{"id":"ja536","title":"4. Kuṇālajātaka","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"ja536","title":"4. Kuṇālajātaka","units":[{"id":"ja536:0","sourceIds":["ja536:0.1","ja536:0.2","ja536:0.3","ja536:0.4"],"kind":"text","text":{"pi":"Jātaka\nAsītinipāta\nCūḷahaṁsavagga\n4. Kuṇālajātaka"}},{"id":"ja536:1","sourceIds":["ja536:1.1","ja536:1.2"],"kind":"text","text":{"pi":"Evamakkhāyati, evamanusūyati.\nSabbosadhadharaṇidhare nekapupphamālyavitate gajagavajamahiṁsarurucamarapasadakhaggagokaṇṇasīhabyagghadīpiacchakokataracchauddārakadalimigabiḷārasasakaṇṇikānucarite ākiṇṇanelamaṇḍalamahāvarāhanāgakulakareṇusaṅghādhivuṭṭhe issamigasākhamigasarabhamigaeṇīmigavātamigapasadamigapurisālukimpurisayakkharakkhasanisevite amajjavamañjarīdharapahaṭṭhapupphaphusitaggānekapādapagaṇavitate kuraracakoravāraṇamayūraparabhatajīvañjīvakacelāvakābhiṅkārakaravīkamattavihaṅgagaṇasatatasampaghuṭṭhe añjanamanosilāharitālahiṅgulakahemarajatakanakānekadhātusatavinaddhapaṭimaṇḍitappadese evarūpe khalu, bho, ramme vanasaṇḍe kuṇālo nāma sakuṇo paṭivasati ativiya citto ativiya cittapattacchadano."}},{"id":"ja536:2","sourceIds":["ja536:2.1","ja536:2.2"],"kind":"text","text":{"pi":"Tasseva khalu, bho, kuṇālassa sakuṇassa aḍḍhuḍḍhāni itthisahassāni paricārikā dijakaññāyo, atha khalu, bho, dve dijakaññāyo kaṭṭhaṁ mukhena ḍaṁsitvā taṁ kuṇālaṁ sakuṇaṁ majjhe nisīdāpetvā uḍḍenti—\n“mā naṁ kuṇālaṁ sakuṇaṁ addhānapariyāyapathe kilamatho ubbāhetthā”ti."}},{"id":"ja536:3","sourceIds":["ja536:3.1","ja536:3.2"],"kind":"text","text":{"pi":"Pañcasatā dijakaññāyo heṭṭhato heṭṭhato uḍḍenti—\n“sacāyaṁ kuṇālo sakuṇo āsanā paripatissati, mayaṁ taṁ pakkhehi paṭiggahessāmā”ti."}},{"id":"ja536:4","sourceIds":["ja536:4.1","ja536:4.2"],"kind":"text","text":{"pi":"Pañcasatā dijakaññāyo uparūpari uḍḍenti—\n“mā naṁ kuṇālaṁ sakuṇaṁ ātapo paritāpesī”ti."}},{"id":"ja536:5","sourceIds":["ja536:5.1","ja536:5.2"],"kind":"text","text":{"pi":"Pañcasatā pañcasatā dijakaññāyo ubhatopassena uḍḍenti—\n“mā naṁ kuṇālaṁ sakuṇaṁ sītaṁ vā uṇhaṁ vā tiṇaṁ vā rajo vā vāto vā ussāvo vā upapphusī”ti."}},{"id":"ja536:6","sourceIds":["ja536:6.1","ja536:6.2","ja536:6.3"],"kind":"text","text":{"pi":"Pañcasatā dijakaññāyo purato purato uḍḍenti—\n“mā naṁ kuṇālaṁ sakuṇaṁ gopālakā vā pasupālakā vā tiṇahārakā vā kaṭṭhahārakā vā vanakammikā vā kaṭṭhena vā kaṭhalena vā pāṇinā vā (…) leḍḍunā vā daṇḍena vā satthena vā sakkharāhi vā pahāraṁ adaṁsu.\nMāyaṁ kuṇālo sakuṇo gacchehi vā latāhi vā rukkhehi vā sākhāhi vā thambhehi vā pāsāṇehi vā balavantehi vā pakkhīhi saṅgamesī”ti."}},{"id":"ja536:7","sourceIds":["ja536:7.1","ja536:7.2"],"kind":"text","text":{"pi":"Pañcasatā dijakaññāyo pacchato pacchato uḍḍenti saṇhāhi sakhilāhi mañjūhi madhurāhi vācāhi samudācarantiyo—\n“māyaṁ kuṇālo sakuṇo āsane pariyukkaṇṭhī”ti."}},{"id":"ja536:8","sourceIds":["ja536:8.1","ja536:8.2"],"kind":"text","text":{"pi":"Pañcasatā dijakaññāyo disodisaṁ uḍḍenti anekarukkhavividhavikatiphalamāharantiyo—\n“māyaṁ kuṇālo sakuṇo khudāya parikilamitthā”ti."}},{"id":"ja536:9","sourceIds":["ja536:9.1"],"kind":"text","text":{"pi":"Atha khalu, bho, tā dijakaññāyo taṁ kuṇālaṁ sakuṇaṁ ārāmeneva ārāmaṁ uyyāneneva uyyānaṁ nadītittheneva nadītitthaṁ pabbatasikhareneva pabbatasikharaṁ ambavaneneva ambavanaṁ jambuvaneneva jambuvanaṁ labujavaneneva labujavanaṁ nāḷikerasañcāriyeneva nāḷikerasañcāriyaṁ khippameva abhisambhonti ratitthāya."}},{"id":"ja536:10","sourceIds":["ja536:10.1","ja536:10.2"],"kind":"text","text":{"pi":"Atha khalu, bho, kuṇālo sakuṇo tāhi dijakaññāhi divasaṁ paribyūḷho evaṁ apasādeti—\n“nassatha tumhe vasaliyo, vinassatha tumhe vasaliyo, coriyo dhuttiyo asatiyo lahucittāyo katassa appaṭikārikāyo anilo viya yenakāmaṅgamāyo”ti."}},{"id":"ja536:11","sourceIds":["ja536:11.1","ja536:11.2"],"kind":"text","text":{"pi":"Tasseva khalu, bho, himavato pabbatarājassa puratthimadisābhāge susukhumasunipuṇagirippabhava—\nharitupayantiyo."}},{"id":"ja536:12","sourceIds":["ja536:12.1"],"kind":"text","text":{"pi":"Uppala paduma kumuda nalina satapatta sogandhika mandālaka sampativirūḷhasucigandhamanuññamāvakappadese."}},{"id":"ja536:13","sourceIds":["ja536:13.1"],"kind":"text","text":{"pi":"Kuravakamucalindaketakavedisavañjulapunnāgabakulatilakapiyakahasanasālasaḷalacampakaasokanāgarukkhatirīṭibhujapattaloddacandanoghavane kāḷāgarupadmakapiyaṅgudevadārukacocagahane kakudhakuṭajaaṅkolakaccikārakaṇikārakaṇṇikārakanaverakoraṇḍakakoviḷārakiṁsukayodhikavanamallikamanaṅgaṇamanavajjabhaṇḍisurucirabhaginimālāmalyadhare jātisumanamadhugandhikadhanutakkāritālīsatagaramusīrakoṭṭhakacchavitate atimuttakasaṅkusumitalatāvitatapaṭimaṇḍitappadese haṁsapilavakādambakāraṇḍavābhinadite vijjādharasiddhasamaṇatāpasagaṇādhivuṭṭhe varadevayakkharakkhasadānavagandhabbakinnaramahoragānuciṇṇappadese evarūpe khalu, bho, ramme vanasaṇḍe puṇṇamukho nāma phussakokilo paṭivasati ativiya madhuragiro vilāsitanayano mattakkho."}},{"id":"ja536:14","sourceIds":["ja536:14.1","ja536:14.2","ja536:14.3"],"kind":"text","text":{"pi":"Tasseva khalu, bho, puṇṇamukhassa phussakokilassa aḍḍhuḍḍhāni itthisatāni paricārikā dijakaññāyo.\nAtha khalu, bho, dve dijakaññāyo kaṭṭhaṁ mukhena ḍaṁsitvā taṁ puṇṇamukhaṁ phussakokilaṁ majjhe nisīdāpetvā uḍḍenti—\n“mā naṁ puṇṇamukhaṁ phussakokilaṁ addhānapariyāyapathe kilamatho ubbāhetthā”ti."}},{"id":"ja536:15","sourceIds":["ja536:15.1","ja536:15.2"],"kind":"text","text":{"pi":"Paññāsa dijakaññāyo heṭṭhato heṭṭhato uḍḍenti—\n“sacāyaṁ puṇṇamukho phussakokilo āsanā paripatissati, mayaṁ taṁ pakkhehi paṭiggahessāmā”ti."}},{"id":"ja536:16","sourceIds":["ja536:16.1","ja536:16.2"],"kind":"text","text":{"pi":"Paññāsa dijakaññāyo uparūpari uḍḍenti—\n“mā naṁ puṇṇamukhaṁ phussakokilaṁ ātapo paritāpesī”ti."}},{"id":"ja536:17","sourceIds":["ja536:17.1","ja536:17.2"],"kind":"text","text":{"pi":"Paññāsa paññāsa dijakaññāyo ubhatopassena uḍḍenti—\n“mā naṁ puṇṇamukhaṁ phussakokilaṁ sītaṁ vā uṇhaṁ vā tiṇaṁ vā rajo vā vāto vā ussāvo vā upapphusī”ti."}},{"id":"ja536:18","sourceIds":["ja536:18.1","ja536:18.2","ja536:18.3"],"kind":"text","text":{"pi":"Paññāsa dijakaññāyo purato purato uḍḍenti—\n“mā naṁ puṇṇamukhaṁ phussakokilaṁ gopālakā vā pasupālakā vā tiṇahārakā vā kaṭṭhahārakā vā vanakammikā vā kaṭṭhena vā kaṭhalena vā pāṇinā vā leḍḍunā vā daṇḍena vā satthena vā sakkharāhi vā pahāraṁ adaṁsu.\nMāyaṁ puṇṇamukho phussakokilo gacchehi vā latāhi vā rukkhehi vā sākhāhi vā thambhehi vā pāsāṇehi vā balavantehi vā pakkhīhi saṅgamesī”ti."}},{"id":"ja536:19","sourceIds":["ja536:19.1","ja536:19.2"],"kind":"text","text":{"pi":"Paññāsa dijakaññāyo pacchato pacchato uḍḍenti saṇhāhi sakhilāhi mañjūhi madhurāhi vācāhi samudācarantiyo—\n“māyaṁ puṇṇamukho phussakokilo āsane pariyukkaṇṭhī”ti."}},{"id":"ja536:20","sourceIds":["ja536:20.1","ja536:20.2"],"kind":"text","text":{"pi":"Paññāsa dijakaññāyo disodisaṁ uḍḍenti anekarukkhavividhavikatiphalamāharantiyo—\n“māyaṁ puṇṇamukho phussakokilo khudāya parikilamitthā”ti."}},{"id":"ja536:21","sourceIds":["ja536:21.1"],"kind":"text","text":{"pi":"Atha khalu, bho, tā dijakaññāyo taṁ puṇṇamukhaṁ phussakokilaṁ ārāmeneva ārāmaṁ uyyāneneva uyyānaṁ nadītittheneva nadītitthaṁ pabbatasikhareneva pabbatasikharaṁ ambavaneneva ambavanaṁ jambuvaneneva jambuvanaṁ labujavaneneva labujavanaṁ nāḷikerasañcāriyeneva nāḷikerasañcāriyaṁ khippameva abhisambhonti ratitthāya."}},{"id":"ja536:22","sourceIds":["ja536:22.1","ja536:22.2"],"kind":"text","text":{"pi":"Atha khalu, bho, puṇṇamukho phussakokilo tāhi dijakaññāhi divasaṁ paribyūḷho evaṁ pasaṁsati—\n“sādhu sādhu, bhaginiyo, etaṁ kho, bhaginiyo, tumhākaṁ patirūpaṁ kuladhītānaṁ, yaṁ tumhe bhattāraṁ paricareyyāthā”ti."}},{"id":"ja536:23","sourceIds":["ja536:23.1","ja536:23.2","ja536:23.3","ja536:23.4","ja536:23.5","ja536:23.6","ja536:23.7","ja536:23.8"],"kind":"text","text":{"pi":"Atha khalu, bho, puṇṇamukho phussakokilo yena kuṇālo sakuṇo tenupasaṅkami.\nAddasaṁsu kho kuṇālassa sakuṇassa paricārikā dijakaññāyo taṁ puṇṇamukhaṁ phussakokilaṁ dūratova āgacchantaṁ;\ndisvāna yena puṇṇamukho phussakokilo tenupasaṅkamiṁsu; upasaṅkamitvā taṁ puṇṇamukhaṁ phussakokilaṁ etadavocuṁ—\n“ayaṁ, samma puṇṇamukha, kuṇālo sakuṇo ativiya pharuso ativiya pharusavāco, appevanāma tavampi āgamma piyavācaṁ labheyyāmā”ti.\n“Appevanāma, bhaginiyo”ti vatvā yena kuṇālo sakuṇo tenupasaṅkami; upasaṅkamitvā kuṇālena sakuṇena saddhiṁ paṭisammoditvā ekamantaṁ nisīdi.\nEkamantaṁ nisinno kho puṇṇamukho phussakokilo taṁ kuṇālaṁ sakuṇaṁ etadavoca—\n“kissa tvaṁ, samma kuṇāla, itthīnaṁ sujātānaṁ kuladhītānaṁ sammāpaṭipannānaṁ micchāpaṭipannosi?\nAmanāpabhāṇīnampi kira, samma kuṇāla, itthīnaṁ manāpabhāṇinā bhavitabbaṁ, kimaṅga pana manāpabhāṇīnan”ti."}},{"id":"ja536:24","sourceIds":["ja536:24.1","ja536:24.2","ja536:24.3"],"kind":"text","text":{"pi":"Evaṁ vutte, kuṇālo sakuṇo taṁ puṇṇamukhaṁ phussakokilaṁ evaṁ apasādesi—\n“nassa tvaṁ, samma jamma vasala, vinassa tvaṁ, samma jamma vasala, ko nu tayā viyatto jāyājinenā”ti.\nEvaṁ apasādito ca pana puṇṇamukho phussakokilo tatoyeva paṭinivatti."}},{"id":"ja536:25","sourceIds":["ja536:25.1","ja536:25.2","ja536:25.3","ja536:25.4","ja536:25.5","ja536:25.6","ja536:25.7","ja536:25.8","ja536:25.9","ja536:25.10","ja536:25.11"],"kind":"text","text":{"pi":"Atha khalu, bho, puṇṇamukhassa phussakokilassa aparena samayena nacirasseva kharo ābādho uppajji lohitapakkhandikā bāḷhā vedanā vattanti māraṇantikā.\nAtha khalu, bho, puṇṇamukhassa phussakokilassa paricārikānaṁ dijakaññānaṁ etadahosi—\n“ābādhiko kho ayaṁ puṇṇamukho phussakokilo, appevanāma imamhā ābādhā vuṭṭhaheyyā”ti ekaṁ adutiyaṁ ohāya yena kuṇālo sakuṇo tenupasaṅkamiṁsu.\nAddasā kho kuṇālo sakuṇo tā dijakaññāyo dūratova āgacchantiyo, disvāna tā dijakaññāyo etadavoca—\n“kahaṁ pana tumhaṁ vasaliyo bhattā”ti?\n“Ābādhiko kho, samma kuṇāla, puṇṇamukho phussakokilo appevanāma tamhā ābādhā vuṭṭhaheyyā”ti.\nEvaṁ vutte, kuṇālo sakuṇo tā dijakaññāyo evaṁ apasādesi—\n“nassatha tumhe vasaliyo, vinassatha tumhe vasaliyo, coriyo dhuttiyo asatiyo lahucittāyo katassa appaṭikārikāyo anilo viya yenakāmaṅgamāyo”ti;\nvatvā yena puṇṇamukho phussakokilo tenupasaṅkami; upasaṅkamitvā taṁ puṇṇamukhaṁ phussakokilaṁ etadavoca—\n“haṁ, samma, puṇṇamukhā”ti.\n“Haṁ, samma, kuṇālā”ti."}},{"id":"ja536:26","sourceIds":["ja536:26.1","ja536:26.2","ja536:26.3"],"kind":"text","text":{"pi":"Atha khalu, bho kuṇālo sakuṇo taṁ puṇṇamukhaṁ phussakokilaṁ pakkhehi ca mukhatuṇḍakena ca pariggahetvā vuṭṭhāpetvā nānābhesajjāni pāyāpesi.\nAtha khalu, bho, puṇṇamukhassa phussakokilassa so ābādho paṭippassambhīti.\nAtha khalu, bho, kuṇālo sakuṇo taṁ puṇṇamukhaṁ phussakokilaṁ gilānavuṭṭhitaṁ aciravuṭṭhitaṁ gelaññā etadavoca—"}},{"id":"ja536:27","sourceIds":["ja536:27.1","ja536:27.2"],"kind":"text","text":{"pi":"“Diṭṭhā mayā, samma puṇṇamukha, kaṇhā dvepitikā pañcapatikāya chaṭṭhe purise cittaṁ paṭibandhantiyā, yadidaṁ kabandhe pīṭhasappimhī”ti.\nBhavati ca panuttarettha vākyaṁ—"}},{"id":"ja536:28","sourceIds":["ja536:28.1","ja536:28.2","ja536:28.3","ja536:28.4"],"kind":"text","text":{"pi":"“Athajjuno nakulo bhīmaseno,\nYudhiṭṭhilo sahadevo ca rājā;\nEte patī pañca maticca nārī,\nAkāsi khujjavāmanakena pāpanti."}},{"id":"ja536:29","sourceIds":["ja536:29.1"],"kind":"text","text":{"pi":"Diṭṭhā mayā, samma puṇṇamukha, saccatapāpī nāma samaṇī susānamajjhe vasantī catutthabhattaṁ pariṇāmayamānā surādhuttakena pāpamakāsi."}},{"id":"ja536:30","sourceIds":["ja536:30.1"],"kind":"text","text":{"pi":"Diṭṭhā mayā, samma puṇṇamukha, kākavatī nāma devī samuddamajjhe vasantī bhariyā venateyyassa naṭakuverena pāpamakāsi."}},{"id":"ja536:31","sourceIds":["ja536:31.1"],"kind":"text","text":{"pi":"Diṭṭhā mayā, samma puṇṇamukha, kuruṅgadevī nāma lomasuddarī eḷikakumāraṁ kāmayamānā chaḷaṅgakumāradhanantevāsinā pāpamakāsi."}},{"id":"ja536:32","sourceIds":["ja536:32.1","ja536:32.2","ja536:32.3","ja536:32.4"],"kind":"text","text":{"pi":"Evañhetaṁ mayā ñātaṁ,\nBrahmadattassa mātaraṁ;\nOhāya kosalarājaṁ,\nPañcālacaṇḍena pāpamakāsi."}},{"id":"ja536:33","sourceIds":["ja536:33.1","ja536:33.2","ja536:33.3","ja536:33.4","ja536:33.5","ja536:33.6"],"kind":"text","text":{"pi":"Etā ca aññā ca akaṁsu pāpaṁ,\nTasmāhamitthīnaṁ na vissase nappasaṁse;\nMahī yathā jagati samānarattā,\nVasundharā itarītarā patiṭṭhā;\nSabbasahā aphandanā akuppā,\nTathitthiyo tāyo na vissase naro."}},{"id":"ja536:34","sourceIds":["ja536:34.1","ja536:34.2","ja536:34.3","ja536:34.4"],"kind":"text","text":{"pi":"Sīho yathā lohitamaṁsabhojano,\nVāḷamigo pañcāvudho suruddho;\nPasayhakhādī parahiṁsane rato,\nTathitthiyo tāyo na vissase naro."}},{"id":"ja536:35","sourceIds":["ja536:35.1"],"kind":"text","text":{"pi":"Na khalu, samma puṇṇamukha, vesiyo nāriyo gamaniyo, na hetā bandhakiyo nāma, vadhikāyo nāma etāyo, yadidaṁ vesiyo nāriyo gamaniyoti."}},{"id":"ja536:36","sourceIds":["ja536:36.1","ja536:36.2"],"kind":"text","text":{"pi":"Coro viya veṇikatā, madirāva diddhā vāṇijo viya vācāsanthutiyo, issasiṅghamiva viparivattāyo, uragāmiva dujivhāyo, sobbhamiva paṭicchannā, pātālamiva duppūrā rakkhasī viya duttosā, yamovekantahāriyo, sikhīriva sabbabhakkhā, nadīriva sabbavāhī, anilo viya yenakāmaṁcarā, neru viya avisesakarā, visarukkho viya niccaphalitāyoti.\nBhavati ca panuttarettha vākyaṁ—"}},{"id":"ja536:37","sourceIds":["ja536:37.1","ja536:37.2","ja536:37.3","ja536:37.4"],"kind":"text","text":{"pi":"Yathā coro yathā diddho,\nVāṇijova vikatthanī;\nIssasiṅghamiva parivattā,\nDujivhā urago viya."}},{"id":"ja536:38","sourceIds":["ja536:38.1","ja536:38.2","ja536:38.3","ja536:38.4"],"kind":"text","text":{"pi":"Sobbhamiva paṭicchannā,\npātālamiva duppurā;\nRakkhasī viya duttosā,\nyamovekantahāriyo."}},{"id":"ja536:39","sourceIds":["ja536:39.1","ja536:39.2","ja536:39.3","ja536:39.4","ja536:39.5"],"kind":"text","text":{"pi":"Yathā sikhī nadī vāto,\nNerunāva samāgatā;\nVisarukkho viya niccaphalā,\nNāsayanti ghare bhogaṁ;\nRatanantakaritthiyoti."}},{"id":"ja536:40","sourceIds":["ja536:40.1","ja536:40.2","ja536:40.3","ja536:40.4"],"kind":"text","text":{"pi":"Cattārimāni, samma puṇṇamukha, yāni vatthūni kicce jāte anatthacarāni bhavanti;\ntāni parakule na vāsetabbāni—\ngoṇaṁ dhenuṁ yānaṁ bhariyā.\nCattāri etāni paṇḍito dhanāni gharā na vippavāsaye."}},{"id":"ja536:41","sourceIds":["ja536:41.1","ja536:41.2","ja536:41.3","ja536:41.4","ja536:41.5","ja536:41.6"],"kind":"text","text":{"pi":"Goṇaṁ dhenuñca yānañca,\nBhariyaṁ ñātikule na vāsaye;\nBhañjanti rathaṁ ayānakā,\nAtivāhena hananti puṅgavaṁ;\nDohena hananti vacchakaṁ,\nBhariyā ñātikule padussatīti."}},{"id":"ja536:42","sourceIds":["ja536:42.1"],"kind":"text","text":{"pi":"Cha imāni, samma puṇṇamukha, yāni vatthūni kicce jāte anatthacarāni bhavanti—"}},{"id":"ja536:43","sourceIds":["ja536:43.1","ja536:43.2","ja536:43.3","ja536:43.4"],"kind":"text","text":{"pi":"Aguṇaṁ dhanu ñātikule ca bhariyā,\nPāraṁ nāvā akkhabhaggañca yānaṁ;\nDūre mitto pāpasahāyako ca,\nKicce jāte anatthacarāni bhavanti."}},{"id":"ja536:44","sourceIds":["ja536:44.1","ja536:44.2","ja536:44.3","ja536:44.4"],"kind":"text","text":{"pi":"Aṭṭhahi khalu, samma puṇṇamukha, ṭhānehi itthī sāmikaṁ avajānāti.\nDaliddatā, āturatā, jiṇṇatā, surāsoṇḍatā, muddhatā, pamattatā, sabbakiccesu anuvattanatā, sabbadhanaanuppadānena—\nimehi khalu, samma puṇṇamukha, aṭṭhahi ṭhānehi itthī sāmikaṁ avajānāti.\nBhavati ca panuttarettha vākyaṁ—"}},{"id":"ja536:45","sourceIds":["ja536:45.1","ja536:45.2","ja536:45.3","ja536:45.4","ja536:45.5","ja536:45.6"],"kind":"text","text":{"pi":"Daliddaṁ āturañcāpi,\njiṇṇakaṁ surasoṇḍakaṁ;\nPamattaṁ muddhapattañca,\nsabbakiccesu hāpanaṁ;\nSabbakāmappadānena,\navajānāti sāmikanti."}},{"id":"ja536:46","sourceIds":["ja536:46.1","ja536:46.2","ja536:46.3","ja536:46.4"],"kind":"text","text":{"pi":"Navahi khalu, samma puṇṇamukha, ṭhānehi itthī padosamāharati.\nĀrāmagamanasīlā ca hoti, uyyānagamanasīlā ca hoti, nadītitthagamanasīlā ca hoti, ñātikulagamanasīlā ca hoti, parakulagamanasīlā ca hoti, ādāsadussamaṇḍanānuyogamanuyuttasīlā ca hoti, majjapāyinī ca hoti, nillokanasīlā ca hoti, sadvāraṭhāyinī ca hoti—\nimehi khalu, samma puṇṇamukha, navahi ṭhānehi itthī padosamāharatīti.\nBhavati ca panuttarettha vākyaṁ—"}},{"id":"ja536:47","sourceIds":["ja536:47.1","ja536:47.2","ja536:47.3","ja536:47.4"],"kind":"text","text":{"pi":"Ārāmasīlā ca uyyānaṁ,\nNadī ñāti parakulaṁ;\nĀdāsadussamaṇḍanamanuyuttā,\nYā citthī majjapāyinī."}},{"id":"ja536:48","sourceIds":["ja536:48.1","ja536:48.2","ja536:48.3","ja536:48.4"],"kind":"text","text":{"pi":"Yā ca nillokanasīlā,\nYā ca sadvāraṭhāyinī;\nNavahetehi ṭhānehi,\nPadosamāharanti itthiyoti."}},{"id":"ja536:49","sourceIds":["ja536:49.1","ja536:49.2","ja536:49.3"],"kind":"text","text":{"pi":"Cattālīsāya khalu, samma puṇṇamukha, ṭhānehi itthī purisaṁ accācarati.\nVijambhati, vinamati, vilasati, vilajjati, nakhena nakhaṁ ghaṭṭeti, pādena pādaṁ akkamati, kaṭṭhena pathaviṁ vilikhati, dārakaṁ ullaṅghati ullaṅghāpeti, kīḷati kīḷāpeti, cumbati cumbāpeti, bhuñjati bhuñjāpeti, dadāti, yācati, katamanukaroti, uccaṁ bhāsati, nīcaṁ bhāsati, aviccaṁ bhāsati, viviccaṁ bhāsati, naccena gītena vāditena rodanena vilasitena vibhūsitena jagghati, pekkhati, kaṭiṁ cāleti, guyhabhaṇḍakaṁ sañcāleti, ūruṁ vivarati, ūruṁ pidahati, thanaṁ dasseti, kacchaṁ dasseti, nābhiṁ dasseti, akkhiṁ nikhanati, bhamukaṁ ukkhipati, oṭṭhaṁ upalikhati, jivhaṁ nillāleti, dussaṁ muñcati, dussaṁ paṭibandhati, sirasaṁ muñcati, sirasaṁ bandhati—\nimehi khalu, samma puṇṇamukha, cattālīsāya ṭhānehi itthī purisaṁ accācarati."}},{"id":"ja536:50","sourceIds":["ja536:50.1","ja536:50.2","ja536:50.3","ja536:50.4"],"kind":"text","text":{"pi":"Pañcavīsāya khalu, samma puṇṇamukha, ṭhānehi itthī paduṭṭhā veditabbā bhavati.\nSāmikassa pavāsaṁ vaṇṇeti, pavuṭṭhaṁ na sarati, āgataṁ nābhinandati, avaṇṇaṁ tassa bhaṇati, vaṇṇaṁ tassa na bhaṇati, anatthaṁ tassa carati, atthaṁ tassa na carati, akiccaṁ tassa karoti, kiccaṁ tassa na karoti, paridahitvā sayati, parammukhī nipajjati, parivattakajātā kho pana hoti kuṅkumiyajātā, dīghaṁ assasati, dukkhaṁ vedayati, uccārapassāvaṁ abhiṇhaṁ gacchati, vilomamācarati, parapurisasaddaṁ sutvā kaṇṇasotaṁ vivaramodahati, nihatabhogā kho pana hoti, paṭivissakehi santhavaṁ karoti, nikkhantapādā kho pana hoti, visikhānucārinī aticārinī kho pana hoti, niccaṁ sāmike agāravā paduṭṭhamanasaṅkappā, abhiṇhaṁ dvāre tiṭṭhati, kacchāni aṅgāni thanāni dasseti, disodisaṁ gantvā pekkhati—\nimehi khalu, samma puṇṇamukha, pañcavīsāya ṭhānehi itthī paduṭṭhā veditabbā bhavati.\nBhavati ca panuttarettha vākyaṁ—"}},{"id":"ja536:51","sourceIds":["ja536:51.1","ja536:51.2","ja536:51.3","ja536:51.4","ja536:51.5"],"kind":"text","text":{"pi":"Pavāsaṁ tassa vaṇṇeti,\nGataṁ tassa na socati;\nDisvāna patimāgataṁ nābhinandati,\nBhattāravaṇṇaṁ na kadāci bhāsati;\nEte paduṭṭhāya bhavanti lakkhaṇā."}},{"id":"ja536:52","sourceIds":["ja536:52.1","ja536:52.2","ja536:52.3","ja536:52.4"],"kind":"text","text":{"pi":"Anatthaṁ tassa carati asaññatā,\nAtthañca hāpeti akiccakārinī;\nParidahitvā sayati parammukhī,\nEte paduṭṭhāya bhavanti lakkhaṇā."}},{"id":"ja536:53","sourceIds":["ja536:53.1","ja536:53.2","ja536:53.3","ja536:53.4"],"kind":"text","text":{"pi":"Parivattajātā ca bhavati kuṅkumī,\nDīghañca assasati dukkhavedinī;\nUccārapassāvamabhiṇhaṁ gacchati,\nEte paduṭṭhāya bhavanti lakkhaṇā."}},{"id":"ja536:54","sourceIds":["ja536:54.1","ja536:54.2","ja536:54.3","ja536:54.4"],"kind":"text","text":{"pi":"Vilomamācarati akiccakārinī,\nSaddaṁ nisāmeti parassa bhāsato;\nNihatabhogā ca karoti santhavaṁ,\nEte paduṭṭhāya bhavanti lakkhaṇā."}},{"id":"ja536:55","sourceIds":["ja536:55.1","ja536:55.2","ja536:55.3","ja536:55.4"],"kind":"text","text":{"pi":"Kicchena laddhaṁ kasirābhataṁ dhanaṁ,\nVittaṁ vināseti dukkhena sambhataṁ;\nPaṭivissakehi ca karoti santhavaṁ,\nEte paduṭṭhāya bhavanti lakkhaṇā."}},{"id":"ja536:56","sourceIds":["ja536:56.1","ja536:56.2","ja536:56.3","ja536:56.4"],"kind":"text","text":{"pi":"Nikkhantapādā visikhānucārinī,\nNiccañca sāmimhi paduṭṭhamānasā;\nAticārinī hoti apetagāravā,\nEte paduṭṭhāya bhavanti lakkhaṇā."}},{"id":"ja536:57","sourceIds":["ja536:57.1","ja536:57.2","ja536:57.3","ja536:57.4"],"kind":"text","text":{"pi":"Abhikkhaṇaṁ tiṭṭhati dvāramūle,\nThanāni kacchāni ca dassayantī;\nDisodisaṁ pekkhati bhantacittā,\nEte paduṭṭhāya bhavanti lakkhaṇā."}},{"id":"ja536:58","sourceIds":["ja536:58.1","ja536:58.2","ja536:58.3","ja536:58.4"],"kind":"text","text":{"pi":"Sabbā nadī vaṅkagatī,\nsabbe kaṭṭhamayā vanā;\nSabbitthiyo kare pāpaṁ,\nlabhamāne nivātake."}},{"id":"ja536:59","sourceIds":["ja536:59.1","ja536:59.2","ja536:59.3","ja536:59.4"],"kind":"text","text":{"pi":"Sace labhetha khaṇaṁ vā raho vā,\nNivātakaṁ vāpi labhetha tādisaṁ;\nSabbāva itthī kayiruṁ nu pāpaṁ,\nAññaṁ alattha pīṭhasappināpi saddhiṁ."}},{"id":"ja536:60","sourceIds":["ja536:60.1","ja536:60.2","ja536:60.3","ja536:60.4"],"kind":"text","text":{"pi":"Narānamārāmakarāsu nārisu,\nAnekacittāsu aniggahāsu ca;\nSabbattha nāpītikarāpi ce siyā,\nNa vissase titthasamā hi nāriyoti."}},{"id":"ja536:61","sourceIds":["ja536:61.1","ja536:61.2","ja536:61.3","ja536:61.4"],"kind":"text","text":{"pi":"Yaṁ ve disvā kaṇḍarīkinnarānaṁ,\nSabbitthiyo na ramanti agāre;\nTaṁ tādisaṁ maccaṁ cajitvā bhariyā,\nAññaṁ disvā purisaṁ pīṭhasappiṁ."}},{"id":"ja536:62","sourceIds":["ja536:62.1","ja536:62.2","ja536:62.3","ja536:62.4"],"kind":"text","text":{"pi":"Bakassa ca bāvarikassa rañño,\nAccantakāmānugatassa bhariyā;\nAvācarī paṭṭhavasānugassa,\nKaṁ vāpi itthī nāticare tadaññaṁ."}},{"id":"ja536:63","sourceIds":["ja536:63.1","ja536:63.2","ja536:63.3","ja536:63.4"],"kind":"text","text":{"pi":"Piṅgiyānī sabbalokissarassa,\nRañño piyā brahmadattassa bhariyā;\nAvācarī paṭṭhavasānugassa,\nTaṁ vāpi sā nājjhagā kāmakāminī."}},{"id":"ja536:64","sourceIds":["ja536:64.1","ja536:64.2","ja536:64.3","ja536:64.4"],"kind":"text","text":{"pi":"Luddhānaṁ lahucittānaṁ,\nAkataññūna dubbhinaṁ;\nNādevasatto puriso,\nThīnaṁ saddhātumarahati."}},{"id":"ja536:65","sourceIds":["ja536:65.1","ja536:65.2","ja536:65.3","ja536:65.4"],"kind":"text","text":{"pi":"Na tā pajānanti kataṁ na kiccaṁ,\nNa mātaraṁ pitaraṁ bhātaraṁ vā;\nAnariyā samatikkantadhammā,\nSasseva cittassa vasaṁ vajanti."}},{"id":"ja536:66","sourceIds":["ja536:66.1","ja536:66.2","ja536:66.3","ja536:66.4"],"kind":"text","text":{"pi":"Cirānuvuṭṭhampi piyaṁ manāpaṁ,\nAnukampakaṁ pāṇasamampi bhattuṁ;\nĀvāsu kiccesu ca naṁ jahanti,\nTasmāhamitthīnaṁ na vissasāmi."}},{"id":"ja536:67","sourceIds":["ja536:67.1","ja536:67.2","ja536:67.3","ja536:67.4"],"kind":"text","text":{"pi":"Thīnañhi cittaṁ yathā vānarassa,\nKannappakannaṁ yathā rukkhachāyā;\nCalācalaṁ hadayamitthiyānaṁ,\nCakkassa nemi viya parivattati."}},{"id":"ja536:68","sourceIds":["ja536:68.1","ja536:68.2","ja536:68.3","ja536:68.4"],"kind":"text","text":{"pi":"Yadā tā passanti samekkhamānā,\nĀdeyyarūpaṁ purisassa vittaṁ;\nSaṇhāhi vācāhi nayanti menaṁ,\nKambojakā jalajeneva assaṁ."}},{"id":"ja536:69","sourceIds":["ja536:69.1","ja536:69.2","ja536:69.3","ja536:69.4"],"kind":"text","text":{"pi":"Yadā na passanti samekkhamānā,\nĀdeyyarūpaṁ purisassa vittaṁ;\nSamantato naṁ parivajjayanti,\nTiṇṇo nadīpāragatova kullaṁ."}},{"id":"ja536:70","sourceIds":["ja536:70.1","ja536:70.2","ja536:70.3","ja536:70.4"],"kind":"text","text":{"pi":"Silesūpamā sikhiriva sabbabhakkhā,\nTikkhamāyā nadīriva sīghasotā;\nSevanti hetā piyamappiyañca,\nNāvā yathā orakūlaṁ parañca."}},{"id":"ja536:71","sourceIds":["ja536:71.1","ja536:71.2","ja536:71.3","ja536:71.4"],"kind":"text","text":{"pi":"Na tā ekassa na dvinnaṁ,\nāpaṇova pasārito;\nYo tā mayhanti maññeyya,\nvātaṁ jālena bādhaye."}},{"id":"ja536:72","sourceIds":["ja536:72.1","ja536:72.2","ja536:72.3","ja536:72.4"],"kind":"text","text":{"pi":"Yathā nadī ca pantho ca,\npānāgāraṁ sabhā papā;\nEvaṁ lokitthiyo nāma,\nvelā tāsaṁ na vijjati."}},{"id":"ja536:73","sourceIds":["ja536:73.1","ja536:73.2","ja536:73.3","ja536:73.4"],"kind":"text","text":{"pi":"Ghatāsanasamā etā,\nkaṇhasappasirūpamā;\nGāvo bahitiṇasseva,\nomasanti varaṁ varaṁ."}},{"id":"ja536:74","sourceIds":["ja536:74.1","ja536:74.2","ja536:74.3","ja536:74.4"],"kind":"text","text":{"pi":"Ghatāsanaṁ kuñjaraṁ kaṇhasappaṁ,\nMuddhābhisittaṁ pamadā ca sabbā;\nEte naro niccayato bhajetha,\nTesaṁ have dubbidu sabbabhāvo."}},{"id":"ja536:75","sourceIds":["ja536:75.1","ja536:75.2","ja536:75.3","ja536:75.4"],"kind":"text","text":{"pi":"Naccantavaṇṇā na bahūna kantā,\nNa dakkhiṇā pamadā sevitabbā;\nNa parassa bhariyā na dhanassa hetu,\nEtitthiyo pañca na sevitabbā”."}},{"id":"ja536:76","sourceIds":["ja536:76.1"],"kind":"text","text":{"pi":"Atha khalu, bho, ānando gijjharājā kuṇālassa sakuṇassa ādimajjhakathāpariyosānaṁ viditvā tāyaṁ velāyaṁ imā gāthāyo abhāsi—"}},{"id":"ja536:77","sourceIds":["ja536:77.1","ja536:77.2","ja536:77.3","ja536:77.4"],"kind":"text","text":{"pi":"“Puṇṇampi cemaṁ pathaviṁ dhanena,\nDajjitthiyā puriso sammatāya;\nLaddhā khaṇaṁ atimaññeyya tampi,\nTāsaṁ vasaṁ asatīnaṁ na gacche."}},{"id":"ja536:78","sourceIds":["ja536:78.1","ja536:78.2","ja536:78.3","ja536:78.4"],"kind":"text","text":{"pi":"Uṭṭhāhakañcepi alīnavuttiṁ,\nKomārabhattāraṁ piyaṁ manāpaṁ;\nĀvāsu kiccesu ca naṁ jahanti,\nTasmāhamitthīnaṁ na vissasāmi."}},{"id":"ja536:79","sourceIds":["ja536:79.1","ja536:79.2","ja536:79.3","ja536:79.4"],"kind":"text","text":{"pi":"Na vissase icchati manti poso,\nNa vissase rodati me sakāse;\nSevanti hetā piyamappiyañca,\nNāvā yathā orakūlaṁ parañca."}},{"id":"ja536:80","sourceIds":["ja536:80.1","ja536:80.2","ja536:80.3","ja536:80.4"],"kind":"text","text":{"pi":"Na vissase sākhapurāṇasanthataṁ,\nNa vissase mittapurāṇacoraṁ;\nNa vissase rājānaṁ sakhā mamanti,\nNa vissase itthi dasanna mātaraṁ."}},{"id":"ja536:81","sourceIds":["ja536:81.1","ja536:81.2","ja536:81.3","ja536:81.4"],"kind":"text","text":{"pi":"Na vissase rāmakarāsu nārisu,\nAccantasīlāsu asaññatāsu;\nAccantapemānugatassa bhariyā,\nNa vissase titthasamā hi nāriyo."}},{"id":"ja536:82","sourceIds":["ja536:82.1","ja536:82.2","ja536:82.3","ja536:82.4"],"kind":"text","text":{"pi":"Haneyyuṁ chindeyyuṁ chedāpeyyumpi,\nKaṇṭhepi chetvā rudhiraṁ piveyyuṁ;\nMā dīnakāmāsu asaññatāsu,\nBhāvaṁ kare gaṅgatitthūpamāsu."}},{"id":"ja536:83","sourceIds":["ja536:83.1","ja536:83.2","ja536:83.3","ja536:83.4"],"kind":"text","text":{"pi":"Musā tāsaṁ yathā saccaṁ,\nsaccaṁ tāsaṁ yathā musā;\nGāvo bahitiṇasseva,\nomasanti varaṁ varaṁ."}},{"id":"ja536:84","sourceIds":["ja536:84.1","ja536:84.2","ja536:84.3","ja536:84.4"],"kind":"text","text":{"pi":"Gatenetā palobhenti,\npekkhitena mhitena ca;\nAthopi dunnivatthena,\nmañjunā bhaṇitena ca."}},{"id":"ja536:85","sourceIds":["ja536:85.1","ja536:85.2","ja536:85.3","ja536:85.4"],"kind":"text","text":{"pi":"Coriyo kathinā hetā,\nvāḷā ca lapasakkharā;\nNa tā kiñci na jānanti,\nyaṁ manussesu vañcanaṁ."}},{"id":"ja536:86","sourceIds":["ja536:86.1","ja536:86.2","ja536:86.3","ja536:86.4"],"kind":"text","text":{"pi":"Asā lokitthiyo nāma,\nvelā tāsaṁ na vijjati;\nSārattā ca pagabbhā ca,\nsikhī sabbaghaso yathā."}},{"id":"ja536:87","sourceIds":["ja536:87.1","ja536:87.2","ja536:87.3","ja536:87.4"],"kind":"text","text":{"pi":"Natthitthīnaṁ piyo nāma,\nAppiyopi na vijjati;\nSevanti hetā piyamappiyañca,\nNāvā yathā orakūlaṁ parañca."}},{"id":"ja536:88","sourceIds":["ja536:88.1","ja536:88.2","ja536:88.3","ja536:88.4"],"kind":"text","text":{"pi":"Natthitthīnaṁ piyo nāma,\nappiyopi na vijjati;\nDhanattā paṭivallanti,\nlatāva dumanissitā."}},{"id":"ja536:89","sourceIds":["ja536:89.1","ja536:89.2","ja536:89.3","ja536:89.4"],"kind":"text","text":{"pi":"Hatthibandhaṁ assabandhaṁ,\nGopurisañca maṇḍalaṁ;\nChavaḍāhakaṁ pupphachaḍḍakaṁ,\nSadhanamanupatanti nāriyo."}},{"id":"ja536:90","sourceIds":["ja536:90.1","ja536:90.2","ja536:90.3","ja536:90.4"],"kind":"text","text":{"pi":"Kulaputtampi jahanti akiñcanaṁ,\nChavakasamasadisampi;\nAnugacchanti anupatanti,\nDhanahetu hi nāriyo”ti."}},{"id":"ja536:91","sourceIds":["ja536:91.1"],"kind":"text","text":{"pi":"Atha khalu, bho, nārado devabrāhmaṇo ānandassa gijjharājassa ādimajjhakathāpariyosānaṁ viditvā tāyaṁ velāyaṁ imā gāthāyo abhāsi—"}},{"id":"ja536:92","sourceIds":["ja536:92.1","ja536:92.2","ja536:92.3","ja536:92.4"],"kind":"text","text":{"pi":"“Cattārome na pūrenti,\nte me suṇātha bhāsato;\nSamuddo brāhmaṇo rājā,\nitthī cāpi dijampati."}},{"id":"ja536:93","sourceIds":["ja536:93.1","ja536:93.2","ja536:93.3","ja536:93.4"],"kind":"text","text":{"pi":"Saritā sāgaraṁ yanti,\nyā kāci pathavissitā;\nTā samuddaṁ na pūrenti,\nūnattā hi na pūrati."}},{"id":"ja536:94","sourceIds":["ja536:94.1","ja536:94.2","ja536:94.3","ja536:94.4"],"kind":"text","text":{"pi":"Brāhmaṇo ca adhīyāna,\nvedamakkhānapañcamaṁ;\nBhiyyopi sutamiccheyya,\nūnattā hi na pūrati."}},{"id":"ja536:95","sourceIds":["ja536:95.1","ja536:95.2","ja536:95.3","ja536:95.4","ja536:95.5","ja536:95.6"],"kind":"text","text":{"pi":"Rājā ca pathaviṁ sabbaṁ,\nsasamuddaṁ sapabbataṁ;\nAjjhāvasaṁ vijinitvā,\nanantaratanocitaṁ;\nPāraṁ samuddaṁ pattheti,\nūnattā hi na pūrati."}},{"id":"ja536:96","sourceIds":["ja536:96.1","ja536:96.2","ja536:96.3","ja536:96.4","ja536:96.5","ja536:96.6"],"kind":"text","text":{"pi":"Ekamekāya itthiyā,\naṭṭhaṭṭha patino siyā;\nSūrā ca balavanto ca,\nsabbakāmarasāharā;\nKareyya navame chandaṁ,\nūnattā hi na pūrati."}},{"id":"ja536:97","sourceIds":["ja536:97.1","ja536:97.2","ja536:97.3","ja536:97.4"],"kind":"text","text":{"pi":"Sabbitthiyo sikhiriva sabbabhakkhā,\nSabbitthiyo nadīriva sabbavāhī;\nSabbitthiyo kaṇṭakānaṁva sākhā,\nSabbitthiyo dhanahetu vajanti."}},{"id":"ja536:98","sourceIds":["ja536:98.1","ja536:98.2","ja536:98.3","ja536:98.4"],"kind":"text","text":{"pi":"Vātañca jālena naro parāmase,\nOsiñcaye sāgaramekapāṇinā;\nSakena hatthena kareyya ghosaṁ,\nYo sabbabhāvaṁ pamadāsu osaje."}},{"id":"ja536:99","sourceIds":["ja536:99.1","ja536:99.2","ja536:99.3","ja536:99.4"],"kind":"text","text":{"pi":"Corīnaṁ bahubuddhīnaṁ,\nyāsu saccaṁ sudullabhaṁ;\nThīnaṁ bhāvo durājāno,\nmacchassevodake gataṁ."}},{"id":"ja536:100","sourceIds":["ja536:100.1","ja536:100.2","ja536:100.3","ja536:100.4"],"kind":"text","text":{"pi":"Analā mudusambhāsā,\nduppūrā tā nadīsamā;\nSīdanti naṁ viditvāna,\nārakā parivajjaye."}},{"id":"ja536:101","sourceIds":["ja536:101.1","ja536:101.2","ja536:101.3","ja536:101.4"],"kind":"text","text":{"pi":"Āvaṭṭanī mahāmāyā,\nbrahmacariyavikopanā;\nSīdanti naṁ viditvāna,\nārakā parivajjaye."}},{"id":"ja536:102","sourceIds":["ja536:102.1","ja536:102.2","ja536:102.3","ja536:102.4"],"kind":"text","text":{"pi":"Yaṁ etā upasevanti,\nchandasā vā dhanena vā;\nJātavedova saṇṭhānaṁ,\nkhippaṁ anudahanti nan”ti."}},{"id":"ja536:103","sourceIds":["ja536:103.1"],"kind":"text","text":{"pi":"Atha khalu, bho, kuṇālo sakuṇo nāradassa devabrāhmaṇassa ādimajjhakathāpariyosānaṁ viditvā tāyaṁ velāyaṁ imā gāthāyo abhāsi—"}},{"id":"ja536:104","sourceIds":["ja536:104.1","ja536:104.2","ja536:104.3","ja536:104.4"],"kind":"text","text":{"pi":"“Sallape nisitakhaggapāṇinā,\nPaṇḍito api pisācadosinā;\nUggatejamuragampi āside,\nEko ekāya pamadāya nālape."}},{"id":"ja536:105","sourceIds":["ja536:105.1","ja536:105.2","ja536:105.3","ja536:105.4"],"kind":"text","text":{"pi":"Lokacittamathanā hi nāriyo,\nNaccagītabhaṇitamhitāvudhā;\nBādhayanti anupaṭṭhitassatiṁ,\nDīpe rakkhasigaṇova vāṇije."}},{"id":"ja536:106","sourceIds":["ja536:106.1","ja536:106.2","ja536:106.3","ja536:106.4"],"kind":"text","text":{"pi":"Natthi tāsaṁ vinayo na saṁvaro,\nMajjamaṁsaniratā asaññatā;\nTā gilanti purisassa pābhataṁ,\nSāgareva makaraṁ timiṅgalo."}},{"id":"ja536:107","sourceIds":["ja536:107.1","ja536:107.2","ja536:107.3","ja536:107.4"],"kind":"text","text":{"pi":"Pañcakāmaguṇasātagocarā,\nUddhatā aniyatā asaññatā;\nOsaranti pamadā pamādinaṁ,\nLoṇatoyavatiyaṁva āpakā."}},{"id":"ja536:108","sourceIds":["ja536:108.1","ja536:108.2","ja536:108.3","ja536:108.4"],"kind":"text","text":{"pi":"Yaṁ naraṁ upalapenti nāriyo,\nChandasā va ratiyā dhanena vā;\nJātavedasadisampi tādisaṁ,\nRāgadosavadhiyo dahanti naṁ."}},{"id":"ja536:109","sourceIds":["ja536:109.1","ja536:109.2","ja536:109.3","ja536:109.4"],"kind":"text","text":{"pi":"Aḍḍhaṁ ñatvā purisaṁ mahaddhanaṁ,\nOsaranti sadhanā sahattanā;\nRattacittamativeṭhayanti naṁ,\nSāla māluvalatāva kānane."}},{"id":"ja536:110","sourceIds":["ja536:110.1","ja536:110.2","ja536:110.3","ja536:110.4"],"kind":"text","text":{"pi":"Tā upenti vividhena chandasā,\nCitrabimbamukhiyo alaṅkatā;\nUhasanti pahasanti nāriyo,\nSambarova satamāyakovidā."}},{"id":"ja536:111","sourceIds":["ja536:111.1","ja536:111.2","ja536:111.3","ja536:111.4"],"kind":"text","text":{"pi":"Jātarūpamaṇimuttabhūsitā,\nSakkatā patikulesu nāriyo;\nRakkhitā aticaranti sāmikaṁ,\nDānavaṁva hadayantarassitā."}},{"id":"ja536:112","sourceIds":["ja536:112.1","ja536:112.2","ja536:112.3","ja536:112.4"],"kind":"text","text":{"pi":"Tejavāpi hi naro vicakkhaṇo,\nSakkato bahujanassa pūjito;\nNārinaṁ vasagato na bhāsati,\nRāhunā upahatova candimā."}},{"id":"ja536:113","sourceIds":["ja536:113.1","ja536:113.2","ja536:113.3","ja536:113.4"],"kind":"text","text":{"pi":"Yaṁ kareyya kupito diso disaṁ,\nDuṭṭhacitto vasamāgataṁ ariṁ;\nTena bhiyyo byasanaṁ nigacchati,\nNārinaṁ vasagato apekkhavā."}},{"id":"ja536:114","sourceIds":["ja536:114.1","ja536:114.2","ja536:114.3","ja536:114.4"],"kind":"text","text":{"pi":"Kesalūnanakhachinnatajjitā,\nPādapāṇikasadaṇḍatāḷitā;\nHīnamevupagatā hi nāriyo,\nTā ramanti kuṇapeva makkhikā."}},{"id":"ja536:115","sourceIds":["ja536:115.1","ja536:115.2","ja536:115.3","ja536:115.4"],"kind":"text","text":{"pi":"Tā kulesu visikhantaresu vā,\nRājadhāninigamesu vā puna;\nOḍḍitaṁ namucipāsavākaraṁ,\nCakkhumā parivajje sukhatthiko."}},{"id":"ja536:116","sourceIds":["ja536:116.1","ja536:116.2","ja536:116.3","ja536:116.4"],"kind":"text","text":{"pi":"Ossajitva kusalaṁ tapoguṇaṁ,\nYo anariyacaritāni mācari;\nDevatāhi nirayaṁ nimissati,\nChedagāmimaṇiyaṁva vāṇijo."}},{"id":"ja536:117","sourceIds":["ja536:117.1","ja536:117.2","ja536:117.3","ja536:117.4"],"kind":"text","text":{"pi":"So idha garahito parattha ca,\nDummatī upahato sakammunā;\nGacchatī aniyato gaḷāgaḷaṁ,\nDuṭṭhagadrabharathova uppathe."}},{"id":"ja536:118","sourceIds":["ja536:118.1","ja536:118.2","ja536:118.3","ja536:118.4"],"kind":"text","text":{"pi":"So upeti nirayaṁ patāpanaṁ,\nSattisimbalivanañca āyasaṁ;\nĀvasitvā tiracchānayoniyaṁ,\nPetarājavisayaṁ na muñcati."}},{"id":"ja536:119","sourceIds":["ja536:119.1","ja536:119.2","ja536:119.3","ja536:119.4"],"kind":"text","text":{"pi":"Dibyakhiḍḍaratiyo ca nandane,\nCakkavatticaritañca mānuse;\nNāsayanti pamadā pamādinaṁ,\nDuggatiñca paṭipādayanti naṁ."}},{"id":"ja536:120","sourceIds":["ja536:120.1","ja536:120.2","ja536:120.3","ja536:120.4"],"kind":"text","text":{"pi":"Dibyakhiḍḍaratiyo na dullabhā,\nCakkavatticaritañca mānuse;\nSoṇṇabyamhanilayā ca accharā,\nYe caranti pamadāhanatthikā."}},{"id":"ja536:121","sourceIds":["ja536:121.1","ja536:121.2","ja536:121.3","ja536:121.4"],"kind":"text","text":{"pi":"Kāmadhātusamatikkamā gati,\nRūpadhātuyā bhāvo na dullabho;\nVītarāgavisayūpapatti yā,\nYe caranti pamadāhanatthikā."}},{"id":"ja536:122","sourceIds":["ja536:122.1","ja536:122.2","ja536:122.3","ja536:122.4"],"kind":"text","text":{"pi":"Sabbadukkhasamatikkamaṁ sivaṁ,\nAccantamacalitaṁ asaṅkhataṁ;\nNibbutehi sucihī na dullabhaṁ,\nYe caranti pamadāhanatthikā”ti."}},{"id":"ja536:123","sourceIds":["ja536:123.1","ja536:123.2","ja536:123.3","ja536:123.4","ja536:123.5","ja536:123.6"],"kind":"text","text":{"pi":"“Kuṇālohaṁ tadā āsiṁ,\nudāyī phussakokilo;\nĀnando gijjharājāsi,\nsāriputto ca nārado;\nParisā buddhaparisā,\nevaṁ dhāretha jātakan”ti."}},{"id":"ja536:124","sourceIds":["ja536:124.1"],"kind":"text","text":{"pi":"Kuṇālajātakaṁ catutthaṁ."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/ja536/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}