{"id":"kv10.9","title":"Samādānahetukathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv10.9","title":"Samādānahetukathā","units":[{"id":"kv10.9:0","sourceIds":["kv10.9:0.1","kv10.9:0.2","kv10.9:0.3","kv10.9:0.4"],"kind":"text","text":{"pi":"Kathāvatthu\nMahāpaṇṇāsaka\nDasamavagga\nSamādānahetukathā"}},{"id":"kv10.9:1","sourceIds":["kv10.9:1.1","kv10.9:1.2","kv10.9:1.3","kv10.9:1.4"],"kind":"text","text":{"pi":"Samādānahetukaṁ sīlaṁ vaḍḍhatīti?\nĀmantā.\nSamādānahetuko phasso vaḍḍhati, vedanā vaḍḍhati, saññā vaḍḍhati, cetanā vaḍḍhati, cittaṁ vaḍḍhati, saddhā vaḍḍhati, vīriyaṁ vaḍḍhati, sati vaḍḍhati, samādhi vaḍḍhati, paññā vaḍḍhatīti?\nNa hevaṁ vattabbe …pe…."}},{"id":"kv10.9:2","sourceIds":["kv10.9:2.1","kv10.9:2.2","kv10.9:2.3","kv10.9:2.4"],"kind":"text","text":{"pi":"Samādānahetukaṁ sīlaṁ vaḍḍhatīti?\nĀmantā.\nLatā viya vaḍḍhati, māluvā viya vaḍḍhati, rukkho viya vaḍḍhati, tiṇaṁ viya vaḍḍhati, muñjapuñjo viya vaḍḍhatīti?\nNa hevaṁ vattabbe …pe…."}},{"id":"kv10.9:3","sourceIds":["kv10.9:3.1","kv10.9:3.2","kv10.9:3.3","kv10.9:3.4","kv10.9:3.5","kv10.9:3.6","kv10.9:3.7","kv10.9:3.8","kv10.9:3.9"],"kind":"text","text":{"pi":"Samādānahetukaṁ sīlaṁ vaḍḍhatīti?\nĀmantā.\nSīlaṁ samādiyitvā kāmavitakkaṁ vitakkentassa byāpādavitakkaṁ vitakkentassa vihiṁsāvitakkaṁ vitakkentassa sīlaṁ vaḍḍhatīti?\nĀmantā.\nDvinnaṁ phassānaṁ …pe… dvinnaṁ cittānaṁ samodhānaṁ hotīti?\nNa hevaṁ vattabbe …pe… dvinnaṁ phassānaṁ …pe… dvinnaṁ cittānaṁ samodhānaṁ hotīti?\nĀmantā.\nKusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantīti?\nNa hevaṁ vattabbe …pe…."}},{"id":"kv10.9:4","sourceIds":["kv10.9:4.1","kv10.9:4.2","kv10.9:4.3","kv10.9:4.4","kv10.9:4.5","kv10.9:4.6","kv10.9:4.7","kv10.9:4.8","kv10.9:4.9","kv10.9:4.10","kv10.9:4.11"],"kind":"text","text":{"pi":"Kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantīti?\nĀmantā.\nNanu vuttaṁ bhagavatā—\n“cattārimāni, bhikkhave, suvidūravidūrāni.\nKatamāni cattāri?\nNabhañca, bhikkhave, pathavī ca—\nidaṁ paṭhamaṁ suvidūravidūraṁ …pe… tasmā sataṁ dhammo asabbhi ārakā”ti.\nAttheva suttantoti?\nĀmantā.\nTena hi na vattabbaṁ—\n“kusalākusalā sāvajjānavajjā hīnapaṇītā kaṇhasukkasappaṭibhāgā dhammā sammukhībhāvaṁ āgacchantī”ti."}},{"id":"kv10.9:5","sourceIds":["kv10.9:5.1","kv10.9:5.2","kv10.9:5.3","kv10.9:5.4","kv10.9:5.5","kv10.9:5.6","kv10.9:5.7","kv10.9:5.8","kv10.9:5.9","kv10.9:5.10"],"kind":"text","text":{"pi":"Na vattabbaṁ—\n“samādānahetukaṁ sīlaṁ vaḍḍhatī”ti?\nĀmantā.\nNanu vuttaṁ bhagavatā—\n“ārāmaropā vanaropā …pe…\ndhammaṭṭhā sīlasampannā te janā saggagāmino”ti.\nAttheva suttantoti?\nĀmantā.\nTena hi samādānahetukaṁ sīlaṁ vaḍḍhatīti.\nSamādānahetukathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv10.9/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}