{"id":"ds2.1.10","title":"2.1.10. Ahetukakiriyāabyākata","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ds2.1.10","title":"2.1.10. Ahetukakiriyāabyākata","units":[{"id":"ds2.1.10:0","sourceIds":["ds2.1.10:0.1","ds2.1.10:0.2","ds2.1.10:0.3","ds2.1.10:0.4"],"kind":"text","text":{"pi":"Dhammasaṅgaṇī\n2 Niddesa\n2.1 Cittuppādakaṇḍa\n2.1.10. Ahetukakiriyāabyākata"}},{"id":"ds2.1.10:1","sourceIds":["ds2.1.10:1.0","ds2.1.10:1.1","ds2.1.10:1.2","ds2.1.10:1.3","ds2.1.10:1.4","ds2.1.10:1.5"],"kind":"text","text":{"pi":"2.1.10.1. Kiriyāmanodhātu\nKatame dhammā abyākatā?\nYasmiṁ samaye manodhātu uppannā hoti kiriyā neva kusalā nākusalā na ca kammavipākā upekkhāsahagatā rūpārammaṇā vā …pe…\nphoṭṭhabbārammaṇā vā yaṁ yaṁ vā panārabbha, tasmiṁ samaye phasso hoti, vedanā hoti, saññā hoti, cetanā hoti, cittaṁ hoti, vitakko hoti, vicāro hoti, upekkhā hoti, cittassekaggatā hoti, manindriyaṁ hoti, upekkhindriyaṁ hoti, jīvitindriyaṁ hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.10:2","sourceIds":["ds2.1.10:2.1","ds2.1.10:2.2","ds2.1.10:2.3"],"kind":"text","text":{"pi":"Tasmiṁ kho pana samaye cattāro khandhā honti, dvāyatanāni honti, dve dhātuyo honti, tayo āhārā honti, tīṇindriyāni honti, eko phasso hoti …pe… ekā manodhātu hoti, ekaṁ dhammāyatanaṁ hoti, ekā dhammadhātu hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.10:3","sourceIds":["ds2.1.10:3.1","ds2.1.10:3.2","ds2.1.10:3.3","ds2.1.10:3.4","ds2.1.10:3.5","ds2.1.10:3.6"],"kind":"text","text":{"pi":"Katamo tasmiṁ samaye saṅkhārakkhandho hoti?\nPhasso cetanā vitakko vicāro cittassekaggatā jīvitindriyaṁ;\nye vā pana tasmiṁ samaye aññepi atthi paṭiccasamuppannā arūpino dhammā ṭhapetvā vedanākkhandhaṁ ṭhapetvā saññākkhandhaṁ ṭhapetvā viññāṇakkhandhaṁ—\nayaṁ tasmiṁ samaye saṅkhārakkhandho hoti …pe…\nime dhammā abyākatā.\nKiriyā manodhātu."}},{"id":"ds2.1.10:4","sourceIds":["ds2.1.10:4.0","ds2.1.10:4.1","ds2.1.10:4.2","ds2.1.10:4.3","ds2.1.10:4.4","ds2.1.10:4.5"],"kind":"text","text":{"pi":"2.1.10.2. Kiriyāmanoviññāṇadhātusomanassasahagata\nKatame dhammā abyākatā?\nYasmiṁ samaye manoviññāṇadhātu uppannā hoti kiriyā neva kusalā nākusalā na ca kammavipākā somanassasahagatā rūpārammaṇā vā …pe…\ndhammārammaṇā vā yaṁ yaṁ vā panārabbha, tasmiṁ samaye phasso hoti, vedanā hoti, saññā hoti, cetanā hoti, cittaṁ hoti, vitakko hoti, vicāro hoti, pīti hoti, sukhaṁ hoti, cittassekaggatā hoti, vīriyindriyaṁ hoti, samādhindriyaṁ hoti, manindriyaṁ hoti, somanassindriyaṁ hoti, jīvitindriyaṁ hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā."}},{"id":"ds2.1.10:5","sourceIds":["ds2.1.10:5.1","ds2.1.10:5.2","ds2.1.10:5.3"],"kind":"text","text":{"pi":"Katamo tasmiṁ samaye phasso hoti?\nYo tasmiṁ samaye phasso phusanā samphusanā samphusitattaṁ—\nayaṁ tasmiṁ samaye phasso hoti …pe…."}},{"id":"ds2.1.10:6","sourceIds":["ds2.1.10:6.1","ds2.1.10:6.2","ds2.1.10:6.3"],"kind":"text","text":{"pi":"Katamā tasmiṁ samaye cittassekaggatā hoti?\nYā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ—\nayaṁ tasmiṁ samaye cittassekaggatā hoti."}},{"id":"ds2.1.10:7","sourceIds":["ds2.1.10:7.1","ds2.1.10:7.2","ds2.1.10:7.3"],"kind":"text","text":{"pi":"Katamaṁ tasmiṁ samaye vīriyindriyaṁ hoti?\nYo tasmiṁ samaye cetasiko vīriyārambho nikkamo parakkamo uyyāmo vāyāmo ussāho ussoḷhī thāmo dhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ—\nidaṁ tasmiṁ samaye vīriyindriyaṁ hoti."}},{"id":"ds2.1.10:8","sourceIds":["ds2.1.10:8.1","ds2.1.10:8.2","ds2.1.10:8.3","ds2.1.10:8.4","ds2.1.10:8.5"],"kind":"text","text":{"pi":"Katamaṁ tasmiṁ samaye samādhindriyaṁ hoti?\nYā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ—\nidaṁ tasmiṁ samaye samādhindriyaṁ hoti …pe…\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā."}},{"id":"ds2.1.10:9","sourceIds":["ds2.1.10:9.1","ds2.1.10:9.2","ds2.1.10:9.3"],"kind":"text","text":{"pi":"Tasmiṁ kho pana samaye cattāro khandhā honti, dvāyatanāni honti, dve dhātuyo honti, tayo āhārā honti, pañcindriyāni honti, eko phasso hoti …pe… ekā manoviññāṇadhātu hoti, ekaṁ dhammāyatanaṁ hoti, ekā dhammadhātu hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.10:10","sourceIds":["ds2.1.10:10.1","ds2.1.10:10.2","ds2.1.10:10.3","ds2.1.10:10.4","ds2.1.10:10.5","ds2.1.10:10.6"],"kind":"text","text":{"pi":"Katamo tasmiṁ samaye saṅkhārakkhandho hoti?\nPhasso cetanā vitakko vicāro pīti cittassekaggatā vīriyindriyaṁ samādhindriyaṁ jīvitindriyaṁ;\nye vā pana tasmiṁ samaye aññepi atthi paṭiccasamuppannā arūpino dhammā ṭhapetvā vedanākkhandhaṁ ṭhapetvā saññākkhandhaṁ ṭhapetvā viññāṇakkhandhaṁ—\nayaṁ tasmiṁ samaye saṅkhārakkhandho hoti …pe…\nime dhammā abyākatā.\nKiriyā manoviññāṇadhātu somanassasahagatā."}},{"id":"ds2.1.10:11","sourceIds":["ds2.1.10:11.0","ds2.1.10:11.1","ds2.1.10:11.2","ds2.1.10:11.3","ds2.1.10:11.4","ds2.1.10:11.5"],"kind":"text","text":{"pi":"2.1.10.3. Kiriyāmanoviññāṇadhātuupekkhāsahagata\nKatame dhammā abyākatā?\nYasmiṁ samaye manoviññāṇadhātu uppannā hoti kiriyā neva kusalā nākusalā na ca kammavipākā upekkhāsahagatā rūpārammaṇā vā …pe…\ndhammārammaṇā vā yaṁ yaṁ vā panārabbha, tasmiṁ samaye phasso hoti, vedanā hoti, saññā hoti, cetanā hoti, cittaṁ hoti, vitakko hoti, vicāro hoti, upekkhā hoti, cittassekaggatā hoti, vīriyindriyaṁ hoti, samādhindriyaṁ hoti manindriyaṁ hoti, upekkhindriyaṁ hoti, jīvitindriyaṁ hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.10:12","sourceIds":["ds2.1.10:12.1","ds2.1.10:12.2","ds2.1.10:12.3"],"kind":"text","text":{"pi":"Tasmiṁ kho pana samaye cattāro khandhā honti, dvāyatanāni honti, dve dhātuyo honti, tayo āhārā honti, pañcindriyāni honti, eko phasso hoti …pe… ekā manoviññāṇadhātu hoti, ekaṁ dhammāyatanaṁ hoti, ekā dhammadhātu hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.10:13","sourceIds":["ds2.1.10:13.1","ds2.1.10:13.2","ds2.1.10:13.3","ds2.1.10:13.4","ds2.1.10:13.5","ds2.1.10:13.6","ds2.1.10:13.7"],"kind":"text","text":{"pi":"Katamo tasmiṁ samaye saṅkhārakkhandho hoti?\nPhasso cetanā vitakko vicāro cittassekaggatā vīriyindriyaṁ samādhindriyaṁ jīvitindriyaṁ;\nye vā pana tasmiṁ samaye aññepi atthi paṭiccasamuppannā arūpino dhammā ṭhapetvā vedanākkhandhaṁ ṭhapetvā saññākkhandhaṁ ṭhapetvā viññāṇakkhandhaṁ—\nayaṁ tasmiṁ samaye saṅkhārakkhandho hoti …pe…\nime dhammā abyākatā.\nKiriyā manoviññāṇadhātu upekkhāsahagatā.\nAhetukā kiriyā abyākatā."}},{"id":"ds2.1.10:14","sourceIds":["ds2.1.10:14.0","ds2.1.10:14.1","ds2.1.10:14.2","ds2.1.10:14.3","ds2.1.10:14.4","ds2.1.10:14.5","ds2.1.10:14.6","ds2.1.10:14.7","ds2.1.10:14.8","ds2.1.10:14.9","ds2.1.10:14.10","ds2.1.10:14.11","ds2.1.10:14.12","ds2.1.10:14.13","ds2.1.10:14.14","ds2.1.10:14.15"],"kind":"text","text":{"pi":"2.1.10.4. Sahetukakāmāvacarakiriyā\nKatame dhammā abyākatā?\nYasmiṁ samaye manoviññāṇadhātu uppannā hoti kiriyā neva kusalā nākusalā na ca kammavipākā somanassasahagatā ñāṇasampayuttā …pe…\nsomanassasahagatā ñāṇasampayuttā sasaṅkhārena …pe…\nsomanassasahagatā ñāṇavippayuttā …pe…\nsomanassasahagatā ñāṇavippayuttā sasaṅkhārena …pe…\nupekkhāsahagatā ñāṇasampayuttā …pe…\nupekkhāsahagatā ñāṇasampayuttā sasaṅkhārena …pe…\nupekkhāsahagatā ñāṇavippayuttā …pe…\nupekkhāsahagatā ñāṇavippayuttā sasaṅkhārena rūpārammaṇā vā …pe…\ndhammārammaṇā vā yaṁ yaṁ vā panārabbha, tasmiṁ samaye phasso hoti …pe… avikkhepo hoti …pe…\nime dhammā abyākatā …pe…\nalobho abyākatamūlaṁ …pe…\nadoso abyākatamūlaṁ …pe…\nime dhammā abyākatā.\nSahetukā kāmāvacarakiriyā."}},{"id":"ds2.1.10:15","sourceIds":["ds2.1.10:15.0","ds2.1.10:15.1","ds2.1.10:15.2","ds2.1.10:15.3"],"kind":"text","text":{"pi":"2.1.10.5. Rūpāvacarakiriyā\nKatame dhammā abyākatā?\nYasmiṁ samaye rūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ vivicceva kāmehi …pe… paṭhamaṁ jhānaṁ upasampajja viharati pathavīkasiṇaṁ, tasmiṁ samaye phasso hoti …pe… avikkhepo hoti …pe…\nime dhammā abyākatā."}},{"id":"ds2.1.10:16","sourceIds":["ds2.1.10:16.1","ds2.1.10:16.2","ds2.1.10:16.3","ds2.1.10:16.4","ds2.1.10:16.5","ds2.1.10:16.6","ds2.1.10:16.7","ds2.1.10:16.8"],"kind":"text","text":{"pi":"Katame dhammā abyākatā?\nYasmiṁ samaye rūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ …pe…\npaṭhamaṁ jhānaṁ …pe…\npañcamaṁ jhānaṁ upasampajja viharati pathavīkasiṇaṁ, tasmiṁ samaye phasso hoti …pe… avikkhepo hoti …pe…\nime dhammā abyākatā.\nRūpāvacarakiriyā."}},{"id":"ds2.1.10:17","sourceIds":["ds2.1.10:17.0","ds2.1.10:17.1","ds2.1.10:17.2","ds2.1.10:17.3"],"kind":"text","text":{"pi":"2.1.10.6. Arūpāvacarakiriyā\nKatame dhammā abyākatā?\nYasmiṁ samaye arūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ sabbaso rūpasaññānaṁ samatikkamā paṭighasaññānaṁ atthaṅgamā nānattasaññānaṁ amanasikārā ākāsānañcāyatanasaññāsahagataṁ sukhassa ca pahānā …pe… catutthaṁ jhānaṁ upasampajja viharati tasmiṁ samaye phasso hoti …pe… avikkhepo hoti …pe…\nime dhammā abyākatā."}},{"id":"ds2.1.10:18","sourceIds":["ds2.1.10:18.1","ds2.1.10:18.2","ds2.1.10:18.3"],"kind":"text","text":{"pi":"Katame dhammā abyākatā?\nYasmiṁ samaye arūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ sabbaso ākāsānañcāyatanaṁ samatikkamma viññāṇañcāyatanasaññāsahagataṁ sukhassa ca pahānā …pe… catutthaṁ jhānaṁ upasampajja viharati, tasmiṁ samaye phasso hoti …pe… avikkhepo hoti …pe…\nime dhammā abyākatā."}},{"id":"ds2.1.10:19","sourceIds":["ds2.1.10:19.1","ds2.1.10:19.2","ds2.1.10:19.3"],"kind":"text","text":{"pi":"Katame dhammā abyākatā?\nYasmiṁ samaye arūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ sabbaso viññāṇañcāyatanaṁ samatikkamma ākiñcaññāyatanasaññāsahagataṁ sukhassa ca pahānā …pe… catutthaṁ jhānaṁ upasampajja viharati, tasmiṁ samaye phasso hoti …pe… avikkhepo hoti …pe…\nime dhammā abyākatā."}},{"id":"ds2.1.10:20","sourceIds":["ds2.1.10:20.1","ds2.1.10:20.2","ds2.1.10:20.3","ds2.1.10:20.4","ds2.1.10:20.5","ds2.1.10:20.6","ds2.1.10:20.7","ds2.1.10:20.8","ds2.1.10:20.9","ds2.1.10:20.10"],"kind":"text","text":{"pi":"Katame dhammā abyākatā?\nYasmiṁ samaye arūpāvacaraṁ jhānaṁ bhāveti kiriyaṁ neva kusalaṁ nākusalaṁ na ca kammavipākaṁ diṭṭhadhammasukhavihāraṁ sabbaso ākiñcaññāyatanaṁ samatikkamma nevasaññānāsaññāyatanasaññāsahagataṁ sukhassa ca pahānā …pe… catutthaṁ jhānaṁ upasampajja viharati, tasmiṁ samaye phasso hoti …pe… avikkhepo hoti …pe…\nime dhammā abyākatā …pe…\nalobho abyākatamūlaṁ …pe…\nadoso abyākatamūlaṁ …pe…\namoho abyākatamūlaṁ …pe…\nime dhammā abyākatā.\nArūpāvacarakiriyā.\nKiriyā abyākatā.\nCittuppādakaṇḍaṁ niṭṭhitaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ds2.1.10/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}