{"id":"kv3.4","title":"Vimuccamānakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv3.4","title":"Vimuccamānakathā","units":[{"id":"kv3.4:0","sourceIds":["kv3.4:0.1","kv3.4:0.2","kv3.4:0.3","kv3.4:0.4"],"kind":"text","text":{"pi":"Kathāvatthu\nMahāpaṇṇāsaka\nTatiyavagga\nVimuccamānakathā"}},{"id":"kv3.4:1","sourceIds":["kv3.4:1.1","kv3.4:1.2","kv3.4:1.3","kv3.4:1.4"],"kind":"text","text":{"pi":"Vimuttaṁ vimuccamānanti?\nĀmantā.\nEkadesaṁ vimuttaṁ, ekadesaṁ avimuttanti?\nNa hevaṁ vattabbe …pe…."}},{"id":"kv3.4:2","sourceIds":["kv3.4:2.1","kv3.4:2.2","kv3.4:2.3","kv3.4:2.4"],"kind":"text","text":{"pi":"Ekadesaṁ vimuttaṁ, ekadesaṁ avimuttanti?\nĀmantā.\nEkadesaṁ sotāpanno, ekadesaṁ na sotāpanno, ekadesaṁ sotāpattiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ sattakkhattuparamo kolaṅkolo ekabījī buddhe aveccappasādena samannāgato dhamme …pe… saṅghe …pe… ariyakantehi sīlehi samannāgato, ekadesaṁ ariyakantehi sīlehi na samannāgatoti?\nNa hevaṁ vattabbe …pe…."}},{"id":"kv3.4:3","sourceIds":["kv3.4:3.1","kv3.4:3.2","kv3.4:3.3","kv3.4:3.4"],"kind":"text","text":{"pi":"Ekadesaṁ vimuttaṁ, ekadesaṁ avimuttanti?\nĀmantā.\nEkadesaṁ sakadāgāmī, ekadesaṁ na sakadāgāmī, ekadesaṁ sakadāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharatīti?\nNa hevaṁ vattabbe …pe…."}},{"id":"kv3.4:4","sourceIds":["kv3.4:4.1","kv3.4:4.2","kv3.4:4.3","kv3.4:4.4"],"kind":"text","text":{"pi":"Ekadesaṁ vimuttaṁ, ekadesaṁ avimuttanti?\nĀmantā.\nEkadesaṁ anāgāmī, ekadesaṁ na anāgāmī, ekadesaṁ anāgāmiphalappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ antarāparinibbāyī, upahaccaparinibbāyī, asaṅkhāraparinibbāyī, sasaṅkhāraparinibbāyī, uddhaṁsotoakaniṭṭhagāmī, ekadesaṁ na uddhaṁsotoakaniṭṭhagāmīti?\nNa hevaṁ vattabbe …pe…."}},{"id":"kv3.4:5","sourceIds":["kv3.4:5.1","kv3.4:5.2","kv3.4:5.3","kv3.4:5.4"],"kind":"text","text":{"pi":"Ekadesaṁ vimuttaṁ, ekadesaṁ avimuttanti?\nĀmantā.\nEkadesaṁ arahā ekadesaṁ na arahā, ekadesaṁ arahattappatto paṭiladdho adhigato sacchikato upasampajja viharati, kāyena phusitvā viharati, ekadesaṁ na kāyena phusitvā viharati, ekadesaṁ vītarāgo vītadoso vītamoho …pe… ekadesaṁ sacchikātabbaṁ sacchikataṁ, ekadesaṁ sacchikātabbaṁ na sacchikatanti?\nNa hevaṁ vattabbe …pe…."}},{"id":"kv3.4:6","sourceIds":["kv3.4:6.1","kv3.4:6.2","kv3.4:6.3","kv3.4:6.4"],"kind":"text","text":{"pi":"Vimuttaṁ vimuccamānanti?\nĀmantā.\nUppādakkhaṇe vimuttaṁ, bhaṅgakkhaṇe vimuccamānanti?\nNa hevaṁ vattabbe …pe…."}},{"id":"kv3.4:7","sourceIds":["kv3.4:7.1","kv3.4:7.2","kv3.4:7.3","kv3.4:7.4","kv3.4:7.5","kv3.4:7.6","kv3.4:7.7","kv3.4:7.8","kv3.4:7.9"],"kind":"text","text":{"pi":"Na vattabbaṁ—\n“vimuttaṁ vimuccamānan”ti?\nĀmantā.\nNanu vuttaṁ bhagavatā—\n“tassa evaṁ jānato evaṁ passato kāmāsavāpi cittaṁ vimuccati, bhavāsavāpi cittaṁ vimuccati, avijjāsavāpi cittaṁ vimuccatī”ti.\nAttheva suttantoti?\nĀmantā.\nTena hi vattabbaṁ—\n“vimuttaṁ vimuccamānan”ti."}},{"id":"kv3.4:8","sourceIds":["kv3.4:8.1","kv3.4:8.2","kv3.4:8.3","kv3.4:8.4","kv3.4:8.5","kv3.4:8.6","kv3.4:8.7","kv3.4:8.8"],"kind":"text","text":{"pi":"Vimuttaṁ vimuccamānanti?\nĀmantā.\nNanu vuttaṁ bhagavatā—\n“so evaṁ samāhite citte parisuddhe pariyodāte anaṅgaṇe vigatūpakkilese mudubhūte kammaniye ṭhite āneñjappatte āsavānaṁ khayañāṇāya cittaṁ abhininnāmetī”ti.\nAttheva suttantoti?\nĀmantā.\nTena hi na vattabbaṁ—\n“vimuttaṁ vimuccamānan”ti."}},{"id":"kv3.4:9","sourceIds":["kv3.4:9.1","kv3.4:9.2","kv3.4:9.3","kv3.4:9.4","kv3.4:9.5","kv3.4:9.6","kv3.4:9.7","kv3.4:9.8","kv3.4:9.9"],"kind":"text","text":{"pi":"Atthi cittaṁ vimuccamānanti?\nĀmantā.\nAtthi cittaṁ rajjamānaṁ dussamānaṁ muyhamānaṁ kilissamānanti?\nNa hevaṁ vattabbe …pe…\nnanu rattañceva arattañca, duṭṭhañceva aduṭṭhañca, mūḷhañceva amūḷhañca, chinnañceva achinnañca, bhinnañceva abhinnañca, katañceva akatañcāti?\nĀmantā.\nHañci rattañceva arattañca, duṭṭhañceva aduṭṭhañca, mūḷhañceva amūḷhañca, chinnañceva achinnañca, bhinnañceva abhinnañca, katañceva akatañca, no ca vata re vattabbe—\n“atthi cittaṁ vimuccamānan”ti.\nVimuccamānakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv3.4/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}