{"id":"kv10.5","title":"Sābhogātikathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv10.5","title":"Sābhogātikathā","units":[{"id":"kv10.5:0","sourceIds":["kv10.5:0.1","kv10.5:0.2","kv10.5:0.3","kv10.5:0.4"],"kind":"text","text":{"pi":"Kathāvatthu\nMahāpaṇṇāsaka\nDasamavagga\nSābhogātikathā"}},{"id":"kv10.5:1","sourceIds":["kv10.5:1.1","kv10.5:1.2","kv10.5:1.3","kv10.5:1.4","kv10.5:1.5","kv10.5:1.6","kv10.5:1.7","kv10.5:1.8","kv10.5:1.9","kv10.5:1.10"],"kind":"text","text":{"pi":"Pañcaviññāṇā sābhogāti?\nĀmantā.\nNanu pañcaviññāṇā uppannavatthukā uppannārammaṇāti?\nĀmantā.\nHañci pañcaviññāṇā uppannavatthukā uppannārammaṇā, no ca vata re vattabbe—\n“pañcaviññāṇā sābhogā”ti.\nNanu pañcaviññāṇā purejātavatthukā purejātārammaṇā ajjhattikavatthukā bāhirārammaṇā asambhinnavatthukā asambhinnārammaṇā nānāvatthukā nānārammaṇā na aññamaññassa gocaravisayaṁ paccanubhonti, na asamannāhārā uppajjanti, na amanasikārā uppajjanti, na abbokiṇṇā uppajjanti, na apubbaṁ acarimaṁ uppajjanti, nanu pañcaviññāṇā na aññamaññassa samanantarā uppajjantīti?\nĀmantā.\nHañci pañcaviññāṇā na aññamaññassa samanantarā uppajjanti, no ca vata re vattabbe—\n“pañcaviññāṇā sābhogā”ti."}},{"id":"kv10.5:2","sourceIds":["kv10.5:2.1","kv10.5:2.2","kv10.5:2.3","kv10.5:2.4","kv10.5:2.5","kv10.5:2.6","kv10.5:2.7","kv10.5:2.8","kv10.5:2.9","kv10.5:2.10","kv10.5:2.11","kv10.5:2.12","kv10.5:2.13","kv10.5:2.14","kv10.5:2.15","kv10.5:2.16","kv10.5:2.17","kv10.5:2.18","kv10.5:2.19"],"kind":"text","text":{"pi":"Cakkhuviññāṇaṁ sābhoganti?\nĀmantā.\nCakkhuviññāṇaṁ suññataṁ ārabbha uppajjatīti?\nNa hevaṁ vattabbe …pe…\ncakkhuviññāṇaṁ suññataṁ ārabbha uppajjatīti?\nĀmantā.\nCakkhuñca paṭicca suññatañca uppajjati cakkhuviññāṇanti?\nNa hevaṁ vattabbe …pe…\ncakkhuñca paṭicca suññatañca uppajjati cakkhuviññāṇanti?\nĀmantā.\n“Cakkhuñca paṭicca suññatañca uppajjati cakkhuviññāṇan”ti—\nattheva suttantoti?\nNatthi …pe…\n“cakkhuñca paṭicca rūpe ca uppajjati cakkhuviññāṇan”ti—\nattheva suttantoti?\nĀmantā.\nHañci “cakkhuñca paṭicca rūpe ca uppajjati cakkhuviññāṇan”ti—\nattheva suttanto, no ca vata re vattabbe—\n“cakkhuñca paṭicca suññatañca uppajjati cakkhuviññāṇan”ti."}},{"id":"kv10.5:3","sourceIds":["kv10.5:3.1","kv10.5:3.2","kv10.5:3.3","kv10.5:3.4","kv10.5:3.5","kv10.5:3.6","kv10.5:3.7","kv10.5:3.8","kv10.5:3.9","kv10.5:3.10","kv10.5:3.11","kv10.5:3.12","kv10.5:3.13","kv10.5:3.14","kv10.5:3.15","kv10.5:3.16","kv10.5:3.17","kv10.5:3.18","kv10.5:3.19","kv10.5:3.20","kv10.5:3.21","kv10.5:3.22","kv10.5:3.23"],"kind":"text","text":{"pi":"Cakkhuviññāṇaṁ sābhoganti?\nĀmantā.\nCakkhuviññāṇaṁ atītānāgataṁ ārabbha uppajjatīti?\nNa hevaṁ vattabbe …pe…\ncakkhuviññāṇaṁ sābhoganti?\nĀmantā.\nCakkhuviññāṇaṁ phassaṁ ārabbha …pe…\nphoṭṭhabbaṁ ārabbha uppajjatīti?\nNa hevaṁ vattabbe …pe…\nmanoviññāṇaṁ sābhogaṁ, manoviññāṇaṁ suññataṁ ārabbha uppajjatīti?\nĀmantā.\nCakkhuviññāṇaṁ sābhogaṁ, cakkhuviññāṇaṁ suññataṁ ārabbha uppajjatīti?\nNa hevaṁ vattabbe …pe…\nmanoviññāṇaṁ sābhogaṁ, manoviññāṇaṁ atītānāgataṁ ārabbha uppajjatīti?\nĀmantā.\nCakkhuviññāṇaṁ sābhogaṁ, cakkhuviññāṇaṁ atītānāgataṁ ārabbha uppajjatīti?\nNa hevaṁ vattabbe …pe…\nmanoviññāṇaṁ sābhogaṁ, manoviññāṇaṁ phassaṁ ārabbha …pe…\nphoṭṭhabbaṁ ārabbha uppajjatīti?\nĀmantā.\nCakkhuviññāṇaṁ sābhogaṁ, cakkhuviññāṇaṁ phassaṁ ārabbha …pe…\nphoṭṭhabbaṁ ārabbha uppajjatīti?\nNa hevaṁ vattabbe …pe…."}},{"id":"kv10.5:4","sourceIds":["kv10.5:4.1","kv10.5:4.2","kv10.5:4.3","kv10.5:4.4","kv10.5:4.5","kv10.5:4.6","kv10.5:4.7","kv10.5:4.8","kv10.5:4.9","kv10.5:4.10","kv10.5:4.11","kv10.5:4.12"],"kind":"text","text":{"pi":"Na vattabbaṁ—\n“pañcaviññāṇā sābhogā”ti?\nĀmantā.\nNanu vuttaṁ bhagavatā—\n“idha, bhikkhave, bhikkhu cakkhunā rūpaṁ disvā nimittaggāhī hoti …pe…\nna nimittaggāhī hoti …pe…\nkāyena phoṭṭhabbaṁ phusitvā nimittaggāhī hoti …pe…\nna nimittaggāhī hotī”ti.\nAttheva suttantoti?\nĀmantā.\nTena hi pañcaviññāṇā sābhogāti …pe….\nSābhogātikathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv10.5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}