{"id":"cnd20","title":"16. Piṅgiyamāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd20","title":"16. Piṅgiyamāṇavapucchāniddesa","units":[{"id":"cnd20:0","sourceIds":["cnd20:0.1","cnd20:0.2","cnd20:0.3","cnd20:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n16. Piṅgiyamāṇavapucchāniddesa"}},{"id":"cnd20:1","sourceIds":["cnd20:1.1","cnd20:1.2","cnd20:1.3","cnd20:1.4","cnd20:1.5","cnd20:1.6"],"kind":"text","text":{"pi":"Jiṇṇohamasmi abalo vītavaṇṇo,\n(iccāyasmā piṅgiyo)\nNettā na suddhā savanaṁ na phāsu;\nMāhaṁ nassaṁ momuho antarāva,\nĀcikkha dhammaṁ yamahaṁ vijaññaṁ;\nJātijarāya idha vippahānaṁ."}},{"id":"cnd20:2","sourceIds":["cnd20:2.1","cnd20:2.2","cnd20:2.3","cnd20:2.4","cnd20:2.5","cnd20:2.6"],"kind":"text","text":{"pi":"Jiṇṇohamasmi abalo vītavaṇṇoti.\nJiṇṇohamasmīti jiṇṇo vuḍḍho mahallako addhagato vayoanuppatto vīsavassasatiko jātiyā.\nAbaloti dubbalo appabalo appathāmo.\nVītavaṇṇoti vītavaṇṇo vigatavaṇṇo vigacchitavaṇṇo.\nYā sā purimā subhā vaṇṇanibhā sā antarahitā, ādīnavo pātubhūtoti—\njiṇṇohamasmi abalo vītavaṇṇo."}},{"id":"cnd20:3","sourceIds":["cnd20:3.1","cnd20:3.2","cnd20:3.3","cnd20:3.4","cnd20:3.5"],"kind":"text","text":{"pi":"Iccāyasmā piṅgiyoti.\nIccāti padasandhi …pe….\nĀyasmāti piyavacanaṁ …pe….\nPiṅgiyoti tassa brāhmaṇassa nāmaṁ …pe… abhilāpoti—\niccāyasmā piṅgiyo."}},{"id":"cnd20:4","sourceIds":["cnd20:4.1","cnd20:4.2","cnd20:4.3","cnd20:4.4","cnd20:4.5","cnd20:4.6"],"kind":"text","text":{"pi":"Nettā na suddhā savanaṁ na phāsūti nettā asuddhā avisuddhā aparisuddhā avodātā.\nNo tathā cakkhunā rūpe passāmīti—\nnettā na suddhā.\nSavanaṁ na phāsūti sotaṁ asuddhaṁ avisuddhaṁ aparisuddhaṁ avodātaṁ.\nNo tathā sotena saddaṁ suṇomīti—\nnettā na suddhā savanaṁ na phāsu."}},{"id":"cnd20:5","sourceIds":["cnd20:5.1","cnd20:5.2","cnd20:5.3","cnd20:5.4","cnd20:5.5"],"kind":"text","text":{"pi":"Māhaṁ nassaṁ momuho antarāvāti.\nMāhaṁ nassanti māhaṁ nassaṁ māhaṁ vinassaṁ māhaṁ panassaṁ.\nMomuhoti mohamuho avijjāgato aññāṇī avibhāvī duppañño.\nAntarāvāti tuyhaṁ dhammaṁ diṭṭhiṁ paṭipadaṁ maggaṁ anaññāya anadhigantvā aviditvā appaṭilabhitvā aphassayitvā asacchikaritvā antarāyeva kālaṁ kareyyanti—\nmāhaṁ nassaṁ momuho antarāva."}},{"id":"cnd20:6","sourceIds":["cnd20:6.1","cnd20:6.2","cnd20:6.3","cnd20:6.4","cnd20:6.5"],"kind":"text","text":{"pi":"Ācikkha dhammaṁ yamahaṁ vijaññanti.\nDhammanti ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ, cattāro satipaṭṭhāne, cattāro sammappadhāne, cattāro iddhipāde, pañcindriyāni, pañca balāni, satta bojjhaṅge, ariyaṁ aṭṭhaṅgikaṁ maggaṁ, nibbānañca nibbānagāminiñca paṭipadaṁ ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\nācikkha dhammaṁ.\nYamahaṁ vijaññanti yamahaṁ jāneyyaṁ ājāneyyaṁ vijāneyyaṁ paṭivijāneyyaṁ paṭivijjheyyaṁ adhigaccheyyaṁ phasseyyaṁ sacchikareyyanti—\nācikkha dhammaṁ yamahaṁ vijaññaṁ."}},{"id":"cnd20:7","sourceIds":["cnd20:7.1","cnd20:7.2","cnd20:7.3"],"kind":"text","text":{"pi":"Jātijarāya idha vippahānanti idheva jātijarāmaraṇassa pahānaṁ vūpasamaṁ paṭinissaggaṁ paṭippassaddhiṁ amataṁ nibbānanti—\njātijarāya idha vippahānaṁ.\nTenāha so brāhmaṇo—"}},{"id":"cnd20:8","sourceIds":["cnd20:8.1","cnd20:8.2","cnd20:8.3","cnd20:8.4","cnd20:8.5","cnd20:8.6"],"kind":"text","text":{"pi":"“Jiṇṇohamasmi abalo vītavaṇṇo,\n(iccāyasmā piṅgiyo)\nNettā na suddhā savanaṁ na phāsu;\nMāhaṁ nassaṁ momuho antarāva,\nĀcikkha dhammaṁ yamahaṁ vijaññaṁ;\nJātijarāya idha vippahānan”ti."}},{"id":"cnd20:9","sourceIds":["cnd20:9.1","cnd20:9.2","cnd20:9.3","cnd20:9.4","cnd20:9.5"],"kind":"text","text":{"pi":"Disvāna rūpesu vihaññamāne,\n(piṅgiyāti bhagavā)\nRuppanti rūpesu janā pamattā;\nTasmā tuvaṁ piṅgiya appamatto,\nJahassu rūpaṁ apunabbhavāya."}},{"id":"cnd20:10","sourceIds":["cnd20:10.1","cnd20:10.2","cnd20:10.3","cnd20:10.4","cnd20:10.5","cnd20:10.6","cnd20:10.7","cnd20:10.8"],"kind":"text","text":{"pi":"Disvāna rūpesu vihaññamāneti.\nRūpanti cattāro ca mahābhūtā catunnañca mahābhūtānaṁ upādāya rūpaṁ.\nSattā rūpahetu rūpappaccayā rūpakāraṇā haññanti vihaññanti upahaññanti upaghātiyanti.\nRūpe sati vividhakammakāraṇā kārenti.\nKasāhipi tāḷenti, vettehipi tāḷenti, aḍḍhadaṇḍakehipi tāḷenti, hatthampi chindanti, pādampi chindanti, hatthapādampi chindanti, kaṇṇampi chindanti, nāsampi chindanti, kaṇṇanāsampi chindanti, bilaṅgathālikampi karonti, saṅkhamuṇḍikampi karonti, rāhumukhampi karonti, jotimālikampi karonti, hatthapajjotikampi karonti, erakavattikampi karonti, cīrakavāsikampi karonti, eṇeyyakampi karonti, baḷisamaṁsikampi karonti, kahāpaṇikampi karonti, khārāpatacchikampi karonti, palighaparivattikampi karonti, palālapīṭhakampi karonti, tattenapi telena osiñcanti, sunakhehipi khādāpenti, jīvantampi sūle uttāsenti, asināpi sīsaṁ chindanti.\nEvaṁ sattā rūpahetu rūpappaccayā rūpakāraṇā haññanti vihaññanti upahaññanti upaghātiyanti.\nEvaṁ haññamāne vihaññamāne upahaññamāne upaghātiyamāne disvā passitvā tulayitvā tīrayitvā vibhāvayitvā vibhūtaṁ katvāti—\ndisvāna rūpesu vihaññamāne."}},{"id":"cnd20:11","sourceIds":["cnd20:11.1","cnd20:11.2","cnd20:11.3","cnd20:11.4"],"kind":"text","text":{"pi":"Piṅgiyāti bhagavāti.\nPiṅgiyāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\npiṅgiyāti bhagavā."}},{"id":"cnd20:12","sourceIds":["cnd20:12.1","cnd20:12.2","cnd20:12.3","cnd20:12.4","cnd20:12.5","cnd20:12.6","cnd20:12.7"],"kind":"text","text":{"pi":"Ruppanti rūpesu janā pamattāti.\nRuppantīti ruppanti kuppanti pīḷayanti ghaṭṭayanti, byādhitā domanassitā honti.\nCakkhurogena ruppanti kuppanti pīḷayanti ghaṭṭayanti, byādhitā domanassitā honti.\nSotarogena …pe…\nkāyarogena …pe…\nḍaṁsamakasavātātapasarīsapasamphassehi ruppanti kuppanti pīḷayanti ghaṭṭayanti, byādhitā domanassitā hontīti—\nruppanti rūpesu."}},{"id":"cnd20:13","sourceIds":["cnd20:13.1","cnd20:13.2","cnd20:13.3","cnd20:13.4","cnd20:13.5","cnd20:13.6","cnd20:13.7","cnd20:13.8","cnd20:13.9","cnd20:13.10","cnd20:13.11","cnd20:13.12","cnd20:13.13","cnd20:13.14","cnd20:13.15","cnd20:13.16","cnd20:13.17","cnd20:13.18","cnd20:13.19","cnd20:13.20","cnd20:13.21","cnd20:13.22","cnd20:13.23"],"kind":"text","text":{"pi":"Atha vā cakkhusmiṁ hīyamāne hāyamāne parihāyamāne vemāne vigacchamāne antaradhāyamāne ruppanti …pe…\ndomanassitā honti.\nSotasmiṁ …pe…\nghānasmiṁ …\njivhāya …\nkāyasmiṁ …\nrūpasmiṁ …\nsaddasmiṁ …\ngandhasmiṁ …\nrasasmiṁ …\nphoṭṭhabbasmiṁ …\nkulasmiṁ …\ngaṇasmiṁ …\nāvāsasmiṁ …\nlābhasmiṁ …\nyasasmiṁ …\npasaṁsāya …\nsukhasmiṁ …\ncīvarasmiṁ …\npiṇḍapātasmiṁ …\nsenāsanasmiṁ …\ngilānapaccayabhesajjaparikkhārasmiṁ hīyamāne hāyamāne parihāyamāne vemāne vigacchamāne antaradhāyamāne ruppanti kuppanti pīḷayanti ghaṭṭayanti, byādhitā domanassitā hontīti—\nevampi ruppanti rūpesu."}},{"id":"cnd20:14","sourceIds":["cnd20:14.1","cnd20:14.2","cnd20:14.3","cnd20:14.4","cnd20:14.5","cnd20:14.6"],"kind":"text","text":{"pi":"Janāti khattiyā ca brāhmaṇā ca vessā ca suddā ca gahaṭṭhā ca pabbajitā ca devā ca manussā ca.\nPamattāti pamādo vattabbo kāyaduccaritena vā vacīduccaritena vā manoduccaritena vā pañcasu kāmaguṇesu cittassa vosaggo vosaggānuppadānaṁ kusalānaṁ vā dhammānaṁ bhāvanāya asakkaccakiriyatā asātaccakiriyatā anaṭṭhitakiriyatā olīnavuttitā nikkhittacchandatā nikkhittadhuratā anāsevanā abhāvanā abahulīkammaṁ anadhiṭṭhānaṁ ananuyogo pamādo.\nYo evarūpo pamādo pamajjanā pamajjitattaṁ—\nayaṁ vuccati pamādo.\nIminā pamādena samannāgatā janā pamattāti—\nruppanti rūpesu janā pamattā."}},{"id":"cnd20:15","sourceIds":["cnd20:15.1","cnd20:15.2","cnd20:15.3","cnd20:15.4","cnd20:15.5"],"kind":"text","text":{"pi":"Tasmā tuvaṁ piṅgiya appamattoti.\nTasmāti tasmā taṅkāraṇā taṁhetu tappaccayā taṁnidānā evaṁ ādīnavaṁ sampassamāno rūpesūti—\ntasmā tuvaṁ piṅgiya.\nAppamattoti sakkaccakārī sātaccakārī …pe… appamādo kusalesu dhammesūti—\ntasmā tuvaṁ piṅgiya appamatto."}},{"id":"cnd20:16","sourceIds":["cnd20:16.1","cnd20:16.2","cnd20:16.3","cnd20:16.4","cnd20:16.5","cnd20:16.6"],"kind":"text","text":{"pi":"Jahassu rūpaṁ apunabbhavāyāti.\nRūpanti cattāro ca mahābhūtā catunnañca mahābhūtānaṁ upādāya rūpaṁ.\nJahassu rūpanti jahassu rūpaṁ, pajahassu rūpaṁ, vinodehi rūpaṁ, byantīkarohi rūpaṁ, anabhāvaṁ gamehi rūpaṁ.\nApunabbhavāyāti yathā te rūpaṁ idheva nirujjheyya, punapaṭisandhiko bhavo na nibbatteyya kāmadhātuyā vā rūpadhātuyā vā arūpadhātuyā vā, kāmabhave vā rūpabhave vā arūpabhave vā, saññābhave vā asaññābhave vā nevasaññānāsaññābhave vā, ekavokārabhave vā catuvokārabhave vā pañcavokārabhave vā, puna gatiyā vā upapattiyā vā paṭisandhiyā vā bhave vā saṁsāre vā vaṭṭe vā na janeyya na sañjaneyya na nibbatteyya nābhinibbatteyya, idheva nirujjheyya vūpasameyya atthaṁ gaccheyya paṭippassambheyyāti—\njahassu rūpaṁ apunabbhavāya.\nTenāha bhagavā—"}},{"id":"cnd20:17","sourceIds":["cnd20:17.1","cnd20:17.2","cnd20:17.3","cnd20:17.4","cnd20:17.5"],"kind":"text","text":{"pi":"“Disvāna rūpesu vihaññamāne,\n(piṅgiyāti bhagavā)\nRuppanti rūpesu janā pamattā;\nTasmā tuvaṁ piṅgiya appamatto,\nJahassu rūpaṁ apunabbhavāyā”ti."}},{"id":"cnd20:18","sourceIds":["cnd20:18.1","cnd20:18.2","cnd20:18.3","cnd20:18.4","cnd20:18.5","cnd20:18.6"],"kind":"text","text":{"pi":"Disā catasso vidisā catasso,\nUddhaṁ adho dasa disā imāyo;\nNa tuyhaṁ adiṭṭhaṁ asutaṁ amutaṁ,\nAtho aviññātaṁ kiñcanamatthi loke;\nĀcikkha dhammaṁ yamahaṁ vijaññaṁ,\nJātijarāya idha vippahānaṁ."}},{"id":"cnd20:19","sourceIds":["cnd20:19.1"],"kind":"text","text":{"pi":"Disā catasso vidisā catasso, uddhaṁ adho dasa disā imāyoti dasa disā."}},{"id":"cnd20:20","sourceIds":["cnd20:20.1","cnd20:20.2"],"kind":"text","text":{"pi":"Na tuyhaṁ adiṭṭhaṁ asutaṁ amutaṁ, atho aviññātaṁ kiñcanamatthi loketi na tuyhaṁ adiṭṭhaṁ asutaṁ amutaṁ aviññātaṁ kiñci attattho vā parattho vā ubhayattho vā diṭṭhadhammiko vā attho samparāyiko vā attho uttāno vā attho gambhīro vā attho gūḷho vā attho paṭicchanno vā attho neyyo vā attho nīto vā attho anavajjo vā attho nikkileso vā attho vodāno vā attho paramattho vā attho natthi na atthi na saṁvijjati nupalabbhatīti—\nna tuyhaṁ adiṭṭhaṁ asutaṁ amutaṁ, atho aviññātaṁ kiñcanamatthi loke."}},{"id":"cnd20:21","sourceIds":["cnd20:21.1","cnd20:21.2","cnd20:21.3","cnd20:21.4","cnd20:21.5"],"kind":"text","text":{"pi":"Ācikkha dhammaṁ yamahaṁ vijaññanti.\nDhammanti ādikalyāṇaṁ …pe…\nnibbānañca nibbānagāminiñca paṭipadaṁ ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehi.\nYamahaṁ vijaññanti yamahaṁ jāneyyaṁ ājāneyyaṁ vijāneyyaṁ paṭivijāneyyaṁ paṭivijjheyyaṁ adhigaccheyyaṁ phasseyyaṁ sacchikareyyanti—\nācikkha dhammaṁ yamahaṁ vijaññaṁ."}},{"id":"cnd20:22","sourceIds":["cnd20:22.1","cnd20:22.2","cnd20:22.3"],"kind":"text","text":{"pi":"Jātijarāya idha vippahānanti idheva jātijarāmaraṇassa pahānaṁ vūpasamaṁ paṭinissaggaṁ paṭippassaddhiṁ amataṁ nibbānanti—\njātijarāya idha vippahānaṁ.\nTenāha so brāhmaṇo—"}},{"id":"cnd20:23","sourceIds":["cnd20:23.1","cnd20:23.2","cnd20:23.3","cnd20:23.4","cnd20:23.5","cnd20:23.6"],"kind":"text","text":{"pi":"“Disā catasso vidisā catasso,\nUddhaṁ adho dasa disā imāyo;\nNa tuyhaṁ adiṭṭhaṁ asutaṁ amutaṁ,\nAtho aviññātaṁ kiñcanamatthi loke;\nĀcikkha dhammaṁ yamahaṁ vijaññaṁ,\nJātijarāya idha vippahānan”ti."}},{"id":"cnd20:24","sourceIds":["cnd20:24.1","cnd20:24.2","cnd20:24.3","cnd20:24.4","cnd20:24.5"],"kind":"text","text":{"pi":"Taṇhādhipanne manuje pekkhamāno,\n(piṅgiyāti bhagavā)\nSantāpajāte jarasā parete;\nTasmā tuvaṁ piṅgiya appamatto,\nJahassu taṇhaṁ apunabbhavāya."}},{"id":"cnd20:25","sourceIds":["cnd20:25.1","cnd20:25.2","cnd20:25.3","cnd20:25.4","cnd20:25.5","cnd20:25.6","cnd20:25.7","cnd20:25.8","cnd20:25.9","cnd20:25.10"],"kind":"text","text":{"pi":"Taṇhādhipanne manuje pekkhamānoti.\nTaṇhāti rūpataṇhā …pe… dhammataṇhā.\nTaṇhādhipanneti taṇhādhipanne taṇhānuge taṇhānugate taṇhānusaṭe taṇhāya panne paṭipanne abhibhūte pariyādinnacitte.\nManujeti sattādhivacanaṁ.\nPekkhamānoti pekkhamāno dakkhamāno olokayamāno nijjhāyamāno upaparikkhamānoti—\ntaṇhādhipanne manuje pekkhamāno.\nPiṅgiyāti bhagavāti.\nPiṅgiyāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe… sacchikā paññatti, yadidaṁ bhagavāti—\npiṅgiyāti bhagavā."}},{"id":"cnd20:26","sourceIds":["cnd20:26.1","cnd20:26.2","cnd20:26.3","cnd20:26.4","cnd20:26.5","cnd20:26.6","cnd20:26.7"],"kind":"text","text":{"pi":"Santāpajāte jarasā pareteti.\nSantāpajāteti jātiyā santāpajāte, jarāya santāpajāte, byādhinā santāpajāte, maraṇena santāpajāte, sokaparidevadukkhadomanassupāyāsehi santāpajāte, nerayikena dukkhena santāpajāte …pe…\ndiṭṭhibyasanena dukkhena santāpajāte ītijāte upaddavajāte upasaggajāteti—\nsantāpajāte.\nJarasā pareteti jarāya phuṭṭhe parete samohite samannāgate.\nJātiyā anugate jarāya anusaṭe byādhinā abhibhūte maraṇena abbhāhate atāṇe aleṇe asaraṇe asaraṇībhūteti—\nsantāpajāte jarasā parete."}},{"id":"cnd20:27","sourceIds":["cnd20:27.1","cnd20:27.2","cnd20:27.3","cnd20:27.4","cnd20:27.5","cnd20:27.6"],"kind":"text","text":{"pi":"Tasmā tuvaṁ piṅgiya appamattoti.\nTasmāti tasmā taṅkāraṇā taṁhetu tappaccayā taṁnidānā evaṁ ādīnavaṁ sampassamāno taṇhāyāti—\ntasmā tuvaṁ piṅgiya.\nAppamattoti sakkaccakārī …pe…\nappamādo kusalesu dhammesūti—\ntasmā tuvaṁ piṅgiya appamatto."}},{"id":"cnd20:28","sourceIds":["cnd20:28.1","cnd20:28.2","cnd20:28.3","cnd20:28.4","cnd20:28.5","cnd20:28.6","cnd20:28.7"],"kind":"text","text":{"pi":"Jahassu taṇhaṁ apunabbhavāyāti.\nTaṇhāti rūpataṇhā …pe… dhammataṇhā.\nJahassu taṇhanti jahassu taṇhaṁ pajahassu taṇhaṁ vinodehi taṇhaṁ byantīkarohi taṇhaṁ anabhāvaṁ gamehi taṇhaṁ.\nApunabbhavāyāti yathā te …pe…\npunapaṭisandhiko bhavo na nibbatteyya kāmadhātuyā vā rūpadhātuyā vā arūpadhātuyā vā, kāmabhave vā rūpabhave vā arūpabhave vā, saññābhave vā asaññābhave vā nevasaññānāsaññābhave vā, ekavokārabhave vā catuvokārabhave vā pañcavokārabhave vā, punagatiyā vā upapattiyā vā paṭisandhiyā vā bhave vā saṁsāre vā vaṭṭe vā na janeyya na sañjaneyya na nibbatteyya nābhinibbatteyya, idheva nirujjheyya vūpasameyya atthaṁ gaccheyya paṭippassambheyyāti—\njahassu taṇhaṁ apunabbhavāya.\nTenāha bhagavā—"}},{"id":"cnd20:29","sourceIds":["cnd20:29.1","cnd20:29.2","cnd20:29.3","cnd20:29.4","cnd20:29.5"],"kind":"text","text":{"pi":"“Taṇhādhipanne manuje pekkhamāno,\n(piṅgiyāti bhagavā)\nSantāpajāte jarasā parete;\nTasmā tuvaṁ piṅgiya appamatto,\nJahassu taṇhaṁ apunabbhavāyā”ti."}},{"id":"cnd20:30","sourceIds":["cnd20:30.1","cnd20:30.2","cnd20:30.3","cnd20:30.4","cnd20:30.5","cnd20:30.6","cnd20:30.7"],"kind":"text","text":{"pi":"Saha gāthāpariyosānā ye te brāhmaṇena saddhiṁ ekacchandā ekapayogā ekādhippāyā ekavāsanavāsitā, tesaṁ anekapāṇasahassānaṁ virajaṁ vītamalaṁ dhammacakkhuṁ udapādi—\n“yaṁ kiñci samudayadhammaṁ sabbaṁ taṁ nirodhadhamman”ti.\nTassa ca brāhmaṇassa virajaṁ vītamalaṁ dhammacakkhuṁ udapādi—\n“yaṁ kiñci samudayadhammaṁ sabbaṁ taṁ nirodhadhamman”ti.\nSaha dhammacakkhussa paṭilābhā ajinajaṭāvākacīratidaṇḍakamaṇḍalukesā ca massū ca antarahitā bhaṇḍukāsāyavatthavasano saṅghāṭipattacīvaradharo anvatthapaṭipattiyā pañjaliko bhagavantaṁ namassamāno nisinno hoti—\n“satthā me, bhante, bhagavā, sāvakohamasmī”ti.\nPiṅgiyamāṇavapucchāniddeso soḷasamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd20/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}