{"id":"kv18.1","title":"Manussalokakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv18.1","title":"Manussalokakathā","units":[{"id":"kv18.1:0","sourceIds":["kv18.1:0.1","kv18.1:0.2","kv18.1:0.3","kv18.1:0.4"],"kind":"text","text":{"pi":"Kathāvatthu\nNiggahapaṇṇāsaka\nAṭṭhārasamavagga\nManussalokakathā"}},{"id":"kv18.1:1","sourceIds":["kv18.1:1.1","kv18.1:1.2","kv18.1:1.3","kv18.1:1.4","kv18.1:1.5","kv18.1:1.6","kv18.1:1.7"],"kind":"text","text":{"pi":"Na vattabbaṁ—\n“buddho bhagavā manussaloke aṭṭhāsī”ti?\nĀmantā.\nNanu atthi buddhavutthāni cetiyāni ārāmavihāragāmanigamanagarāni raṭṭhāni janapadānīti?\nĀmantā.\nHañci atthi buddhavutthāni cetiyāni ārāmavihāragāmanigamanagarāni raṭṭhāni janapadāni, tena vata re vattabbe—\n“buddho bhagavā manussaloke aṭṭhāsī”ti."}},{"id":"kv18.1:2","sourceIds":["kv18.1:2.1","kv18.1:2.2","kv18.1:2.3","kv18.1:2.4","kv18.1:2.5","kv18.1:2.6","kv18.1:2.7"],"kind":"text","text":{"pi":"Na vattabbaṁ—\n“buddho bhagavā manussaloke aṭṭhāsī”ti?\nĀmantā.\nNanu bhagavā lumbiniyā jāto, bodhiyā mūle abhisambuddho, bārāṇasiyaṁ bhagavatā dhammacakkaṁ pavattitaṁ, cāpāle cetiye āyusaṅkhāro ossaṭṭho, kusinārāyaṁ bhagavā parinibbutoti?\nĀmantā.\nHañci bhagavā lumbiniyā jāto …pe… kusinārāyaṁ bhagavā parinibbuto, tena vata re vattabbe—\n“buddho bhagavā manussaloke aṭṭhāsī”ti."}},{"id":"kv18.1:3","sourceIds":["kv18.1:3.1","kv18.1:3.2","kv18.1:3.3","kv18.1:3.4","kv18.1:3.5","kv18.1:3.6","kv18.1:3.7","kv18.1:3.8","kv18.1:3.9","kv18.1:3.10","kv18.1:3.11","kv18.1:3.12"],"kind":"text","text":{"pi":"Na vattabbaṁ—\n“buddho bhagavā manussaloke aṭṭhāsī”ti?\nĀmantā.\nNanu vuttaṁ bhagavatā—\n“ekamidāhaṁ, bhikkhave, samayaṁ ukkaṭṭhāyaṁ viharāmi subhagavane sālarājamūle”ti;\n“ekamidāhaṁ, bhikkhave, samayaṁ uruvelāyaṁ viharāmi ajapālanigrodhe paṭhamābhisambuddho”ti;\n“ekamidāhaṁ, bhikkhave, samayaṁ rājagahe viharāmi veḷuvane kalandakanivāpe”ti;\n“ekamidāhaṁ, bhikkhave, samayaṁ sāvatthiyaṁ viharāmi jetavane anāthapiṇḍikassa ārāme”ti;\n“ekamidāhaṁ, bhikkhave, samayaṁ vesāliyaṁ viharāmi mahāvane kūṭāgārasālāyan”ti.\nAttheva suttantoti?\nĀmantā.\nTena hi buddho bhagavā manussaloke aṭṭhāsīti."}},{"id":"kv18.1:4","sourceIds":["kv18.1:4.1","kv18.1:4.2","kv18.1:4.3","kv18.1:4.4","kv18.1:4.5","kv18.1:4.6","kv18.1:4.7"],"kind":"text","text":{"pi":"Buddho bhagavā manussaloke aṭṭhāsīti?\nĀmantā.\nNanu bhagavā loke jāto, loke saṁvaḍḍho, lokaṁ abhibhuyya viharati anupalitto lokenāti?\nĀmantā.\nHañci bhagavā loke jāto, loke saṁvaḍḍho, lokaṁ abhibhuyya viharati anupalitto lokena, no ca vata re vattabbe—\n“buddho bhagavā manussaloke aṭṭhāsī”ti.\nManussalokakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv18.1/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}