{"id":"kv10.4","title":"Pañcaviññāṇākusalāpiakusalāpītikathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv10.4","title":"Pañcaviññāṇākusalāpiakusalāpītikathā","units":[{"id":"kv10.4:0","sourceIds":["kv10.4:0.1","kv10.4:0.2","kv10.4:0.3","kv10.4:0.4"],"kind":"text","text":{"pi":"Kathāvatthu\nMahāpaṇṇāsaka\nDasamavagga\nPañcaviññāṇākusalāpiakusalāpītikathā"}},{"id":"kv10.4:1","sourceIds":["kv10.4:1.1","kv10.4:1.2","kv10.4:1.3","kv10.4:1.4","kv10.4:1.5","kv10.4:1.6","kv10.4:1.7","kv10.4:1.8","kv10.4:1.9","kv10.4:1.10"],"kind":"text","text":{"pi":"Pañcaviññāṇā kusalāpi akusalāpīti?\nĀmantā.\nNanu pañcaviññāṇā uppannavatthukā uppannārammaṇāti?\nĀmantā.\nHañci pañcaviññāṇā uppannavatthukā uppannārammaṇā, no ca vata re vattabbe—\n“pañcaviññāṇā kusalāpi akusalāpī”ti.\nNanu pañcaviññāṇā purejātavatthukā purejātārammaṇā ajjhattikavatthukā bāhirārammaṇā asambhinnavatthukā asambhinnārammaṇā nānāvatthukā nānārammaṇā na aññamaññassa gocaravisayaṁ paccanubhonti, na asamannāhārā uppajjanti, na amanasikārā uppajjanti, na abbokiṇṇā uppajjanti, na apubbaṁ acarimaṁ uppajjanti, na aññamaññassa samanantarā uppajjanti, nanu pañcaviññāṇā anābhogāti?\nĀmantā.\nHañci pañcaviññāṇā anābhogā, no ca vata re vattabbe—\n“pañcaviññāṇā kusalāpi akusalāpī”ti."}},{"id":"kv10.4:2","sourceIds":["kv10.4:2.1","kv10.4:2.2","kv10.4:2.3","kv10.4:2.4","kv10.4:2.5","kv10.4:2.6","kv10.4:2.7","kv10.4:2.8","kv10.4:2.9","kv10.4:2.10","kv10.4:2.11","kv10.4:2.12","kv10.4:2.13","kv10.4:2.14","kv10.4:2.15","kv10.4:2.16","kv10.4:2.17","kv10.4:2.18","kv10.4:2.19"],"kind":"text","text":{"pi":"Cakkhuviññāṇaṁ kusalanti?\nĀmantā.\nCakkhuviññāṇaṁ suññataṁ ārabbha uppajjatīti?\nNa hevaṁ vattabbe …pe…\ncakkhuviññāṇaṁ suññataṁ ārabbha uppajjatīti?\nĀmantā.\nCakkhuñca paṭicca suññatañca uppajjati cakkhuviññāṇanti?\nNa hevaṁ vattabbe.\nCakkhuñca paṭicca suññatañca uppajjati cakkhuviññāṇanti?\nĀmantā.\n“Cakkhuñca paṭicca suññatañca uppajjati cakkhuviññāṇan”ti—\nattheva suttantoti?\nNatthi.\n“Cakkhuñca paṭicca rūpe ca uppajjati cakkhuviññāṇan”ti—\nattheva suttantoti?\nĀmantā.\nHañci “cakkhuñca paṭicca rūpe ca uppajjati cakkhuviññāṇan”ti—\nattheva suttanto, no ca vata re vattabbe—\n“cakkhuñca paṭicca suññatañca uppajjati cakkhuviññāṇan”ti."}},{"id":"kv10.4:3","sourceIds":["kv10.4:3.1","kv10.4:3.2","kv10.4:3.3","kv10.4:3.4","kv10.4:3.5","kv10.4:3.6","kv10.4:3.7","kv10.4:3.8","kv10.4:3.9","kv10.4:3.10","kv10.4:3.11"],"kind":"text","text":{"pi":"Cakkhuviññāṇaṁ kusalampi akusalampīti?\nĀmantā.\nCakkhuviññāṇaṁ atītānāgataṁ ārabbha uppajjatīti?\nNa hevaṁ vattabbe …pe….\nCakkhuviññāṇaṁ kusalampi akusalampīti?\nĀmantā.\nCakkhuviññāṇaṁ phassaṁ ārabbha …pe…\ncittaṁ ārabbha … cakkhuṁ ārabbha …pe…\nkāyaṁ ārabbha … saddaṁ ārabbha …pe…\nphoṭṭhabbaṁ ārabbha uppajjatīti?\nNa hevaṁ vattabbe …pe…."}},{"id":"kv10.4:4","sourceIds":["kv10.4:4.1","kv10.4:4.2","kv10.4:4.3","kv10.4:4.4","kv10.4:4.5","kv10.4:4.6","kv10.4:4.7","kv10.4:4.8","kv10.4:4.9","kv10.4:4.10","kv10.4:4.11","kv10.4:4.12","kv10.4:4.13","kv10.4:4.14","kv10.4:4.15","kv10.4:4.16"],"kind":"text","text":{"pi":"Manoviññāṇaṁ kusalampi akusalampi, manoviññāṇaṁ suññataṁ ārabbha uppajjatīti?\nĀmantā.\nCakkhuviññāṇaṁ kusalampi akusalampi, cakkhuviññāṇaṁ suññataṁ ārabbha uppajjatīti?\nNa hevaṁ vattabbe …pe…\nmanoviññāṇaṁ kusalampi akusalampi, manoviññāṇaṁ atītānāgataṁ ārabbha uppajjatīti?\nĀmantā.\nCakkhuviññāṇaṁ kusalampi akusalampi, cakkhuviññāṇaṁ atītānāgataṁ ārabbha uppajjatīti?\nNa hevaṁ vattabbe …pe…\nmanoviññāṇaṁ kusalampi akusalampi, manoviññāṇaṁ phassaṁ ārabbha …pe…\ncittaṁ ārabbha …pe…\nkāyaṁ ārabbha … saddaṁ ārabbha …pe…\nphoṭṭhabbaṁ ārabbha uppajjatīti?\nĀmantā.\nCakkhuviññāṇaṁ kusalampi akusalampi, cakkhuviññāṇaṁ phassaṁ ārabbha …pe…\nphoṭṭhabbaṁ ārabbha uppajjatīti?\nNa hevaṁ vattabbe …pe…."}},{"id":"kv10.4:5","sourceIds":["kv10.4:5.1","kv10.4:5.2","kv10.4:5.3","kv10.4:5.4","kv10.4:5.5","kv10.4:5.6","kv10.4:5.7","kv10.4:5.8","kv10.4:5.9","kv10.4:5.10","kv10.4:5.11","kv10.4:5.12","kv10.4:5.13"],"kind":"text","text":{"pi":"Na vattabbaṁ—\n“pañcaviññāṇā kusalāpi akusalāpī”ti?\nĀmantā.\nNanu vuttaṁ bhagavatā—\n“idha, bhikkhave, bhikkhu cakkhunā rūpaṁ disvā nimittaggāhī hoti …pe…\nna nimittaggāhī hoti …pe…\nsotena saddaṁ sutvā …pe…\nkāyena phoṭṭhabbaṁ phusitvā nimittaggāhī hoti …pe…\nna nimittaggāhī hotī”ti.\nAttheva suttantoti?\nĀmantā.\nTena hi pañcaviññāṇā kusalāpi akusalāpīti.\nPañcaviññāṇā kusalāpi akusalāpītikathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv10.4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}