{"id":"cnd14","title":"10. Kappamāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd14","title":"10. Kappamāṇavapucchāniddesa","units":[{"id":"cnd14:0","sourceIds":["cnd14:0.1","cnd14:0.2","cnd14:0.3","cnd14:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n10. Kappamāṇavapucchāniddesa"}},{"id":"cnd14:1","sourceIds":["cnd14:1.1","cnd14:1.2","cnd14:1.3","cnd14:1.4","cnd14:1.5","cnd14:1.6","cnd14:1.7"],"kind":"text","text":{"pi":"Majjhe sarasmiṁ tiṭṭhataṁ,\n(iccāyasmā kappo)\nOghe jāte mahabbhaye;\nJarāmaccuparetānaṁ,\nDīpaṁ pabrūhi mārisa;\nTvañca me dīpamakkhāhi,\nYathāyidaṁ nāparaṁ siyā."}},{"id":"cnd14:2","sourceIds":["cnd14:2.1","cnd14:2.2","cnd14:2.3"],"kind":"text","text":{"pi":"Majjhe sarasmiṁ tiṭṭhatanti saro vuccati saṁsāro āgamanaṁ gamanaṁ gamanāgamanaṁ kālaṁ gati bhavābhavo cuti ca upapatti ca nibbatti ca bhedo ca jāti ca jarā ca maraṇañca.\nSaṁsārassa purimāpi koṭi na paññāyati, pacchimāpi koṭi na paññāyati;\nmajjheva saṁsāre sattā ṭhitā patiṭṭhitā allīnā upagatā ajjhositā adhimuttā."}},{"id":"cnd14:3","sourceIds":["cnd14:3.1","cnd14:3.2","cnd14:3.3","cnd14:3.4","cnd14:3.5","cnd14:3.6","cnd14:3.7","cnd14:3.8","cnd14:3.9","cnd14:3.10"],"kind":"text","text":{"pi":"Kathaṁ saṁsārassa purimā koṭi na paññāyati?\nEttakā jātiyo vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni jātisatāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni jātisahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni jātisatasahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakā jātikoṭiyo vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni jātikoṭisatāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni jātikoṭisahassāni vaṭṭaṁ vatti, tato paraṁ na vattatīti, hevaṁ natthi.\nEvampi saṁsārassa purimā koṭi na paññāyati.\nEttakāni jātikoṭisatasahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati."}},{"id":"cnd14:4","sourceIds":["cnd14:4.1","cnd14:4.2","cnd14:4.3","cnd14:4.4","cnd14:4.5","cnd14:4.6","cnd14:4.7","cnd14:4.8"],"kind":"text","text":{"pi":"Ettakāni vassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni vassasatāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni vassasahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni vassasatasahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakā vassakoṭiyo vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni vassakoṭisatāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni vassakoṭisahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni vassakoṭisatasahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati."}},{"id":"cnd14:5","sourceIds":["cnd14:5.1","cnd14:5.2","cnd14:5.3","cnd14:5.4","cnd14:5.5","cnd14:5.6","cnd14:5.7","cnd14:5.8"],"kind":"text","text":{"pi":"Ettakāni kappāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni kappasatāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni kappasahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni kappasatasahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakā kappakoṭiyo vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni kappakoṭisatāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni kappakoṭisahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati.\nEttakāni kappakoṭisatasahassāni vaṭṭaṁ vatti, tato paraṁ na vattatīti hevaṁ natthi, evampi saṁsārassa purimā koṭi na paññāyati."}},{"id":"cnd14:6","sourceIds":["cnd14:6.1","cnd14:6.2","cnd14:6.3","cnd14:6.4","cnd14:6.5"],"kind":"text","text":{"pi":"Vuttañhetaṁ bhagavatā—\n“anamataggoyaṁ, bhikkhave, saṁsāro, pubbā koṭi na paññāyati avijjānīvaraṇānaṁ sattānaṁ taṇhāsaṁyojanānaṁ sandhāvataṁ saṁsarataṁ.\nEvaṁ dīgharattaṁ kho, bhikkhave, dukkhaṁ paccanubhūtaṁ tibbaṁ paccanubhūtaṁ byasanaṁ paccanubhūtaṁ, kaṭasī vaḍḍhitā.\nYāvañcidaṁ, bhikkhave, alameva sabbasaṅkhāresu nibbindituṁ alaṁ virajjituṁ alaṁ vimuccitun”ti.\nEvampi saṁsārassa purimā koṭi na paññāyati."}},{"id":"cnd14:7","sourceIds":["cnd14:7.1","cnd14:7.2","cnd14:7.3","cnd14:7.4","cnd14:7.5","cnd14:7.6","cnd14:7.7","cnd14:7.8","cnd14:7.9","cnd14:7.10","cnd14:7.11"],"kind":"text","text":{"pi":"Kathaṁ saṁsārassa pacchimā koṭi na paññāyati?\nEttakā jātiyo vaṭṭaṁ vattissati, tato paraṁ na vattissatīti hevaṁ natthi, evampi saṁsārassa pacchimā koṭi na paññāyati.\nEttakāni jātisatāni, ettakāni jātisahassāni, ettakāni jātisatasahassāni …pe…\nettakā jātikoṭiyo, ettakāni jātikoṭisatāni, ettakāni jātikoṭisahassāni, ettakāni jātikoṭisatasahassāni, ettakāni vassāni, ettakāni vassasatāni, ettakāni vassasahassāni, ettakāni vassasatasahassāni, ettakā vassakoṭiyo, ettakāni vassakoṭisatāni, ettakāni vassakoṭisahassāni, ettakāni vassakoṭisatasahassāni, ettakāni kappāni, ettakāni kappasatāni, ettakāni kappasahassāni, ettakāni kappasatasahassāni, ettakā kappakoṭiyo, ettakāni kappakoṭisatāni, ettakāni kappakoṭisahassāni, ettakāni kappakoṭisatasahassāni vaṭṭaṁ vattissati, tato paraṁ na vattissatīti hevaṁ natthi, evampi saṁsārassa pacchimā koṭi na paññāyati.\nEvampi saṁsārassa purimāpi koṭi na paññāyati, pacchimāpi koṭi na paññāyati, majjheva saṁsāre sattā ṭhitā patiṭṭhitā allīnā upagatā ajjhositā adhimuttāti—\nmajjhe sarasmiṁ tiṭṭhataṁ.\nIccāyasmā kappoti.\nIccāti padasandhi …pe….\nĀyasmāti piyavacanaṁ …pe….\nKappoti tassa brāhmaṇassa nāmaṁ …pe… abhilāpoti—\niccāyasmā kappo."}},{"id":"cnd14:8","sourceIds":["cnd14:8.1","cnd14:8.2","cnd14:8.3"],"kind":"text","text":{"pi":"Oghe jāte mahabbhayeti kāmoghe bhavoghe diṭṭhoghe avijjoghe jāte sañjāte nibbatte abhinibbatte pātubhūte.\nMahabbhayeti jātibhaye jarābhaye byādhibhaye maraṇabhayeti—\noghe jāte mahabbhaye."}},{"id":"cnd14:9","sourceIds":["cnd14:9.1","cnd14:9.2","cnd14:9.3"],"kind":"text","text":{"pi":"Jarāmaccuparetānanti jarāya phuṭṭhānaṁ paretānaṁ samohitānaṁ samannāgatānaṁ.\nMaccunā phuṭṭhānaṁ paretānaṁ samohitānaṁ samannāgatānaṁ, jātiyā anugatānaṁ jarāya anusaṭānaṁ byādhinā abhibhūtānaṁ maraṇena abbhāhatānaṁ atāṇānaṁ aleṇānaṁ asaraṇānaṁ asaraṇībhūtānanti—\njarāmaccuparetānaṁ."}},{"id":"cnd14:10","sourceIds":["cnd14:10.1","cnd14:10.2","cnd14:10.3"],"kind":"text","text":{"pi":"Dīpaṁ pabrūhi mārisāti dīpaṁ tāṇaṁ leṇaṁ saraṇaṁ gatiṁ parāyanaṁ brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehi.\nMārisāti piyavacanaṁ garuvacanaṁ sagāravasappatissādhivacanametaṁ mārisāti—\ndīpaṁ pabrūhi mārisa."}},{"id":"cnd14:11","sourceIds":["cnd14:11.1","cnd14:11.2","cnd14:11.3","cnd14:11.4"],"kind":"text","text":{"pi":"Tvañca me dīpamakkhāhīti.\nTvanti bhagavantaṁ bhaṇati.\nDīpamakkhāhīti dīpaṁ tāṇaṁ leṇaṁ saraṇaṁ gatiṁ parāyanaṁ akkhāhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\ntvañca me dīpamakkhāhi."}},{"id":"cnd14:12","sourceIds":["cnd14:12.1","cnd14:12.2","cnd14:12.3","cnd14:12.4"],"kind":"text","text":{"pi":"Yathāyidaṁ nāparaṁ siyāti yathayidaṁ dukkhaṁ idheva nirujjheyya vūpasameyya atthaṁ gaccheyya paṭippassambheyya punapaṭisandhikaṁ dukkhaṁ na nibbatteyya, kāmadhātuyā vā rūpadhātuyā vā arūpadhātuyā vā kāmabhave vā rūpabhave vā arūpabhave vā saññābhave vā asaññābhave vā nevasaññānāsaññābhave vā ekavokārabhave vā catuvokārabhave vā pañcavokārabhave vā punagatiyā vā upapattiyā vā paṭisandhiyā vā bhave vā saṁsāre vā vaṭṭe vā na janeyya na sañjaneyya na nibbatteyya nābhinibbatteyya.\nIdheva nirujjheyya vūpasameyya atthaṁ gaccheyya paṭippassambheyyāti—\nyathāyidaṁ nāparaṁ siyā.\nTenāha so brāhmaṇo—"}},{"id":"cnd14:13","sourceIds":["cnd14:13.1","cnd14:13.2","cnd14:13.3","cnd14:13.4","cnd14:13.5","cnd14:13.6","cnd14:13.7"],"kind":"text","text":{"pi":"“Majjhe sarasmiṁ tiṭṭhataṁ,\n(iccāyasmā kappo)\nOghe jāte mahabbhaye;\nJarāmaccuparetānaṁ,\nDīpaṁ pabrūhi mārisa;\nTvañca me dīpamakkhāhi,\nYathāyidaṁ nāparaṁ siyā”ti."}},{"id":"cnd14:14","sourceIds":["cnd14:14.1","cnd14:14.2","cnd14:14.3","cnd14:14.4","cnd14:14.5"],"kind":"text","text":{"pi":"Majjhe sarasmiṁ tiṭṭhataṁ,\n(kappāti bhagavā)\nOghe jāte mahabbhaye;\nJarāmaccuparetānaṁ,\nDīpaṁ pabrūmi kappa te."}},{"id":"cnd14:15","sourceIds":["cnd14:15.1","cnd14:15.2","cnd14:15.3"],"kind":"text","text":{"pi":"Majjhe sarasmiṁ tiṭṭhatanti saro vuccati saṁsāro āgamanaṁ gamanaṁ gamanāgamanaṁ kālaṁ gati bhavābhavo, cuti ca upapatti ca nibbatti ca bhedo ca jāti ca jarā ca maraṇañca.\nSaṁsārassa purimāpi koṭi na paññāyati, pacchimāpi koṭi na paññāyati.\nMajjheva saṁsāre sattā ṭhitā patiṭṭhitā allīnā upagatā ajjhositā adhimuttā."}},{"id":"cnd14:16","sourceIds":["cnd14:16.1","cnd14:16.2","cnd14:16.3","cnd14:16.4","cnd14:16.5","cnd14:16.6","cnd14:16.7","cnd14:16.8","cnd14:16.9","cnd14:16.10","cnd14:16.11"],"kind":"text","text":{"pi":"Kathaṁ saṁsārassa purimā koṭi na paññāyati …pe…\nevaṁ saṁsārassa purimā koṭi na paññāyati.\nKathaṁ saṁsārassa pacchimā koṭi na paññāyati …pe…\nevaṁ saṁsārassa pacchimā koṭi na paññāyati.\nEvaṁ saṁsārassa purimāpi koṭi na paññāyati, pacchimāpi koṭi na paññāyati.\nMajjheva saṁsāre sattā ṭhitā patiṭṭhitā allīnā upagatā ajjhositā adhimuttāti—\nmajjhe sarasmiṁ tiṭṭhataṁ.\nKappāti bhagavāti.\nKappāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\nkappāti bhagavā."}},{"id":"cnd14:17","sourceIds":["cnd14:17.1","cnd14:17.2","cnd14:17.3"],"kind":"text","text":{"pi":"Oghe jāte mahabbhayeti kāmoghe bhavoghe diṭṭhoghe avijjoghe jāte sañjāte nibbatte abhinibbatte pātubhūte.\nMahabbhayeti jātibhaye jarābhaye byādhibhaye maraṇabhayeti—\noghe jāte mahabbhaye."}},{"id":"cnd14:18","sourceIds":["cnd14:18.1","cnd14:18.2"],"kind":"text","text":{"pi":"Jarāmaccuparetānanti jarāya phuṭṭhānaṁ paretānaṁ samohitānaṁ samannāgatānaṁ, maccunā phuṭṭhānaṁ paretānaṁ samohitānaṁ samannāgatānaṁ jātiyā anugatānaṁ jarāya anusaṭānaṁ byādhinā abhibhūtānaṁ maraṇena abbhāhatānaṁ atāṇānaṁ aleṇānaṁ asaraṇānaṁ asaraṇībhūtānanti—\njarāmaccuparetānaṁ."}},{"id":"cnd14:19","sourceIds":["cnd14:19.1","cnd14:19.2","cnd14:19.3"],"kind":"text","text":{"pi":"Dīpaṁ pabrūmi kappa teti dīpaṁ tāṇaṁ leṇaṁ saraṇaṁ gatiṁ parāyanaṁ brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\ndīpaṁ pabrūmi kappa te.\nTenāha bhagavā—"}},{"id":"cnd14:20","sourceIds":["cnd14:20.1","cnd14:20.2","cnd14:20.3","cnd14:20.4","cnd14:20.5"],"kind":"text","text":{"pi":"“Majjhe sarasmiṁ tiṭṭhataṁ,\n(kappāti bhagavā)\nOghe jāte mahabbhaye;\nJarāmaccuparetānaṁ,\nDīpaṁ pabrūmi kappa te”ti."}},{"id":"cnd14:21","sourceIds":["cnd14:21.1","cnd14:21.2","cnd14:21.3","cnd14:21.4"],"kind":"text","text":{"pi":"Akiñcanaṁ anādānaṁ,\netaṁ dīpaṁ anāparaṁ;\nNibbānaṁ iti naṁ brūmi,\njarāmaccuparikkhayaṁ."}},{"id":"cnd14:22","sourceIds":["cnd14:22.1","cnd14:22.2","cnd14:22.3","cnd14:22.4","cnd14:22.5","cnd14:22.6","cnd14:22.7","cnd14:22.8","cnd14:22.9"],"kind":"text","text":{"pi":"Akiñcanaṁ anādānanti.\nKiñcananti—\nrāgakiñcanaṁ dosakiñcanaṁ mohakiñcanaṁ mānakiñcanaṁ diṭṭhikiñcanaṁ kilesakiñcanaṁ duccaritakiñcanaṁ;\nkiñcanappahānaṁ kiñcanavūpasamaṁ kiñcanapaṭinissaggaṁ kiñcanapaṭippassaddhiṁ amataṁ nibbānanti—\nakiñcanaṁ.\nAnādānanti ādānaṁ vuccati taṇhā.\nYo rāgo sārāgo …pe… abhijjhā lobho akusalamūlaṁ.\nĀdānappahānaṁ ādānavūpasamaṁ ādānapaṭinissaggaṁ ādānapaṭippassaddhiṁ amataṁ nibbānanti—\nakiñcanaṁ anādānaṁ."}},{"id":"cnd14:23","sourceIds":["cnd14:23.1","cnd14:23.2","cnd14:23.3","cnd14:23.4"],"kind":"text","text":{"pi":"Etaṁ dīpaṁ anāparanti etaṁ dīpaṁ tāṇaṁ leṇaṁ saraṇaṁ gati parāyanaṁ.\nAnāparanti tamhā paro añño dīpo natthi.\nAtha kho so evaṁ dīpo aggo ca seṭṭho ca viseṭṭho ca pāmokkho ca uttamo ca pavaro cāti—\netaṁ dīpaṁ anāparaṁ."}},{"id":"cnd14:24","sourceIds":["cnd14:24.1","cnd14:24.2","cnd14:24.3","cnd14:24.4","cnd14:24.5","cnd14:24.6","cnd14:24.7"],"kind":"text","text":{"pi":"Nibbānaṁ iti naṁ brūmīti vānaṁ vuccati taṇhā.\nYo rāgo sārāgo …pe… abhijjhā lobho akusalamūlaṁ.\nVānappahānaṁ vānavūpasamaṁ vānapaṭinissaggaṁ vānapaṭippassaddhiṁ amataṁ nibbānaṁ.\nItīti padasandhi padasaṁsaggo padapāripūrī akkharasamavāyo byañjanasiliṭṭhatā padānupubbatāpetaṁ—\nitīti.\nBrūmīti brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\nnibbānaṁ iti naṁ brūmi."}},{"id":"cnd14:25","sourceIds":["cnd14:25.1","cnd14:25.2","cnd14:25.3"],"kind":"text","text":{"pi":"Jarāmaccuparikkhayanti jarāmaraṇassa pahānaṁ vūpasamaṁ paṭinissaggaṁ paṭippassaddhiṁ amataṁ nibbānanti—\njarāmaccuparikkhayaṁ.\nTenāha bhagavā—"}},{"id":"cnd14:26","sourceIds":["cnd14:26.1","cnd14:26.2","cnd14:26.3","cnd14:26.4"],"kind":"text","text":{"pi":"“Akiñcanaṁ anādānaṁ,\netaṁ dīpaṁ anāparaṁ;\nNibbānaṁ iti naṁ brūmi,\njarāmaccuparikkhayan”ti."}},{"id":"cnd14:27","sourceIds":["cnd14:27.1","cnd14:27.2","cnd14:27.3","cnd14:27.4"],"kind":"text","text":{"pi":"Etadaññāya ye satā,\nDiṭṭhadhammābhinibbutā;\nNa te māravasānugā,\nNa te mārassa paddhagū."}},{"id":"cnd14:28","sourceIds":["cnd14:28.1","cnd14:28.2","cnd14:28.3","cnd14:28.4","cnd14:28.5","cnd14:28.6","cnd14:28.7","cnd14:28.8","cnd14:28.9","cnd14:28.10"],"kind":"text","text":{"pi":"Etadaññāya ye satāti.\nEtanti amataṁ nibbānaṁ.\nYo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṁ.\nAññāyāti aññāya jānitvā tulayitvā tīrayitvā vibhāvayitvā vibhūtaṁ katvā, “sabbe saṅkhārā aniccā”ti …pe…\n“yaṁ kiñci samudayadhammaṁ, sabbaṁ taṁ nirodhadhamman”ti aññāya jānitvā tulayitvā tīrayitvā vibhāvayitvā vibhūtaṁ katvā.\nYeti arahanto khīṇāsavā.\nSatāti catūhi kāraṇehi satā—\nkāye kāyānupassanāsatipaṭṭhānaṁ bhāventā satā …pe…\nte vuccanti satāti—\netadaññāya ye satā."}},{"id":"cnd14:29","sourceIds":["cnd14:29.1","cnd14:29.2","cnd14:29.3","cnd14:29.4","cnd14:29.5"],"kind":"text","text":{"pi":"Diṭṭhadhammābhinibbutāti.\nDiṭṭhadhammāti diṭṭhadhammā ñātadhammā tulitadhammā tīritadhammā vibhūtadhammā vibhāvitadhammā.\nAbhinibbutāti rāgassa nibbāpitattā nibbutā, dosassa …pe…\nsabbākusalābhisaṅkhārānaṁ santattā samitattā vūpasamitattā nijjhātattā nibbutattā paṭippassaddhattā santā upasantā vūpasantā nibbutā paṭippassaddhāti—\ndiṭṭhadhammābhinibbutā."}},{"id":"cnd14:30","sourceIds":["cnd14:30.1","cnd14:30.2","cnd14:30.3","cnd14:30.4","cnd14:30.5"],"kind":"text","text":{"pi":"Na te māravasānugāti.\nMāroti yo so māro kaṇho adhipati antagū namuci pamattabandhu.\nNa te māravasānugāti na te mārassa vase vattanti, nāpi māro tesu vasaṁ vatteti.\nTe mārañca mārapakkhañca mārapāsañca mārabaḷisañca mārāmisañca māravisayañca māranivāsañca māragocarañca mārabandhanañca abhibhuyya abhibhavitvā ajjhottharitvā pariyādiyitvā madditvā caranti viharanti iriyanti vattenti pālenti yapenti yāpentīti—\nna te māravasānugā."}},{"id":"cnd14:31","sourceIds":["cnd14:31.1","cnd14:31.2","cnd14:31.3","cnd14:31.4"],"kind":"text","text":{"pi":"Na te mārassa paddhagūti na te mārassa paddhā paddhacarā paricārikā siyā;\nbuddhassa te bhagavato paddhā paddhacarā paricārikā siyāti—\nna te mārassa paddhagū.\nTenāha bhagavā—"}},{"id":"cnd14:32","sourceIds":["cnd14:32.1","cnd14:32.2","cnd14:32.3","cnd14:32.4"],"kind":"text","text":{"pi":"“Etadaññāya ye satā,\ndiṭṭhadhammābhinibbutā;\nNa te māravasānugā,\nna te mārassa paddhagū”ti."}},{"id":"cnd14:33","sourceIds":["cnd14:33.1","cnd14:33.2","cnd14:33.3"],"kind":"text","text":{"pi":"Saha gāthāpariyosānā …pe…\nsatthā me bhante bhagavā, sāvakohamasmīti.\nKappamāṇavapucchāniddeso dasamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd14/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}