{"id":"cnd5","title":"1. Ajitamāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd5","title":"1. Ajitamāṇavapucchāniddesa","units":[{"id":"cnd5:0","sourceIds":["cnd5:0.1","cnd5:0.2","cnd5:0.3","cnd5:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n1. Ajitamāṇavapucchāniddesa"}},{"id":"cnd5:1","sourceIds":["cnd5:1.1","cnd5:1.2","cnd5:1.3","cnd5:1.4","cnd5:1.5"],"kind":"text","text":{"pi":"Kenassu nivuto loko,\n(iccāyasmā ajito)\nKenassu nappakāsati;\nKissābhilepanaṁ brūsi,\nKiṁsu tassa mahabbhayaṁ."}},{"id":"cnd5:2","sourceIds":["cnd5:2.1","cnd5:2.2","cnd5:2.3","cnd5:2.4","cnd5:2.5"],"kind":"text","text":{"pi":"Kenassu nivuto lokoti.\nLokoti nirayaloko tiracchānaloko pettivisayaloko manussaloko devaloko khandhaloko dhātuloko āyatanaloko ayaṁ loko paro loko brahmaloko devaloko—\nayaṁ vuccati loko.\nAyaṁ loko kena āvuto nivuto ovuto pihito paṭicchanno paṭikujjitoti—\nkenassu nivuto loko?"}},{"id":"cnd5:3","sourceIds":["cnd5:3.1","cnd5:3.2","cnd5:3.3","cnd5:3.4","cnd5:3.5"],"kind":"text","text":{"pi":"Iccāyasmā ajitoti.\nIccāti padasandhi padasaṁsaggo padapāripūrī akkharasamavāyo byañjanasiliṭṭhatā padānupubbatāpetaṁ iccāti.\nĀyasmāti piyavacanaṁ garuvacanaṁ sagāravasappatissādhivacanametaṁ āyasmāti.\nAjitoti tassa brāhmaṇassa nāmaṁ saṅkhā samaññā paññatti vohāro nāmaṁ nāmakammaṁ nāmadheyyaṁ nirutti byañjanaṁ abhilāpoti—\niccāyasmā ajito."}},{"id":"cnd5:4","sourceIds":["cnd5:4.1","cnd5:4.2"],"kind":"text","text":{"pi":"Kenassu nappakāsatīti kena loko nappakāsati nappabhāsati na tapati na virocati na ñāyati na paññāyatīti—\nkenassu nappakāsati."}},{"id":"cnd5:5","sourceIds":["cnd5:5.1","cnd5:5.2","cnd5:5.3"],"kind":"text","text":{"pi":"Kissābhilepanaṁ brūsīti kiṁ lokassa lepanaṁ lagganaṁ bandhanaṁ upakkileso.\nKena loko litto saṁlitto upalitto kiliṭṭho saṅkiliṭṭho makkhito saṁsaṭṭho laggo laggito palibuddho, brūsi ācikkhasi desesi paññapesi paṭṭhapesi vivarasi vibhajasi uttānīkarosi pakāsesīti—\nkissābhilepanaṁ brūsi."}},{"id":"cnd5:6","sourceIds":["cnd5:6.1","cnd5:6.2","cnd5:6.3"],"kind":"text","text":{"pi":"Kiṁsu tassa mahabbhayanti kiṁ lokassa bhayaṁ mahabbhayaṁ pīḷanaṁ ghaṭṭanaṁ upaddavo upasaggoti—\nkiṁsu tassa mahabbhayaṁ.\nTenāha so brāhmaṇo—"}},{"id":"cnd5:7","sourceIds":["cnd5:7.1","cnd5:7.2","cnd5:7.3","cnd5:7.4","cnd5:7.5"],"kind":"text","text":{"pi":"“Kenassu nivuto loko,\n(iccāyasmā ajito)\nKenassu nappakāsati;\nKissābhilepanaṁ brūsi,\nKiṁsu tassa mahabbhayan”ti."}},{"id":"cnd5:8","sourceIds":["cnd5:8.1","cnd5:8.2","cnd5:8.3","cnd5:8.4","cnd5:8.5"],"kind":"text","text":{"pi":"Avijjāya nivuto loko,\n(ajitāti bhagavā)\nVevicchā pamādā nappakāsati;\nJappābhilepanaṁ brūmi,\nDukkhamassa mahabbhayaṁ."}},{"id":"cnd5:9","sourceIds":["cnd5:9.1","cnd5:9.2","cnd5:9.3"],"kind":"text","text":{"pi":"Avijjāya nivuto lokoti.\nAvijjāti dukkhe aññāṇaṁ dukkhasamudaye aññāṇaṁ dukkhanirodhe aññāṇaṁ dukkhanirodhagāminiyā paṭipadāya aññāṇaṁ, pubbante aññāṇaṁ aparante aññāṇaṁ pubbantāparante aññāṇaṁ, idappaccayatāpaṭiccasamuppannesu dhammesu aññāṇaṁ, yaṁ evarūpaṁ aññāṇaṁ adassanaṁ anabhisamayo ananubodho asambodho appaṭivedho asaṅgāhanā apariyogāhanā asamapekkhanā apaccavekkhaṇā apaccavekkhaṇakammaṁ dummejjhaṁ bālyaṁ asampajaññaṁ moho pamoho sammoho avijjā avijjogho avijjāyogo avijjānusayo avijjāpariyuṭṭhānaṁ avijjālaṅgī moho akusalamūlaṁ, ayaṁ vuccati—\navijjā."}},{"id":"cnd5:10","sourceIds":["cnd5:10.1","cnd5:10.2","cnd5:10.3","cnd5:10.4"],"kind":"text","text":{"pi":"Lokoti nirayaloko tiracchānaloko pettivisayaloko manussaloko devaloko khandhaloko dhātuloko āyatanaloko ayaṁ loko paro loko brahmaloko devaloko—\nayaṁ vuccati loko.\nAyaṁ loko imāya avijjāya āvuto nivuto ovuto pihito paṭicchanno paṭikujjitoti—\navijjāya nivuto loko."}},{"id":"cnd5:11","sourceIds":["cnd5:11.1","cnd5:11.2","cnd5:11.3","cnd5:11.4","cnd5:11.5","cnd5:11.6","cnd5:11.7","cnd5:11.8","cnd5:11.9","cnd5:11.10","cnd5:11.11","cnd5:11.12","cnd5:11.13","cnd5:11.14","cnd5:11.15","cnd5:11.16","cnd5:11.17","cnd5:11.18","cnd5:11.19","cnd5:11.20","cnd5:11.21","cnd5:11.22","cnd5:11.23"],"kind":"text","text":{"pi":"Ajitāti bhagavā taṁ brāhmaṇaṁ nāmena ālapati.\nBhagavāti gāravādhivacanaṁ.\nApi ca, bhaggarāgoti bhagavā;\nbhaggadosoti bhagavā;\nbhaggamohoti bhagavā;\nbhaggamānoti bhagavā;\nbhaggadiṭṭhīti bhagavā;\nbhaggakaṇḍakoti bhagavā;\nbhaggakilesoti bhagavā;\nbhaji vibhaji pavibhaji dhammaratananti bhagavā;\nbhavānaṁ antakaroti bhagavā;\nbhāvitakāyo bhāvitasīlo bhāvitacitto bhāvitapaññoti bhagavā;\nbhaji vā bhagavā araññavanapatthāni pantāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppānīti bhagavā;\nbhāgī vā bhagavā cīvarapiṇḍapātasenāsanagilānapaccayabhesajjaparikkhārānanti bhagavā;\nbhāgī vā bhagavā attharasassa dhammarasassa vimuttirasassa adhisīlassa adhicittassa adhipaññāyāti bhagavā;\nbhāgī vā bhagavā catunnaṁ jhānānaṁ catunnaṁ appamaññānaṁ catunnaṁ arūpasamāpattīnanti bhagavā;\nbhāgī vā bhagavā aṭṭhannaṁ vimokkhānaṁ aṭṭhannaṁ abhibhāyatanānaṁ navannaṁ anupubbasamāpattīnanti bhagavā;\nbhāgī vā bhagavā dasannaṁ saññābhāvanānaṁ kasiṇasamāpattīnaṁ ānāpānassatisamādhissa asubhasamāpattiyāti bhagavā;\nbhāgī vā bhagavā catunnaṁ satipaṭṭhānānaṁ catunnaṁ sammappadhānānaṁ catunnaṁ iddhipādānaṁ pañcannaṁ indriyānaṁ pañcannaṁ balānaṁ sattannaṁ bojjhaṅgānaṁ ariyassa aṭṭhaṅgikassa maggassāti bhagavā;\nbhāgī vā bhagavā dasannaṁ tathāgatabalānaṁ catunnaṁ vesārajjānaṁ catunnaṁ paṭisambhidānaṁ channaṁ abhiññānaṁ channaṁ buddhadhammānanti bhagavā;\nbhagavāti netaṁ nāmaṁ mātarā kataṁ na pitarā kataṁ na bhātarā kataṁ na bhaginiyā kataṁ na mittāmaccehi kataṁ na ñātisālohitehi kataṁ na samaṇabrāhmaṇehi kataṁ na devatāhi kataṁ.\nVimokkhantikametaṁ buddhānaṁ bhagavantānaṁ bodhiyā mūle saha sabbaññutañāṇassa paṭilābhā sacchikā paññatti, yadidaṁ bhagavāti—\najitāti bhagavā."}},{"id":"cnd5:12","sourceIds":["cnd5:12.1","cnd5:12.2","cnd5:12.3","cnd5:12.4","cnd5:12.5","cnd5:12.6","cnd5:12.7","cnd5:12.8","cnd5:12.9","cnd5:12.10","cnd5:12.11","cnd5:12.12"],"kind":"text","text":{"pi":"Vevicchā pamādā nappakāsatīti.\nVevicchaṁ vuccati pañca macchariyāni—\nāvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ.\nYaṁ evarūpaṁ maccheraṁ maccharāyanā maccharāyitattaṁ vevicchaṁ kadariyaṁ kaṭukañcukatā aggahitattaṁ cittassa—\nidaṁ vuccati macchariyaṁ.\nApi ca khandhamacchariyampi macchariyaṁ, dhātumacchariyampi macchariyaṁ, āyatanamacchariyampi macchariyaṁ, gāho vuccati macchariyaṁ.\nPamādo vattabbo—\nkāyaduccarite vā vacīduccarite vā manoduccarite vā pañcasu kāmaguṇesu vā cittassa vosaggo vosaggānuppadānaṁ kusalānaṁ dhammānaṁ bhāvanāya asakkaccakiriyatā asātaccakiriyatā anaṭṭhitakiriyatā olīnavuttitā nikkhittacchandatā nikkhittadhuratā anāsevanā abhāvanā abahulīkammaṁ anadhiṭṭhānaṁ ananuyogo pamādo.\nYo evarūpo pamādo pamajjanā pamajjitattaṁ—\nayaṁ vuccati pamādo.\nVevicchā pamādā nappakāsatīti iminā ca macchariyena iminā ca pamādena loko nappakāsati nappabhāsati na tapati na virocati na ñāyati na paññāyatīti—\nvevicchā pamādā nappakāsati."}},{"id":"cnd5:13","sourceIds":["cnd5:13.1","cnd5:13.2","cnd5:13.3","cnd5:13.4","cnd5:13.5"],"kind":"text","text":{"pi":"Jappābhilepanaṁ brūmīti jappā vuccati taṇhā.\nYo rāgo sārāgo anunayo anurodho nandī nandirāgo cittassa sārāgo icchā mucchā ajjhosānaṁ gedho paligedho saṅgo paṅko ejā māyā janikā sañjananī sibbinī jālinī saritā visattikā suttaṁ visaṭā āyūhanī dutiyā paṇidhi bhavanetti vanaṁ vanatho santhavo sineho apekkhā paṭibandhu āsā āsīsanā āsīsitattaṁ rūpāsā saddāsā gandhāsā rasāsā phoṭṭhabbāsā lābhāsā dhanāsā puttāsā jīvitāsā jappā pajappā abhijappā jappanā jappitattaṁ loluppaṁ loluppāyanā loluppāyitattaṁ pucchañjikatā sādhukamyatā adhammarāgo visamalobho nikanti nikāmanā patthanā pihanā sampatthanā kāmataṇhā bhavataṇhā vibhavataṇhā rūpataṇhā arūpataṇhā nirodhataṇhā rūpataṇhā saddataṇhā gandhataṇhā rasataṇhā phoṭṭhabbataṇhā dhammataṇhā ogho yogo gantho upādānaṁ āvaraṇaṁ nīvaraṇaṁ chadanaṁ bandhanaṁ upakkileso anusayo pariyuṭṭhānaṁ latā vevicchaṁ dukkhamūlaṁ dukkhanidānaṁ dukkhappabhavo mārapāso mārabaḷisaṁ mārāmisaṁ māravisayo māranivāso māragocaro mārabandhanaṁ taṇhānadī taṇhājālaṁ taṇhāgaddulaṁ taṇhāsamuddo abhijjhā lobho akusalamūlaṁ—\nayaṁ vuccati jappā.\nLokassa lepanaṁ lagganaṁ bandhanaṁ upakkileso imāya jappāya loko litto saṁlitto upalitto kiliṭṭho saṅkiliṭṭho makkhito saṁsaṭṭho laggo laggito palibuddhoti brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\njappābhilepanaṁ brūmi."}},{"id":"cnd5:14","sourceIds":["cnd5:14.1","cnd5:14.2","cnd5:14.3","cnd5:14.4","cnd5:14.5","cnd5:14.6","cnd5:14.7","cnd5:14.8"],"kind":"text","text":{"pi":"Dukkhamassa mahabbhayanti.\nDukkhanti jātidukkhaṁ jarādukkhaṁ byādhidukkhaṁ maraṇadukkhaṁ sokaparidevadukkhadomanassupāyāsadukkhaṁ nerayikaṁ dukkhaṁ tiracchānayonikaṁ dukkhaṁ pettivisayikaṁ dukkhaṁ mānusikaṁ dukkhaṁ gabbhokkantimūlakaṁ dukkhaṁ gabbhaṭṭhitimūlakaṁ dukkhaṁ gabbhavuṭṭhānamūlakaṁ dukkhaṁ jātassūpanibandhakaṁ dukkhaṁ jātassa parādheyyakaṁ dukkhaṁ attūpakkamaṁ dukkhaṁ parūpakkamaṁ dukkhaṁ saṅkhāradukkhaṁ vipariṇāmadukkhaṁ cakkhurogo sotarogo ghānarogo jivhārogo kāyarogo sīsarogo kaṇṇarogo mukharogo dantarogo kāso sāso pināso ḍāho jaro kucchirogo mucchā pakkhandikā sūlā visūcikā kuṭṭhaṁ gaṇḍo kilāso soso apamāro daddu kaṇḍu kacchu rakhasā vitacchikā lohitapittaṁ madhumeho aṁsā piḷakā bhagandalā pittasamuṭṭhānā ābādhā semhasamuṭṭhānā ābādhā vātasamuṭṭhānā ābādhā sannipātikā ābādhā utupariṇāmajā ābādhā visamaparihārajā ābādhā opakkamikā ābādhā kammavipākajā ābādhā sītaṁ uṇhaṁ jighacchā pipāsā uccāro passāvo ḍaṁsamakasavātātapasarīsapasamphassaṁ dukkhaṁ mātumaraṇaṁ dukkhaṁ pitumaraṇaṁ dukkhaṁ bhātumaraṇaṁ dukkhaṁ bhaginimaraṇaṁ dukkhaṁ puttamaraṇaṁ dukkhaṁ dhītumaraṇaṁ dukkhaṁ ñātibyasanaṁ dukkhaṁ rogabyasanaṁ dukkhaṁ bhogabyasanaṁ dukkhaṁ sīlabyasanaṁ dukkhaṁ diṭṭhibyasanaṁ dukkhaṁ yesaṁ dhammānaṁ ādito samudāgamanaṁ paññāyati.\nAtthaṅgamato nirodho paññāyati.\nKammasannissito vipāko, vipākasannissitaṁ kammaṁ, nāmasannissitaṁ rūpaṁ rūpasannissitaṁ nāmaṁ, jātiyā anugataṁ jarāya anusaṭaṁ byādhinā abhibhūtaṁ maraṇena abbhāhataṁ dukkhe patiṭṭhitaṁ atāṇaṁ aleṇaṁ asaraṇaṁ asaraṇībhūtaṁ—\nidaṁ vuccati dukkhaṁ.\nIdaṁ dukkhaṁ lokassa bhayaṁ mahābhayaṁ pīḷanaṁ ghaṭṭanaṁ upaddavo upasaggoti—\ndukkhamassa mahabbhayaṁ.\nTenāha bhagavā—"}},{"id":"cnd5:15","sourceIds":["cnd5:15.1","cnd5:15.2","cnd5:15.3","cnd5:15.4","cnd5:15.5"],"kind":"text","text":{"pi":"“Avijjāya nivuto loko,\n(ajitāti bhagavā)\nVevicchā pamādā nappakāsati;\nJappābhilepanaṁ brūmi,\nDukkhamassa mahabbhayan”ti."}},{"id":"cnd5:16","sourceIds":["cnd5:16.1","cnd5:16.2","cnd5:16.3","cnd5:16.4","cnd5:16.5"],"kind":"text","text":{"pi":"Savanti sabbadhi sotā,\n(iccāyasmā ajito)\nSotānaṁ kiṁ nivāraṇaṁ;\nSotānaṁ saṁvaraṁ brūhi,\nKena sotā pidhiyyare."}},{"id":"cnd5:17","sourceIds":["cnd5:17.1","cnd5:17.2","cnd5:17.3","cnd5:17.4","cnd5:17.5","cnd5:17.6","cnd5:17.7","cnd5:17.8","cnd5:17.9","cnd5:17.10","cnd5:17.11","cnd5:17.12","cnd5:17.13","cnd5:17.14","cnd5:17.15","cnd5:17.16","cnd5:17.17"],"kind":"text","text":{"pi":"Savanti sabbadhi sotāti.\nSotāti taṇhāsoto diṭṭhisoto kilesasoto duccaritasoto avijjāsoto.\nSabbadhīti sabbesu āyatanesu.\nSavantīti savanti āsavanti sandanti pavattanti.\nCakkhuto rūpe savanti āsavanti sandanti pavattanti.\nSotato sadde savanti …\nghānato gandhe savanti …\njivhāto rase savanti …\nkāyato phoṭṭhabbe savanti …\nmanato dhamme savanti āsavanti sandanti pavattanti.\nCakkhuto rūpataṇhā savanti āsavanti sandanti pavattanti.\nSotato saddataṇhā savanti āsavanti sandanti pavattanti.\nGhānato gandhataṇhā savanti …\njivhāto rasataṇhā savanti …\nkāyato phoṭṭhabbataṇhā savanti …\nmanato dhammataṇhā savanti āsavanti sandanti pavattantīti—\nsavanti sabbadhi sotā."}},{"id":"cnd5:18","sourceIds":["cnd5:18.1","cnd5:18.2","cnd5:18.3"],"kind":"text","text":{"pi":"Iccāyasmā ajitoti.\nIccāti padasandhi …pe… padānupubbatāpetaṁ iccāti …pe…\niccāyasmā ajito."}},{"id":"cnd5:19","sourceIds":["cnd5:19.1","cnd5:19.2"],"kind":"text","text":{"pi":"Sotānaṁ kiṁ nivāraṇanti sotānaṁ kiṁ āvaraṇaṁ nīvaraṇaṁ saṁvaraṇaṁ rakkhanaṁ gopananti—\nsotānaṁ kiṁ nivāraṇaṁ."}},{"id":"cnd5:20","sourceIds":["cnd5:20.1","cnd5:20.2"],"kind":"text","text":{"pi":"Sotānaṁ saṁvaraṁ brūhīti sotānaṁ āvaraṇaṁ nīvaraṇaṁ saṁvaraṇaṁ rakkhanaṁ gopanaṁ brūhi ācikkha desehi paññapehi paṭṭhapehi vivarāhi vibhajāhi uttānīkarohi pakāsehīti—\nsotānaṁ saṁvaraṁ brūhi."}},{"id":"cnd5:21","sourceIds":["cnd5:21.1","cnd5:21.2","cnd5:21.3"],"kind":"text","text":{"pi":"Kena sotā pidhiyyareti kena sotā pidhīyanti pacchijjanti na savanti na āsavanti na sandanti nappavattantīti—\nkena sotā pidhiyyare.\nTenāha so brāhmaṇo—"}},{"id":"cnd5:22","sourceIds":["cnd5:22.1","cnd5:22.2","cnd5:22.3","cnd5:22.4","cnd5:22.5"],"kind":"text","text":{"pi":"“Savanti sabbadhi sotā,\n(iccāyasmā ajito)\nSotānaṁ kiṁ nivāraṇaṁ;\nSotānaṁ saṁvaraṁ brūhi,\nKena sotā pidhiyyare”."}},{"id":"cnd5:23","sourceIds":["cnd5:23.1","cnd5:23.2","cnd5:23.3","cnd5:23.4","cnd5:23.5"],"kind":"text","text":{"pi":"Yāni sotāni lokasmiṁ,\n(ajitāti bhagavā)\nSati tesaṁ nivāraṇaṁ;\nSotānaṁ saṁvaraṁ brūmi,\nPaññāyete pidhiyyare."}},{"id":"cnd5:24","sourceIds":["cnd5:24.1","cnd5:24.2","cnd5:24.3","cnd5:24.4","cnd5:24.5"],"kind":"text","text":{"pi":"Yāni sotāni lokasminti yāni etāni sotāni mayā kittitāni pakittitāni ācikkhitāni desitāni paññapitāni paṭṭhapitāni vivaritāni vibhajitāni uttānīkatāni pakāsitāni, seyyathidaṁ—\ntaṇhāsoto diṭṭhisoto kilesasoto duccaritasoto avijjāsoto.\nLokasminti apāyaloke manussaloke devaloke khandhaloke dhātuloke āyatanaloketi—\nyāni sotāni lokasmiṁ.\nAjitāti bhagavā taṁ brāhmaṇaṁ nāmena ālapati."}},{"id":"cnd5:25","sourceIds":["cnd5:25.1","cnd5:25.2","cnd5:25.3","cnd5:25.4","cnd5:25.5"],"kind":"text","text":{"pi":"Sati tesaṁ nivāraṇanti.\nSatīti yā sati anussati paṭissati sati saraṇatā dhāraṇatā apilāpanatā asammussanatā, sati satindriyaṁ satibalaṁ sammāsati satisambojjhaṅgo ekāyanamaggo—\nayaṁ vuccati sati.\nNivāraṇanti āvaraṇaṁ nīvaraṇaṁ saṁvaraṇaṁ rakkhanaṁ gopananti—\nsati tesaṁ nivāraṇaṁ."}},{"id":"cnd5:26","sourceIds":["cnd5:26.1","cnd5:26.2"],"kind":"text","text":{"pi":"Sotānaṁ saṁvaraṁ brūmīti sotānaṁ āvaraṇaṁ nīvaraṇaṁ saṁvaraṇaṁ rakkhanaṁ gopanaṁ brūmi ācikkhāmi …pe… uttānīkaromi pakāsemīti—\nsotānaṁ saṁvaraṁ brūmi."}},{"id":"cnd5:27","sourceIds":["cnd5:27.1","cnd5:27.2","cnd5:27.3","cnd5:27.4","cnd5:27.5","cnd5:27.6","cnd5:27.7","cnd5:27.8","cnd5:27.9","cnd5:27.10","cnd5:27.11","cnd5:27.12","cnd5:27.13","cnd5:27.14","cnd5:27.15","cnd5:27.16","cnd5:27.17","cnd5:27.18","cnd5:27.19","cnd5:27.20","cnd5:27.21","cnd5:27.22","cnd5:27.23","cnd5:27.24","cnd5:27.25","cnd5:27.26","cnd5:27.27","cnd5:27.28","cnd5:27.29","cnd5:27.30","cnd5:27.31","cnd5:27.32","cnd5:27.33","cnd5:27.34","cnd5:27.35","cnd5:27.36","cnd5:27.37","cnd5:27.38","cnd5:27.39","cnd5:27.40","cnd5:27.41","cnd5:27.42","cnd5:27.43","cnd5:27.44","cnd5:27.45","cnd5:27.46","cnd5:27.47","cnd5:27.48"],"kind":"text","text":{"pi":"Paññāyete pidhiyyareti.\nPaññāti yā paññā pajānanā …pe… amoho dhammavicayo sammādiṭṭhi.\nPaññāyete pidhiyyareti—\npaññāyete sotā pidhīyanti pacchijjanti na savanti na āsavanti na sandanti nappavattanti.\n“Sabbe saṅkhārā aniccā”ti jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\n“Sabbe saṅkhārā dukkhā”ti jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\n“Sabbe saṅkhārā anattā”ti jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\n“Avijjāpaccayā saṅkhārā”ti jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\n“Saṅkhārapaccayā viññāṇan”ti …\n“viññāṇapaccayā nāmarūpan”ti …\n“nāmarūpapaccayā saḷāyatanan”ti …\n“saḷāyatanapaccayā phasso”ti …\n“phassapaccayā vedanā”ti …\n“vedanāpaccayā taṇhā”ti …\n“taṇhāpaccayā upādānan”ti …\n“upādānapaccayā bhavo”ti …\n“bhavapaccayā jātī”ti …\n“jātipaccayā jarāmaraṇan”ti jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\n“Avijjānirodhā saṅkhāranirodho”ti …\n“saṅkhāranirodhā viññāṇanirodho”ti …\n“viññāṇanirodhā nāmarūpanirodho”ti …\n“nāmarūpanirodhā saḷāyatananirodho”ti …\n“saḷāyatananirodhā phassanirodho”ti …\n“phassanirodhā vedanānirodho”ti …\n“vedanānirodhā taṇhānirodho”ti …\n“taṇhānirodhā upādānanirodho”ti …\n“upādānanirodhā bhavanirodho”ti …\n“bhavanirodhā jātinirodho”ti …\n“jātinirodhā jarāmaraṇanirodho”ti jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\n“Idaṁ dukkhan”ti …\n“ayaṁ dukkhasamudayo”ti …\n“ayaṁ dukkhanirodho”ti …\n“ayaṁ dukkhanirodhagāminī paṭipadā”ti jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\n“Ime dhammā āsavā”ti …\n“ayaṁ āsavasamudayo”ti …\n“ayaṁ āsavanirodho”ti …\n“ayaṁ āsavanirodhagāminī paṭipadā”ti jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\n“Ime dhammā abhiññeyyā”ti …\n“ime dhammā pariññeyyā”ti …\n“ime dhammā pahātabbā”ti …\n“ime dhammā bhāvetabbā”ti …\n“ime dhammā sacchikātabbā”ti jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\nChannaṁ phassāyatanānaṁ samudayañca atthaṅgamañca assādañca ādīnavañca nissaraṇañca jānato passato paññāyete sotā pidhīyanti pacchijjanti na savanti na āsavanti na sandanti nappavattanti.\nPañcannaṁ upādānakkhandhānaṁ samudayañca atthaṅgamañca assādañca ādīnavañca nissaraṇañca jānato passato …\ncatunnaṁ mahābhūtānaṁ samudayañca atthaṅgamañca assādañca ādīnavañca nissaraṇañca jānato passato …\n“yaṁ kiñci samudayadhammaṁ sabbaṁ taṁ nirodhadhamman”ti jānato passato paññāyete sotā pidhīyanti pacchijjanti na savanti na āsavanti na sandanti nappavattantīti—\npaññāyete pidhiyyare.\nTenāha bhagavā—"}},{"id":"cnd5:28","sourceIds":["cnd5:28.1","cnd5:28.2","cnd5:28.3","cnd5:28.4","cnd5:28.5"],"kind":"text","text":{"pi":"“Yāni sotāni lokasmiṁ,\n(ajitāti bhagavā)\nSati tesaṁ nivāraṇaṁ;\nSotānaṁ saṁvaraṁ brūmi,\nPaññāyete pidhiyyare”ti."}},{"id":"cnd5:29","sourceIds":["cnd5:29.1","cnd5:29.2","cnd5:29.3","cnd5:29.4","cnd5:29.5"],"kind":"text","text":{"pi":"Paññā ceva sati cāpi,\n(iccāyasmā ajito)\nNāmarūpañca mārisa;\nEtaṁ me puṭṭho pabrūhi,\nKatthetaṁ uparujjhati."}},{"id":"cnd5:30","sourceIds":["cnd5:30.1","cnd5:30.2","cnd5:30.3","cnd5:30.4","cnd5:30.5"],"kind":"text","text":{"pi":"Paññā ceva sati cāpīti.\nPaññāti yā paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi.\nSatīti yā sati anussati …pe…\nsammāsatīti—\npaññā ceva sati cāpi, iccāyasmā ajito."}},{"id":"cnd5:31","sourceIds":["cnd5:31.1","cnd5:31.2","cnd5:31.3","cnd5:31.4","cnd5:31.5"],"kind":"text","text":{"pi":"Nāmarūpañca mārisāti.\nNāmanti cattāro arūpino khandhā.\nRūpanti cattāro ca mahābhūtā catunnañca mahābhūtānaṁ upādāyarūpaṁ.\nMārisāti piyavacanaṁ garuvacanaṁ sagāravasappatissādhivacanametaṁ mārisāti—\nnāmarūpañca mārisa."}},{"id":"cnd5:32","sourceIds":["cnd5:32.1","cnd5:32.2","cnd5:32.3","cnd5:32.4","cnd5:32.5"],"kind":"text","text":{"pi":"Etaṁ me puṭṭho pabrūhīti.\nEtaṁ meti yaṁ pucchāmi yaṁ yācāmi yaṁ ajjhesāmi yaṁ pasādemi.\nPuṭṭhoti pucchito yācito ajjhesito pasādito.\nPabrūhīti brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\netaṁ me puṭṭho pabrūhi."}},{"id":"cnd5:33","sourceIds":["cnd5:33.1","cnd5:33.2","cnd5:33.3","cnd5:33.4"],"kind":"text","text":{"pi":"Katthetaṁ uparujjhatīti.\nKatthetaṁ nirujjhati vūpasammati atthaṁ gacchati paṭippassambhatīti—\nkatthetaṁ uparujjhati.\nTenāha so brāhmaṇo—"}},{"id":"cnd5:34","sourceIds":["cnd5:34.1","cnd5:34.2","cnd5:34.3","cnd5:34.4","cnd5:34.5"],"kind":"text","text":{"pi":"“Paññā ceva sati cāpi,\n(iccāyasmā ajito)\nNāmarūpañca mārisa;\nEtaṁ me puṭṭho pabrūhi,\nKatthetaṁ uparujjhatī”ti."}},{"id":"cnd5:35","sourceIds":["cnd5:35.1","cnd5:35.2","cnd5:35.3","cnd5:35.4","cnd5:35.5","cnd5:35.6"],"kind":"text","text":{"pi":"Yametaṁ pañhaṁ apucchi,\najita taṁ vadāmi te;\nYattha nāmañca rūpañca,\nasesaṁ uparujjhati;\nViññāṇassa nirodhena,\netthetaṁ uparujjhati."}},{"id":"cnd5:36","sourceIds":["cnd5:36.1","cnd5:36.2","cnd5:36.3","cnd5:36.4"],"kind":"text","text":{"pi":"Yametaṁ pañhaṁ apucchīti.\nYametanti paññañca satiñca nāmarūpañca.\nApucchīti apucchasi yācasi ajjhesasi pasādesīti—\nyametaṁ pañhaṁ apucchi."}},{"id":"cnd5:37","sourceIds":["cnd5:37.1","cnd5:37.2","cnd5:37.3","cnd5:37.4","cnd5:37.5"],"kind":"text","text":{"pi":"Ajita taṁ vadāmi teti.\nAjitāti bhagavā taṁ brāhmaṇaṁ nāmena ālapati.\nTanti paññañca satiñca nāmarūpañca.\nVadāmīti vadāmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\najita taṁ vadāmi te."}},{"id":"cnd5:38","sourceIds":["cnd5:38.1","cnd5:38.2","cnd5:38.3","cnd5:38.4","cnd5:38.5"],"kind":"text","text":{"pi":"Yattha nāmañca rūpañca, asesaṁ uparujjhatīti nāmanti cattāro arūpino khandhā.\nRūpanti cattāro ca mahābhūtā catunnañca mahābhūtānaṁ upādāyarūpaṁ.\nAsesanti sabbena sabbaṁ sabbathā sabbaṁ asesaṁ nissesaṁ pariyādiyanavacanametaṁ asesanti.\nUparujjhatīti nirujjhati vūpasammati atthaṁ gacchati paṭippassambhatīti.\nYattha nāmañca rūpañca asesaṁ uparujjhati."}},{"id":"cnd5:39","sourceIds":["cnd5:39.1","cnd5:39.2","cnd5:39.3","cnd5:39.4","cnd5:39.5","cnd5:39.6","cnd5:39.7"],"kind":"text","text":{"pi":"Viññāṇassa nirodhena, etthetaṁ uparujjhatīti sotāpattimaggañāṇena abhisaṅkhāraviññāṇassa nirodhena satta bhave ṭhapetvā anamatagge saṁsāre ye uppajjeyyuṁ nāmañca rūpañca, etthete nirujjhanti vūpasammanti atthaṁ gacchanti paṭippassambhanti.\nSakadāgāmimaggañāṇena abhisaṅkhāraviññāṇassa nirodhena dve bhave ṭhapetvā pañcasu bhavesu ye uppajjeyyuṁ nāmañca rūpañca, etthete nirujjhanti vūpasammanti atthaṁ gacchanti paṭippassambhanti.\nAnāgāmimaggañāṇena abhisaṅkhāraviññāṇassa nirodhena ekaṁ bhavaṁ ṭhapetvā rūpadhātuyā vā arūpadhātuyā vā ye uppajjeyyuṁ nāmañca rūpañca, etthete nirujjhanti vūpasammanti atthaṁ gacchanti paṭippassambhanti.\nArahattamaggañāṇena abhisaṅkhāraviññāṇassa nirodhena ye uppajjeyyuṁ nāmañca rūpañca, etthete nirujjhanti vūpasammanti atthaṁ gacchanti paṭippassambhanti.\nArahato anupādisesāya nibbānadhātuyā parinibbāyantassa carimaviññāṇassa nirodhena paññā ca sati ca nāmañca rūpañca, etthete nirujjhanti vūpasammanti atthaṁ gacchanti paṭippassambhantīti—\nviññāṇassa nirodhena, etthetaṁ uparujjhati.\nTenāha bhagavā—"}},{"id":"cnd5:40","sourceIds":["cnd5:40.1","cnd5:40.2","cnd5:40.3","cnd5:40.4","cnd5:40.5","cnd5:40.6"],"kind":"text","text":{"pi":"“Yametaṁ pañhaṁ apucchi,\najita taṁ vadāmi te;\nYattha nāmañca rūpañca,\nasesaṁ uparujjhati;\nViññāṇassa nirodhena,\netthetaṁ uparujjhatī”ti."}},{"id":"cnd5:41","sourceIds":["cnd5:41.1","cnd5:41.2","cnd5:41.3","cnd5:41.4"],"kind":"text","text":{"pi":"Ye ca saṅkhātadhammāse,\nye ca sekhā puthū idha;\nTesaṁ me nipako iriyaṁ,\npuṭṭho pabrūhi mārisa."}},{"id":"cnd5:42","sourceIds":["cnd5:42.1","cnd5:42.2","cnd5:42.3","cnd5:42.4","cnd5:42.5","cnd5:42.6","cnd5:42.7","cnd5:42.8","cnd5:42.9","cnd5:42.10"],"kind":"text","text":{"pi":"Ye ca saṅkhātadhammāseti saṅkhātadhammā vuccanti arahanto khīṇāsavā.\nKiṅkāraṇā saṅkhātadhammā vuccanti arahanto khīṇāsavā?\nTe saṅkhātadhammā ñātadhammā tulitadhammā tīritadhammā vibhūtadhammā vibhāvitadhammā.\n“Sabbe saṅkhārā aniccā”ti saṅkhātadhammā ñātadhammā tulitadhammā tīritadhammā vibhūtadhammā vibhāvitadhammā.\n“Sabbe saṅkhārā dukkhā”ti saṅkhātadhammā …pe…\n“sabbe dhammā anattā”ti saṅkhātadhammā …\n“avijjāpaccayā saṅkhārā”ti saṅkhātadhammā …\n“yaṁ kiñci samudayadhammaṁ sabbaṁ taṁ nirodhadhamman”ti saṅkhātadhammā ñātadhammā tulitadhammā tīritadhammā vibhūtadhammā vibhāvitadhammā.\nAtha vā tesaṁ khandhā saṅkhātā dhātuyo saṅkhātā āyatanāni saṅkhātā gatiyo saṅkhātā upapattiyo saṅkhātā paṭisandhi saṅkhātā bhavā saṅkhātā saṁsārā saṅkhātā vaṭṭā saṅkhātā.\nAtha vā te khandhapariyante ṭhitā dhātupariyante ṭhitā āyatanapariyante ṭhitā gatipariyante ṭhitā upapattipariyante ṭhitā paṭisandhipariyante ṭhitā bhavapariyante ṭhitā saṁsārapariyante ṭhitā vaṭṭapariyante ṭhitā antime bhave ṭhitā antime samussaye ṭhitā antimadehadharā arahanto."}},{"id":"cnd5:43","sourceIds":["cnd5:43.1","cnd5:43.2","cnd5:43.3","cnd5:43.4"],"kind":"text","text":{"pi":"Tesaṁ cāyaṁ pacchimako,\nCarimoyaṁ samussayo;\nJātimaraṇasaṁsāro,\nNatthi nesaṁ punabbhavoti."}},{"id":"cnd5:44","sourceIds":["cnd5:44.1","cnd5:44.2","cnd5:44.3","cnd5:44.4","cnd5:44.5","cnd5:44.6"],"kind":"text","text":{"pi":"Taṅkāraṇā saṅkhātadhammā vuccanti arahanto khīṇāsavāti.\nYe ca saṅkhātadhammāse, ye ca sekhā puthū idhāti.\nSekhāti kiṅkāraṇā vuccanti sekhā?\nSikkhantīti sekhā.\nKiñca sikkhanti?\nAdhisīlampi sikkhanti, adhicittampi sikkhanti, adhipaññampi sikkhanti."}},{"id":"cnd5:45","sourceIds":["cnd5:45.1","cnd5:45.2","cnd5:45.3","cnd5:45.4"],"kind":"text","text":{"pi":"Katamā adhisīlasikkhā?\nIdha bhikkhu sīlavā hoti pātimokkhasaṁvarasaṁvuto viharati ācāragocarasampanno aṇumattesu vajjesu bhayadassāvī, samādāya sikkhati sikkhāpadesu.\nKhuddako sīlakkhandho mahanto sīlakkhandho sīlaṁ patiṭṭhā ādi caraṇaṁ saṁyamo saṁvaro mukhaṁ pamukhaṁ kusalānaṁ dhammānaṁ samāpattiyā—\nayaṁ adhisīlasikkhā."}},{"id":"cnd5:46","sourceIds":["cnd5:46.1","cnd5:46.2","cnd5:46.3","cnd5:46.4","cnd5:46.5","cnd5:46.6"],"kind":"text","text":{"pi":"Katamā adhicittasikkhā?\nIdha bhikkhu vivicceva kāmehi …pe… paṭhamaṁ jhānaṁ …\ndutiyaṁ jhānaṁ …\ntatiyaṁ jhānaṁ …\ncatutthaṁ jhānaṁ upasampajja viharati—\nayaṁ adhicittasikkhā."}},{"id":"cnd5:47","sourceIds":["cnd5:47.1","cnd5:47.2","cnd5:47.3","cnd5:47.4","cnd5:47.5","cnd5:47.6","cnd5:47.7","cnd5:47.8","cnd5:47.9","cnd5:47.10","cnd5:47.11","cnd5:47.12","cnd5:47.13","cnd5:47.14","cnd5:47.15","cnd5:47.16","cnd5:47.17"],"kind":"text","text":{"pi":"Katamā adhipaññāsikkhā?\nIdha bhikkhu paññavā hoti udayatthagāminiyā paññāya samannāgato ariyāya nibbedhikāya sammā dukkhakkhayagāminiyā.\nSo “idaṁ dukkhan”ti yathābhūtaṁ pajānāti, “ayaṁ dukkhasamudayo”ti …pe…\n“ayaṁ dukkhanirodho”ti …\n“ayaṁ dukkhanirodhagāminī paṭipadā”ti yathābhūtaṁ pajānāti.\n“Ime āsavā”ti …pe…\n“ayaṁ āsavasamudayo”ti …\n“ayaṁ āsavanirodho”ti …\n“ayaṁ āsavanirodhagāminī paṭipadā”ti yathābhūtaṁ pajānāti.\n“Ayaṁ adhipaññāsikkhā” …\nimā tisso sikkhāyo āvajjantā sikkhanti jānantā sikkhanti passantā sikkhanti cittaṁ adhiṭṭhahantā sikkhanti saddhāya adhimuccantā sikkhanti vīriyaṁ paggaṇhantā sikkhanti satiṁ upaṭṭhapentā sikkhanti cittaṁ samādahantā sikkhanti paññāya pajānantā sikkhanti abhiññeyyaṁ abhijānantā sikkhanti pariññeyyaṁ parijānantā sikkhanti pahātabbaṁ pajahantā sikkhanti bhāvetabbaṁ bhāventā sikkhanti sacchikātabbaṁ sacchikarontā sikkhanti ācaranti samācaranti samādāya vattanti.\nTaṅkāraṇā vuccanti—\nsekhā.\nPuthūti bahukā.\nEte sekhā sotāpannā ca paṭipannā ca sakadāgāmino ca paṭipannā ca anāgāmino ca paṭipannā ca arahanto ca paṭipannā ca.\nIdhāti imissā diṭṭhiyā imissā khantiyā imissā ruciyā imasmiṁ ādāye imasmiṁ dhamme imasmiṁ vinaye imasmiṁ dhammavinaye imasmiṁ pāvacane imasmiṁ brahmacariye imasmiṁ satthusāsane imasmiṁ attabhāve imasmiṁ manussaloketi—\nye ca sekhā puthū idha."}},{"id":"cnd5:48","sourceIds":["cnd5:48.1","cnd5:48.2","cnd5:48.3","cnd5:48.4","cnd5:48.5","cnd5:48.6","cnd5:48.7"],"kind":"text","text":{"pi":"Tesaṁ me nipako iriyaṁ, puṭṭho pabrūhi mārisāti tvampi nipako paṇḍito paññavā buddhimā ñāṇī medhāvī.\nTesaṁ saṅkhātadhammānañca sekkhānañca iriyaṁ cariyaṁ vuttiṁ pavattiṁ ācaraṁ gocaraṁ vihāraṁ paṭipadaṁ.\nPuṭṭhoti pucchito yācito ajjhesito pasādito.\nPabrūhīti brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehi.\nMārisāti piyavacanaṁ garuvacanaṁ sagāravasappatissādhivacanametaṁ mārisāti—\ntesaṁ me nipako iriyaṁ, puṭṭho pabrūhi mārisa.\nTenāha so brāhmaṇo—"}},{"id":"cnd5:49","sourceIds":["cnd5:49.1","cnd5:49.2","cnd5:49.3","cnd5:49.4"],"kind":"text","text":{"pi":"“Ye ca saṅkhātadhammāse,\nye ca sekhā puthū idha;\nTesaṁ me nipako iriyaṁ,\npuṭṭho pabrūhi mārisā”ti."}},{"id":"cnd5:50","sourceIds":["cnd5:50.1","cnd5:50.2","cnd5:50.3","cnd5:50.4"],"kind":"text","text":{"pi":"Kāmesu nābhigijjheyya,\nmanasānāvilo siyā;\nKusalo sabbadhammānaṁ,\nsato bhikkhu paribbaje."}},{"id":"cnd5:51","sourceIds":["cnd5:51.1","cnd5:51.2","cnd5:51.3","cnd5:51.4","cnd5:51.5","cnd5:51.6"],"kind":"text","text":{"pi":"Kāmesu nābhigijjheyyāti.\nKāmāti uddānato dve kāmā—\nvatthukāmā ca kilesakāmā ca.\nKatame vatthukāmā?\nManāpikā rūpā manāpikā saddā manāpikā gandhā manāpikā rasā manāpikā phoṭṭhabbā, attharaṇā pāvuraṇā dāsidāsā ajeḷakā kukkuṭasūkarā hatthigavāssavaḷavā khettaṁ vatthu hiraññaṁ suvaṇṇaṁ gāmanigamarājadhāniyo raṭṭhañca janapado ca koso ca koṭṭhāgārañca—\nyaṁ kiñci rajanīyavatthu vatthukāmā."}},{"id":"cnd5:52","sourceIds":["cnd5:52.1","cnd5:52.2"],"kind":"text","text":{"pi":"Api ca atītā kāmā anāgatā kāmā paccuppannā kāmā ajjhattā kāmā bahiddhā kāmā ajjhattabahiddhā kāmā, hīnā kāmā majjhimā kāmā paṇītā kāmā, āpāyikā kāmā mānusikā kāmā dibbā kāmā, paccupaṭṭhitā kāmā, nimmitā kāmā paranimmitā kāmā, pariggahitā kāmā apariggahitā kāmā, mamāyitā kāmā amamāyitā kāmā, sabbepi kāmāvacarā dhammā, sabbepi rūpāvacarā dhammā, sabbepi arūpāvacarā dhammā, taṇhāvatthukā taṇhārammaṇā, kāmanīyaṭṭhena rajanīyaṭṭhena madanīyaṭṭhena ramaṇīyaṭṭhena kāmā.\nIme vuccanti vatthukāmā."}},{"id":"cnd5:53","sourceIds":["cnd5:53.1","cnd5:53.2"],"kind":"text","text":{"pi":"Katame kilesakāmā?\nChando kāmo rāgo kāmo chandarāgo kāmo saṅkappo kāmo rāgo kāmo saṅkapparāgo kāmo, yo kāmesu kāmacchando kāmarāgo kāmanandī kāmataṇhā kāmasineho kāmapipāsā kāmapariḷāho kāmagedho kāmamucchā kāmajjhosānaṁ kāmogho kāmayogo kāmupādānaṁ kāmacchandanīvaraṇaṁ—"}},{"id":"cnd5:54","sourceIds":["cnd5:54.1","cnd5:54.2","cnd5:54.3","cnd5:54.4"],"kind":"text","text":{"pi":"Addasaṁ kāma te mūlaṁ,\nsaṅkappā kāma jāyasi;\nNa taṁ saṅkappayissāmi,\nevaṁ kāma na hehisīti."}},{"id":"cnd5:55","sourceIds":["cnd5:55.1","cnd5:55.2","cnd5:55.3","cnd5:55.4"],"kind":"text","text":{"pi":"Ime vuccanti kilesakāmā.\nGedho vuccati taṇhā, yo rāgo sārāgo …pe… abhijjhā lobho akusalamūlaṁ.\nKāmesu nābhigijjheyyāti kilesakāmena vatthukāmesu nābhigijjheyya na paligijjheyya na palibundheyya agiddho assa agadhito amucchito anajjhosanno vītagedho vigatagedho cattagedho vantagedho muttagedho pahīnagedho paṭinissaṭṭhagedho vītarāgo vigatarāgo cattarāgo vantarāgo muttarāgo pahīnarāgo paṭinissaṭṭharāgo nicchāto nibbuto sītibhūto sukhappaṭisaṁvedī brahmabhūtena attanā vihareyyāti—\nkāmesu nābhigijjheyya."}},{"id":"cnd5:56","sourceIds":["cnd5:56.1","cnd5:56.2","cnd5:56.3","cnd5:56.4","cnd5:56.5","cnd5:56.6","cnd5:56.7","cnd5:56.8","cnd5:56.9","cnd5:56.10","cnd5:56.11","cnd5:56.12","cnd5:56.13","cnd5:56.14","cnd5:56.15","cnd5:56.16","cnd5:56.17","cnd5:56.18","cnd5:56.19","cnd5:56.20","cnd5:56.21","cnd5:56.22","cnd5:56.23","cnd5:56.24","cnd5:56.25","cnd5:56.26","cnd5:56.27","cnd5:56.28","cnd5:56.29","cnd5:56.30","cnd5:56.31"],"kind":"text","text":{"pi":"Manasānāvilo siyāti.\nManoti yaṁ cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjā manoviññāṇadhātu.\nKāyaduccaritena cittaṁ āvilaṁ hoti luḷitaṁ eritaṁ ghaṭṭitaṁ calitaṁ bhantaṁ avūpasantaṁ.\nVacīduccaritena …pe…\nmanoduccaritena …\nrāgena …\ndosena …\nmohena …\nkodhena …\nupanāhena …\nmakkhena …\npaḷāsena …\nissāya …\nmacchariyena …\nmāyāya …\nsāṭheyyena …\nthambhena …\nsārambhena …\nmānena …\natimānena …\nmadena …\npamādena …\nsabbakilesehi …\nsabbaduccaritehi …\nsabbaḍāhehi …\nsabbapariḷāhehi …\nsabbasantāpehi …\nsabbākusalābhisaṅkhārehi cittaṁ āvilaṁ hoti luḷitaṁ eritaṁ ghaṭṭitaṁ calitaṁ bhantaṁ avūpasantaṁ.\nManasānāvilo siyāti cittena anāvilo siyā—\naluḷito anerito aghaṭṭito acalito abhanto vūpasanto āvilakare kilese jaheyya pajaheyya vinodeyya byantīkareyya anabhāvaṁ gameyya, āvilakarehi kilesehi ca ārato virato paṭivirato nikkhanto nissaṭo vippamutto visaññutto vimariyādikatena cetasā vihareyyāti—\nmanasānāvilo siyā."}},{"id":"cnd5:57","sourceIds":["cnd5:57.1","cnd5:57.2","cnd5:57.3","cnd5:57.4","cnd5:57.5"],"kind":"text","text":{"pi":"Kusalo sabbadhammānanti “sabbe saṅkhārā aniccā”ti kusalo sabbadhammānaṁ,\n“sabbe saṅkhārā dukkhā”ti kusalo sabbadhammānaṁ,\n“sabbe dhammā anattā”ti kusalo sabbadhammānaṁ, “avijjāpaccayā saṅkhārā”ti kusalo sabbadhammānaṁ …pe…\n“yaṁ kiñci samudayadhammaṁ sabbaṁ taṁ nirodhadhamman”ti kusalo sabbadhammānaṁ.\nEvampi kusalo sabbadhammānaṁ."}},{"id":"cnd5:58","sourceIds":["cnd5:58.1","cnd5:58.2","cnd5:58.3","cnd5:58.4","cnd5:58.5","cnd5:58.6","cnd5:58.7","cnd5:58.8","cnd5:58.9","cnd5:58.10","cnd5:58.11","cnd5:58.12","cnd5:58.13","cnd5:58.14","cnd5:58.15","cnd5:58.16","cnd5:58.17","cnd5:58.18","cnd5:58.19","cnd5:58.20","cnd5:58.21","cnd5:58.22","cnd5:58.23","cnd5:58.24","cnd5:58.25","cnd5:58.26","cnd5:58.27","cnd5:58.28","cnd5:58.29","cnd5:58.30","cnd5:58.31","cnd5:58.32","cnd5:58.33","cnd5:58.34","cnd5:58.35","cnd5:58.36","cnd5:58.37","cnd5:58.38","cnd5:58.39","cnd5:58.40","cnd5:58.41","cnd5:58.42","cnd5:58.43","cnd5:58.44"],"kind":"text","text":{"pi":"Atha vā aniccato kusalo sabbadhammānaṁ, dukkhato …pe…\nrogato …\ngaṇḍato …\nsallato …\naghato …\nābādhato …\nparato …\npalokato …\nītito …\nupaddavato …\nbhayato …\nupasaggato …\ncalato …\npabhaṅguto …\naddhuvato …\natāṇato …\naleṇato …\nasaraṇato …\nasaraṇībhūtato …\nrittato …\ntucchato …\nsuññato …\nanattato …\nādīnavato …\nvipariṇāmadhammato …\nasārakato …\naghamūlato …\nvadhakato …\nvibhavato …\nsāsavato …\nsaṅkhatato …\nmārāmisato …\njātidhammato …\njarādhammato …\nbyādhidhammato …\nmaraṇadhammato …\nsokaparidevadukkhadomanassupāyāsadhammato …\nsaṅkilesikadhammato …\nsamudayato …\natthaṅgamato …\nassādato …\nādīnavato …\nnissaraṇato kusalo sabbadhammānaṁ.\nEvampi kusalo sabbadhammānaṁ."}},{"id":"cnd5:59","sourceIds":["cnd5:59.1","cnd5:59.2"],"kind":"text","text":{"pi":"Atha vā khandhakusalo dhātukusalo āyatanakusalo paṭiccasamuppādakusalo satipaṭṭhānakusalo sammappadhānakusalo iddhipādakusalo indriyakusalo balakusalo bojjhaṅgakusalo maggakusalo phalakusalo nibbānakusalo.\nEvampi kusalo sabbadhammānaṁ."}},{"id":"cnd5:60","sourceIds":["cnd5:60.1","cnd5:60.2","cnd5:60.3","cnd5:60.4"],"kind":"text","text":{"pi":"Atha vā sabbadhammā vuccanti dvādasāyatanāni—\ncakkhu ceva rūpā ca, sotañca saddā ca, ghānañca gandhā ca, jivhā ca rasā ca, kāyo ca phoṭṭhabbā ca, mano ca dhammā ca.\nYato ca ajjhattikabāhiresu āyatanesu chandarāgo pahīno hoti ucchinnamūlo tālāvatthukato anabhāvaṅkato āyatiṁ anuppādadhammo, ettāvatāpi kusalo sabbadhammānanti—\nkusalo sabbadhammānaṁ."}},{"id":"cnd5:61","sourceIds":["cnd5:61.1","cnd5:61.2","cnd5:61.3","cnd5:61.4"],"kind":"text","text":{"pi":"Sato bhikkhu paribbajeti.\nSatoti catūhi kāraṇehi sato—\nkāye kāyānupassanāsatipaṭṭhānaṁ bhāvento sato,\nvedanāsu vedanānupassanāsatipaṭṭhānaṁ bhāvento sato, citte cittānupassanāsatipaṭṭhānaṁ bhāvento sato, dhammesu dhammānupassanāsatipaṭṭhānaṁ bhāvento sato."}},{"id":"cnd5:62","sourceIds":["cnd5:62.1","cnd5:62.2"],"kind":"text","text":{"pi":"Aparehipi catūhi kāraṇehi sato—\nasatiparivajjanāya sato, satikaraṇīyānaṁ dhammānaṁ katattā sato, satiparibandhānaṁ dhammānaṁ hatattā sato, satinimittānaṁ dhammānaṁ asammuṭṭhattā sato."}},{"id":"cnd5:63","sourceIds":["cnd5:63.1","cnd5:63.2"],"kind":"text","text":{"pi":"Aparehipi catūhi kāraṇehi sato—\nsatiyā samannāgatattā sato, satiyā vasitattā sato, satiyā pāguññena samannāgatattā sato, satiyā apaccorohaṇatāya sato."}},{"id":"cnd5:64","sourceIds":["cnd5:64.1","cnd5:64.2","cnd5:64.3","cnd5:64.4","cnd5:64.5","cnd5:64.6","cnd5:64.7","cnd5:64.8"],"kind":"text","text":{"pi":"Aparehipi catūhi kāraṇehi sato—\nsatiyā samannāgatattā sato, santattā sato, samitattā sato, santadhammasamannāgatattā sato.\nBuddhānussatiyā sato, dhammānussatiyā sato, saṅghānussatiyā sato, sīlānussatiyā sato, cāgānussatiyā sato, devatānussatiyā sato, ānāpānassatiyā sato, maraṇassatiyā sato, kāyagatāsatiyā sato, upasamānussatiyā sato.\nYā sati anussati …pe… sammāsati satisambojjhaṅgo ekāyanamaggo, ayaṁ vuccati sati.\nImāya satiyā upeto hoti samupeto upāgato samupāgato upapanno samupapanno samannāgato, so vuccati sato.\nBhikkhūti sattannaṁ dhammānaṁ bhinnattā bhikkhu—\nsakkāyadiṭṭhi bhinnā hoti, vicikicchā bhinnā hoti, sīlabbataparāmāso bhinno hoti, rāgo bhinno hoti, doso bhinno hoti, moho bhinno hoti, māno bhinno hoti.\nBhinnā honti pāpakā akusalā dhammā saṅkilesikā ponobhavikā sadarā dukkhavipākā āyatiṁ jātijarāmaraṇiyā."}},{"id":"cnd5:65","sourceIds":["cnd5:65.1","cnd5:65.2","cnd5:65.3","cnd5:65.4","cnd5:65.5"],"kind":"text","text":{"pi":"Pajjena katena attanā,\n(sabhiyāti bhagavā)\nParinibbānagato vitiṇṇakaṅkho;\nVibhavañca bhavañca vippahāya,\nVusitavā khīṇapunabbhavo sa bhikkhūti."}},{"id":"cnd5:66","sourceIds":["cnd5:66.1","cnd5:66.2","cnd5:66.3"],"kind":"text","text":{"pi":"Sato bhikkhu paribbajeti sato bhikkhu paribbaje, sato gaccheyya, sato tiṭṭheyya, sato nisīdeyya, sato seyyaṁ kappeyya, sato abhikkameyya, sato paṭikkameyya, sato ālokeyya, sato vilokeyya, sato samiñjeyya, sato pasāreyya, sato saṅghāṭipattacīvaraṁ dhāreyya, sato careyya vihareyya iriyeyya vatteyya pāleyya yapeyya yāpeyyāti—\nsato bhikkhu paribbaje.\nTenāha bhagavā—"}},{"id":"cnd5:67","sourceIds":["cnd5:67.1","cnd5:67.2","cnd5:67.3","cnd5:67.4"],"kind":"text","text":{"pi":"“Kāmesu nābhigijjheyya,\nmanasānāvilo siyā;\nKusalo sabbadhammānaṁ,\nsato bhikkhu paribbaje”ti."}},{"id":"cnd5:68","sourceIds":["cnd5:68.1","cnd5:68.2","cnd5:68.3","cnd5:68.4","cnd5:68.5","cnd5:68.6"],"kind":"text","text":{"pi":"Saha gāthāpariyosānā ye te brāhmaṇena saddhiṁ ekacchandā ekapayogā ekādhippāyā ekavāsanavāsitā, tesaṁ anekapāṇasahassānaṁ virajaṁ vītamalaṁ dhammacakkhuṁ udapādi—\n“yaṁ kiñci samudayadhammaṁ sabbaṁ taṁ nirodhadhamman”ti.\nTassa brāhmaṇassa anupādāya āsavehi cittaṁ vimucci.\nSaha arahattappattā ajinajaṭāvākacīratidaṇḍakamaṇḍalukesā ca massū ca antarahitā, bhaṇḍukāsāyavatthavasano saṅghāṭipattacīvaradharo anvatthapaṭipattiyā pañjaliko bhagavantaṁ namassamāno nisinno hoti—\n“satthā me bhante bhagavā, sāvakohamasmī”ti.\nAjitamāṇavapucchāniddeso paṭhamo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}