{"id":"cnd7","title":"3. Puṇṇakamāṇavapucchāniddesa","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"cnd7","title":"3. Puṇṇakamāṇavapucchāniddesa","units":[{"id":"cnd7:0","sourceIds":["cnd7:0.1","cnd7:0.2","cnd7:0.3","cnd7:0.4"],"kind":"text","text":{"pi":"Cūḷaniddesa\nPārāyanavagganiddesa\nPucchāniddesa\n3. Puṇṇakamāṇavapucchāniddesa"}},{"id":"cnd7:1","sourceIds":["cnd7:1.1","cnd7:1.2","cnd7:1.3","cnd7:1.4","cnd7:1.5","cnd7:1.6","cnd7:1.7"],"kind":"text","text":{"pi":"Anejaṁ mūladassāviṁ,\n(iccāyasmā puṇṇako)\nAtthi pañhena āgamaṁ;\nKiṁnissitā isayo manujā,\nKhattiyā brāhmaṇā devatānaṁ;\nYaññamakappayiṁsu puthūdha loke,\nPucchāmi taṁ bhagavā brūhi metaṁ."}},{"id":"cnd7:2","sourceIds":["cnd7:2.1","cnd7:2.2","cnd7:2.3","cnd7:2.4","cnd7:2.5","cnd7:2.6","cnd7:2.7"],"kind":"text","text":{"pi":"Anejaṁ mūladassāvinti ejā vuccati taṇhā.\nYo rāgo sārāgo …pe… abhijjhā lobho akusalamūlaṁ sā ejā taṇhā buddhassa bhagavato pahīnā ucchinnamūlā tālāvatthukatā anabhāvaṅkatā āyatiṁ anuppādadhammā.\nTasmā buddho anejo.\nEjāya pahīnattā anejo.\nBhagavā lābhepi na iñjati, alābhepi na iñjati, yasepi na iñjati, ayasepi na iñjati, pasaṁsāyapi na iñjati, nindāyapi na iñjati, sukhepi na iñjati, dukkhepi na iñjati na calati na vedhati nappavedhatīti—\nanejaṁ.\nMūladassāvinti bhagavā mūladassāvī hetudassāvī nidānadassāvī sambhavadassāvī pabhavadassāvī samuṭṭhānadassāvī āhāradassāvī ārammaṇadassāvī paccayadassāvī samudayadassāvī."}},{"id":"cnd7:3","sourceIds":["cnd7:3.1","cnd7:3.2"],"kind":"text","text":{"pi":"Tīṇi akusalamūlāni—\nlobho akusalamūlaṁ, doso akusalamūlaṁ, moho akusalamūlaṁ."}},{"id":"cnd7:4","sourceIds":["cnd7:4.1","cnd7:4.2","cnd7:4.3","cnd7:4.4","cnd7:4.5","cnd7:4.6","cnd7:4.7","cnd7:4.8","cnd7:4.9","cnd7:4.10","cnd7:4.11"],"kind":"text","text":{"pi":"Vuttañhetaṁ bhagavatā—\n“tīṇimāni, bhikkhave, nidānāni kammānaṁ samudayāya.\nKatamāni tīṇi?\nLobho nidānaṁ kammānaṁ samudayāya, doso nidānaṁ kammānaṁ samudayāya, moho nidānaṁ kammānaṁ samudayāya.\nNa, bhikkhave, lobhajena kammena dosajena kammena mohajena kammena devā paññāyanti, manussā paññāyanti, yā vā panaññāpi kāci sugatiyo.\nAtha kho, bhikkhave, lobhajena kammena dosajena kammena mohajena kammena nirayo paññāyati, tiracchānayoni paññāyati, pettivisayo paññāyati, yā vā panaññāpi kāci duggatiyo niraye tiracchānayoniyā pettivisaye attabhāvābhinibbattiyā”.\nImāni tīṇi akusalamūlānīti bhagavā jānāti passati.\nEvampi bhagavā mūladassāvī …pe…\nsamudayadassāvī.\nTīṇi kusalamūlāni—\nalobho kusalamūlaṁ, adoso kusalamūlaṁ, amoho kusalamūlaṁ."}},{"id":"cnd7:5","sourceIds":["cnd7:5.1","cnd7:5.2","cnd7:5.3","cnd7:5.4","cnd7:5.5","cnd7:5.6","cnd7:5.7"],"kind":"text","text":{"pi":"Vuttañhetaṁ bhagavatā—\n“tīṇimāni …pe…\nna, bhikkhave, alobhajena kammena adosajena kammena amohajena kammena nirayo paññāyati, tiracchānayoni paññāyati, pettivisayo paññāyati, yā vā panaññāpi kāci duggatiyo.\nAtha kho, bhikkhave, alobhajena kammena adosajena kammena amohajena kammena devā paññāyanti, manussā paññāyanti, yā vā panaññāpi kāci sugatiyo deve ca manusse ca attabhāvābhinibbattiyā”.\nImāni tīṇi kusalamūlānīti bhagavā jānāti passati.\nEvampi bhagavā mūladassāvī …pe…\nsamudayadassāvī."}},{"id":"cnd7:6","sourceIds":["cnd7:6.1","cnd7:6.2","cnd7:6.3","cnd7:6.4","cnd7:6.5"],"kind":"text","text":{"pi":"Vuttañhetaṁ bhagavatā—\n“ye keci, bhikkhave, dhammā akusalā akusalabhāgiyā akusalapakkhikā sabbe te avijjāmūlakā avijjāsamosaraṇā avijjāsamugghātā”.\nSabbe te samugghātaṁ gacchantīti bhagavā jānāti passati.\nEvampi bhagavā mūladassāvī …pe…\nsamudayadassāvī."}},{"id":"cnd7:7","sourceIds":["cnd7:7.1","cnd7:7.2","cnd7:7.3","cnd7:7.4","cnd7:7.5"],"kind":"text","text":{"pi":"Vuttañhetaṁ bhagavatā—\n“ye keci, bhikkhave, dhammā kusalā kusalabhāgiyā kusalapakkhikā, sabbe te appamādamūlakā appamādasamosaraṇā.\nAppamādo tesaṁ dhammānaṁ aggamakkhāyatī”ti bhagavā jānāti passati.\nEvampi bhagavā mūladassāvī …pe…\nsamudayadassāvī."}},{"id":"cnd7:8","sourceIds":["cnd7:8.1","cnd7:8.2","cnd7:8.3","cnd7:8.4","cnd7:8.5"],"kind":"text","text":{"pi":"Atha vā bhagavā jānāti passati.\n“Avijjā mūlaṁ saṅkhārānaṁ, saṅkhārā mūlaṁ viññāṇassa, viññāṇaṁ mūlaṁ nāmarūpassa, nāmarūpaṁ mūlaṁ saḷāyatanassa, saḷāyatanaṁ mūlaṁ phassassa, phasso mūlaṁ vedanāya, vedanā mūlaṁ taṇhāya, taṇhā mūlaṁ upādānassa, upādānaṁ mūlaṁ bhavassa, bhavo mūlaṁ jātiyā, jāti mūlaṁ jarāmaraṇassā”ti—\nbhagavā jānāti passati.\nEvampi bhagavā mūladassāvī …pe…\nsamudayadassāvī."}},{"id":"cnd7:9","sourceIds":["cnd7:9.1","cnd7:9.2","cnd7:9.3","cnd7:9.4","cnd7:9.5"],"kind":"text","text":{"pi":"Atha vā bhagavā jānāti passati.\n“Cakkhu mūlaṁ cakkhurogānaṁ, sotaṁ mūlaṁ sotarogānaṁ, ghānaṁ mūlaṁ ghānarogānaṁ, jivhā mūlaṁ jivhārogānaṁ, kāyo mūlaṁ kāyarogānaṁ, mano mūlaṁ cetasikānaṁ dukkhānan”ti—\nbhagavā jānāti passati.\nEvampi bhagavā mūladassāvī hetudassāvī nidānadassāvī sambhavadassāvī pabhavadassāvī samuṭṭhānadassāvī āhāradassāvī ārammaṇadassāvī paccayadassāvī samudayadassāvīti—\nanejaṁ mūladassāvī."}},{"id":"cnd7:10","sourceIds":["cnd7:10.1","cnd7:10.2"],"kind":"text","text":{"pi":"Iccāyasmā puṇṇakoti iccāti padasandhi …pe…\nāyasmā puṇṇako."}},{"id":"cnd7:11","sourceIds":["cnd7:11.1","cnd7:11.2","cnd7:11.3","cnd7:11.4","cnd7:11.5","cnd7:11.6","cnd7:11.7"],"kind":"text","text":{"pi":"Atthi pañhena āgamanti pañhena atthiko āgatomhi, pañhaṁ pucchitukāmo āgatomhi, pañhaṁ sotukāmo āgatomhīti—\nevampi atthi pañhena āgamaṁ.\nAtha vā pañhatthikānaṁ pañhaṁ pucchitukāmānaṁ pañhaṁ sotukāmānaṁ āgamanaṁ abhikkamanaṁ upasaṅkamanaṁ payirupāsanaṁ atthīti—\nevampi atthi pañhena āgamaṁ.\nAtha vā pañhāgamo tuyhaṁ atthi, tvampi pahu tvamasi alamatto.\nMayā pucchitaṁ kathetuṁ visajjetuṁ vahassetaṁ bhāranti—\nevampi atthi pañhena āgamaṁ."}},{"id":"cnd7:12","sourceIds":["cnd7:12.1","cnd7:12.2","cnd7:12.3","cnd7:12.4"],"kind":"text","text":{"pi":"Kiṁ nissitā isayo manujāti kiṁ nissitā āsitā allīnā upagatā ajjhositā adhimuttā.\nIsayoti isināmakā ye keci isipabbajjaṁ pabbajitā ājīvakā nigaṇṭhā jaṭilā tāpasā.\nManujāti manussā vuccantīti—\nkiṁ nissitā isayo manujā."}},{"id":"cnd7:13","sourceIds":["cnd7:13.1","cnd7:13.2","cnd7:13.3","cnd7:13.4","cnd7:13.5"],"kind":"text","text":{"pi":"Khattiyā brāhmaṇā devatānanti.\nKhattiyāti ye keci khattiyajātikā.\nBrāhmaṇāti ye keci bhovādikā.\nDevatānanti ājīvakasāvakānaṁ ājīvakā devatā, nigaṇṭhasāvakānaṁ nigaṇṭhā devatā, jaṭilasāvakānaṁ jaṭilā devatā, paribbājakasāvakānaṁ paribbājakā devatā, aviruddhakasāvakānaṁ aviruddhakā devatā, hatthivatikānaṁ hatthī devatā, assavatikānaṁ assā devatā, govatikānaṁ gāvo devatā, kukkuravatikānaṁ kukkurā devatā, kākavatikānaṁ kākā devatā, vāsudevavatikānaṁ vāsudevo devatā, baladevavatikānaṁ baladevo devatā, puṇṇabhaddavatikānaṁ puṇṇabhaddo devatā, maṇibhaddavatikānaṁ maṇibhaddo devatā, aggivatikānaṁ aggi devatā, nāgavatikānaṁ nāgā devatā, supaṇṇavatikānaṁ supaṇṇā devatā, yakkhavatikānaṁ yakkhā devatā, asuravatikānaṁ asurā devatā, gandhabbavatikānaṁ gandhabbā devatā, mahārājavatikānaṁ mahārājāno devatā, candavatikānaṁ cando devatā, sūriyavatikānaṁ sūriyo devatā, indavatikānaṁ indo devatā, brahmavatikānaṁ brahmā devatā, devavatikānaṁ devo devatā, disāvatikānaṁ disā devatā, ye yesaṁ dakkhiṇeyyā te tesaṁ devatāti—\nkhattiyabrāhmaṇā devatānaṁ."}},{"id":"cnd7:14","sourceIds":["cnd7:14.1","cnd7:14.2","cnd7:14.3","cnd7:14.4","cnd7:14.5","cnd7:14.6","cnd7:14.7","cnd7:14.8","cnd7:14.9","cnd7:14.10"],"kind":"text","text":{"pi":"Yaññamakappayiṁsu puthūdha loketi yaññaṁ vuccati deyyadhammo cīvarapiṇḍapātasenāsanagilānapaccayabhesajjaparikkhāraṁ annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ.\nYaññamakappayiṁsūti yepi yaññaṁ esanti gavesanti pariyesanti cīvarapiṇḍapātasenāsanagilānapaccayabhesajjaparikkhāraṁ annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyaṁ, tepi yaññaṁ kappenti.\nYepi yaññaṁ abhisaṅkharonti cīvarapiṇḍapātasenāsanagilānapaccayabhesajjaparikkhāraṁ annaṁ pānaṁ …pe…\nseyyāvasathapadīpeyyaṁ, tepi yaññaṁ kappenti.\nYepi yaññaṁ denti yajanti pariccajanti cīvarapiṇḍapātasenāsanagilānapaccayabhesajjaparikkhāraṁ annaṁ pānaṁ …pe…\nseyyāvasathapadīpeyyaṁ, tepi yaññaṁ kappenti.\nPuthūti yaññā vā ete puthū, yaññayājakā vā ete puthū, dakkhiṇeyyā vā ete puthū.\nKathaṁ yaññā vā ete puthū?\nBahukānaṁ ete yaññā cīvarapiṇḍapātasenāsanagilānapaccayabhesajjaparikkhārā annaṁ pānaṁ vatthaṁ yānaṁ mālaṁ gandhaṁ vilepanaṁ seyyāvasathapadīpeyyaṁ—\nevaṁ yaññā vā ete puthū."}},{"id":"cnd7:15","sourceIds":["cnd7:15.1","cnd7:15.2","cnd7:15.3"],"kind":"text","text":{"pi":"Kathaṁ yaññayājakā vā ete puthū?\nBahukā ete yaññayājakā khattiyā ca brāhmaṇā ca vessā ca suddā ca gahaṭṭhā ca pabbajitā ca devā ca manussā ca—\nevaṁ yaññayājakā vā ete puthū."}},{"id":"cnd7:16","sourceIds":["cnd7:16.1","cnd7:16.2","cnd7:16.3","cnd7:16.4","cnd7:16.5"],"kind":"text","text":{"pi":"Kathaṁ dakkhiṇeyyā vā ete puthū?\nBahukā ete dakkhiṇeyyā puthū samaṇabrāhmaṇā kapaṇaddhikavanibbakayācakā—\nevaṁ dakkhiṇeyyā vā ete puthū.\nIdha loketi manussaloketi yaññamakappayiṁsu—\nputhūdha loke."}},{"id":"cnd7:17","sourceIds":["cnd7:17.1","cnd7:17.2","cnd7:17.3","cnd7:17.4","cnd7:17.5","cnd7:17.6"],"kind":"text","text":{"pi":"Pucchāmi taṁ bhagavā brūhi metanti.\nPucchāti tisso pucchā—\nadiṭṭhajotanā pucchā, diṭṭhasaṁsandanā pucchā, vimaticchedanā pucchā.\nKatamā adiṭṭhajotanā pucchā?\nPakatiyā lakkhaṇaṁ aññātaṁ hoti adiṭṭhaṁ atulitaṁ atīritaṁ avibhūtaṁ avibhāvitaṁ, tassa ñāṇāya dassanāya tulanāya tīraṇāya vibhūtatthāya vibhāvanatthāya pañhaṁ pucchati—\nayaṁ adiṭṭhajotanā pucchā."}},{"id":"cnd7:18","sourceIds":["cnd7:18.1","cnd7:18.2","cnd7:18.3","cnd7:18.4"],"kind":"text","text":{"pi":"Katamā diṭṭhasaṁsandanā pucchā?\nPakatiyā lakkhaṇaṁ ñātaṁ hoti diṭṭhaṁ tulitaṁ tīritaṁ vibhūtaṁ vibhāvitaṁ.\nAññehi paṇḍitehi saddhiṁ saṁsandanatthāya pañhaṁ pucchati—\nayaṁ diṭṭhasaṁsandanā pucchā."}},{"id":"cnd7:19","sourceIds":["cnd7:19.1","cnd7:19.2","cnd7:19.3","cnd7:19.4","cnd7:19.5","cnd7:19.6"],"kind":"text","text":{"pi":"Katamā vimaticchedanā pucchā?\nPakatiyā saṁsayapakkhando hoti vimatipakkhando dveḷhakajāto—\n“evaṁ nu kho, na nu kho, kiṁ nu kho, kathaṁ nu kho”ti.\nSo vimaticchedanatthāya pañhaṁ pucchati—\nayaṁ vimaticchedanā pucchā.\nImā tisso pucchā."}},{"id":"cnd7:20","sourceIds":["cnd7:20.1","cnd7:20.2","cnd7:20.3","cnd7:20.4","cnd7:20.5"],"kind":"text","text":{"pi":"Aparāpi tisso pucchā—\nmanussapucchā, amanussapucchā, nimmitapucchā.\nKatamā manussapucchā?\nManussā buddhaṁ bhagavantaṁ upasaṅkamitvā pucchanti, bhikkhū pucchanti, bhikkhuniyo pucchanti, upāsakā pucchanti, upāsikāyo pucchanti, rājāno pucchanti, khattiyā pucchanti, brāhmaṇā pucchanti, vessā pucchanti, suddā pucchanti, gahaṭṭhā pucchanti, pabbajitā pucchanti—\nayaṁ manussapucchā."}},{"id":"cnd7:21","sourceIds":["cnd7:21.1","cnd7:21.2","cnd7:21.3"],"kind":"text","text":{"pi":"Katamā amanussapucchā?\nAmanussā buddhaṁ bhagavantaṁ upasaṅkamitvā pañhaṁ pucchanti, nāgā pucchanti, supaṇṇā pucchanti, yakkhā pucchanti, asurā pucchanti, gandhabbā pucchanti, mahārājāno pucchanti, indā pucchanti, brahmāno pucchanti, devatāyo pucchanti—\nayaṁ amanussapucchā."}},{"id":"cnd7:22","sourceIds":["cnd7:22.1","cnd7:22.2","cnd7:22.3","cnd7:22.4","cnd7:22.5"],"kind":"text","text":{"pi":"Katamā nimmitapucchā?\nYaṁ bhagavā rūpaṁ abhinimmināti manomayaṁ sabbaṅgapaccaṅgaṁ ahīnindriyaṁ, so nimmito buddhaṁ bhagavantaṁ upasaṅkamitvā pañhaṁ pucchati;\nbhagavā visajjeti—\nayaṁ nimmitapucchā.\nImā tisso pucchā."}},{"id":"cnd7:23","sourceIds":["cnd7:23.1","cnd7:23.2","cnd7:23.3","cnd7:23.4","cnd7:23.5","cnd7:23.6","cnd7:23.7","cnd7:23.8","cnd7:23.9","cnd7:23.10","cnd7:23.11","cnd7:23.12","cnd7:23.13","cnd7:23.14","cnd7:23.15","cnd7:23.16","cnd7:23.17","cnd7:23.18","cnd7:23.19","cnd7:23.20"],"kind":"text","text":{"pi":"Aparāpi tisso pucchā—\nattatthapucchā, paratthapucchā, ubhayatthapucchā.\nAparāpi tisso pucchā—\ndiṭṭhadhammikatthapucchā, samparāyikatthapucchā, paramatthapucchā.\nAparāpi tisso pucchā—\nanavajjatthapucchā, nikkilesatthapucchā, vodānatthapucchā.\nAparāpi tisso pucchā—\natītapucchā, anāgatapucchā, paccuppannapucchā.\nAparāpi tisso pucchā—\najjhattapucchā, bahiddhāpucchā, ajjhattabahiddhāpucchā.\nAparāpi tisso pucchā—\nkusalapucchā, akusalapucchā, abyākatapucchā.\nAparāpi tisso pucchā—\nkhandhapucchā, dhātupucchā, āyatanapucchā.\nAparāpi tisso pucchā—\nsatipaṭṭhānapucchā, sammappadhānapucchā, iddhipādapucchā.\nAparāpi tisso pucchā—\nindriyapucchā, balapucchā, bojjhaṅgapucchā.\nAparāpi tisso pucchā—\nmaggapucchā, phalapucchā, nibbānapucchā."}},{"id":"cnd7:24","sourceIds":["cnd7:24.1","cnd7:24.2","cnd7:24.3","cnd7:24.4","cnd7:24.5","cnd7:24.6"],"kind":"text","text":{"pi":"Pucchāmi tanti pucchāmi taṁ yācāmi taṁ ajjhesāmi taṁ pasādemi taṁ “kathayassu me”ti pucchāmi taṁ.\nBhagavāti gāravādhivacanametaṁ …pe… sacchikā paññatti—\nyadidaṁ bhagavāti.\nBrūhi metanti brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\npucchāmi taṁ bhagavā brūhi metaṁ.\nTenāha so brāhmaṇo—"}},{"id":"cnd7:25","sourceIds":["cnd7:25.1","cnd7:25.2","cnd7:25.3","cnd7:25.4","cnd7:25.5","cnd7:25.6","cnd7:25.7"],"kind":"text","text":{"pi":"“Anejaṁ mūladassāviṁ,\n(iccāyasmā puṇṇako)\nAtthi pañhena āgamaṁ;\nKiṁ nissitā isayo manujā,\nKhattiyā brāhmaṇā devatānaṁ;\nYaññamakappayiṁsu puthūdha loke,\nPucchāmi taṁ bhagavā brūhi metan”ti."}},{"id":"cnd7:26","sourceIds":["cnd7:26.1","cnd7:26.2","cnd7:26.3","cnd7:26.4","cnd7:26.5","cnd7:26.6"],"kind":"text","text":{"pi":"Ye kecime isayo manujā,\n(puṇṇakāti bhagavā)\nKhattiyā brāhmaṇā devatānaṁ;\nYaññamakappayiṁsu puthūdha loke,\nĀsīsamānā puṇṇaka itthattaṁ;\nJaraṁ sitā yaññamakappayiṁsu."}},{"id":"cnd7:27","sourceIds":["cnd7:27.1","cnd7:27.2","cnd7:27.3","cnd7:27.4","cnd7:27.5","cnd7:27.6"],"kind":"text","text":{"pi":"Ye kecime isayo manujāti.\nYe kecīti sabbena sabbaṁ sabbathā sabbaṁ asesaṁ nissesaṁ pariyādiyanavacanametaṁ—\nye kecīti.\nIsayoti isināmakā ye keci isipabbajjaṁ pabbajitā ājīvakā nigaṇṭhā jaṭilā tāpasā.\nManujāti manussā vuccantīti—\nye kecime isayo manujā puṇṇakāti bhagavā."}},{"id":"cnd7:28","sourceIds":["cnd7:28.1","cnd7:28.2","cnd7:28.3","cnd7:28.4","cnd7:28.5","cnd7:28.6","cnd7:28.7"],"kind":"text","text":{"pi":"Khattiyā brāhmaṇā devatānanti.\nKhattiyāti ye keci khattiyajātikā.\nBrāhmaṇāti ye keci bhovādikā.\nDevatānanti ājīvakasāvakānaṁ ājīvakā devatā …pe…\ndisāvatikānaṁ disā devatā.\nYe yesaṁ dakkhiṇeyyā, te tesaṁ devatāti—\nkhattiyā brāhmaṇā devatānaṁ."}},{"id":"cnd7:29","sourceIds":["cnd7:29.1","cnd7:29.2","cnd7:29.3","cnd7:29.4","cnd7:29.5","cnd7:29.6"],"kind":"text","text":{"pi":"Yaññamakappayiṁsu puthūdha loketi.\nYaññaṁ vuccati deyyadhammo cīvarapiṇḍapātasenāsanagilānapaccayabhesajjaparikkhāraṁ annaṁ pānaṁ …pe… seyyāvasathapadīpeyyaṁ.\nYaññamakappayiṁsūti yepi yaññaṁ esanti gavesanti pariyesanti …pe… seyyāvasathapadīpeyyaṁ, tepi yaññaṁ kappenti.\nPuthūti yaññā vā ete puthū, yaññayājakā vā ete puthū, dakkhiṇeyyā vā ete puthū …pe… evaṁ dakkhiṇeyyā vā ete puthū.\nIdha loketi manussaloketi yaññamakappayiṁsu—\nputhūdha loke."}},{"id":"cnd7:30","sourceIds":["cnd7:30.1","cnd7:30.2"],"kind":"text","text":{"pi":"Āsīsamānā puṇṇaka itthattanti.\nĀsīsamānāti rūpapaṭilābhaṁ āsīsamānā, saddapaṭilābhaṁ āsīsamānā, gandhapaṭilābhaṁ āsīsamānā, rasapaṭilābhaṁ āsīsamānā, phoṭṭhabbapaṭilābhaṁ āsīsamānā, puttapaṭilābhaṁ āsīsamānā, dārapaṭilābhaṁ āsīsamānā, dhanapaṭilābhaṁ āsīsamānā, yasapaṭilābhaṁ āsīsamānā, issariyapaṭilābhaṁ āsīsamānā, khattiyamahāsālakule attabhāvapaṭilābhaṁ āsīsamānā, brāhmaṇamahāsālakule attabhāvapaṭilābhaṁ āsīsamānā, gahapatimahāsālakule attabhāvapaṭilābhaṁ āsīsamānā, cātumahārājikesu devesu attabhāvapaṭilābhaṁ āsīsamānā, tāvatiṁsesu devesu yāmesu devesu tusitesu devesu nimmānaratīsu devesu paranimmitavasavattīsu devesu brahmakāyikesu devesu attabhāvapaṭilābhaṁ āsīsamānā icchamānā sādiyamānā patthayamānā pihayamānā abhijappamānāti āsīsamānā."}},{"id":"cnd7:31","sourceIds":["cnd7:31.1","cnd7:31.2","cnd7:31.3"],"kind":"text","text":{"pi":"Puṇṇaka itthattanti ettha attabhāvābhinibbattiṁ āsīsamānā ettha khattiyamahāsālakule attabhāvābhinibbattiṁ āsīsamānā …pe…\nettha brahmakāyikesu devesu attabhāvābhinibbattiṁ āsīsamānā icchamānā sādiyamānā patthayamānā pihayamānā abhijappamānāti āsīsamānā—\npuṇṇaka itthattaṁ."}},{"id":"cnd7:32","sourceIds":["cnd7:32.1","cnd7:32.2","cnd7:32.3","cnd7:32.4","cnd7:32.5","cnd7:32.6","cnd7:32.7","cnd7:32.8","cnd7:32.9","cnd7:32.10","cnd7:32.11","cnd7:32.12","cnd7:32.13"],"kind":"text","text":{"pi":"Jaraṁ sitā yaññamakappayiṁsūti jarānissitā byādhinissitā maraṇanissitā sokaparidevadukkhadomanassupāyāsanissitā.\nYadeva te jātinissitā tadeva te jarānissitā.\nYadeva te jarānissitā tadeva te byādhinissitā.\nYadeva te byādhinissitā tadeva te maraṇanissitā.\nYadeva te maraṇanissitā tadeva te sokaparidevadukkhadomanassupāyāsanissitā.\nYadeva te sokaparidevadukkhadomanassupāyāsanissitā tadeva te gatinissitā.\nYadeva te gatinissitā tadeva te upapattinissitā.\nYadeva te upapattinissitā tadeva te paṭisandhinissitā.\nYadeva te paṭisandhinissitā tadeva te bhavanissitā.\nYadeva te bhavanissitā tadeva te saṁsāranissitā.\nYadeva te saṁsāranissitā tadeva te vaṭṭanissitā allīnā upagatā ajjhositā adhimuttāti—\njaraṁ sitā yaññamakappayiṁsu.\nTenāha bhagavā—"}},{"id":"cnd7:33","sourceIds":["cnd7:33.1","cnd7:33.2","cnd7:33.3","cnd7:33.4","cnd7:33.5","cnd7:33.6"],"kind":"text","text":{"pi":"“Ye kecime isayo manujā,\n(puṇṇakāti bhagavā)\nKhattiyā brāhmaṇā devatānaṁ;\nYaññamakappayiṁsu puthūdha loke,\nĀsīsamānā puṇṇaka itthattaṁ;\nJaraṁ sitā yaññamakappayiṁsū”ti."}},{"id":"cnd7:34","sourceIds":["cnd7:34.1","cnd7:34.2","cnd7:34.3","cnd7:34.4","cnd7:34.5","cnd7:34.6","cnd7:34.7"],"kind":"text","text":{"pi":"Ye kecime isayo manujā,\n(iccāyasmā puṇṇako)\nKhattiyā brāhmaṇā devatānaṁ;\nYaññamakappayiṁsu puthūdha loke,\nKaccisu te bhagavā yaññapathe appamattā;\nAtāruṁ jātiñca jarañca mārisa,\nPucchāmi taṁ bhagavā brūhi metaṁ."}},{"id":"cnd7:35","sourceIds":["cnd7:35.1","cnd7:35.2"],"kind":"text","text":{"pi":"Ye kecime isayo manujāti.\nYe kecīti …pe…."}},{"id":"cnd7:36","sourceIds":["cnd7:36.1","cnd7:36.2","cnd7:36.3","cnd7:36.4","cnd7:36.5","cnd7:36.6","cnd7:36.7","cnd7:36.8","cnd7:36.9","cnd7:36.10","cnd7:36.11","cnd7:36.12","cnd7:36.13","cnd7:36.14","cnd7:36.15","cnd7:36.16","cnd7:36.17","cnd7:36.18","cnd7:36.19","cnd7:36.20","cnd7:36.21"],"kind":"text","text":{"pi":"Kaccisu te bhagavā yaññapathe appamattāti.\nKaccisūti saṁsayapucchā vimatipucchā dveḷhakapucchā anekaṁsapucchā—\n“evaṁ nu kho, na nu kho, kiṁ nu kho, kathaṁ nu kho”ti—\nkaccisu.\nTeti yaññayājakā vuccanti.\nBhagavāti gāravādhivacanaṁ …pe… sacchikā paññatti, yadidaṁ bhagavāti—\nkaccisu te bhagavā.\nYaññapathe appamattāti yaññoyeva vuccati yaññapatho.\nYathā ariyamaggo ariyapatho devamaggo devapatho brahmamaggo brahmapatho, evameva yaññoyeva vuccati yaññapatho.\nAppamattāti yaññapathe appamattā sakkaccakārino sātaccakārino aṭṭhitakārino anolīnavuttino anikkhittacchandā anikkhittadhurā taccaritā tabbahulā taggarukā tanninnā tappoṇā tappabbhārā tadadhimuttā tadadhipateyyāti—\ntepi yaññapathe appamattā.\nYepi yaññaṁ esanti gavesanti pariyesanti cīvarapiṇḍapātasenāsanagilānapaccayabhesajjaparikkhāraṁ annaṁ pānaṁ …pe…\nseyyāvasathapadīpeyyaṁ sakkaccakārino …pe…\ntadadhipateyyā, tepi yaññapathe appamattā.\nYepi yaññaṁ abhisaṅkharonti cīvarapiṇḍapātasenāsanagilānapaccayabhesajjaparikkhāraṁ annaṁ pānaṁ …pe…\nseyyāvasathapadīpeyyaṁ sakkaccakārino …pe…\ntadadhipateyyā, tepi yaññapathe appamattā.\nYepi yaññaṁ denti yajanti pariccajanti cīvarapiṇḍapātasenāsanagilānapaccayabhesajjaparikkhāraṁ annaṁ pānaṁ …pe…\nseyyāvasathapadīpeyyaṁ sakkaccakārino …pe…\ntadadhipateyyā, tepi yaññapathe appamattāti—\nkaccisu te bhagavā yaññapathe appamattā."}},{"id":"cnd7:37","sourceIds":["cnd7:37.1","cnd7:37.2","cnd7:37.3"],"kind":"text","text":{"pi":"Atāruṁ jātiñca jarañca mārisāti jarāmaraṇaṁ atariṁsu uttariṁsu patariṁsu samatikkamiṁsu vītivattiṁsu.\nMārisāti piyavacanaṁ garuvacanaṁ sagāravasappatissādhivacanametaṁ mārisāti—\natāru jātiñca jarañca mārisa."}},{"id":"cnd7:38","sourceIds":["cnd7:38.1","cnd7:38.2","cnd7:38.3","cnd7:38.4","cnd7:38.5","cnd7:38.6","cnd7:38.7","cnd7:38.8"],"kind":"text","text":{"pi":"Pucchāmi taṁ bhagavā brūhi metanti.\nPucchāmi tanti pucchāmi taṁ yācāmi taṁ ajjhesāmi taṁ pasādemi taṁ kathayassu meti—\npucchāmi taṁ.\nBhagavāti gāravādhivacanaṁ …pe… sacchikā paññatti—\nyadidaṁ bhagavāti.\nBrūhi metanti brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\npucchāmi taṁ bhagavā brūhi metaṁ.\nTenāha so brāhmaṇo—"}},{"id":"cnd7:39","sourceIds":["cnd7:39.1","cnd7:39.2","cnd7:39.3","cnd7:39.4","cnd7:39.5","cnd7:39.6","cnd7:39.7"],"kind":"text","text":{"pi":"“Ye kecime isayo manujā,\n(iccāyasmā puṇṇako)\nKhattiyā brāhmaṇā devatānaṁ;\nYaññamakappayiṁsu puthūdha loke,\nKaccisu te bhagavā yaññapathe appamattā;\nAtāruṁ jātiñca jarañca mārisa,\nPucchāmi taṁ bhagavā brūhi metan”ti."}},{"id":"cnd7:40","sourceIds":["cnd7:40.1","cnd7:40.2","cnd7:40.3","cnd7:40.4","cnd7:40.5"],"kind":"text","text":{"pi":"Āsīsanti thomayanti abhijappanti juhanti,\n(puṇṇakāti bhagavā)\nKāmābhijappanti paṭicca lābhaṁ;\nTe yājayogā bhavarāgarattā,\nNātariṁsu jātijaranti brūmi."}},{"id":"cnd7:41","sourceIds":["cnd7:41.1","cnd7:41.2","cnd7:41.3","cnd7:41.4"],"kind":"text","text":{"pi":"Āsīsanti thomayanti abhijappanti juhantīti.\nĀsīsantīti rūpapaṭilābhaṁ āsīsanti, saddapaṭilābhaṁ āsīsanti, gandhapaṭilābhaṁ āsīsanti, rasapaṭilābhaṁ āsīsanti, phoṭṭhabbapaṭilābhaṁ āsīsanti, puttapaṭilābhaṁ āsīsanti, dārapaṭilābhaṁ āsīsanti, dhanapaṭilābhaṁ āsīsanti, yasapaṭilābhaṁ āsīsanti, issariyapaṭilābhaṁ āsīsanti, khattiyamahāsālakule attabhāvapaṭilābhaṁ āsīsanti, brāhmaṇamahāsālakule …pe…\ngahapatimahāsālakule attabhāvapaṭilābhaṁ āsīsanti, cātumahārājikesu devesu …pe… brahmakāyikesu devesu attabhāvapaṭilābhaṁ āsīsanti icchanti sādiyanti patthayanti pihayantīti—\nāsīsanti."}},{"id":"cnd7:42","sourceIds":["cnd7:42.1","cnd7:42.2","cnd7:42.3","cnd7:42.4","cnd7:42.5"],"kind":"text","text":{"pi":"Thomayantīti yaññaṁ vā thomenti phalaṁ vā thomenti dakkhiṇeyye vā thomenti.\nKathaṁ yaññaṁ thomenti?\nSuciṁ dinnaṁ, manāpaṁ dinnaṁ, paṇītaṁ dinnaṁ, kālena dinnaṁ, kappiyaṁ dinnaṁ, viceyya dinnaṁ, anavajjaṁ dinnaṁ, abhiṇhaṁ dinnaṁ dadaṁ cittaṁ pasāditanti—\nthomenti kittenti vaṇṇenti pasaṁsanti.\nEvaṁ yaññaṁ thomenti."}},{"id":"cnd7:43","sourceIds":["cnd7:43.1","cnd7:43.2","cnd7:43.3","cnd7:43.4","cnd7:43.5"],"kind":"text","text":{"pi":"Kathaṁ phalaṁ thomenti?\nItonidānaṁ rūpapaṭilābho bhavissati …pe…\nbrahmakāyikesu devesu attabhāvapaṭilābho bhavissatīti—\nthomenti kittenti vaṇṇenti pasaṁsanti.\nEvaṁ phalaṁ thomenti."}},{"id":"cnd7:44","sourceIds":["cnd7:44.1","cnd7:44.2","cnd7:44.3","cnd7:44.4","cnd7:44.5"],"kind":"text","text":{"pi":"Kathaṁ dakkhiṇeyye thomenti?\nDakkhiṇeyyā jātisampannā gottasampannā ajjhāyakā mantadharā tiṇṇaṁ vedānaṁ pāragū sanighaṇḍukeṭubhānaṁ sākkharappabhedānaṁ itihāsapañcamānaṁ padakā veyyākaraṇā lokāyatamahāpurisalakkhaṇesu anavayāti, vītarāgā vā rāgavinayāya vā paṭipannā, vītadosā vā dosavinayāya vā paṭipannā, vītamohā vā mohavinayāya vā paṭipannā, saddhāsampannā sīlasampannā samādhisampannā paññāsampannā vimuttisampannā vimuttiñāṇadassanasampannāti—\nthomenti kittenti vaṇṇenti pasaṁsanti.\nEvaṁ dakkhiṇeyye thomentīti—\nāsīsanti thomayanti."}},{"id":"cnd7:45","sourceIds":["cnd7:45.1","cnd7:45.2","cnd7:45.3","cnd7:45.4","cnd7:45.5"],"kind":"text","text":{"pi":"Abhijappantīti rūpapaṭilābhaṁ abhijappanti, saddapaṭilābhaṁ abhijappanti, gandhapaṭilābhaṁ abhijappanti, rasapaṭilābhaṁ abhijappanti …pe…\nbrahmakāyikesu devesu attabhāvapaṭilābhaṁ abhijappantīti—\nāsīsanti thomayanti abhijappanti.\nJuhantīti juhanti denti yajanti pariccajanti cīvarapiṇḍapātasenāsanagilānapaccayabhesajjaparikkhāraṁ annaṁ pānaṁ vatthaṁ yānaṁ mālāgandhavilepanaṁ seyyāvasathapadīpeyyanti—\nāsīsanti thomayanti abhijappanti juhanti puṇṇakāti bhagavā."}},{"id":"cnd7:46","sourceIds":["cnd7:46.1","cnd7:46.2","cnd7:46.3"],"kind":"text","text":{"pi":"Kāmābhijappanti paṭicca lābhanti rūpapaṭilābhaṁ paṭicca kāme abhijappanti, saddapaṭilābhaṁ paṭicca kāme abhijappanti …pe…\nbrahmakāyikesu devesu attabhāvapaṭilābhaṁ paṭicca kāme abhijappanti pajappantīti—\nkāmābhijappanti paṭicca lābhaṁ."}},{"id":"cnd7:47","sourceIds":["cnd7:47.1","cnd7:47.2","cnd7:47.3","cnd7:47.4","cnd7:47.5","cnd7:47.6","cnd7:47.7"],"kind":"text","text":{"pi":"Te yājayogā bhavarāgarattā nātariṁsu jātijaranti brūmīti\nteti yaññayājakā vuccanti,\nyājayogāti yājayogesu yuttā payuttā āyuttā samāyuttā taccaritā tabbahulā taggarukā tanninnā tappoṇā tappabbhārā tadadhimuttā tadadhipateyyāti—\nte yājayogā,\nbhavarāgarattāti bhavarāgo vuccati yo bhavesu bhavacchando bhavarāgo bhavanandī bhavataṇhā bhavasineho bhavapariḷāho bhavamucchā bhavajjhosānaṁ.\nBhavarāgena bhavesu rattā giddhā gadhitā mucchitā ajjhosannā laggā laggitā palibuddhāti—\nte yājayogā bhavarāgarattā."}},{"id":"cnd7:48","sourceIds":["cnd7:48.1","cnd7:48.2","cnd7:48.3","cnd7:48.4","cnd7:48.5"],"kind":"text","text":{"pi":"Nātariṁsu jātijaranti brūmīti te yājayogā bhavarāgarattā jātijarāmaraṇaṁ nātariṁsu na uttariṁsu na patariṁsu na samatikkamiṁsu na vītivattiṁsu, jātijarāmaraṇā anikkhantā anissaṭā anatikkantā asamatikkantā avītivattā antojātijarāmaraṇe parivattanti antosaṁsārapathe parivattanti.\nJātiyā anugatā jarāya anusaṭā byādhinā abhibhūtā maraṇena abbhāhatā atāṇā aleṇā asaraṇā asaraṇībhūtāti;\nbrūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\nte yājayogā bhavarāgarattā nātariṁsu jātijaranti brūmi.\nTenāha bhagavā—"}},{"id":"cnd7:49","sourceIds":["cnd7:49.1","cnd7:49.2","cnd7:49.3","cnd7:49.4","cnd7:49.5"],"kind":"text","text":{"pi":"“Āsīsanti thomayanti abhijappanti juhanti,\n(puṇṇakāti bhagavā)\nKāmābhijappanti paṭicca lābhaṁ;\nTe yājayogā bhavarāgarattā,\nNātariṁsu jātijaranti brūmī”ti."}},{"id":"cnd7:50","sourceIds":["cnd7:50.1","cnd7:50.2","cnd7:50.3","cnd7:50.4","cnd7:50.5","cnd7:50.6"],"kind":"text","text":{"pi":"Te ce nātariṁsu yājayogā,\n(iccāyasmā puṇṇako)\nYaññehi jātiñca jarañca mārisa;\nAtha ko carahi devamanussaloke,\nAtāri jātiñca jarañca mārisa;\nPucchāmi taṁ bhagavā brūhi metaṁ."}},{"id":"cnd7:51","sourceIds":["cnd7:51.1","cnd7:51.2","cnd7:51.3"],"kind":"text","text":{"pi":"Te ce nātariṁsu yājayogāti te yaññayājakā yājayogā bhavarāgarattā jātijarāmaraṇaṁ nātariṁsu na uttariṁsu na patariṁsu na samatikkamiṁsu na vītivattiṁsu, jātijarāmaraṇā anikkhantā anissaṭā anatikkantā asamatikkantā avītivattā antojātijarāmaraṇe parivattanti antosaṁsārapathe parivattanti.\nJātiyā anugatā jarāya anusaṭā byādhinā abhibhūtā maraṇena abbhāhatā atāṇā aleṇā asaraṇā asaraṇībhūtāti—\nte ce nātariṁsu yājayogā."}},{"id":"cnd7:52","sourceIds":["cnd7:52.1","cnd7:52.2","cnd7:52.3"],"kind":"text","text":{"pi":"Iccāyasmā puṇṇakoti.\nIccāti padasandhi …pe…\nāyasmā puṇṇako."}},{"id":"cnd7:53","sourceIds":["cnd7:53.1","cnd7:53.2","cnd7:53.3","cnd7:53.4"],"kind":"text","text":{"pi":"Yaññehi jātiñca jarañca mārisāti.\nYaññehīti yaññehi pahūtehi yaññehi vividhehi yaññehi puthūhi.\nMārisāti piyavacanaṁ garuvacanaṁ sagāravasappatissādhivacanametaṁ mārisāti—\nyaññehi jātiñca jarañca mārisa."}},{"id":"cnd7:54","sourceIds":["cnd7:54.1","cnd7:54.2","cnd7:54.3"],"kind":"text","text":{"pi":"Atha ko carahi devamanussaloke, atāri jātiñca jarañca mārisāti atha ko eso sadevake loke samārake sabrahmake sassamaṇabrāhmaṇiyā pajāya sadevamanussāya jātijarāmaraṇaṁ atari uttari patari samatikkami vītivattayi.\nMārisāti piyavacanaṁ garuvacanaṁ sagāravasappatissādhivacanametaṁ mārisāti—\natha ko carahi devamanussaloke, atāri jātiñca jarañca mārisa."}},{"id":"cnd7:55","sourceIds":["cnd7:55.1","cnd7:55.2","cnd7:55.3","cnd7:55.4","cnd7:55.5","cnd7:55.6","cnd7:55.7","cnd7:55.8"],"kind":"text","text":{"pi":"Pucchāmi taṁ bhagavā brūhi metanti.\nPucchāmi tanti pucchāmi taṁ yācāmi taṁ ajjhesāmi taṁ pasādemi taṁ kathayassu metanti—\npucchāmi taṁ.\nBhagavāti gāravādhivacanaṁ …pe… sacchikā paññatti—\nyadidaṁ bhagavāti.\nBrūhi metanti brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti—\npucchāmi taṁ bhagavā brūhi metaṁ.\nTenāha so brāhmaṇo—"}},{"id":"cnd7:56","sourceIds":["cnd7:56.1","cnd7:56.2","cnd7:56.3","cnd7:56.4","cnd7:56.5","cnd7:56.6"],"kind":"text","text":{"pi":"“Te ce nātariṁsu yājayogā,\n(iccāyasmā puṇṇako)\nYaññehi jātiñca jarañca mārisa;\nAtha ko carahi devamanussaloke,\nAtāri jātiñca jarañca mārisa;\nPucchāmi taṁ bhagavā brūhi metan”ti."}},{"id":"cnd7:57","sourceIds":["cnd7:57.1","cnd7:57.2","cnd7:57.3","cnd7:57.4","cnd7:57.5"],"kind":"text","text":{"pi":"Saṅkhāya lokasmi paroparāni,\n(puṇṇakāti bhagavā)\nYassiñjitaṁ natthi kuhiñci loke;\nSanto vidhūmo anīgho nirāso,\nAtāri so jātijaranti brūmi."}},{"id":"cnd7:58","sourceIds":["cnd7:58.1","cnd7:58.2","cnd7:58.3","cnd7:58.4","cnd7:58.5","cnd7:58.6","cnd7:58.7","cnd7:58.8","cnd7:58.9","cnd7:58.10","cnd7:58.11","cnd7:58.12","cnd7:58.13","cnd7:58.14","cnd7:58.15","cnd7:58.16","cnd7:58.17"],"kind":"text","text":{"pi":"Saṅkhāya lokasmi paroparānīti saṅkhā vuccati ñāṇaṁ yā paññā pajānanā …pe… amoho dhammavicayo sammādiṭṭhi.\nParoparānīti\noraṁ vuccati sakattabhāvo,\nparaṁ vuccati parattabhāvo\noraṁ vuccati sakarūpavedanāsaññāsaṅkhāraviññāṇaṁ, paraṁ vuccati pararūpavedanāsaññāsaṅkhāraviññāṇaṁ;\noraṁ vuccati cha ajjhattikāni āyatanāni, paraṁ vuccati cha bāhirāni āyatanāni.\nOraṁ vuccati manussaloko, paraṁ vuccati devaloko;\noraṁ vuccati kāmadhātu, paraṁ vuccati rūpadhātu arūpadhātu;\noraṁ vuccati kāmadhātu rūpadhātu, paraṁ vuccati arūpadhātu.\nSaṅkhāya lokasmi paroparānīti paroparāni aniccato saṅkhāya dukkhato rogato gaṇḍato …pe…\nnissaraṇato saṅkhāya jānitvā tulayitvā tīrayitvā vibhāvayitvā vibhūtaṁ katvāti—\nsaṅkhāya lokasmi paroparāni.\nPuṇṇakāti bhagavāti.\nPuṇṇakāti bhagavā taṁ brāhmaṇaṁ nāmena ālapati.\nBhagavāti gāravādhivacanametaṁ …pe…\nyadidaṁ bhagavāti—\npuṇṇakāti bhagavā."}},{"id":"cnd7:59","sourceIds":["cnd7:59.1","cnd7:59.2","cnd7:59.3","cnd7:59.4","cnd7:59.5","cnd7:59.6","cnd7:59.7"],"kind":"text","text":{"pi":"Yassiñjitaṁ natthi kuhiñci loketi.\nYassāti arahato khīṇāsavassa.\nIñjitanti taṇhiñjitaṁ diṭṭhiñjitaṁ māniñjitaṁ kilesiñjitaṁ kāmiñjitaṁ.\nYassime iñjitā natthi na santi na saṁvijjanti nupalabbhanti, pahīnā samucchinnā vūpasantā paṭipassaddhā abhabbuppattikā ñāṇagginā daḍḍhā.\nKuhiñcīti kuhiñci kismiñci katthaci ajjhattaṁ vā bahiddhā vā ajjhattabahiddhā vā.\nLoketi apāyaloke …pe… āyatanaloketi—\nyassiñjitaṁ natthi kuhiñci loke."}},{"id":"cnd7:60","sourceIds":["cnd7:60.1","cnd7:60.2","cnd7:60.3","cnd7:60.4","cnd7:60.5"],"kind":"text","text":{"pi":"Santo vidhūmo anīgho nirāso, atāri so jātijaranti brūmīti.\nSantoti rāgassa santattā santo, dosassa …pe… mohassa … kodhassa … upanāhassa … makkhassa … sabbākusalābhisaṅkhārānaṁ santattā samitattā vūpasamitattā vijjhātattā nibbutattā vigatattā paṭipassaddhattā santo upasanto vūpasanto nibbuto paṭipassaddhoti santo;\nvidhūmoti kāyaduccaritaṁ vidhūmitaṁ vidhamitaṁ sositaṁ visositaṁ byantīkataṁ, vacīduccaritaṁ …pe…\nmanoduccaritaṁ vidhūmitaṁ vidhamitaṁ sositaṁ visositaṁ byantīkataṁ, rāgo … doso … moho vidhūmito vidhamito sosito visosito byantīkato, kodho … upanāho … makkho … paḷāso … issā … macchariyaṁ … māyā … sāṭheyyaṁ … thambho … sārambho … māno … atimāno … mado … pamādo … sabbe kilesā sabbe duccaritā sabbe darathā sabbe pariḷāhā sabbe santāpā sabbākusalābhisaṅkhārā vidhūmitā vidhamitā sositā visositā byantīkatā.\nAtha vā kodho vuccati dhūmo—"}},{"id":"cnd7:61","sourceIds":["cnd7:61.1","cnd7:61.2","cnd7:61.3","cnd7:61.4"],"kind":"text","text":{"pi":"Māno hi te brāhmaṇa khāribhāro,\nKodho dhūmo bhasmani mosavajjaṁ;\nJivhā sujā hadayaṁ jotiṭṭhānaṁ,\nAttā sudanto purisassa joti."}},{"id":"cnd7:62","sourceIds":["cnd7:62.1","cnd7:62.2","cnd7:62.3","cnd7:62.4"],"kind":"text","text":{"pi":"Api ca dasahākārehi kodho jāyati—\nanatthaṁ me acarīti kodho jāyati, anatthaṁ me caratīti kodho jāyati, anatthaṁ me carissatīti kodho jāyati, piyassa me manāpassa anatthaṁ acari, anatthaṁ carati, anatthaṁ carissatīti kodho jāyati, appiyassa me amanāpassa atthaṁ acari, atthaṁ carati, atthaṁ carissatīti kodho jāyati, aṭṭhāne vā pana kodho jāyati.\nYo evarūpo cittassa āghāto paṭighāto paṭighaṁ paṭivirodho kopo pakopo sampakopo doso padoso sampadoso cittassa byāpatti manopadoso kodho kujjhanā kujjhitattaṁ doso dussanā dussitattaṁ byāpatti byāpajjanā byāpajjitattaṁ virodho paṭivirodho caṇḍikkaṁ asuropo anattamanatā cittassa—\nayaṁ vuccati kodho."}},{"id":"cnd7:63","sourceIds":["cnd7:63.1","cnd7:63.2","cnd7:63.3","cnd7:63.4","cnd7:63.5","cnd7:63.6","cnd7:63.7","cnd7:63.8","cnd7:63.9","cnd7:63.10","cnd7:63.11","cnd7:63.12","cnd7:63.13","cnd7:63.14","cnd7:63.15","cnd7:63.16"],"kind":"text","text":{"pi":"Api ca kodhassa adhimattaparittatā veditabbā.\nAtthi kañci kālaṁ kodho cittāvilakaraṇamatto hoti, na ca tāva mukhakulānavikulāno hoti.\nAtthi kañci kālaṁ kodho mukhakulānavikulānamatto hoti, na ca tāva hanusañcopano hoti.\nAtthi kañci kālaṁ kodho hanusañcopanamatto hoti, na ca tāva pharusavācaṁ nicchāraṇo hoti.\nAtthi kañci kālaṁ kodho pharusavācaṁ nicchāraṇamatto hoti, na ca tāva disāvidisānuvilokano hoti.\nAtthi kañci kālaṁ kodho disāvidisānuvilokanamatto hoti, na ca tāva daṇḍasatthaparāmasano hoti.\nAtthi kañci kālaṁ kodho daṇḍasatthaparāmasanamatto hoti, na ca tāva daṇḍasatthaabbhukkiraṇo hoti.\nAtthi kañci kālaṁ kodho daṇḍasatthaabbhukkiraṇamatto hoti, na ca tāva daṇḍasatthaabhinipātano hoti.\nAtthi kañci kālaṁ kodho daṇḍasatthaabhinipātanamatto hoti, na ca tāva chinnavicchinnakaraṇo hoti.\nAtthi kañci kālaṁ kodho chinnavicchinnakaraṇamatto hoti, na ca tāva sambhañjanapalibhañjano hoti.\nAtthi kañci kālaṁ kodho sambhañjanapalibhañjanamatto hoti, na ca tāva aṅgamaṅgaapakaḍḍhano hoti.\nAtthi kañci kālaṁ kodho aṅgamaṅgaapakaḍḍhanamatto hoti, na ca tāva jīvitāvoropano hoti.\nAtthi kañci kālaṁ kodho jīvitāvoropanamatto hoti, na ca tāva sabbacāgapariccāgāya saṇṭhito hoti.\nYato kodho paraṁ puggalaṁ ghātetvā attānaṁ ghāteti, ettāvatā kodho paramussadagato paramavepullapatto hoti.\nYassa so hoti kodho pahīno samucchinno vūpasanto paṭipassaddho abhabbuppattiko ñāṇagginā daḍḍho, so vuccati—\nvidhūmo."}},{"id":"cnd7:64","sourceIds":["cnd7:64.1"],"kind":"text","text":{"pi":"Kodhassa pahīnattā vidhūmo, kodhavatthussa pariññātattā vidhūmo, kodhahetussa pariññātattā vidhūmo, kodhahetussa upacchinnattā vidhūmo."}},{"id":"cnd7:65","sourceIds":["cnd7:65.1","cnd7:65.2"],"kind":"text","text":{"pi":"Anīghoti rāgo nīgho, doso nīgho, moho nīgho, kodho nīgho, upanāho nīgho …pe… sabbākusalābhisaṅkhārā nīghā.\nYassete nīghā pahīnā samucchinnā vūpasantā paṭipassaddhā abhabbuppattikā ñāṇagginā daḍḍhā, so vuccati anīgho."}},{"id":"cnd7:66","sourceIds":["cnd7:66.1","cnd7:66.2","cnd7:66.3","cnd7:66.4","cnd7:66.5","cnd7:66.6","cnd7:66.7","cnd7:66.8"],"kind":"text","text":{"pi":"Nirāsoti āsā vuccati taṇhā.\nYo rāgo sārāgo …pe… abhijjhā lobho akusalamūlaṁ.\nYassesā āsā taṇhā pahīnā samucchinnā vūpasantā paṭipassaddhā abhabbuppattikā ñāṇagginā daḍḍhā, so vuccati nirāso.\nJātīti yā tesaṁ tesaṁ sattānaṁ tamhi tamhi sattanikāye jāti sañjāti okkanti abhinibbatti khandhānaṁ pātubhāvo āyatanānaṁ paṭilābho.\nJarāti yā tesaṁ tesaṁ sattānaṁ tamhi tamhi sattanikāye jarā jīraṇatā khaṇḍiccaṁ pāliccaṁ valittacatā āyuno saṁhāni indriyānaṁ paripāko.\nSanto vidhūmo anīgho nirāso, atāri so jātijaranti brūmīti yo santo ca vidhūmo ca anīgho ca nirāso ca, so jātijarāmaraṇaṁ atari uttari patari samatikkami vītivattayīti brūmi ācikkhāmi desemi paññapemi paṭṭhapemi vivarāmi vibhajāmi uttānīkaromi pakāsemīti—\nsanto vidhūmo anīgho nirāso, atāri so jātijaranti brūmi.\nTenāha bhagavā—"}},{"id":"cnd7:67","sourceIds":["cnd7:67.1","cnd7:67.2","cnd7:67.3","cnd7:67.4","cnd7:67.5"],"kind":"text","text":{"pi":"“Saṅkhāya lokasmi paroparāni,\n(puṇṇakāti bhagavā)\nYassiñjitaṁ natthi kuhiñci loke;\nSanto vidhūmo anīgho nirāso,\nAtāri so jātijaranti brūmī”ti."}},{"id":"cnd7:68","sourceIds":["cnd7:68.1","cnd7:68.2","cnd7:68.3","cnd7:68.4"],"kind":"text","text":{"pi":"Sahagāthāpariyosānā …pe…\npañjaliko bhagavantaṁ namassamāno nisinno hoti—\n“satthā me, bhante, bhagavā, sāvakohamasmī”ti.\nPuṇṇakamāṇavapucchāniddeso tatiyo."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/cnd7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}