{"id":"cnd16","title":"12. Bhadrāvudhamāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd16","title":"12. Bhadrāvudhamāṇavapucchāniddesa","units":[{"id":"cnd16:0","sourceIds":["cnd16:0.1","cnd16:0.2","cnd16:0.3","cnd16:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n12. Bhadrāvudhamāṇavapucchāniddesa"}},{"id":"cnd16:1","sourceIds":["cnd16:1.1","cnd16:1.2","cnd16:1.3","cnd16:1.4","cnd16:1.5"],"kind":"text","text":{"pi":"Okañjahaṁ taṇhacchidaṁ anejaṁ,\n(iccāyasmā bhadrāvudho)\nNandiñjahaṁ oghatiṇṇaṁ vimuttaṁ;\nKappañjahaṁ abhiyāce sumedhaṁ,\nSutvāna nāgassa apanamissanti ito."}},{"id":"cnd16:2","sourceIds":["cnd16:2.1","cnd16:2.2","cnd16:2.3","cnd16:2.4","cnd16:2.5","cnd16:2.6","cnd16:2.7","cnd16:2.8"],"kind":"text","text":{"pi":"Okañjahaṁ taṇhacchidaṁ anejanti.\nOkañjahanti rūpadhātuyā yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, te buddhassa bhagavato pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.\nTasmā buddho okañjaho.\nVedanādhātuyā …pe…\nsaññādhātuyā …\nsaṅkhāradhātuyā …\nviññāṇadhātuyā yo chando yo rāgo yā nandī yā taṇhā ye upayupādānā cetaso adhiṭṭhānābhinivesānusayā, te buddhassa bhagavato pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.\nTasmā buddho okañjaho."}},{"id":"cnd16:3","sourceIds":["cnd16:3.1","cnd16:3.2","cnd16:3.3","cnd16:3.4","cnd16:3.5","cnd16:3.6","cnd16:3.7","cnd16:3.8","cnd16:3.9","cnd16:3.10","cnd16:3.11","cnd16:3.12","cnd16:3.13","cnd16:3.14","cnd16:3.15","cnd16:3.16"],"kind":"text","text":{"pi":"Taṇhacchidanti.\nTaṇhāti rūpataṇhā …pe… dhammataṇhā.\nSā taṇhā buddhassa bhagavato chinnā ucchinnā samucchinnā vūpasantā paṭippassaddhā abhabbuppattikā ñāṇagginā daḍḍhā.\nTasmā buddho taṇhacchido.\nAnejoti ejā vuccati taṇhā.\nYo rāgo sārāgo …pe… abhijjhā lobho akusalamūlaṁ.\nSā ejā taṇhā buddhassa bhagavato pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.\nTasmā buddho anejo.\nEjāya pahīnattā anejo bhagavā lābhepi na iñjati, alābhepi na iñjati, yasepi na iñjati, ayasepi na iñjati, pasaṁsāyapi na iñjati, nindāyapi na iñjati, sukhepi na iñjati, dukkhepi na iñjati na calati na vedhati na pavedhati na sampavedhatīti.\nTasmā buddho anejoti—\nokañjahaṁ taṇhacchidaṁ anejaṁ.\nIccāyasmā bhadrāvudhoti.\nIccāti padasandhi …pe…\nāyasmāti, piyavacanaṁ …pe…\nbhadrāvudhoti tassa brāhmaṇassa nāmaṁ …pe… abhilāpoti—\niccāyasmā bhadrāvudho."}},{"id":"cnd16:4","sourceIds":["cnd16:4.1","cnd16:4.2","cnd16:4.3","cnd16:4.4","cnd16:4.5","cnd16:4.6","cnd16:4.7","cnd16:4.8","cnd16:4.9","cnd16:4.10"],"kind":"text","text":{"pi":"Nandiñjahaṁ oghatiṇṇaṁ vimuttanti nandī vuccati taṇhā.\nYo rāgo sārāgo …pe… abhijjhā lobho akusalamūlaṁ.\nSā nandī sā taṇhā buddhassa bhagavato pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.\nTasmā buddho nandiñjaho.\nOghatiṇṇanti bhagavā kāmoghaṁ tiṇṇo bhavoghaṁ tiṇṇo diṭṭhoghaṁ tiṇṇo avijjoghaṁ tiṇṇo sabbasaṁsārapathaṁ tiṇṇo uttiṇṇo nitthiṇṇo atikkanto samatikkanto vītivatto.\nSo vutthavāso ciṇṇacaraṇo …pe… jātimaraṇasaṁsāro natthi tassa punabbhavoti—\nnandiñjahaṁ oghatiṇṇaṁ.\nVimuttanti bhagavato rāgā cittaṁ muttaṁ vimuttaṁ suvimuttaṁ, dosā cittaṁ … mohā cittaṁ …pe…\nsabbākusalābhisaṅkhārehi cittaṁ muttaṁ vimuttaṁ suvimuttanti—\nnandiñjahaṁ oghatiṇṇaṁ vimuttaṁ."}},{"id":"cnd16:5","sourceIds":["cnd16:5.1","cnd16:5.2","cnd16:5.3","cnd16:5.4","cnd16:5.5","cnd16:5.6","cnd16:5.7","cnd16:5.8","cnd16:5.9","cnd16:5.10","cnd16:5.11","cnd16:5.12","cnd16:5.13"],"kind":"text","text":{"pi":"Kappañjahaṁ abhiyāce sumedhanti.\nKappāti dve kappā—\ntaṇhākappo ca diṭṭhikappo ca …pe…\nayaṁ taṇhākappo …pe…\nayaṁ diṭṭhikappo.\nBuddhassa bhagavato taṇhākappo pahīno diṭṭhikappo paṭinissaṭṭho.\nTaṇhākappassa pahīnattā diṭṭhikappassa paṭinissaṭṭhattā tasmā buddho kappañjaho.\nAbhiyāceti yācāmi abhiyācāmi ajjhesāmi sādiyāmi patthayāmi pihayāmi jappāmi abhijappāmi.\nSumedhā vuccati paññā.\nYā paññā pajānanā …pe… amoho dhammavicayo sammādiṭṭhi.\nBhagavā imāya medhāya paññāya upeto samupeto upāgato samupāgato upapanno samupapanno samannāgato.\nTasmā buddho sumedhoti—\nkappañjahaṁ abhiyāce sumedhaṁ."}},{"id":"cnd16:6","sourceIds":["cnd16:6.1","cnd16:6.2","cnd16:6.3","cnd16:6.4","cnd16:6.5","cnd16:6.6"],"kind":"text","text":{"pi":"Sutvāna nāgassa apanamissanti itoti.\nNāgassāti nāgo.\nBhagavā āguṁ na karotīti nāgo, na gacchatīti nāgo, na āgacchatīti nāgo …pe… evaṁ bhagavā na gacchatīti nāgo.\nSutvāna nāgassa apanamissanti itoti tuyhaṁ vacanaṁ byappathaṁ desanaṁ anusāsanaṁ anusiṭṭhaṁ sutvā suṇitvā uggahetvā upadhārayitvā upalakkhayitvā ito apanamissanti vajissanti pakkamissanti disāvidisaṁ gamissantīti—\nsutvāna nāgassa apanamissanti ito.\nTenāha so brāhmaṇo—"}},{"id":"cnd16:7","sourceIds":["cnd16:7.1","cnd16:7.2","cnd16:7.3","cnd16:7.4","cnd16:7.5"],"kind":"text","text":{"pi":"“Okañjahaṁ taṇhacchidaṁ anejaṁ,\n(iccāyasmā bhadrāvudho)\nNandiñjahaṁ oghatiṇṇaṁ vimuttaṁ;\nKappañjahaṁ abhiyāce sumedhaṁ,\nSutvāna nāgassa apanamissanti ito”ti."}},{"id":"cnd16:8","sourceIds":["cnd16:8.1","cnd16:8.2","cnd16:8.3","cnd16:8.4"],"kind":"text","text":{"pi":"Nānājanā janapadehi saṅgatā,\nTava vīra vākyaṁ abhikaṅkhamānā;\nTesaṁ tuvaṁ sādhu viyākarohi,\nTathā hi te vidito esa dhammo."}},{"id":"cnd16:9","sourceIds":["cnd16:9.1","cnd16:9.2","cnd16:9.3","cnd16:9.4","cnd16:9.5"],"kind":"text","text":{"pi":"Nānājanā janapadehi saṅgatāti.\nNānājanāti khattiyā ca brāhmaṇā ca vessā ca suddā ca gahaṭṭhā ca pabbajitā ca devā ca manussā ca.\nJanapadehi saṅgatāti aṅgā ca magadhā ca kaliṅgā ca kāsiyā ca kosalā ca vajjiyā ca mallā ca cetiyamhā ca vaṁsā ca kurumhā ca pañcālā ca macchā ca surasenā ca assakā ca avantiyā ca yonā ca kambojā ca.\nSaṅgatāti saṅgatā samāgatā samohitā sannipatitāti—\nnānājanā janapadehi saṅgatā."}},{"id":"cnd16:10","sourceIds":["cnd16:10.1","cnd16:10.2","cnd16:10.3"],"kind":"text","text":{"pi":"Tava vīra vākyaṁ abhikaṅkhamānāti.\nVīrāti vīro.\nBhagavā vīriyavāti vīro, pahūti vīro, visavīti vīro, alamattoti vīro, vigatalomahaṁsotipi vīro."}},{"id":"cnd16:11","sourceIds":["cnd16:11.1","cnd16:11.2","cnd16:11.3","cnd16:11.4"],"kind":"text","text":{"pi":"Virato idha sabbapāpakehi,\nNirayadukkhaṁ aticca vīriyavāso;\nSo vīriyavā padhānavā,\nVīro tādi pavuccate tathattāti."}},{"id":"cnd16:12","sourceIds":["cnd16:12.1","cnd16:12.2","cnd16:12.3"],"kind":"text","text":{"pi":"Tava vīra vākyaṁ abhikaṅkhamānāti tuyhaṁ vacanaṁ byappathaṁ desanaṁ anusāsanaṁ anusiṭṭhaṁ.\nAbhikaṅkhamānāti abhikaṅkhamānā icchamānā sādiyamānā patthayamānā pihayamānā abhijappamānāti—\ntava vīra vākyaṁ abhikaṅkhamānā."}},{"id":"cnd16:13","sourceIds":["cnd16:13.1","cnd16:13.2","cnd16:13.3","cnd16:13.4","cnd16:13.5"],"kind":"text","text":{"pi":"Tesaṁ tuvaṁ sādhu viyākarohīti.\nTesanti tesaṁ khattiyānaṁ brāhmaṇānaṁ vessānaṁ suddānaṁ gahaṭṭhānaṁ pabbajitānaṁ devānaṁ manussānaṁ.\nTuvanti bhagavantaṁ bhaṇati.\nSādhu viyākarohīti sādhu ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\ntesaṁ tuvaṁ sādhu viyākarohi."}},{"id":"cnd16:14","sourceIds":["cnd16:14.1","cnd16:14.2","cnd16:14.3"],"kind":"text","text":{"pi":"Tathā hi te vidito esa dhammoti tathā hi te vidito tulito tīrito vibhūto vibhāvito esa dhammoti—\ntathā hi te vidito esa dhammo.\nTenāha so brāhmaṇo—"}},{"id":"cnd16:15","sourceIds":["cnd16:15.1","cnd16:15.2","cnd16:15.3","cnd16:15.4"],"kind":"text","text":{"pi":"“Nānājanā janapadehi saṅgatā,\nTava vīra vākyaṁ abhikaṅkhamānā;\nTesaṁ tuvaṁ sādhu viyākarohi,\nTathā hi te vidito esa dhammo”ti."}},{"id":"cnd16:16","sourceIds":["cnd16:16.1","cnd16:16.2","cnd16:16.3","cnd16:16.4","cnd16:16.5"],"kind":"text","text":{"pi":"Ādānataṇhaṁ vinayetha sabbaṁ,\n(bhadrāvudhāti bhagavā)\nUddhaṁ adho tiriyañcāpi majjhe;\nYaṁ yañhi lokasmimupādiyanti,\nTeneva māro anveti jantuṁ."}},{"id":"cnd16:17","sourceIds":["cnd16:17.1","cnd16:17.2","cnd16:17.3","cnd16:17.4","cnd16:17.5","cnd16:17.6","cnd16:17.7","cnd16:17.8","cnd16:17.9","cnd16:17.10","cnd16:17.11","cnd16:17.12","cnd16:17.13","cnd16:17.14","cnd16:17.15","cnd16:17.16","cnd16:17.17","cnd16:17.18","cnd16:17.19","cnd16:17.20"],"kind":"text","text":{"pi":"Ādānataṇhaṁ vinayetha sabbanti ādānataṇhaṁ vuccati rūpataṇhā …pe…\nādānataṇhāti kiṅkāraṇā vuccati ādānataṇhā?\nTāya taṇhāya rūpaṁ ādiyanti upādiyanti gaṇhanti parāmasanti abhinivisanti.\nVedanaṁ …pe…\nsaññaṁ …\nsaṅkhāre …\nviññāṇaṁ …\ngatiṁ …\nupapattiṁ …\npaṭisandhiṁ …\nbhavaṁ …\nsaṁsāraṁ …\nvaṭṭaṁ ādiyanti upādiyanti gaṇhanti parāmasanti abhinivisanti.\nTaṅkāraṇā vuccati ādānataṇhā.\nĀdānataṇhaṁ vinayetha sabbanti sabbaṁ ādānataṇhaṁ vinayeyya paṭivinayeyya pajaheyya vinodeyya byantīkareyya anabhāvaṁ gameyyāti—\nādānataṇhaṁ vinayetha sabbaṁ.\nBhadrāvudhāti bhagavāti.\nBhadrāvudhāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\nbhadrāvudhāti bhagavā."}},{"id":"cnd16:18","sourceIds":["cnd16:18.1","cnd16:18.2","cnd16:18.3","cnd16:18.4","cnd16:18.5","cnd16:18.6","cnd16:18.7","cnd16:18.8","cnd16:18.9","cnd16:18.10","cnd16:18.11","cnd16:18.12","cnd16:18.13","cnd16:18.14","cnd16:18.15","cnd16:18.16","cnd16:18.17","cnd16:18.18","cnd16:18.19","cnd16:18.20"],"kind":"text","text":{"pi":"Uddhaṁ adho tiriyañcāpi majjheti.\nUddhanti anāgataṁ;\nadhoti atītaṁ;\ntiriyañcāpi majjheti paccuppannaṁ.\nUddhanti devaloko;\nadhoti nirayaloko;\ntiriyañcāpi majjheti manussaloko.\nAtha vā uddhanti kusalā dhammā;\nadhoti akusalā dhammā;\ntiriyañcāpi majjheti abyākatā dhammā.\nUddhanti arūpadhātu;\nadhoti kāmadhātu;\ntiriyañcāpi majjheti rūpadhātu.\nUddhanti sukhā vedanā;\nadhoti dukkhā vedanā;\ntiriyañcāpi majjheti adukkhamasukhā vedanā.\nUddhanti uddhaṁ pādatalā;\nadhoti adho kesamatthakā;\ntiriyañcāpi majjheti vemajjheti—\nuddhaṁ adho tiriyañcāpi majjhe."}},{"id":"cnd16:19","sourceIds":["cnd16:19.1","cnd16:19.2","cnd16:19.3"],"kind":"text","text":{"pi":"Yaṁ yañhi lokasmimupādiyantīti yaṁ yaṁ rūpagataṁ vedanāgataṁ saññāgataṁ saṅkhāragataṁ viññāṇagataṁ ādiyanti upādiyanti gaṇhanti parāmasanti abhinivisanti.\nLokasminti apāyaloke …pe… āyatanaloketi—\nyaṁ yañhi lokasmimupādiyanti."}},{"id":"cnd16:20","sourceIds":["cnd16:20.1","cnd16:20.2","cnd16:20.3","cnd16:20.4"],"kind":"text","text":{"pi":"Teneva māro anveti jantunti teneva kammābhisaṅkhāravasena paṭisandhiko khandhamāro dhātumāro āyatanamāro gatimāro upapattimāro paṭisandhimāro bhavamāro saṁsāramāro vaṭṭamāro anveti anugacchati anvāyiko hoti.\nJantunti sattaṁ janaṁ naraṁ mānavaṁ posaṁ puggalaṁ jīvaṁ jāguṁ jantuṁ indaguṁ manujanti—\nteneva māro anveti jantuṁ.\nTenāha bhagavā—"}},{"id":"cnd16:21","sourceIds":["cnd16:21.1","cnd16:21.2","cnd16:21.3","cnd16:21.4","cnd16:21.5"],"kind":"text","text":{"pi":"“Ādānataṇhaṁ vinayetha sabbaṁ,\n(bhadrāvudhāti bhagavā)\nUddhaṁ adho tiriyañcāpi majjhe;\nYaṁ yañhi lokasmimupādiyanti,\nTeneva māro anveti jantun”ti."}},{"id":"cnd16:22","sourceIds":["cnd16:22.1","cnd16:22.2","cnd16:22.3","cnd16:22.4"],"kind":"text","text":{"pi":"Tasmā pajānaṁ na upādiyetha,\nBhikkhu sato kiñcanaṁ sabbaloke;\nĀdānasatte iti pekkhamāno,\nPajaṁ imaṁ maccudheyye visattaṁ."}},{"id":"cnd16:23","sourceIds":["cnd16:23.1","cnd16:23.2","cnd16:23.3","cnd16:23.4","cnd16:23.5","cnd16:23.6","cnd16:23.7","cnd16:23.8","cnd16:23.9","cnd16:23.10","cnd16:23.11","cnd16:23.12","cnd16:23.13","cnd16:23.14","cnd16:23.15","cnd16:23.16","cnd16:23.17"],"kind":"text","text":{"pi":"Tasmā pajānaṁ na upādiyethāti.\nTasmāti tasmā taṅkāraṇā taṁhetu tappaccayā taṁnidānā, etaṁ ādīnavaṁ sampassamāno ādānataṇhāyāti—\ntasmā.\nPajānanti jānanto pajānanto ājānanto vijānanto paṭivijānanto paṭivijjhanto “sabbe saṅkhārā aniccā”ti …pe…\n“yaṁ kiñci samudayadhammaṁ sabbaṁ taṁ nirodhadhamman”ti jānanto pajānanto ājānanto vijānanto paṭivijānanto paṭivijjhanto.\nNa upādiyethāti rūpaṁ nādiyeyya na upādiyeyya na gaṇheyya na parāmaseyya nābhiniviseyya;\nvedanaṁ …pe…\nsaññaṁ …\nsaṅkhāre …\nviññāṇaṁ …\ngatiṁ …\nupapattiṁ …\npaṭisandhiṁ …\nbhavaṁ …\nsaṁsāraṁ …\nvaṭṭaṁ nādiyeyya na upādiyeyya na gaṇheyya na parāmaseyya nābhiniviseyyāti—\ntasmā pajānaṁ na upādiyetha."}},{"id":"cnd16:24","sourceIds":["cnd16:24.1","cnd16:24.2","cnd16:24.3","cnd16:24.4","cnd16:24.5","cnd16:24.6","cnd16:24.7","cnd16:24.8","cnd16:24.9"],"kind":"text","text":{"pi":"Bhikkhu sato kiñcanaṁ sabbaloketi.\nBhikkhūti puthujjanakalyāṇako vā bhikkhu, sekkho vā bhikkhu.\nSatoti catūhi kāraṇehi sato—\nkāye kāyānupassanāsatipaṭṭhānaṁ bhāvento sato …pe…\nso vuccati satoti—\nbhikkhu sato.\nKiñcananti kiñci rūpagataṁ vedanāgataṁ saññāgataṁ saṅkhāragataṁ viññāṇagataṁ.\nSabbaloketi sabbaapāyaloke sabbamanussaloke sabbadevaloke sabbakhandhaloke sabbadhātuloke sabbaāyatanaloketi—\nbhikkhu sato kiñcanaṁ sabbaloke."}},{"id":"cnd16:25","sourceIds":["cnd16:25.1","cnd16:25.2","cnd16:25.3","cnd16:25.4","cnd16:25.5","cnd16:25.6","cnd16:25.7","cnd16:25.8","cnd16:25.9","cnd16:25.10","cnd16:25.11","cnd16:25.12","cnd16:25.13","cnd16:25.14"],"kind":"text","text":{"pi":"Ādānasatte iti pekkhamānoti ādānasattā vuccanti ye rūpaṁ ādiyanti upādiyanti gaṇhanti parāmasanti abhinivisanti;\nvedanaṁ …pe…\nsaññaṁ …\nsaṅkhāre …\nviññāṇaṁ …\ngatiṁ …\nupapattiṁ …\npaṭisandhiṁ …\nbhavaṁ …\nsaṁsāraṁ …\nvaṭṭaṁ ādiyanti upādiyanti gaṇhanti parāmasanti abhinivisanti.\nItīti padasandhi …pe… padānupubbatāpetaṁ itīti.\nPekkhamānoti pekkhamāno dakkhamāno dissamāno passamāno olokayamāno nijjhāyamāno upaparikkhamānoti—\nādānasatte iti pekkhamāno."}},{"id":"cnd16:26","sourceIds":["cnd16:26.1","cnd16:26.2","cnd16:26.3","cnd16:26.4","cnd16:26.5","cnd16:26.6"],"kind":"text","text":{"pi":"Pajaṁ imaṁ maccudheyye visattanti.\nPajāti sattādhivacanaṁ maccudheyyā vuccanti kilesā ca khandhā ca abhisaṅkhārā ca.\nPajā maccudheyye māradheyye maraṇadheyye sattā visattā āsattā laggā laggitā palibuddhā.\nYathā bhittikhile vā nāgadante vā bhaṇḍaṁ sattaṁ visattaṁ āsattaṁ laggaṁ laggitaṁ palibuddhaṁ, evameva pajā maccudheyye māradheyye maraṇadheyye sattā visattā āsattā laggā laggitā palibuddhāti—\npajaṁ imaṁ maccudheyye visattaṁ.\nTenāha bhagavā—"}},{"id":"cnd16:27","sourceIds":["cnd16:27.1","cnd16:27.2","cnd16:27.3","cnd16:27.4"],"kind":"text","text":{"pi":"“Tasmā pajānaṁ na upādiyetha,\nBhikkhu sato kiñcanaṁ sabbaloke;\nĀdānasatte iti pekkhamāno,\nPajaṁ imaṁ maccudheyye visattan”ti."}},{"id":"cnd16:28","sourceIds":["cnd16:28.1","cnd16:28.2","cnd16:28.3"],"kind":"text","text":{"pi":"Saha gāthāpariyosānā …pe…\nsatthā me bhante bhagavā, sāvakohamasmīti.\nBhadrāvudhamāṇavapucchāniddeso dvādasamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd16/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}