{"id":"cnd11","title":"7. Nandamāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd11","title":"7. Nandamāṇavapucchāniddesa","units":[{"id":"cnd11:0","sourceIds":["cnd11:0.1","cnd11:0.2","cnd11:0.3","cnd11:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n7. Nandamāṇavapucchāniddesa"}},{"id":"cnd11:1","sourceIds":["cnd11:1.1","cnd11:1.2","cnd11:1.3","cnd11:1.4","cnd11:1.5"],"kind":"text","text":{"pi":"Santi loke munayo,\n(iccāyasmā nando)\nJanā vadanti tayidaṁ kathaṁsu;\nÑāṇūpapannaṁ muni no vadanti,\nUdāhu ve jīvitenūpapannaṁ."}},{"id":"cnd11:2","sourceIds":["cnd11:2.1","cnd11:2.2","cnd11:2.3","cnd11:2.4","cnd11:2.5","cnd11:2.6","cnd11:2.7","cnd11:2.8","cnd11:2.9","cnd11:2.10","cnd11:2.11"],"kind":"text","text":{"pi":"Santi loke munayoti.\nSantīti santi saṁvijjanti atthi upalabbhanti.\nLoketi apāyaloke …pe… āyatanaloke.\nMunayoti munināmakā ājīvakā nigaṇṭhā jaṭilā tāpasā.\nDevā loke munayoti sañjānanti, na ca te munayoti.\nSanti loke munayo.\nIccāyasmā nandoti.\nIccāti padasandhi …pe….\nĀyasmāti piyavacanaṁ …pe….\nNandoti tassa brāhmaṇassa nāmaṁ …pe… abhilāpoti—\niccāyasmā nando."}},{"id":"cnd11:3","sourceIds":["cnd11:3.1","cnd11:3.2","cnd11:3.3","cnd11:3.4","cnd11:3.5"],"kind":"text","text":{"pi":"Janā vadanti tayidaṁ kathaṁsūti.\nJanāti khattiyā ca brāhmaṇā ca vessā ca suddā ca gahaṭṭhā ca pabbajitā ca devā ca manussā ca.\nVadantīti kathenti bhaṇanti dīpayanti voharanti.\nTayidaṁ kathaṁsūti saṁsayapucchā vimatipucchā dveḷhakapucchā anekaṁsapucchā “evaṁ nu kho, na nu kho, kiṁ nu kho, kathaṁ nu kho”ti—\njanā vadanti tayidaṁ kathaṁsu."}},{"id":"cnd11:4","sourceIds":["cnd11:4.1","cnd11:4.2","cnd11:4.3"],"kind":"text","text":{"pi":"Ñāṇūpapannaṁ muni no vadantīti.\nAṭṭha samāpattiñāṇena vā pañcābhiññāñāṇena vā upetaṁ samupetaṁ upāgataṁ samupāgataṁ upapannaṁ samupapannaṁ samannāgataṁ muniṁ vadanti kathenti bhaṇanti dīpayanti voharantīti—\nñāṇūpapannaṁ muni no vadanti."}},{"id":"cnd11:5","sourceIds":["cnd11:5.1","cnd11:5.2","cnd11:5.3"],"kind":"text","text":{"pi":"Udāhu ve jīvitenūpapannanti udāhu anekavividhaatiparamadukkarakārikalūkhajīvitānuyogena upetaṁ samupetaṁ upāgataṁ samupāgataṁ upapannaṁ samupapannaṁ samannāgataṁ muniṁ vadanti kathenti bhaṇanti dīpayanti voharantīti—\nudāhu ve jīvitenūpapannaṁ.\nTenāha so brāhmaṇo—"}},{"id":"cnd11:6","sourceIds":["cnd11:6.1","cnd11:6.2","cnd11:6.3","cnd11:6.4","cnd11:6.5"],"kind":"text","text":{"pi":"“Santi loke munayo,\n(iccāyasmā nando)\nJanā vadanti tayidaṁ kathaṁsu;\nÑāṇūpapannaṁ muni no vadanti,\nUdāhu ve jīvitenūpapannan”ti."}},{"id":"cnd11:7","sourceIds":["cnd11:7.1","cnd11:7.2","cnd11:7.3","cnd11:7.4"],"kind":"text","text":{"pi":"Na diṭṭhiyā na sutiyā na ñāṇena,\nMunīdha nanda kusalā vadanti;\nVisenikatvā anīghā nirāsā,\nCaranti ye te munayoti brūmi."}},{"id":"cnd11:8","sourceIds":["cnd11:8.1","cnd11:8.2","cnd11:8.3","cnd11:8.4","cnd11:8.5"],"kind":"text","text":{"pi":"Na diṭṭhiyā na sutiyā na ñāṇenāti.\nNa diṭṭhiyāti na diṭṭhasuddhiyā.\nNa sutiyāti na sutasuddhiyā.\nNa ñāṇenāti napi aṭṭhasamāpattiñāṇena napi pañcābhiññāñāṇena napi micchāñāṇenāti—\nna diṭṭhiyā na sutiyā na ñāṇena."}},{"id":"cnd11:9","sourceIds":["cnd11:9.1","cnd11:9.2","cnd11:9.3"],"kind":"text","text":{"pi":"Munīdha nanda kusalā vadantīti.\nKusalāti ye te khandhakusalā dhātukusalā āyatanakusalā paṭiccasamuppādakusalā satipaṭṭhānakusalā sammappadhānakusalā iddhipādakusalā indriyakusalā balakusalā bojjhaṅgakusalā maggakusalā phalakusalā nibbānakusalā diṭṭhasuddhiyā vā sutasuddhiyā vā aṭṭhasamāpattiñāṇena vā pañcābhiññāñāṇena vā micchāñāṇena vā diṭṭhena vā sutena vā upetaṁ samupetaṁ upāgataṁ samupāgataṁ upapannaṁ samupapannaṁ samannāgataṁ muniṁ na vadanti na kathenti na bhaṇanti na dīpayanti na voharantīti—\nmunīdha nanda kusalā vadanti."}},{"id":"cnd11:10","sourceIds":["cnd11:10.1","cnd11:10.2","cnd11:10.3"],"kind":"text","text":{"pi":"Visenikatvā anīghā nirāsā, caranti ye te munayoti brūmīti\nsenā vuccati mārasenā, kāyaduccaritaṁ mārasenā, vacīduccaritaṁ mārasenā, manoduccaritaṁ mārasenā, rāgo mārasenā, doso mārasenā, moho mārasenā, kodho …pe… upanāho … makkho … paḷāso … issā … macchariyaṁ … māyā … sāṭheyyaṁ … thambho … sārambho … māno … atimāno … mado … pamādo … sabbe kilesā sabbe duccaritā sabbe darathā sabbe pariḷāhā sabbe santāpā sabbākusalābhisaṅkhārā mārasenā.\nVuttañhetaṁ bhagavatā—"}},{"id":"cnd11:11","sourceIds":["cnd11:11.1","cnd11:11.2","cnd11:11.3","cnd11:11.4"],"kind":"text","text":{"pi":"“Kāmā te paṭhamā senā,\ndutiyā arati vuccati;\nTatiyā khuppipāsā te,\ncatutthī taṇhā pavuccati."}},{"id":"cnd11:12","sourceIds":["cnd11:12.1","cnd11:12.2","cnd11:12.3","cnd11:12.4","cnd11:12.5","cnd11:12.6"],"kind":"text","text":{"pi":"Pañcamaṁ thinamiddhaṁ te,\nChaṭṭhā bhīrū pavuccati;\nSattamī vicikicchā te,\nMakkho thambho te aṭṭhamo;\nLābho siloko sakkāro,\nMicchāladdho ca yo yaso."}},{"id":"cnd11:13","sourceIds":["cnd11:13.1","cnd11:13.2","cnd11:13.3","cnd11:13.4","cnd11:13.5","cnd11:13.6"],"kind":"text","text":{"pi":"Yo cattānaṁ samukkaṁse,\npare ca avajānati;\nEsā namuci te senā,\nkaṇhassābhippahārinī;\nNa naṁ asūro jināti,\njetvā ca labhate sukhan”ti."}},{"id":"cnd11:14","sourceIds":["cnd11:14.1","cnd11:14.2","cnd11:14.3","cnd11:14.4","cnd11:14.5","cnd11:14.6","cnd11:14.7","cnd11:14.8","cnd11:14.9","cnd11:14.10"],"kind":"text","text":{"pi":"Yato catūhi ariyamaggehi sabbā ca mārasenā sabbe ca paṭisenikarā kilesā jitā ca parājitā ca bhaggā vippaluggā parammukhā, tena vuccanti visenikatvā.\nAnīghāti rāgo nīgho, doso nīgho, moho nīgho, kodho nīgho, upanāho nīgho …pe… sabbākusalābhisaṅkhārā nīghā.\nYesaṁ ete nīghā pahīnā samucchinnā vūpasantā paṭippassaddhā abhabbuppattikā ñāṇagginā daḍḍhā te vuccanti anīghā.\nNirāsāti āsā vuccati taṇhā.\nYo rāgo sārāgo …pe…\navijjā lobho akusalamūlaṁ.\nYesaṁ esā āsā taṇhā pahīnā samucchinnā vūpasantā paṭippassaddhā abhabbuppattikā ñāṇagginā daḍḍhā, te vuccanti nirāsā arahanto khīṇāsavā.\nVisenikatvā anīghā nirāsā, caranti ye te munayoti brūmīti ye te visenikatvāva anīghā ca nirāsā ca caranti viharanti iriyanti vattenti pālenti yapenti yāpenti, te loke munayoti brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\nvisenikatvā anīghā nirāsā, caranti ye te munayoti brūmi.\nTenāha bhagavā—"}},{"id":"cnd11:15","sourceIds":["cnd11:15.1","cnd11:15.2","cnd11:15.3","cnd11:15.4"],"kind":"text","text":{"pi":"“Na diṭṭhiyā na sutiyā na ñāṇena,\nMunīdha nanda kusalā vadanti;\nVisenikatvā anīghā nirāsā,\nCaranti ye te munayoti brūmī”ti."}},{"id":"cnd11:16","sourceIds":["cnd11:16.1","cnd11:16.2","cnd11:16.3","cnd11:16.4","cnd11:16.5"],"kind":"text","text":{"pi":"Ye kecime samaṇabrāhmaṇāse,\n(iccāyasmā nando)\nDiṭṭhassutenāpi vadanti suddhiṁ;\nSīlabbatenāpi vadanti suddhiṁ,\nAnekarūpena vadanti suddhiṁ."}},{"id":"cnd11:17","sourceIds":["cnd11:17.1","cnd11:17.2","cnd11:17.3"],"kind":"text","text":{"pi":"Kaccissu te bhagavā tattha yatā carantā,\nAtāru jātiñca jarañca mārisa;\nPucchāmi taṁ bhagavā brūhi metaṁ."}},{"id":"cnd11:18","sourceIds":["cnd11:18.1","cnd11:18.2","cnd11:18.3","cnd11:18.4","cnd11:18.5","cnd11:18.6","cnd11:18.7","cnd11:18.8","cnd11:18.9","cnd11:18.10","cnd11:18.11","cnd11:18.12"],"kind":"text","text":{"pi":"Ye kecime samaṇabrāhmaṇāseti.\nYe kecīti sabbena sabbaṁ sabbathā sabbaṁ asesaṁ nissesaṁ pariyādiyanavacanametaṁ—\nye kecīti.\nSamaṇāti ye keci ito bahiddhā pabbajjūpagatā paribbājakasamāpannā.\nBrāhmaṇāti ye keci bhovādikāti—\nye kecime samaṇabrāhmaṇāse.\nIccāyasmā nandoti.\nIccāti padasandhi …pe….\nĀyasmāti piyavacanaṁ …pe….\nNandoti.\nTassa brāhmaṇassa nāmaṁ …pe… abhilāpoti—\niccāyasmā nando."}},{"id":"cnd11:19","sourceIds":["cnd11:19.1","cnd11:19.2","cnd11:19.3","cnd11:19.4"],"kind":"text","text":{"pi":"Diṭṭhassutenāpi vadanti suddhinti diṭṭhenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti;\nsutenapi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti;\ndiṭṭhassutenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\ndiṭṭhassutenāpi vadanti suddhiṁ."}},{"id":"cnd11:20","sourceIds":["cnd11:20.1","cnd11:20.2","cnd11:20.3","cnd11:20.4"],"kind":"text","text":{"pi":"Sīlabbatenāpi vadanti suddhinti sīlenapi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti;\nvatenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti;\nsīlabbatenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\nsīlabbatenāpi vadanti suddhiṁ."}},{"id":"cnd11:21","sourceIds":["cnd11:21.1","cnd11:21.2"],"kind":"text","text":{"pi":"Anekarūpena vadanti suddhinti anekavidhakotūhalamaṅgalena suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\nanekarūpena vadanti suddhiṁ."}},{"id":"cnd11:22","sourceIds":["cnd11:22.1","cnd11:22.2","cnd11:22.3","cnd11:22.4","cnd11:22.5","cnd11:22.6","cnd11:22.7","cnd11:22.8","cnd11:22.9","cnd11:22.10","cnd11:22.11"],"kind":"text","text":{"pi":"Kaccissu te bhagavā tattha yatā carantāti.\nKaccissūti saṁsayapucchā vimatipucchā dveḷhakapucchā anekaṁsapucchā, “evaṁ nu kho, na nu kho, kiṁ nu kho, kathaṁ nu kho”ti—\nkaccissu.\nTeti diṭṭhigatikā.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\nkaccissu te bhagavā.\nTattha yatā carantāti.\nTatthāti sakāya diṭṭhiyā sakāya khantiyā sakāya ruciyā sakāya laddhiyā.\nYatāti yattā paṭiyattā guttā gopitā rakkhitā saṁvutā.\nCarantāti carantā viharantā iriyantā vattentā pālentā yapentā yāpentāti—\nkaccissu te bhagavā tattha yatā carantā."}},{"id":"cnd11:23","sourceIds":["cnd11:23.1","cnd11:23.2","cnd11:23.3","cnd11:23.4"],"kind":"text","text":{"pi":"Atāru jātiñca jarañca mārisāti jātijarāmaraṇaṁ atariṁsu uttariṁsu patariṁsu samatikkamiṁsu vītivattiṁsu.\nMārisāti piyavacanaṁ garuvacanaṁ sagāravasappatissādhivacanametaṁ—\nmārisāti—\natāru jātiñca jarañca mārisa."}},{"id":"cnd11:24","sourceIds":["cnd11:24.1","cnd11:24.2","cnd11:24.3","cnd11:24.4","cnd11:24.5","cnd11:24.6","cnd11:24.7"],"kind":"text","text":{"pi":"Pucchāmi taṁ bhagavā brūhi metanti.\nPucchāmi tanti pucchāmi taṁ yācāmi taṁ ajjhesāmi taṁ, kathayassu meti pucchāmi taṁ.\nBhagavāti …pe…\nsacchikā paññatti, yadidaṁ bhagavāti.\nBrūhi metanti brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\npucchāmi taṁ bhagavā brūhi metaṁ.\nTenāha so brāhmaṇo—"}},{"id":"cnd11:25","sourceIds":["cnd11:25.1","cnd11:25.2","cnd11:25.3","cnd11:25.4","cnd11:25.5"],"kind":"text","text":{"pi":"“Ye kecime samaṇabrāhmaṇāse,\n(iccāyasmā nando)\nDiṭṭhassutenāpi vadanti suddhiṁ;\nSīlabbatenāpi vadanti suddhiṁ,\nAnekarūpena vadanti suddhiṁ."}},{"id":"cnd11:26","sourceIds":["cnd11:26.1","cnd11:26.2","cnd11:26.3"],"kind":"text","text":{"pi":"Kaccissu te bhagavā tattha yatā carantā,\nAtāru jātiñca jarañca mārisa;\nPucchāmi taṁ bhagavā brūhi metan”ti."}},{"id":"cnd11:27","sourceIds":["cnd11:27.1","cnd11:27.2","cnd11:27.3","cnd11:27.4","cnd11:27.5","cnd11:27.6","cnd11:27.7"],"kind":"text","text":{"pi":"Ye kecime samaṇabrāhmaṇāse,\n(nandāti bhagavā)\nDiṭṭhassutenāpi vadanti suddhiṁ;\nSīlabbatenāpi vadanti suddhiṁ,\nAnekarūpena vadanti suddhiṁ;\nKiñcāpi te tattha yatā caranti,\nNātariṁsu jātijaranti brūmi."}},{"id":"cnd11:28","sourceIds":["cnd11:28.1","cnd11:28.2","cnd11:28.3","cnd11:28.4","cnd11:28.5","cnd11:28.6","cnd11:28.7","cnd11:28.8","cnd11:28.9","cnd11:28.10"],"kind":"text","text":{"pi":"Ye kecime samaṇabrāhmaṇāseti.\nYe kecīti sabbena sabbaṁ sabbathā sabbaṁ asesaṁ nissesaṁ pariyādiyanavacanametaṁ—\nye kecīti.\nSamaṇāti ye keci ito bahiddhā pabbajjūpagatā paribbājakasamāpannā.\nBrāhmaṇāti ye keci bhovādikāti—\nye kecime samaṇabrāhmaṇāse.\nNandāti bhagavāti.\nNandāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\nnandāti bhagavā."}},{"id":"cnd11:29","sourceIds":["cnd11:29.1","cnd11:29.2","cnd11:29.3","cnd11:29.4"],"kind":"text","text":{"pi":"Diṭṭhassutenāpi vadanti suddhinti diṭṭhenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti;\nsutenapi suddhiṁ …pe…\ndiṭṭhassutenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\ndiṭṭhassutenāpi vadanti suddhiṁ."}},{"id":"cnd11:30","sourceIds":["cnd11:30.1","cnd11:30.2","cnd11:30.3","cnd11:30.4"],"kind":"text","text":{"pi":"Sīlabbatenāpi vadanti suddhinti sīlenapi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti;\nvatenāpi suddhiṁ …pe… voharanti;\nsīlabbatenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\nsīlabbatenāpi vadanti suddhiṁ."}},{"id":"cnd11:31","sourceIds":["cnd11:31.1","cnd11:31.2"],"kind":"text","text":{"pi":"Anekarūpena vadanti suddhinti anekavidhakotūhalamaṅgalena suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\nanekarūpena vadanti suddhiṁ."}},{"id":"cnd11:32","sourceIds":["cnd11:32.1","cnd11:32.2","cnd11:32.3","cnd11:32.4","cnd11:32.5","cnd11:32.6","cnd11:32.7","cnd11:32.8"],"kind":"text","text":{"pi":"Kiñcāpi te tattha yatā carantīti.\nKiñcāpīti padasandhi padasaṁsaggo padapāripūrī akkharasamavāyo byañjanasiliṭṭhatā padānupubbatāpetaṁ—\nkiñcāpīti.\nTeti diṭṭhigatikā.\nTatthāti sakāya diṭṭhiyā sakāya khantiyā sakāya ruciyā sakāya laddhiyā.\nYatāti yattā paṭiyattā guttā gopitā rakkhitā saṁvutā.\nCarantīti caranti viharanti iriyanti vattenti pālenti yapenti yāpentīti—\nkiñcāpi te tattha yatā caranti."}},{"id":"cnd11:33","sourceIds":["cnd11:33.1","cnd11:33.2","cnd11:33.3"],"kind":"text","text":{"pi":"Nātariṁsu jātijaranti brūmīti jātijarāmaraṇaṁ na tariṁsu na uttariṁsu na patariṁsu na samatikkamiṁsu na vītivattiṁsu, jātijarāmaraṇā anikkhantā anissaṭā anatikkantā asamatikkantā avītivattā, antojātijarāmaraṇe parivattenti, antosaṁsārapathe parivattenti, jātiyā anugatā, jarāya anusaṭā, byādhinā abhibhūtā, maraṇena abbhāhatā atāṇā aleṇā asaraṇā asaraṇībhūtāti brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\nnātariṁsu jātijaranti brūmi.\nTenāha bhagavā—"}},{"id":"cnd11:34","sourceIds":["cnd11:34.1","cnd11:34.2","cnd11:34.3","cnd11:34.4","cnd11:34.5","cnd11:34.6","cnd11:34.7"],"kind":"text","text":{"pi":"“Ye kecime samaṇabrāhmaṇāse,\n(nandāti bhagavā)\nDiṭṭhassutenāpi vadanti suddhiṁ;\nSīlabbatenāpi vadanti suddhiṁ,\nAnekarūpena vadanti suddhiṁ;\nKiñcāpi te tattha yatā caranti,\nNātariṁsu jātijaranti brūmī”ti."}},{"id":"cnd11:35","sourceIds":["cnd11:35.1","cnd11:35.2","cnd11:35.3","cnd11:35.4","cnd11:35.5"],"kind":"text","text":{"pi":"Ye kecime samaṇabrāhmaṇāse,\n(iccāyasmā nando)\nDiṭṭhassutenāpi vadanti suddhiṁ;\nSīlabbatenāpi vadanti suddhiṁ,\nAnekarūpena vadanti suddhiṁ."}},{"id":"cnd11:36","sourceIds":["cnd11:36.1","cnd11:36.2","cnd11:36.3","cnd11:36.4"],"kind":"text","text":{"pi":"Te ce munī brūsi anoghatiṇṇe,\nAtha ko carahi devamanussaloke;\nAtāri jātiñca jarañca mārisa,\nPucchāmi taṁ bhagavā brūhi metaṁ."}},{"id":"cnd11:37","sourceIds":["cnd11:37.1","cnd11:37.2","cnd11:37.3","cnd11:37.4","cnd11:37.5","cnd11:37.6","cnd11:37.7","cnd11:37.8","cnd11:37.9"],"kind":"text","text":{"pi":"Ye kecime samaṇabrāhmaṇāseti.\nYe kecīti sabbena sabbaṁ sabbathā sabbaṁ asesaṁ nissesaṁ pariyādiyanavacanametaṁ—\nye kecīti.\nSamaṇāti ye keci ito bahiddhā pabbajjūpagatā paribbājakasamāpannā.\nBrāhmaṇāti ye keci bhovādikāti—\nye kecime samaṇabrāhmaṇāse.\nIccāyasmā nandoti.\nIccāti padasandhi …pe…\niccāyasmā nando."}},{"id":"cnd11:38","sourceIds":["cnd11:38.1","cnd11:38.2","cnd11:38.3","cnd11:38.4"],"kind":"text","text":{"pi":"Diṭṭhassutenāpi vadanti suddhinti diṭṭhenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti;\nsutenāpi suddhiṁ …pe…\ndiṭṭhassutenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\ndiṭṭhassutenāpi vadanti suddhiṁ."}},{"id":"cnd11:39","sourceIds":["cnd11:39.1","cnd11:39.2","cnd11:39.3","cnd11:39.4"],"kind":"text","text":{"pi":"Sīlabbatenāpi vadanti suddhinti sīlenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti;\nvatenāpi suddhiṁ …pe… voharanti;\nsīlabbatenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\nsīlabbatenāpi vadanti suddhiṁ."}},{"id":"cnd11:40","sourceIds":["cnd11:40.1","cnd11:40.2"],"kind":"text","text":{"pi":"Anekarūpena vadanti suddhinti anekavidhakotūhalamaṅgalena suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti—\nanekarūpena vadanti suddhiṁ."}},{"id":"cnd11:41","sourceIds":["cnd11:41.1","cnd11:41.2","cnd11:41.3","cnd11:41.4","cnd11:41.5","cnd11:41.6"],"kind":"text","text":{"pi":"Te ce munī brūsi anoghatiṇṇeti.\nTe ceti diṭṭhigatike.\nMunīti monaṁ vuccati ñāṇaṁ …pe… saṅgajālamaticca so muni.\nBrūsi anoghatiṇṇeti kāmoghaṁ bhavoghaṁ diṭṭhoghaṁ avijjoghaṁ atiṇṇe anatikkante asamatikkante avītivatte antojātijarāmaraṇe parivattente antosaṁsārapathe parivattente jātiyā anugate jarāya anusaṭe byādhinā abhibhūte maraṇena abbhāhate atāṇe aleṇe asaraṇe asaraṇībhūte.\nBrūsīti brūsi ācikkhasi desesi paññapesi paṭṭhapesi vivarasi vibhajasi uttānīkarosi pakāsesīti—\nte ce munī brūsi anoghatiṇṇe."}},{"id":"cnd11:42","sourceIds":["cnd11:42.1","cnd11:42.2","cnd11:42.3"],"kind":"text","text":{"pi":"Atha ko carahi devamanussaloke, atāri jātiñca jarañca mārisāti atha ko eso sadevake loke samārake sabrahmake sassamaṇabrāhmaṇiyā pajāya sadevamanussāya jātijarāmaraṇaṁ atari uttari patari samatikkami vītivattayi.\nMārisāti piyavacanaṁ garuvacanaṁ sagāravasappatissādhivacanametaṁ mārisāti—\natha ko carahi devamanussaloke, atāri jātiñca jarañca mārisa."}},{"id":"cnd11:43","sourceIds":["cnd11:43.1","cnd11:43.2","cnd11:43.3","cnd11:43.4","cnd11:43.5","cnd11:43.6"],"kind":"text","text":{"pi":"Pucchāmi taṁ bhagavā brūhi metanti.\nPucchāmi tanti pucchāmi taṁ yācāmi taṁ ajjhesāmi taṁ pasādemi taṁ.\nBhagavāti gāravādhivacanametaṁ …pe… sacchikā paññatti, yadidaṁ bhagavāti.\nBrūhi metanti brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\npucchāmi taṁ bhagavā brūhi metaṁ.\nTenāha so brāhmaṇo—"}},{"id":"cnd11:44","sourceIds":["cnd11:44.1","cnd11:44.2","cnd11:44.3","cnd11:44.4","cnd11:44.5"],"kind":"text","text":{"pi":"“Ye kecime samaṇabrāhmaṇāse,\n(iccāyasmā nando)\nDiṭṭhassutenāpi vadanti suddhiṁ;\nSīlabbatenāpi vadanti suddhiṁ,\nAnekarūpena vadanti suddhiṁ."}},{"id":"cnd11:45","sourceIds":["cnd11:45.1","cnd11:45.2","cnd11:45.3","cnd11:45.4"],"kind":"text","text":{"pi":"Te ce munī brūsi anoghatiṇṇe,\nAtha ko carahi devamanussaloke;\nAtāri jātiñca jarañca mārisa,\nPucchāmi taṁ bhagavā brūhi metan”ti."}},{"id":"cnd11:46","sourceIds":["cnd11:46.1","cnd11:46.2","cnd11:46.3","cnd11:46.4","cnd11:46.5"],"kind":"text","text":{"pi":"Nāhaṁ sabbe samaṇabrāhmaṇāse,\n(nandāti bhagavā)\nJātijarāya nivutāti brūmi;\nYe sīdha diṭṭhaṁ va sutaṁ mutaṁ vā,\nSīlabbataṁ vāpi pahāya sabbaṁ."}},{"id":"cnd11:47","sourceIds":["cnd11:47.1","cnd11:47.2","cnd11:47.3"],"kind":"text","text":{"pi":"Anekarūpampi pahāya sabbaṁ,\nTaṇhaṁ pariññāya anāsavāse;\nTe ve narā oghatiṇṇāti brūmi."}},{"id":"cnd11:48","sourceIds":["cnd11:48.1","cnd11:48.2","cnd11:48.3"],"kind":"text","text":{"pi":"Nāhaṁ sabbe samaṇabrāhmaṇāse, (nandāti bhagavā) jātijarāya nivutāti brūmīti nāhaṁ, nanda, sabbe samaṇabrāhmaṇā jātijarāya āvutā nivutā ovutā pihitā paṭicchannā paṭikujjitāti vadāmi.\nAtthi te samaṇabrāhmaṇā yesaṁ jāti ca jarāmaraṇañca pahīnā ucchinnamūlā tālāvatthukatā anabhāvaṅkatā āyatiṁ anuppādadhammāti brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\nnāhaṁ sabbe samaṇabrāhmaṇāse, (nandāti bhagavā) jātijarāya nivutāti brūmi."}},{"id":"cnd11:49","sourceIds":["cnd11:49.1","cnd11:49.2","cnd11:49.3","cnd11:49.4","cnd11:49.5","cnd11:49.6","cnd11:49.7","cnd11:49.8"],"kind":"text","text":{"pi":"Ye sīdha diṭṭhaṁ va sutaṁ mutaṁ vā, sīlabbataṁ vāpi pahāya sabbanti ye sabbā diṭṭhasuddhiyo pahāya jahitvā pajahitvā vinodetvā byantīkaritvā anabhāvaṁ gametvā.\nYe sabbā sutasuddhiyo pahāya …pe…\nye sabbā mutasuddhiyo pahāya,\nye sabbā diṭṭhasutamutasuddhiyo pahāya\nye sabbā sīlasuddhiyo pahāya,\nye sabbā vatasuddhiyo pahāya,\nye sabbā sīlabbatasuddhiyo pahāya jahitvā pajahitvā vinodetvā byantīkaritvā anabhāvaṁ gametvāti—\nye sīdha diṭṭhaṁ va sutaṁ mutaṁ vā, sīlabbataṁ vāpi pahāya sabbaṁ."}},{"id":"cnd11:50","sourceIds":["cnd11:50.1","cnd11:50.2"],"kind":"text","text":{"pi":"Anekarūpampi pahāya sabbanti anekavidhakotūhalamaṅgalena suddhiṁ visuddhiṁ parisuddhiṁ muttiṁ vimuttiṁ parimuttiṁ pahāya jahitvā pajahitvā vinodetvā byantīkaritvā anabhāvaṁ gametvāti—\nanekarūpampi pahāya sabbaṁ."}},{"id":"cnd11:51","sourceIds":["cnd11:51.1","cnd11:51.2","cnd11:51.3","cnd11:51.4","cnd11:51.5","cnd11:51.6","cnd11:51.7"],"kind":"text","text":{"pi":"Taṇhaṁ pariññāya anāsavā se, te ve narā oghatiṇṇāti brūmīti.\nTaṇhāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā.\nTaṇhaṁ pariññāyāti taṇhaṁ tīhi pariññāhi parijānitvā—\nñātapariññāya, tīraṇapariññāya, pahānapariññāya.\nKatamā ñātapariññā?\nTaṇhaṁ jānāti “ayaṁ rūpataṇhā, ayaṁ saddataṇhā, ayaṁ gandhataṇhā, ayaṁ rasataṇhā, ayaṁ phoṭṭhabbataṇhā, ayaṁ dhammataṇhā”ti jānāti passati—\nayaṁ ñātapariññā."}},{"id":"cnd11:52","sourceIds":["cnd11:52.1","cnd11:52.2","cnd11:52.3","cnd11:52.4"],"kind":"text","text":{"pi":"Katamā tīraṇapariññā?\nEvaṁ ñātaṁ katvā taṇhaṁ tīreti aniccato dukkhato rogato gaṇḍato …pe…\nnissaraṇato tīreti—\nayaṁ tīraṇapariññā."}},{"id":"cnd11:53","sourceIds":["cnd11:53.1","cnd11:53.2","cnd11:53.3","cnd11:53.4","cnd11:53.5","cnd11:53.6","cnd11:53.7","cnd11:53.8","cnd11:53.9","cnd11:53.10","cnd11:53.11"],"kind":"text","text":{"pi":"Katamā pahānapariññā?\nEvaṁ tīrayitvā taṇhaṁ pajahati vinodeti byantīkaroti anabhāvaṁ gameti.\nVuttañhetaṁ bhagavatā—\n“yo, bhikkhave, taṇhāya chandarāgo taṁ pajahatha.\nEvaṁ sā taṇhā pahīnā bhavissati ucchinnamūlā tālāvatthukatā anabhāvaṅkatā āyatiṁ anuppādadhammā”.\nAyaṁ pahānapariññā.\nTaṇhaṁ pariññāyāti taṇhaṁ imāhi tīhi pariññāhi parijānitvā.\nAnāsavāti cattāro āsavā—\nkāmāsavo, bhavāsavo, diṭṭhāsavo, avijjāsavo.\nYesaṁ ime āsavā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā, te vuccanti anāsavā arahanto khīṇāsavā—\ntaṇhaṁ pariññāya anāsavā."}},{"id":"cnd11:54","sourceIds":["cnd11:54.1","cnd11:54.2","cnd11:54.3"],"kind":"text","text":{"pi":"Te ve narā oghatiṇṇāti brūmīti ye taṇhaṁ pariññāya anāsavā, te kāmoghaṁ tiṇṇā bhavoghaṁ tiṇṇā diṭṭhoghaṁ tiṇṇā avijjoghaṁ tiṇṇā sabbasaṁsārapathaṁ tiṇṇā uttiṇṇā nitthiṇṇā atikkantā samatikkantā vītivattāti brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\ntaṇhaṁ pariññāya anāsavāse te ve narā oghatiṇṇāti brūmi.\nTenāha bhagavā—"}},{"id":"cnd11:55","sourceIds":["cnd11:55.1","cnd11:55.2","cnd11:55.3","cnd11:55.4","cnd11:55.5"],"kind":"text","text":{"pi":"“Nāhaṁ sabbe samaṇabrāhmaṇāse,\n(nandāti bhagavā)\nJātijarāya nivutāti brūmi;\nYe sīdha diṭṭhaṁ va sutaṁ mutaṁ vā,\nSīlabbataṁ vāpi pahāya sabbaṁ."}},{"id":"cnd11:56","sourceIds":["cnd11:56.1","cnd11:56.2","cnd11:56.3"],"kind":"text","text":{"pi":"Anekarūpampi pahāya sabbaṁ,\nTaṇhaṁ pariññāya anāsavāse;\nTe ve narā oghatiṇṇāti brūmī”ti."}},{"id":"cnd11:57","sourceIds":["cnd11:57.1","cnd11:57.2","cnd11:57.3","cnd11:57.4"],"kind":"text","text":{"pi":"Etābhinandāmi vaco mahesino,\nSukittitaṁ gotamanūpadhīkaṁ;\nYe sīdha diṭṭhaṁ va sutaṁ mutaṁ vā,\nSīlabbataṁ vāpi pahāya sabbaṁ."}},{"id":"cnd11:58","sourceIds":["cnd11:58.1","cnd11:58.2","cnd11:58.3"],"kind":"text","text":{"pi":"Anekarūpampi pahāya sabbaṁ,\nTaṇhaṁ pariññāya anāsavāse;\nAhampi te oghatiṇṇāti brūmi."}},{"id":"cnd11:59","sourceIds":["cnd11:59.1","cnd11:59.2","cnd11:59.3","cnd11:59.4","cnd11:59.5","cnd11:59.6"],"kind":"text","text":{"pi":"Etābhinandāmi vaco mahesinoti.\nEtanti tuyhaṁ vacanaṁ byappathaṁ desanaṁ anusāsanaṁ anusiṭṭhaṁ nandāmi abhinandāmi modāmi anumodāmi icchāmi sādiyāmi patthayāmi pihayāmi abhijappāmi.\nMahesinoti kiṁ mahesi bhagavā?\nMahantaṁ sīlakkhandhaṁ esī gavesī pariyesīti mahesi …pe…\nkahaṁ narāsabhoti mahesīti—\netābhinandāmi vaco mahesino."}},{"id":"cnd11:60","sourceIds":["cnd11:60.1","cnd11:60.2","cnd11:60.3","cnd11:60.4","cnd11:60.5"],"kind":"text","text":{"pi":"Sukittitaṁ gotamanūpadhīkanti.\nSukittitanti sukittitaṁ suācikkhitaṁ sudesitaṁ supaññapitaṁ supaṭṭhapitaṁ suvivaṭaṁ suvibhattaṁ suuttānīkataṁ supakāsitaṁ.\nGotamanūpadhīkanti upadhī vuccanti kilesā ca khandhā ca abhisaṅkhārā ca.\nUpadhippahānaṁ upadhivūpasamaṁ upadhinissaggaṁ upadhipaṭippassaddhaṁ amataṁ nibbānanti—\nsukittitaṁ gotamanūpadhīkaṁ."}},{"id":"cnd11:61","sourceIds":["cnd11:61.1","cnd11:61.2","cnd11:61.3","cnd11:61.4","cnd11:61.5","cnd11:61.6","cnd11:61.7","cnd11:61.8"],"kind":"text","text":{"pi":"Ye sīdha diṭṭhaṁ va sutaṁ mutaṁ vā, sīlabbataṁ vāpi pahāya sabbanti ye sabbā diṭṭhasuddhiyo pahāya jahitvā pajahitvā vinodetvā byantīkaritvā anabhāvaṁ gametvā.\nYe sabbā sutasuddhiyo …pe…\nye sabbā mutasuddhiyo …\nye sabbā diṭṭhasutamutasuddhiyo …\nye sabbā sīlasuddhiyo …\nye sabbā vatasuddhiyo …\nye sabbā sīlabbatasuddhiyo pahāya jahitvā pajahitvā vinodetvā byantīkaritvā anabhāvaṁ gametvāti—\nye sīdha diṭṭhaṁ va sutaṁ mutaṁ vā, sīlabbataṁ vāpi pahāya sabbaṁ."}},{"id":"cnd11:62","sourceIds":["cnd11:62.1","cnd11:62.2"],"kind":"text","text":{"pi":"Anekarūpampi pahāya sabbanti anekavidhakotūhalamaṅgalena suddhiṁ visuddhiṁ parisuddhiṁ muttiṁ vimuttiṁ parimuttiṁ pahāya jahitvā pajahitvā vinodetvā byantīkaritvā anabhāvaṁ gametvāti—\nanekarūpampi pahāya sabbaṁ."}},{"id":"cnd11:63","sourceIds":["cnd11:63.1","cnd11:63.2","cnd11:63.3","cnd11:63.4","cnd11:63.5","cnd11:63.6","cnd11:63.7","cnd11:63.8"],"kind":"text","text":{"pi":"Taṇhaṁ pariññāya anāsavāse, ahampi te oghatiṇṇāti brūmīti.\nTaṇhāti rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā.\nTaṇhaṁ pariññāyāti taṇhaṁ tīhi pariññāhi parijānitvā—\nñātapariññāya, tīraṇapariññāya, pahānapariññāya.\nKatamā ñātapariññā?\nTaṇhaṁ jānāti—\nayaṁ rūpataṇhā, ayaṁ saddataṇhā, ayaṁ gandhataṇhā, ayaṁ rasataṇhā, ayaṁ phoṭṭhabbataṇhā, ayaṁ dhammataṇhāti jānāti passati—\nayaṁ ñātapariññā."}},{"id":"cnd11:64","sourceIds":["cnd11:64.1","cnd11:64.2","cnd11:64.3"],"kind":"text","text":{"pi":"Katamā tīraṇapariññā?\nEvaṁ ñātaṁ katvā taṇhaṁ tīreti aniccato dukkhato rogato gaṇḍato sallato aghato ābādhato parato palokato ītito upaddavato bhayato upasaggato calato pabhaṅguto addhuvato atāṇato aleṇato asaraṇato asaraṇībhūtato rittato tucchato suññato anattato ādīnavato vipariṇāmadhammato asārakato aghamūlato vadhakato vibhavato sāsavato saṅkhatato mārāmisato jātidhammato jarādhammato byādhidhammato maraṇadhammato sokaparidevadukkhadomanassupāyāsadhammato saṅkilesadhammato samudayato atthaṅgamato assādato ādīnavato nissaraṇato tīreti—\nayaṁ tīraṇapariññā."}},{"id":"cnd11:65","sourceIds":["cnd11:65.1","cnd11:65.2","cnd11:65.3"],"kind":"text","text":{"pi":"Katamā pahānapariññā?\nEvaṁ tīrayitvā taṇhaṁ pajahati vinodeti byantīkaroti anabhāvaṁ gameti—\nayaṁ pahānapariññā."}},{"id":"cnd11:66","sourceIds":["cnd11:66.1","cnd11:66.2","cnd11:66.3","cnd11:66.4","cnd11:66.5","cnd11:66.6","cnd11:66.7","cnd11:66.8"],"kind":"text","text":{"pi":"Taṇhaṁ pariññāyāti taṇhaṁ imāhi tīhi pariññāhi parijānitvā.\nAnāsavāti cattāro āsavā—\nkāmāsavo, bhavāsavo, diṭṭhāsavo, avijjāsavo.\nYesaṁ ime āsavā pahīnā ucchinnamūlā tālāvatthukatā anabhāvaṅkatā āyatiṁ anuppādadhammā, te vuccanti anāsavā arahanto khīṇāsavā.\nTaṇhaṁ pariññāya anāsavāse, ahampi te oghatiṇṇāti.\nBrūmīti ye taṇhaṁ pariññāya anāsavā, ahampi te kāmoghaṁ tiṇṇā bhavoghaṁ tiṇṇā diṭṭhoghaṁ tiṇṇā avijjoghaṁ tiṇṇā sabbasaṁsārapathaṁ tiṇṇā uttiṇṇā nitthiṇṇā atikkantā samatikkantā vītivattāti brūmi vadāmīti—\ntaṇhaṁ pariññāya anāsavāse, ahampi te oghatiṇṇāti brūmi.\nTenāha so brāhmaṇo—"}},{"id":"cnd11:67","sourceIds":["cnd11:67.1","cnd11:67.2","cnd11:67.3","cnd11:67.4"],"kind":"text","text":{"pi":"“Etābhinandāmi vaco mahesino,\nSukittitaṁ gotamanūpadhīkaṁ;\nYe sīdha diṭṭhaṁ va sutaṁ mutaṁ vā,\nSīlabbataṁ vāpi pahāya sabbaṁ."}},{"id":"cnd11:68","sourceIds":["cnd11:68.1","cnd11:68.2","cnd11:68.3","cnd11:68.4"],"kind":"text","text":{"pi":"Anekarūpampi pahāya sabbaṁ,\nTaṇhaṁ pariññāya anāsavāse;\nAhampi te oghatiṇṇāti brūmī”ti.\nNandamāṇavapucchāniddeso sattamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd11/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}