{"id":"kv1.3","title":"Brahmacariyakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv1.3","title":"Brahmacariyakathā","units":[{"id":"kv1.3:0","sourceIds":["kv1.3:0.1","kv1.3:0.2","kv1.3:0.3","kv1.3:0.4"],"kind":"text","text":{"pi":"Kathāvatthu\nMahāpaṇṇāsaka\nPaṭhamavagga\nBrahmacariyakathā"}},{"id":"kv1.3:1","sourceIds":["kv1.3:1.0","kv1.3:1.1","kv1.3:1.2","kv1.3:1.3","kv1.3:1.4"],"kind":"text","text":{"pi":"Suddhabrahmacariyakathā\nNatthi devesu brahmacariyavāsoti?\nĀmantā.\nSabbe devā jaḷā elamūgā aviññū hatthasaṁvācikā nappaṭibalā subhāsitadubbhāsitānaṁ atthamaññātuṁ, sabbe devā na buddhe pasannā na dhamme pasannā na saṅghe pasannā, na buddhaṁ bhagavantaṁ payirupāsanti, na buddhaṁ bhagavantaṁ pañhaṁ pucchanti, na buddhena bhagavatā pañhe vissajjite attamanā, sabbe devā kammāvaraṇena samannāgatā kilesāvaraṇena samannāgatā vipākāvaraṇena samannāgatā assaddhā acchandikā duppaññā abhabbā niyāmaṁ okkamituṁ kusalesu dhammesu sammattaṁ, sabbe devā mātughātakā pitughātakā arahantaghātakā ruhiruppādakā saṅghabhedakā, sabbe devā pāṇātipātino adinnādāyino kāmesumicchācārino musāvādino pisuṇāvācā pharusāvācā samphappalāpino abhijjhāluno byāpannacittā micchādiṭṭhikāti?\nNa hevaṁ vattabbe …pe…."}},{"id":"kv1.3:2","sourceIds":["kv1.3:2.1","kv1.3:2.2"],"kind":"text","text":{"pi":"Nanu atthi devā ajaḷā anelamūgā viññū na hatthasaṁvācikā paṭibalā subhāsitadubbhāsitānaṁ atthamaññātuṁ, atthi devā buddhe pasannā dhamme pasannā saṅghe pasannā, buddhaṁ bhagavantaṁ payirupāsanti, buddhaṁ bhagavantaṁ pañhaṁ pucchanti, buddhena bhagavatā pañhe vissajjite attamanā honti, atthi devā na kammāvaraṇena samannāgatā na kilesāvaraṇena samannāgatā na vipākāvaraṇena samannāgatā saddhā chandikā paññavanto bhabbā niyāmaṁ okkamituṁ kusalesu dhammesu sammattaṁ, atthi devā na mātughātakā na pitughātakā na arahantaghātakā na ruhiruppādakā na saṅghabhedakā, atthi devā na pāṇātipātino na adinnādāyino na kāmesumicchācārino na musāvādino na pisuṇāvācā na pharusāvācā na samphappalāpino na abhijjhāluno abyāpannacittā sammādiṭṭhikāti?\nĀmantā."}},{"id":"kv1.3:3","sourceIds":["kv1.3:3.1","kv1.3:3.2","kv1.3:3.3","kv1.3:3.4"],"kind":"text","text":{"pi":"Hañci atthi devā ajaḷā anelamūgā viññū na hatthasaṁvācikā paṭibalā subhāsitadubbhāsitānaṁ atthamaññātuṁ …pe…\natthi devā buddhe pasannā …pe…\nsammādiṭṭhikā, no ca vata re vattabbe—\n“natthi devesu brahmacariyavāso”ti."}},{"id":"kv1.3:4","sourceIds":["kv1.3:4.1","kv1.3:4.2","kv1.3:4.3","kv1.3:4.4"],"kind":"text","text":{"pi":"Atthi devesu brahmacariyavāsoti?\nĀmantā.\nAtthi tattha pabbajjā muṇḍiyaṁ kāsāvadhāraṇā pattadhāraṇā, devesu sammāsambuddhā uppajjanti, paccekasambuddhā uppajjanti, sāvakayugaṁ uppajjatīti?\nNa hevaṁ vattabbe …pe…."}},{"id":"kv1.3:5","sourceIds":["kv1.3:5.1","kv1.3:5.2","kv1.3:5.3","kv1.3:5.4","kv1.3:5.5","kv1.3:5.6","kv1.3:5.7","kv1.3:5.8"],"kind":"text","text":{"pi":"Devesu pabbajjā natthīti, natthi devesu brahmacariyavāsoti?\nĀmantā.\nYattha atthi pabbajjā tattheva brahmacariyavāso, yattha natthi pabbajjā natthi tattha brahmacariyavāsoti?\nNa hevaṁ vattabbe …pe…\nyattha atthi pabbajjā tattheva brahmacariyavāso, yattha natthi pabbajjā natthi tattha brahmacariyavāsoti?\nĀmantā.\nYo pabbajati tasseva brahmacariyavāso, yo na pabbajati natthi tassa brahmacariyavāsoti?\nNa hevaṁ vattabbe …pe…."}},{"id":"kv1.3:6","sourceIds":["kv1.3:6.1","kv1.3:6.2","kv1.3:6.3","kv1.3:6.4","kv1.3:6.5","kv1.3:6.6","kv1.3:6.7","kv1.3:6.8"],"kind":"text","text":{"pi":"Devesu muṇḍiyaṁ natthīti, natthi devesu brahmacariyavāsoti?\nĀmantā.\nYattha atthi muṇḍiyaṁ tattheva brahmacariyavāso, yattha natthi muṇḍiyaṁ natthi tattha brahmacariyavāsoti?\nNa hevaṁ vattabbe …pe…\nyattha atthi muṇḍiyaṁ tattheva brahmacariyavāso, yattha natthi muṇḍiyaṁ natthi tattha brahmacariyavāsoti?\nĀmantā.\nYo muṇḍo hoti tasseva brahmacariyavāso, yo muṇḍo na hoti natthi tassa brahmacariyavāsoti?\nNa hevaṁ vattabbe …pe…."}},{"id":"kv1.3:7","sourceIds":["kv1.3:7.1","kv1.3:7.2","kv1.3:7.3","kv1.3:7.4","kv1.3:7.5","kv1.3:7.6","kv1.3:7.7","kv1.3:7.8"],"kind":"text","text":{"pi":"Devesu kāsāvadhāraṇā natthīti, natthi devesu brahmacariyavāsoti?\nĀmantā.\nYattha atthi kāsāvadhāraṇā tattheva brahmacariyavāso, yattha natthi kāsāvadhāraṇā natthi tattha brahmacariyavāsoti?\nNa hevaṁ vattabbe …pe…\nyattha atthi kāsāvadhāraṇā tattheva brahmacariyavāso, yattha natthi kāsāvadhāraṇā natthi tattha brahmacariyavāsoti?\nĀmantā.\nYo kāsāvaṁ dhāreti tasseva brahmacariyavāso, yo kāsāvaṁ na dhāreti natthi tassa brahmacariyavāsoti?\nNa hevaṁ vattabbe …pe…."}},{"id":"kv1.3:8","sourceIds":["kv1.3:8.1","kv1.3:8.2","kv1.3:8.3","kv1.3:8.4","kv1.3:8.5","kv1.3:8.6","kv1.3:8.7","kv1.3:8.8"],"kind":"text","text":{"pi":"Devesu pattadhāraṇā natthīti, natthi devesu brahmacariyavāsoti?\nĀmantā.\nYattha atthi pattadhāraṇā tattheva brahmacariyavāso, yattha natthi pattadhāraṇā natthi tattha brahmacariyavāsoti?\nNa hevaṁ vattabbe …pe…\nyattha atthi pattadhāraṇā tattheva brahmacariyavāso, yattha natthi pattadhāraṇā natthi tattha brahmacariyavāsoti?\nĀmantā?\nYo pattaṁ dhāreti tasseva brahmacariyavāso, yo pattaṁ na dhāreti natthi tassa brahmacariyavāsoti?\nNa hevaṁ vattabbe …pe…."}},{"id":"kv1.3:9","sourceIds":["kv1.3:9.1","kv1.3:9.2","kv1.3:9.3","kv1.3:9.4","kv1.3:9.5","kv1.3:9.6","kv1.3:9.7","kv1.3:9.8","kv1.3:9.9"],"kind":"text","text":{"pi":"Devesu sammāsambuddhā nuppajjantīti, natthi devesu brahmacariyavāsoti?\nĀmantā.\nYattha sammāsambuddhā uppajjanti tattheva brahmacariyavāso, yattha sammāsambuddhā nuppajjanti natthi tattha brahmacariyavāsoti?\nNa hevaṁ vattabbe …pe…\nyattha sammāsambuddhā uppajjanti tattheva brahmacariyavāso, yattha sammāsambuddhā nuppajjanti natthi tattha brahmacariyavāsoti?\nĀmantā.\nLumbiniyā bhagavā jāto, bodhiyā mūle abhisambuddho, bārāṇasiyaṁ bhagavatā dhammacakkaṁ pavattitaṁ;\ntattheva brahmacariyavāso, natthaññatra brahmacariyavāsoti?\nNa hevaṁ vattabbe …pe…."}},{"id":"kv1.3:10","sourceIds":["kv1.3:10.1","kv1.3:10.2","kv1.3:10.3","kv1.3:10.4","kv1.3:10.5","kv1.3:10.6","kv1.3:10.7","kv1.3:10.8"],"kind":"text","text":{"pi":"Devesu paccekasambuddhā nuppajjantīti, natthi devesu brahmacariyavāsoti?\nĀmantā.\nYattha paccekasambuddhā uppajjanti tattheva brahmacariyavāso, yattha paccekasambuddhā nuppajjanti natthi tattha brahmacariyavāsoti?\nNa hevaṁ vattabbe …pe…\nyattha paccekasambuddhā uppajjanti tattheva brahmacariyavāso, yattha paccekasambuddhā nuppajjanti natthi tattha brahmacariyavāsoti?\nĀmantā.\nMajjhimesu janapadesu paccekasambuddhā uppajjanti, tattheva brahmacariyavāso, natthaññatra brahmacariyavāsoti?\nNa hevaṁ vattabbe …pe…."}},{"id":"kv1.3:11","sourceIds":["kv1.3:11.1","kv1.3:11.2","kv1.3:11.3","kv1.3:11.4","kv1.3:11.5","kv1.3:11.6","kv1.3:11.7","kv1.3:11.8"],"kind":"text","text":{"pi":"Devesu sāvakayugaṁ nuppajjatīti, natthi devesu brahmacariyavāsoti?\nĀmantā.\nYattha sāvakayugaṁ uppajjati tattheva brahmacariyavāso, yattha sāvakayugaṁ nuppajjati natthi tattha brahmacariyavāsoti?\nNa hevaṁ vattabbe …pe…\nyattha sāvakayugaṁ uppajjati tattheva brahmacariyavāso, yattha sāvakayugaṁ nuppajjati natthi tattha brahmacariyavāsoti?\nĀmantā.\nMagadhesu sāvakayugaṁ uppannaṁ, tattheva brahmacariyavāso, natthaññatra brahmacariyavāsoti?\nNa hevaṁ vattabbe …pe…."}},{"id":"kv1.3:12","sourceIds":["kv1.3:12.1","kv1.3:12.2","kv1.3:12.3","kv1.3:12.4"],"kind":"text","text":{"pi":"Atthi devesu brahmacariyavāsoti?\nĀmantā.\nSabbadevesu atthi brahmacariyavāsoti?\nNa hevaṁ vattabbe …pe…."}},{"id":"kv1.3:13","sourceIds":["kv1.3:13.1","kv1.3:13.2","kv1.3:13.3","kv1.3:13.4"],"kind":"text","text":{"pi":"Atthi manussesu brahmacariyavāsoti?\nĀmantā.\nSabbamanussesu atthi brahmacariyavāsoti?\nNa hevaṁ vattabbe …pe…."}},{"id":"kv1.3:14","sourceIds":["kv1.3:14.1","kv1.3:14.2","kv1.3:14.3","kv1.3:14.4"],"kind":"text","text":{"pi":"Atthi devesu brahmacariyavāsoti?\nĀmantā.\nAsaññasattesu devesu atthi brahmacariyavāsoti?\nNa hevaṁ vattabbe …pe…."}},{"id":"kv1.3:15","sourceIds":["kv1.3:15.1","kv1.3:15.2","kv1.3:15.3","kv1.3:15.4"],"kind":"text","text":{"pi":"Atthi manussesu brahmacariyavāsoti?\nĀmantā.\nPaccantimesu janapadesu atthi brahmacariyavāso milakkhesu aviññātāresu yattha natthi gati bhikkhūnaṁ bhikkhunīnaṁ upāsakānaṁ upāsikānanti?\nNa hevaṁ vattabbe."}},{"id":"kv1.3:16","sourceIds":["kv1.3:16.1","kv1.3:16.2","kv1.3:16.3","kv1.3:16.4"],"kind":"text","text":{"pi":"Atthi devesu brahmacariyavāsoti?\nAtthi yattha atthi, atthi yattha natthīti.\nAsaññasattesu devesu atthi yattha atthi, atthi yattha natthi brahmacariyavāso, saññasattesu devesu atthi yattha atthi, atthi yattha natthi brahmacariyavāsoti?\nNa hevaṁ vattabbe."}},{"id":"kv1.3:17","sourceIds":["kv1.3:17.1","kv1.3:17.2","kv1.3:17.3","kv1.3:17.4","kv1.3:17.5","kv1.3:17.6","kv1.3:17.7","kv1.3:17.8"],"kind":"text","text":{"pi":"Devesu atthi yattha atthi, atthi yattha natthi brahmacariyavāsoti?\nĀmantā.\nKattha atthi, kattha natthīti?\nAsaññasattesu devesu natthi brahmacariyavāso, saññasattesu devesu atthi brahmacariyavāsoti.\nAsaññasattesu devesu natthi brahmacariyavāsoti?\nĀmantā.\nSaññasattesu devesu natthi brahmacariyavāsoti?\nNa hevaṁ vattabbe."}},{"id":"kv1.3:18","sourceIds":["kv1.3:18.1","kv1.3:18.2","kv1.3:18.3","kv1.3:18.4"],"kind":"text","text":{"pi":"Saññasattesu devesu atthi brahmacariyavāsoti?\nĀmantā.\nAsaññasattesu devesu atthi brahmacariyavāsoti?\nNa hevaṁ vattabbe."}},{"id":"kv1.3:19","sourceIds":["kv1.3:19.1","kv1.3:19.2","kv1.3:19.3","kv1.3:19.4"],"kind":"text","text":{"pi":"Atthi manussesu brahmacariyavāsoti?\nAtthi yattha atthi, atthi yattha natthīti.\nPaccantimesu janapadesu atthi yattha atthi, atthi yattha natthi brahmacariyavāso milakkhesu aviññātāresu yattha natthi gati bhikkhūnaṁ bhikkhunīnaṁ upāsakānaṁ upāsikānaṁ, majjhimesu janapadesu atthi yattha atthi, atthi yattha natthi brahmacariyavāsoti?\nNa hevaṁ vattabbe."}},{"id":"kv1.3:20","sourceIds":["kv1.3:20.1","kv1.3:20.2","kv1.3:20.3","kv1.3:20.4","kv1.3:20.5","kv1.3:20.6","kv1.3:20.7","kv1.3:20.8"],"kind":"text","text":{"pi":"Manussesu atthi yattha atthi, atthi yattha natthi brahmacariyavāsoti?\nĀmantā.\nKattha atthi, kattha natthīti?\nPaccantimesu janapadesu natthi brahmacariyavāso milakkhesu aviññātāresu yattha natthi gati bhikkhūnaṁ bhikkhunīnaṁ upāsakānaṁ upāsikānaṁ, majjhimesu janapadesu atthi brahmacariyavāsoti.\nPaccantimesu janapadesu natthi brahmacariyavāso milakkhesu aviññātāresu yattha natthi gati bhikkhūnaṁ bhikkhunīnaṁ upāsakānaṁ upāsikānanti?\nĀmantā.\nMajjhimesu janapadesu natthi brahmacariyavāsoti?\nNa hevaṁ vattabbe."}},{"id":"kv1.3:21","sourceIds":["kv1.3:21.1","kv1.3:21.2","kv1.3:21.3","kv1.3:21.4"],"kind":"text","text":{"pi":"Majjhimesu janapadesu atthi brahmacariyavāsoti?\nĀmantā.\nPaccantimesu janapadesu atthi brahmacariyavāso milakkhesu aviññātāresu yattha natthi gati bhikkhūnaṁ bhikkhunīnaṁ upāsakānaṁ upāsikānanti?\nNa hevaṁ vattabbe."}},{"id":"kv1.3:22","sourceIds":["kv1.3:22.1","kv1.3:22.2","kv1.3:22.3","kv1.3:22.4","kv1.3:22.5","kv1.3:22.6","kv1.3:22.7","kv1.3:22.8","kv1.3:22.9"],"kind":"text","text":{"pi":"Atthi devesu brahmacariyavāsoti?\nĀmantā.\nNanu vuttaṁ bhagavatā—\n“tīhi, bhikkhave, ṭhānehi jambudīpakā manussā uttarakuruke ca manusse adhigaṇhanti deve ca tāvatiṁse.\nKatamehi tīhi?\nSūrā, satimanto, idha brahmacariyavāso”ti.\nAttheva suttantoti?\nĀmantā.\nTena hi natthi devesu brahmacariyavāsoti."}},{"id":"kv1.3:23","sourceIds":["kv1.3:23.1","kv1.3:23.2","kv1.3:23.3","kv1.3:23.4","kv1.3:23.5"],"kind":"text","text":{"pi":"Sāvatthiyaṁ vuttaṁ bhagavatā—\n“idha brahmacariyavāso”ti?\nĀmantā.\nSāvatthiyaṁyeva brahmacariyavāso, natthi aññatra brahmacariyavāsoti?\nNa hevaṁ vattabbe."}},{"id":"kv1.3:24","sourceIds":["kv1.3:24.1","kv1.3:24.2","kv1.3:24.3","kv1.3:24.4","kv1.3:24.5"],"kind":"text","text":{"pi":"Anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa kuhiṁ phaluppattīti?\nTattheva.\nHañci anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa tahiṁ phaluppatti;\nno ca vata re vattabbe—\n“natthi devesu brahmacariyavāso”ti."}},{"id":"kv1.3:25","sourceIds":["kv1.3:25.1","kv1.3:25.2","kv1.3:25.3","kv1.3:25.4","kv1.3:25.5"],"kind":"text","text":{"pi":"Anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa kuhiṁ bhāroharaṇaṁ, kuhiṁ dukkhapariññātaṁ, kuhiṁ kilesappahānaṁ, kuhiṁ nirodhasacchikiriyā, kuhiṁ akuppapaṭivedhoti?\nTattheva.\nHañci anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa tahiṁ akuppapaṭivedho;\nno ca vata re vattabbe—\n“natthi devesu brahmacariyavāso”ti."}},{"id":"kv1.3:26","sourceIds":["kv1.3:26.1","kv1.3:26.2","kv1.3:26.3","kv1.3:26.4"],"kind":"text","text":{"pi":"Anāgāmissa puggalassa pañcorambhāgiyāni saṁyojanāni pahīnāni, pañcuddhambhāgiyāni saṁyojanāni appahīnāni, ito cutassa tattha upapannassa tahiṁ phaluppatti, tahiṁ bhāroharaṇaṁ, tahiṁ dukkhapariññātaṁ, tahiṁ kilesappahānaṁ, tahiṁ nirodhasacchikiriyā, tahiṁ akuppapaṭivedho;\nkenaṭṭhena vadesi—\n“natthi devesu brahmacariyavāso”ti?\nHanda hi anāgāmī puggalo idha bhāvitena maggena tattha phalaṁ sacchikarotīti."}},{"id":"kv1.3:27","sourceIds":["kv1.3:27.0","kv1.3:27.1","kv1.3:27.2","kv1.3:27.3","kv1.3:27.4"],"kind":"text","text":{"pi":"Saṁsandanabrahmacariyakathā\nAnāgāmī puggalo idha bhāvitena maggena tattha phalaṁ sacchikarotīti?\nĀmantā.\nSotāpanno puggalo tattha bhāvitena maggena idha phalaṁ sacchikarotīti?\nNa hevaṁ vattabbe."}},{"id":"kv1.3:28","sourceIds":["kv1.3:28.1","kv1.3:28.2","kv1.3:28.3","kv1.3:28.4"],"kind":"text","text":{"pi":"Anāgāmī puggalo idha bhāvitena maggena tattha phalaṁ sacchikarotīti?\nĀmantā.\nSakadāgāmī puggalo idha parinibbāyipuggalo tattha bhāvitena maggena idha phalaṁ sacchikarotīti?\nNa hevaṁ vattabbe."}},{"id":"kv1.3:29","sourceIds":["kv1.3:29.1","kv1.3:29.2","kv1.3:29.3","kv1.3:29.4"],"kind":"text","text":{"pi":"Sotāpanno puggalo idha bhāvitena maggena idha phalaṁ sacchikarotīti?\nĀmantā.\nAnāgāmī puggalo tattha bhāvitena maggena tattha phalaṁ sacchikarotīti?\nNa hevaṁ vattabbe."}},{"id":"kv1.3:30","sourceIds":["kv1.3:30.1","kv1.3:30.2","kv1.3:30.3","kv1.3:30.4"],"kind":"text","text":{"pi":"Sakadāgāmī puggalo idha parinibbāyipuggalo idha bhāvitena maggena idha phalaṁ sacchikarotīti?\nĀmantā.\nAnāgāmī puggalo tattha bhāvitena maggena tattha phalaṁ sacchikarotīti?\nNa hevaṁ vattabbe …pe…."}},{"id":"kv1.3:31","sourceIds":["kv1.3:31.1","kv1.3:31.2","kv1.3:31.3","kv1.3:31.4"],"kind":"text","text":{"pi":"Idha vihāya niṭṭhassa puggalassa maggo ca bhāvīyati, na ca kilesā pahīyantīti?\nĀmantā.\nSotāpattiphalasacchikiriyāya paṭipannassa puggalassa maggo ca bhāvīyati, na ca kilesā pahīyantīti?\nNa hevaṁ vattabbe …pe…."}},{"id":"kv1.3:32","sourceIds":["kv1.3:32.1","kv1.3:32.2","kv1.3:32.3","kv1.3:32.4","kv1.3:32.5"],"kind":"text","text":{"pi":"Idha vihāya niṭṭhassa puggalassa maggo ca bhāvīyati, na ca kilesā pahīyantīti?\nĀmantā.\nSakadāgāmiphalasacchikiriyāya paṭipannassa puggalassa …pe…\narahattasacchikiriyāya paṭipannassa puggalassa maggo ca bhāvīyati, na ca kilesā pahīyantīti?\nNa hevaṁ vattabbe …pe…."}},{"id":"kv1.3:33","sourceIds":["kv1.3:33.1","kv1.3:33.2","kv1.3:33.3","kv1.3:33.4"],"kind":"text","text":{"pi":"Sotāpattiphalasacchikiriyāya paṭipannassa puggalassa apubbaṁ acarimaṁ maggo ca bhāvīyati, kilesā ca pahīyantīti?\nĀmantā.\nIdha vihāya niṭṭhassa puggalassa apubbaṁ acarimaṁ maggo ca bhāvīyati, kilesā ca pahīyantīti?\nNa hevaṁ vattabbe."}},{"id":"kv1.3:34","sourceIds":["kv1.3:34.1","kv1.3:34.2","kv1.3:34.3","kv1.3:34.4","kv1.3:34.5"],"kind":"text","text":{"pi":"Sakadāgāmiphalasacchikiriyāya paṭipannassa puggalassa …pe…\narahattasacchikiriyāya paṭipannassa puggalassa apubbaṁ acarimaṁ maggo ca bhāvīyati, kilesā ca pahīyantīti?\nĀmantā.\nIdha vihāya niṭṭhassa puggalassa apubbaṁ acarimaṁ maggo ca bhāvīyati, kilesā ca pahīyantīti?\nNa hevaṁ vattabbe."}},{"id":"kv1.3:35","sourceIds":["kv1.3:35.1","kv1.3:35.2","kv1.3:35.3","kv1.3:35.4"],"kind":"text","text":{"pi":"Anāgāmī puggalo katakaraṇīyo bhāvitabhāvano tattha upapajjatīti?\nĀmantā.\nArahā upapajjatīti?\nNa hevaṁ vattabbe."}},{"id":"kv1.3:36","sourceIds":["kv1.3:36.1","kv1.3:36.2","kv1.3:36.3","kv1.3:36.4"],"kind":"text","text":{"pi":"Arahā upapajjatīti?\nĀmantā.\nAtthi arahato punabbhavoti?\nNa hevaṁ vattabbe."}},{"id":"kv1.3:37","sourceIds":["kv1.3:37.1","kv1.3:37.2","kv1.3:37.3","kv1.3:37.4"],"kind":"text","text":{"pi":"Atthi arahato punabbhavoti?\nĀmantā.\nArahā bhavena bhavaṁ gacchati, gatiyā gatiṁ gacchati, saṁsārena saṁsāraṁ gacchati, upapattiyā upapattiṁ gacchatīti?\nNa hevaṁ vattabbe."}},{"id":"kv1.3:38","sourceIds":["kv1.3:38.1","kv1.3:38.2","kv1.3:38.3","kv1.3:38.4"],"kind":"text","text":{"pi":"Anāgāmī puggalo katakaraṇīyo bhāvitabhāvano anohaṭabhāro tattha upapajjatīti?\nĀmantā.\nBhāroharaṇāya puna maggaṁ bhāvetīti?\nNa hevaṁ vattabbe."}},{"id":"kv1.3:39","sourceIds":["kv1.3:39.1","kv1.3:39.2","kv1.3:39.3","kv1.3:39.4"],"kind":"text","text":{"pi":"Anāgāmī puggalo katakaraṇīyo bhāvitabhāvano apariññātadukkho appahīnakileso asacchikatanirodho appaṭividdhākuppo tattha upapajjatīti?\nĀmantā.\nAkuppapaṭivedhāya puna maggaṁ bhāvetīti?\nNa hevaṁ vattabbe."}},{"id":"kv1.3:40","sourceIds":["kv1.3:40.1","kv1.3:40.2","kv1.3:40.3","kv1.3:40.4"],"kind":"text","text":{"pi":"Anāgāmī puggalo katakaraṇīyo bhāvitabhāvano anohaṭabhāro tattha upapajjati, na ca bhāroharaṇāya puna maggaṁ bhāvetīti?\nĀmantā.\nAnohaṭabhāro ca tattha parinibbāyatīti?\nNa hevaṁ vattabbe."}},{"id":"kv1.3:41","sourceIds":["kv1.3:41.1","kv1.3:41.2","kv1.3:41.3","kv1.3:41.4","kv1.3:41.5"],"kind":"text","text":{"pi":"Anāgāmī puggalo katakaraṇīyo bhāvitabhāvano apariññātadukkho appahīnakileso asacchikatanirodho appaṭividdhākuppo tattha upapajjati, na ca akuppapaṭivedhāya puna maggaṁ bhāvetīti?\nĀmantā.\nAppaṭividdhākuppo ca tattha parinibbāyatīti?\nNa hevaṁ vattabbe.\nYathā migo sallena viddho dūrampi gantvā kālaṁ karoti, evamevaṁ anāgāmī puggalo idha bhāvitena maggena tattha phalaṁ sacchikarotīti."}},{"id":"kv1.3:42","sourceIds":["kv1.3:42.1","kv1.3:42.2","kv1.3:42.3"],"kind":"text","text":{"pi":"Yathā migo sallena viddho dūrampi gantvā sasallova kālaṁ karoti, evamevaṁ anāgāmī puggalo idha bhāvitena maggena tattha sasallova parinibbāyatīti?\nNa hevaṁ vattabbe …pe….\nBrahmacariyakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv1.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}