{"id":"kv11.5","title":"Iddhibalakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv11.5","title":"Iddhibalakathā","units":[{"id":"kv11.5:0","sourceIds":["kv11.5:0.1","kv11.5:0.2","kv11.5:0.3","kv11.5:0.4"],"kind":"text","text":{"pi":"Kathāvatthu\nMahāpaṇṇāsaka\nEkādasamavagga\nIddhibalakathā"}},{"id":"kv11.5:1","sourceIds":["kv11.5:1.1","kv11.5:1.2","kv11.5:1.3","kv11.5:1.4"],"kind":"text","text":{"pi":"Iddhibalena samannāgato kappaṁ tiṭṭheyyāti?\nĀmantā.\nIddhimayiko so āyu, iddhimayikā sā gati, iddhimayiko so attabhāvappaṭilābhoti?\nNa hevaṁ vattabbe …pe…."}},{"id":"kv11.5:2","sourceIds":["kv11.5:2.1","kv11.5:2.2","kv11.5:2.3","kv11.5:2.4","kv11.5:2.5","kv11.5:2.6","kv11.5:2.7","kv11.5:2.8","kv11.5:2.9","kv11.5:2.10","kv11.5:2.11","kv11.5:2.12","kv11.5:2.13","kv11.5:2.14","kv11.5:2.15","kv11.5:2.16"],"kind":"text","text":{"pi":"Iddhibalena samannāgato kappaṁ tiṭṭheyyāti?\nĀmantā.\nAtītaṁ kappaṁ tiṭṭheyya, anāgataṁ kappaṁ tiṭṭheyyāti?\nNa hevaṁ vattabbe …pe…\niddhibalena samannāgato kappaṁ tiṭṭheyyāti?\nĀmantā.\nDve kappe tiṭṭheyya, tayo kappe tiṭṭheyya, cattāro kappe tiṭṭheyyāti?\nNa hevaṁ vattabbe …pe…\niddhibalena samannāgato kappaṁ tiṭṭheyyāti?\nĀmantā.\nSati jīvite jīvitāvasese tiṭṭheyya, asati jīvite jīvitāvasese tiṭṭheyyāti?\nSati jīvite jīvitāvasese tiṭṭheyyāti.\nHañci sati jīvite jīvitāvasese tiṭṭheyya, no ca vata re vattabbe—\n“iddhibalena samannāgato kappaṁ tiṭṭheyyā”ti.\nAsati jīvite jīvitāvasese tiṭṭheyyāti, mato tiṭṭheyya, kālaṅkato tiṭṭheyyāti?\nNa hevaṁ vattabbe …pe…."}},{"id":"kv11.5:3","sourceIds":["kv11.5:3.1","kv11.5:3.2","kv11.5:3.3","kv11.5:3.4","kv11.5:3.5","kv11.5:3.6","kv11.5:3.7","kv11.5:3.8","kv11.5:3.9","kv11.5:3.10","kv11.5:3.11","kv11.5:3.12","kv11.5:3.13","kv11.5:3.14"],"kind":"text","text":{"pi":"Iddhibalena samannāgato kappaṁ tiṭṭheyyāti?\nĀmantā.\nUppanno phasso mā nirujjhīti labbhā iddhiyā paggahetunti?\nNa hevaṁ vattabbe …pe…\nuppannā vedanā …pe…\nuppannā saññā …pe…\nuppannā cetanā …pe…\nuppannaṁ cittaṁ …\nuppannā saddhā …\nuppannaṁ vīriyaṁ …\nuppannā sati …\nuppanno samādhi …pe…\nuppannā paññā mā nirujjhīti labbhā iddhiyā paggahetunti?\nNa hevaṁ vattabbe …pe…."}},{"id":"kv11.5:4","sourceIds":["kv11.5:4.1","kv11.5:4.2","kv11.5:4.3","kv11.5:4.4","kv11.5:4.5","kv11.5:4.6","kv11.5:4.7","kv11.5:4.8","kv11.5:4.9"],"kind":"text","text":{"pi":"Iddhibalena samannāgato kappaṁ tiṭṭheyyāti?\nĀmantā.\nRūpaṁ niccaṁ hotūti labbhā iddhiyā paggahetunti?\nNa hevaṁ vattabbe …pe…\nvedanā …pe…\nsaññā …\nsaṅkhārā …\nviññāṇaṁ niccaṁ hotūti labbhā iddhiyā paggahetunti?\nNa hevaṁ vattabbe …pe…."}},{"id":"kv11.5:5","sourceIds":["kv11.5:5.1","kv11.5:5.2","kv11.5:5.3","kv11.5:5.4","kv11.5:5.5","kv11.5:5.6","kv11.5:5.7","kv11.5:5.8"],"kind":"text","text":{"pi":"Iddhibalena samannāgato kappaṁ tiṭṭheyyāti?\nĀmantā.\nJātidhammā sattā mā jāyiṁsūti labbhā iddhiyā paggahetunti?\nNa hevaṁ vattabbe …pe…\njarādhammā sattā mā jīriṁsūti …pe…\nbyādhidhammā sattā mā byādhiyiṁsūti …pe…\nmaraṇadhammā sattā mā mīyiṁsūti labbhā iddhiyā paggahetunti?\nNa hevaṁ vattabbe …pe…."}},{"id":"kv11.5:6","sourceIds":["kv11.5:6.1","kv11.5:6.2","kv11.5:6.3","kv11.5:6.4","kv11.5:6.5","kv11.5:6.6","kv11.5:6.7","kv11.5:6.8"],"kind":"text","text":{"pi":"Na vattabbaṁ—\n“iddhibalena samannāgato kappaṁ tiṭṭheyyā”ti?\nĀmantā.\nNanu vuttaṁ bhagavatā—\n“yassa kassaci, ānanda, cattāro iddhipādā bhāvitā bahulīkatā yānīkatā vatthukatā anuṭṭhitā paricitā susamāraddhā, so ākaṅkhamāno kappaṁ vā tiṭṭheyya kappāvasesaṁ vā”ti.\nAttheva suttantoti?\nĀmantā.\nTena hi iddhibalena samannāgato kappaṁ tiṭṭheyyāti."}},{"id":"kv11.5:7","sourceIds":["kv11.5:7.1","kv11.5:7.2","kv11.5:7.3","kv11.5:7.4","kv11.5:7.5","kv11.5:7.6","kv11.5:7.7","kv11.5:7.8","kv11.5:7.9","kv11.5:7.10","kv11.5:7.11","kv11.5:7.12","kv11.5:7.13","kv11.5:7.14","kv11.5:7.15"],"kind":"text","text":{"pi":"Iddhibalena samannāgato kappaṁ tiṭṭheyyāti?\nĀmantā.\nNanu vuttaṁ bhagavatā—\n“catunnaṁ, bhikkhave, dhammānaṁ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṁ.\nKatamesaṁ catunnaṁ?\n‘Jarādhammo mā jīrī’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṁ.\n‘Byādhidhammo mā byādhiyī’ti …pe…\n‘maraṇadhammo mā mīyī’ti …pe…\nyāni kho pana tāni pubbe katāni pāpakāni kammāni saṅkilesikāni ponobbhavikāni sadarāni dukkhavipākāni āyatiṁ jātijarāmaraṇiyāni, ‘tesaṁ vipāko mā nibbattī’ti natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmiṁ.\nImesaṁ kho, bhikkhave, catunnaṁ dhammānaṁ natthi koci pāṭibhogo samaṇo vā brāhmaṇo vā devo vā māro vā brahmā vā koci vā lokasmin”ti.\nAttheva suttantoti?\nĀmantā.\nTena hi na vattabbaṁ—\n“iddhibalena samannāgato kappaṁ tiṭṭheyyā”ti.\nIddhibalakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv11.5/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}