{"id":"cnd18","title":"14. Posālamāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd18","title":"14. Posālamāṇavapucchāniddesa","units":[{"id":"cnd18:0","sourceIds":["cnd18:0.1","cnd18:0.2","cnd18:0.3","cnd18:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n14. Posālamāṇavapucchāniddesa"}},{"id":"cnd18:1","sourceIds":["cnd18:1.1","cnd18:1.2","cnd18:1.3","cnd18:1.4","cnd18:1.5"],"kind":"text","text":{"pi":"Yo atītaṁ ādisati,\n(iccāyasmā posālo)\nAnejo chinnasaṁsayo;\nPāraguṁ sabbadhammānaṁ,\nAtthi pañhena āgamaṁ."}},{"id":"cnd18:2","sourceIds":["cnd18:2.1","cnd18:2.2","cnd18:2.3","cnd18:2.4"],"kind":"text","text":{"pi":"Yo atītaṁ ādisatīti.\nYoti yo so bhagavā sayambhū.\nAnācariyako pubbe ananussutesu dhammesu sāmaṁ saccāni abhisambujjhi, tattha ca sabbaññutaṁ patto, balesu ca vasībhāvaṁ.\nAtītaṁ ādisatīti bhagavā attano ca paresañca atītampi ādisati, anāgatampi ādisati, paccuppannampi ādisati."}},{"id":"cnd18:3","sourceIds":["cnd18:3.1","cnd18:3.2","cnd18:3.3","cnd18:3.4","cnd18:3.5","cnd18:3.6","cnd18:3.7","cnd18:3.8","cnd18:3.9","cnd18:3.10","cnd18:3.11"],"kind":"text","text":{"pi":"Kathaṁ bhagavā attano atītaṁ ādisati?\nBhagavā attano atītaṁ ekampi jātiṁ ādisati, dvepi jātiyo ādisati, tissopi jātiyo ādisati, catassopi jātiyo ādisati, pañcapi jātiyo ādisati, dasapi jātiyo ādisati, vīsampi jātiyo ādisati, tiṁsampi jātiyo ādisati, cattālīsampi jātiyo ādisati, paññāsampi jātiyo ādisati, jātisatampi …pe…\njātisahassampi …\njātisatasahassampi …\nanekepi saṁvaṭṭakappe …\nanekepi vivaṭṭakappe …\nanekepi saṁvaṭṭavivaṭṭakappe ādisati—\n“amutrāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto amutra udapādiṁ;\ntatrāpāsiṁ evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto idhūpapanno”ti.\nIti sākāraṁ sauddesaṁ anekavihitaṁ pubbenivāsaṁ ādisati.\nEvaṁ bhagavā attano atītaṁ ādisati."}},{"id":"cnd18:4","sourceIds":["cnd18:4.1","cnd18:4.2","cnd18:4.3","cnd18:4.4","cnd18:4.5","cnd18:4.6","cnd18:4.7"],"kind":"text","text":{"pi":"Kathaṁ bhagavā paresaṁ atītaṁ ādisati?\nBhagavā paresaṁ atītaṁ ekampi jātiṁ ādisati, dvepi jātiyo ādisati …pe…\nanekepi saṁvaṭṭavivaṭṭakappe ādisati—\n“amutrāsi evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto amutra udapādi;\ntatrāpāsi evaṁnāmo evaṅgotto evaṁvaṇṇo evamāhāro evaṁsukhadukkhappaṭisaṁvedī evamāyupariyanto, so tato cuto idhūpapanno”ti.\nIti sākāraṁ sauddesaṁ anekavihitaṁ pubbenivāsaṁ ādisati.\nEvaṁ bhagavā paresaṁ atītaṁ ādisati."}},{"id":"cnd18:5","sourceIds":["cnd18:5.1"],"kind":"text","text":{"pi":"Bhagavā pañca jātakasatāni bhāsanto attano ca paresañca atītaṁ ādisati, mahāpadāniyasuttantaṁ bhāsanto attano ca paresañca atītaṁ ādisati, mahāsudassaniyasuttantaṁ bhāsanto attano ca paresañca atītaṁ ādisati, mahāgovindiyasuttantaṁ bhāsanto attano ca paresañca atītaṁ ādisati, maghadeviyasuttantaṁ bhāsanto attano ca paresañca atītaṁ ādisati."}},{"id":"cnd18:6","sourceIds":["cnd18:6.1","cnd18:6.2","cnd18:6.3","cnd18:6.4","cnd18:6.5","cnd18:6.6"],"kind":"text","text":{"pi":"Vuttañhetaṁ bhagavatā—\n“atītaṁ kho, cunda, addhānaṁ ārabbha tathāgatassa satānusāriñāṇaṁ hoti.\nSo yāvatakaṁ ākaṅkhati tāvatakaṁ anussarati.\nAnāgatañca kho, cunda …pe…\npaccuppannañca kho, cunda, addhānaṁ ārabbha tathāgatassa bodhijaṁ ñāṇaṁ uppajjati—\n‘ayamantimā jāti, natthi dāni punabbhavo’”ti."}},{"id":"cnd18:7","sourceIds":["cnd18:7.1","cnd18:7.2","cnd18:7.3"],"kind":"text","text":{"pi":"Indriyaparopariyattañāṇaṁ tathāgatassa tathāgatabalaṁ, sattānaṁ āsayānusayañāṇaṁ tathāgatassa tathāgatabalaṁ, yamakapāṭihīre ñāṇaṁ tathāgatassa tathāgatabalaṁ, mahākaruṇāsamāpattiyā ñāṇaṁ tathāgatassa tathāgatabalaṁ, sabbaññutañāṇaṁ tathāgatassa tathāgatabalaṁ, anāvaraṇañāṇaṁ tathāgatassa tathāgatabalaṁ, sabbattha asaṅgamappaṭihatamanāvaraṇañāṇaṁ tathāgatassa tathāgatabalaṁ.\nEvaṁ bhagavā attano ca paresañca atītampi ādisati anāgatampi ādisati paccuppannampi ādisati ācikkhati deseti paññapeti paṭṭhapeti vivarati vibhajati uttānīkaroti pakāsetīti—\nyo atītaṁ ādisati."}},{"id":"cnd18:8","sourceIds":["cnd18:8.1","cnd18:8.2","cnd18:8.3","cnd18:8.4","cnd18:8.5"],"kind":"text","text":{"pi":"Iccāyasmā posāloti.\nIccāti padasandhi …pe…\nāyasmāti piyavacanaṁ …pe…\nposāloti tassa brāhmaṇassa nāmaṁ …pe… abhilāpoti—\niccāyasmā posālo."}},{"id":"cnd18:9","sourceIds":["cnd18:9.1","cnd18:9.2","cnd18:9.3","cnd18:9.4","cnd18:9.5","cnd18:9.6","cnd18:9.7","cnd18:9.8","cnd18:9.9","cnd18:9.10","cnd18:9.11","cnd18:9.12"],"kind":"text","text":{"pi":"Anejo chinnasaṁsayoti ejā vuccati taṇhā.\nYo rāgo sārāgo …pe… abhijjhā lobho akusalamūlaṁ.\nSā ejā taṇhā buddhassa bhagavato pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.\nTasmā buddho anejo.\nEjāya pahīnattā anejo.\nBhagavā lābhepi na iñjati …pe…\ndukkhepi na iñjati na calati na vedhati nappavedhati na sampavedhatīti anejo.\nChinnasaṁsayoti saṁsayo vuccati vicikicchā.\nDukkhe kaṅkhā …pe… chambhitattaṁ cittassa manovilekho.\nSo saṁsayo buddhassa bhagavato pahīno chinno ucchinno samucchinno vūpasanto paṭinissaggo paṭippassaddho abhabbuppattiko ñāṇagginā daḍḍho.\nTasmā buddho chinnasaṁsayoti—\nanejo chinnasaṁsayo."}},{"id":"cnd18:10","sourceIds":["cnd18:10.1","cnd18:10.2","cnd18:10.3"],"kind":"text","text":{"pi":"Pāraguṁ sabbadhammānanti bhagavā sabbadhammānaṁ abhiññāpāragū pariññāpāragū pahānapāragū bhāvanāpāragū sacchikiriyāpāragū samāpattipāragū abhiññāpāragū sabbadhammānaṁ …pe…\njātimaraṇasaṁsāro natthi tassa punabbhavoti—\npāragū sabbadhammānaṁ."}},{"id":"cnd18:11","sourceIds":["cnd18:11.1","cnd18:11.2","cnd18:11.3","cnd18:11.4"],"kind":"text","text":{"pi":"Atthi pañhena āgamanti pañhena atthiko āgatomhi …pe…\n“vahassetaṁ bhāran”ti—\natthi pañhena āgamaṁ.\nTenāha so brāhmaṇo—"}},{"id":"cnd18:12","sourceIds":["cnd18:12.1","cnd18:12.2","cnd18:12.3","cnd18:12.4","cnd18:12.5"],"kind":"text","text":{"pi":"“Yo atītaṁ ādisati,\n(iccāyasmā posālo)\nAnejo chinnasaṁsayo;\nPāraguṁ sabbadhammānaṁ,\nAtthi pañhena āgaman”ti."}},{"id":"cnd18:13","sourceIds":["cnd18:13.1","cnd18:13.2","cnd18:13.3","cnd18:13.4","cnd18:13.5","cnd18:13.6"],"kind":"text","text":{"pi":"Vibhūtarūpasaññissa,\nsabbakāyappahāyino;\nAjjhattañca bahiddhā ca,\nnatthi kiñcīti passato;\nÑāṇaṁ sakkānupucchāmi,\nkathaṁ neyyo tathāvidho."}},{"id":"cnd18:14","sourceIds":["cnd18:14.1","cnd18:14.2","cnd18:14.3","cnd18:14.4","cnd18:14.5"],"kind":"text","text":{"pi":"Vibhūtarūpasaññissāti katamā rūpasaññā?\nRūpāvacarasamāpattiṁ samāpannassa vā upapannassa vā diṭṭhadhammasukhavihārissa vā saññā sañjānanā sañjānitattaṁ—\nayaṁ rūpasaññā.\nVibhūtarūpasaññissāti catasso arūpasamāpattiyo paṭiladdhassa rūpasaññā vibhūtā honti vigatā atikkantā samatikkantā vītivattāti—\nvibhūtarūpasaññissa."}},{"id":"cnd18:15","sourceIds":["cnd18:15.1","cnd18:15.2"],"kind":"text","text":{"pi":"Sabbakāyappahāyinoti sabbo tassa paṭisandhiko rūpakāyo pahīno, tadaṅgasamatikkamā vikkhambhanappahānena pahīno tassa rūpakāyoti—\nsabbakāyappahāyino."}},{"id":"cnd18:16","sourceIds":["cnd18:16.1","cnd18:16.2","cnd18:16.3","cnd18:16.4","cnd18:16.5","cnd18:16.6","cnd18:16.7"],"kind":"text","text":{"pi":"Ajjhattañca bahiddhā ca, natthi kiñcīti passatoti.\nNatthi kiñcīti ākiñcaññāyatanasamāpatti.\nKiṅkāraṇā?\nNatthi kiñcīti ākiñcaññāyatanasamāpatti.\nYaṁ viññāṇañcāyatanasamāpattiṁ sato samāpajjitvā tato vuṭṭhahitvā taññeva viññāṇaṁ abhāveti, vibhāveti, antaradhāpeti, “natthi kiñcī”ti passati—\ntaṅkāraṇā natthi kiñcīti ākiñcaññāyatanasamāpattīti—\najjhattañca bahiddhā ca natthi kiñcīti passato."}},{"id":"cnd18:17","sourceIds":["cnd18:17.1","cnd18:17.2","cnd18:17.3","cnd18:17.4","cnd18:17.5","cnd18:17.6","cnd18:17.7"],"kind":"text","text":{"pi":"Ñāṇaṁ sakkānupucchāmīti.\nSakkāti—\nsakko.\nBhagavā sakyakulā pabbajitotipi sakko …pe… pahīnabhayabheravo vigatalomahaṁsotipi sakko.\nÑāṇaṁ sakkānupucchāmīti tassa ñāṇaṁ pucchāmi, paññaṁ pucchāmi, sambuddhaṁ pucchāmi.\n“Kīdisaṁ kiṁsaṇṭhitaṁ kiṁpakāraṁ kiṁpaṭibhāgaṁ ñāṇaṁ icchitabban”ti—\nñāṇaṁ sakkānupucchāmi."}},{"id":"cnd18:18","sourceIds":["cnd18:18.1","cnd18:18.2","cnd18:18.3","cnd18:18.4","cnd18:18.5"],"kind":"text","text":{"pi":"Kathaṁ neyyo tathāvidhoti kathaṁ so netabbo vinetabbo anunetabbo paññāpetabbo nijjhāpetabbo pekkhetabbo pasādetabbo?\nKathaṁ tena uttari ñāṇaṁ uppādetabbaṁ?\nTathāvidhoti tathāvidho tādiso tassaṇṭhito tappakāro tappaṭibhāgo yo so ākiñcaññāyatanasamāpattilābhīti—\nkathaṁ neyyo tathāvidho.\nTenāha so brāhmaṇo—"}},{"id":"cnd18:19","sourceIds":["cnd18:19.1","cnd18:19.2","cnd18:19.3","cnd18:19.4","cnd18:19.5","cnd18:19.6"],"kind":"text","text":{"pi":"“Vibhūtarūpasaññissa,\nsabbakāyappahāyino;\nAjjhattañca bahiddhā ca,\nnatthi kiñcīti passato;\nÑāṇaṁ sakkānupucchāmi,\nkathaṁ neyyo tathāvidho”ti."}},{"id":"cnd18:20","sourceIds":["cnd18:20.1","cnd18:20.2","cnd18:20.3","cnd18:20.4","cnd18:20.5"],"kind":"text","text":{"pi":"Viññāṇaṭṭhitiyo sabbā,\n(posālāti bhagavā)\nAbhijānaṁ tathāgato;\nTiṭṭhantamenaṁ jānāti,\nDhimuttaṁ tapparāyaṇaṁ."}},{"id":"cnd18:21","sourceIds":["cnd18:21.1","cnd18:21.2","cnd18:21.3","cnd18:21.4","cnd18:21.5","cnd18:21.6","cnd18:21.7","cnd18:21.8"],"kind":"text","text":{"pi":"Viññāṇaṭṭhitiyo sabbāti bhagavā abhisaṅkhāravasena catasso viññāṇaṭṭhitiyo jānāti, paṭisandhivasena satta viññāṇaṭṭhitiyo jānāti.\nKathaṁ bhagavā abhisaṅkhāravasena catasso viññāṇaṭṭhitiyo jānāti?\nVuttañhetaṁ bhagavatā—\n“rūpupayaṁ vā, bhikkhave, viññāṇaṁ tiṭṭhamānaṁ tiṭṭheyya, rūpārammaṇaṁ rūpappatiṭṭhaṁ nandūpasecanaṁ vuddhiṁ virūḷhiṁ vepullaṁ āpajjeyya.\nVedanupayaṁ vā, bhikkhave …pe…\nsaññupayaṁ vā, bhikkhave …pe…\nsaṅkhārupayaṁ vā, bhikkhave, viññāṇaṁ tiṭṭhamānaṁ tiṭṭheyya, saṅkhārārammaṇaṁ saṅkhārappatiṭṭhaṁ nandūpasecanaṁ vuddhiṁ virūḷhiṁ vepullaṁ āpajjeyyā”ti.\nEvaṁ bhagavā abhisaṅkhāravasena catasso viññāṇaṭṭhitiyo jānāti."}},{"id":"cnd18:22","sourceIds":["cnd18:22.1","cnd18:22.2","cnd18:22.3","cnd18:22.4","cnd18:22.5"],"kind":"text","text":{"pi":"Kathaṁ bhagavā paṭisandhivasena satta viññāṇaṭṭhitiyo jānāti?\nVuttañhetaṁ bhagavatā—\n“santi, bhikkhave, sattā nānattakāyā nānattasaññino—\nseyyathāpi manussā ekacce ca devā ekacce ca vinipātikā.\nAyaṁ paṭhamā viññāṇaṭṭhiti."}},{"id":"cnd18:23","sourceIds":["cnd18:23.1","cnd18:23.2"],"kind":"text","text":{"pi":"Santi, bhikkhave, sattā nānattakāyā ekattasaññino, seyyathāpi devā brahmakāyikā paṭhamābhinibbattā.\nAyaṁ dutiyā viññāṇaṭṭhiti."}},{"id":"cnd18:24","sourceIds":["cnd18:24.1","cnd18:24.2"],"kind":"text","text":{"pi":"Santi, bhikkhave, sattā ekattakāyā nānattasaññino, seyyathāpi devā ābhassarā.\nAyaṁ tatiyā viññāṇaṭṭhiti."}},{"id":"cnd18:25","sourceIds":["cnd18:25.1","cnd18:25.2"],"kind":"text","text":{"pi":"Santi, bhikkhave, sattā ekattakāyā ekattasaññino, seyyathāpi devā subhakiṇhā.\nAyaṁ catutthī viññāṇaṭṭhiti."}},{"id":"cnd18:26","sourceIds":["cnd18:26.1","cnd18:26.2"],"kind":"text","text":{"pi":"Santi, bhikkhave, sattā sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā, ananto ākāsoti ākāsānañcāyatanūpagā.\nAyaṁ pañcamī viññāṇaṭṭhiti."}},{"id":"cnd18:27","sourceIds":["cnd18:27.1","cnd18:27.2"],"kind":"text","text":{"pi":"Santi, bhikkhave, sattā sabbaso ākāsānañcāyatanaṁ samatikkamma, anantaṁ viññāṇanti viññāṇañcāyatanūpagā.\nAyaṁ chaṭṭhī viññāṇaṭṭhiti."}},{"id":"cnd18:28","sourceIds":["cnd18:28.1","cnd18:28.2","cnd18:28.3","cnd18:28.4"],"kind":"text","text":{"pi":"Santi, bhikkhave, sattā sabbaso viññāṇañcāyatanaṁ samatikkamma, natthi kiñcīti ākiñcaññāyatanūpagā.\nAyaṁ sattamī viññāṇaṭṭhiti”.\nEvaṁ bhagavā paṭisandhivasena satta viññāṇaṭṭhitiyo jānātīti—\nviññāṇaṭṭhitiyo sabbā."}},{"id":"cnd18:29","sourceIds":["cnd18:29.1","cnd18:29.2","cnd18:29.3","cnd18:29.4"],"kind":"text","text":{"pi":"Posālāti bhagavāti.\nPosālāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\nposālāti bhagavā."}},{"id":"cnd18:30","sourceIds":["cnd18:30.1","cnd18:30.2","cnd18:30.3","cnd18:30.4","cnd18:30.5","cnd18:30.6","cnd18:30.7","cnd18:30.8","cnd18:30.9","cnd18:30.10","cnd18:30.11","cnd18:30.12"],"kind":"text","text":{"pi":"Abhijānaṁ tathāgatoti.\nAbhijānanti abhijānanto vijānanto paṭivijānanto paṭivijjhanto tathāgato.\nVuttañhetaṁ bhagavatā—\n“atītañcepi kho, cunda, hoti abhūtaṁ atacchaṁ anatthasañhitaṁ, na taṁ tathāgato byākaroti.\nAtītañcepi, cunda, hoti bhūtaṁ tacchaṁ anatthasañhitaṁ, tampi tathāgato na byākaroti.\nAtītañcepi kho, cunda, hoti bhūtaṁ tacchaṁ atthasañhitaṁ, tatra kālaññū tathāgato hoti tasseva pañhassa veyyākaraṇāya.\nAnāgatañcepi, cunda, hoti …pe…\npaccuppannañcepi, cunda, hoti abhūtaṁ atacchaṁ anatthasañhitaṁ, na taṁ tathāgato byākaroti.\nPaccuppannañcepi, cunda, hoti bhūtaṁ tacchaṁ anatthasañhitaṁ, tampi tathāgato na byākaroti.\nPaccuppannañcepi, cunda, hoti bhūtaṁ tacchaṁ atthasañhitaṁ, tatra kālaññū tathāgato hoti tassa pañhassa veyyākaraṇāya.\nIti kho, cunda, atītānāgatapaccuppannesu dhammesu tathāgato kālavādī bhūtavādī atthavādī dhammavādī vinayavādī.\nTasmā ‘tathāgato’ti vuccati."}},{"id":"cnd18:31","sourceIds":["cnd18:31.1","cnd18:31.2","cnd18:31.3","cnd18:31.4","cnd18:31.5","cnd18:31.6","cnd18:31.7","cnd18:31.8","cnd18:31.9","cnd18:31.10","cnd18:31.11"],"kind":"text","text":{"pi":"Yaṁ kho, cunda, sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā, sabbaṁ taṁ tathāgatena abhisambuddhaṁ.\nTasmā ‘tathāgato’ti vuccati.\nYañca, cunda, rattiṁ tathāgato anuttaraṁ sammāsambodhiṁ abhisambujjhati, yañca rattiṁ anupādisesāya nibbānadhātuyā parinibbāyati, yaṁ etasmiṁ antare bhāsati lapati niddisati sabbaṁ taṁ tatheva hoti no aññathā.\nTasmā ‘tathāgato’ti vuccati.\nYathāvādī, cunda, tathāgato tathākārī;\nyathākārī tathāvādī.\nIti yathāvādī tathākārī, yathākārī tathāvādī.\nTasmā ‘tathāgato’ti vuccati.\nSadevake, cunda, loke samārake sabrahmake sassamaṇabrāhmaṇiyā pajāya sadevamanussāya tathāgato abhibhū anabhibhūto aññadatthudaso vasavattī.\nTasmā tathāgatoti vuccatī”ti—\nabhijānaṁ tathāgato."}},{"id":"cnd18:32","sourceIds":["cnd18:32.1","cnd18:32.2","cnd18:32.3","cnd18:32.4","cnd18:32.5","cnd18:32.6","cnd18:32.7","cnd18:32.8","cnd18:32.9","cnd18:32.10"],"kind":"text","text":{"pi":"Tiṭṭhantamenaṁ jānātīti bhagavā idhatthaññeva jānāti kammābhisaṅkhāravasena—\n“ayaṁ puggalo kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjissatī”ti.\nBhagavā idhatthaññeva jānāti kammābhisaṅkhāravasena—\n“ayaṁ puggalo kāyassa bhedā paraṁ maraṇā tiracchānayoniṁ upapajjissatī”ti.\nBhagavā idhatthaññeva jānāti kammābhisaṅkhāravasena—\n“ayaṁ puggalo kāyassa bhedā paraṁ maraṇā pettivisayaṁ upapajjissatī”ti.\nBhagavā idhatthaññeva jānāti kammābhisaṅkhāravasena—\n“ayaṁ puggalo kāyassa bhedā paraṁ maraṇā manussesu uppajjissatī”ti.\nBhagavā idhatthaññeva jānāti kammābhisaṅkhāravasena—\n“ayaṁ puggalo suppaṭipanno kāyassa bhedā paraṁ maraṇā sugatiṁ saggaṁ lokaṁ upapajjissatī”ti."}},{"id":"cnd18:33","sourceIds":["cnd18:33.1","cnd18:33.2","cnd18:33.3"],"kind":"text","text":{"pi":"Vuttañhetaṁ bhagavatā—\n“idha panāhaṁ, sāriputta, ekaccaṁ puggalaṁ evaṁ cetasā ceto paricca pajānāmi—\n‘tathāyaṁ puggalo paṭipanno, tathā ca iriyati, tañca maggaṁ samārūḷho, yathā kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapajjissatī’ti."}},{"id":"cnd18:34","sourceIds":["cnd18:34.1","cnd18:34.2"],"kind":"text","text":{"pi":"Idha panāhaṁ, sāriputta, ekaccaṁ puggalaṁ evaṁ cetasā ceto paricca pajānāmi—\n‘tathāyaṁ puggalo paṭipanno tathā ca iriyati tañca maggaṁ samārūḷho, yathā kāyassa bhedā paraṁ maraṇā tiracchānayoniṁ upapajjissatī’ti."}},{"id":"cnd18:35","sourceIds":["cnd18:35.1","cnd18:35.2"],"kind":"text","text":{"pi":"Idha panāhaṁ, sāriputta, ekaccaṁ puggalaṁ evaṁ cetasā ceto paricca pajānāmi—\n‘tathāyaṁ puggalo paṭipanno tathā ca iriyati tañca maggaṁ samārūḷho, yathā kāyassa bhedā paraṁ maraṇā pettivisayaṁ upapajjissatī’ti."}},{"id":"cnd18:36","sourceIds":["cnd18:36.1","cnd18:36.2"],"kind":"text","text":{"pi":"Idha panāhaṁ, sāriputta, ekaccaṁ puggalaṁ evaṁ cetasā ceto paricca pajānāmi—\n‘tathāyaṁ puggalo paṭipanno tathā ca iriyati tañca maggaṁ samārūḷho, yathā kāyassa bhedā paraṁ maraṇā manussesu uppajjissatī’ti."}},{"id":"cnd18:37","sourceIds":["cnd18:37.1","cnd18:37.2"],"kind":"text","text":{"pi":"Idha panāhaṁ, sāriputta, ekaccaṁ puggalaṁ evaṁ cetasā ceto paricca pajānāmi—\n‘tathāyaṁ puggalo paṭipanno tathā ca iriyati tañca maggaṁ samārūḷho, yathā kāyassa bhedā paraṁ maraṇā sugatiṁ saggaṁ lokaṁ upapajjissatī’ti."}},{"id":"cnd18:38","sourceIds":["cnd18:38.1","cnd18:38.2","cnd18:38.3"],"kind":"text","text":{"pi":"Idha panāhaṁ, sāriputta, ekaccaṁ puggalaṁ evaṁ cetasā ceto paricca pajānāmi—\n‘tathāyaṁ puggalo paṭipanno tathā ca iriyati tañca maggaṁ samārūḷho, yathā āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā sacchikatvā upasampajja viharatī’”ti—\ntiṭṭhantamenaṁ jānāti."}},{"id":"cnd18:39","sourceIds":["cnd18:39.1","cnd18:39.2","cnd18:39.3","cnd18:39.4","cnd18:39.5"],"kind":"text","text":{"pi":"Dhimuttaṁ tapparāyaṇanti.\nDhimuttanti ākiñcaññāyatanaṁ.\nDhimuttanti vimokkhena dhimuttaṁ tatrādhimuttaṁ tadadhimuttaṁ tadādhipateyyaṁ.\nAtha vā bhagavā jānāti—\n“ayaṁ puggalo rūpādhimutto saddādhimutto gandhādhimutto rasādhimutto phoṭṭhabbādhimutto kulādhimutto gaṇādhimutto āvāsādhimutto lābhādhimutto yasādhimutto pasaṁsādhimutto sukhādhimutto cīvarādhimutto piṇḍapātādhimutto senāsanādhimutto gilānapaccayabhesajjaparikkhārādhimutto suttantādhimutto vinayādhimutto abhidhammādhimutto āraññakaṅgādhimutto piṇḍapātikaṅgādhimutto paṁsukūlikaṅgādhimutto tecīvarikaṅgādhimutto sapadānacārikaṅgādhimutto khalupacchābhattikaṅgādhimutto nesajjikaṅgādhimutto yathāsanthatikaṅgādhimutto paṭhamajjhānādhimutto dutiyajjhānādhimutto tatiyajjhānādhimutto catutthajjhānādhimutto ākāsānañcāyatanasamāpattādhimutto viññāṇañcāyatanasamāpattādhimutto ākiñcaññāyatanasamāpattādhimutto nevasaññānāsaññāyatanasamāpattādhimutto”ti dhimuttaṁ."}},{"id":"cnd18:40","sourceIds":["cnd18:40.1","cnd18:40.2","cnd18:40.3","cnd18:40.4","cnd18:40.5","cnd18:40.6"],"kind":"text","text":{"pi":"Tapparāyaṇanti ākiñcaññāyatanamayaṁ tapparāyaṇaṁ kammaparāyaṇaṁ vipākaparāyaṇaṁ kammagarukaṁ paṭisandhigarukaṁ.\nAtha vā bhagavā jānāti—\n“ayaṁ puggalo rūpaparāyaṇo …pe…\nnevasaññānāsaññāyatanasamāpattiparāyaṇo”ti—\ndhimuttaṁ tapparāyaṇaṁ.\nTenāha bhagavā—"}},{"id":"cnd18:41","sourceIds":["cnd18:41.1","cnd18:41.2","cnd18:41.3","cnd18:41.4","cnd18:41.5"],"kind":"text","text":{"pi":"“Viññāṇaṭṭhitiyo sabbā,\n(posālāti bhagavā)\nAbhijānaṁ tathāgato;\nTiṭṭhantamenaṁ jānāti,\nDhimuttaṁ tapparāyaṇan”ti."}},{"id":"cnd18:42","sourceIds":["cnd18:42.1","cnd18:42.2","cnd18:42.3","cnd18:42.4","cnd18:42.5","cnd18:42.6"],"kind":"text","text":{"pi":"Ākiñcaññasambhavaṁ ñatvā,\nNandisaṁyojanaṁ iti;\nEvametaṁ abhiññāya,\nTato tattha vipassati;\nEtaṁ ñāṇaṁ tathaṁ tassa,\nBrāhmaṇassa vusīmato."}},{"id":"cnd18:43","sourceIds":["cnd18:43.1","cnd18:43.2","cnd18:43.3"],"kind":"text","text":{"pi":"Ākiñcaññasambhavaṁ ñatvāti ākiñcaññasambhavoti vuccati ākiñcaññāyatanasaṁvattaniko kammābhisaṅkhāro.\nĀkiñcaññāyatanasaṁvattanikaṁ kammābhisaṅkhāraṁ ākiñcaññasambhavoti ñatvā, laggananti ñatvā, bandhananti ñatvā, palibodhoti ñatvā jānitvā tulayitvā tīrayitvā vibhāvayitvā vibhūtaṁ katvāti—\nākiñcaññasambhavaṁ ñatvā."}},{"id":"cnd18:44","sourceIds":["cnd18:44.1","cnd18:44.2","cnd18:44.3","cnd18:44.4"],"kind":"text","text":{"pi":"Nandisaṁyojanaṁ itīti nandisaṁyojanaṁ vuccati arūparāgo.\nArūparāgena taṁ kammaṁ laggaṁ laggitaṁ palibuddhaṁ arūparāgaṁ nandisaṁyojananti ñatvā, laggananti ñatvā, bandhananti ñatvā, palibodhoti ñatvā jānitvā tulayitvā tīrayitvā vibhāvayitvā vibhūtaṁ katvā.\nItīti padasandhi padasaṁsaggo padapāripūrī akkharasamavāyo byañjanasiliṭṭhatā padānupubbatāpetaṁ itīti—\nnandisaṁyojanaṁ iti."}},{"id":"cnd18:45","sourceIds":["cnd18:45.1","cnd18:45.2"],"kind":"text","text":{"pi":"Evametaṁ abhiññāyāti evaṁ etaṁ abhiññāya jānitvā tulayitvā tīrayitvā vibhāvayitvā vibhūtaṁ katvāti—\nevametaṁ abhiññāya."}},{"id":"cnd18:46","sourceIds":["cnd18:46.1","cnd18:46.2","cnd18:46.3","cnd18:46.4"],"kind":"text","text":{"pi":"Tato tattha vipassatīti.\nTatthāti ākiñcaññāyatanaṁ samāpajjitvā tato vuṭṭhahitvā tattha jāte cittacetasike dhamme aniccato vipassati, dukkhato vipassati, rogato …pe…\nnissaraṇato vipassati dakkhati oloketi nijjhāyati upaparikkhatīti—\ntato tattha vipassati."}},{"id":"cnd18:47","sourceIds":["cnd18:47.1","cnd18:47.2"],"kind":"text","text":{"pi":"Etaṁ ñāṇaṁ tathaṁ tassāti etaṁ ñāṇaṁ tacchaṁ bhūtaṁ yāthāvaṁ aviparītaṁ tassāti—\netaṁ ñāṇaṁ tathaṁ tassa."}},{"id":"cnd18:48","sourceIds":["cnd18:48.1","cnd18:48.2","cnd18:48.3","cnd18:48.4","cnd18:48.5","cnd18:48.6","cnd18:48.7","cnd18:48.8"],"kind":"text","text":{"pi":"Brāhmaṇassa vusīmatoti.\nBrāhmaṇoti sattannaṁ dhammānaṁ bāhitattā brāhmaṇo …pe… asito tādi pavuccate sa brahmāti.\nBrāhmaṇassa vusīmatoti puthujjanakalyāṇaṁ upādāya satta sekkhā appattassa pattiyā anadhigatassa adhigamāya asacchikatassa sacchikiriyāya vasanti saṁvasanti āvasanti parivasanti;\narahā vusitavā katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto,\nso vutthavāso ciṇṇacaraṇo …pe… jātimaraṇasaṁsāro;\nnatthi tassa punabbhavoti—\nbrāhmaṇassa vusīmato.\nTenāha bhagavā—"}},{"id":"cnd18:49","sourceIds":["cnd18:49.1","cnd18:49.2","cnd18:49.3","cnd18:49.4","cnd18:49.5","cnd18:49.6"],"kind":"text","text":{"pi":"“Ākiñcaññasambhavaṁ ñatvā,\nnandisaṁyojanaṁ iti;\nEvametaṁ abhiññāya,\ntato tattha vipassati;\nEtaṁ ñāṇaṁ tathaṁ tassa,\nbrāhmaṇassa vusīmato”ti."}},{"id":"cnd18:50","sourceIds":["cnd18:50.1","cnd18:50.2","cnd18:50.3"],"kind":"text","text":{"pi":"Saha gāthāpariyosānā …pe…\nsatthā me, bhante bhagavā, sāvakohamasmīti.\nPosālamāṇavapucchāniddeso cuddasamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd18/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}