{"id":"kv2.3","title":"Kaṅkhākathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv2.3","title":"Kaṅkhākathā","units":[{"id":"kv2.3:0","sourceIds":["kv2.3:0.1","kv2.3:0.2","kv2.3:0.3","kv2.3:0.4"],"kind":"text","text":{"pi":"Kathāvatthu\nMahāpaṇṇāsaka\nDutiyavagga\nKaṅkhākathā"}},{"id":"kv2.3:1","sourceIds":["kv2.3:1.1","kv2.3:1.2","kv2.3:1.3","kv2.3:1.4"],"kind":"text","text":{"pi":"Atthi arahato kaṅkhāti?\nĀmantā.\nAtthi arahato vicikicchā vicikicchāpariyuṭṭhānaṁ vicikicchāsaṁyojanaṁ vicikicchānīvaraṇanti?\nNa hevaṁ vattabbe …pe…."}},{"id":"kv2.3:2","sourceIds":["kv2.3:2.1","kv2.3:2.2","kv2.3:2.3","kv2.3:2.4"],"kind":"text","text":{"pi":"Natthi arahato vicikicchā vicikicchāpariyuṭṭhānaṁ vicikicchāsaṁyojanaṁ vicikicchānīvaraṇanti?\nĀmantā.\nHañci natthi arahato vicikicchā vicikicchāpariyuṭṭhānaṁ vicikicchāsaṁyojanaṁ vicikicchānīvaraṇaṁ, no ca vata re vattabbe—\n“atthi arahato kaṅkhā”ti."}},{"id":"kv2.3:3","sourceIds":["kv2.3:3.1","kv2.3:3.2","kv2.3:3.3","kv2.3:3.4"],"kind":"text","text":{"pi":"Atthi puthujjanassa kaṅkhā, atthi tassa vicikicchā vicikicchāpariyuṭṭhānaṁ vicikicchāsaṁyojanaṁ vicikicchānīvaraṇanti?\nĀmantā.\nAtthi arahato kaṅkhā, atthi tassa vicikicchā vicikicchāpariyuṭṭhānaṁ vicikicchāsaṁyojanaṁ vicikicchānīvaraṇanti?\nNa hevaṁ vattabbe …pe…."}},{"id":"kv2.3:4","sourceIds":["kv2.3:4.1","kv2.3:4.2","kv2.3:4.3","kv2.3:4.4"],"kind":"text","text":{"pi":"Atthi arahato kaṅkhā, natthi tassa vicikicchā vicikicchāpariyuṭṭhānaṁ vicikicchāsaṁyojanaṁ vicikicchānīvaraṇanti?\nĀmantā.\nAtthi puthujjanassa kaṅkhā, natthi tassa vicikicchā vicikicchāpariyuṭṭhānaṁ vicikicchāsaṁyojanaṁ vicikicchānīvaraṇanti?\nNa hevaṁ vattabbe …pe…."}},{"id":"kv2.3:5","sourceIds":["kv2.3:5.1","kv2.3:5.2","kv2.3:5.3","kv2.3:5.4"],"kind":"text","text":{"pi":"Atthi arahato kaṅkhāti?\nĀmantā.\nAtthi arahato satthari kaṅkhā, dhamme kaṅkhā, saṅghe kaṅkhā, sikkhāya kaṅkhā, pubbante kaṅkhā, aparante kaṅkhā, pubbantāparante kaṅkhā, idappaccayatāpaṭiccasamuppannesu dhammesu kaṅkhāti?\nNa hevaṁ vattabbe."}},{"id":"kv2.3:6","sourceIds":["kv2.3:6.1","kv2.3:6.2","kv2.3:6.3","kv2.3:6.4"],"kind":"text","text":{"pi":"Natthi arahato satthari kaṅkhā, dhamme kaṅkhā …pe… idappaccayatāpaṭiccasamuppannesu dhammesu kaṅkhāti?\nĀmantā.\nHañci natthi arahato satthari kaṅkhā, dhamme kaṅkhā …pe… idappaccayatāpaṭiccasamuppannesu dhammesu kaṅkhā, no ca vata re vattabbe—\n“atthi arahato kaṅkhā”ti."}},{"id":"kv2.3:7","sourceIds":["kv2.3:7.1","kv2.3:7.2","kv2.3:7.3","kv2.3:7.4"],"kind":"text","text":{"pi":"Atthi puthujjanassa kaṅkhā, atthi tassa satthari kaṅkhā, dhamme kaṅkhā …pe… idappaccayatāpaṭiccasamuppannesu dhammesu kaṅkhāti?\nĀmantā.\nAtthi arahato kaṅkhā, atthi tassa satthari kaṅkhā, dhamme kaṅkhā …pe… idappaccayatāpaṭiccasamuppannesu dhammesu kaṅkhāti?\nNa hevaṁ vattabbe."}},{"id":"kv2.3:8","sourceIds":["kv2.3:8.1","kv2.3:8.2","kv2.3:8.3","kv2.3:8.4"],"kind":"text","text":{"pi":"Atthi arahato kaṅkhā, natthi tassa satthari kaṅkhā, dhamme kaṅkhā …pe… idappaccayatāpaṭiccasamuppannesu dhammesu kaṅkhāti?\nĀmantā.\nAtthi puthujjanassa kaṅkhā, natthi tassa satthari kaṅkhā, dhamme kaṅkhā …pe… idappaccayatāpaṭiccasamuppannesu dhammesu kaṅkhāti?\nNa hevaṁ vattabbe."}},{"id":"kv2.3:9","sourceIds":["kv2.3:9.1","kv2.3:9.2","kv2.3:9.3","kv2.3:9.4","kv2.3:9.5","kv2.3:9.6"],"kind":"text","text":{"pi":"Atthi arahato kaṅkhāti?\nĀmantā.\nNanu arahato rāgo pahīno ucchinnamūlo tālāvatthukato anabhāvaṅkato āyatiṁ anuppādadhammoti?\nĀmantā.\nHañci arahato rāgo pahīno ucchinnamūlo tālāvatthukato anabhāvaṅkato āyatiṁ anuppādadhammo, no ca vata re vattabbe—\n“atthi arahato kaṅkhā”ti."}},{"id":"kv2.3:10","sourceIds":["kv2.3:10.1","kv2.3:10.2","kv2.3:10.3","kv2.3:10.4","kv2.3:10.5","kv2.3:10.6","kv2.3:10.7","kv2.3:10.8","kv2.3:10.9","kv2.3:10.10","kv2.3:10.11","kv2.3:10.12","kv2.3:10.13","kv2.3:10.14","kv2.3:10.15","kv2.3:10.16"],"kind":"text","text":{"pi":"Atthi arahato kaṅkhāti?\nĀmantā.\nNanu arahato doso pahīno …pe…\nmoho pahīno …pe…\nanottappaṁ pahīnaṁ …pe…\nrāgappahānāya maggo bhāvito …pe…\nbojjhaṅgā bhāvitā …pe…\ndosappahānāya …pe…\nanottappapahānāya maggo bhāvito …pe…\nbojjhaṅgā bhāvitā;\nnanu arahā vītarāgo vītadoso vītamoho …pe…\nsacchikātabbaṁ sacchikatanti?\nĀmantā.\nHañci arahā vītarāgo vītadoso vītamoho …pe…\nsacchikātabbaṁ sacchikataṁ, no ca vata re vattabbe—\n“atthi arahato kaṅkhā”ti."}},{"id":"kv2.3:11","sourceIds":["kv2.3:11.1","kv2.3:11.2","kv2.3:11.3","kv2.3:11.4","kv2.3:11.5","kv2.3:11.6"],"kind":"text","text":{"pi":"Atthi arahato kaṅkhāti?\nSadhammakusalassa arahato atthi kaṅkhā, paradhammakusalassa arahato natthi kaṅkhāti.\nSadhammakusalassa arahato atthi kaṅkhāti?\nĀmantā.\nParadhammakusalassa arahato atthi kaṅkhāti?\nNa hevaṁ vattabbe …pe…."}},{"id":"kv2.3:12","sourceIds":["kv2.3:12.1","kv2.3:12.2","kv2.3:12.3","kv2.3:12.4"],"kind":"text","text":{"pi":"Paradhammakusalassa arahato natthi kaṅkhāti?\nĀmantā.\nSadhammakusalassa arahato natthi kaṅkhāti?\nNa hevaṁ vattabbe …pe…."}},{"id":"kv2.3:13","sourceIds":["kv2.3:13.1","kv2.3:13.2","kv2.3:13.3","kv2.3:13.4"],"kind":"text","text":{"pi":"Sadhammakusalassa arahato rāgo pahīno, atthi tassa kaṅkhāti?\nĀmantā.\nParadhammakusalassa arahato rāgo pahīno, atthi tassa kaṅkhāti?\nNa hevaṁ vattabbe …pe…."}},{"id":"kv2.3:14","sourceIds":["kv2.3:14.1","kv2.3:14.2","kv2.3:14.3","kv2.3:14.4","kv2.3:14.5","kv2.3:14.6","kv2.3:14.7","kv2.3:14.8","kv2.3:14.9","kv2.3:14.10","kv2.3:14.11","kv2.3:14.12","kv2.3:14.13","kv2.3:14.14","kv2.3:14.15","kv2.3:14.16","kv2.3:14.17","kv2.3:14.18","kv2.3:14.19"],"kind":"text","text":{"pi":"Sadhammakusalassa arahato doso pahīno …pe…\nmoho pahīno …pe…\nanottappaṁ pahīnaṁ …pe…\nrāgappahānāya maggo bhāvito …pe…\nbojjhaṅgā bhāvitā …pe…\ndosappahānāya …pe…\nmohappahānāya …pe…\nanottappapahānāya maggo bhāvito …pe…\nbojjhaṅgā bhāvitā …pe…\nsadhammakusalo arahā vītarāgo vītadoso vītamoho …pe…\nsacchikātabbaṁ sacchikataṁ, atthi tassa kaṅkhāti?\nĀmantā.\nParadhammakusalo arahā vītarāgo vītadoso vītamoho …pe…\nsacchikātabbaṁ sacchikataṁ, atthi tassa kaṅkhāti?\nNa hevaṁ vattabbe …pe…\nparadhammakusalassa arahato rāgo pahīno, natthi tassa kaṅkhāti?\nĀmantā.\nSadhammakusalassa arahato rāgo pahīno, natthi tassa kaṅkhāti?\nNa hevaṁ vattabbe …pe…."}},{"id":"kv2.3:15","sourceIds":["kv2.3:15.1","kv2.3:15.2","kv2.3:15.3","kv2.3:15.4","kv2.3:15.5","kv2.3:15.6","kv2.3:15.7","kv2.3:15.8","kv2.3:15.9","kv2.3:15.10","kv2.3:15.11","kv2.3:15.12","kv2.3:15.13","kv2.3:15.14","kv2.3:15.15"],"kind":"text","text":{"pi":"Paradhammakusalassa arahato doso pahīno …pe…\nmoho pahīno …pe…\nanottappaṁ pahīnaṁ …pe…\nrāgappahānāya maggo bhāvito …pe…\nbojjhaṅgā bhāvitā …pe…\ndosappahānāya …pe…\nmohappahānāya …pe…\nanottappapahānāya maggo bhāvito …pe…\nbojjhaṅgā bhāvitā …pe…\nparadhammakusalo arahā vītarāgo vītadoso vītamoho …pe…\nsacchikātabbaṁ sacchikataṁ, natthi tassa kaṅkhāti?\nĀmantā.\nSadhammakusalo arahā vītarāgo vītadoso vītamoho …pe…\nsacchikātabbaṁ sacchikataṁ, natthi tassa kaṅkhāti?\nNa hevaṁ vattabbe …pe…."}},{"id":"kv2.3:16","sourceIds":["kv2.3:16.1","kv2.3:16.2","kv2.3:16.3","kv2.3:16.4","kv2.3:16.5","kv2.3:16.6","kv2.3:16.7","kv2.3:16.8","kv2.3:16.9","kv2.3:16.10","kv2.3:16.11","kv2.3:16.12"],"kind":"text","text":{"pi":"Atthi arahato kaṅkhāti?\nĀmantā.\nNanu vuttaṁ bhagavatā—\n“jānatohaṁ, bhikkhave, passato āsavānaṁ khayaṁ vadāmi, no ajānato no apassato.\nKiñca, bhikkhave, jānato kiṁ passato āsavānaṁ khayo hoti?\n‘Iti rūpaṁ’ …pe…\n‘iti viññāṇassa atthaṅgamo’ti—\nevaṁ kho, bhikkhave, jānato evaṁ passato āsavānaṁ khayo hotī”ti.\nAttheva suttantoti?\nĀmantā.\nTena hi na vattabbaṁ—\n“atthi arahato kaṅkhā”ti."}},{"id":"kv2.3:17","sourceIds":["kv2.3:17.1","kv2.3:17.2","kv2.3:17.3","kv2.3:17.4","kv2.3:17.5","kv2.3:17.6","kv2.3:17.7","kv2.3:17.8","kv2.3:17.9","kv2.3:17.10","kv2.3:17.11","kv2.3:17.12"],"kind":"text","text":{"pi":"Atthi arahato kaṅkhāti?\nĀmantā.\nNanu vuttaṁ bhagavatā—\n“jānatohaṁ, bhikkhave, passato āsavānaṁ khayaṁ vadāmi, no ajānato no apassato.\nKiñca, bhikkhave, jānato kiṁ passato āsavānaṁ khayo hoti?\n‘Idaṁ dukkhan’ti, bhikkhave …pe…\n‘ayaṁ dukkhanirodhagāminī paṭipadā’ti jānato passato āsavānaṁ khayo hoti.\nEvaṁ kho, bhikkhave, jānato evaṁ passato āsavānaṁ khayo hotī”ti.\nAttheva suttantoti?\nĀmantā.\nTena hi na vattabbaṁ—\n“atthi arahato kaṅkhā”ti."}},{"id":"kv2.3:18","sourceIds":["kv2.3:18.1","kv2.3:18.2","kv2.3:18.3","kv2.3:18.4","kv2.3:18.5","kv2.3:18.6","kv2.3:18.7","kv2.3:18.8","kv2.3:18.9"],"kind":"text","text":{"pi":"Atthi arahato kaṅkhāti?\nĀmantā.\nNanu vuttaṁ bhagavatā—\n“sabbaṁ, bhikkhave, anabhijānaṁ aparijānaṁ avirājayaṁ appajahaṁ abhabbo dukkhakkhayāya;\nsabbañca kho, bhikkhave, abhijānaṁ parijānaṁ virājayaṁ pajahaṁ bhabbo dukkhakkhayāyā”ti.\nAttheva suttantoti?\nĀmantā.\nTena hi na vattabbaṁ—\n“atthi arahato kaṅkhā”ti."}},{"id":"kv2.3:19","sourceIds":["kv2.3:19.1","kv2.3:19.2","kv2.3:19.3","kv2.3:19.4","kv2.3:19.5","kv2.3:19.6","kv2.3:19.7","kv2.3:19.8","kv2.3:19.9"],"kind":"text","text":{"pi":"Atthi arahato kaṅkhāti?\nĀmantā.\nNanu vuttaṁ bhagavatā—\n“sahāvassa dassanasampadāya …pe…\nchaccābhiṭhānāni abhabba kātun”ti.\nAttheva suttantoti?\nĀmantā.\nTena hi na vattabbaṁ—\n“atthi arahato kaṅkhā”ti."}},{"id":"kv2.3:20","sourceIds":["kv2.3:20.1","kv2.3:20.2","kv2.3:20.3","kv2.3:20.4","kv2.3:20.5","kv2.3:20.6","kv2.3:20.7","kv2.3:20.8","kv2.3:20.9","kv2.3:20.10"],"kind":"text","text":{"pi":"Atthi arahato kaṅkhāti?\nĀmantā.\nNanu vuttaṁ bhagavatā—\n“yasmiṁ, bhikkhave, samaye ariyasāvakassa virajaṁ vītamalaṁ dhammacakkhuṁ udapādi—\n‘yaṁ kiñci samudayadhammaṁ sabbaṁ taṁ nirodhadhamman’ti, saha dassanuppādā, bhikkhave, ariyasāvakassa tīṇi saṁyojanāni pahīyanti—\nsakkāyadiṭṭhi, vicikicchā, sīlabbataparāmāso”ti.\nAttheva suttantoti?\nĀmantā.\nTena hi na vattabbaṁ—\n“atthi arahato kaṅkhā”ti."}},{"id":"kv2.3:21","sourceIds":["kv2.3:21.1","kv2.3:21.2","kv2.3:21.3"],"kind":"text","text":{"pi":"Atthi arahato kaṅkhāti?\nĀmantā.\nNanu vuttaṁ bhagavatā—"}},{"id":"kv2.3:22","sourceIds":["kv2.3:22.1","kv2.3:22.2","kv2.3:22.3","kv2.3:22.4"],"kind":"text","text":{"pi":"“Yadā have pātubhavanti dhammā,\nĀtāpino jhāyato brāhmaṇassa;\nAthassa kaṅkhā vapayanti sabbā,\nYato pajānāti sahetudhammanti."}},{"id":"kv2.3:23","sourceIds":["kv2.3:23.1","kv2.3:23.2","kv2.3:23.3","kv2.3:23.4"],"kind":"text","text":{"pi":"Yadā have pātubhavanti dhammā,\nĀtāpino jhāyato brāhmaṇassa;\nAthassa kaṅkhā vapayanti sabbā,\nYato khayaṁ paccayānaṁ avedīti."}},{"id":"kv2.3:24","sourceIds":["kv2.3:24.1","kv2.3:24.2","kv2.3:24.3","kv2.3:24.4"],"kind":"text","text":{"pi":"Yadā have pātubhavanti dhammā,\nĀtāpino jhāyato brāhmaṇassa;\nVidhūpayaṁ tiṭṭhati mārasenaṁ,\nSūriyova obhāsayamantalikkhanti."}},{"id":"kv2.3:25","sourceIds":["kv2.3:25.1","kv2.3:25.2","kv2.3:25.3","kv2.3:25.4"],"kind":"text","text":{"pi":"Yā kāci kaṅkhā idha vā huraṁ vā,\nSakavediyā vā paravediyā vā;\nJhāyino tā pajahanti sabbā,\nĀtāpino brahmacariyaṁ carantāti."}},{"id":"kv2.3:26","sourceIds":["kv2.3:26.1","kv2.3:26.2","kv2.3:26.3","kv2.3:26.4"],"kind":"text","text":{"pi":"Ye kaṅkhāsamatikkantā,\nkaṅkhābhūtesu pāṇisu;\nAsaṁsayā visaṁyuttā,\ntesu dinnaṁ mahapphalanti."}},{"id":"kv2.3:27","sourceIds":["kv2.3:27.1","kv2.3:27.2","kv2.3:27.3","kv2.3:27.4"],"kind":"text","text":{"pi":"Etādisī dhammapakāsanettha,\nNa tattha kiṁ kaṅkhati koci sāvako;\nNitthiṇṇaoghaṁ vicikicchachinnaṁ,\nBuddhaṁ namassāma jinaṁ janindā”ti."}},{"id":"kv2.3:28","sourceIds":["kv2.3:28.1","kv2.3:28.2","kv2.3:28.3","kv2.3:28.4"],"kind":"text","text":{"pi":"Attheva suttantoti?\nĀmantā.\nTena hi na vattabbaṁ—\n“atthi arahato kaṅkhā”ti."}},{"id":"kv2.3:29","sourceIds":["kv2.3:29.1","kv2.3:29.2","kv2.3:29.3","kv2.3:29.4","kv2.3:29.5","kv2.3:29.6","kv2.3:29.7","kv2.3:29.8"],"kind":"text","text":{"pi":"Na vattabbaṁ—\n“atthi arahato kaṅkhā”ti?\nĀmantā.\nNanu arahā itthipurisānaṁ nāmagotte kaṅkheyya, maggāmagge kaṅkheyya, tiṇakaṭṭhavanappatīnaṁ nāme kaṅkheyyāti?\nĀmantā.\nHañci arahā itthipurisānaṁ nāmagotte kaṅkheyya, maggāmagge kaṅkheyya, tiṇakaṭṭhavanappatīnaṁ nāme kaṅkheyya;\ntena vata re vattabbe—\n“atthi arahato kaṅkhā”ti."}},{"id":"kv2.3:30","sourceIds":["kv2.3:30.1","kv2.3:30.2","kv2.3:30.3","kv2.3:30.4","kv2.3:30.5"],"kind":"text","text":{"pi":"Arahā itthipurisānaṁ nāmagotte kaṅkheyya, maggāmagge kaṅkheyya, tiṇakaṭṭhavanappatīnaṁ nāme kaṅkheyyāti, atthi arahato kaṅkhāti?\nĀmantā.\nArahā sotāpattiphale vā sakadāgāmiphale vā anāgāmiphale vā arahatte vā kaṅkheyyāti?\nNa hevaṁ vattabbe …pe….\nKaṅkhākathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv2.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}