{"id":"kv20.3","title":"Nirayapālakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv20.3","title":"Nirayapālakathā","units":[{"id":"kv20.3:0","sourceIds":["kv20.3:0.1","kv20.3:0.2","kv20.3:0.3","kv20.3:0.4"],"kind":"text","text":{"pi":"Kathāvatthu\nMahāpaṇṇāsaka\nVīsatimavagga\nNirayapālakathā"}},{"id":"kv20.3:1","sourceIds":["kv20.3:1.1","kv20.3:1.2","kv20.3:1.3","kv20.3:1.4","kv20.3:1.5","kv20.3:1.6","kv20.3:1.7","kv20.3:1.8"],"kind":"text","text":{"pi":"Natthi nirayesu nirayapālāti?\nĀmantā.\nNatthi nirayesu kammakāraṇāti?\nNa hevaṁ vattabbe …pe…\natthi nirayesu kammakāraṇāti?\nĀmantā.\nAtthi nirayesu nirayapālāti?\nNa hevaṁ vattabbe …pe…."}},{"id":"kv20.3:2","sourceIds":["kv20.3:2.1","kv20.3:2.2","kv20.3:2.3","kv20.3:2.4","kv20.3:2.5","kv20.3:2.6","kv20.3:2.7","kv20.3:2.8"],"kind":"text","text":{"pi":"Atthi manussesu kammakāraṇā, atthi ca kāraṇikāti?\nĀmantā.\nAtthi nirayesu kammakāraṇā, atthi ca kāraṇikāti?\nNa hevaṁ vattabbe …pe…\natthi nirayesu kammakāraṇā, natthi ca kāraṇikāti?\nĀmantā.\nAtthi manussesu kammakāraṇā, natthi ca kāraṇikāti?\nNa hevaṁ vattabbe …pe…."}},{"id":"kv20.3:3","sourceIds":["kv20.3:3.1","kv20.3:3.2","kv20.3:3.3"],"kind":"text","text":{"pi":"Atthi nirayesu nirayapālāti?\nĀmantā.\nNanu vuttaṁ bhagavatā—"}},{"id":"kv20.3:4","sourceIds":["kv20.3:4.1","kv20.3:4.2","kv20.3:4.3","kv20.3:4.4"],"kind":"text","text":{"pi":"“Na vessabhū nopi ca pettirājā,\nSomo yamo vessavaṇo ca rājā;\nSakāni kammāni hananti tattha,\nIto paṇunnaṁ paralokapattan”ti."}},{"id":"kv20.3:5","sourceIds":["kv20.3:5.1","kv20.3:5.2","kv20.3:5.3"],"kind":"text","text":{"pi":"Attheva suttantoti?\nĀmantā.\nTena hi natthi nirayesu nirayapālāti."}},{"id":"kv20.3:6","sourceIds":["kv20.3:6.1","kv20.3:6.2","kv20.3:6.3","kv20.3:6.4","kv20.3:6.5","kv20.3:6.6","kv20.3:6.7","kv20.3:6.8","kv20.3:6.9","kv20.3:6.10"],"kind":"text","text":{"pi":"Natthi nirayesu nirayapālāti?\nĀmantā.\nNanu vuttaṁ bhagavatā—\n“tamenaṁ, bhikkhave, nirayapālā pañcavidhabandhanaṁ nāma kāraṇaṁ kārenti—\ntattaṁ ayokhīlaṁ hatthe gamenti, tattaṁ ayokhīlaṁ dutiye hatthe gamenti, tattaṁ ayokhīlaṁ pāde gamenti, tattaṁ ayokhīlaṁ dutiye pāde gamenti, tattaṁ ayokhīlaṁ majjheurasmiṁ gamenti;\nso tattha dukkhā tibbā kaṭukā vedanā vedeti;\nna ca tāva kālaṁ karoti yāva na taṁ pāpakammaṁ byantī hotī”ti.\nAttheva suttantoti?\nĀmantā.\nTena hi atthi nirayesu nirayapālāti."}},{"id":"kv20.3:7","sourceIds":["kv20.3:7.1","kv20.3:7.2","kv20.3:7.3","kv20.3:7.4","kv20.3:7.5","kv20.3:7.6","kv20.3:7.7","kv20.3:7.8","kv20.3:7.9","kv20.3:7.10","kv20.3:7.11","kv20.3:7.12"],"kind":"text","text":{"pi":"Natthi nirayesu nirayapālāti?\nĀmantā.\nNanu vuttaṁ bhagavatā—\n“tamenaṁ, bhikkhave, nirayapālā saṁvesetvā kuṭhārīhi tacchanti …pe…\ntamenaṁ, bhikkhave, nirayapālā uddhampādaṁ adhosiraṁ ṭhapetvā vāsīhi tacchanti …pe…\ntamenaṁ, bhikkhave, nirayapālā rathe yojetvā ādittāya pathaviyā sampajjalitāya sajotibhūtāya sārentipi paccāsārentipi …pe…\ntamenaṁ, bhikkhave, nirayapālā mahantaṁ aṅgārapabbataṁ ādittaṁ sampajjalitaṁ sajotibhūtaṁ āropentipi oropentipi …pe…\ntamenaṁ, bhikkhave, nirayapālā uddhampādaṁ adhosiraṁ gahetvā tattāya lohakumbhiyā pakkhipanti ādittāya sampajjalitāya sajotibhūtāya.\nSo tattha pheṇuddehakaṁ paccati, so tattha pheṇuddehakaṁ paccamāno sakimpi uddhaṁ gacchati, sakimpi adho gacchati, sakimpi tiriyaṁ gacchati.\nSo tattha dukkhā tibbā kaṭukā vedanā vedayati, na ca tāva kālaṁ karoti yāva na taṁ pāpakammaṁ byantīhoti.\nTamenaṁ, bhikkhave, nirayapālā mahāniraye pakkhipanti.\nSo kho pana, bhikkhave, mahānirayo—"}},{"id":"kv20.3:8","sourceIds":["kv20.3:8.1","kv20.3:8.2","kv20.3:8.3","kv20.3:8.4"],"kind":"text","text":{"pi":"Catukkaṇṇo catudvāro,\nvibhatto bhāgaso mito;\nAyopākārapariyanto,\nayasā paṭikujjito."}},{"id":"kv20.3:9","sourceIds":["kv20.3:9.1","kv20.3:9.2","kv20.3:9.3","kv20.3:9.4"],"kind":"text","text":{"pi":"Tassa ayomayā bhūmi,\nJalitā tejasā yutā;\nSamantā yojanasataṁ,\nPharitvā tiṭṭhati sabbadā”ti."}},{"id":"kv20.3:10","sourceIds":["kv20.3:10.1","kv20.3:10.2","kv20.3:10.3","kv20.3:10.4"],"kind":"text","text":{"pi":"Attheva suttantoti?\nĀmantā.\nTena hi atthi nirayesu nirayapālāti.\nNirayapālakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv20.3/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}