{"id":"cnd12","title":"8. Hemakamāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd12","title":"8. Hemakamāṇavapucchāniddesa","units":[{"id":"cnd12:0","sourceIds":["cnd12:0.1","cnd12:0.2","cnd12:0.3","cnd12:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n8. Hemakamāṇavapucchāniddesa"}},{"id":"cnd12:1","sourceIds":["cnd12:1.1","cnd12:1.2","cnd12:1.3","cnd12:1.4","cnd12:1.5","cnd12:1.6","cnd12:1.7"],"kind":"text","text":{"pi":"Ye me pubbe viyākaṁsu,\n(iccāyasmā hemako)\nHuraṁ gotamasāsanā;\nIccāsi iti bhavissati,\nSabbaṁ taṁ itihītihaṁ;\nSabbaṁ taṁ takkavaḍḍhanaṁ,\nNāhaṁ tattha abhiramiṁ."}},{"id":"cnd12:2","sourceIds":["cnd12:2.1","cnd12:2.2","cnd12:2.3","cnd12:2.4","cnd12:2.5","cnd12:2.6","cnd12:2.7","cnd12:2.8"],"kind":"text","text":{"pi":"Ye me pubbe viyākaṁsūti yo ca bāvarī brāhmaṇo ye caññe tassa ācariyā, te sakaṁ diṭṭhiṁ sakaṁ khantiṁ sakaṁ ruciṁ sakaṁ laddhiṁ sakaṁ ajjhāsayaṁ sakaṁ adhippāyaṁ byākaṁsu ācikkhiṁsu desayiṁsu paññapiṁsu paṭṭhapiṁsu vivariṁsu vibhajiṁsu uttānīakaṁsu pakāsesunti—\nye me pubbe viyākaṁsu.\nIccāyasmā hemakoti.\nIccāti padasandhi …pe… padānupubbatāpetaṁ—\niccāti.\nĀyasmāti piyavacanaṁ …pe….\nHemakoti tassa brāhmaṇassa nāmaṁ …pe… abhilāpoti—\niccāyasmā hemako."}},{"id":"cnd12:3","sourceIds":["cnd12:3.1","cnd12:3.2"],"kind":"text","text":{"pi":"Huraṁ gotamasāsanāti huraṁ gotamasāsanā paraṁ gotamasāsanā pure gotamasāsanā paṭhamataraṁ gotamasāsanā buddhasāsanā jinasāsanā tathāgatasāsanā arahantasāsanāti—\nhuraṁ gotamasāsanā."}},{"id":"cnd12:4","sourceIds":["cnd12:4.1","cnd12:4.2"],"kind":"text","text":{"pi":"Iccāsi iti bhavissatīti evaṁ kira āsi, evaṁ kira bhavissatīti—\niccāsi iti bhavissati."}},{"id":"cnd12:5","sourceIds":["cnd12:5.1","cnd12:5.2"],"kind":"text","text":{"pi":"Sabbaṁ taṁ itihītihanti sabbaṁ taṁ itihītihaṁ itikirāya paraṁparāya piṭakasampadāya takkahetu nayahetu ākāraparivitakkena diṭṭhinijjhānakkhantiyā na sāmaṁ sayamabhiññātaṁ na attapaccakkhadhammaṁ kathayiṁsūti—\nsabbaṁ taṁ itihītihaṁ."}},{"id":"cnd12:6","sourceIds":["cnd12:6.1","cnd12:6.2"],"kind":"text","text":{"pi":"Sabbaṁ taṁ takkavaḍḍhananti sabbaṁ taṁ takkavaḍḍhanaṁ vitakkavaḍḍhanaṁ saṅkappavaḍḍhanaṁ kāmavitakkavaḍḍhanaṁ byāpādavitakkavaḍḍhanaṁ vihiṁsāvitakkavaḍḍhanaṁ ñātivitakkavaḍḍhanaṁ janapadavitakkavaḍḍhanaṁ amarāvitakkavaḍḍhanaṁ parānudayatāpaṭisaṁyuttavitakkavaḍḍhanaṁ lābhasakkārasilokapaṭisaṁyuttavitakkavaḍḍhanaṁ anavaññattipaṭisaṁyuttavitakkavaḍḍhananti—\nsabbaṁ taṁ takkavaḍḍhanaṁ."}},{"id":"cnd12:7","sourceIds":["cnd12:7.1","cnd12:7.2","cnd12:7.3"],"kind":"text","text":{"pi":"Nāhaṁ tattha abhiraminti nāhaṁ tattha abhiramiṁ na vindiṁ nādhigacchiṁ na paṭilabhinti—\nnāhaṁ tattha abhiramiṁ.\nTenāha so brāhmaṇo—"}},{"id":"cnd12:8","sourceIds":["cnd12:8.1","cnd12:8.2","cnd12:8.3","cnd12:8.4","cnd12:8.5","cnd12:8.6","cnd12:8.7"],"kind":"text","text":{"pi":"“Ye me pubbe viyākaṁsu,\n(iccāyasmā hemako)\nHuraṁ gotamasāsanā;\nIccāsi iti bhavissati,\nSabbaṁ taṁ itihītihaṁ;\nSabbaṁ taṁ takkavaḍḍhanaṁ,\nNāhaṁ tattha abhiramin”ti."}},{"id":"cnd12:9","sourceIds":["cnd12:9.1","cnd12:9.2","cnd12:9.3","cnd12:9.4"],"kind":"text","text":{"pi":"Tvañca me dhammamakkhāhi,\nTaṇhānigghātanaṁ muni;\nYaṁ viditvā sato caraṁ,\nTare loke visattikaṁ."}},{"id":"cnd12:10","sourceIds":["cnd12:10.1","cnd12:10.2","cnd12:10.3","cnd12:10.4","cnd12:10.5"],"kind":"text","text":{"pi":"Tvañca me dhammamakkhāhīti.\nTvanti bhagavantaṁ bhaṇati.\nDhammamakkhāhīti.\nDhammanti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ, cattāro satipaṭṭhāne cattāro sammappadhāne cattāro iddhipāde pañcindriyāni pañca balāni satta bojjhaṅge ariyaṁ aṭṭhaṅgikaṁ maggaṁ nibbānañca nibbānagāminiñca paṭipadaṁ akkhāhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\ntvañca me dhammamakkhāhi."}},{"id":"cnd12:11","sourceIds":["cnd12:11.1","cnd12:11.2","cnd12:11.3","cnd12:11.4","cnd12:11.5","cnd12:11.6"],"kind":"text","text":{"pi":"Taṇhānigghātanaṁ munīti.\nTaṇhāti—\nrūpataṇhā …pe… dhammataṇhā.\nTaṇhānigghātanaṁ taṇhāpahānaṁ taṇhāvūpasamaṁ taṇhāpaṭinissaggaṁ taṇhāpaṭippassaddhiṁ amataṁ nibbānaṁ.\nMunīti monaṁ vuccati ñāṇaṁ …pe… saṅgajālamaticca so munīti—\ntaṇhānigghātanaṁ muni."}},{"id":"cnd12:12","sourceIds":["cnd12:12.1","cnd12:12.2","cnd12:12.3","cnd12:12.4","cnd12:12.5","cnd12:12.6","cnd12:12.7","cnd12:12.8","cnd12:12.9","cnd12:12.10"],"kind":"text","text":{"pi":"Yaṁ viditvā sato caranti yaṁ viditaṁ katvā tulayitvā tīrayitvā vibhāvayitvā vibhūtaṁ katvā.\n“Sabbe saṅkhārā aniccā”ti viditaṁ katvā tulayitvā tīrayitvā vibhāvayitvā vibhūtaṁ katvā,\n“sabbe saṅkhārā dukkhā”ti …pe…\n“sabbe dhammā anattā”ti …pe…\n“yaṁ kiñci samudayadhammaṁ sabbaṁ taṁ nirodhadhamman”ti viditaṁ katvā tulayitvā tīrayitvā vibhāvayitvā vibhūtaṁ katvā.\nSatoti catūhi kāraṇehi sato—\nkāye kāyānupassanāsatipaṭṭhānaṁ bhāvento sato …pe…\nso vuccati sato.\nCaranti caranto viharanto iriyanto vattento pālento yapento yāpentoti—\nyaṁ viditvā sato caraṁ."}},{"id":"cnd12:13","sourceIds":["cnd12:13.1","cnd12:13.2","cnd12:13.3","cnd12:13.4","cnd12:13.5","cnd12:13.6","cnd12:13.7"],"kind":"text","text":{"pi":"Tare loke visattikanti visattikā vuccati taṇhā.\nYo rāgo sārāgo …pe… abhijjhā lobho akusalamūlaṁ.\nVisattikāti kenaṭṭhena visattikā …pe… visaṭā vitthatāti visattikā.\nLoketi apāyaloke manussaloke devaloke khandhaloke dhātuloke āyatanaloke.\nTare loke visattikanti loke vesā visattikā loke vetaṁ visattikaṁ sato tareyyaṁ uttareyyaṁ patareyyaṁ samatikkameyyaṁ vītivatteyyanti—\ntare loke visattikaṁ.\nTenāha so brāhmaṇo—"}},{"id":"cnd12:14","sourceIds":["cnd12:14.1","cnd12:14.2","cnd12:14.3","cnd12:14.4"],"kind":"text","text":{"pi":"“Tvañca me dhammamakkhāhi,\ntaṇhānigghātanaṁ muni;\nYaṁ viditvā sato caraṁ,\ntare loke visattikan”ti."}},{"id":"cnd12:15","sourceIds":["cnd12:15.1","cnd12:15.2","cnd12:15.3","cnd12:15.4"],"kind":"text","text":{"pi":"Idha diṭṭhasutamutaviññātesu,\nPiyarūpesu hemaka;\nChandarāgavinodanaṁ,\nNibbānapadamaccutaṁ."}},{"id":"cnd12:16","sourceIds":["cnd12:16.1","cnd12:16.2","cnd12:16.3","cnd12:16.4","cnd12:16.5","cnd12:16.6"],"kind":"text","text":{"pi":"Idha diṭṭhasutamutaviññātesūti.\nDiṭṭhanti cakkhunā diṭṭhaṁ;\nsutanti sotena sutaṁ;\nmutanti ghānena ghāyitaṁ jivhāya sāyitaṁ kāyena phuṭṭhaṁ;\nviññātanti manasā viññātanti—\nidha diṭṭhasutamutaviññātesu."}},{"id":"cnd12:17","sourceIds":["cnd12:17.1","cnd12:17.2","cnd12:17.3","cnd12:17.4","cnd12:17.5","cnd12:17.6","cnd12:17.7","cnd12:17.8","cnd12:17.9","cnd12:17.10"],"kind":"text","text":{"pi":"Piyarūpesu hemakāti kiñca loke piyarūpaṁ sātarūpaṁ?\nCakkhu loke piyarūpaṁ sātarūpaṁ, sotaṁ loke …pe… ghānaṁ loke … jivhā loke … kāyo loke … mano loke piyarūpaṁ sātarūpaṁ;\nrūpā loke piyarūpaṁ sātarūpaṁ, saddā loke … gandhā loke … rasā loke … phoṭṭhabbā loke … dhammā loke piyarūpaṁ sātarūpaṁ;\ncakkhuviññāṇaṁ loke piyarūpaṁ sātarūpaṁ, sotaviññāṇaṁ loke piyarūpaṁ sātarūpaṁ, ghānaviññāṇaṁ loke … jivhāviññāṇaṁ loke … kāyaviññāṇaṁ loke … manoviññāṇaṁ loke piyarūpaṁ sātarūpaṁ, cakkhusamphasso loke … sotasamphasso loke … ghānasamphasso loke … jivhāsamphasso loke … kāyasamphasso loke … manosamphasso loke piyarūpaṁ sātarūpaṁ;\ncakkhusamphassajā vedanā loke piyarūpaṁ sātarūpaṁ … sotasamphassajā vedanā … ghānasamphassajā vedanā … jivhāsamphassajā vedanā … kāyasamphassajā vedanā … manosamphassajā vedanā loke piyarūpaṁ sātarūpaṁ;\nrūpasaññā loke … saddasaññā loke … gandhasaññā loke … rasasaññā loke … phoṭṭhabbasaññā loke … dhammasaññā loke piyarūpaṁ sātarūpaṁ, rūpasañcetanā loke … saddasañcetanā loke … gandhasañcetanā loke … rasasañcetanā loke … phoṭṭhabbasañcetanā loke … dhammasañcetanā loke piyarūpaṁ sātarūpaṁ;\nrūpataṇhā loke … saddataṇhā loke … gandhataṇhā loke … rasataṇhā loke … phoṭṭhabbataṇhā loke … dhammataṇhā loke piyarūpaṁ sātarūpaṁ;\nrūpavitakko loke … saddavitakko loke … gandhavitakko loke … rasavitakko loke … phoṭṭhabbavitakko loke … dhammavitakko loke piyarūpaṁ sātarūpaṁ;\nrūpavicāro loke piyarūpaṁ sātarūpaṁ, saddavicāro loke … gandhavicāro loke … rasavicāro loke … phoṭṭhabbavicāro loke … dhammavicāro loke piyarūpaṁ sātarūpanti—\npiyarūpesu hemaka."}},{"id":"cnd12:18","sourceIds":["cnd12:18.1","cnd12:18.2","cnd12:18.3","cnd12:18.4"],"kind":"text","text":{"pi":"Chandarāgavinodananti.\nChandarāgoti yo kāmesu kāmacchando kāmarāgo kāmanandī kāmataṇhā kāmasineho kāmapariḷāho kāmamucchā kāmajjhosānaṁ kāmogho kāmayogo kāmupādānaṁ kāmacchandanīvaraṇaṁ.\nChandarāgavinodananti chandarāgappahānaṁ chandarāgavūpasamaṁ chandarāgapaṭinissaggaṁ chandarāgapaṭippassaddhaṁ amataṁ nibbānanti—\nchandarāgavinodanaṁ."}},{"id":"cnd12:19","sourceIds":["cnd12:19.1","cnd12:19.2","cnd12:19.3","cnd12:19.4"],"kind":"text","text":{"pi":"Nibbānapadamaccutanti nibbānapadaṁ tāṇapadaṁ leṇapadaṁ saraṇapadaṁ abhayapadaṁ.\nAccutanti niccaṁ dhuvaṁ sassataṁ avipariṇāmadhammanti—\nnibbānapadamaccutaṁ.\nTenāha bhagavā—"}},{"id":"cnd12:20","sourceIds":["cnd12:20.1","cnd12:20.2","cnd12:20.3","cnd12:20.4"],"kind":"text","text":{"pi":"“Idha diṭṭhasutamutaviññātesu,\nPiyarūpesu hemaka;\nChandarāgavinodanaṁ,\nNibbānapadamaccutan”ti."}},{"id":"cnd12:21","sourceIds":["cnd12:21.1","cnd12:21.2","cnd12:21.3","cnd12:21.4"],"kind":"text","text":{"pi":"Etadaññāya ye satā,\ndiṭṭhadhammābhinibbutā;\nUpasantā ca te sadā,\ntiṇṇā loke visattikaṁ."}},{"id":"cnd12:22","sourceIds":["cnd12:22.1","cnd12:22.2","cnd12:22.3","cnd12:22.4","cnd12:22.5","cnd12:22.6","cnd12:22.7","cnd12:22.8","cnd12:22.9","cnd12:22.10","cnd12:22.11","cnd12:22.12","cnd12:22.13"],"kind":"text","text":{"pi":"Etadaññāya ye satāti.\nEtanti amataṁ nibbānaṁ.\nYo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṁ.\nAññāyāti aññāya jānitvā tulayitvā tīrayitvā vibhāvayitvā vibhūtaṁ katvā.\n“Sabbe saṅkhārā aniccā”ti aññāya jānitvā tulayitvā tīrayitvā vibhāvayitvā vibhūtaṁ katvā.\n“Sabbe saṅkhārā dukkhā”ti …\n“sabbe dhammā anattā”ti …pe…\n“yaṁ kiñci samudayadhammaṁ sabbaṁ taṁ nirodhadhamman”ti aññāya jānitvā tulayitvā tīrayitvā vibhāvayitvā vibhūtaṁ katvā.\nYeti arahanto khīṇāsavā.\nSatāti catūhi kāraṇehi satā—\nkāye kāyānupassanāsatipaṭṭhānaṁ bhāvitattā satā …pe…\nte vuccanti satāti—\netadaññāya ye satā."}},{"id":"cnd12:23","sourceIds":["cnd12:23.1","cnd12:23.2","cnd12:23.3","cnd12:23.4","cnd12:23.5","cnd12:23.6"],"kind":"text","text":{"pi":"Diṭṭhadhammābhinibbutāti.\nDiṭṭhadhammāti diṭṭhadhammā ñātadhammā tulitadhammā tīritadhammā vibhūtadhammā vibhāvitadhammā.\n“Sabbe saṅkhārā aniccā”ti diṭṭhadhammā …pe…\n“yaṁ kiñci samudayadhammaṁ sabbaṁ taṁ nirodhadhamman”ti diṭṭhadhammā ñātadhammā tulitadhammā tīritadhammā vibhūtadhammā vibhāvitadhammā.\nAbhinibbutāti rāgassa nibbāpitattā nibbutā, dosassa nibbāpitattā nibbutā, mohassa nibbāpitattā nibbutā, kodhassa …pe… upanāhassa … sabbākusalābhisaṅkhārānaṁ santattā samitattā vūpasamitattā nijjhātattā nibbutattā vigatattā paṭippassaddhattā santā upasantā vūpasantā nibbutā paṭippassaddhāti—\ndiṭṭhadhammābhinibbutā."}},{"id":"cnd12:24","sourceIds":["cnd12:24.1","cnd12:24.2","cnd12:24.3","cnd12:24.4","cnd12:24.5"],"kind":"text","text":{"pi":"Upasantā ca te sadāti.\nUpasantāti rāgassa upasamitattā nibbāpitattā upasantā …pe… dosassa … mohassa … kodhassa … upanāhassa …pe… sabbākusalābhisaṅkhārānaṁ santattā samitattā vūpasamitattā nijjhātattā nibbutattā vigatattā paṭippassaddhattā santā upasantā vūpasantā nibbutā paṭippassaddhāti upasantā.\nTeti arahanto khīṇāsavā.\nSadāti sadā sabbakālaṁ niccakālaṁ dhuvakālaṁ satataṁ samitaṁ abbokiṇṇaṁ poṅkhānupoṅkhaṁ udakūmikajātaṁ avīcisantatisahitaṁ phassitaṁ purebhattaṁ pacchābhattaṁ purimayāmaṁ majjhimayāmaṁ pacchimayāmaṁ kāḷe juṇhe vasse hemante gimhe purime vayokhandhe majjhime vayokhandhe pacchime vayokhandheti—\nupasantā ca te sadā."}},{"id":"cnd12:25","sourceIds":["cnd12:25.1","cnd12:25.2","cnd12:25.3","cnd12:25.4","cnd12:25.5","cnd12:25.6","cnd12:25.7"],"kind":"text","text":{"pi":"Tiṇṇā loke visattikanti visattikā vuccati taṇhā.\nYo rāgo sārāgo …pe… abhijjhā lobho akusalamūlaṁ.\nVisattikāti kenaṭṭhena visattikā …pe… visaṭā vitthatāti visattikā.\nLoketi apāyaloke …pe… āyatanaloke.\nTiṇṇā loke visattikanti loke vesā visattikā loke vetaṁ visattikaṁ tiṇṇā uttiṇṇā nitthiṇṇā atikkantā samatikkantā vītivattāti—\ntiṇṇā loke visattikaṁ.\nTenāha bhagavā—"}},{"id":"cnd12:26","sourceIds":["cnd12:26.1","cnd12:26.2","cnd12:26.3","cnd12:26.4"],"kind":"text","text":{"pi":"“Etadaññāya ye satā,\ndiṭṭhadhammābhinibbutā;\nUpasantā ca te sadā,\ntiṇṇā loke visattikan”ti."}},{"id":"cnd12:27","sourceIds":["cnd12:27.1","cnd12:27.2","cnd12:27.3"],"kind":"text","text":{"pi":"Saha gāthāpariyosānā …pe…\nsatthā me, bhante, bhagavā, sāvakohamasmīti.\nHemakamāṇavapucchāniddeso aṭṭhamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd12/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}