{"id":"an9.5","title":"Powers","languageCodes":["en","pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"an9.5","title":"Powers","units":[{"id":"an9.5:0","sourceIds":["an9.5:0.1","an9.5:0.2","an9.5:0.3"],"kind":"text","text":{"pi":"Aṅguttara Nikāya 9.5\n1. Sambodhivagga\nBalasutta","en":"Numbered Discourses 9.5\n1. Awakening\nPowers"}},{"id":"an9.5:1","sourceIds":["an9.5:1.1","an9.5:1.2","an9.5:1.3","an9.5:1.4","an9.5:1.5","an9.5:1.6"],"kind":"text","text":{"pi":"“Cattārimāni, bhikkhave, balāni.\nKatamāni cattāri?\nPaññābalaṁ, vīriyabalaṁ, anavajjabalaṁ, saṅgāhabalaṁ.\nKatamañca, bhikkhave, paññābalaṁ?\nYe dhammā kusalā kusalasaṅkhātā ye dhammā akusalā akusalasaṅkhātā ye dhammā sāvajjā sāvajjasaṅkhātā ye dhammā anavajjā anavajjasaṅkhātā ye dhammā kaṇhā kaṇhasaṅkhātā ye dhammā sukkā sukkasaṅkhātā ye dhammā sevitabbā sevitabbasaṅkhātā ye dhammā asevitabbā asevitabbasaṅkhātā ye dhammā nālamariyā nālamariyasaṅkhātā ye dhammā alamariyā alamariyasaṅkhātā, tyassa dhammā paññāya vodiṭṭhā honti vocaritā.\nIdaṁ vuccati, bhikkhave, paññābalaṁ.","en":"“Mendicants, there are these four powers.\nWhat four?\nThe powers of wisdom, energy, blamelessness, and inclusiveness.\nAnd what is the power of wisdom?\nOne has clearly seen and clearly contemplated with wisdom those qualities that are skillful and considered to be skillful; those that are unskillful … blameworthy … blameless … dark … bright … to be cultivated … not to be cultivated … not worthy of the noble ones … worthy of the noble ones and considered to be worthy of the noble ones.\nThis is called the power of wisdom."}},{"id":"an9.5:2","sourceIds":["an9.5:2.1","an9.5:2.2","an9.5:2.3","an9.5:2.4"],"kind":"text","text":{"pi":"Katamañca, bhikkhave, vīriyabalaṁ?\nYe dhammā akusalā akusalasaṅkhātā ye dhammā sāvajjā sāvajjasaṅkhātā ye dhammā kaṇhā kaṇhasaṅkhātā ye dhammā asevitabbā asevitabbasaṅkhātā ye dhammā nālamariyā nālamariyasaṅkhātā, tesaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati.\nYe dhammā kusalā kusalasaṅkhātā ye dhammā anavajjā anavajjasaṅkhātā ye dhammā sukkā sukkasaṅkhātā ye dhammā sevitabbā sevitabbasaṅkhātā ye dhammā alamariyā alamariyasaṅkhātā, tesaṁ dhammānaṁ paṭilābhāya chandaṁ janeti vāyamati vīriyaṁ ārabhati cittaṁ paggaṇhāti padahati.\nIdaṁ vuccati, bhikkhave, vīriyabalaṁ.","en":"And what is the power of energy?\nOne generates enthusiasm, tries, makes an effort, exerts the mind, and strives to give up those qualities that are unskillful and considered to be unskillful; those that are blameworthy … dark … not to be cultivated … not worthy of the noble ones and considered to be not worthy of the noble ones.\nOne generates enthusiasm, tries, makes an effort, exerts the mind, and strives to gain those qualities that are skillful and considered to be skillful; those that are blameless … bright … to be cultivated … worthy of the noble ones and considered to be worthy of the noble ones.\nThis is called the power of energy."}},{"id":"an9.5:3","sourceIds":["an9.5:3.1","an9.5:3.2","an9.5:3.3"],"kind":"text","text":{"pi":"Katamañca, bhikkhave, anavajjabalaṁ?\nIdha, bhikkhave, ariyasāvako anavajjena kāyakammena samannāgato hoti, anavajjena vacīkammena samannāgato hoti, anavajjena manokammena samannāgato hoti.\nIdaṁ vuccati, bhikkhave, anavajjabalaṁ.","en":"And what is the power of blamelessness?\nIt’s when a noble disciple has blameless conduct by way of body, speech, and mind.\nThis is called the power of blamelessness."}},{"id":"an9.5:4","sourceIds":["an9.5:4.1","an9.5:4.2","an9.5:4.3","an9.5:4.4","an9.5:4.5","an9.5:4.6","an9.5:4.7","an9.5:4.8","an9.5:4.9"],"kind":"text","text":{"pi":"Katamañca, bhikkhave, saṅgāhabalaṁ?\nCattārimāni, bhikkhave, saṅgahavatthūni—\ndānaṁ, peyyavajjaṁ, atthacariyā, samānattatā.\nEtadaggaṁ, bhikkhave, dānānaṁ yadidaṁ dhammadānaṁ.\nEtadaggaṁ, bhikkhave, peyyavajjānaṁ yadidaṁ atthikassa ohitasotassa punappunaṁ dhammaṁ deseti.\nEtadaggaṁ, bhikkhave, atthacariyānaṁ yadidaṁ assaddhaṁ saddhāsampadāya samādapeti niveseti patiṭṭhāpeti, dussīlaṁ sīlasampadāya … macchariṁ cāgasampadāya … duppaññaṁ paññāsampadāya samādapeti niveseti patiṭṭhāpeti.\nEtadaggaṁ, bhikkhave, samānattatānaṁ yadidaṁ sotāpanno sotāpannassa samānatto, sakadāgāmī sakadāgāmissa samānatto, anāgāmī anāgāmissa samānatto, arahā arahato samānatto.\nIdaṁ vuccati, bhikkhave, saṅgāhabalaṁ.\nImāni kho, bhikkhave, cattāri balāni.","en":"And what is the power of inclusiveness?\nThere are these four ways of being inclusive.\nGiving, kindly words, taking care, and equality.\nThe best of gifts is the gift of the teaching.\nThe best sort of kindly speech is to teach the Dhamma again and again to someone who is engaged and who actively listens.\nThe best way of taking care is to encourage, settle, and ground the unfaithful in faith, the unethical in ethics, the stingy in generosity, and the ignorant in wisdom.\nThe best kind of equality is the equality of a stream-enterer with another stream-enterer, a once-returner with another once-returner, a non-returner with another non-returner, and a perfected one with another perfected one.\nThis is called the power of inclusiveness.\nThese are the four powers."}},{"id":"an9.5:5","sourceIds":["an9.5:5.1","an9.5:5.2","an9.5:5.3","an9.5:5.4","an9.5:5.5","an9.5:5.6","an9.5:5.7","an9.5:5.8","an9.5:5.9","an9.5:5.10","an9.5:5.11","an9.5:5.12","an9.5:5.13","an9.5:5.14","an9.5:5.15","an9.5:5.16","an9.5:5.17","an9.5:5.18","an9.5:5.19","an9.5:5.20","an9.5:5.21","an9.5:5.22","an9.5:5.23","an9.5:5.24","an9.5:5.25"],"kind":"text","text":{"pi":"Imehi kho, bhikkhave, catūhi balehi samannāgato ariyasāvako pañca bhayāni samatikkanto hoti.\nKatamāni pañca?\nĀjīvikabhayaṁ, asilokabhayaṁ, parisasārajjabhayaṁ, maraṇabhayaṁ, duggatibhayaṁ.\nSa kho so, bhikkhave, ariyasāvako iti paṭisañcikkhati:\n‘nāhaṁ ājīvikabhayassa bhāyāmi.\nKissāhaṁ ājīvikabhayassa bhāyissāmi?\nAtthi me cattāri balāni—\npaññābalaṁ, vīriyabalaṁ, anavajjabalaṁ, saṅgāhabalaṁ.\nDuppañño kho ājīvikabhayassa bhāyeyya.\nKusīto ājīvikabhayassa bhāyeyya.\nSāvajjakāyakammantavacīkammantamanokammanto ājīvikabhayassa bhāyeyya.\nAsaṅgāhako ājīvikabhayassa bhāyeyya.\nNāhaṁ asilokabhayassa bhāyāmi …pe…\nnāhaṁ parisasārajjabhayassa bhāyāmi …pe…\nnāhaṁ maraṇabhayassa bhāyāmi …pe…\nnāhaṁ duggatibhayassa bhāyāmi.\nKissāhaṁ duggatibhayassa bhāyissāmi?\nAtthi me cattāri balāni—\npaññābalaṁ, vīriyabalaṁ, anavajjabalaṁ, saṅgāhabalaṁ.\nDuppañño kho duggatibhayassa bhāyeyya.\nKusīto duggatibhayassa bhāyeyya.\nSāvajjakāyakammantavacīkammantamanokammanto duggatibhayassa bhāyeyya.\nAsaṅgāhako duggatibhayassa bhāyeyya’.\nImehi kho, bhikkhave, catūhi balehi samannāgato ariyasāvako imāni pañca bhayāni samatikkanto hotī”ti.\nPañcamaṁ.","en":"A noble disciple who has these four powers has got past five fears.\nWhat five?\nFear regarding livelihood, disrepute, feeling insecure in an assembly, death, and bad rebirth.\nThen that noble disciple reflects:\n‘I have no fear regarding livelihood.\nWhy would I be afraid of that?\nI have these four powers:\nthe powers of wisdom, energy, blamelessness, and inclusiveness.\nA witless person might fear for their livelihood.\nA lazy person might fear for their livelihood.\nSomeone who does blameworthy things by way of body, speech, and mind might fear for their livelihood.\nSomeone who does not include others might fear for their livelihood.\nI have no fear of disrepute …\nI have no fear about feeling insecure in an assembly …\nI have no fear of death …\nI have no fear of a bad rebirth.\nWhy would I be afraid of that?\nI have these four powers:\nthe powers of wisdom, energy, blamelessness, and inclusiveness.\nA witless person might be afraid of a bad rebirth.\nA lazy person might be afraid of a bad rebirth.\nSomeone who does blameworthy things by way of body, speech, and mind might be afraid of a bad rebirth.\nSomeone who does not include others might be afraid of a bad rebirth.’\nA noble disciple who has these four powers has got past these five fears.”"}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/an9.5/en/sujato","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}