{"id":"cnd15","title":"11. Jatukaṇṇimāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd15","title":"11. Jatukaṇṇimāṇavapucchāniddesa","units":[{"id":"cnd15:0","sourceIds":["cnd15:0.1","cnd15:0.2","cnd15:0.3","cnd15:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n11. Jatukaṇṇimāṇavapucchāniddesa"}},{"id":"cnd15:1","sourceIds":["cnd15:1.1","cnd15:1.2","cnd15:1.3","cnd15:1.4","cnd15:1.5"],"kind":"text","text":{"pi":"Sutvānahaṁ vīramakāmakāmiṁ,\n(iccāyasmā jatukaṇṇi)\nOghātigaṁ puṭṭhumakāmamāgamaṁ;\nSantipadaṁ brūhi sahajanetta,\nYathātacchaṁ bhagavā brūhi metaṁ."}},{"id":"cnd15:2","sourceIds":["cnd15:2.1","cnd15:2.2","cnd15:2.3","cnd15:2.4","cnd15:2.5"],"kind":"text","text":{"pi":"Sutvānahaṁ vīramakāmakāminti sutvā suṇitvā uggahetvā upadhāretvā upalakkhayitvā.\nItipi so bhagavā arahaṁ …pe… buddho bhagavāti—\nsutvānahaṁ.\nVīranti vīro bhagavā.\nVīriyavāti vīro, pahūti vīro, visavīti vīro, alamattoti vīro, sūroti vīro, vikkanto abhīrū acchambhī anutrāsī apalāyī pahīnabhayabheravo vigatalomahaṁsoti vīro."}},{"id":"cnd15:3","sourceIds":["cnd15:3.1","cnd15:3.2","cnd15:3.3","cnd15:3.4"],"kind":"text","text":{"pi":"Virato idha sabbapāpakehi,\nNirayadukkhaṁ aticca vīriyavāso;\nSo vīriyavā padhānavā,\nVīro tādi pavuccate tathattāti."}},{"id":"cnd15:4","sourceIds":["cnd15:4.1","cnd15:4.2","cnd15:4.3","cnd15:4.4","cnd15:4.5","cnd15:4.6","cnd15:4.7","cnd15:4.8","cnd15:4.9","cnd15:4.10","cnd15:4.11","cnd15:4.12"],"kind":"text","text":{"pi":"Sutvānahaṁ vīraṁ.\nAkāmakāminti.\nKāmāti uddānato dve kāmā—\nvatthukāmā ca kilesakāmā ca …pe…\nime vuccanti vatthukāmā …pe…\nime vuccanti kilesakāmā.\nBuddhassa bhagavato vatthukāmā pariññātā, kilesakāmā pahīnā.\nVatthukāmānaṁ pariññātattā kilesakāmānaṁ pahīnattā bhagavā na kāme kāmeti, na kāme pattheti, na kāme piheti, na kāme abhijappati.\nYe kāme kāmenti, kāme patthenti, kāme pihenti, kāme abhijappanti, te kāmakāmino rāgarāgino saññāsaññino.\nBhagavā na kāme kāmeti, na kāme pattheti, na kāme piheti, na kāme abhijappati.\nTasmā buddho akāmo nikkāmo cattakāmo vantakāmo muttakāmo pahīnakāmo paṭinissaṭṭhakāmo vītarāgo vigatarāgo cattarāgo vantarāgo muttarāgo pahīnarāgo paṭinissaṭṭharāgo nicchāto nibbuto sītibhūto sukhappaṭisaṁvedī brahmabhūtena attanā viharatīti—\nsutvānahaṁ vīra amakāmakāmiṁ."}},{"id":"cnd15:5","sourceIds":["cnd15:5.1","cnd15:5.2","cnd15:5.3","cnd15:5.4","cnd15:5.5","cnd15:5.6"],"kind":"text","text":{"pi":"Iccāyasmā jatukaṇṇīti.\nIccāti padasandhi …pe… padānupubbatāpetaṁ—\niccāti.\nĀyasmāti piyavacanaṁ sagāravasappatissādhivacanametaṁ āyasmāti.\nJatukaṇṇīti tassa brāhmaṇassa gottaṁ saṅkhā samaññā paññatti vohāroti—\niccāyasmā jatukaṇṇi."}},{"id":"cnd15:6","sourceIds":["cnd15:6.1","cnd15:6.2","cnd15:6.3","cnd15:6.4","cnd15:6.5","cnd15:6.6"],"kind":"text","text":{"pi":"Oghātigaṁ puṭṭhumakāmamāgamanti.\nOghātiganti oghātigaṁ oghaṁ atikkantaṁ samatikkantaṁ vītivattanti—\noghātigaṁ.\nPuṭṭhunti puṭṭhuṁ pucchituṁ yācituṁ ajjhesituṁ pasādetuṁ.\nAkāmamāgamanti akāmaṁ puṭṭhuṁ nikkāmaṁ cattakāmaṁ vantakāmaṁ muttakāmaṁ pahīnakāmaṁ paṭinissaṭṭhakāmaṁ vītarāgaṁ vigatarāgaṁ cattarāgaṁ vantarāgaṁ muttarāgaṁ pahīnarāgaṁ paṭinissaṭṭharāgaṁ āgamhā āgatamhā upāgatamhā sampattamhā tayā saddhiṁ samāgatamhāti—\noghātigaṁ puṭṭhumakāmamāgamaṁ."}},{"id":"cnd15:7","sourceIds":["cnd15:7.1","cnd15:7.2","cnd15:7.3","cnd15:7.4","cnd15:7.5","cnd15:7.6","cnd15:7.7","cnd15:7.8","cnd15:7.9","cnd15:7.10","cnd15:7.11","cnd15:7.12"],"kind":"text","text":{"pi":"Santipadaṁ brūhi sahajanettāti.\nSantīti ekena ākārena santipi santipadampi taṁyeva amataṁ nibbānaṁ.\nYo so sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānaṁ.\nVuttañhetaṁ bhagavatā—\n“santametaṁ padaṁ, paṇītametaṁ padaṁ, yadidaṁ sabbasaṅkhārasamatho sabbūpadhipaṭinissaggo taṇhakkhayo virāgo nirodho nibbānan”ti.\nAthāparenākārena ye dhammā santādhigamāya santiphusanāya santisacchikiriyāya saṁvattanti, seyyathidaṁ—\ncattāro satipaṭṭhānā cattāro sammappadhānā cattāro iddhipādā pañcindriyāni pañca balāni satta bojjhaṅgā ariyo aṭṭhaṅgiko maggo—\nime vuccanti santipadā.\nSantipadaṁ tāṇapadaṁ leṇapadaṁ saraṇapadaṁ abhayapadaṁ accutapadaṁ amatapadaṁ nibbānapadaṁ brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehi.\nSahajanettāti nettaṁ vuccati sabbaññutañāṇaṁ.\nBuddhassa bhagavato nettañca jinabhāvo ca bodhiyā mūle apubbaṁ acarimaṁ ekasmiṁ khaṇe uppanno, tasmā buddho sahajanettoti—\nsantipadaṁ brūhi sahajanetta."}},{"id":"cnd15:8","sourceIds":["cnd15:8.1","cnd15:8.2","cnd15:8.3","cnd15:8.4","cnd15:8.5","cnd15:8.6"],"kind":"text","text":{"pi":"Yathātacchaṁ bhagavā brūhi metanti yathātacchaṁ vuccati amataṁ nibbānaṁ …pe… nirodho nibbānaṁ.\nBhagavāti gāravādhivacanaṁ …pe… sacchikā paññatti, yadidaṁ bhagavāti.\nBrūhi metanti brūhi ācikkhāhi …pe…\npakāsehīti—\nyathātacchaṁ bhagavā brūhi metaṁ.\nTenāha so brāhmaṇo—"}},{"id":"cnd15:9","sourceIds":["cnd15:9.1","cnd15:9.2","cnd15:9.3","cnd15:9.4","cnd15:9.5"],"kind":"text","text":{"pi":"“Sutvānahaṁ vīramakāmakāmiṁ,\n(iccāyasmā jatukaṇṇi)\nOghātigaṁ puṭṭhumakāmamāgamaṁ;\nSantipadaṁ brūhi sahajanetta,\nYathātacchaṁ bhagavā brūhi metan”ti."}},{"id":"cnd15:10","sourceIds":["cnd15:10.1","cnd15:10.2","cnd15:10.3","cnd15:10.4","cnd15:10.5"],"kind":"text","text":{"pi":"Bhagavā hi kāme abhibhuyya iriyati,\nĀdiccova pathaviṁ tejī tejasā;\nParittapaññassa me bhūripañña,\nĀcikkha dhammaṁ yamahaṁ vijaññaṁ;\nJātijarāya idha vippahānaṁ."}},{"id":"cnd15:11","sourceIds":["cnd15:11.1","cnd15:11.2","cnd15:11.3","cnd15:11.4","cnd15:11.5","cnd15:11.6","cnd15:11.7","cnd15:11.8"],"kind":"text","text":{"pi":"Bhagavā hi kāme abhibhuyya iriyatīti.\nBhagavāti gāravādhivacanaṁ …pe… sacchikā paññatti, yadidaṁ bhagavāti.\nKāmāti uddānato dve kāmā—\nvatthukāmā ca kilesakāmā ca …pe…\nime vuccanti vatthukāmā …pe…\nime vuccanti kilesakāmā.\nBhagavā vatthukāme parijānitvā kilesakāme pahāya abhibhuyya abhibhavitvā ajjhottharitvā pariyādiyitvā carati viharati iriyati vatteti pāleti yapeti yāpetīti—\nbhagavā hi kāme abhibhuyya iriyati."}},{"id":"cnd15:12","sourceIds":["cnd15:12.1","cnd15:12.2","cnd15:12.3","cnd15:12.4","cnd15:12.5"],"kind":"text","text":{"pi":"Ādiccova pathaviṁ tejī tejasāti ādicco vuccati sūriyo.\nPathavī vuccati jagatī.\nYathā sūriyo tejī tejena samannāgato pathaviṁ abhibhuyya abhibhavitvā ajjhottharitvā pariyādiyitvā santāpayitvā sabbaṁ ākāsagataṁ tamagataṁ abhivihacca andhakāraṁ vidhamitvā ālokaṁ dassayitvā ākāse antalikkhe gaganapathe gacchati, evameva bhagavā ñāṇatejī ñāṇatejena samannāgato sabbaṁ abhisaṅkhārasamudayaṁ …pe…\nkilesatamaṁ avijjandhakāraṁ vidhamitvā ñāṇālokaṁ dassetvā vatthukāme parijānitvā kilesakāme pahāya abhibhuyya abhibhavitvā ajjhottharitvā pariyādiyitvā madditvā carati viharati iriyati vatteti pāleti yapeti yāpetīti—\nādiccova pathaviṁ tejī tejasā."}},{"id":"cnd15:13","sourceIds":["cnd15:13.1","cnd15:13.2","cnd15:13.3","cnd15:13.4","cnd15:13.5"],"kind":"text","text":{"pi":"Parittapaññassa me bhūripaññāti ahamasmi parittapañño omakapañño lāmakapañño chatukkapañño.\nTvampi mahāpañño puthupañño hāsapañño javanapañño tikkhapañño nibbedhikapañño.\nBhūri vuccati pathavī.\nBhagavā tāya pathavisamāya paññāya vipulāya vitthatāya samannāgatoti—\nparittapaññassa me bhūripañña."}},{"id":"cnd15:14","sourceIds":["cnd15:14.1","cnd15:14.2","cnd15:14.3","cnd15:14.4","cnd15:14.5"],"kind":"text","text":{"pi":"Ācikkha dhammaṁ yamahaṁ vijaññanti.\nDhammanti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ, cattāro satipaṭṭhāne …pe…\nnibbānañca nibbānagāminiñca paṭipadaṁ ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehi.\nYamahaṁ vijaññanti yamahaṁ jāneyyaṁ ājāneyyaṁ vijāneyyaṁ paṭijāneyyaṁ paṭivijjheyyaṁ adhigaccheyyaṁ phasseyyaṁ sacchikareyyanti—\nācikkha dhammaṁ yamahaṁ vijaññaṁ."}},{"id":"cnd15:15","sourceIds":["cnd15:15.1","cnd15:15.2","cnd15:15.3"],"kind":"text","text":{"pi":"Jātijarāya idha vippahānanti idheva jātijarāya maraṇassa pahānaṁ vūpasamaṁ paṭinissaggaṁ paṭippassaddhiṁ amataṁ nibbānanti—\njātijarāya idha vippahānaṁ.\nTenāha so brāhmaṇo—"}},{"id":"cnd15:16","sourceIds":["cnd15:16.1","cnd15:16.2","cnd15:16.3","cnd15:16.4","cnd15:16.5"],"kind":"text","text":{"pi":"“Bhagavā hi kāme abhibhuyya iriyati,\nĀdiccova pathaviṁ tejī tejasā;\nParittapaññassa me bhūripañña,\nĀcikkha dhammaṁ yamahaṁ vijaññaṁ;\nJātijarāya idha vippahānan”ti."}},{"id":"cnd15:17","sourceIds":["cnd15:17.1","cnd15:17.2","cnd15:17.3","cnd15:17.4","cnd15:17.5"],"kind":"text","text":{"pi":"Kāmesu vinaya gedhaṁ,\n(jatukaṇṇīti bhagavā)\nNekkhammaṁ daṭṭhu khemato;\nUggahitaṁ nirattaṁ vā,\nMā te vijjittha kiñcanaṁ."}},{"id":"cnd15:18","sourceIds":["cnd15:18.1","cnd15:18.2","cnd15:18.3","cnd15:18.4","cnd15:18.5","cnd15:18.6","cnd15:18.7","cnd15:18.8","cnd15:18.9","cnd15:18.10","cnd15:18.11","cnd15:18.12"],"kind":"text","text":{"pi":"Kāmesu vinaya gedhanti.\nKāmāti uddānato dve kāmā—\nvatthukāmā ca kilesakāmā ca …pe…\nime vuccanti vatthukāmā …pe…\nime vuccanti kilesakāmā.\nGedhanti gedho vuccati taṇhā.\nYo rāgo sārāgo …pe… abhijjhā lobho akusalamūlaṁ.\nKāmesu vinaya gedhanti kāmesu gedhaṁ vinaya paṭivinaya pajaha vinodehi byantīkarohi anabhāvaṁ gamehīti—\nkāmesu vinaya gedhaṁ.\nJatukaṇṇīti bhagavā taṁ brāhmaṇaṁ gottena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\njatukaṇṇīti bhagavā."}},{"id":"cnd15:19","sourceIds":["cnd15:19.1","cnd15:19.2","cnd15:19.3"],"kind":"text","text":{"pi":"Nekkhammaṁ daṭṭhu khematoti.\nNekkhammanti sammāpaṭipadaṁ anulomapaṭipadaṁ apaccanīkapaṭipadaṁ anvatthapaṭipadaṁ dhammānudhammapaṭipadaṁ sīlesu paripūrakāritaṁ indriyesu guttadvārataṁ bhojane mattaññutaṁ jāgariyānuyogaṁ satisampajaññaṁ cattāro satipaṭṭhāne cattāro sammappadhāne cattāro iddhipāde pañcindriyāni pañca balāni satta bojjhaṅge ariyaṁ aṭṭhaṅgikaṁ maggaṁ nibbānañca nibbānagāminiñca paṭipadaṁ khemato tāṇato leṇato saraṇato saraṇībhūtato abhayato accutato amatato nibbānato daṭṭhuṁ passitvā tulayitvā tīrayitvā vibhāvayitvā vibhūtaṁ katvāti—\nnekkhammaṁ daṭṭhu khemato."}},{"id":"cnd15:20","sourceIds":["cnd15:20.1","cnd15:20.2","cnd15:20.3","cnd15:20.4"],"kind":"text","text":{"pi":"Uggahitaṁ nirattaṁ vāti.\nUggahitanti taṇhāvasena diṭṭhivasena gahitaṁ parāmaṭṭhaṁ abhiniviṭṭhaṁ ajjhositaṁ adhimuttaṁ.\nNirattaṁ vāti nirattaṁ vā muñcitabbaṁ vijahitabbaṁ vinoditabbaṁ byantīkātabbaṁ anabhāvaṁ gametabbanti—\nuggahitaṁ nirattaṁ vā."}},{"id":"cnd15:21","sourceIds":["cnd15:21.1","cnd15:21.2","cnd15:21.3","cnd15:21.4"],"kind":"text","text":{"pi":"Mā te vijjittha kiñcananti rāgakiñcanaṁ dosakiñcanaṁ mohakiñcanaṁ mānakiñcanaṁ diṭṭhikiñcanaṁ kilesakiñcanaṁ duccaritakiñcanaṁ.\nIdaṁ kiñcanaṁ tuyhaṁ mā vijjittha mā pavijjittha mā saṁvijjittha pajaha vinodehi byantīkarohi anabhāvaṁ gamehīti—\nmā te vijjittha kiñcanaṁ.\nTenāha bhagavā—"}},{"id":"cnd15:22","sourceIds":["cnd15:22.1","cnd15:22.2","cnd15:22.3","cnd15:22.4","cnd15:22.5"],"kind":"text","text":{"pi":"“Kāmesu vinaya gedhaṁ,\n(jatukaṇṇīti bhagavā)\nNekkhammaṁ daṭṭhu khemato;\nUggahitaṁ nirattaṁ vā,\nMā te vijjittha kiñcanan”ti."}},{"id":"cnd15:23","sourceIds":["cnd15:23.1","cnd15:23.2","cnd15:23.3","cnd15:23.4"],"kind":"text","text":{"pi":"Yaṁ pubbe taṁ visosehi,\npacchā te māhu kiñcanaṁ;\nMajjhe ce no gahessasi,\nupasanto carissasi."}},{"id":"cnd15:24","sourceIds":["cnd15:24.1","cnd15:24.2","cnd15:24.3","cnd15:24.4"],"kind":"text","text":{"pi":"Yaṁ pubbe taṁ visosehīti atīte saṅkhāre ārabbha ye kilesā uppajjeyyuṁ te kilese sosehi visosehi sukkhāpehi visukkhāpehi abījaṁ karohi pajaha vinodehi byantīkarohi anabhāvaṁ gamehīti—\nevampi yaṁ pubbe taṁ visosehi.\nAtha vā ye atītā kammābhisaṅkhārā avipakkavipākā te kammābhisaṅkhāre sosehi visosehi sukkhāpehi visukkhāpehi abījaṁ karohi pajaha vinodehi byantīkarohi anabhāvaṁ gamehīti—\nevampi yaṁ pubbe taṁ visosehi."}},{"id":"cnd15:25","sourceIds":["cnd15:25.1","cnd15:25.2","cnd15:25.3"],"kind":"text","text":{"pi":"Pacchā te māhu kiñcananti pacchā vuccati anāgate saṅkhāre ārabbha rāgakiñcanaṁ dosakiñcanaṁ mohakiñcanaṁ mānakiñcanaṁ diṭṭhikiñcanaṁ kilesakiñcanaṁ duccaritakiñcanaṁ.\nIdaṁ kiñcanaṁ tuyhaṁ mā ahu mā ahosi mā janesi mā sañjanesi mābhinibbattesi pajaha vinodehi byantīkarohi anabhāvaṁ gamehīti—\npacchā te māhu kiñcanaṁ."}},{"id":"cnd15:26","sourceIds":["cnd15:26.1","cnd15:26.2","cnd15:26.3","cnd15:26.4"],"kind":"text","text":{"pi":"Majjhe ce no gahessasīti majjhe vuccati paccuppannaṁ rūpaṁ vedanā saññā saṅkhārā viññāṇaṁ.\nPaccuppanne saṅkhāre taṇhāvasena diṭṭhivasena na gahessasi na gaṇhissasi na parāmasissasi na nandissasi nābhinandissasi na ajjhosissasi.\nAbhinandanaṁ abhivadanaṁ ajjhosānaṁ gāhaṁ parāmāsaṁ abhinivesaṁ pajahissasi vinodessasi byantīkarissasi anabhāvaṁ gamessasīti—\nmajjhe ce no gahessasi."}},{"id":"cnd15:27","sourceIds":["cnd15:27.1","cnd15:27.2","cnd15:27.3","cnd15:27.4"],"kind":"text","text":{"pi":"Upasanto carissasīti rāgassa upasamitattā upasanto carissasi, dosassa …pe…\nsabbākusalābhisaṅkhārānaṁ santattā samitattā upasamitattā vūpasamitattā nijjhātattā nibbutattā vigatattā paṭippassaddhattā santo upasanto vūpasanto nibbuto paṭippassaddho carissasi viharissasi iriyissasi vattissasi pālessasi yapessasi yāpessasīti—\nupasanto carissasi.\nTenāha bhagavā—"}},{"id":"cnd15:28","sourceIds":["cnd15:28.1","cnd15:28.2","cnd15:28.3","cnd15:28.4"],"kind":"text","text":{"pi":"“Yaṁ pubbe taṁ visosehi,\npacchā te māhu kiñcanaṁ;\nMajjhe ce no gahessasi,\nupasanto carissasī”ti."}},{"id":"cnd15:29","sourceIds":["cnd15:29.1","cnd15:29.2","cnd15:29.3","cnd15:29.4"],"kind":"text","text":{"pi":"Sabbaso nāmarūpasmiṁ,\nvītagedhassa brāhmaṇa;\nĀsavāssa na vijjanti,\nyehi maccuvasaṁ vaje."}},{"id":"cnd15:30","sourceIds":["cnd15:30.1","cnd15:30.2","cnd15:30.3","cnd15:30.4","cnd15:30.5","cnd15:30.6","cnd15:30.7","cnd15:30.8"],"kind":"text","text":{"pi":"Sabbaso nāmarūpasmiṁ vītagedhassa brāhmaṇāti.\nSabbasoti sabbena sabbaṁ sabbathā sabbaṁ asesaṁ nissesaṁ pariyādiyanavacanametaṁ sabbasoti.\nNāmanti cattāro arūpino khandhā.\nRūpanti cattāro ca mahābhūtā catunnañca mahābhūtānaṁ upādāya rūpaṁ.\nGedho vuccati taṇhā.\nYo rāgo sārāgo …pe… abhijjhā lobho akusalamūlaṁ.\nSabbaso nāmarūpasmiṁ vītagedhassa brāhmaṇāti sabbaso nāmarūpasmiṁ vītagedhassa vigatagedhassa cattagedhassa vantagedhassa muttagedhassa pahīnagedhassa paṭinissaṭṭhagedhassa vītarāgassa vigatarāgassa cattarāgassa vantarāgassa muttarāgassa pahīnarāgassa paṭinissaṭṭharāgassāti—\nsabbaso nāmarūpasmiṁ vītagedhassa brāhmaṇa."}},{"id":"cnd15:31","sourceIds":["cnd15:31.1","cnd15:31.2","cnd15:31.3","cnd15:31.4","cnd15:31.5","cnd15:31.6"],"kind":"text","text":{"pi":"Āsavāssa na vijjantīti.\nĀsavāti cattāro āsavā—\nkāmāsavo, bhavāsavo, diṭṭhāsavo, avijjāsavo.\nAssāti arahato khīṇāsavassa.\nNa vijjantīti ime āsavā tassa natthi na santi na saṁvijjanti nupalabbhanti pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti—\nāsavāssa na vijjanti."}},{"id":"cnd15:32","sourceIds":["cnd15:32.1","cnd15:32.2","cnd15:32.3","cnd15:32.4"],"kind":"text","text":{"pi":"Yehi maccuvasaṁ vajeti yehi āsavehi maccuno vā vasaṁ gaccheyya, maraṇassa vā vasaṁ gaccheyya, mārapakkhassa vā vasaṁ gaccheyya;\nte āsavā tassa natthi na santi na saṁvijjanti nupalabbhanti pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti—\nyehi maccuvasaṁ vaje.\nTenāha bhagavā—"}},{"id":"cnd15:33","sourceIds":["cnd15:33.1","cnd15:33.2","cnd15:33.3","cnd15:33.4"],"kind":"text","text":{"pi":"“Sabbaso nāmarūpasmiṁ,\nvītagedhassa brāhmaṇa;\nĀsavāssa na vijjanti,\nyehi maccuvasaṁ vaje”ti."}},{"id":"cnd15:34","sourceIds":["cnd15:34.1","cnd15:34.2","cnd15:34.3"],"kind":"text","text":{"pi":"Saha gāthāpariyosānā …pe…\nsatthā me bhante bhagavā, sāvakohamasmīti.\nJatukaṇṇimāṇavapucchāniddeso ekādasamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd15/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}