{"id":"kv3.9","title":"Yathākammūpagatañāṇakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv3.9","title":"Yathākammūpagatañāṇakathā","units":[{"id":"kv3.9:0","sourceIds":["kv3.9:0.1","kv3.9:0.2","kv3.9:0.3","kv3.9:0.4"],"kind":"text","text":{"pi":"Kathāvatthu\nMahāpaṇṇāsaka\nTatiyavagga\nYathākammūpagatañāṇakathā"}},{"id":"kv3.9:1","sourceIds":["kv3.9:1.1","kv3.9:1.2","kv3.9:1.3","kv3.9:1.4"],"kind":"text","text":{"pi":"Yathākammūpagataṁ ñāṇaṁ dibbacakkhunti?\nĀmantā.\nYathākammūpagatañca manasi karoti, dibbena cakkhunā rūpaṁ passatīti?\nNa hevaṁ vattabbe …pe…."}},{"id":"kv3.9:2","sourceIds":["kv3.9:2.1","kv3.9:2.2","kv3.9:2.3","kv3.9:2.4"],"kind":"text","text":{"pi":"Yathākammūpagatañca manasi karoti, dibbena cakkhunā rūpaṁ passatīti?\nĀmantā.\nDvinnaṁ phassānaṁ dvinnaṁ cittānaṁ samodhānaṁ hotīti?\nNa hevaṁ vattabbe …pe…."}},{"id":"kv3.9:3","sourceIds":["kv3.9:3.1","kv3.9:3.2","kv3.9:3.3","kv3.9:3.4"],"kind":"text","text":{"pi":"Yathākammūpagataṁ ñāṇaṁ dibbacakkhunti?\nĀmantā.\n“Ime vata bhonto sattā”ti ca manasi karoti, “kāyaduccaritena samannāgatā”ti ca manasi karoti, “vacīduccaritena samannāgatā”ti ca manasi karoti, “manoduccaritena samannāgatā”ti ca manasi karoti, “ariyānaṁ upavādakā”ti ca manasi karoti, “micchādiṭṭhikā”ti ca manasi karoti, “micchādiṭṭhikammasamādānā”ti ca manasi karoti, “te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā”ti ca manasi karoti, “ime vā pana bhonto sattā”ti ca manasi karoti, “kāyasucaritena samannāgatā”ti ca manasi karoti, “vacīsucaritena samannāgatā”ti ca manasi karoti, “manosucaritena samannāgatā”ti ca manasi karoti, “ariyānaṁ anupavādakā”ti ca manasi karoti, “sammādiṭṭhikā”ti ca manasi karoti, “sammādiṭṭhikammasamādānā”ti ca manasi karoti, “te kāyassa bhedā paraṁ maraṇā sugatiṁ saggaṁ lokaṁ upapannā”ti ca manasi karoti, dibbena cakkhunā rūpaṁ passatīti?\nNa hevaṁ vattabbe …pe…."}},{"id":"kv3.9:4","sourceIds":["kv3.9:4.1","kv3.9:4.2","kv3.9:4.3","kv3.9:4.4"],"kind":"text","text":{"pi":"“Te kāyassa bhedā paraṁ maraṇā sugatiṁ saggaṁ lokaṁ upapannā”ti ca manasi karoti, dibbena cakkhunā rūpaṁ passatīti?\nĀmantā.\nDvinnaṁ phassānaṁ dvinnaṁ cittānaṁ samodhānaṁ hotīti?\nNa hevaṁ vattabbe …pe…."}},{"id":"kv3.9:5","sourceIds":["kv3.9:5.1","kv3.9:5.2","kv3.9:5.3","kv3.9:5.4","kv3.9:5.5","kv3.9:5.6"],"kind":"text","text":{"pi":"Yathākammūpagataṁ ñāṇaṁ dibbacakkhunti?\nĀmantā.\nAtthi koci adibbacakkhuko dibbacakkhuṁ appaṭiladdho anadhigato asacchikato yathākammūpagataṁ jānātīti?\nĀmantā.\nHañci atthi koci adibbacakkhuko dibbacakkhuṁ appaṭiladdho anadhigato asacchikato yathākammūpagataṁ jānāti, no ca vata re vattabbe—\n“yathākammūpagataṁ ñāṇaṁ dibbacakkhun”ti."}},{"id":"kv3.9:6","sourceIds":["kv3.9:6.1","kv3.9:6.2","kv3.9:6.3","kv3.9:6.4","kv3.9:6.5","kv3.9:6.6"],"kind":"text","text":{"pi":"Yathākammūpagataṁ ñāṇaṁ dibbacakkhunti?\nĀmantā.\nĀyasmā sāriputto yathākammūpagataṁ ñāṇaṁ jānātīti?\nĀmantā.\nHañci āyasmā sāriputto yathākammūpagataṁ ñāṇaṁ jānāti, no ca vata re vattabbe—\n“yathākammūpagataṁ ñāṇaṁ dibbacakkhun”ti."}},{"id":"kv3.9:7","sourceIds":["kv3.9:7.1","kv3.9:7.2","kv3.9:7.3","kv3.9:7.4","kv3.9:7.5","kv3.9:7.6"],"kind":"text","text":{"pi":"Yathākammūpagataṁ ñāṇaṁ dibbacakkhunti?\nĀmantā.\nĀyasmā sāriputto yathākammūpagataṁ ñāṇaṁ jānātīti?\nĀmantā.\nAtthāyasmato sāriputtassa dibbacakkhunti?\nNa hevaṁ vattabbe …pe…."}},{"id":"kv3.9:8","sourceIds":["kv3.9:8.1","kv3.9:8.2","kv3.9:8.3"],"kind":"text","text":{"pi":"Atthāyasmato sāriputtassa dibbacakkhunti?\nĀmantā.\nNanu āyasmā sāriputto etadavoca—"}},{"id":"kv3.9:9","sourceIds":["kv3.9:9.1","kv3.9:9.2","kv3.9:9.3","kv3.9:9.4","kv3.9:9.5","kv3.9:9.6"],"kind":"text","text":{"pi":"“Neva pubbenivāsāya,\nnapi dibbassa cakkhuno;\nCetopariyāya iddhiyā,\nsotadhātuvisuddhiyā;\nCutiyā upapattiyā,\npaṇidhi me na vijjatī”ti."}},{"id":"kv3.9:10","sourceIds":["kv3.9:10.1","kv3.9:10.2","kv3.9:10.3","kv3.9:10.4","kv3.9:10.5"],"kind":"text","text":{"pi":"Attheva suttantoti?\nĀmantā.\nTena hi na vattabbaṁ—\n“yathākammūpagataṁ ñāṇaṁ dibbacakkhun”ti.\nYathākammūpagatañāṇakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv3.9/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}