{"id":"kv13.8","title":"Asātarāgakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv13.8","title":"Asātarāgakathā","units":[{"id":"kv13.8:0","sourceIds":["kv13.8:0.1","kv13.8:0.2","kv13.8:0.3","kv13.8:0.4"],"kind":"text","text":{"pi":"Kathāvatthu\nMahāpaṇṇāsaka\nTerasamavagga\nAsātarāgakathā"}},{"id":"kv13.8:1","sourceIds":["kv13.8:1.1","kv13.8:1.2","kv13.8:1.3","kv13.8:1.4","kv13.8:1.5","kv13.8:1.6","kv13.8:1.7","kv13.8:1.8"],"kind":"text","text":{"pi":"Atthi asātarāgoti?\nĀmantā.\nDukkhābhinandino sattā, atthi keci dukkhaṁ patthenti pihenti esanti gavesanti pariyesanti, dukkhaṁ ajjhosāya tiṭṭhantīti?\nNa hevaṁ vattabbe …pe…\nnanu sukhābhinandino sattā, atthi keci sukhaṁ patthenti pihenti esanti gavesanti pariyesanti, sukhaṁ ajjhosāya tiṭṭhantīti?\nĀmantā.\nHañci sukhābhinandino sattā, atthi keci sukhaṁ patthenti pihenti esanti gavesanti pariyesanti, sukhaṁ ajjhosāya tiṭṭhanti, no ca vata re vattabbe—\n“atthi asātarāgo”ti."}},{"id":"kv13.8:2","sourceIds":["kv13.8:2.1","kv13.8:2.2","kv13.8:2.3","kv13.8:2.4","kv13.8:2.5","kv13.8:2.6","kv13.8:2.7","kv13.8:2.8"],"kind":"text","text":{"pi":"Atthi asātarāgoti?\nĀmantā.\nDukkhāya vedanāya rāgānusayo anuseti, sukhāya vedanāya paṭighānusayo anusetīti?\nNa hevaṁ vattabbe …pe…\nnanu sukhāya vedanāya rāgānusayo anuseti, dukkhāya vedanāya paṭighānusayo anusetīti?\nĀmantā.\nHañci sukhāya vedanāya rāgānusayo anuseti, dukkhāya vedanāya paṭighānusayo anuseti, no ca vata re vattabbe—\n“atthi asātarāgo”ti."}},{"id":"kv13.8:3","sourceIds":["kv13.8:3.1","kv13.8:3.2","kv13.8:3.3","kv13.8:3.4","kv13.8:3.5","kv13.8:3.6","kv13.8:3.7","kv13.8:3.8","kv13.8:3.9"],"kind":"text","text":{"pi":"Na vattabbaṁ—\n“atthi asātarāgo”ti?\nĀmantā.\nNanu vuttaṁ bhagavatā—\n“so evaṁ anurodhavirodhaṁ samāpanno yaṁ kiñci vedanaṁ vedayati sukhaṁ vā dukkhaṁ vā adukkhamasukhaṁ vā, so taṁ vedanaṁ abhinandati abhivadati ajjhosāya tiṭṭhatī”ti.\nAttheva suttantoti?\nĀmantā.\nTena hi atthi asātarāgoti.\nAsātarāgakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv13.8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}