{"id":"kv2.8","title":"Kukkuḷakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv2.8","title":"Kukkuḷakathā","units":[{"id":"kv2.8:0","sourceIds":["kv2.8:0.1","kv2.8:0.2","kv2.8:0.3","kv2.8:0.4"],"kind":"text","text":{"pi":"Kathāvatthu\nMahāpaṇṇāsaka\nDutiyavagga\nKukkuḷakathā"}},{"id":"kv2.8:1","sourceIds":["kv2.8:1.1","kv2.8:1.2","kv2.8:1.3","kv2.8:1.4","kv2.8:1.5","kv2.8:1.6","kv2.8:1.7"],"kind":"text","text":{"pi":"Sabbe saṅkhārā anodhiṁ katvā kukkuḷāti?\nĀmantā.\nNanu atthi sukhā vedanā, kāyikaṁ sukhaṁ, cetasikaṁ sukhaṁ, dibbaṁ sukhaṁ, mānusakaṁ sukhaṁ, lābhasukhaṁ, sakkārasukhaṁ, yānasukhaṁ, sayanasukhaṁ, issariyasukhaṁ, ādhipaccasukhaṁ, gihisukhaṁ, sāmaññasukhaṁ, sāsavaṁ sukhaṁ, anāsavaṁ sukhaṁ, upadhisukhaṁ, nirūpadhisukhaṁ, sāmisaṁ sukhaṁ, nirāmisaṁ sukhaṁ, sappītikaṁ sukhaṁ, nippītikaṁ sukhaṁ, jhānasukhaṁ, vimuttisukhaṁ, kāmasukhaṁ, nekkhammasukhaṁ, vivekasukhaṁ, upasamasukhaṁ, sambodhasukhanti?\nĀmantā.\nHañci atthi sukhā vedanā …pe…\nsambodhasukhaṁ, no ca vata re vattabbe—\n“sabbe saṅkhārā anodhiṁ katvā kukkuḷā”ti."}},{"id":"kv2.8:2","sourceIds":["kv2.8:2.1","kv2.8:2.2","kv2.8:2.3","kv2.8:2.4"],"kind":"text","text":{"pi":"Sabbe saṅkhārā anodhiṁ katvā kukkuḷāti?\nĀmantā.\nSabbe saṅkhārā dukkhā vedanā kāyikaṁ dukkhaṁ cetasikaṁ dukkhaṁ sokaparidevadukkhadomanassaupāyāsāti?\nNa hevaṁ vattabbe."}},{"id":"kv2.8:3","sourceIds":["kv2.8:3.1","kv2.8:3.2","kv2.8:3.3","kv2.8:3.4","kv2.8:3.5","kv2.8:3.6","kv2.8:3.7","kv2.8:3.8","kv2.8:3.9","kv2.8:3.10","kv2.8:3.11","kv2.8:3.12","kv2.8:3.13","kv2.8:3.14","kv2.8:3.15","kv2.8:3.16","kv2.8:3.17","kv2.8:3.18","kv2.8:3.19","kv2.8:3.20","kv2.8:3.21","kv2.8:3.22"],"kind":"text","text":{"pi":"Na vattabbaṁ—\n“sabbe saṅkhārā anodhiṁ katvā kukkuḷā”ti?\nĀmantā.\nNanu vuttaṁ bhagavatā—\n“sabbaṁ, bhikkhave, ādittaṁ.\nKiñca, bhikkhave, sabbaṁ ādittaṁ?\nCakkhuṁ, bhikkhave, ādittaṁ, rūpā ādittā, cakkhuviññāṇaṁ ādittaṁ, cakkhusamphasso āditto;\nyamidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi ādittaṁ.\nKena ādittaṁ?\n‘Rāgagginā dosagginā mohagginā ādittaṁ, jātiyā jarāya maraṇena sokehi paridevehi dukkhehi domanassehi upāyāsehi ādittan’ti vadāmi.\nSotaṁ ādittaṁ, saddā ādittā …pe…\nghānaṁ ādittaṁ, gandhā ādittā …pe…\njivhā ādittā, rasā ādittā …pe…\nkāyo āditto, phoṭṭhabbā ādittā …pe…\nmano āditto, dhammā ādittā, manoviññāṇaṁ ādittaṁ, manosamphasso āditto;\nyamidaṁ manosamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā, tampi ādittaṁ.\nKena ādittaṁ?\n‘Rāgagginā dosagginā mohagginā ādittaṁ, jātiyā jarāya maraṇena sokehi paridevehi dukkhehi domanassehi upāyāsehi ādittan’ti vadāmī”ti.\nAttheva suttantoti?\nĀmantā.\nTena hi vattabbaṁ—\n“sabbe saṅkhārā anodhiṁ katvā kukkuḷā”ti."}},{"id":"kv2.8:4","sourceIds":["kv2.8:4.1","kv2.8:4.2","kv2.8:4.3","kv2.8:4.4","kv2.8:4.5","kv2.8:4.6","kv2.8:4.7","kv2.8:4.8","kv2.8:4.9","kv2.8:4.10","kv2.8:4.11","kv2.8:4.12","kv2.8:4.13","kv2.8:4.14"],"kind":"text","text":{"pi":"Sabbe saṅkhārā anodhiṁ katvā kukkuḷāti?\nĀmantā.\nNanu vuttaṁ bhagavatā—\n“pañcime, bhikkhave, kāmaguṇā.\nKatame pañca?\nCakkhuviññeyyā rūpā iṭṭhā kantā manāpā piyarūpā kāmūpasaṁhitā rajanīyā, sotaviññeyyā saddā …pe…\nghānaviññeyyā gandhā …\njivhāviññeyyā rasā …\nkāyaviññeyyā phoṭṭhabbā iṭṭhā kantā manāpā piyarūpā kāmūpasaṁhitā rajanīyā.\nIme kho, bhikkhave, pañca kāmaguṇā”ti.\nAttheva suttantoti?\nĀmantā.\nTena hi na vattabbaṁ—\n“sabbe saṅkhārā anodhiṁ katvā kukkuḷā”ti."}},{"id":"kv2.8:5","sourceIds":["kv2.8:5.1","kv2.8:5.2","kv2.8:5.3","kv2.8:5.4","kv2.8:5.5","kv2.8:5.6","kv2.8:5.7","kv2.8:5.8","kv2.8:5.9","kv2.8:5.10","kv2.8:5.11","kv2.8:5.12","kv2.8:5.13","kv2.8:5.14","kv2.8:5.15","kv2.8:5.16"],"kind":"text","text":{"pi":"Na vattabbaṁ—\n“sabbe saṅkhārā anodhiṁ katvā kukkuḷā”ti?\nĀmantā.\nNanu vuttaṁ bhagavatā—\n“lābhā vo, bhikkhave, suladdhaṁ vo, bhikkhave, khaṇo vo paṭiladdho brahmacariyavāsāya.\nDiṭṭhā mayā, bhikkhave, cha phassāyatanikā nāma nirayā.\nTattha yaṁ kiñci cakkhunā rūpaṁ passati, aniṭṭharūpaññeva passati no iṭṭharūpaṁ, akantarūpaññeva passati no kantarūpaṁ, amanāparūpaññeva passati no manāparūpaṁ.\nYaṁ kiñci sotena saddaṁ suṇāti …pe…\nghānena gandhaṁ ghāyati …\njivhāya rasaṁ sāyati …\nkāyena phoṭṭhabbaṁ phusati …\nmanasā dhammaṁ vijānāti, aniṭṭharūpaññeva vijānāti no iṭṭharūpaṁ, akantarūpaññeva vijānāti no kantarūpaṁ, amanāparūpaññeva vijānāti no manāparūpan”ti.\nAttheva suttantoti?\nĀmantā.\nTena hi vattabbaṁ—\n“sabbe saṅkhārā anodhiṁ katvā kukkuḷā”ti."}},{"id":"kv2.8:6","sourceIds":["kv2.8:6.1","kv2.8:6.2","kv2.8:6.3","kv2.8:6.4","kv2.8:6.5","kv2.8:6.6","kv2.8:6.7","kv2.8:6.8","kv2.8:6.9","kv2.8:6.10","kv2.8:6.11","kv2.8:6.12","kv2.8:6.13","kv2.8:6.14","kv2.8:6.15"],"kind":"text","text":{"pi":"Sabbe saṅkhārā anodhiṁ katvā kukkuḷāti?\nĀmantā.\nNanu vuttaṁ bhagavatā—\n“lābhā vo, bhikkhave, suladdhaṁ vo, bhikkhave, khaṇo vo paṭiladdho brahmacariyavāsāya.\nDiṭṭhā mayā, bhikkhave, cha phassāyatanikā nāma saggā.\nTattha yaṁ kiñci cakkhunā rūpaṁ passati, iṭṭharūpaññeva passati no aniṭṭharūpaṁ, kantarūpaññeva passati no akantarūpaṁ, manāparūpaññeva passati no amanāparūpaṁ.\nYaṁ kiñci sotena saddaṁ suṇāti …pe…\nghānena gandhaṁ ghāyati …\njivhāya rasaṁ sāyati …\nkāyena phoṭṭhabbaṁ phusati …\nmanasā dhammaṁ vijānāti, iṭṭharūpaññeva vijānāti no aniṭṭharūpaṁ, kantarūpaññeva vijānāti no akantarūpaṁ, manāparūpaññeva vijānāti no amanāparūpan”ti.\nAttheva suttantoti?\nĀmantā.\nTena hi na vattabbaṁ—\n“sabbe saṅkhārā anodhiṁ katvā kukkuḷā”ti."}},{"id":"kv2.8:7","sourceIds":["kv2.8:7.1","kv2.8:7.2","kv2.8:7.3","kv2.8:7.4","kv2.8:7.5","kv2.8:7.6","kv2.8:7.7","kv2.8:7.8","kv2.8:7.9"],"kind":"text","text":{"pi":"Na vattabbaṁ—\n“sabbe saṅkhārā anodhiṁ katvā kukkuḷā”ti?\nĀmantā.\nNanu “yadaniccaṁ taṁ dukkhaṁ”, vuttaṁ bhagavatā—\n“sabbe saṅkhārā aniccā”ti?\nĀmantā.\nHañci “yadaniccaṁ taṁ dukkhaṁ”, vuttaṁ bhagavatā—\n“sabbe saṅkhārā aniccā”, tena vata re vattabbe—\n“sabbe saṅkhārā anodhiṁ katvā kukkuḷā”ti."}},{"id":"kv2.8:8","sourceIds":["kv2.8:8.1","kv2.8:8.2","kv2.8:8.3","kv2.8:8.4"],"kind":"text","text":{"pi":"Sabbe saṅkhārā anodhiṁ katvā kukkuḷāti?\nĀmantā.\nDānaṁ aniṭṭhaphalaṁ akantaphalaṁ amanuññaphalaṁ secanakaphalaṁ dukkhudrayaṁ dukkhavipākanti?\nNa hevaṁ vattabbe."}},{"id":"kv2.8:9","sourceIds":["kv2.8:9.1","kv2.8:9.2","kv2.8:9.3","kv2.8:9.4","kv2.8:9.5"],"kind":"text","text":{"pi":"Sīlaṁ …pe…\nuposatho …pe…\nbhāvanā …pe…\nbrahmacariyaṁ aniṭṭhaphalaṁ akantaphalaṁ amanuññaphalaṁ secanakaphalaṁ dukkhudrayaṁ dukkhavipākanti?\nNa hevaṁ vattabbe."}},{"id":"kv2.8:10","sourceIds":["kv2.8:10.1","kv2.8:10.2","kv2.8:10.3","kv2.8:10.4"],"kind":"text","text":{"pi":"Nanu dānaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti?\nĀmantā.\nHañci dānaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākaṁ, no ca vata re vattabbe—\n“sabbe saṅkhārā anodhiṁ katvā kukkuḷā”ti."}},{"id":"kv2.8:11","sourceIds":["kv2.8:11.1","kv2.8:11.2","kv2.8:11.3","kv2.8:11.4","kv2.8:11.5","kv2.8:11.6","kv2.8:11.7"],"kind":"text","text":{"pi":"Nanu sīlaṁ …\nuposatho …\nbhāvanā …\nbrahmacariyaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti?\nĀmantā.\nHañci brahmacariyaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti, no ca vata re vattabbe—\n“sabbe saṅkhārā anodhiṁ katvā kukkuḷā”ti."}},{"id":"kv2.8:12","sourceIds":["kv2.8:12.1","kv2.8:12.2","kv2.8:12.3"],"kind":"text","text":{"pi":"Sabbe saṅkhārā anodhiṁ katvā kukkuḷāti?\nĀmantā.\nNanu vuttaṁ bhagavatā—"}},{"id":"kv2.8:13","sourceIds":["kv2.8:13.1","kv2.8:13.2","kv2.8:13.3","kv2.8:13.4"],"kind":"text","text":{"pi":"“Sukho viveko tuṭṭhassa,\nsutadhammassa passato;\nAbyāpajjaṁ sukhaṁ loke,\npāṇabhūtesu saṁyamo."}},{"id":"kv2.8:14","sourceIds":["kv2.8:14.1","kv2.8:14.2","kv2.8:14.3","kv2.8:14.4"],"kind":"text","text":{"pi":"Sukhā virāgatā loke,\nkāmānaṁ samatikkamo;\nAsmimānassa yo vinayo,\netaṁ ve paramaṁ sukhaṁ."}},{"id":"kv2.8:15","sourceIds":["kv2.8:15.1","kv2.8:15.2","kv2.8:15.3","kv2.8:15.4"],"kind":"text","text":{"pi":"Taṁ sukhena sukhaṁ pattaṁ,\naccantasukhameva taṁ;\nTisso vijjā anuppattā,\netaṁ ve paramaṁ sukhan”ti."}},{"id":"kv2.8:16","sourceIds":["kv2.8:16.1","kv2.8:16.2","kv2.8:16.3","kv2.8:16.4","kv2.8:16.5"],"kind":"text","text":{"pi":"Attheva suttantoti?\nĀmantā.\nTena hi na vattabbaṁ—\n“sabbe saṅkhārā anodhiṁ katvā kukkuḷā”ti.\nKukkuḷakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv2.8/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}