{"id":"kv14.3","title":"Anantarapaccayakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv14.3","title":"Anantarapaccayakathā","units":[{"id":"kv14.3:0","sourceIds":["kv14.3:0.1","kv14.3:0.2","kv14.3:0.3","kv14.3:0.4"],"kind":"text","text":{"pi":"Kathāvatthu\nMahāpaṇṇāsaka\nCuddasamavagga\nAnantarapaccayakathā"}},{"id":"kv14.3:1","sourceIds":["kv14.3:1.1","kv14.3:1.2","kv14.3:1.3","kv14.3:1.4"],"kind":"text","text":{"pi":"Cakkhuviññāṇassa anantarā sotaviññāṇaṁ uppajjatīti?\nĀmantā.\nYā cakkhuviññāṇassa uppādāya āvaṭṭanā …pe… paṇidhi, sāva sotaviññāṇassa uppādāya āvaṭṭanā …pe… paṇidhīti?\nNa hevaṁ vattabbe …pe…."}},{"id":"kv14.3:2","sourceIds":["kv14.3:2.1","kv14.3:2.2","kv14.3:2.3","kv14.3:2.4","kv14.3:2.5","kv14.3:2.6","kv14.3:2.7","kv14.3:2.8","kv14.3:2.9"],"kind":"text","text":{"pi":"Cakkhuviññāṇassa anantarā sotaviññāṇaṁ uppajjati, na vattabbaṁ—\n“yā cakkhuviññāṇassa uppādāya āvaṭṭanā …pe… paṇidhi, sāva sotaviññāṇassa uppādāya āvaṭṭanā …pe… paṇidhī”ti?\nĀmantā.\nSotaviññāṇaṁ anāvaṭṭentassa uppajjati …pe… appaṇidahantassa uppajjatīti?\nNa hevaṁ vattabbe …pe….\nNanu sotaviññāṇaṁ āvaṭṭentassa uppajjati …pe… paṇidahantassa uppajjatīti?\nĀmantā.\nHañci sotaviññāṇaṁ āvaṭṭentassa uppajjati …pe… paṇidahantassa uppajjati, no ca vata re vattabbe—\n“cakkhuviññāṇassa anantarā sotaviññāṇaṁ uppajjatī”ti."}},{"id":"kv14.3:3","sourceIds":["kv14.3:3.1","kv14.3:3.2","kv14.3:3.3","kv14.3:3.4","kv14.3:3.5","kv14.3:3.6"],"kind":"text","text":{"pi":"Cakkhuviññāṇassa anantarā sotaviññāṇaṁ uppajjatīti?\nĀmantā.\nCakkhuviññāṇaṁ rūpanimittaṁ manasikaroto uppajjatīti?\nĀmantā.\nSotaviññāṇaṁ rūpanimittaṁ manasikaroto uppajjatīti?\nNa hevaṁ vattabbe …pe…."}},{"id":"kv14.3:4","sourceIds":["kv14.3:4.1","kv14.3:4.2","kv14.3:4.3","kv14.3:4.4"],"kind":"text","text":{"pi":"Cakkhuviññāṇaṁ rūpārammaṇaññeva na aññārammaṇanti?\nĀmantā.\nSotaviññāṇaṁ rūpārammaṇaññeva na aññārammaṇanti?\nNa hevaṁ vattabbe …pe…."}},{"id":"kv14.3:5","sourceIds":["kv14.3:5.1","kv14.3:5.2","kv14.3:5.3","kv14.3:5.4"],"kind":"text","text":{"pi":"Cakkhuñca paṭicca rūpe ca uppajjati cakkhuviññāṇanti?\nĀmantā.\nCakkhuñca paṭicca rūpe ca uppajjati sotaviññāṇanti?\nNa hevaṁ vattabbe …pe…."}},{"id":"kv14.3:6","sourceIds":["kv14.3:6.1","kv14.3:6.2","kv14.3:6.3","kv14.3:6.4","kv14.3:6.5","kv14.3:6.6","kv14.3:6.7","kv14.3:6.8","kv14.3:6.9","kv14.3:6.10","kv14.3:6.11"],"kind":"text","text":{"pi":"Cakkhuñca paṭicca rūpe ca uppajjati sotaviññāṇanti?\nĀmantā.\n“Cakkhuñca paṭicca rūpe ca uppajjati sotaviññāṇan”ti—\nattheva suttantoti?\nNatthi.\n“Cakkhuñca paṭicca rūpe ca uppajjati cakkhuviññāṇan”ti—\nattheva suttantoti?\nĀmantā.\nHañci “cakkhuñca paṭicca rūpe ca uppajjati cakkhuviññāṇan”ti—\nattheva suttanto, no ca vata re vattabbe—\n“cakkhuñca paṭicca rūpe ca uppajjati sotaviññāṇan”ti."}},{"id":"kv14.3:7","sourceIds":["kv14.3:7.1","kv14.3:7.2","kv14.3:7.3","kv14.3:7.4"],"kind":"text","text":{"pi":"Cakkhuviññāṇassa anantarā sotaviññāṇaṁ uppajjatīti?\nĀmantā.\nTaññeva cakkhuviññāṇaṁ taṁ sotaviññāṇanti?\nNa hevaṁ vattabbe …pe…."}},{"id":"kv14.3:8","sourceIds":["kv14.3:8.1","kv14.3:8.2","kv14.3:8.3","kv14.3:8.4","kv14.3:8.5","kv14.3:8.6","kv14.3:8.7","kv14.3:8.8","kv14.3:8.9","kv14.3:8.10","kv14.3:8.11","kv14.3:8.12","kv14.3:8.13","kv14.3:8.14","kv14.3:8.15"],"kind":"text","text":{"pi":"Sotaviññāṇassa anantarā ghānaviññāṇaṁ uppajjati …pe…\nghānaviññāṇassa anantarā jivhāviññāṇaṁ uppajjati …pe…\njivhāviññāṇassa anantarā kāyaviññāṇaṁ uppajjatīti?\nĀmantā.\nYā jivhāviññāṇassa uppādāya āvaṭṭanā …pe… paṇidhi, sāva kāyaviññāṇassa uppādāya āvaṭṭanā …pe… paṇidhīti?\nNa hevaṁ vattabbe …pe…\njivhāviññāṇassa anantarā kāyaviññāṇaṁ uppajjati, na vattabbaṁ—\n“yā jivhāviññāṇassa uppādāya āvaṭṭanā …pe… paṇidhi, sāva kāyaviññāṇassa uppādāya āvaṭṭanā …pe… paṇidhī”ti?\nĀmantā.\nKāyaviññāṇaṁ anāvaṭṭentassa uppajjati …pe… appaṇidahantassa uppajjatīti?\nNa hevaṁ vattabbe …pe…\nnanu kāyaviññāṇaṁ āvaṭṭentassa uppajjati …pe… paṇidahantassa uppajjatīti?\nĀmantā.\nHañci kāyaviññāṇaṁ āvaṭṭentassa uppajjati …pe… paṇidahantassa uppajjati, no ca vata re vattabbe—\n“jivhāviññāṇassa anantarā kāyaviññāṇaṁ uppajjatī”ti."}},{"id":"kv14.3:9","sourceIds":["kv14.3:9.1","kv14.3:9.2","kv14.3:9.3","kv14.3:9.4","kv14.3:9.5","kv14.3:9.6"],"kind":"text","text":{"pi":"Jivhāviññāṇassa anantarā kāyaviññāṇaṁ uppajjatīti?\nĀmantā.\nJivhāviññāṇaṁ rasanimittaṁ manasikaroto uppajjatīti?\nĀmantā.\nKāyaviññāṇaṁ rasanimittaṁ manasikaroto uppajjatīti?\nNa hevaṁ vattabbe …pe…."}},{"id":"kv14.3:10","sourceIds":["kv14.3:10.1","kv14.3:10.2","kv14.3:10.3","kv14.3:10.4"],"kind":"text","text":{"pi":"Jivhāviññāṇaṁ rasārammaṇaññeva na aññārammaṇanti?\nĀmantā.\nKāyaviññāṇaṁ rasārammaṇaññeva na aññārammaṇanti?\nNa hevaṁ vattabbe …pe…."}},{"id":"kv14.3:11","sourceIds":["kv14.3:11.1","kv14.3:11.2","kv14.3:11.3","kv14.3:11.4"],"kind":"text","text":{"pi":"Jivhañca paṭicca rase ca uppajjati jivhāviññāṇanti?\nĀmantā.\nJivhañca paṭicca rase ca uppajjati kāyaviññāṇanti?\nNa hevaṁ vattabbe …pe…."}},{"id":"kv14.3:12","sourceIds":["kv14.3:12.1","kv14.3:12.2","kv14.3:12.3","kv14.3:12.4","kv14.3:12.5","kv14.3:12.6","kv14.3:12.7","kv14.3:12.8","kv14.3:12.9","kv14.3:12.10","kv14.3:12.11"],"kind":"text","text":{"pi":"Jivhañca paṭicca rase ca uppajjati kāyaviññāṇanti?\nĀmantā.\n“Jivhañca paṭicca rase ca uppajjati kāyaviññāṇan”ti—\nattheva suttantoti?\nNatthi.\n“Jivhañca paṭicca rase ca uppajjati jivhāviññāṇan”ti—\nattheva suttantoti?\nĀmantā.\nHañci “jivhañca paṭicca rase ca uppajjati jivhāviññāṇan”ti—\nattheva suttantoti, no ca vata re vattabbe—\n“jivhañca paṭicca rase ca uppajjati kāyaviññāṇan”ti."}},{"id":"kv14.3:13","sourceIds":["kv14.3:13.1","kv14.3:13.2","kv14.3:13.3","kv14.3:13.4"],"kind":"text","text":{"pi":"Jivhāviññāṇassa anantarā kāyaviññāṇaṁ uppajjatīti?\nĀmantā.\nTaññeva jivhāviññāṇaṁ taṁ kāyaviññāṇanti?\nNa hevaṁ vattabbe …pe…."}},{"id":"kv14.3:14","sourceIds":["kv14.3:14.1","kv14.3:14.2","kv14.3:14.3","kv14.3:14.4","kv14.3:14.5","kv14.3:14.6","kv14.3:14.7","kv14.3:14.8"],"kind":"text","text":{"pi":"Na vattabbaṁ—\n“pañcaviññāṇā aññamaññassa samanantarā uppajjantī”ti?\nĀmantā.\nNanu atthi koci naccati gāyati vādeti, rūpañca passati, saddañca suṇāti, gandhañca ghāyati, rasañca sāyati, phoṭṭhabbañca phusatīti?\nĀmantā.\nHañci atthi koci naccati gāyati vādeti, rūpañca passati, saddañca suṇāti, gandhañca ghāyati, rasañca sāyati, phoṭṭhabbañca phusati, tena vata re vattabbe—\n“pañcaviññāṇā aññamaññassa samanantarā uppajjantī”ti.\nAnantarapaccayakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv14.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}