{"id":"ds2.1.9","title":"2.1.9. Akusalavipākaabyākata","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ds2.1.9","title":"2.1.9. Akusalavipākaabyākata","units":[{"id":"ds2.1.9:0","sourceIds":["ds2.1.9:0.1","ds2.1.9:0.2","ds2.1.9:0.3","ds2.1.9:0.4"],"kind":"text","text":{"pi":"Dhammasaṅgaṇī\n2 Niddesa\n2.1 Cittuppādakaṇḍa\n2.1.9. Akusalavipākaabyākata"}},{"id":"ds2.1.9:1","sourceIds":["ds2.1.9:1.0","ds2.1.9:1.1","ds2.1.9:1.2","ds2.1.9:1.3","ds2.1.9:1.4","ds2.1.9:1.5","ds2.1.9:1.6","ds2.1.9:1.7","ds2.1.9:1.8"],"kind":"text","text":{"pi":"2.1.9.1. Akusalavipākapañcaviññāṇa\nKatame dhammā abyākatā?\nYasmiṁ samaye akusalassa kammassa katattā upacitattā vipākaṁ cakkhuviññāṇaṁ uppannaṁ hoti upekkhāsahagataṁ rūpārammaṇaṁ …pe…\nsotaviññāṇaṁ uppannaṁ hoti upekkhāsahagataṁ saddārammaṇaṁ …pe…\nghānaviññāṇaṁ uppannaṁ hoti upekkhāsahagataṁ gandhārammaṇaṁ …pe…\njivhāviññāṇaṁ uppannaṁ hoti upekkhāsahagataṁ rasārammaṇaṁ …pe…\nkāyaviññāṇaṁ uppannaṁ hoti dukkhasahagataṁ phoṭṭhabbārammaṇaṁ, tasmiṁ samaye phasso hoti, vedanā hoti, saññā hoti, cetanā hoti, cittaṁ hoti, dukkhaṁ hoti, cittassekaggatā hoti, manindriyaṁ hoti, dukkhindriyaṁ hoti, jīvitindriyaṁ hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā."}},{"id":"ds2.1.9:2","sourceIds":["ds2.1.9:2.1","ds2.1.9:2.2","ds2.1.9:2.3"],"kind":"text","text":{"pi":"Katamo tasmiṁ samaye phasso hoti?\nYo tasmiṁ samaye phasso phusanā samphusanā samphusitattaṁ—\nayaṁ tasmiṁ samaye phasso hoti."}},{"id":"ds2.1.9:3","sourceIds":["ds2.1.9:3.1","ds2.1.9:3.2","ds2.1.9:3.3"],"kind":"text","text":{"pi":"Katamā tasmiṁ samaye vedanā hoti?\nYaṁ tasmiṁ samaye tajjākāyaviññāṇadhātusamphassajaṁ kāyikaṁ asātaṁ kāyikaṁ dukkhaṁ kāyasamphassajaṁ asātaṁ dukkhaṁ vedayitaṁ kāyasamphassajā asātā dukkhā vedanā—\nayaṁ tasmiṁ samaye vedanā hoti …pe…."}},{"id":"ds2.1.9:4","sourceIds":["ds2.1.9:4.1","ds2.1.9:4.2","ds2.1.9:4.3"],"kind":"text","text":{"pi":"Katamaṁ tasmiṁ samaye dukkhaṁ hoti?\nYaṁ tasmiṁ samaye kāyikaṁ asātaṁ kāyikaṁ dukkhaṁ kāyasamphassajaṁ asātaṁ dukkhaṁ vedayitaṁ kāyasamphassajā asātā dukkhā vedanā—\nidaṁ tasmiṁ samaye dukkhaṁ hoti …pe…."}},{"id":"ds2.1.9:5","sourceIds":["ds2.1.9:5.1","ds2.1.9:5.2","ds2.1.9:5.3","ds2.1.9:5.4","ds2.1.9:5.5"],"kind":"text","text":{"pi":"Katamaṁ tasmiṁ samaye dukkhindriyaṁ hoti?\nYaṁ tasmiṁ samaye kāyikaṁ asātaṁ kāyikaṁ dukkhaṁ kāyasamphassajaṁ asātaṁ dukkhaṁ vedayitaṁ kāyasamphassajā asātā dukkhā vedanā—\nidaṁ tasmiṁ samaye dukkhindriyaṁ hoti …pe…\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā."}},{"id":"ds2.1.9:6","sourceIds":["ds2.1.9:6.1","ds2.1.9:6.2","ds2.1.9:6.3"],"kind":"text","text":{"pi":"Tasmiṁ kho pana samaye cattāro khandhā honti, dvāyatanāni honti, dve dhātuyo honti, tayo āhārā honti, tīṇindriyāni honti, eko phasso hoti …pe… ekā kāyaviññāṇadhātu hoti, ekaṁ dhammāyatanaṁ hoti, ekā dhammadhātu hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.9:7","sourceIds":["ds2.1.9:7.1","ds2.1.9:7.2","ds2.1.9:7.3","ds2.1.9:7.4","ds2.1.9:7.5","ds2.1.9:7.6"],"kind":"text","text":{"pi":"Katamo tasmiṁ samaye saṅkhārakkhandho hoti?\nPhasso cetanā cittassekaggatā jīvitindriyaṁ;\nye vā pana tasmiṁ samaye aññepi atthi paṭiccasamuppannā arūpino dhammā ṭhapetvā vedanākkhandhaṁ ṭhapetvā saññākkhandhaṁ ṭhapetvā viññāṇakkhandhaṁ—\nayaṁ tasmiṁ samaye saṅkhārakkhandho hoti …pe…\nime dhammā abyākatā.\nAkusalavipākapañcaviññāṇāni."}},{"id":"ds2.1.9:8","sourceIds":["ds2.1.9:8.0","ds2.1.9:8.1","ds2.1.9:8.2","ds2.1.9:8.3","ds2.1.9:8.4","ds2.1.9:8.5"],"kind":"text","text":{"pi":"2.1.9.2. Akusalavipākamanodhātu\nKatame dhammā abyākatā?\nYasmiṁ samaye akusalassa kammassa katattā upacitattā vipākā manodhātu uppannā hoti upekkhāsahagatā rūpārammaṇā vā …pe…\nphoṭṭhabbārammaṇā vā yaṁ yaṁ vā panārabbha, tasmiṁ samaye phasso hoti, vedanā hoti, saññā hoti, cetanā hoti, cittaṁ hoti, vitakko hoti, vicāro hoti, upekkhā hoti, cittassekaggatā hoti, manindriyaṁ hoti, upekkhindriyaṁ hoti, jīvitindriyaṁ hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.9:9","sourceIds":["ds2.1.9:9.1","ds2.1.9:9.2","ds2.1.9:9.3"],"kind":"text","text":{"pi":"Tasmiṁ kho pana samaye cattāro khandhā honti, dvāyatanāni honti, dve dhātuyo honti, tayo āhārā honti, tīṇindriyāni honti, eko phasso hoti …pe… ekā manodhātu hoti, ekaṁ dhammāyatanaṁ hoti, ekā dhammadhātu hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.9:10","sourceIds":["ds2.1.9:10.1","ds2.1.9:10.2","ds2.1.9:10.3","ds2.1.9:10.4","ds2.1.9:10.5","ds2.1.9:10.6"],"kind":"text","text":{"pi":"Katamo tasmiṁ samaye saṅkhārakkhandho hoti?\nPhasso cetanā vitakko vicāro cittassekaggatā jīvitindriyaṁ;\nye vā pana tasmiṁ samaye aññepi atthi paṭiccasamuppannā arūpino dhammā ṭhapetvā vedanākkhandhaṁ ṭhapetvā saññākkhandhaṁ ṭhapetvā viññāṇakkhandhaṁ—\nayaṁ tasmiṁ samaye saṅkhārakkhandho hoti …pe…\nime dhammā abyākatā.\nAkusalavipākā manodhātu."}},{"id":"ds2.1.9:11","sourceIds":["ds2.1.9:11.0","ds2.1.9:11.1","ds2.1.9:11.2","ds2.1.9:11.3","ds2.1.9:11.4","ds2.1.9:11.5"],"kind":"text","text":{"pi":"2.1.9.3. Akusalavipākamanoviññāṇadhātu\nKatame dhammā abyākatā?\nYasmiṁ samaye akusalassa kammassa katattā upacitattā vipākā manoviññāṇadhātu uppannā hoti upekkhāsahagatā rūpārammaṇā vā …pe…\ndhammārammaṇā vā yaṁ yaṁ vā panārabbha, tasmiṁ samaye phasso hoti, vedanā hoti, saññā hoti, cetanā hoti, cittaṁ hoti, vitakko hoti, vicāro hoti, upekkhā hoti, cittassekaggatā hoti, manindriyaṁ hoti, upekkhindriyaṁ hoti, jīvitindriyaṁ hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.9:12","sourceIds":["ds2.1.9:12.1","ds2.1.9:12.2","ds2.1.9:12.3"],"kind":"text","text":{"pi":"Tasmiṁ kho pana samaye cattāro khandhā honti, dvāyatanāni honti, dve dhātuyo honti, tayo āhārā honti, tīṇindriyāni honti, eko phasso hoti …pe… ekā manoviññāṇadhātu hoti, ekaṁ dhammāyatanaṁ hoti, ekā dhammadhātu hoti;\nye vā pana tasmiṁ samaye aññepi atthi paṭiccasamuppannā arūpino dhammā—\nime dhammā abyākatā …pe…."}},{"id":"ds2.1.9:13","sourceIds":["ds2.1.9:13.1","ds2.1.9:13.2","ds2.1.9:13.3","ds2.1.9:13.4","ds2.1.9:13.5","ds2.1.9:13.6","ds2.1.9:13.7"],"kind":"text","text":{"pi":"Katamo tasmiṁ samaye saṅkhārakkhandho hoti?\nPhasso cetanā vitakko vicāro cittassekaggatā jīvitindriyaṁ;\nye vā pana tasmiṁ samaye aññepi atthi paṭiccasamuppannā arūpino dhammā ṭhapetvā vedanākkhandhaṁ ṭhapetvā saññākkhandhaṁ ṭhapetvā viññāṇakkhandhaṁ—\nayaṁ tasmiṁ samaye saṅkhārakkhandho hoti …pe…\nime dhammā abyākatā.\nAkusalavipākā manoviññāṇadhātu.\nVipākā abyākatā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ds2.1.9/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}