{"id":"ds2.1.5","title":"2.1.5. Lokuttarakusala","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ds2.1.5","title":"2.1.5. Lokuttarakusala","units":[{"id":"ds2.1.5:0","sourceIds":["ds2.1.5:0.1","ds2.1.5:0.2","ds2.1.5:0.3","ds2.1.5:0.4"],"kind":"text","text":{"pi":"Dhammasaṅgaṇī\n2 Niddesa\n2.1 Cittuppādakaṇḍa\n2.1.5. Lokuttarakusala"}},{"id":"ds2.1.5:1","sourceIds":["ds2.1.5:1.0","ds2.1.5:1.1","ds2.1.5:1.2","ds2.1.5:1.3","ds2.1.5:1.4"],"kind":"text","text":{"pi":"2.1.5.1. Suddhikapaṭipadā\nKatame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti, vedanā hoti, saññā hoti, cetanā hoti, cittaṁ hoti, vitakko hoti, vicāro hoti, pīti hoti, sukhaṁ hoti, cittassekaggatā hoti, saddhindriyaṁ hoti, vīriyindriyaṁ hoti, satindriyaṁ hoti, samādhindriyaṁ hoti, paññindriyaṁ hoti, manindriyaṁ hoti, somanassindriyaṁ hoti, jīvitindriyaṁ hoti, anaññātaññassāmītindriyaṁ hoti, sammādiṭṭhi hoti, sammāsaṅkappo hoti, sammāvācā hoti, sammākammanto hoti, sammāājīvo hoti, sammāvāyāmo hoti, sammāsati hoti, sammāsamādhi hoti, saddhābalaṁ hoti, vīriyabalaṁ hoti, satibalaṁ hoti, samādhibalaṁ hoti, paññābalaṁ hoti, hiribalaṁ hoti, ottappabalaṁ hoti, alobho hoti, adoso hoti, amoho hoti, anabhijjhā hoti, abyāpādo hoti, sammādiṭṭhi hoti, hirī hoti, ottappaṁ hoti, kāyapassaddhi hoti, cittapassaddhi hoti, kāyalahutā hoti, cittalahutā hoti, kāyamudutā hoti, cittamudutā hoti, kāyakammaññatā hoti, cittakammaññatā hoti, kāyapāguññatā hoti, cittapāguññatā hoti, kāyujukatā hoti, cittujukatā hoti, sati hoti, sampajaññaṁ hoti, samatho hoti, vipassanā hoti, paggāho hoti, avikkhepo hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā kusalā."}},{"id":"ds2.1.5:2","sourceIds":["ds2.1.5:2.1","ds2.1.5:2.2","ds2.1.5:2.3"],"kind":"text","text":{"pi":"Katamo tasmiṁ samaye phasso hoti?\nYo tasmiṁ samaye phasso phusanā samphusanā samphusitattaṁ—\nayaṁ tasmiṁ samaye phasso hoti."}},{"id":"ds2.1.5:3","sourceIds":["ds2.1.5:3.1","ds2.1.5:3.2","ds2.1.5:3.3"],"kind":"text","text":{"pi":"Katamā tasmiṁ samaye vedanā hoti?\nYaṁ tasmiṁ samaye tajjāmanoviññāṇadhātusamphassajaṁ cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—\nayaṁ tasmiṁ samaye vedanā hoti."}},{"id":"ds2.1.5:4","sourceIds":["ds2.1.5:4.1","ds2.1.5:4.2","ds2.1.5:4.3"],"kind":"text","text":{"pi":"Katamā tasmiṁ samaye saññā hoti?\nYā tasmiṁ samaye tajjāmanoviññāṇadhātusamphassajā saññā sañjānanā sañjānitattaṁ—\nayaṁ tasmiṁ samaye saññā hoti."}},{"id":"ds2.1.5:5","sourceIds":["ds2.1.5:5.1","ds2.1.5:5.2","ds2.1.5:5.3"],"kind":"text","text":{"pi":"Katamā tasmiṁ samaye cetanā hoti?\nYā tasmiṁ samaye tajjāmanoviññāṇadhātusamphassajā cetanā sañcetanā cetayitattaṁ—\nayaṁ tasmiṁ samaye cetanā hoti."}},{"id":"ds2.1.5:6","sourceIds":["ds2.1.5:6.1","ds2.1.5:6.2","ds2.1.5:6.3"],"kind":"text","text":{"pi":"Katamaṁ tasmiṁ samaye cittaṁ hoti?\nYaṁ tasmiṁ samaye cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—\nidaṁ tasmiṁ samaye cittaṁ hoti."}},{"id":"ds2.1.5:7","sourceIds":["ds2.1.5:7.1","ds2.1.5:7.2","ds2.1.5:7.3"],"kind":"text","text":{"pi":"Katamo tasmiṁ samaye vitakko hoti?\nYo tasmiṁ samaye takko vitakko saṅkappo appanā byappanā cetaso abhiniropanā sammāsaṅkappo maggaṅgaṁ maggapariyāpannaṁ—\nayaṁ tasmiṁ samaye vitakko hoti."}},{"id":"ds2.1.5:8","sourceIds":["ds2.1.5:8.1","ds2.1.5:8.2","ds2.1.5:8.3"],"kind":"text","text":{"pi":"Katamo tasmiṁ samaye vicāro hoti?\nYo tasmiṁ samaye cāro vicāro anuvicāro upavicāro cittassa anusandhānatā anupekkhanatā—\nayaṁ tasmiṁ samaye vicāro hoti."}},{"id":"ds2.1.5:9","sourceIds":["ds2.1.5:9.1","ds2.1.5:9.2","ds2.1.5:9.3"],"kind":"text","text":{"pi":"Katamā tasmiṁ samaye pīti hoti?\nYā tasmiṁ samaye pīti pāmojjaṁ āmodanā pamodanā hāso pahāso vitti odagyaṁ attamanatā cittassa pītisambojjhaṅgo—\nayaṁ tasmiṁ samaye pīti hoti."}},{"id":"ds2.1.5:10","sourceIds":["ds2.1.5:10.1","ds2.1.5:10.2","ds2.1.5:10.3"],"kind":"text","text":{"pi":"Katamaṁ tasmiṁ samaye sukhaṁ hoti?\nYaṁ tasmiṁ samaye cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—\nidaṁ tasmiṁ samaye sukhaṁ hoti."}},{"id":"ds2.1.5:11","sourceIds":["ds2.1.5:11.1","ds2.1.5:11.2","ds2.1.5:11.3"],"kind":"text","text":{"pi":"Katamā tasmiṁ samaye cittassekaggatā hoti?\nYā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—\nayaṁ tasmiṁ samaye cittassekaggatā hoti."}},{"id":"ds2.1.5:12","sourceIds":["ds2.1.5:12.1","ds2.1.5:12.2","ds2.1.5:12.3"],"kind":"text","text":{"pi":"Katamaṁ tasmiṁ samaye saddhindriyaṁ hoti?\nYā tasmiṁ samaye saddhā saddahanā okappanā abhippasādo saddhā saddhindriyaṁ saddhābalaṁ—\nidaṁ tasmiṁ samaye saddhindriyaṁ hoti."}},{"id":"ds2.1.5:13","sourceIds":["ds2.1.5:13.1","ds2.1.5:13.2","ds2.1.5:13.3"],"kind":"text","text":{"pi":"Katamaṁ tasmiṁ samaye vīriyindriyaṁ hoti?\nYo tasmiṁ samaye cetasiko vīriyārambho nikkamo parakkamo uyyāmo vāyāmo ussāho ussoḷhī thāmo dhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ sammāvāyāmo vīriyasambojjhaṅgo maggaṅgaṁ maggapariyāpannaṁ—\nidaṁ tasmiṁ samaye vīriyindriyaṁ hoti."}},{"id":"ds2.1.5:14","sourceIds":["ds2.1.5:14.1","ds2.1.5:14.2","ds2.1.5:14.3"],"kind":"text","text":{"pi":"Katamaṁ tasmiṁ samaye satindriyaṁ hoti?\nYā tasmiṁ samaye sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati satisambojjhaṅgo maggaṅgaṁ maggapariyāpannaṁ—\nidaṁ tasmiṁ samaye satindriyaṁ hoti."}},{"id":"ds2.1.5:15","sourceIds":["ds2.1.5:15.1","ds2.1.5:15.2","ds2.1.5:15.3"],"kind":"text","text":{"pi":"Katamaṁ tasmiṁ samaye samādhindriyaṁ hoti?\nYā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—\nidaṁ tasmiṁ samaye samādhindriyaṁ hoti."}},{"id":"ds2.1.5:16","sourceIds":["ds2.1.5:16.1","ds2.1.5:16.2","ds2.1.5:16.3"],"kind":"text","text":{"pi":"Katamaṁ tasmiṁ samaye paññindriyaṁ hoti?\nYā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nidaṁ tasmiṁ samaye paññindriyaṁ hoti."}},{"id":"ds2.1.5:17","sourceIds":["ds2.1.5:17.1","ds2.1.5:17.2","ds2.1.5:17.3"],"kind":"text","text":{"pi":"Katamaṁ tasmiṁ samaye manindriyaṁ hoti?\nYaṁ tasmiṁ samaye cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—\nidaṁ tasmiṁ samaye manindriyaṁ hoti."}},{"id":"ds2.1.5:18","sourceIds":["ds2.1.5:18.1","ds2.1.5:18.2","ds2.1.5:18.3"],"kind":"text","text":{"pi":"Katamaṁ tasmiṁ samaye somanassindriyaṁ hoti?\nYaṁ tasmiṁ samaye cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—\nidaṁ tasmiṁ samaye somanassindriyaṁ hoti."}},{"id":"ds2.1.5:19","sourceIds":["ds2.1.5:19.1","ds2.1.5:19.2","ds2.1.5:19.3"],"kind":"text","text":{"pi":"Katamaṁ tasmiṁ samaye jīvitindriyaṁ hoti?\nYo tesaṁ arūpīnaṁ dhammānaṁ āyu ṭhiti yapanā yāpanā iriyanā vattanā pālanā jīvitaṁ jīvitindriyaṁ—\nidaṁ tasmiṁ samaye jīvitindriyaṁ hoti."}},{"id":"ds2.1.5:20","sourceIds":["ds2.1.5:20.1","ds2.1.5:20.2","ds2.1.5:20.3"],"kind":"text","text":{"pi":"Katamaṁ tasmiṁ samaye anaññātaññassāmītindriyaṁ hoti?\nYā tesaṁ dhammānaṁ anaññātānaṁ adiṭṭhānaṁ appattānaṁ aviditānaṁ asacchikatānaṁ sacchikiriyāya paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nidaṁ tasmiṁ samaye anaññātaññassāmītindriyaṁ hoti."}},{"id":"ds2.1.5:21","sourceIds":["ds2.1.5:21.1","ds2.1.5:21.2","ds2.1.5:21.3"],"kind":"text","text":{"pi":"Katamā tasmiṁ samaye sammādiṭṭhi hoti?\nYā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nayaṁ tasmiṁ samaye sammādiṭṭhi hoti."}},{"id":"ds2.1.5:22","sourceIds":["ds2.1.5:22.1","ds2.1.5:22.2","ds2.1.5:22.3"],"kind":"text","text":{"pi":"Katamo tasmiṁ samaye sammāsaṅkappo hoti?\nYo tasmiṁ samaye takko vitakko saṅkappo appanā byappanā cetaso abhiniropanā sammāsaṅkappo maggaṅgaṁ maggapariyāpannaṁ—\nayaṁ tasmiṁ samaye sammāsaṅkappo hoti."}},{"id":"ds2.1.5:23","sourceIds":["ds2.1.5:23.1","ds2.1.5:23.2","ds2.1.5:23.3"],"kind":"text","text":{"pi":"Katamā tasmiṁ samaye sammāvācā hoti?\nYā tasmiṁ samaye catūhi vacīduccaritehi ārati virati paṭivirati veramaṇī akiriyā akaraṇaṁ anajjhāpatti velāanatikkamo setughāto sammāvācā maggaṅgaṁ maggapariyāpannaṁ—\nayaṁ tasmiṁ samaye sammāvācā hoti."}},{"id":"ds2.1.5:24","sourceIds":["ds2.1.5:24.1","ds2.1.5:24.2","ds2.1.5:24.3"],"kind":"text","text":{"pi":"Katamo tasmiṁ samaye sammākammanto hoti?\nYā tasmiṁ samaye tīhi kāyaduccaritehi ārati virati paṭivirati veramaṇī akiriyā akaraṇaṁ anajjhāpatti velāanatikkamo setughāto sammākammanto maggaṅgaṁ maggapariyāpannaṁ—\nayaṁ tasmiṁ samaye sammākammanto hoti."}},{"id":"ds2.1.5:25","sourceIds":["ds2.1.5:25.1","ds2.1.5:25.2","ds2.1.5:25.3"],"kind":"text","text":{"pi":"Katamo tasmiṁ samaye sammāājīvo hoti?\nYā tasmiṁ samaye micchāājīvā ārati virati paṭivirati veramaṇī akiriyā akaraṇaṁ anajjhāpatti velāanatikkamo setughāto sammāājīvo maggaṅgaṁ maggapariyāpannaṁ—\nayaṁ tasmiṁ samaye sammāājīvo hoti."}},{"id":"ds2.1.5:26","sourceIds":["ds2.1.5:26.1","ds2.1.5:26.2","ds2.1.5:26.3"],"kind":"text","text":{"pi":"Katamo tasmiṁ samaye sammāvāyāmo hoti?\nYo tasmiṁ samaye cetasiko vīriyārambho nikkamo parakkamo uyyāmo vāyāmo ussāho ussoḷhī thāmo dhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ sammāvāyāmo vīriyasambojjhaṅgo maggaṅgaṁ maggapariyāpannaṁ—\nayaṁ tasmiṁ samaye sammāvāyāmo hoti."}},{"id":"ds2.1.5:27","sourceIds":["ds2.1.5:27.1","ds2.1.5:27.2","ds2.1.5:27.3"],"kind":"text","text":{"pi":"Katamā tasmiṁ samaye sammāsati hoti?\nYā tasmiṁ samaye sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati satisambojjhaṅgo maggaṅgaṁ maggapariyāpannaṁ—\nayaṁ tasmiṁ samaye sammāsati hoti."}},{"id":"ds2.1.5:28","sourceIds":["ds2.1.5:28.1","ds2.1.5:28.2","ds2.1.5:28.3"],"kind":"text","text":{"pi":"Katamo tasmiṁ samaye sammāsamādhi hoti?\nYā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—\nayaṁ tasmiṁ samaye sammāsamādhi hoti."}},{"id":"ds2.1.5:29","sourceIds":["ds2.1.5:29.1","ds2.1.5:29.2","ds2.1.5:29.3"],"kind":"text","text":{"pi":"Katamaṁ tasmiṁ samaye saddhābalaṁ hoti?\nYā tasmiṁ samaye saddhā saddahanā okappanā abhippasādo saddhā saddhindriyaṁ saddhābalaṁ—\nidaṁ tasmiṁ samaye saddhābalaṁ hoti."}},{"id":"ds2.1.5:30","sourceIds":["ds2.1.5:30.1","ds2.1.5:30.2","ds2.1.5:30.3"],"kind":"text","text":{"pi":"Katamaṁ tasmiṁ samaye vīriyabalaṁ hoti?\nYo tasmiṁ samaye cetasiko vīriyārambho nikkamo parakkamo uyyāmo vāyāmo ussāho ussoḷhī thāmo dhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ sammāvāyāmo vīriyasambojjhaṅgo maggaṅgaṁ maggapariyāpannaṁ—\nidaṁ tasmiṁ samaye vīriyabalaṁ hoti."}},{"id":"ds2.1.5:31","sourceIds":["ds2.1.5:31.1","ds2.1.5:31.2","ds2.1.5:31.3"],"kind":"text","text":{"pi":"Katamaṁ tasmiṁ samaye satibalaṁ hoti?\nYā tasmiṁ samaye sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati satisambojjhaṅgo maggaṅgaṁ maggapariyāpannaṁ—\nidaṁ tasmiṁ samaye satibalaṁ hoti."}},{"id":"ds2.1.5:32","sourceIds":["ds2.1.5:32.1","ds2.1.5:32.2","ds2.1.5:32.3"],"kind":"text","text":{"pi":"Katamaṁ tasmiṁ samaye samādhibalaṁ hoti?\nYā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—\nidaṁ tasmiṁ samaye samādhibalaṁ hoti."}},{"id":"ds2.1.5:33","sourceIds":["ds2.1.5:33.1","ds2.1.5:33.2","ds2.1.5:33.3"],"kind":"text","text":{"pi":"Katamaṁ tasmiṁ samaye paññābalaṁ hoti?\nYā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nidaṁ tasmiṁ samaye paññābalaṁ hoti."}},{"id":"ds2.1.5:34","sourceIds":["ds2.1.5:34.1","ds2.1.5:34.2","ds2.1.5:34.3"],"kind":"text","text":{"pi":"Katamaṁ tasmiṁ samaye hiribalaṁ hoti?\nYaṁ tasmiṁ samaye hirīyati hiriyitabbena hirīyati pāpakānaṁ akusalānaṁ dhammānaṁ samāpattiyā—\nidaṁ tasmiṁ samaye hiribalaṁ hoti."}},{"id":"ds2.1.5:35","sourceIds":["ds2.1.5:35.1","ds2.1.5:35.2","ds2.1.5:35.3"],"kind":"text","text":{"pi":"Katamaṁ tasmiṁ samaye ottappabalaṁ hoti?\nYaṁ tasmiṁ samaye ottappati ottappitabbena ottappati pāpakānaṁ akusalānaṁ dhammānaṁ samāpattiyā—\nidaṁ tasmiṁ samaye ottappabalaṁ hoti."}},{"id":"ds2.1.5:36","sourceIds":["ds2.1.5:36.1","ds2.1.5:36.2","ds2.1.5:36.3"],"kind":"text","text":{"pi":"Katamo tasmiṁ samaye alobho hoti?\nYo tasmiṁ samaye alobho alubbhanā alubbhitattaṁ asārāgo asārajjanā asārajjitattaṁ anabhijjhā alobho kusalamūlaṁ—\nayaṁ tasmiṁ samaye alobho hoti."}},{"id":"ds2.1.5:37","sourceIds":["ds2.1.5:37.1","ds2.1.5:37.2","ds2.1.5:37.3"],"kind":"text","text":{"pi":"Katamo tasmiṁ samaye adoso hoti?\nYo tasmiṁ samaye adoso adussanā adussitattaṁ abyāpādo abyāpajjo adoso kusalamūlaṁ—\nayaṁ tasmiṁ samaye adoso hoti."}},{"id":"ds2.1.5:38","sourceIds":["ds2.1.5:38.1","ds2.1.5:38.2","ds2.1.5:38.3"],"kind":"text","text":{"pi":"Katamo tasmiṁ samaye amoho hoti?\nYā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nayaṁ tasmiṁ samaye amoho hoti."}},{"id":"ds2.1.5:39","sourceIds":["ds2.1.5:39.1","ds2.1.5:39.2","ds2.1.5:39.3"],"kind":"text","text":{"pi":"Katamā tasmiṁ samaye anabhijjhā hoti?\nYo tasmiṁ samaye alobho alubbhanā alubbhitattaṁ asārāgo asārajjanā asārajjitattaṁ anabhijjhā alobho kusalamūlaṁ—\nayaṁ tasmiṁ samaye anabhijjhā hoti."}},{"id":"ds2.1.5:40","sourceIds":["ds2.1.5:40.1","ds2.1.5:40.2","ds2.1.5:40.3"],"kind":"text","text":{"pi":"Katamo tasmiṁ samaye abyāpādo hoti?\nYo tasmiṁ samaye adoso adussanā adussitattaṁ abyāpādo abyāpajjo adoso kusalamūlaṁ—\nayaṁ tasmiṁ samaye abyāpādo hoti."}},{"id":"ds2.1.5:41","sourceIds":["ds2.1.5:41.1","ds2.1.5:41.2","ds2.1.5:41.3"],"kind":"text","text":{"pi":"Katamā tasmiṁ samaye sammādiṭṭhi hoti?\nYā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nayaṁ tasmiṁ samaye sammādiṭṭhi hoti."}},{"id":"ds2.1.5:42","sourceIds":["ds2.1.5:42.1","ds2.1.5:42.2","ds2.1.5:42.3"],"kind":"text","text":{"pi":"Katamā tasmiṁ samaye hirī hoti?\nYaṁ tasmiṁ samaye hirīyati hiriyitabbena hirīyati pāpakānaṁ akusalānaṁ dhammānaṁ samāpattiyā—\nayaṁ tasmiṁ samaye hirī hoti."}},{"id":"ds2.1.5:43","sourceIds":["ds2.1.5:43.1","ds2.1.5:43.2","ds2.1.5:43.3"],"kind":"text","text":{"pi":"Katamaṁ tasmiṁ samaye ottappaṁ hoti?\nYaṁ tasmiṁ samaye ottappati ottappitabbena ottappati pāpakānaṁ akusalānaṁ dhammānaṁ samāpattiyā—\nidaṁ tasmiṁ samaye ottappaṁ hoti."}},{"id":"ds2.1.5:44","sourceIds":["ds2.1.5:44.1","ds2.1.5:44.2","ds2.1.5:44.3"],"kind":"text","text":{"pi":"Katamā tasmiṁ samaye kāyapassaddhi hoti?\nYā tasmiṁ samaye vedanākkhandhassa saññākkhandhassa saṅkhārakkhandhassa passaddhi paṭipassaddhi passambhanā paṭipassambhanā paṭipassambhitattaṁ passaddhisambojjhaṅgo—\nayaṁ tasmiṁ samaye kāyapassaddhi hoti."}},{"id":"ds2.1.5:45","sourceIds":["ds2.1.5:45.1","ds2.1.5:45.2","ds2.1.5:45.3"],"kind":"text","text":{"pi":"Katamā tasmiṁ samaye cittapassaddhi hoti?\nYā tasmiṁ samaye viññāṇakkhandhassa passaddhi paṭipassaddhi passambhanā paṭipassambhanā paṭipassambhitattaṁ passaddhisambojjhaṅgo—\nayaṁ tasmiṁ samaye cittapassaddhi hoti."}},{"id":"ds2.1.5:46","sourceIds":["ds2.1.5:46.1","ds2.1.5:46.2","ds2.1.5:46.3"],"kind":"text","text":{"pi":"Katamā tasmiṁ samaye kāyalahutā hoti?\nYā tasmiṁ samaye vedanākkhandhassa saññākkhandhassa saṅkhārakkhandhassa lahutā lahupariṇāmatā adandhanatā avitthanatā—\nayaṁ tasmiṁ samaye kāyalahutā hoti."}},{"id":"ds2.1.5:47","sourceIds":["ds2.1.5:47.1","ds2.1.5:47.2","ds2.1.5:47.3"],"kind":"text","text":{"pi":"Katamā tasmiṁ samaye cittalahutā hoti?\nYā tasmiṁ samaye viññāṇakkhandhassa lahutā lahupariṇāmatā adandhanatā avitthanatā—\nayaṁ tasmiṁ samaye cittalahutā hoti."}},{"id":"ds2.1.5:48","sourceIds":["ds2.1.5:48.1","ds2.1.5:48.2","ds2.1.5:48.3"],"kind":"text","text":{"pi":"Katamā tasmiṁ samaye kāyamudutā hoti?\nYā tasmiṁ samaye vedanākkhandhassa saññākkhandhassa saṅkhārakkhandhassa mudutā maddavatā akakkhaḷatā akathinatā—\nayaṁ tasmiṁ samaye kāyamudutā hoti."}},{"id":"ds2.1.5:49","sourceIds":["ds2.1.5:49.1","ds2.1.5:49.2","ds2.1.5:49.3"],"kind":"text","text":{"pi":"Katamā tasmiṁ samaye cittamudutā hoti?\nYā tasmiṁ samaye viññāṇakkhandhassa mudutā maddavatā akakkhaḷatā akathinatā—\nayaṁ tasmiṁ samaye cittamudutā hoti."}},{"id":"ds2.1.5:50","sourceIds":["ds2.1.5:50.1","ds2.1.5:50.2","ds2.1.5:50.3"],"kind":"text","text":{"pi":"Katamā tasmiṁ samaye kāyakammaññatā hoti?\nYā tasmiṁ samaye vedanākkhandhassa saññākkhandhassa saṅkhārakkhandhassa kammaññatā kammaññattaṁ kammaññabhāvo—\nayaṁ tasmiṁ samaye kāyakammaññatā hoti."}},{"id":"ds2.1.5:51","sourceIds":["ds2.1.5:51.1","ds2.1.5:51.2","ds2.1.5:51.3"],"kind":"text","text":{"pi":"Katamā tasmiṁ samaye cittakammaññatā hoti?\nYā tasmiṁ samaye viññāṇakkhandhassa kammaññatā kammaññattaṁ kammaññabhāvo—\nayaṁ tasmiṁ samaye cittakammaññatā hoti."}},{"id":"ds2.1.5:52","sourceIds":["ds2.1.5:52.1","ds2.1.5:52.2","ds2.1.5:52.3"],"kind":"text","text":{"pi":"Katamā tasmiṁ samaye kāyapāguññatā hoti?\nYā tasmiṁ samaye vedanākkhandhassa saññākkhandhassa saṅkhārakkhandhassa paguṇatā paguṇattaṁ paguṇabhāvo—\nayaṁ tasmiṁ samaye kāyapāguññatā hoti."}},{"id":"ds2.1.5:53","sourceIds":["ds2.1.5:53.1","ds2.1.5:53.2","ds2.1.5:53.3"],"kind":"text","text":{"pi":"Katamā tasmiṁ samaye cittapāguññatā hoti?\nYā tasmiṁ samaye viññāṇakkhandhassa paguṇatā paguṇattaṁ paguṇabhāvo—\nayaṁ tasmiṁ samaye cittapāguññatā hoti."}},{"id":"ds2.1.5:54","sourceIds":["ds2.1.5:54.1","ds2.1.5:54.2","ds2.1.5:54.3"],"kind":"text","text":{"pi":"Katamā tasmiṁ samaye kāyujukatā hoti?\nYā tasmiṁ samaye vedanākkhandhassa saññākkhandhassa saṅkhārakkhandhassa ujutā ujukatā ajimhatā avaṅkatā akuṭilatā—\nayaṁ tasmiṁ samaye kāyujukatā hoti."}},{"id":"ds2.1.5:55","sourceIds":["ds2.1.5:55.1","ds2.1.5:55.2","ds2.1.5:55.3"],"kind":"text","text":{"pi":"Katamā tasmiṁ samaye cittujukatā hoti?\nYā tasmiṁ samaye viññāṇakkhandhassa ujutā ujukatā ajimhatā avaṅkatā akuṭilatā—\nayaṁ tasmiṁ samaye cittujukatā hoti."}},{"id":"ds2.1.5:56","sourceIds":["ds2.1.5:56.1","ds2.1.5:56.2","ds2.1.5:56.3"],"kind":"text","text":{"pi":"Katamā tasmiṁ samaye sati hoti?\nYā tasmiṁ samaye sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati satisambojjhaṅgo maggaṅgaṁ maggapariyāpannaṁ—\nayaṁ tasmiṁ samaye sati hoti."}},{"id":"ds2.1.5:57","sourceIds":["ds2.1.5:57.1","ds2.1.5:57.2","ds2.1.5:57.3"],"kind":"text","text":{"pi":"Katamaṁ tasmiṁ samaye sampajaññaṁ hoti?\nYā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nidaṁ tasmiṁ samaye sampajaññaṁ hoti."}},{"id":"ds2.1.5:58","sourceIds":["ds2.1.5:58.1","ds2.1.5:58.2","ds2.1.5:58.3"],"kind":"text","text":{"pi":"Katamo tasmiṁ samaye samatho hoti?\nYā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—\nayaṁ tasmiṁ samaye samatho hoti."}},{"id":"ds2.1.5:59","sourceIds":["ds2.1.5:59.1","ds2.1.5:59.2","ds2.1.5:59.3"],"kind":"text","text":{"pi":"Katamā tasmiṁ samaye vipassanā hoti?\nYā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ—\nayaṁ tasmiṁ samaye vipassanā hoti."}},{"id":"ds2.1.5:60","sourceIds":["ds2.1.5:60.1","ds2.1.5:60.2","ds2.1.5:60.3"],"kind":"text","text":{"pi":"Katamo tasmiṁ samaye paggāho hoti?\nYo tasmiṁ samaye cetasiko vīriyārambho nikkamo parakkamo uyyāmo vāyāmo ussāho ussoḷhī thāmo dhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ sammāvāyāmo vīriyasambojjhaṅgo maggaṅgaṁ maggapariyāpannaṁ—\nayaṁ tasmiṁ samaye paggāho hoti."}},{"id":"ds2.1.5:61","sourceIds":["ds2.1.5:61.1","ds2.1.5:61.2","ds2.1.5:61.3","ds2.1.5:61.4","ds2.1.5:61.5"],"kind":"text","text":{"pi":"Katamo tasmiṁ samaye avikkhepo hoti?\nYā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi samādhisambojjhaṅgo maggaṅgaṁ maggapariyāpannaṁ—\nayaṁ tasmiṁ samaye avikkhepo hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā kusalā."}},{"id":"ds2.1.5:62","sourceIds":["ds2.1.5:62.1","ds2.1.5:62.2","ds2.1.5:62.3"],"kind":"text","text":{"pi":"Tasmiṁ kho pana samaye cattāro khandhā honti, dvāyatanāni honti, dve dhātuyo honti, tayo āhārā honti, navindriyāni honti, pañcaṅgikaṁ jhānaṁ hoti, aṭṭhaṅgiko maggo hoti, satta balāni honti, tayo hetū honti, eko phasso hoti, ekā vedanā hoti, ekā saññā hoti, ekā cetanā hoti, ekaṁ cittaṁ hoti, eko vedanākkhandho hoti, eko saññākkhandho hoti, eko saṅkhārakkhandho hoti, eko viññāṇakkhandho hoti, ekaṁ manāyatanaṁ hoti, ekaṁ manindriyaṁ hoti, ekā manoviññāṇadhātu hoti, ekaṁ dhammāyatanaṁ hoti, ekā dhammadhātu hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā kusalā …pe…."}},{"id":"ds2.1.5:63","sourceIds":["ds2.1.5:63.1","ds2.1.5:63.2","ds2.1.5:63.3","ds2.1.5:63.4","ds2.1.5:63.5"],"kind":"text","text":{"pi":"Katamo tasmiṁ samaye saṅkhārakkhandho hoti?\nPhasso cetanā vitakko vicāro pīti cittassekaggatā saddhindriyaṁ vīriyindriyaṁ satindriyaṁ samādhindriyaṁ paññindriyaṁ jīvitindriyaṁ anaññātaññassāmītindriyaṁ sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi saddhābalaṁ vīriyabalaṁ satibalaṁ samādhibalaṁ paññābalaṁ hiribalaṁ ottappabalaṁ alobho adoso amoho anabhijjhā abyāpādo sammādiṭṭhi hirī ottappaṁ kāyapassaddhi cittapassaddhi kāyalahutā cittalahutā kāyamudutā cittamudutā kāyakammaññatā cittakammaññatā kāyapāguññatā cittapāguññatā kāyujukatā cittujukatā sati sampajaññaṁ samatho vipassanā paggāho avikkhepo;\nye vā pana tasmiṁ samaye aññepi atthi paṭiccasamuppannā arūpino dhammā ṭhapetvā vedanākkhandhaṁ ṭhapetvā saññākkhandhaṁ ṭhapetvā viññāṇakkhandhaṁ—\nayaṁ tasmiṁ samaye saṅkhārakkhandho hoti …pe…\nime dhammā kusalā."}},{"id":"ds2.1.5:64","sourceIds":["ds2.1.5:64.1","ds2.1.5:64.2","ds2.1.5:64.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:65","sourceIds":["ds2.1.5:65.1","ds2.1.5:65.2","ds2.1.5:65.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ khippābhiññaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:66","sourceIds":["ds2.1.5:66.1","ds2.1.5:66.2","ds2.1.5:66.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati sukhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:67","sourceIds":["ds2.1.5:67.1","ds2.1.5:67.2","ds2.1.5:67.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati sukhapaṭipadaṁ khippābhiññaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:68","sourceIds":["ds2.1.5:68.1","ds2.1.5:68.2","ds2.1.5:68.3","ds2.1.5:68.4","ds2.1.5:68.5","ds2.1.5:68.6","ds2.1.5:68.7","ds2.1.5:68.8","ds2.1.5:68.9","ds2.1.5:68.10","ds2.1.5:68.11"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ …pe…\npaṭhamaṁ jhānaṁ …pe…\npañcamaṁ jhānaṁ upasampajja viharati dukkhapaṭipadaṁ dandhābhiññaṁ …pe…\ndukkhapaṭipadaṁ khippābhiññaṁ …pe…\nsukhapaṭipadaṁ dandhābhiññaṁ …pe…\nsukhapaṭipadaṁ khippābhiññaṁ, tasmiṁ samaye phasso hoti …pe… avikkhepo hoti …pe…\nime dhammā kusalā.\nSuddhikapaṭipadā."}},{"id":"ds2.1.5:69","sourceIds":["ds2.1.5:69.0","ds2.1.5:69.1","ds2.1.5:69.2","ds2.1.5:69.3"],"kind":"text","text":{"pi":"2.1.5.2. Suññata\nKatame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati suññataṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:70","sourceIds":["ds2.1.5:70.1","ds2.1.5:70.2","ds2.1.5:70.3","ds2.1.5:70.4","ds2.1.5:70.5","ds2.1.5:70.6","ds2.1.5:70.7","ds2.1.5:70.8"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ …pe…\npaṭhamaṁ jhānaṁ …pe…\npañcamaṁ jhānaṁ upasampajja viharati suññataṁ, tasmiṁ samaye phasso hoti …pe… avikkhepo hoti …pe…\nime dhammā kusalā.\nSuññataṁ."}},{"id":"ds2.1.5:71","sourceIds":["ds2.1.5:71.0","ds2.1.5:71.1","ds2.1.5:71.2","ds2.1.5:71.3"],"kind":"text","text":{"pi":"2.1.5.3. Suññatamūlakapaṭipadā\nKatame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:72","sourceIds":["ds2.1.5:72.1","ds2.1.5:72.2","ds2.1.5:72.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ khippābhiññaṁ suññataṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:73","sourceIds":["ds2.1.5:73.1","ds2.1.5:73.2","ds2.1.5:73.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati sukhapaṭipadaṁ dandhābhiññaṁ suññataṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:74","sourceIds":["ds2.1.5:74.1","ds2.1.5:74.2","ds2.1.5:74.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati sukhapaṭipadaṁ khippābhiññaṁ suññataṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:75","sourceIds":["ds2.1.5:75.1","ds2.1.5:75.2","ds2.1.5:75.3","ds2.1.5:75.4","ds2.1.5:75.5","ds2.1.5:75.6","ds2.1.5:75.7","ds2.1.5:75.8","ds2.1.5:75.9","ds2.1.5:75.10","ds2.1.5:75.11"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ …pe…\npaṭhamaṁ jhānaṁ …pe…\npañcamaṁ jhānaṁ upasampajja viharati dukkhapaṭipadaṁ dandhābhiññaṁ suññataṁ …pe…\ndukkhapaṭipadaṁ khippābhiññaṁ suññataṁ …pe…\nsukhapaṭipadaṁ dandhābhiññaṁ suññataṁ …pe…\nsukhapaṭipadaṁ khippābhiññaṁ suññataṁ, tasmiṁ samaye phasso hoti …pe… avikkhepo hoti …pe…\nime dhammā kusalā.\nSuññatamūlakapaṭipadā."}},{"id":"ds2.1.5:76","sourceIds":["ds2.1.5:76.0","ds2.1.5:76.1","ds2.1.5:76.2","ds2.1.5:76.3"],"kind":"text","text":{"pi":"2.1.5.4. Appaṇihita\nKatame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati appaṇihitaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:77","sourceIds":["ds2.1.5:77.1","ds2.1.5:77.2","ds2.1.5:77.3","ds2.1.5:77.4","ds2.1.5:77.5","ds2.1.5:77.6","ds2.1.5:77.7","ds2.1.5:77.8"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ …pe…\npaṭhamaṁ jhānaṁ …pe…\npañcamaṁ jhānaṁ upasampajja viharati appaṇihitaṁ, tasmiṁ samaye phasso hoti …pe… avikkhepo hoti …pe…\nime dhammā kusalā.\nAppaṇihitaṁ."}},{"id":"ds2.1.5:78","sourceIds":["ds2.1.5:78.0","ds2.1.5:78.1","ds2.1.5:78.2","ds2.1.5:78.3"],"kind":"text","text":{"pi":"2.1.5.5. Appaṇihitamūlakapaṭipadā\nKatame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ appaṇihitaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:79","sourceIds":["ds2.1.5:79.1","ds2.1.5:79.2","ds2.1.5:79.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ khippābhiññaṁ appaṇihitaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:80","sourceIds":["ds2.1.5:80.1","ds2.1.5:80.2","ds2.1.5:80.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati sukhapaṭipadaṁ dandhābhiññaṁ appaṇihitaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:81","sourceIds":["ds2.1.5:81.1","ds2.1.5:81.2","ds2.1.5:81.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati sukhapaṭipadaṁ khippābhiññaṁ appaṇihitaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:82","sourceIds":["ds2.1.5:82.1","ds2.1.5:82.2","ds2.1.5:82.3","ds2.1.5:82.4","ds2.1.5:82.5","ds2.1.5:82.6","ds2.1.5:82.7","ds2.1.5:82.8","ds2.1.5:82.9","ds2.1.5:82.10","ds2.1.5:82.11"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ …pe…\npaṭhamaṁ jhānaṁ …pe…\npañcamaṁ jhānaṁ upasampajja viharati dukkhapaṭipadaṁ dandhābhiññaṁ appaṇihitaṁ …pe…\ndukkhapaṭipadaṁ khippābhiññaṁ appaṇihitaṁ …pe…\nsukhapaṭipadaṁ dandhābhiññaṁ appaṇihitaṁ …pe…\nsukhapaṭipadaṁ khippābhiññaṁ appaṇihitaṁ, tasmiṁ samaye phasso hoti …pe… avikkhepo hoti …pe…\nime dhammā kusalā.\nAppaṇihitamūlakapaṭipadā."}},{"id":"ds2.1.5:83","sourceIds":["ds2.1.5:83.0","ds2.1.5:83.1","ds2.1.5:83.2","ds2.1.5:83.3","ds2.1.5:83.4","ds2.1.5:83.5","ds2.1.5:83.6","ds2.1.5:83.7","ds2.1.5:83.8","ds2.1.5:83.9","ds2.1.5:83.10","ds2.1.5:83.11","ds2.1.5:83.12","ds2.1.5:83.13","ds2.1.5:83.14","ds2.1.5:83.15","ds2.1.5:83.16","ds2.1.5:83.17","ds2.1.5:83.18","ds2.1.5:83.19","ds2.1.5:83.20","ds2.1.5:83.21","ds2.1.5:83.22"],"kind":"text","text":{"pi":"2.1.5.6. Vīsati mahānaya\nKatame dhammā kusalā?\nYasmiṁ samaye lokuttaraṁ maggaṁ bhāveti …pe…\nlokuttaraṁ satipaṭṭhānaṁ bhāveti …pe…\nlokuttaraṁ sammappadhānaṁ bhāveti …pe…\nlokuttaraṁ iddhipādaṁ bhāveti …pe…\nlokuttaraṁ indriyaṁ bhāveti …pe…\nlokuttaraṁ balaṁ bhāveti …pe…\nlokuttaraṁ bojjhaṅgaṁ bhāveti …pe…\nlokuttaraṁ saccaṁ bhāveti …pe…\nlokuttaraṁ samathaṁ bhāveti …pe…\nlokuttaraṁ dhammaṁ bhāveti …pe…\nlokuttaraṁ khandhaṁ bhāveti …pe…\nlokuttaraṁ āyatanaṁ bhāveti …pe…\nlokuttaraṁ dhātuṁ bhāveti …pe…\nlokuttaraṁ āhāraṁ bhāveti …pe…\nlokuttaraṁ phassaṁ bhāveti …pe…\nlokuttaraṁ vedanaṁ bhāveti …pe…\nlokuttaraṁ saññaṁ bhāveti …pe…\nlokuttaraṁ cetanaṁ bhāveti …pe…\nlokuttaraṁ cittaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… avikkhepo hoti …pe…\nime dhammā kusalā.\nVīsati mahānayā."}},{"id":"ds2.1.5:84","sourceIds":["ds2.1.5:84.0","ds2.1.5:84.1","ds2.1.5:84.2","ds2.1.5:84.3","ds2.1.5:84.4","ds2.1.5:84.5","ds2.1.5:84.6"],"kind":"text","text":{"pi":"2.1.5.7. Adhipati\nKatame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ chandādhipateyyaṁ …pe…\nvīriyādhipateyyaṁ …pe…\ncittādhipateyyaṁ …pe…\nvīmaṁsādhipateyyaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:85","sourceIds":["ds2.1.5:85.1","ds2.1.5:85.2","ds2.1.5:85.3","ds2.1.5:85.4","ds2.1.5:85.5","ds2.1.5:85.6","ds2.1.5:85.7","ds2.1.5:85.8","ds2.1.5:85.9","ds2.1.5:85.10"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vitakkavicārānaṁ vūpasamā …pe… dutiyaṁ jhānaṁ …pe…\ntatiyaṁ jhānaṁ …pe…\ncatutthaṁ jhānaṁ …pe…\npaṭhamaṁ jhānaṁ …pe…\npañcamaṁ jhānaṁ upasampajja viharati dukkhapaṭipadaṁ dandhābhiññaṁ chandādhipateyyaṁ …pe…\nvīriyādhipateyyaṁ …pe…\ncittādhipateyyaṁ …pe…\nvīmaṁsādhipateyyaṁ, tasmiṁ samaye phasso hoti …pe… avikkhepo hoti …pe…\nime dhammā kusalā."}},{"id":"ds2.1.5:86","sourceIds":["ds2.1.5:86.1","ds2.1.5:86.2","ds2.1.5:86.3","ds2.1.5:86.4","ds2.1.5:86.5","ds2.1.5:86.6","ds2.1.5:86.7","ds2.1.5:86.8","ds2.1.5:86.9","ds2.1.5:86.10","ds2.1.5:86.11","ds2.1.5:86.12","ds2.1.5:86.13","ds2.1.5:86.14","ds2.1.5:86.15","ds2.1.5:86.16","ds2.1.5:86.17","ds2.1.5:86.18","ds2.1.5:86.19","ds2.1.5:86.20","ds2.1.5:86.21","ds2.1.5:86.22","ds2.1.5:86.23","ds2.1.5:86.24","ds2.1.5:86.25","ds2.1.5:86.26"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ maggaṁ bhāveti …pe…\nlokuttaraṁ satipaṭṭhānaṁ bhāveti …pe…\nlokuttaraṁ sammappadhānaṁ bhāveti …pe…\nlokuttaraṁ iddhipādaṁ bhāveti …pe…\nlokuttaraṁ indriyaṁ bhāveti …pe…\nlokuttaraṁ balaṁ bhāveti …pe…\nlokuttaraṁ bojjhaṅgaṁ bhāveti …pe…\nlokuttaraṁ saccaṁ bhāveti …pe…\nlokuttaraṁ samathaṁ bhāveti …pe…\nlokuttaraṁ dhammaṁ bhāveti …pe…\nlokuttaraṁ khandhaṁ bhāveti …pe…\nlokuttaraṁ āyatanaṁ bhāveti …pe…\nlokuttaraṁ dhātuṁ bhāveti …pe…\nlokuttaraṁ āhāraṁ bhāveti …pe…\nlokuttaraṁ phassaṁ bhāveti …pe…\nlokuttaraṁ vedanaṁ bhāveti …pe…\nlokuttaraṁ saññaṁ bhāveti …pe…\nlokuttaraṁ cetanaṁ bhāveti …pe…\nlokuttaraṁ cittaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ chandādhipateyyaṁ …pe…\nvīriyādhipateyyaṁ …pe…\ncittādhipateyyaṁ …pe…\nvīmaṁsādhipateyyaṁ, tasmiṁ samaye phasso hoti …pe… avikkhepo hoti …pe…\nime dhammā kusalā.\nAdhipati.\nPaṭhamo maggo."}},{"id":"ds2.1.5:87","sourceIds":["ds2.1.5:87.1","ds2.1.5:87.2","ds2.1.5:87.3","ds2.1.5:87.4"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ kāmarāgabyāpādānaṁ tanubhāvāya dutiyāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… aññindriyaṁ hoti …pe… avikkhepo hoti …pe…\nime dhammā kusalā.\nDutiyo maggo."}},{"id":"ds2.1.5:88","sourceIds":["ds2.1.5:88.1","ds2.1.5:88.2","ds2.1.5:88.3","ds2.1.5:88.4"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ kāmarāgabyāpādānaṁ anavasesappahānāya tatiyāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… aññindriyaṁ hoti …pe… avikkhepo hoti …pe…\nime dhammā kusalā.\nTatiyo maggo."}},{"id":"ds2.1.5:89","sourceIds":["ds2.1.5:89.1","ds2.1.5:89.2","ds2.1.5:89.3"],"kind":"text","text":{"pi":"Katame dhammā kusalā?\nYasmiṁ samaye lokuttaraṁ jhānaṁ bhāveti niyyānikaṁ apacayagāmiṁ rūparāgaarūparāgamānauddhaccaavijjāya anavasesappahānāya catutthāya bhūmiyā pattiyā vivicceva kāmehi …pe… paṭhamaṁ jhānaṁ upasampajja viharati dukkhapaṭipadaṁ dandhābhiññaṁ, tasmiṁ samaye phasso hoti …pe… aññindriyaṁ hoti …pe… avikkhepo hoti …pe…\nime dhammā kusalā …pe…."}},{"id":"ds2.1.5:90","sourceIds":["ds2.1.5:90.1","ds2.1.5:90.2","ds2.1.5:90.3","ds2.1.5:90.4","ds2.1.5:90.5","ds2.1.5:90.6"],"kind":"text","text":{"pi":"Katamaṁ tasmiṁ samaye aññindriyaṁ hoti?\nYā tesaṁ dhammānaṁ ñātānaṁ diṭṭhānaṁ pattānaṁ viditānaṁ sacchikatānaṁ sacchikiriyāya paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi dhammavicayasambojjhaṅgo maggaṅgaṁ maggapariyāpannaṁ, idaṁ tasmiṁ samaye aññindriyaṁ hoti …pe… avikkhepo hoti …pe…\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā kusalā.\nCatuttho maggo.\nLokuttaraṁ cittaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ds2.1.5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}