{"id":"an8.23","title":"With Hatthaka (1st)","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an8.23","title":"With Hatthaka (1st)","units":[{"id":"an8.23:0","sourceIds":["an8.23:0.1","an8.23:0.2","an8.23:0.3"],"kind":"text","text":{"pi":"Aṅguttara Nikāya 8.23\n3. Gahapativagga\nPaṭhamahatthakasutta","en":"Numbered Discourses 8.23\n3. Householders\nWith Hatthaka (1st)"}},{"id":"an8.23:1","sourceIds":["an8.23:1.1","an8.23:1.2","an8.23:1.3","an8.23:1.4","an8.23:1.5","an8.23:1.6","an8.23:1.7","an8.23:1.8","an8.23:1.9","an8.23:1.10","an8.23:1.11","an8.23:1.12","an8.23:1.13","an8.23:1.14"],"kind":"text","text":{"pi":"Ekaṁ samayaṁ bhagavā āḷaviyaṁ viharati aggāḷave cetiye.\nTatra kho bhagavā bhikkhū āmantesi:\n“sattahi, bhikkhave, acchariyehi abbhutehi dhammehi samannāgataṁ hatthakaṁ āḷavakaṁ dhāretha.\nKatamehi sattahi?\nSaddho hi, bhikkhave, hatthako āḷavako;\nsīlavā, bhikkhave, hatthako āḷavako;\nhirīmā, bhikkhave, hatthako āḷavako;\nottappī, bhikkhave, hatthako āḷavako;\nbahussuto, bhikkhave, hatthako āḷavako;\ncāgavā, bhikkhave, hatthako āḷavako;\npaññavā, bhikkhave, hatthako āḷavako—\nimehi kho, bhikkhave, sattahi acchariyehi abbhutehi dhammehi samannāgataṁ hatthakaṁ āḷavakaṁ dhārethā”ti.\nIdamavoca bhagavā.\nIdaṁ vatvāna sugato uṭṭhāyāsanā vihāraṁ pāvisi.","en":"At one time the Buddha was staying near Āḷavī, at Āḷavī’s premier shrine.\nThere the Buddha addressed the mendicants:\n“Mendicants, you should remember the householder Hatthaka of Āḷavī as someone who has seven amazing and incredible qualities.\nWhat seven?\nHe’s faithful,\nethical,\nconscientious,\nprudent,\nlearned,\ngenerous,\nand wise.\nYou should remember the householder Hatthaka of Āḷavī as someone who possesses these seven amazing and incredible qualities.”\nThat is what the Buddha said.\nWhen he had spoken, the Holy One rose from his seat and entered his dwelling."}},{"id":"an8.23:2","sourceIds":["an8.23:2.1","an8.23:2.2"],"kind":"text","text":{"pi":"Atha kho aññataro bhikkhu pubbaṇhasamayaṁ nivāsetvā pattacīvaramādāya yena hatthakassa āḷavakassa nivesanaṁ tenupasaṅkami; upasaṅkamitvā paññatte āsane nisīdi.\nAtha kho hatthako āḷavako yena so bhikkhu tenupasaṅkami; upasaṅkamitvā taṁ bhikkhuṁ abhivādetvā ekamantaṁ nisīdi. Ekamantaṁ nisinnaṁ kho hatthakaṁ āḷavakaṁ so bhikkhu etadavoca:","en":"Then a certain mendicant robed up in the morning and, taking his bowl and robe, went to the home of the householder Hatthaka of Āḷavī, where he sat down on the seat spread out.\nThen Hatthaka went up to that mendicant, bowed, and sat down to one side. The mendicant said to Hatthaka:"}},{"id":"an8.23:3","sourceIds":["an8.23:3.1","an8.23:3.2","an8.23:3.3","an8.23:3.4","an8.23:3.5","an8.23:3.6","an8.23:3.7","an8.23:3.8","an8.23:3.9","an8.23:3.10","an8.23:3.11","an8.23:3.12","an8.23:3.13"],"kind":"text","text":{"pi":"“Sattahi kho tvaṁ, āvuso, acchariyehi abbhutehi dhammehi samannāgato bhagavatā byākato.\nKatamehi sattahi?\n‘Saddho, bhikkhave, hatthako āḷavako;\nsīlavā …pe…\nhirīmā …\nottappī …\nbahussuto …\ncāgavā …\npaññavā, bhikkhave, hatthako āḷavako’ti.\nImehi kho tvaṁ, āvuso, sattahi acchariyehi abbhutehi dhammehi samannāgato bhagavatā byākato”ti.\n“Kaccittha, bhante, na koci gihī ahosi odātavasano”ti?\n“Na hettha, āvuso, koci gihī ahosi odātavasano”ti.\n“Sādhu, bhante, yadettha na koci gihī ahosi odātavasano”ti.","en":"“Respectable sir, the Buddha declared that you have seven amazing and incredible qualities.\nWhat seven?\nHe said that you’re faithful,\nethical,\nconscientious,\nprudent,\nlearned,\ngenerous,\nand wise.\nThe Buddha declared that you possess these seven amazing and incredible qualities.”\n“But sir, I trust that no white-clothed lay people were present?”\n“No, there weren’t any white-clothed lay people present.”\n“That’s good, sir.”"}},{"id":"an8.23:4","sourceIds":["an8.23:4.1","an8.23:4.2"],"kind":"text","text":{"pi":"Atha kho so bhikkhu hatthakassa āḷavakassa nivesane piṇḍapātaṁ gahetvā uṭṭhāyāsanā pakkāmi.\nAtha kho so bhikkhu pacchābhattaṁ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṁ abhivādetvā ekamantaṁ nisīdi. Ekamantaṁ nisinno kho so bhikkhu bhagavantaṁ etadavoca:","en":"Then that mendicant, after taking almsfood in Hatthaka of Āḷavī’s home, rose from his seat and left.\nThen after the meal, on his return from almsround, he went to the Buddha, bowed, sat down to one side, and told him of what he had discussed with the householder Hatthaka. The Buddha said:"}},{"id":"an8.23:5","sourceIds":["an8.23:5.1","an8.23:5.2","an8.23:5.3","an8.23:5.4","an8.23:5.5","an8.23:5.6","an8.23:5.7","an8.23:5.8","an8.23:5.9","an8.23:5.10","an8.23:5.11","an8.23:5.12","an8.23:5.13"],"kind":"text","text":{"pi":"“Idhāhaṁ, bhante, pubbaṇhasamayaṁ nivāsetvā pattacīvaramādāya yena hatthakassa āḷavakassa nivesanaṁ tenupasaṅkamiṁ; upasaṅkamitvā paññatte āsane nisīdiṁ.\nAtha kho, bhante, hatthako āḷavako yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi.\nEkamantaṁ nisinnaṁ kho ahaṁ, bhante, hatthakaṁ āḷavakaṁ etadavacaṁ:\n‘sattahi kho tvaṁ, āvuso, acchariyehi abbhutehi dhammehi samannāgato bhagavatā byākato.\nKatamehi sattahi?\nSaddho, bhikkhave, hatthako āḷavako;\nsīlavā …pe…\nhirīmā …\nottappī …\nbahussuto …\ncāgavā …\npaññavā, bhikkhave, hatthako āḷavakoti.\nImehi kho tvaṁ, āvuso, sattahi acchariyehi abbhutehi dhammehi samannāgato bhagavatā byākato’ti."}},{"id":"an8.23:6","sourceIds":["an8.23:6.1","an8.23:6.2","an8.23:6.3","an8.23:6.4"],"kind":"text","text":{"pi":"Evaṁ vutte, bhante, hatthako maṁ etadavoca:\n‘kaccittha, bhante, na koci gihī ahosi odātavasano’ti?\n‘Na hettha, āvuso, koci gihī ahosi odātavasano’ti.\n‘Sādhu, bhante, yadettha na koci gihī ahosi odātavasano’”ti."}},{"id":"an8.23:7","sourceIds":["an8.23:7.1","an8.23:7.2","an8.23:7.3","an8.23:7.4","an8.23:7.5"],"kind":"text","text":{"pi":"“Sādhu sādhu, bhikkhu.\nAppiccho so, bhikkhu, kulaputto.\nSanteyeva attani kusaladhamme na icchati parehi ñāyamāne.\nTena hi tvaṁ, bhikkhu, imināpi aṭṭhamena acchariyena abbhutena dhammena samannāgataṁ hatthakaṁ āḷavakaṁ dhārehi, yadidaṁ appicchatāyā”ti.\nTatiyaṁ.","en":"“Good, good, mendicant!\nThat gentleman has few wishes.\nHe doesn’t want his own good qualities to be made known to others.\nWell then, mendicant, you should remember the householder Hatthaka of Āḷavī as someone who has this eighth amazing and incredible quality, that is, fewness of wishes.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an8.23/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}