{"id":"cnd10","title":"6. Upasīvamāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd10","title":"6. Upasīvamāṇavapucchāniddesa","units":[{"id":"cnd10:0","sourceIds":["cnd10:0.1","cnd10:0.2","cnd10:0.3","cnd10:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n6. Upasīvamāṇavapucchāniddesa"}},{"id":"cnd10:1","sourceIds":["cnd10:1.1","cnd10:1.2","cnd10:1.3","cnd10:1.4","cnd10:1.5"],"kind":"text","text":{"pi":"Eko ahaṁ sakka mahantamoghaṁ,\n(iccāyasmā upasīvo)\nAnissito no visahāmi tārituṁ;\nĀrammaṇaṁ brūhi samantacakkhu,\nYaṁ nissito oghamimaṁ tareyyaṁ."}},{"id":"cnd10:2","sourceIds":["cnd10:2.1","cnd10:2.2","cnd10:2.3","cnd10:2.4","cnd10:2.5","cnd10:2.6","cnd10:2.7","cnd10:2.8","cnd10:2.9","cnd10:2.10","cnd10:2.11"],"kind":"text","text":{"pi":"Eko ahaṁ sakka mahantamoghanti.\nEkoti puggalo vā me dutiyo natthi, dhammo vā me dutiyo natthi, yaṁ vā puggalaṁ nissāya dhammaṁ vā nissāya mahantaṁ kāmoghaṁ bhavoghaṁ diṭṭhoghaṁ avijjoghaṁ tareyyaṁ uttareyyaṁ patareyyaṁ samatikkameyyaṁ vītivatteyyanti.\nSakkāti sakko.\nBhagavā sakyakulā pabbajitotipi sakko.\nAtha vā aḍḍho mahaddhano dhanavātipi sakko.\nTassimāni dhanāni, seyyathidaṁ—\nsaddhādhanaṁ sīladhanaṁ hiridhanaṁ ottappadhanaṁ sutadhanaṁ cāgadhanaṁ paññādhanaṁ satipaṭṭhānadhanaṁ …pe…\nnibbānadhanaṁ.\nImehi anekehi dhanaratanehi aḍḍho mahaddhano dhanavātipi sakko.\nAtha vā sakko pahu visavī alamatto sūro vīro vikkanto abhīrū achambhī anutrāsī apalāyī pahīnabhayabheravo vigatalomahaṁsotipi sakkoti—\neko ahaṁ sakka mahantamoghaṁ."}},{"id":"cnd10:3","sourceIds":["cnd10:3.1","cnd10:3.2","cnd10:3.3","cnd10:3.4","cnd10:3.5"],"kind":"text","text":{"pi":"Iccāyasmā upasīvoti.\nIccāti padasandhi …pe….\nĀyasmāti piyavacanaṁ …pe….\nUpasīvoti tassa brāhmaṇassa nāmaṁ …pe… abhilāpoti—\niccāyasmā upasīvo."}},{"id":"cnd10:4","sourceIds":["cnd10:4.1","cnd10:4.2","cnd10:4.3"],"kind":"text","text":{"pi":"Anissito no visahāmi tāritunti.\nAnissitoti puggalaṁ vā anissito dhammaṁ vā anissito no visahāmi na ussahāmi na sakkomi na paṭibalo mahantaṁ kāmoghaṁ bhavoghaṁ diṭṭhoghaṁ avijjoghaṁ tarituṁ uttarituṁ patarituṁ samatikkamituṁ vītivattitunti—\nanissito no visahāmi tārituṁ."}},{"id":"cnd10:5","sourceIds":["cnd10:5.1","cnd10:5.2","cnd10:5.3"],"kind":"text","text":{"pi":"Ārammaṇaṁ brūhi samantacakkhūti ārammaṇaṁ ālambaṇaṁ nissayaṁ upanissayaṁ brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehi.\nSamantacakkhūti samantacakkhu vuccati sabbaññutañāṇaṁ.\nBhagavā tena sabbaññutañāṇena upeto samupeto upāgato samupāgato upapanno samupapanno samannāgato."}},{"id":"cnd10:6","sourceIds":["cnd10:6.1","cnd10:6.2","cnd10:6.3","cnd10:6.4"],"kind":"text","text":{"pi":"Na tassa adiṭṭhamidhatthi kiñci,\nAtho aviññātamajānitabbaṁ;\nSabbaṁ abhiññāsi yadatthi neyyaṁ,\nTathāgato tena samantacakkhūti."}},{"id":"cnd10:7","sourceIds":["cnd10:7.1"],"kind":"text","text":{"pi":"Ārammaṇaṁ brūhi samantacakkhu."}},{"id":"cnd10:8","sourceIds":["cnd10:8.1","cnd10:8.2","cnd10:8.3","cnd10:8.4"],"kind":"text","text":{"pi":"Yaṁ nissito oghamimaṁ tareyyanti.\nYaṁ nissitoti yaṁ puggalaṁ vā nissito dhammaṁ vā nissito mahantaṁ kāmoghaṁ bhavoghaṁ diṭṭhoghaṁ avijjoghaṁ tareyyaṁ uttareyyaṁ patareyyaṁ samatikkameyyaṁ vītivatteyyanti—\nyaṁ nissito oghamimaṁ tareyyaṁ.\nTenāha so brāhmaṇo—"}},{"id":"cnd10:9","sourceIds":["cnd10:9.1","cnd10:9.2","cnd10:9.3","cnd10:9.4","cnd10:9.5"],"kind":"text","text":{"pi":"“Eko ahaṁ sakka mahantamoghaṁ,\n(iccāyasmā upasīvo)\nAnissito no visahāmi tārituṁ;\nĀrammaṇaṁ brūhi samantacakkhu,\nYaṁ nissito oghamimaṁ tareyyan”ti."}},{"id":"cnd10:10","sourceIds":["cnd10:10.1","cnd10:10.2","cnd10:10.3","cnd10:10.4","cnd10:10.5"],"kind":"text","text":{"pi":"Ākiñcaññaṁ pekkhamāno satimā,\n(upasīvāti bhagavā)\nNatthīti nissāya tarassu oghaṁ;\nKāme pahāya virato kathāhi,\nTaṇhakkhayaṁ nattamahābhipassa."}},{"id":"cnd10:11","sourceIds":["cnd10:11.1","cnd10:11.2","cnd10:11.3","cnd10:11.4","cnd10:11.5","cnd10:11.6","cnd10:11.7","cnd10:11.8","cnd10:11.9","cnd10:11.10","cnd10:11.11","cnd10:11.12","cnd10:11.13","cnd10:11.14","cnd10:11.15","cnd10:11.16","cnd10:11.17","cnd10:11.18","cnd10:11.19","cnd10:11.20","cnd10:11.21","cnd10:11.22","cnd10:11.23","cnd10:11.24","cnd10:11.25","cnd10:11.26","cnd10:11.27","cnd10:11.28","cnd10:11.29","cnd10:11.30","cnd10:11.31","cnd10:11.32","cnd10:11.33","cnd10:11.34","cnd10:11.35","cnd10:11.36","cnd10:11.37","cnd10:11.38","cnd10:11.39","cnd10:11.40","cnd10:11.41","cnd10:11.42","cnd10:11.43","cnd10:11.44","cnd10:11.45"],"kind":"text","text":{"pi":"Ākiñcaññaṁ pekkhamāno satimāti so brāhmaṇo pakatiyā ākiñcaññāyatanasamāpattiṁ lābhīyeva nissayaṁ na jānāti—\n“ayaṁ me nissayo”ti.\nTassa bhagavā nissayañca ācikkhati uttariñca niyyānapathaṁ.\nĀkiñcaññāyatanasamāpattiṁ sato samāpajjitvā tato vuṭṭhahitvā tattha jāte cittacetasike dhamme aniccato pekkhamāno, dukkhato …pe…\nrogato …\ngaṇḍato …\nsallato …\naghato …\nābādhato …\nparato …\npalokato …\nītito …\nupaddavato …\nbhayato …\nupasaggato …\ncalato …\npabhaṅguto …\naddhuvato …\natāṇato …\naleṇato …\nasaraṇato …\nasaraṇībhūtato …\nrittato …\ntucchato …\nsuññato …\nanattato …\nādīnavato …\nvipariṇāmadhammato …\nasārakato …\naghamūlato …\nbhavato …\nvibhavato …\nsāsavato …\nsaṅkhatato …\nmārāmisato …\njātidhammato …\njarādhammato …\nbyādhidhammato …\nmaraṇadhammato …\nsokaparidevadukkhadomanassupāyāsadhammato …\nsamudayadhammato …\natthaṅgamato …\nassādato …\nādīnavato …\nnissaraṇato pekkhamāno dakkhamāno olokayamāno nijjhāyamāno upaparikkhamāno."}},{"id":"cnd10:12","sourceIds":["cnd10:12.1","cnd10:12.2","cnd10:12.3","cnd10:12.4"],"kind":"text","text":{"pi":"Satimāti yā sati anussati paṭissati …pe… sammāsati—\nayaṁ vuccati sati.\nImāya satiyā upeto hoti …pe… samannāgato, so vuccati satimāti—\nākiñcaññaṁ pekkhamāno satimā."}},{"id":"cnd10:13","sourceIds":["cnd10:13.1","cnd10:13.2","cnd10:13.3","cnd10:13.4"],"kind":"text","text":{"pi":"Upasīvāti bhagavāti.\nUpasīvāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\nupasīvāti bhagavā."}},{"id":"cnd10:14","sourceIds":["cnd10:14.1","cnd10:14.2","cnd10:14.3","cnd10:14.4","cnd10:14.5"],"kind":"text","text":{"pi":"Natthīti nissāya tarassu oghanti natthi kiñcīti ākiñcaññāyatanasamāpatti.\nKiṅkāraṇā natthi kiñcīti ākiñcaññāyatanasamāpatti?\nViññāṇañcāyatanasamāpattiṁ sato samāpajjitvā tato vuṭṭhahitvā taññeva viññāṇaṁ abhāveti, vibhāveti, antaradhāpeti, natthi kiñcīti passati.\nTaṅkāraṇā natthi kiñcīti ākiñcaññāyatanasamāpattiṁ nissāya upanissāya ālambaṇaṁ karitvā kāmoghaṁ bhavoghaṁ diṭṭhoghaṁ avijjoghaṁ tarassu uttarassu patarassu samatikkamassu vītivattassūti—\nnatthīti nissāya tarassu oghaṁ."}},{"id":"cnd10:15","sourceIds":["cnd10:15.1","cnd10:15.2","cnd10:15.3","cnd10:15.4","cnd10:15.5","cnd10:15.6","cnd10:15.7","cnd10:15.8","cnd10:15.9","cnd10:15.10","cnd10:15.11","cnd10:15.12"],"kind":"text","text":{"pi":"Kāme pahāya virato kathāhīti.\nKāmāti uddānato dve kāmā—\nvatthukāmā ca kilesakāmā ca …pe…\nime vuccanti vatthukāmā …pe…\nime vuccanti kilesakāmā.\nKāme pahāyāti vatthukāme parijānitvā kilesakāme pahāya pajahitvā vinodetvā byantīkaritvā anabhāvaṁ gametvāti—\nkāme pahāya.\nVirato kathāhīti kathaṅkathā vuccati vicikicchā.\nDukkhe kaṅkhā …pe… chambhitattaṁ cittassa manovilekho kathaṅkathāya ārato virato paṭivirato nikkhanto nissaṭo vippamutto visaññutto vimariyādikatena cetasā viharatīti—\nevampi virato kathāhi …pe…\natha vā dvattiṁsāya tiracchānakathāya ārato virato paṭivirato nikkhanto nissaṭo vippamutto visaññutto vimariyādikatena cetasā viharatīti evampi virato kathāhīti—\nkāme pahāya virato kathāhi."}},{"id":"cnd10:16","sourceIds":["cnd10:16.1","cnd10:16.2","cnd10:16.3","cnd10:16.4","cnd10:16.5","cnd10:16.6","cnd10:16.7"],"kind":"text","text":{"pi":"Taṇhakkhayaṁ nattamahābhipassāti.\nTaṇhāti rūpataṇhā …pe… dhammataṇhā.\nNattaṁ vuccati ratti.\nAhoti divaso.\nRattiñca divā ca taṇhakkhayaṁ rāgakkhayaṁ dosakkhayaṁ mohakkhayaṁ gatikkhayaṁ upapattikkhayaṁ paṭisandhikkhayaṁ bhavakkhayaṁ saṁsārakkhayaṁ vaṭṭakkhayaṁ passa abhipassa dakkha olokaya nijjhāya upaparikkhāti—\ntaṇhakkhayaṁ nattamahābhipassa.\nTenāha bhagavā—"}},{"id":"cnd10:17","sourceIds":["cnd10:17.1","cnd10:17.2","cnd10:17.3","cnd10:17.4","cnd10:17.5"],"kind":"text","text":{"pi":"“Ākiñcaññaṁ pekkhamāno satimā,\n(upasīvāti bhagavā)\nNatthīti nissāya tarassu oghaṁ;\nKāme pahāya virato kathāhi,\nTaṇhakkhayaṁ nattamahābhipassā”ti."}},{"id":"cnd10:18","sourceIds":["cnd10:18.1","cnd10:18.2","cnd10:18.3","cnd10:18.4","cnd10:18.5"],"kind":"text","text":{"pi":"Sabbesu kāmesu yo vītarāgo,\n(iccāyasmā upasīvo)\nĀkiñcaññaṁ nissito hitvā maññaṁ;\nSaññāvimokkhe paramedhimutto,\nTiṭṭhe nu so tattha anānuyāyī."}},{"id":"cnd10:19","sourceIds":["cnd10:19.1","cnd10:19.2","cnd10:19.3","cnd10:19.4","cnd10:19.5","cnd10:19.6","cnd10:19.7","cnd10:19.8","cnd10:19.9"],"kind":"text","text":{"pi":"Sabbesu kāmesu yo vītarāgoti.\nSabbesūti sabbena sabbaṁ sabbathā sabbaṁ asesaṁ nissesaṁ pariyādiyanavacanametaṁ sabbesūti.\nKāmesūti kāmāti uddānato dve kāmā—\nvatthukāmā ca kilesakāmā ca …pe…\nime vuccanti vatthukāmā …pe…\nime vuccanti kilesakāmā.\nSabbesu kāmesu yo vītarāgoti.\nSabbesu kāmesu yo vītarāgo vigatarāgo cattarāgo vantarāgo muttarāgo pahīnarāgo paṭinissaṭṭharāgo vikkhambhanatoti—\nsabbesu kāmesu yo vītarāgo."}},{"id":"cnd10:20","sourceIds":["cnd10:20.1","cnd10:20.2","cnd10:20.3","cnd10:20.4","cnd10:20.5"],"kind":"text","text":{"pi":"Iccāyasmā upasīvoti.\nIccāti padasandhi …pe….\nĀyasmāti piyavacanaṁ …pe….\nUpasīvoti tassa brāhmaṇassa nāmaṁ …pe… abhilāpoti—\niccāyasmā upasīvo."}},{"id":"cnd10:21","sourceIds":["cnd10:21.1","cnd10:21.2","cnd10:21.3"],"kind":"text","text":{"pi":"Ākiñcaññaṁ nissito hitvā maññanti.\nHeṭṭhimā cha samāpattiyo hitvā cajitvā pariccajitvā atikkamitvā samatikkamitvā vītivattitvā ākiñcaññāyatanasamāpattiṁ nissito allīno upagato samupagato ajjhosito adhimuttoti—\nākiñcaññaṁ nissito hitvā maññaṁ."}},{"id":"cnd10:22","sourceIds":["cnd10:22.1","cnd10:22.2","cnd10:22.3"],"kind":"text","text":{"pi":"Saññāvimokkhe paramedhimuttoti saññāvimokkhā vuccanti satta saññāsamāpattiyo.\nTāsaṁ saññāsamāpattīnaṁ ākiñcaññāyatanasamāpattivimokkho aggo ca seṭṭho ca viseṭṭho ca pāmokkho ca uttamo ca pavaro ca, parame agge seṭṭhe viseṭṭhe pāmokkhe uttame pavare adhimuttivimokkhena adhimutto tatrādhimutto tadadhimutto taccarito tabbahulo taggaruko tanninno tappoṇo tappabbhāro tadadhimutto tadadhipateyyoti—\nsaññāvimokkhe paramedhimutto."}},{"id":"cnd10:23","sourceIds":["cnd10:23.1","cnd10:23.2","cnd10:23.3","cnd10:23.4","cnd10:23.5","cnd10:23.6","cnd10:23.7","cnd10:23.8"],"kind":"text","text":{"pi":"Tiṭṭhe nu so tattha anānuyāyīti.\nTiṭṭhe nūti saṁsayapucchā vimatipucchā dveḷhakapucchā anekaṁsapucchā, “evaṁ nu kho, nanu kho, kiṁ nu kho, kathaṁ nu kho”ti—\ntiṭṭhe nu.\nTatthāti ākiñcaññāyatane.\nAnānuyāyīti anānuyāyī aviccamāno avigacchamāno anantaradhāyamāno aparihāyamāno …pe….\nAtha vā arajjamāno adussamāno amuyhamāno akilissamānoti—\ntiṭṭhe nu so tattha anānuyāyī.\nTenāha so brāhmaṇo—"}},{"id":"cnd10:24","sourceIds":["cnd10:24.1","cnd10:24.2","cnd10:24.3","cnd10:24.4","cnd10:24.5"],"kind":"text","text":{"pi":"“Sabbesu kāmesu yo vītarāgo,\n(iccāyasmā upasīvo)\nĀkiñcaññaṁ nissito hitvā maññaṁ;\nSaññāvimokkhe paramedhimutto,\nTiṭṭhe nu so tattha anānuyāyī”ti."}},{"id":"cnd10:25","sourceIds":["cnd10:25.1","cnd10:25.2","cnd10:25.3","cnd10:25.4","cnd10:25.5"],"kind":"text","text":{"pi":"Sabbesu kāmesu yo vītarāgo,\n(upasīvāti bhagavā)\nĀkiñcaññaṁ nissito hitvā maññaṁ;\nSaññāvimokkhe paramedhimutto,\nTiṭṭheyya so tattha anānuyāyī."}},{"id":"cnd10:26","sourceIds":["cnd10:26.1","cnd10:26.2","cnd10:26.3","cnd10:26.4","cnd10:26.5","cnd10:26.6","cnd10:26.7","cnd10:26.8","cnd10:26.9"],"kind":"text","text":{"pi":"Sabbesu kāmesu yo vītarāgoti.\nSabbesūti sabbena sabbaṁ sabbathā sabbaṁ asesaṁ nissesaṁ pariyādiyanavacanametaṁ sabbesūti.\nKāmesūti kāmāti uddānato dve kāmā—\nvatthukāmā ca kilesakāmā ca …pe…\nime vuccanti vatthukāmā …pe…\nime vuccanti kilesakāmā.\nSabbesu kāmesu yo vītarāgoti sabbesu kāmesu yo vītarāgo …pe…\npaṭinissaṭṭharāgo vikkhambhanatoti—\nsabbesu kāmesu yo vītarāgo."}},{"id":"cnd10:27","sourceIds":["cnd10:27.1","cnd10:27.2","cnd10:27.3","cnd10:27.4"],"kind":"text","text":{"pi":"Upasīvāti bhagavāti.\nUpasīvāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\nupasīvāti bhagavā."}},{"id":"cnd10:28","sourceIds":["cnd10:28.1","cnd10:28.2","cnd10:28.3"],"kind":"text","text":{"pi":"Ākiñcaññaṁ nissito hitvā maññanti.\nHeṭṭhimā cha samāpattiyo hitvā cajitvā pariccajitvā atikkamitvā samatikkamitvā vītivattitvā ākiñcaññāyatanasamāpattiṁ nissito allīno upagato samupagato ajjhosito adhimuttoti—\nākiñcaññaṁ nissito hitvā maññaṁ."}},{"id":"cnd10:29","sourceIds":["cnd10:29.1","cnd10:29.2","cnd10:29.3","cnd10:29.4"],"kind":"text","text":{"pi":"Saññāvimokkhe paramedhimuttoti saññāvimokkhā vuccanti satta saññāsamāpattiyo.\nTāsaṁ saññāsamāpattīnaṁ ākiñcaññāyatanasamāpattivimokkho aggo ca seṭṭho ca viseṭṭho ca pāmokkho ca uttamo ca pavaro ca, parame agge seṭṭhe viseṭṭhe pāmokkhe uttame pavare adhimuttivimokkhena adhimutto tatrādhimutto tadadhimutto …pe…\ntadadhipateyyoti—\nsaññāvimokkhe paramedhimutto."}},{"id":"cnd10:30","sourceIds":["cnd10:30.1","cnd10:30.2","cnd10:30.3","cnd10:30.4","cnd10:30.5","cnd10:30.6","cnd10:30.7"],"kind":"text","text":{"pi":"Tiṭṭheyya so tattha anānuyāyīti.\nTiṭṭheyyāti tiṭṭheyya saṭṭhikappasahassāni.\nTatthāti ākiñcaññāyatane.\nAnānuyāyīti anānuyāyī aviccamāno avigacchamāno anantaradhāyamāno aparihāyamāno.\nAtha vā arajjamāno adussamāno amuyhamāno akilissamānoti—\ntiṭṭheyya so tattha anānuyāyī.\nTenāha bhagavā—"}},{"id":"cnd10:31","sourceIds":["cnd10:31.1","cnd10:31.2","cnd10:31.3","cnd10:31.4","cnd10:31.5"],"kind":"text","text":{"pi":"“Sabbesu kāmesu yo vītarāgo,\n(upasīvāti bhagavā)\nĀkiñcaññaṁ nissito hitvā maññaṁ;\nSaññāvimokkhe paramedhimutto,\nTiṭṭheyya so tattha anānuyāyī”ti."}},{"id":"cnd10:32","sourceIds":["cnd10:32.1","cnd10:32.2","cnd10:32.3","cnd10:32.4"],"kind":"text","text":{"pi":"Tiṭṭhe ce so tattha anānuyāyī,\nPūgampi vassāni samantacakkhu;\nTattheva so sītisiyā vimutto,\nCavetha viññāṇaṁ tathāvidhassa."}},{"id":"cnd10:33","sourceIds":["cnd10:33.1","cnd10:33.2","cnd10:33.3","cnd10:33.4","cnd10:33.5"],"kind":"text","text":{"pi":"Tiṭṭhe ce so tattha anānuyāyīti sace so tiṭṭheyya saṭṭhikappasahassāni.\nTatthāti ākiñcaññāyatane.\nAnānuyāyīti anānuyāyī aviccamāno avigacchamāno anantaradhāyamāno aparihāyamāno.\nAtha vā arajjamāno adussamāno amuyhamāno akilissamānoti—\ntiṭṭhe ce so tattha anānuyāyī."}},{"id":"cnd10:34","sourceIds":["cnd10:34.1","cnd10:34.2","cnd10:34.3","cnd10:34.4","cnd10:34.5"],"kind":"text","text":{"pi":"Pūgampi vassāni samantacakkhūti.\nPūgampi vassānīti pūgampi vassāni bahūni vassāni bahūni vassasatāni bahūni vassasahassāni bahūni vassasatasahassāni bahūni kappāni bahūni kappasatāni bahūni kappasahassāni bahūni kappasatasahassāni.\nSamantacakkhūti samantacakkhu vuccati sabbaññutañāṇaṁ …pe…\ntathāgato tena samantacakkhūti—\npūgampi vassāni samantacakkhu."}},{"id":"cnd10:35","sourceIds":["cnd10:35.1","cnd10:35.2","cnd10:35.3","cnd10:35.4","cnd10:35.5","cnd10:35.6","cnd10:35.7"],"kind":"text","text":{"pi":"Tattheva so sītisiyā vimutto, cavetha viññāṇaṁ tathāvidhassāti tattheva so sītibhāvamanuppatto nicco dhuvo sassato avipariṇāmadhammo sassatisamaṁ tatheva tiṭṭheyya.\nAtha vā tassa viññāṇaṁ caveyya ucchijjeyya nasseyya vinasseyya na bhaveyyāti punabbhavapaṭisandhiviññāṇaṁ nibbatteyya kāmadhātuyā vā rūpadhātuyā vā arūpadhātuyā vāti ākiñcaññāyatanaṁ samāpannassa sassatañca ucchedañca pucchati.\nUdāhu tattheva anupādisesāya nibbānadhātuyā parinibbāyeyya.\nAtha vā tassa viññāṇaṁ caveyya puna paṭisandhiviññāṇaṁ nibbatteyya kāmadhātuyā vā rūpadhātuyā vā arūpadhātuyā vāti, ākiñcaññāyatanaṁ upapannassa parinibbānañca paṭisandhiñca pucchati.\nTathāvidhassāti tathāvidhassa tādisassa tassaṇṭhitassa tappakārassa tappaṭibhāgassa ākiñcaññāyatanaṁ upapannassāti—\ntattheva so sītisiyā vimutto, cavetha viññāṇaṁ tathāvidhassa.\nTenāha so brāhmaṇo—"}},{"id":"cnd10:36","sourceIds":["cnd10:36.1","cnd10:36.2","cnd10:36.3","cnd10:36.4"],"kind":"text","text":{"pi":"“Tiṭṭhe ce so tattha anānuyāyī,\nPūgampi vassāni samantacakkhu;\nTattheva so sītisiyā vimutto,\nCavetha viññāṇaṁ tathāvidhassā”ti."}},{"id":"cnd10:37","sourceIds":["cnd10:37.1","cnd10:37.2","cnd10:37.3","cnd10:37.4","cnd10:37.5"],"kind":"text","text":{"pi":"Acci yathā vātavegena khittā,\n(upasīvāti bhagavā)\nAtthaṁ paleti na upeti saṅkhaṁ;\nEvaṁ munī nāmakāyā vimutto,\nAtthaṁ paleti na upeti saṅkhaṁ."}},{"id":"cnd10:38","sourceIds":["cnd10:38.1","cnd10:38.2","cnd10:38.3","cnd10:38.4","cnd10:38.5","cnd10:38.6","cnd10:38.7","cnd10:38.8"],"kind":"text","text":{"pi":"Acci yathā vātavegena khittāti acci vuccati jālasikhā.\nVātāti puratthimā vātā pacchimā vātā uttarā vātā dakkhiṇā vātā sarajā vātā arajā vātā sītā vātā uṇhā vātā parittā vātā adhimattā vātā verambhavātā pakkhavātā supaṇṇavātā tālapaṇṇavātā vidhūpanavātā.\nVātavegena khittāti vātavegena khittā ukkhittā nunnā paṇunnā khambhitā vikkhambhitāti—\nacci yathā vātavegena khittā.\nUpasīvāti bhagavāti.\nUpasīvāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\nupasīvāti bhagavā."}},{"id":"cnd10:39","sourceIds":["cnd10:39.1","cnd10:39.2","cnd10:39.3","cnd10:39.4"],"kind":"text","text":{"pi":"Atthaṁ paleti na upeti saṅkhanti.\nAtthaṁ paletīti atthaṁ paleti, atthaṁ gameti, atthaṁ gacchati nirujjhati vūpasamati paṭippassambhati.\nNa upeti saṅkhanti saṅkhaṁ na upeti, uddesaṁ na upeti, gaṇanaṁ na upeti, paṇṇattiṁ na upeti, “puratthimaṁ vā disaṁ gatā, pacchimaṁ vā disaṁ gatā, uttaraṁ vā disaṁ gatā, dakkhiṇaṁ vā disaṁ gatā uddhaṁ vā gatā, adho vā gatā, tiriyaṁ vā gatā, vidisaṁ vā gatā”ti, so hetu natthi, paccayo natthi, kāraṇaṁ natthi, yena saṅkhaṁ gaccheyyāti—\natthaṁ paleti na upeti saṅkhaṁ."}},{"id":"cnd10:40","sourceIds":["cnd10:40.1","cnd10:40.2","cnd10:40.3","cnd10:40.4","cnd10:40.5","cnd10:40.6","cnd10:40.7","cnd10:40.8","cnd10:40.9"],"kind":"text","text":{"pi":"Evaṁ munī nāmakāyā vimuttoti.\nEvanti opammasampaṭipādanaṁ.\nMunīti monaṁ vuccati ñāṇaṁ …pe… saṅgajālamaticca so muni.\nNāmakāyā vimuttoti so muni pakatiyā pubbeva rūpakāyā vimutto.\nTadaṅgaṁ samatikkamā vikkhambhanappahānena pahīno.\nTassa munino bhavantaṁ āgamma cattāro ariyamaggā paṭiladdhā honti.\nCatunnaṁ ariyamaggānaṁ paṭiladdhattā nāmakāyo ca rūpakāyo ca pariññātā honti.\nNāmakāyassa ca rūpakāyassa ca pariññātattā nāmakāyā ca rūpakāyā ca mutto vimutto suvimutto accantaanupādāvimokkhenāti—\nevaṁ munī nāmakāyā vimutto."}},{"id":"cnd10:41","sourceIds":["cnd10:41.1","cnd10:41.2","cnd10:41.3","cnd10:41.4","cnd10:41.5","cnd10:41.6","cnd10:41.7"],"kind":"text","text":{"pi":"Atthaṁ paleti na upeti saṅkhanti.\nAtthaṁ paletīti anupādisesāya nibbānadhātuyā parinibbāyati.\nNa upeti saṅkhanti anupādisesāya nibbānadhātuyā parinibbuto saṅkhaṁ na upeti, uddesaṁ na upeti, gaṇanaṁ na upeti, paṇṇattiṁ na upeti—\nkhattiyoti vā brāhmaṇoti vā vessoti vā suddoti vā gahaṭṭhoti vā pabbajitoti vā devoti vā manussoti vā rūpīti vā arūpīti vā saññīti vā asaññīti vā nevasaññīnāsaññīti vā.\nSo hetu natthi paccayo natthi kāraṇaṁ natthi yena saṅkhaṁ gaccheyyāti—\natthaṁ paleti na upeti saṅkhaṁ.\nTenāha bhagavā—"}},{"id":"cnd10:42","sourceIds":["cnd10:42.1","cnd10:42.2","cnd10:42.3","cnd10:42.4","cnd10:42.5"],"kind":"text","text":{"pi":"“Acci yathā vātavegena khittā,\n(upasīvāti bhagavā)\nAtthaṁ paleti na upeti saṅkhaṁ;\nEvaṁ munī nāmakāyā vimutto,\nAtthaṁ paleti na upeti saṅkhan”ti."}},{"id":"cnd10:43","sourceIds":["cnd10:43.1","cnd10:43.2","cnd10:43.3","cnd10:43.4"],"kind":"text","text":{"pi":"Atthaṅgato so uda vā so natthi,\nUdāhu ve sassatiyā arogo;\nTaṁ me munī sādhu viyākarohi,\nTathā hi te vidito esa dhammo."}},{"id":"cnd10:44","sourceIds":["cnd10:44.1","cnd10:44.2"],"kind":"text","text":{"pi":"Atthaṅgato so uda vā so natthīti so atthaṅgato udāhu natthi so niruddho ucchinno vinaṭṭhoti—\natthaṅgato so uda vā so natthi."}},{"id":"cnd10:45","sourceIds":["cnd10:45.1","cnd10:45.2"],"kind":"text","text":{"pi":"Udāhu ve sassatiyā arogoti udāhu nicco dhuvo sassato avipariṇāmadhammo sassatisamaṁ tatheva tiṭṭheyyāti—\nudāhu ve sassatiyā arogo."}},{"id":"cnd10:46","sourceIds":["cnd10:46.1","cnd10:46.2","cnd10:46.3","cnd10:46.4","cnd10:46.5"],"kind":"text","text":{"pi":"Taṁ me munī sādhu viyākarohīti.\nTanti yaṁ pucchāmi yaṁ yācāmi yaṁ ajjhesāmi yaṁ pasādemi.\nMunīti monaṁ vuccati ñāṇaṁ …pe… saṅgajālamaticca so muni.\nSādhu viyākarohīti sādhu ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\ntaṁ me munī sādhu viyākarohi."}},{"id":"cnd10:47","sourceIds":["cnd10:47.1","cnd10:47.2","cnd10:47.3"],"kind":"text","text":{"pi":"Tathā hi te vidito esa dhammoti tathā hi te vidito tulito tīrito vibhūto vibhāvito esa dhammoti—\ntathā hi te vidito esa dhammo.\nTenāha so brāhmaṇo—"}},{"id":"cnd10:48","sourceIds":["cnd10:48.1","cnd10:48.2","cnd10:48.3","cnd10:48.4"],"kind":"text","text":{"pi":"“Atthaṅgato so uda vā so natthi,\nUdāhu ve sassatiyā arogo;\nTaṁ me munī sādhu viyākarohi,\nTathā hi te vidito esa dhammo”ti."}},{"id":"cnd10:49","sourceIds":["cnd10:49.1","cnd10:49.2","cnd10:49.3","cnd10:49.4","cnd10:49.5"],"kind":"text","text":{"pi":"Atthaṅgatassa na pamāṇamatthi,\n(upasīvāti bhagavā)\nYena naṁ vajjuṁ taṁ tassa natthi;\nSabbesu dhammesu samūhatesu,\nSamūhatā vādapathāpi sabbe."}},{"id":"cnd10:50","sourceIds":["cnd10:50.1","cnd10:50.2","cnd10:50.3","cnd10:50.4","cnd10:50.5"],"kind":"text","text":{"pi":"Atthaṅgatassa na pamāṇamatthīti atthaṅgatassa anupādisesāya nibbānadhātuyā parinibbutassa rūpapamāṇaṁ natthi, vedanāpamāṇaṁ natthi, saññāpamāṇaṁ natthi, saṅkhārapamāṇaṁ natthi, viññāṇapamāṇaṁ natthi, na atthi na saṁvijjati nupalabbhati pahīnaṁ samucchinnaṁ vūpasantaṁ paṭippassaddhaṁ abhabbuppattikaṁ ñāṇagginā daḍḍhanti—\natthaṅgatassa na pamāṇamatthi.\nUpasīvāti bhagavāti upasīvāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\nupasīvāti bhagavā."}},{"id":"cnd10:51","sourceIds":["cnd10:51.1","cnd10:51.2","cnd10:51.3","cnd10:51.4","cnd10:51.5"],"kind":"text","text":{"pi":"Yena naṁ vajjuṁ taṁ tassa natthīti yena taṁ rāgena vadeyyuṁ, yena dosena vadeyyuṁ, yena mohena vadeyyuṁ, yena mānena vadeyyuṁ, yāya diṭṭhiyā vadeyyuṁ, yena uddhaccena vadeyyuṁ, yāya vicikicchāya vadeyyuṁ, yehi anusayehi vadeyyuṁ—\nrattoti vā duṭṭhoti vā mūḷhoti vā vinibaddhoti vā parāmaṭṭhoti vā vikkhepagatoti vā aniṭṭhaṅgatoti vā thāmagatoti vā, te abhisaṅkhārā pahīnā.\nAbhisaṅkhārānaṁ pahīnattā gatiyā yena taṁ vadeyyuṁ—\nnerayikoti vā tiracchānayonikoti vā pettivisayikoti vā manussoti vā devoti vā rūpīti vā arūpīti vā saññīti vā asaññīti vā nevasaññīnāsaññīti vā, so hetu natthi paccayo natthi kāraṇaṁ natthi yena vadeyyuṁ katheyyuṁ bhaṇeyyuṁ dīpeyyuṁ vohareyyunti—\nyena naṁ vajjuṁ taṁ tassa natthi."}},{"id":"cnd10:52","sourceIds":["cnd10:52.1","cnd10:52.2"],"kind":"text","text":{"pi":"Sabbesu dhammesu samūhatesūti sabbesu dhammesu sabbesu khandhesu sabbesu āyatanesu sabbāsu dhātūsu sabbāsu gatīsu sabbāsu upapattīsu sabbāsu paṭisandhīsu sabbesu bhavesu sabbesu saṁsāresu sabbesu vaṭṭesu ūhatesu samūhatesu uddhatesu samuddhatesu uppāṭitesu samuppāṭitesu pahīnesu samucchinnesu vūpasantesu paṭippassaddhesu abhabbuppattikesu ñāṇagginā daḍḍhesūti—\nsabbesu dhammesu samūhatesu."}},{"id":"cnd10:53","sourceIds":["cnd10:53.1","cnd10:53.2","cnd10:53.3","cnd10:53.4"],"kind":"text","text":{"pi":"Samūhatā vādapathāpi sabbeti vādapathā vuccanti kilesā ca khandhā ca abhisaṅkhārā ca.\nTassa vādā ca vādapathā ca adhivacanāni ca adhivacanapathā ca nirutti ca niruttipathā ca paññatti ca paññattipathā ca ūhatā samūhatā uddhatā samuddhatā uppāṭitā samuppāṭitā pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti—\nsamūhatā vādapathāpi sabbe.\nTenāha bhagavā—"}},{"id":"cnd10:54","sourceIds":["cnd10:54.1","cnd10:54.2","cnd10:54.3","cnd10:54.4","cnd10:54.5"],"kind":"text","text":{"pi":"“Atthaṅgatassa na pamāṇamatthi,\n(upasīvāti bhagavā)\nYena naṁ vajjuṁ taṁ tassa natthi;\nSabbesu dhammesu samūhatesu,\nSamūhatā vādapathāpi sabbe”ti."}},{"id":"cnd10:55","sourceIds":["cnd10:55.1","cnd10:55.2","cnd10:55.3","cnd10:55.4"],"kind":"text","text":{"pi":"Saha gāthāpariyosānā ye te brāhmaṇena saddhiṁ …pe…\npañjaliko namassamāno nisinno hoti—\nsatthā me, bhante bhagavā, sāvakohamasmīti.\nUpasīvamāṇavapucchāniddeso chaṭṭho."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd10/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}