{"id":"kv4.7","title":"Lakkhaṇakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv4.7","title":"Lakkhaṇakathā","units":[{"id":"kv4.7:0","sourceIds":["kv4.7:0.1","kv4.7:0.2","kv4.7:0.3","kv4.7:0.4"],"kind":"text","text":{"pi":"Kathāvatthu\nMahāpaṇṇāsaka\nCatutthavagga\nLakkhaṇakathā"}},{"id":"kv4.7:1","sourceIds":["kv4.7:1.1","kv4.7:1.2","kv4.7:1.3","kv4.7:1.4"],"kind":"text","text":{"pi":"Lakkhaṇasamannāgato bodhisattoti?\nĀmantā.\nPadesalakkhaṇehi samannāgato padesabodhisattoti?\nNa hevaṁ vattabbe …pe…."}},{"id":"kv4.7:2","sourceIds":["kv4.7:2.1","kv4.7:2.2","kv4.7:2.3","kv4.7:2.4"],"kind":"text","text":{"pi":"Lakkhaṇasamannāgato bodhisattoti?\nĀmantā.\nTibhāgalakkhaṇehi samannāgato tibhāgabodhisattoti?\nNa hevaṁ vattabbe …pe…."}},{"id":"kv4.7:3","sourceIds":["kv4.7:3.1","kv4.7:3.2","kv4.7:3.3","kv4.7:3.4"],"kind":"text","text":{"pi":"Lakkhaṇasamannāgato bodhisattoti?\nĀmantā.\nUpaḍḍhalakkhaṇehi samannāgato upaḍḍhabodhisattoti?\nNa hevaṁ vattabbe …pe…."}},{"id":"kv4.7:4","sourceIds":["kv4.7:4.1","kv4.7:4.2","kv4.7:4.3","kv4.7:4.4"],"kind":"text","text":{"pi":"Lakkhaṇasamannāgato bodhisattoti?\nĀmantā.\nCakkavattisatto lakkhaṇasamannāgato, cakkavattisatto bodhisattoti?\nNa hevaṁ vattabbe …pe…."}},{"id":"kv4.7:5","sourceIds":["kv4.7:5.1","kv4.7:5.2","kv4.7:5.3","kv4.7:5.4"],"kind":"text","text":{"pi":"Cakkavattisatto lakkhaṇasamannāgato, cakkavattisatto bodhisattoti?\nĀmantā.\nYādiso bodhisattassa pubbayogo pubbacariyā dhammakkhānaṁ dhammadesanā, tādiso cakkavattisattassa pubbayogo pubbacariyā dhammakkhānaṁ dhammadesanāti?\nNa hevaṁ vattabbe …pe…."}},{"id":"kv4.7:6","sourceIds":["kv4.7:6.1","kv4.7:6.2"],"kind":"text","text":{"pi":"Yathā bodhisattassa jāyamānassa devā paṭhamaṁ paṭiggaṇhanti pacchā manussā, evamevaṁ cakkavattisattassa jāyamānassa devā paṭhamaṁ paṭiggaṇhanti pacchā manussāti?\nNa hevaṁ vattabbe …pe…."}},{"id":"kv4.7:7","sourceIds":["kv4.7:7.1","kv4.7:7.2","kv4.7:7.3","kv4.7:7.4","kv4.7:7.5","kv4.7:7.6"],"kind":"text","text":{"pi":"Yathā bodhisattassa jāyamānassa cattāro naṁ devaputtā paṭiggahetvā mātu purato ṭhapenti—\n“attamanā, devi, hohi.\nMahesakkho te putto uppanno”ti, evamevaṁ cakkavattisattassa jāyamānassa cattāro naṁ devaputtā paṭiggahetvā mātu purato ṭhapenti—\n“attamanā, devi, hohi.\nMahesakkho te putto uppanno”ti?\nNa hevaṁ vattabbe …pe…."}},{"id":"kv4.7:8","sourceIds":["kv4.7:8.1","kv4.7:8.2","kv4.7:8.3","kv4.7:8.4","kv4.7:8.5","kv4.7:8.6"],"kind":"text","text":{"pi":"Yathā bodhisattassa jāyamānassa dve udakassa dhārā antalikkhā pātubhavanti—\nekā sītassa, ekā uṇhassa—\nyena bodhisattassa udakakiccaṁ karonti mātu ca, evamevaṁ cakkavattisattassa jāyamānassa dve udakassa dhārā antalikkhā pātubhavanti—\nekā sītassa, ekā uṇhassa—\nyena cakkavattisattassa udakakiccaṁ karonti mātu cāti?\nNa hevaṁ vattabbe …pe…."}},{"id":"kv4.7:9","sourceIds":["kv4.7:9.1","kv4.7:9.2","kv4.7:9.3","kv4.7:9.4"],"kind":"text","text":{"pi":"Yathā sampatijāto bodhisatto samehi pādehi patiṭṭhahitvā uttarena abhimukho sattapadavītihārena gacchati setamhi chatte anudhāriyamāne, sabbā ca disā viloketi, āsabhiñca vācaṁ bhāsati—\n“aggohamasmi lokassa, jeṭṭhohamasmi lokassa, seṭṭhohamasmi lokassa, ayamantimā jāti, natthi dāni punabbhavo”ti, evamevaṁ sampatijāto cakkavattisatto samehi pādehi patiṭṭhahitvā uttarena abhimukho sattapadavītihārena gacchati setamhi chatte anudhāriyamāne, sabbā ca disā viloketi, āsabhiñca vācaṁ bhāsati—\n“aggohamasmi lokassa, jeṭṭhohamasmi lokassa, seṭṭhohamasmi lokassa, ayamantimā jāti, natthi dāni punabbhavo”ti?\nNa hevaṁ vattabbe …pe…."}},{"id":"kv4.7:10","sourceIds":["kv4.7:10.1","kv4.7:10.2"],"kind":"text","text":{"pi":"Yathā bodhisattassa jāyamānassa mahato ālokassa mahato obhāsassa mahato bhūmicālassa pātubhāvo hoti, evamevaṁ cakkavattisattassa jāyamānassa mahato ālokassa mahato obhāsassa mahato bhūmicālassa pātubhāvo hotīti?\nNa hevaṁ vattabbe …pe…."}},{"id":"kv4.7:11","sourceIds":["kv4.7:11.1","kv4.7:11.2"],"kind":"text","text":{"pi":"Yathā bodhisattassa pakatikāyo samantā byāmaṁ obhāsati, evamevaṁ cakkavattisattassa pakatikāyo samantā byāmaṁ obhāsatīti?\nNa hevaṁ vattabbe …pe…."}},{"id":"kv4.7:12","sourceIds":["kv4.7:12.1","kv4.7:12.2"],"kind":"text","text":{"pi":"Yathā bodhisatto mahāsupinaṁ passati, evamevaṁ cakkavattisatto mahāsupinaṁ passatīti?\nNa hevaṁ vattabbe …pe…."}},{"id":"kv4.7:13","sourceIds":["kv4.7:13.1","kv4.7:13.2","kv4.7:13.3","kv4.7:13.4","kv4.7:13.5","kv4.7:13.6","kv4.7:13.7","kv4.7:13.8","kv4.7:13.9","kv4.7:13.10","kv4.7:13.11","kv4.7:13.12","kv4.7:13.13","kv4.7:13.14","kv4.7:13.15"],"kind":"text","text":{"pi":"Na vattabbaṁ—\n“lakkhaṇasamannāgato bodhisatto”ti?\nĀmantā.\nNanu vuttaṁ bhagavatā—\n“dvattiṁsimāni, bhikkhave, mahāpurisassa mahāpurisalakkhaṇāni, yehi samannāgatassa mahāpurisassa dveva gatiyo bhavanti anaññā.\nSace agāraṁ ajjhāvasati, rājā hoti cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato.\nTassimāni satta ratanāni bhavanti, seyyathidaṁ—\ncakkaratanaṁ, hatthiratanaṁ, assaratanaṁ, maṇiratanaṁ, itthiratanaṁ, gahapatiratanaṁ, pariṇāyakaratanameva sattamaṁ.\nParosahassaṁ kho panassa puttā bhavanti sūrā vīraṅgarūpā parasenappamaddanā.\nSo imaṁ pathaviṁ sāgarapariyantaṁ adaṇḍena asatthena dhammena abhivijiya ajjhāvasati.\nSace kho pana agārasmā anagāriyaṁ pabbajati, arahaṁ hoti sammāsambuddho loke vivaṭṭacchado”ti.\nAttheva suttantoti?\nĀmantā.\nTena hi lakkhaṇasamannāgato bodhisattoti.\nLakkhaṇakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv4.7/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}