{"id":"kv2.2","title":"Aññāṇakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv2.2","title":"Aññāṇakathā","units":[{"id":"kv2.2:0","sourceIds":["kv2.2:0.1","kv2.2:0.2","kv2.2:0.3","kv2.2:0.4"],"kind":"text","text":{"pi":"Kathāvatthu\nMahāpaṇṇāsaka\nDutiyavagga\nAññāṇakathā"}},{"id":"kv2.2:1","sourceIds":["kv2.2:1.1","kv2.2:1.2","kv2.2:1.3","kv2.2:1.4","kv2.2:1.5","kv2.2:1.6","kv2.2:1.7","kv2.2:1.8"],"kind":"text","text":{"pi":"Atthi arahato aññāṇanti?\nĀmantā.\nAtthi arahato avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti?\nNa hevaṁ vattabbe.\nNatthi arahato avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti?\nĀmantā.\nHañci natthi arahato avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇaṁ, no ca vata re vattabbe—\n“atthi arahato aññāṇan”ti."}},{"id":"kv2.2:2","sourceIds":["kv2.2:2.1","kv2.2:2.2","kv2.2:2.3","kv2.2:2.4"],"kind":"text","text":{"pi":"Atthi puthujjanassa aññāṇaṁ, atthi tassa avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti?\nĀmantā.\nAtthi arahato aññāṇaṁ, atthi tassa avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti?\nNa hevaṁ vattabbe."}},{"id":"kv2.2:3","sourceIds":["kv2.2:3.1","kv2.2:3.2","kv2.2:3.3","kv2.2:3.4"],"kind":"text","text":{"pi":"Atthi arahato aññāṇaṁ, natthi tassa avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti?\nĀmantā.\nAtthi puthujjanassa aññāṇaṁ, natthi tassa avijjā avijjogho avijjāyogo avijjānusayo avijjāpariyuṭṭhānaṁ avijjāsaṁyojanaṁ avijjānīvaraṇanti?\nNa hevaṁ vattabbe."}},{"id":"kv2.2:4","sourceIds":["kv2.2:4.1","kv2.2:4.2","kv2.2:4.3","kv2.2:4.4"],"kind":"text","text":{"pi":"Atthi arahato aññāṇanti?\nĀmantā.\nArahā aññāṇapakato pāṇaṁ haneyya, adinnaṁ ādiyeyya, musā bhaṇeyya, pisuṇaṁ bhaṇeyya, pharusaṁ bhaṇeyya, samphaṁ palapeyya, sandhiṁ chindeyya, nillopaṁ hareyya, ekāgāriyaṁ kareyya, paripanthe tiṭṭheyya, paradāraṁ gaccheyya, gāmaghātaṁ kareyya, nigamaghātaṁ kareyyāti?\nNa hevaṁ vattabbe."}},{"id":"kv2.2:5","sourceIds":["kv2.2:5.1","kv2.2:5.2","kv2.2:5.3","kv2.2:5.4"],"kind":"text","text":{"pi":"Atthi puthujjanassa aññāṇaṁ, puthujjano aññāṇapakato pāṇaṁ haneyya, adinnaṁ ādiyeyya, musā bhaṇeyya …pe… gāmaghātaṁ kareyya, nigamaghātaṁ kareyyāti?\nĀmantā.\nAtthi arahato aññāṇaṁ, arahā aññāṇapakato pāṇaṁ haneyya, adinnaṁ ādiyeyya …pe… gāmaghātaṁ kareyya, nigamaghātaṁ kareyyāti?\nNa hevaṁ vattabbe."}},{"id":"kv2.2:6","sourceIds":["kv2.2:6.1","kv2.2:6.2","kv2.2:6.3","kv2.2:6.4"],"kind":"text","text":{"pi":"Atthi arahato aññāṇaṁ, na ca arahā aññāṇapakato pāṇaṁ haneyya, adinnaṁ ādiyeyya …pe… gāmaghātaṁ kareyya, nigamaghātaṁ kareyyāti?\nĀmantā.\nAtthi puthujjanassa aññāṇaṁ, na ca puthujjano aññāṇapakato pāṇaṁ haneyya, adinnaṁ ādiyeyya …pe… gāmaghātaṁ kareyya, nigamaghātaṁ kareyyāti?\nNa hevaṁ vattabbe."}},{"id":"kv2.2:7","sourceIds":["kv2.2:7.1","kv2.2:7.2","kv2.2:7.3","kv2.2:7.4"],"kind":"text","text":{"pi":"Atthi arahato aññāṇanti?\nĀmantā.\nAtthi arahato satthari aññāṇaṁ, dhamme aññāṇaṁ, saṅghe aññāṇaṁ, sikkhāya aññāṇaṁ, pubbante aññāṇaṁ, aparante aññāṇaṁ, pubbantāparante aññāṇaṁ, idappaccayatāpaṭiccasamuppannesu dhammesu aññāṇanti?\nNa hevaṁ vattabbe."}},{"id":"kv2.2:8","sourceIds":["kv2.2:8.1","kv2.2:8.2","kv2.2:8.3","kv2.2:8.4"],"kind":"text","text":{"pi":"Natthi arahato satthari aññāṇaṁ, dhamme aññāṇaṁ, saṅghe aññāṇaṁ, sikkhāya aññāṇaṁ, pubbante aññāṇaṁ, aparante aññāṇaṁ, pubbantāparante aññāṇaṁ, idappaccayatāpaṭiccasamuppannesu dhammesu aññāṇanti?\nĀmantā.\nHañci natthi arahato satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇaṁ, no ca vata re vattabbe—\n“atthi arahato aññāṇan”ti."}},{"id":"kv2.2:9","sourceIds":["kv2.2:9.1","kv2.2:9.2","kv2.2:9.3","kv2.2:9.4"],"kind":"text","text":{"pi":"Atthi puthujjanassa aññāṇaṁ, atthi tassa satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇanti?\nĀmantā.\nAtthi arahato aññāṇaṁ, atthi tassa satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇanti?\nNa hevaṁ vattabbe."}},{"id":"kv2.2:10","sourceIds":["kv2.2:10.1","kv2.2:10.2","kv2.2:10.3","kv2.2:10.4"],"kind":"text","text":{"pi":"Atthi arahato aññāṇaṁ, natthi tassa satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇanti?\nĀmantā.\nAtthi puthujjanassa aññāṇaṁ, natthi tassa satthari aññāṇaṁ, dhamme aññāṇaṁ, saṅghe aññāṇaṁ …pe… idappaccayatāpaṭiccasamuppannesu dhammesu aññāṇanti?\nNa hevaṁ vattabbe."}},{"id":"kv2.2:11","sourceIds":["kv2.2:11.1","kv2.2:11.2","kv2.2:11.3","kv2.2:11.4","kv2.2:11.5","kv2.2:11.6"],"kind":"text","text":{"pi":"Atthi arahato aññāṇanti?\nĀmantā.\nNanu arahato rāgo pahīno ucchinnamūlo tālāvatthukato anabhāvaṅkato āyatiṁ anuppādadhammoti?\nĀmantā.\nHañci arahato rāgo pahīno ucchinnamūlo tālāvatthukato anabhāvaṅkato āyatiṁ anuppādadhammo, no ca vata re vattabbe—\n“atthi arahato aññāṇan”ti."}},{"id":"kv2.2:12","sourceIds":["kv2.2:12.1","kv2.2:12.2","kv2.2:12.3","kv2.2:12.4","kv2.2:12.5","kv2.2:12.6","kv2.2:12.7","kv2.2:12.8"],"kind":"text","text":{"pi":"Atthi arahato aññāṇanti?\nĀmantā.\nNanu arahato doso pahīno …pe…\nmoho pahīno …pe…\nanottappaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammanti?\nĀmantā.\nHañci arahato anottappaṁ pahīnaṁ ucchinnamūlaṁ tālāvatthukataṁ anabhāvaṅkataṁ āyatiṁ anuppādadhammaṁ, no ca vata re vattabbe—\n“atthi arahato aññāṇan”ti."}},{"id":"kv2.2:13","sourceIds":["kv2.2:13.1","kv2.2:13.2","kv2.2:13.3","kv2.2:13.4","kv2.2:13.5","kv2.2:13.6","kv2.2:13.7"],"kind":"text","text":{"pi":"Atthi arahato aññāṇanti?\nĀmantā.\nNanu arahato rāgappahānāya maggo bhāvito …pe…\nbojjhaṅgā bhāvitāti?\nĀmantā.\nHañci arahato rāgappahānāya bojjhaṅgā bhāvitā, no ca vata re vattabbe—\n“atthi arahato aññāṇan”ti."}},{"id":"kv2.2:14","sourceIds":["kv2.2:14.1","kv2.2:14.2","kv2.2:14.3","kv2.2:14.4","kv2.2:14.5","kv2.2:14.6","kv2.2:14.7","kv2.2:14.8","kv2.2:14.9"],"kind":"text","text":{"pi":"Atthi arahato aññāṇanti?\nĀmantā.\nNanu arahato dosappahānāya …pe…\nmohappahānāya …pe…\nanottappapahānāya maggo bhāvito …pe…\nbojjhaṅgā bhāvitāti?\nĀmantā.\nHañci arahato anottappapahānāya bojjhaṅgā bhāvitā, no ca vata re vattabbe—\n“atthi arahato aññāṇan”ti."}},{"id":"kv2.2:15","sourceIds":["kv2.2:15.1","kv2.2:15.2","kv2.2:15.3","kv2.2:15.4","kv2.2:15.5","kv2.2:15.6","kv2.2:15.7","kv2.2:15.8"],"kind":"text","text":{"pi":"Atthi arahato aññāṇanti?\nĀmantā.\nNanu arahā vītarāgo vītadoso vītamoho …pe…\nsacchikātabbaṁ sacchikatanti?\nĀmantā.\nHañci arahā vītarāgo …pe…\nsacchikātabbaṁ sacchikataṁ, no ca vata re vattabbe—\n“atthi arahato aññāṇan”ti."}},{"id":"kv2.2:16","sourceIds":["kv2.2:16.1","kv2.2:16.2","kv2.2:16.3","kv2.2:16.4","kv2.2:16.5","kv2.2:16.6"],"kind":"text","text":{"pi":"Atthi arahato aññāṇanti?\nSadhammakusalassa arahato atthi aññāṇaṁ, paradhammakusalassa arahato natthi aññāṇanti.\nSadhammakusalassa arahato atthi aññāṇanti?\nĀmantā.\nParadhammakusalassa arahato atthi aññāṇanti?\nNa hevaṁ vattabbe …pe…."}},{"id":"kv2.2:17","sourceIds":["kv2.2:17.1","kv2.2:17.2","kv2.2:17.3","kv2.2:17.4"],"kind":"text","text":{"pi":"Paradhammakusalassa arahato natthi aññāṇanti?\nĀmantā.\nSadhammakusalassa arahato natthi aññāṇanti?\nNa hevaṁ vattabbe …pe…."}},{"id":"kv2.2:18","sourceIds":["kv2.2:18.1","kv2.2:18.2","kv2.2:18.3","kv2.2:18.4"],"kind":"text","text":{"pi":"Sadhammakusalassa arahato rāgo pahīno, atthi tassa aññāṇanti?\nĀmantā.\nParadhammakusalassa arahato rāgo pahīno, atthi tassa aññāṇanti?\nNa hevaṁ vattabbe …pe…."}},{"id":"kv2.2:19","sourceIds":["kv2.2:19.1","kv2.2:19.2","kv2.2:19.3","kv2.2:19.4","kv2.2:19.5","kv2.2:19.6"],"kind":"text","text":{"pi":"Sadhammakusalassa arahato doso pahīno …pe…\nmoho pahīno …pe…\nanottappaṁ pahīnaṁ, atthi tassa aññāṇanti?\nĀmantā.\nParadhammakusalassa arahato anottappaṁ pahīnaṁ, atthi tassa aññāṇanti?\nNa hevaṁ vattabbe …pe…."}},{"id":"kv2.2:20","sourceIds":["kv2.2:20.1","kv2.2:20.2","kv2.2:20.3","kv2.2:20.4","kv2.2:20.5"],"kind":"text","text":{"pi":"Sadhammakusalassa arahato rāgappahānāya maggo bhāvito …pe…\nbojjhaṅgā bhāvitā, atthi tassa aññāṇanti?\nĀmantā.\nParadhammakusalassa arahato rāgappahānāya bojjhaṅgā bhāvitā, atthi tassa aññāṇanti?\nNa hevaṁ vattabbe …pe…."}},{"id":"kv2.2:21","sourceIds":["kv2.2:21.1","kv2.2:21.2","kv2.2:21.3","kv2.2:21.4","kv2.2:21.5","kv2.2:21.6","kv2.2:21.7"],"kind":"text","text":{"pi":"Sadhammakusalassa arahato dosappahānāya …pe…\nmohappahānāya …pe…\nanottappapahānāya maggo bhāvito …pe…\nbojjhaṅgā bhāvitā, atthi tassa aññāṇanti?\nĀmantā.\nParadhammakusalassa arahato anottappapahānāya bojjhaṅgā bhāvitā, atthi tassa aññāṇanti?\nNa hevaṁ vattabbe …pe…."}},{"id":"kv2.2:22","sourceIds":["kv2.2:22.1","kv2.2:22.2","kv2.2:22.3","kv2.2:22.4","kv2.2:22.5","kv2.2:22.6"],"kind":"text","text":{"pi":"Sadhammakusalo arahā vītarāgo vītadoso vītamoho …pe…\nsacchikātabbaṁ sacchikataṁ, atthi tassa aññāṇanti?\nĀmantā.\nParadhammakusalo arahā vītarāgo vītadoso vītamoho …pe…\nsacchikātabbaṁ sacchikataṁ, atthi tassa aññāṇanti?\nNa hevaṁ vattabbe …pe…."}},{"id":"kv2.2:23","sourceIds":["kv2.2:23.1","kv2.2:23.2","kv2.2:23.3","kv2.2:23.4"],"kind":"text","text":{"pi":"Paradhammakusalassa arahato rāgo pahīno, natthi tassa aññāṇanti?\nĀmantā.\nSadhammakusalassa arahato rāgo pahīno, natthi tassa aññāṇanti?\nNa hevaṁ vattabbe …pe…."}},{"id":"kv2.2:24","sourceIds":["kv2.2:24.1","kv2.2:24.2","kv2.2:24.3","kv2.2:24.4","kv2.2:24.5","kv2.2:24.6"],"kind":"text","text":{"pi":"Paradhammakusalassa arahato doso pahīno …pe…\nmoho pahīno …pe…\nanottappaṁ pahīnaṁ, natthi tassa aññāṇanti?\nĀmantā.\nSadhammakusalassa arahato anottappaṁ pahīnaṁ, natthi tassa aññāṇanti?\nNa hevaṁ vattabbe …pe…."}},{"id":"kv2.2:25","sourceIds":["kv2.2:25.1","kv2.2:25.2","kv2.2:25.3","kv2.2:25.4","kv2.2:25.5","kv2.2:25.6","kv2.2:25.7","kv2.2:25.8"],"kind":"text","text":{"pi":"Paradhammakusalassa arahato rāgappahānāya maggo bhāvito …pe…\nbojjhaṅgā bhāvitā …pe…\ndosappahānāya mohappahānāya …pe…\nanottappapahānāya maggo bhāvito …pe…\nbojjhaṅgā bhāvitā, natthi tassa aññāṇanti?\nĀmantā.\nSadhammakusalassa arahato anottappapahānāya bojjhaṅgā bhāvitā, natthi tassa aññāṇanti?\nNa hevaṁ vattabbe …pe…."}},{"id":"kv2.2:26","sourceIds":["kv2.2:26.1","kv2.2:26.2","kv2.2:26.3","kv2.2:26.4","kv2.2:26.5","kv2.2:26.6"],"kind":"text","text":{"pi":"Paradhammakusalo arahā vītarāgo vītadoso vītamoho …pe…\nsacchikātabbaṁ sacchikataṁ, natthi tassa aññāṇanti?\nĀmantā.\nSadhammakusalo arahā vītarāgo vītadoso vītamoho …pe…\nsacchikātabbaṁ sacchikataṁ, natthi tassa aññāṇanti?\nNa hevaṁ vattabbe …pe…."}},{"id":"kv2.2:27","sourceIds":["kv2.2:27.1","kv2.2:27.2","kv2.2:27.3","kv2.2:27.4","kv2.2:27.5","kv2.2:27.6","kv2.2:27.7","kv2.2:27.8","kv2.2:27.9","kv2.2:27.10","kv2.2:27.11","kv2.2:27.12","kv2.2:27.13","kv2.2:27.14"],"kind":"text","text":{"pi":"Atthi arahato aññāṇanti?\nĀmantā.\nNanu vuttaṁ bhagavatā—\n“jānatohaṁ, bhikkhave, passato āsavānaṁ khayaṁ vadāmi, no ajānato no apassato.\nKiñca, bhikkhave, jānato kiṁ passato āsavānaṁ khayo hoti?\n‘Iti rūpaṁ, iti rūpassa samudayo, iti rūpassa atthaṅgamo, iti vedanā …pe…\niti saññā …\niti saṅkhārā …\niti viññāṇaṁ, iti viññāṇassa samudayo, iti viññāṇassa atthaṅgamo’ti—\nevaṁ kho, bhikkhave, jānato evaṁ passato āsavānaṁ khayo hotī”ti.\nAttheva suttantoti?\nĀmantā.\nTena hi na vattabbaṁ—\n“atthi arahato aññāṇan”ti."}},{"id":"kv2.2:28","sourceIds":["kv2.2:28.1","kv2.2:28.2","kv2.2:28.3","kv2.2:28.4","kv2.2:28.5","kv2.2:28.6","kv2.2:28.7","kv2.2:28.8","kv2.2:28.9","kv2.2:28.10","kv2.2:28.11","kv2.2:28.12","kv2.2:28.13","kv2.2:28.14","kv2.2:28.15"],"kind":"text","text":{"pi":"Atthi arahato aññāṇanti?\nĀmantā.\nNanu vuttaṁ bhagavatā—\n“jānatohaṁ, bhikkhave, passato āsavānaṁ khayaṁ vadāmi, no ajānato no apassato.\nKiñca, bhikkhave, jānato kiṁ passato āsavānaṁ khayo hoti?\n‘Idaṁ dukkhan’ti—\nbhikkhave, jānato passato āsavānaṁ khayo hoti, ‘ayaṁ dukkhasamudayo’ti—\njānato passato āsavānaṁ khayo hoti, ‘ayaṁ dukkhanirodho’ti—\njānato passato āsavānaṁ khayo hoti, ‘ayaṁ dukkhanirodhagāminī paṭipadā’ti—\njānato passato āsavānaṁ khayo hoti.\nEvaṁ kho, bhikkhave, jānato evaṁ passato āsavānaṁ khayo hotī”ti.\nAttheva suttantoti?\nĀmantā.\nTena hi na vattabbaṁ—\n“atthi arahato aññāṇan”ti."}},{"id":"kv2.2:29","sourceIds":["kv2.2:29.1","kv2.2:29.2","kv2.2:29.3","kv2.2:29.4","kv2.2:29.5","kv2.2:29.6","kv2.2:29.7","kv2.2:29.8"],"kind":"text","text":{"pi":"Atthi arahato aññāṇanti?\nĀmantā.\nNanu vuttaṁ bhagavatā—\n“sabbaṁ, bhikkhave, anabhijānaṁ aparijānaṁ avirājayaṁ appajahaṁ abhabbo dukkhakkhayāya, sabbañca kho, bhikkhave, abhijānaṁ parijānaṁ virājayaṁ pajahaṁ bhabbo dukkhakkhayāyā”ti.\nAttheva suttantoti?\nĀmantā.\nTena hi na vattabbaṁ—\n“atthi arahato aññāṇan”ti."}},{"id":"kv2.2:30","sourceIds":["kv2.2:30.1","kv2.2:30.2","kv2.2:30.3"],"kind":"text","text":{"pi":"Atthi arahato aññāṇanti?\nĀmantā.\nNanu vuttaṁ bhagavatā—"}},{"id":"kv2.2:31","sourceIds":["kv2.2:31.1","kv2.2:31.2","kv2.2:31.3","kv2.2:31.4","kv2.2:31.5","kv2.2:31.6"],"kind":"text","text":{"pi":"“Sahāvassa dassanasampadāya,\nTayassu dhammā jahitā bhavanti;\nSakkāyadiṭṭhī vicikicchitañca,\nSīlabbataṁ vāpi yadatthi kiñci;\nCatūhapāyehi ca vippamutto,\nChaccābhiṭhānāni abhabba kātun”ti."}},{"id":"kv2.2:32","sourceIds":["kv2.2:32.1","kv2.2:32.2","kv2.2:32.3","kv2.2:32.4"],"kind":"text","text":{"pi":"Attheva suttantoti?\nĀmantā.\nTena hi na vattabbaṁ—\n“atthi arahato aññāṇan”ti."}},{"id":"kv2.2:33","sourceIds":["kv2.2:33.1","kv2.2:33.2","kv2.2:33.3","kv2.2:33.4","kv2.2:33.5","kv2.2:33.6","kv2.2:33.7","kv2.2:33.8","kv2.2:33.9","kv2.2:33.10"],"kind":"text","text":{"pi":"Atthi arahato aññāṇanti?\nĀmantā.\nNanu vuttaṁ bhagavatā—\n“yasmiṁ, bhikkhave, samaye ariyasāvakassa virajaṁ vītamalaṁ dhammacakkhuṁ udapādi—\n‘yaṁ kiñci samudayadhammaṁ sabbaṁ taṁ nirodhadhamman’ti, saha dassanuppādā, bhikkhave, ariyasāvakassa tīṇi saṁyojanāni pahīyanti—\nsakkāyadiṭṭhi, vicikicchā, sīlabbataparāmāso”ti.\nAttheva suttantoti?\nĀmantā.\nTena hi na vattabbaṁ—\n“atthi arahato aññāṇan”ti."}},{"id":"kv2.2:34","sourceIds":["kv2.2:34.1","kv2.2:34.2","kv2.2:34.3","kv2.2:34.4","kv2.2:34.5","kv2.2:34.6","kv2.2:34.7"],"kind":"text","text":{"pi":"Na vattabbaṁ—\n“atthi arahato aññāṇan”ti?\nĀmantā.\nNanu arahā itthipurisānaṁ nāmagottaṁ na jāneyya, maggāmaggaṁ na jāneyya, tiṇakaṭṭhavanappatīnaṁ nāmaṁ na jāneyyāti?\nĀmantā.\nHañci arahā itthipurisānaṁ nāmagottaṁ na jāneyya, maggāmaggaṁ na jāneyya, tiṇakaṭṭhavanappatīnaṁ nāmaṁ na jāneyya, tena vata re vattabbe—\n“atthi arahato aññāṇan”ti."}},{"id":"kv2.2:35","sourceIds":["kv2.2:35.1","kv2.2:35.2","kv2.2:35.3","kv2.2:35.4","kv2.2:35.5"],"kind":"text","text":{"pi":"Arahā itthipurisānaṁ nāmagottaṁ na jāneyya, maggāmaggaṁ na jāneyya, tiṇakaṭṭhavanappatīnaṁ nāmaṁ na jāneyyāti, atthi arahato aññāṇanti?\nĀmantā.\nArahā sotāpattiphalaṁ vā sakadāgāmiphalaṁ vā anāgāmiphalaṁ vā arahattaṁ vā na jāneyyāti?\nNa hevaṁ vattabbe …pe….\nAññāṇakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv2.2/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}