{"id":"an6.63","title":"Penetrative","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an6.63","title":"Penetrative","units":[{"id":"an6.63:0","sourceIds":["an6.63:0.1","an6.63:0.2","an6.63:0.3"],"kind":"text","text":{"pi":"Aṅguttara Nikāya 6.63\n6. Mahāvagga\nNibbedhikasutta","en":"Numbered Discourses 6.63\n6. The Great Chapter\nPenetrative"}},{"id":"an6.63:1","sourceIds":["an6.63:1.1","an6.63:1.2","an6.63:1.3","an6.63:1.4"],"kind":"text","text":{"pi":"“Nibbedhikapariyāyaṁ vo, bhikkhave, dhammapariyāyaṁ desessāmi.\nTaṁ suṇātha, sādhukaṁ manasi karotha, bhāsissāmī”ti.\n“Evaṁ, bhante”ti kho te bhikkhū bhagavato paccassosuṁ.\nBhagavā etadavoca:","en":"“Mendicants, I will teach you a penetrative exposition of the teaching.\nListen and apply your mind well, I will speak.”\n“Yes, sir,” they replied.\nThe Buddha said this:"}},{"id":"an6.63:2","sourceIds":["an6.63:2.1","an6.63:2.2"],"kind":"text","text":{"pi":"“Katamo ca so, bhikkhave, nibbedhikapariyāyo dhammapariyāyo?\nKāmā, bhikkhave, veditabbā, kāmānaṁ nidānasambhavo veditabbo, kāmānaṁ vemattatā veditabbā, kāmānaṁ vipāko veditabbo, kāmanirodho veditabbo, kāmanirodhagāminī paṭipadā veditabbā.","en":"“Mendicants, what is the penetrative exposition of the teaching?\nSensual pleasures should be known. And their source, diversity, result, cessation, and the practice that leads to their cessation should be known."}},{"id":"an6.63:3","sourceIds":["an6.63:3.1"],"kind":"text","text":{"pi":"Vedanā, bhikkhave, veditabbā, vedanānaṁ nidānasambhavo veditabbo, vedanānaṁ vemattatā veditabbā, vedanānaṁ vipāko veditabbo, vedanānirodho veditabbo, vedanānirodhagāminī paṭipadā veditabbā.","en":"Feelings should be known. And their source, diversity, result, cessation, and the practice that leads to their cessation should be known."}},{"id":"an6.63:4","sourceIds":["an6.63:4.1"],"kind":"text","text":{"pi":"Saññā, bhikkhave, veditabbā, saññānaṁ nidānasambhavo veditabbo, saññānaṁ vemattatā veditabbā, saññānaṁ vipāko veditabbo, saññānirodho veditabbo, saññānirodhagāminī paṭipadā veditabbā.","en":"Perceptions should be known. And their source, diversity, result, cessation, and the practice that leads to their cessation should be known."}},{"id":"an6.63:5","sourceIds":["an6.63:5.1"],"kind":"text","text":{"pi":"Āsavā, bhikkhave, veditabbā, āsavānaṁ nidānasambhavo veditabbo, āsavānaṁ vemattatā veditabbā, āsavānaṁ vipāko veditabbo, āsavanirodho veditabbo, āsavanirodhagāminī paṭipadā veditabbā.","en":"Defilements should be known. And their source, diversity, result, cessation, and the practice that leads to their cessation should be known."}},{"id":"an6.63:6","sourceIds":["an6.63:6.1"],"kind":"text","text":{"pi":"Kammaṁ, bhikkhave, veditabbaṁ, kammānaṁ nidānasambhavo veditabbo, kammānaṁ vemattatā veditabbā, kammānaṁ vipāko veditabbo, kammanirodho veditabbo, kammanirodhagāminī paṭipadā veditabbā.","en":"Deeds should be known. And their source, diversity, result, cessation, and the practice that leads to their cessation should be known."}},{"id":"an6.63:7","sourceIds":["an6.63:7.1"],"kind":"text","text":{"pi":"Dukkhaṁ, bhikkhave, veditabbaṁ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbā.","en":"Suffering should be known. And its source, diversity, result, cessation, and the practice that leads to its cessation should be known."}},{"id":"an6.63:8","sourceIds":["an6.63:8.1","an6.63:8.2","an6.63:8.3","an6.63:8.4","an6.63:8.5","an6.63:8.6","an6.63:8.7","an6.63:8.8","an6.63:8.9","an6.63:8.10","an6.63:8.11","an6.63:8.12","an6.63:8.13","an6.63:8.14"],"kind":"text","text":{"pi":"‘Kāmā, bhikkhave, veditabbā, kāmānaṁ nidānasambhavo veditabbo, kāmānaṁ vemattatā veditabbā, kāmānaṁ vipāko veditabbo, kāmanirodho veditabbo, kāmanirodhagāminī paṭipadā veditabbā’ti, iti kho panetaṁ vuttaṁ.\nKiñcetaṁ paṭicca vuttaṁ?\nPañcime, bhikkhave, kāmaguṇā—\ncakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā,\nsotaviññeyyā saddā …\nghānaviññeyyā gandhā …\njivhāviññeyyā rasā …\nkāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā.\nApi ca kho, bhikkhave, nete kāmā kāmaguṇā nāmete ariyassa vinaye vuccanti—\nSaṅkapparāgo purisassa kāmo,\nNete kāmā yāni citrāni loke;\nSaṅkapparāgo purisassa kāmo,\nTiṭṭhanti citrāni tatheva loke;\nAthettha dhīrā vinayanti chandanti.","en":"‘Sensual pleasures should be known. And their source, diversity, result, cessation, and the practice that leads to their cessation should be known.’ That’s what I said,\nbut why did I say it?\nThere are these five kinds of sensual stimulation.\nSights known by the eye, which are likable, desirable, agreeable, pleasant, sensual, and arousing.\nSounds known by the ear …\nSmells known by the nose …\nTastes known by the tongue …\nTouches known by the body, which are likable, desirable, agreeable, pleasant, sensual, and arousing.\nHowever, these are not sensual pleasures. In the training of the Noble One they’re called ‘kinds of sensual stimulation’.\nGreedy intention is a person’s sensual pleasure.\nThe world’s pretty things aren’t sensual pleasures.\nGreedy intention is a person’s sensual pleasure.\nThe world’s pretty things stay just as they are,\nbut the attentive remove desire for them."}},{"id":"an6.63:9","sourceIds":["an6.63:9.1"],"kind":"text","text":{"pi":"Katamo ca, bhikkhave, kāmānaṁ nidānasambhavo?","en":"And what is the source of sensual pleasures?"}},{"id":"an6.63:10","sourceIds":["an6.63:10.2"],"kind":"text","text":{"pi":"Phasso, bhikkhave, kāmānaṁ nidānasambhavo.","en":"Contact is their source."}},{"id":"an6.63:11","sourceIds":["an6.63:11.1","an6.63:11.2","an6.63:11.3"],"kind":"text","text":{"pi":"Katamā ca, bhikkhave, kāmānaṁ vemattatā?\nAñño, bhikkhave, kāmo rūpesu, añño kāmo saddesu, añño kāmo gandhesu, añño kāmo rasesu, añño kāmo phoṭṭhabbesu.\nAyaṁ vuccati, bhikkhave, kāmānaṁ vemattatā.","en":"And what is the diversity of sensual pleasures?\nThe sensual desire for sights, sounds, smells, tastes, and touches are all different.\nThis is called the diversity of sensual pleasures."}},{"id":"an6.63:12","sourceIds":["an6.63:12.1","an6.63:12.2"],"kind":"text","text":{"pi":"Katamo ca, bhikkhave, kāmānaṁ vipāko?\nYaṁ kho, bhikkhave, kāmayamāno tajjaṁ tajjaṁ attabhāvaṁ abhinibbatteti puññabhāgiyaṁ vā apuññabhāgiyaṁ vā, ayaṁ vuccati, bhikkhave, kāmānaṁ vipāko.","en":"And what is the result of sensual pleasures?\nWhen one who desires sensual pleasures generates a corresponding incarnation, partaking of either good or bad deeds—this is called the result of sensual pleasures."}},{"id":"an6.63:13","sourceIds":["an6.63:13.1","an6.63:13.2","an6.63:13.3","an6.63:13.4"],"kind":"text","text":{"pi":"Katamo ca, bhikkhave, kāmanirodho?\nPhassanirodho, bhikkhave, kāmanirodho.\nAyameva ariyo aṭṭhaṅgiko maggo kāmanirodhagāminī paṭipadā, seyyathidaṁ—\nsammādiṭṭhi, sammāsaṅkappo, sammāvācā, sammākammanto, sammāājīvo, sammāvāyāmo, sammāsati, sammāsamādhi.","en":"And what is the cessation of sensual pleasures?\nWhen contact ceases, sensual pleasures cease.\nThe practice that leads to the cessation of sensual pleasures is simply this noble eightfold path, that is:\nright view, right purpose, right speech, right action, right livelihood, right effort, right mindfulness, and right immersion."}},{"id":"an6.63:14","sourceIds":["an6.63:14.1","an6.63:14.2","an6.63:14.3"],"kind":"text","text":{"pi":"Yato kho, bhikkhave, ariyasāvako evaṁ kāme pajānāti, evaṁ kāmānaṁ nidānasambhavaṁ pajānāti, evaṁ kāmānaṁ vemattataṁ pajānāti, evaṁ kāmānaṁ vipākaṁ pajānāti, evaṁ kāmanirodhaṁ pajānāti, evaṁ kāmanirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti kāmanirodhaṁ.\nKāmā, bhikkhave, veditabbā …pe… kāmanirodhagāminī paṭipadā veditabbāti,\niti yaṁ taṁ vuttaṁ idametaṁ paṭicca vuttaṁ.","en":"When a noble disciple understands sensual pleasures in this way—and understands their source, diversity, result, cessation, and the practice that leads to their cessation—they understand that this penetrative spiritual life is the cessation of sensual pleasures.\n‘Sensual pleasures should be known. And their source, diversity, result, cessation, and the practice that leads to their cessation should be known.’\nThat’s what I said, and this is why I said it."}},{"id":"an6.63:15","sourceIds":["an6.63:15.1","an6.63:15.2","an6.63:15.3","an6.63:15.4"],"kind":"text","text":{"pi":"Vedanā, bhikkhave, veditabbā …pe… vedanānirodhagāminī paṭipadā veditabbāti,\niti kho panetaṁ vuttaṁ. Kiñcetaṁ paṭicca vuttaṁ?\nTisso imā, bhikkhave, vedanā—\nsukhā vedanā, dukkhā vedanā, adukkhamasukhā vedanā.","en":"‘Feelings should be known. And their source, diversity, result, cessation, and the practice that leads to their cessation should be known.’\nThat’s what I said, but why did I say it?\nThere are these three feelings:\npleasant, painful, and neutral."}},{"id":"an6.63:16","sourceIds":["an6.63:16.1","an6.63:16.2"],"kind":"text","text":{"pi":"Katamo ca, bhikkhave, vedanānaṁ nidānasambhavo?\nPhasso, bhikkhave, vedanānaṁ nidānasambhavo.","en":"And what is the source of feelings?\nContact is their source."}},{"id":"an6.63:17","sourceIds":["an6.63:17.1","an6.63:17.2","an6.63:17.3"],"kind":"text","text":{"pi":"Katamā ca, bhikkhave, vedanānaṁ vemattatā?\nAtthi, bhikkhave, sāmisā sukhā vedanā, atthi nirāmisā sukhā vedanā, atthi sāmisā dukkhā vedanā, atthi nirāmisā dukkhā vedanā, atthi sāmisā adukkhamasukhā vedanā, atthi nirāmisā adukkhamasukhā vedanā.\nAyaṁ vuccati, bhikkhave, vedanānaṁ vemattatā.","en":"And what is the diversity of feelings?\nThere are pleasant feelings of the flesh, pleasant feelings not of the flesh, painful feelings of the flesh, painful feelings not of the flesh, neutral feelings of the flesh, and neutral feelings not of the flesh.\nThis is called the disparity of feelings."}},{"id":"an6.63:18","sourceIds":["an6.63:18.1","an6.63:18.2","an6.63:18.3"],"kind":"text","text":{"pi":"Katamo ca, bhikkhave, vedanānaṁ vipāko?\nYaṁ kho, bhikkhave, vediyamāno tajjaṁ tajjaṁ attabhāvaṁ abhinibbatteti puññabhāgiyaṁ vā apuññabhāgiyaṁ vā,\nayaṁ vuccati, bhikkhave, vedanānaṁ vipāko.","en":"And what is the result of feelings?\nWhen one who feels generates a corresponding incarnation, partaking of either good or bad deeds—\nthis is called the result of feelings."}},{"id":"an6.63:19","sourceIds":["an6.63:19.1","an6.63:19.2","an6.63:19.3","an6.63:19.4"],"kind":"text","text":{"pi":"Katamo ca, bhikkhave, vedanānirodho?\nPhassanirodho, bhikkhave, vedanānirodho.\nAyameva ariyo aṭṭhaṅgiko maggo vedanānirodhagāminī paṭipadā, seyyathidaṁ—\nsammādiṭṭhi …pe… sammāsamādhi.","en":"And what is the cessation of feelings?\nWhen contact ceases, feelings cease.\nThe practice that leads to the cessation of feelings is simply this noble eightfold path, that is:\nright view, right purpose, right speech, right action, right livelihood, right effort, right mindfulness, and right immersion."}},{"id":"an6.63:20","sourceIds":["an6.63:20.1","an6.63:20.2","an6.63:20.3"],"kind":"text","text":{"pi":"Yato kho, bhikkhave, ariyasāvako evaṁ vedanaṁ pajānāti, evaṁ vedanānaṁ nidānasambhavaṁ pajānāti, evaṁ vedanānaṁ vemattataṁ pajānāti, evaṁ vedanānaṁ vipākaṁ pajānāti, evaṁ vedanānirodhaṁ pajānāti, evaṁ vedanānirodhagāminiṁ paṭipadaṁ pajānāti. So imaṁ nibbedhikaṁ brahmacariyaṁ pajānāti vedanānirodhaṁ.\nVedanā, bhikkhave, veditabbā …pe… vedanānirodhagāminī paṭipadā veditabbāti,\niti yaṁ taṁ vuttaṁ idametaṁ paṭicca vuttaṁ.","en":"When a noble disciple understands feelings in this way … they understand that this penetrative spiritual life is the cessation of feelings.\n‘Feelings should be known. And their source, diversity, result, cessation, and the practice that leads to their cessation should be known.’\nThat’s what I said, and this is why I said it."}},{"id":"an6.63:21","sourceIds":["an6.63:21.1","an6.63:21.2","an6.63:21.3","an6.63:21.4"],"kind":"text","text":{"pi":"Saññā, bhikkhave, veditabbā …pe… saññānirodhagāminī paṭipadā veditabbāti,\niti kho panetaṁ vuttaṁ. Kiñcetaṁ paṭicca vuttaṁ?\nChayimā, bhikkhave, saññā—\nrūpasaññā, saddasaññā, gandhasaññā, rasasaññā, phoṭṭhabbasaññā, dhammasaññā.","en":"‘Perceptions should be known. And their source, diversity, result, cessation, and the practice that leads to their cessation should be known.’\nThat’s what I said, but why did I say it?\nThere are these six perceptions:\nperceptions of sights, sounds, smells, tastes, touches, and ideas."}},{"id":"an6.63:22","sourceIds":["an6.63:22.1","an6.63:22.2"],"kind":"text","text":{"pi":"Katamo ca, bhikkhave, saññānaṁ nidānasambhavo?\nPhasso, bhikkhave, saññānaṁ nidānasambhavo.","en":"And what is the source of perceptions?\nContact is their source."}},{"id":"an6.63:23","sourceIds":["an6.63:23.1","an6.63:23.2","an6.63:23.3"],"kind":"text","text":{"pi":"Katamā ca, bhikkhave, saññānaṁ vemattatā?\nAññā, bhikkhave, saññā rūpesu, aññā saññā saddesu, aññā saññā gandhesu, aññā saññā rasesu, aññā saññā phoṭṭhabbesu, aññā saññā dhammesu.\nAyaṁ vuccati, bhikkhave, saññānaṁ vemattatā.","en":"And what is the diversity of perceptions?\nThe perceptions of sights, sounds, smells, tastes, touches, and ideas are all different.\nThis is called the diversity of perceptions."}},{"id":"an6.63:24","sourceIds":["an6.63:24.1","an6.63:24.2","an6.63:24.3","an6.63:24.4"],"kind":"text","text":{"pi":"Katamo ca, bhikkhave, saññānaṁ vipāko?\nVohāravepakkaṁ, bhikkhave, saññaṁ vadāmi.\nYathā yathā naṁ sañjānāti tathā tathā voharati, evaṁ saññī ahosinti.\nAyaṁ vuccati, bhikkhave, saññānaṁ vipāko.","en":"And what is the result of perceptions?\nCommunication is the result of perception, I say.\nYou communicate something in whatever manner you perceive it, saying ‘That’s what I perceived.’\nThis is called the result of perceptions."}},{"id":"an6.63:25","sourceIds":["an6.63:25.1","an6.63:25.2","an6.63:25.3","an6.63:25.4"],"kind":"text","text":{"pi":"Katamo ca, bhikkhave, saññānirodho?\nPhassanirodho, bhikkhave, saññānirodho.\nAyameva ariyo aṭṭhaṅgiko maggo saññānirodhagāminī paṭipadā, seyyathidaṁ—\nsammādiṭṭhi …pe… sammāsamādhi.","en":"And what is the cessation of perception?\nWhen contact ceases, perception ceases.\nThe practice that leads to the cessation of perceptions is simply this noble eightfold path, that is:\nright view, right purpose, right speech, right action, right livelihood, right effort, right mindfulness, and right immersion."}},{"id":"an6.63:26","sourceIds":["an6.63:26.1","an6.63:26.2","an6.63:26.3"],"kind":"text","text":{"pi":"Yato kho, bhikkhave, ariyasāvako evaṁ saññaṁ pajānāti, evaṁ saññānaṁ nidānasambhavaṁ pajānāti, evaṁ saññānaṁ vemattataṁ pajānāti, evaṁ saññānaṁ vipākaṁ pajānāti, evaṁ saññānirodhaṁ pajānāti, evaṁ saññānirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti saññānirodhaṁ.\nSaññā, bhikkhave, veditabbā …pe… saññānirodhagāminī paṭipadā veditabbāti.\nIti yaṁ taṁ vuttaṁ idametaṁ paṭicca vuttaṁ.","en":"When a noble disciple understands perception in this way … they understand that this penetrative spiritual life is the cessation of perception.\n‘Perceptions should be known. And their source, diversity, result, cessation, and the practice that leads to their cessation should be known.’\nThat’s what I said, and this is why I said it."}},{"id":"an6.63:27","sourceIds":["an6.63:27.1","an6.63:27.2","an6.63:27.3","an6.63:27.4"],"kind":"text","text":{"pi":"Āsavā, bhikkhave, veditabbā …pe… āsavanirodhagāminī paṭipadā veditabbāti,\niti kho panetaṁ vuttaṁ. Kiñcetaṁ paṭicca vuttaṁ?\nTayome, bhikkhave, āsavā—\nkāmāsavo, bhavāsavo, avijjāsavo.","en":"‘Defilements should be known. And their source, diversity, result, cessation, and the practice that leads to their cessation should be known.’\nThat’s what I said, but why did I say it?\nThere are these three defilements:\nthe defilements of sensuality, desire to be reborn, and ignorance."}},{"id":"an6.63:28","sourceIds":["an6.63:28.1","an6.63:28.2"],"kind":"text","text":{"pi":"Katamo ca, bhikkhave, āsavānaṁ nidānasambhavo?\nAvijjā, bhikkhave, āsavānaṁ nidānasambhavo.","en":"And what is the source of defilements?\nIgnorance is the source of defilements."}},{"id":"an6.63:29","sourceIds":["an6.63:29.1","an6.63:29.2","an6.63:29.3"],"kind":"text","text":{"pi":"Katamā ca, bhikkhave, āsavānaṁ vemattatā?\nAtthi, bhikkhave, āsavā nirayagamanīyā, atthi āsavā tiracchānayonigamanīyā, atthi āsavā pettivisayagamanīyā, atthi āsavā manussalokagamanīyā, atthi āsavā devalokagamanīyā.\nAyaṁ vuccati, bhikkhave, āsavānaṁ vemattatā.","en":"And what is the disparity of defilements?\nThere are defilements that lead to rebirth in hell, the animal realm, the ghost realm, the human world, and the world of the gods.\nThis is called the disparity of defilements."}},{"id":"an6.63:30","sourceIds":["an6.63:30.1","an6.63:30.2"],"kind":"text","text":{"pi":"Katamo ca, bhikkhave, āsavānaṁ vipāko?\nYaṁ kho, bhikkhave, avijjāgato tajjaṁ tajjaṁ attabhāvaṁ abhinibbatteti puññabhāgiyaṁ vā apuññabhāgiyaṁ vā, ayaṁ vuccati, bhikkhave, āsavānaṁ vipāko.","en":"And what is the result of defilements?\nWhen one who is ignorant generates a corresponding incarnation, partaking of either good or bad deeds—this is called the result of defilements."}},{"id":"an6.63:31","sourceIds":["an6.63:31.1","an6.63:31.2","an6.63:31.3","an6.63:31.4"],"kind":"text","text":{"pi":"Katamo ca, bhikkhave, āsavanirodho?\nAvijjānirodho, bhikkhave, āsavanirodho.\nAyameva ariyo aṭṭhaṅgiko maggo āsavanirodhagāminī paṭipadā, seyyathidaṁ—\nsammādiṭṭhi …pe… sammāsamādhi.","en":"And what is the cessation of defilements?\nWhen ignorance ceases, defilements cease.\nThe practice that leads to the cessation of defilements is simply this noble eightfold path, that is:\nright view, right purpose, right speech, right action, right livelihood, right effort, right mindfulness, and right immersion."}},{"id":"an6.63:32","sourceIds":["an6.63:32.1","an6.63:32.2","an6.63:32.3"],"kind":"text","text":{"pi":"Yato kho, bhikkhave, ariyasāvako evaṁ āsave pajānāti, evaṁ āsavānaṁ nidānasambhavaṁ pajānāti, evaṁ āsavānaṁ vemattataṁ pajānāti, evaṁ āsavānaṁ vipākaṁ pajānāti, evaṁ āsavānaṁ nirodhaṁ pajānāti, evaṁ āsavānaṁ nirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti āsavanirodhaṁ.\nĀsavā, bhikkhave, veditabbā …pe… āsavanirodhagāminī paṭipadā veditabbāti.\nIti yaṁ taṁ vuttaṁ idametaṁ paṭicca vuttaṁ.","en":"When a noble disciple understands defilements in this way … they understand that this penetrative spiritual life is the cessation of defilements.\n‘Defilements should be known. And their source, diversity, result, cessation, and the practice that leads to their cessation should be known.’\nThat’s what I said, and this is why I said it."}},{"id":"an6.63:33","sourceIds":["an6.63:33.1","an6.63:33.2","an6.63:33.3","an6.63:33.4","an6.63:33.5"],"kind":"text","text":{"pi":"Kammaṁ, bhikkhave, veditabbaṁ …pe… kammanirodhagāminī paṭipadā veditabbāti, iti kho panetaṁ vuttaṁ.\nKiñcetaṁ paṭicca vuttaṁ?\nCetanāhaṁ, bhikkhave, kammaṁ vadāmi.\nCetayitvā kammaṁ karoti—\nkāyena vācāya manasā.","en":"‘Deeds should be known. And their source, diversity, result, cessation, and the practice that leads to their cessation should be known.’ That’s what I said,\nbut why did I say it?\nIt is intention that I call deeds.\nFor after making a choice one acts\nby way of body, speech, and mind."}},{"id":"an6.63:34","sourceIds":["an6.63:34.1","an6.63:34.2"],"kind":"text","text":{"pi":"Katamo ca, bhikkhave, kammānaṁ nidānasambhavo?\nPhasso, bhikkhave, kammānaṁ nidānasambhavo.","en":"And what is the source of deeds?\nContact is their source."}},{"id":"an6.63:35","sourceIds":["an6.63:35.1","an6.63:35.2","an6.63:35.3"],"kind":"text","text":{"pi":"Katamā ca, bhikkhave, kammānaṁ vemattatā?\nAtthi, bhikkhave, kammaṁ nirayavedanīyaṁ, atthi kammaṁ tiracchānayonivedanīyaṁ, atthi kammaṁ pettivisayavedanīyaṁ, atthi kammaṁ manussalokavedanīyaṁ, atthi kammaṁ devalokavedanīyaṁ.\nAyaṁ vuccati, bhikkhave, kammānaṁ vemattatā.","en":"And what is the disparity of deeds?\nThere are deeds that lead to rebirth in hell, the animal realm, the ghost realm, the human world, and the world of the gods.\nThis is called the disparity of deeds."}},{"id":"an6.63:36","sourceIds":["an6.63:36.1","an6.63:36.2","an6.63:36.3","an6.63:36.4"],"kind":"text","text":{"pi":"Katamo ca, bhikkhave, kammānaṁ vipāko?\nTividhāhaṁ, bhikkhave, kammānaṁ vipākaṁ vadāmi—\ndiṭṭheva dhamme, upapajje vā, apare vā pariyāye.\nAyaṁ vuccati, bhikkhave, kammānaṁ vipāko.","en":"And what is the result of deeds?\nThe result of deeds is threefold, I say:\nin this very life, on rebirth in the next life, or at some later time.\nThis is called the result of deeds."}},{"id":"an6.63:37","sourceIds":["an6.63:37.1","an6.63:37.2","an6.63:37.3","an6.63:37.4"],"kind":"text","text":{"pi":"Katamo ca, bhikkhave, kammanirodho?\nPhassanirodho, bhikkhave, kammanirodho.\nAyameva ariyo aṭṭhaṅgiko maggo kammanirodhagāminī paṭipadā, seyyathidaṁ—\nsammādiṭṭhi …pe… sammāsamādhi.","en":"And what is the cessation of deeds?\nWhen contact ceases, deeds cease.\nThe practice that leads to the cessation of deeds is simply this noble eightfold path, that is:\nright view, right purpose, right speech, right action, right livelihood, right effort, right mindfulness, and right immersion."}},{"id":"an6.63:38","sourceIds":["an6.63:38.1","an6.63:38.2","an6.63:38.3"],"kind":"text","text":{"pi":"Yato kho, bhikkhave, ariyasāvako evaṁ kammaṁ pajānāti, evaṁ kammānaṁ nidānasambhavaṁ pajānāti, evaṁ kammānaṁ vemattataṁ pajānāti, evaṁ kammānaṁ vipākaṁ pajānāti, evaṁ kammanirodhaṁ pajānāti, evaṁ kammanirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti kammanirodhaṁ.\nKammaṁ, bhikkhave, veditabbaṁ …pe… kammanirodhagāminī paṭipadā veditabbāti,\niti yaṁ taṁ vuttaṁ idametaṁ paṭicca vuttaṁ.","en":"When a noble disciple understands deeds in this way … they understand that this penetrative spiritual life is the cessation of deeds.\n‘Deeds should be known. And their source, diversity, result, cessation, and the practice that leads to their cessation should be known.’\nThat’s what I said, and this is why I said it."}},{"id":"an6.63:39","sourceIds":["an6.63:39.1","an6.63:39.2","an6.63:39.3"],"kind":"text","text":{"pi":"Dukkhaṁ, bhikkhave, veditabbaṁ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbāti.\nIti kho panetaṁ vuttaṁ, kiñcetaṁ paṭicca vuttaṁ?\nJātipi dukkhā, jarāpi dukkhā, byādhipi dukkho, maraṇampi dukkhaṁ, sokaparidevadukkhadomanassupāyāsāpi dukkhā, yampicchaṁ na labhati tampi dukkhaṁ, saṅkhittena pañcupādānakkhandhā dukkhā.","en":"‘Suffering should be known. And its source, disparity, result, cessation, and the practice that leads to its cessation should be known.’\nThat’s what I said, but why did I say it?\nRebirth is suffering; old age is suffering; illness is suffering; death is suffering; sorrow, lamentation, pain, sadness, and distress are suffering; not getting what you wish for is suffering. In brief, the five grasping aggregates are suffering."}},{"id":"an6.63:40","sourceIds":["an6.63:40.1","an6.63:40.2"],"kind":"text","text":{"pi":"Katamo ca, bhikkhave, dukkhassa nidānasambhavo?\nTaṇhā, bhikkhave, dukkhassa nidānasambhavo.","en":"And what is the source of suffering?\nCraving is the source of suffering."}},{"id":"an6.63:41","sourceIds":["an6.63:41.1","an6.63:41.2","an6.63:41.3"],"kind":"text","text":{"pi":"Katamā ca, bhikkhave, dukkhassa vemattatā?\nAtthi, bhikkhave, dukkhaṁ adhimattaṁ, atthi parittaṁ, atthi dandhavirāgi, atthi khippavirāgi.\nAyaṁ vuccati, bhikkhave, dukkhassa vemattatā.","en":"And what is the disparity of suffering?\nThere is suffering that is severe, mild, slow to fade, and quick to fade.\nThis is called the disparity of suffering."}},{"id":"an6.63:42","sourceIds":["an6.63:42.1","an6.63:42.2","an6.63:42.3","an6.63:42.4","an6.63:42.5"],"kind":"text","text":{"pi":"Katamo ca, bhikkhave, dukkhassa vipāko?\nIdha, bhikkhave, ekacco yena dukkhena abhibhūto pariyādinnacitto socati kilamati paridevati, urattāḷiṁ kandati, sammohaṁ āpajjati, yena vā pana dukkhena abhibhūto pariyādinnacitto bahiddhā pariyeṭṭhiṁ āpajjati:\n‘ko ekapadaṁ dvipadaṁ jānāti imassa dukkhassa nirodhāyā’ti?\nSammohavepakkaṁ vāhaṁ, bhikkhave, dukkhaṁ vadāmi pariyeṭṭhivepakkaṁ vā.\nAyaṁ vuccati, bhikkhave, dukkhassa vipāko.","en":"And what is the result of suffering?\nIt’s when someone who is overcome and overwhelmed by suffering sorrows and wails and laments, beating their breast and falling into confusion. Or else, overcome by that suffering, they begin an external search, wondering:\n‘Who knows one or two phrases to stop this suffering?’\nThe result of suffering is either confusion or a search, I say.\nThis is called the result of suffering."}},{"id":"an6.63:43","sourceIds":["an6.63:43.1","an6.63:43.2","an6.63:43.3","an6.63:43.4"],"kind":"text","text":{"pi":"Katamo ca, bhikkhave, dukkhanirodho?\nTaṇhānirodho, bhikkhave, dukkhanirodho.\nAyameva ariyo aṭṭhaṅgiko maggo dukkhassa nirodhagāminī paṭipadā, seyyathidaṁ—\nsammādiṭṭhi …pe… sammāsamādhi.","en":"And what is the cessation of suffering?\nWhen craving ceases, suffering ceases.\nThe practice that leads to the cessation of suffering is simply this noble eightfold path, that is:\nright view, right purpose, right speech, right action, right livelihood, right effort, right mindfulness, and right immersion."}},{"id":"an6.63:44","sourceIds":["an6.63:44.1","an6.63:44.2","an6.63:44.3"],"kind":"text","text":{"pi":"Yato kho, bhikkhave, ariyasāvako evaṁ dukkhaṁ pajānāti, evaṁ dukkhassa nidānasambhavaṁ pajānāti, evaṁ dukkhassa vemattataṁ pajānāti, evaṁ dukkhassa vipākaṁ pajānāti, evaṁ dukkhanirodhaṁ pajānāti, evaṁ dukkhanirodhagāminiṁ paṭipadaṁ pajānāti, so imaṁ nibbedhikaṁ brahmacariyaṁ pajānāti dukkhanirodhaṁ.\nDukkhaṁ, bhikkhave, veditabbaṁ, dukkhassa nidānasambhavo veditabbo, dukkhassa vemattatā veditabbā, dukkhassa vipāko veditabbo, dukkhanirodho veditabbo, dukkhanirodhagāminī paṭipadā veditabbāti.\nIti yaṁ taṁ vuttaṁ idametaṁ paṭicca vuttaṁ.","en":"When a noble disciple understands suffering in this way … they understand that this penetrative spiritual life is the cessation of suffering.\n‘Suffering should be known. And its source, diversity, result, cessation, and the practice that leads to its cessation should be known.’\nThat’s what I said, and this is why I said it."}},{"id":"an6.63:45","sourceIds":["an6.63:45.1","an6.63:45.2"],"kind":"text","text":{"pi":"Ayaṁ kho so, bhikkhave, nibbedhikapariyāyo dhammapariyāyo”ti.\nNavamaṁ.","en":"This is the penetrative exposition of the teaching.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an6.63/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}