEvampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.","en":"When he said this, Venerable Ānanda said to the Buddha,\n“Sir, can you describe three other individuals who share a portion of these three?”\n“I can, Ānanda,” said the Buddha.\n“Ānanda, when I’ve comprehended the mind of an individual, I understand:\n‘Both skillful and unskillful qualities are found in this individual.’\nAfter some time I encompass their mind and understand:\n‘The skillful qualities of this individual have vanished, but the unskillful qualities are still present.\nNevertheless, their skillful root is unbroken, but it’s about to be totally destroyed.\nSo this individual is still liable to decline in the future.’\nSuppose there were some burning coals, blazing and glowing, placed on a broad rock.\nWouldn’t you know that those coals would not grow, increase, and spread?”\n“Yes, sir.”\n“Or suppose it’s the late afternoon and the sun was going down. Wouldn’t you know that the light was about to vanish and darkness appear?”\n“Yes, sir.”\n“Or suppose that it’s nearly time for the midnight meal. Wouldn’t you know that the light had vanished and the darkness appeared?”\n“Yes, sir.”\n“In the same way, when I’ve comprehended the mind of an individual, I understand …\nThis individual is still liable to decline in the future …"}},{"id":"an6.62:11","sourceIds":["an6.62:11.1","an6.62:11.2","an6.62:11.3","an6.62:11.4","an6.62:11.5","an6.62:11.6","an6.62:11.7","an6.62:11.8","an6.62:11.9","an6.62:11.10","an6.62:11.11","an6.62:11.12","an6.62:11.13","an6.62:11.14","an6.62:11.15","an6.62:11.16","an6.62:11.17","an6.62:11.18","an6.62:11.19","an6.62:11.20","an6.62:11.21","an6.62:11.22"],"kind":"text","text":{"pi":"Idha panāhaṁ, ānanda, ekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘imassa kho puggalassa akusalā dhammā antarahitā, kusalā dhammā sammukhībhūtā.\nAtthi ca khvassa akusalamūlaṁ asamucchinnaṁ, tampi sabbena sabbaṁ samugghātaṁ gacchati.\nEvamayaṁ puggalo āyatiṁ aparihānadhammo bhavissatī’ti.\nSeyyathāpi, ānanda, aṅgārāni ādittāni sampajjalitāni sajotibhūtāni sukkhe tiṇapuñje vā kaṭṭhapuñje vā nikkhittāni.\nJāneyyāsi tvaṁ, ānanda, imāni aṅgārāni vuḍḍhiṁ virūḷhiṁ vepullaṁ āpajjissantī”ti?\n“Evaṁ, bhante”.\n“Seyyathāpi vā panānanda, rattiyā paccūsasamayaṁ sūriye uggacchante, jāneyyāsi tvaṁ, ānanda, andhakāro antaradhāyissati, āloko pātubhavissatī”ti?\n“Evaṁ, bhante”.\n“Seyyathāpi vā panānanda, abhido majjhanhike bhattakālasamaye, jāneyyāsi tvaṁ, ānanda, andhakāro antarahito āloko pātubhūto”ti?\n“Evaṁ, bhante”.\n“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘imassa kho puggalassa akusalā dhammā antarahitā, kusalā dhammā sammukhībhūtā.\nAtthi ca khvassa akusalamūlaṁ asamucchinnaṁ, tampi sabbena sabbaṁ samugghātaṁ gacchati.\nEvamayaṁ puggalo āyatiṁ aparihānadhammo bhavissatī’ti.\nEvampi kho, ānanda, tathāgatassa purisapuggalo cetasā ceto paricca vidito hoti.\nEvampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.\nEvampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.","en":"When I’ve comprehended the mind of an individual, I understand:\n‘Both skillful and unskillful qualities are found in this individual.’\nAfter some time I encompass their mind and understand:\n‘The unskillful qualities of this individual have vanished, but the skillful qualities are still present.\nNevertheless, their unskillful root is unbroken, but it’s about to be totally destroyed.\nSo this individual is not liable to decline in the future.’\nSuppose there were some burning coals, blazing and glowing, placed on a pile of grass or timber.\nWouldn’t you know that those coals would grow, increase, and spread?”\n“Yes, sir.”\n“Or suppose it’s the crack of dawn and the sun is rising. Wouldn’t you know that the dark will vanish and the light appear?”\n“Yes, sir.”\n“Or suppose that it’s nearly time for the midday meal. Wouldn’t you know that the dark had vanished and the light appeared?”\n“Yes, sir.”\n“In the same way, when I’ve comprehended the mind of an individual, I understand …\nThis individual is not liable to decline in the future …"}},{"id":"an6.62:12","sourceIds":["an6.62:12.1","an6.62:12.2","an6.62:12.3","an6.62:12.4","an6.62:12.5","an6.62:12.6","an6.62:12.7","an6.62:12.8","an6.62:12.9","an6.62:12.10","an6.62:12.11","an6.62:12.12","an6.62:12.13","an6.62:12.14"],"kind":"text","text":{"pi":"Idha panāhaṁ, ānanda, ekaccaṁ puggalaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘natthi imassa puggalassa vālaggakoṭinittudanamattopi akusalo dhammo, samannāgatoyaṁ puggalo ekantasukkehi anavajjehi dhammehi, diṭṭheva dhamme parinibbāyissatī’ti.\nSeyyathāpi, ānanda, aṅgārāni sītāni nibbutāni sukkhe tiṇapuñje vā kaṭṭhapuñje vā nikkhittāni.\nJāneyyāsi tvaṁ, ānanda, nayimāni aṅgārāni vuḍḍhiṁ virūḷhiṁ vepullaṁ āpajjissantī”ti?\n“Evaṁ, bhante”.\n“Evamevaṁ kho ahaṁ, ānanda, idhekaccaṁ puggalaṁ evaṁ cetasā ceto paricca pajānāmi:\n‘imassa kho puggalassa vijjamānā kusalāpi dhammā akusalāpi dhammā’ti.\nTamenaṁ aparena samayena evaṁ cetasā ceto paricca pajānāmi:\n‘natthi imassa puggalassa vālaggakoṭinittudanamattopi akusalo dhammo, samannāgatoyaṁ puggalo ekantasukkehi anavajjehi dhammehi, diṭṭheva dhamme parinibbāyissatī’ti.\nEvampi kho, ānanda, tathāgatassa purisapuggalo cetasā ceto paricca vidito hoti.\nEvampi kho, ānanda, tathāgatassa purisindriyañāṇaṁ cetasā ceto paricca viditaṁ hoti.\nEvampi kho, ānanda, tathāgatassa āyatiṁ dhammasamuppādo cetasā ceto paricca vidito hoti.","en":"When I’ve comprehended the mind of an individual, I understand:\n‘Both skillful and unskillful qualities are found in this individual.’\nAfter some time I encompass their mind and understand:\n‘This individual has not even a fraction of a hair’s tip of unskillful qualities. They have absolutely bright, blameless qualities. They will become extinguished in this very life.’\nSuppose there were some cool, quenched coals, placed on a pile of grass or timber.\nWouldn’t you know that those coals would not grow, increase, and spread?”\n“Yes, sir.”\n“In the same way, when I’ve comprehended the mind of an individual, I understand …\n‘This individual has not even a fraction of a hair’s tip of unskillful qualities. They have absolutely bright, blameless qualities. They will become extinguished in this very life.’\nThis is how another individual is known to the Realized One by encompassing their mind.\nAnd this is how the Realized One knows a person’s faculties by encompassing their mind.\nAnd this is how the Realized One knows the future origination of a person’s qualities by encompassing their mind."}},{"id":"an6.62:13","sourceIds":["an6.62:13.1","an6.62:13.2","an6.62:13.3"],"kind":"text","text":{"pi":"Tatrānanda, ye te purimā tayo puggalā tesaṁ tiṇṇaṁ puggalānaṁ eko aparihānadhammo, eko parihānadhammo, eko āpāyiko nerayiko.\nTatrānanda, yeme pacchimā tayo puggalā imesaṁ tiṇṇaṁ puggalānaṁ eko parihānadhammo, eko aparihānadhammo, eko parinibbānadhammo”ti.\nAṭṭhamaṁ.","en":"And so, Ānanda, of the first three individuals one is not liable to decline, one is liable to decline, and one is bound for a place of loss, hell.\nAnd of the second three individuals, one is liable to decline, one is not liable to decline, and one is bound to become extinguished.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an6.62/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}