{"id":"kv1.4","title":"Odhisokathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv1.4","title":"Odhisokathā","units":[{"id":"kv1.4:0","sourceIds":["kv1.4:0.1","kv1.4:0.2","kv1.4:0.3","kv1.4:0.4"],"kind":"text","text":{"pi":"Kathāvatthu\nMahāpaṇṇāsaka\nPaṭhamavagga\nOdhisokathā"}},{"id":"kv1.4:1","sourceIds":["kv1.4:1.1","kv1.4:1.2","kv1.4:1.3","kv1.4:1.4","kv1.4:1.5","kv1.4:1.6","kv1.4:1.7","kv1.4:1.8"],"kind":"text","text":{"pi":"Odhisodhiso kilese jahatīti?\nĀmantā.\nSotāpattiphalasacchikiriyāya paṭipanno puggalo dukkhadassanena kiṁ jahatīti?\nSakkāyadiṭṭhiṁ vicikicchaṁ sīlabbataparāmāsaṁ tadekaṭṭhe ca kilese ekadese jahatīti.\nEkadesaṁ sotāpanno, ekadesaṁ na sotāpanno, ekadesaṁ sotāpattiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ sattakkhattuparamo, kolaṅkolo, ekabījī, buddhe aveccappasādena samannāgato, dhamme …pe…\nsaṅghe …pe…\nariyakantehi sīlehi samannāgato ekadesaṁ ariyakantehi sīlehi na samannāgatoti?\nNa hevaṁ vattabbe …pe…."}},{"id":"kv1.4:2","sourceIds":["kv1.4:2.1","kv1.4:2.2","kv1.4:2.3","kv1.4:2.4","kv1.4:2.5"],"kind":"text","text":{"pi":"Samudayadassanena kiṁ jahatīti?\nSakkāyadiṭṭhiṁ jahati, vicikicchaṁ sīlabbataparāmāsaṁ tadekaṭṭhe ca kilese ekadese jahatīti.\nEkadesaṁ sotāpanno, ekadesaṁ na sotāpanno …pe…\nekadesaṁ ariyakantehi sīlehi samannāgato, ekadesaṁ ariyakantehi sīlehi na samannāgatoti?\nNa hevaṁ vattabbe …pe…."}},{"id":"kv1.4:3","sourceIds":["kv1.4:3.1","kv1.4:3.2","kv1.4:3.3","kv1.4:3.4","kv1.4:3.5"],"kind":"text","text":{"pi":"Nirodhadassanena kiṁ jahatīti?\nVicikicchaṁ sīlabbataparāmāsaṁ tadekaṭṭhe ca kilese ekadese jahatīti.\nEkadesaṁ sotāpanno, ekadesaṁ na sotāpanno …pe…\nekadesaṁ ariyakantehi sīlehi samannāgato, ekadesaṁ ariyakantehi sīlehi na samannāgatoti?\nNa hevaṁ vattabbe …pe…."}},{"id":"kv1.4:4","sourceIds":["kv1.4:4.1","kv1.4:4.2","kv1.4:4.3","kv1.4:4.4","kv1.4:4.5","kv1.4:4.6"],"kind":"text","text":{"pi":"Maggadassanena kiṁ jahatīti?\nSīlabbataparāmāsaṁ tadekaṭṭhe ca kilese jahatīti.\nEkadesaṁ sotāpanno, ekadesaṁ na sotāpanno, ekadesaṁ sotāpattiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ sattakkhattuparamo, kolaṅkolo, ekabījī, buddhe aveccappasādena samannāgato, dhamme …pe…\nsaṅghe …pe…\nariyakantehi sīlehi samannāgato, ekadesaṁ ariyakantehi sīlehi na samannāgatoti?\nNa hevaṁ vattabbe …pe…."}},{"id":"kv1.4:5","sourceIds":["kv1.4:5.1","kv1.4:5.2","kv1.4:5.3","kv1.4:5.4"],"kind":"text","text":{"pi":"Sakadāgāmiphalasacchikiriyāya paṭipanno puggalo dukkhadassanena kiṁ jahatīti?\nOḷārikaṁ kāmarāgaṁ jahati, oḷārikaṁ byāpādaṁ tadekaṭṭhe ca kilese ekadese jahatīti.\nEkadesaṁ sakadāgāmī, ekadesaṁ na sakadāgāmī, ekadesaṁ sakadāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharatīti?\nNa hevaṁ vattabbe …pe…."}},{"id":"kv1.4:6","sourceIds":["kv1.4:6.1","kv1.4:6.2","kv1.4:6.3","kv1.4:6.4"],"kind":"text","text":{"pi":"Samudayadassanena kiṁ jahatīti?\nOḷārikaṁ kāmarāgaṁ jahati, oḷārikaṁ byāpādaṁ tadekaṭṭhe ca kilese ekadese jahatīti.\nEkadesaṁ sakadāgāmī, ekadesaṁ na sakadāgāmī, ekadesaṁ sakadāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharatīti?\nNa hevaṁ vattabbe …pe…."}},{"id":"kv1.4:7","sourceIds":["kv1.4:7.1","kv1.4:7.2","kv1.4:7.3","kv1.4:7.4"],"kind":"text","text":{"pi":"Nirodhadassanena kiṁ jahatīti?\nOḷārikaṁ byāpādaṁ jahati, tadekaṭṭhe ca kilese ekadese jahatīti.\nEkadesaṁ sakadāgāmī, ekadesaṁ na sakadāgāmī, ekadesaṁ sakadāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharatīti?\nNa hevaṁ vattabbe …pe…."}},{"id":"kv1.4:8","sourceIds":["kv1.4:8.1","kv1.4:8.2","kv1.4:8.3","kv1.4:8.4"],"kind":"text","text":{"pi":"Maggadassanena kiṁ jahatīti?\nOḷārikaṁ byāpādaṁ jahati, tadekaṭṭhe ca kilese jahatīti.\nEkadesaṁ sakadāgāmī, ekadesaṁ na sakadāgāmī, ekadesaṁ sakadāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharatīti?\nNa hevaṁ vattabbe …pe…."}},{"id":"kv1.4:9","sourceIds":["kv1.4:9.1","kv1.4:9.2","kv1.4:9.3","kv1.4:9.4"],"kind":"text","text":{"pi":"Anāgāmiphalasacchikiriyāya paṭipanno puggalo dukkhadassanena kiṁ jahatīti?\nAṇusahagataṁ kāmarāgaṁ jahati, aṇusahagataṁ byāpādaṁ tadekaṭṭhe ca kilese ekadese jahatīti.\nEkadesaṁ anāgāmī, ekadesaṁ na anāgāmī, ekadesaṁ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ antarāparinibbāyī, upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṁsoto akaniṭṭhagāmī, ekadesaṁ na uddhaṁsoto akaniṭṭhagāmīti?\nNa hevaṁ vattabbe …pe…."}},{"id":"kv1.4:10","sourceIds":["kv1.4:10.1","kv1.4:10.2","kv1.4:10.3","kv1.4:10.4","kv1.4:10.5"],"kind":"text","text":{"pi":"Samudayadassanena kiṁ jahatīti?\nAṇusahagataṁ kāmarāgaṁ jahati, aṇusahagataṁ byāpādaṁ tadekaṭṭhe ca kilese ekadese jahatīti.\nEkadesaṁ anāgāmī, ekadesaṁ na anāgāmī …pe…\nekadesaṁ uddhaṁsoto akaniṭṭhagāmī, ekadesaṁ na uddhaṁsoto akaniṭṭhagāmīti?\nNa hevaṁ vattabbe …pe…."}},{"id":"kv1.4:11","sourceIds":["kv1.4:11.1","kv1.4:11.2","kv1.4:11.3","kv1.4:11.4","kv1.4:11.5"],"kind":"text","text":{"pi":"Nirodhadassanena kiṁ jahatīti?\nAṇusahagataṁ byāpādaṁ jahati, tadekaṭṭhe ca kilese ekadese jahatīti.\nEkadesaṁ anāgāmī, ekadesaṁ na anāgāmī …pe…\nekadesaṁ uddhaṁsoto akaniṭṭhagāmī, ekadesaṁ na uddhaṁsoto akaniṭṭhagāmīti?\nNa hevaṁ vattabbe …pe…."}},{"id":"kv1.4:12","sourceIds":["kv1.4:12.1","kv1.4:12.2","kv1.4:12.3","kv1.4:12.4"],"kind":"text","text":{"pi":"Maggadassanena kiṁ jahatīti?\nTadekaṭṭhe ca kilese jahatīti.\nEkadesaṁ anāgāmī, ekadesaṁ na anāgāmī, ekadesaṁ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ antarāparinibbāyī, upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṁsoto akaniṭṭhagāmī, ekadesaṁ na uddhaṁsoto akaniṭṭhagāmīti?\nNa hevaṁ vattabbe …pe…."}},{"id":"kv1.4:13","sourceIds":["kv1.4:13.1","kv1.4:13.2","kv1.4:13.3","kv1.4:13.4"],"kind":"text","text":{"pi":"Arahattasacchikiriyāya paṭipanno puggalo dukkhadassanena kiṁ jahatīti?\nRūparāgaṁ arūparāgaṁ mānaṁ uddhaccaṁ avijjaṁ tadekaṭṭhe ca kilese ekadese jahatīti.\nEkadesaṁ arahā, ekadesaṁ na arahā, ekadesaṁ arahattappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ vītarāgo vītadoso vītamoho katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto ukkhittapaligho saṅkiṇṇaparikho abbūḷhesiko niraggaḷo ariyo pannaddhajo pannabhāro visaññutto suvijitavijayo, dukkhaṁ tassa pariññātaṁ, samudayo pahīno, nirodho sacchikato, maggo bhāvito, abhiññeyyaṁ abhiññātaṁ, pariññeyyaṁ pariññātaṁ, pahātabbaṁ pahīnaṁ, bhāvetabbaṁ bhāvitaṁ, sacchikātabbaṁ sacchikataṁ, (ekadesaṁ sacchikātabbaṁ sacchikataṁ) ekadesaṁ sacchikātabbaṁ na sacchikatanti?\nNa hevaṁ vattabbe …pe…."}},{"id":"kv1.4:14","sourceIds":["kv1.4:14.1","kv1.4:14.2","kv1.4:14.3","kv1.4:14.4","kv1.4:14.5"],"kind":"text","text":{"pi":"Samudayadassanena kiṁ jahatīti?\nRūparāgaṁ arūparāgaṁ jahati, mānaṁ uddhaccaṁ avijjaṁ tadekaṭṭhe ca kilese ekadese jahatīti.\nEkadesaṁ arahā, ekadesaṁ na arahā …pe…\nekadesaṁ sacchikātabbaṁ sacchikataṁ, ekadesaṁ sacchikātabbaṁ na sacchikatanti?\nNa hevaṁ vattabbe …pe…."}},{"id":"kv1.4:15","sourceIds":["kv1.4:15.1","kv1.4:15.2","kv1.4:15.3","kv1.4:15.4","kv1.4:15.5"],"kind":"text","text":{"pi":"Nirodhadassanena kiṁ jahatīti?\nMānaṁ jahati, uddhaccaṁ avijjaṁ tadekaṭṭhe ca kilese ekadese jahatīti.\nEkadesaṁ arahā, ekadesaṁ na arahā …pe…\nekadesaṁ sacchikātabbaṁ sacchikataṁ, ekadesaṁ sacchikātabbaṁ na sacchikatanti?\nNa hevaṁ vattabbe …pe…."}},{"id":"kv1.4:16","sourceIds":["kv1.4:16.1","kv1.4:16.2","kv1.4:16.3","kv1.4:16.4"],"kind":"text","text":{"pi":"Maggadassanena kiṁ jahatīti?\nUddhaccaṁ avijjaṁ tadekaṭṭhe ca kilese jahatīti.\nEkadesaṁ arahā, ekadesaṁ na arahā, ekadesaṁ arahattappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ vītarāgo vītadoso vītamoho katakaraṇīyo ohitabhāro anuppattasadattho parikkhīṇabhavasaṁyojano sammadaññāvimutto ukkhittapaligho saṅkiṇṇaparikho abbūḷhesiko niraggaḷo ariyo pannaddhajo pannabhāro visaññutto suvijitavijayo, dukkhaṁ tassa pariññātaṁ, samudayo pahīno, nirodho sacchikato, maggo bhāvito, abhiññeyyaṁ abhiññātaṁ, pariññeyyaṁ pariññātaṁ, pahātabbaṁ pahīnaṁ, bhāvetabbaṁ bhāvitaṁ, sacchikātabbaṁ sacchikataṁ, ekadesaṁ sacchikātabbaṁ sacchikataṁ, ekadesaṁ sacchikātabbaṁ na sacchikatanti?\nNa hevaṁ vattabbe …pe…."}},{"id":"kv1.4:17","sourceIds":["kv1.4:17.1","kv1.4:17.2","kv1.4:17.3","kv1.4:17.4"],"kind":"text","text":{"pi":"Na vattabbaṁ—\n“odhisodhiso kilese jahatī”ti?\nĀmantā.\nNanu vuttaṁ bhagavatā—"}},{"id":"kv1.4:18","sourceIds":["kv1.4:18.1","kv1.4:18.2","kv1.4:18.3","kv1.4:18.4"],"kind":"text","text":{"pi":"“Anupubbena medhāvī,\nthokaṁ thokaṁ khaṇe khaṇe;\nKammāro rajatasseva,\nniddhame malamattano”ti."}},{"id":"kv1.4:19","sourceIds":["kv1.4:19.1","kv1.4:19.2","kv1.4:19.3","kv1.4:19.4"],"kind":"text","text":{"pi":"Attheva suttantoti?\nĀmantā.\nTena hi na vattabbaṁ—\n“odhisodhiso kilese jahatī”ti."}},{"id":"kv1.4:20","sourceIds":["kv1.4:20.1","kv1.4:20.2","kv1.4:20.3"],"kind":"text","text":{"pi":"Odhisodhiso kilese jahatīti?\nĀmantā.\nNanu vuttaṁ bhagavatā—"}},{"id":"kv1.4:21","sourceIds":["kv1.4:21.1","kv1.4:21.2","kv1.4:21.3","kv1.4:21.4","kv1.4:21.5","kv1.4:21.6"],"kind":"text","text":{"pi":"“Sahāvassa dassanasampadāya,\nTayassu dhammā jahitā bhavanti;\nSakkāyadiṭṭhī vicikicchitañca,\nSīlabbataṁ vāpi yadatthi kiñci;\nCatūhapāyehi ca vippamutto,\nChaccābhiṭhānāni abhabba kātun”ti."}},{"id":"kv1.4:22","sourceIds":["kv1.4:22.1","kv1.4:22.2","kv1.4:22.3","kv1.4:22.4"],"kind":"text","text":{"pi":"Attheva suttantoti?\nĀmantā.\nTena hi na vattabbaṁ—\n“odhisodhiso kilese jahatī”ti."}},{"id":"kv1.4:23","sourceIds":["kv1.4:23.1","kv1.4:23.2","kv1.4:23.3","kv1.4:23.4","kv1.4:23.5","kv1.4:23.6","kv1.4:23.7","kv1.4:23.8","kv1.4:23.9","kv1.4:23.10","kv1.4:23.11"],"kind":"text","text":{"pi":"Odhisodhiso kilese jahatīti?\nĀmantā.\nNanu vuttaṁ bhagavatā—\n“yasmiṁ, bhikkhave, samaye ariyasāvakassa virajaṁ vītamalaṁ dhammacakkhuṁ udapādi—\n‘yaṁ kiñci samudayadhammaṁ, sabbaṁ taṁ nirodhadhamman’ti, saha dassanuppādā, bhikkhave, ariyasāvakassa tīṇi saṁyojanāni pahīyanti—\nsakkāyadiṭṭhi vicikicchā sīlabbataparāmāso”ti.\nAttheva suttantoti?\nĀmantā.\nTena hi na vattabbaṁ—\n“odhisodhiso kilese jahatī”ti.\nOdhisokathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv1.4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}