{"id":"kv5.2","title":"Asekhañāṇakathā","languageCodes":["pi"],"languageNotes":{"en":"Bhikkhu Sujato · CC0","pi":"Mahāsaṅgīti edition · SuttaCentral"},"chapters":[{"id":"kv5.2","title":"Asekhañāṇakathā","units":[{"id":"kv5.2:0","sourceIds":["kv5.2:0.1","kv5.2:0.2","kv5.2:0.3","kv5.2:0.4"],"kind":"text","text":{"pi":"Kathāvatthu\nMahāpaṇṇāsaka\nPañcamavagga\nAsekhañāṇakathā"}},{"id":"kv5.2:1","sourceIds":["kv5.2:1.1","kv5.2:1.2","kv5.2:1.3","kv5.2:1.4","kv5.2:1.5","kv5.2:1.6","kv5.2:1.7","kv5.2:1.8"],"kind":"text","text":{"pi":"Sekhassa asekhaṁ ñāṇaṁ atthīti?\nĀmantā.\nSekho asekhaṁ dhammaṁ jānāti passati, diṭṭhaṁ viditaṁ sacchikataṁ upasampajja viharati, kāyena phusitvā viharatīti?\nNa hevaṁ vattabbe …pe…\nnanu sekho asekhaṁ dhammaṁ na jānāti na passati, adiṭṭhaṁ aviditaṁ asacchikataṁ na upasampajja viharati, na kāyena phusitvā viharatīti?\nĀmantā.\nHañci sekho asekhaṁ dhammaṁ na jānāti na passati, adiṭṭhaṁ aviditaṁ asacchikataṁ na upasampajja viharati, na kāyena phusitvā viharati, no ca vata re vattabbe—\n“sekhassa asekhaṁ ñāṇaṁ atthī”ti."}},{"id":"kv5.2:2","sourceIds":["kv5.2:2.1","kv5.2:2.2","kv5.2:2.3","kv5.2:2.4"],"kind":"text","text":{"pi":"Asekhassa asekhaṁ ñāṇaṁ atthi, asekho asekhaṁ dhammaṁ jānāti passati, diṭṭhaṁ viditaṁ sacchikataṁ upasampajja viharati, kāyena phusitvā viharatīti?\nĀmantā.\nSekhassa asekhaṁ ñāṇaṁ atthi, sekho asekhaṁ dhammaṁ jānāti passati, diṭṭhaṁ viditaṁ sacchikataṁ upasampajja viharati, kāyena phusitvā viharatīti?\nNa hevaṁ vattabbe …pe…."}},{"id":"kv5.2:3","sourceIds":["kv5.2:3.1","kv5.2:3.2","kv5.2:3.3","kv5.2:3.4"],"kind":"text","text":{"pi":"Sekhassa asekhaṁ ñāṇaṁ atthi, sekho asekhaṁ dhammaṁ na jānāti na passati, adiṭṭhaṁ aviditaṁ asacchikataṁ na upasampajja viharati, na kāyena phusitvā viharatīti?\nĀmantā.\nAsekhassa asekhaṁ ñāṇaṁ atthi, asekho asekhaṁ dhammaṁ na jānāti na passati, adiṭṭhaṁ aviditaṁ asacchikataṁ na upasampajja viharati, na kāyena phusitvā viharatīti?\nNa hevaṁ vattabbe …pe…."}},{"id":"kv5.2:4","sourceIds":["kv5.2:4.1","kv5.2:4.2","kv5.2:4.3","kv5.2:4.4","kv5.2:4.5","kv5.2:4.6","kv5.2:4.7","kv5.2:4.8"],"kind":"text","text":{"pi":"Sekhassa asekhaṁ ñāṇaṁ atthīti?\nĀmantā.\nGotrabhuno puggalassa sotāpattimagge ñāṇaṁ atthīti?\nNa hevaṁ vattabbe …pe…\nsotāpattiphalasacchikiriyāya paṭipannassa puggalassa sotāpattiphale ñāṇaṁ atthīti?\nNa hevaṁ vattabbe …pe…\nsakadāgāmiphala … anāgāmiphala … arahattasacchikiriyāya paṭipannassa puggalassa arahatte ñāṇaṁ atthīti?\nNa hevaṁ vattabbe …pe…."}},{"id":"kv5.2:5","sourceIds":["kv5.2:5.1","kv5.2:5.2","kv5.2:5.3","kv5.2:5.4","kv5.2:5.5","kv5.2:5.6","kv5.2:5.7","kv5.2:5.8"],"kind":"text","text":{"pi":"Na vattabbaṁ—\n“sekhassa asekhaṁ ñāṇaṁ atthī”ti?\nĀmantā.\nNanu āyasmā ānando sekho—“bhagavā uḷāro”ti jānāti, “sāriputto thero, mahāmoggallāno thero uḷāro”ti jānātīti?\nĀmantā.\nHañci āyasmā ānando sekho—“bhagavā uḷāro”ti jānāti, “sāriputto thero, mahāmoggallāno thero uḷāro”ti jānāti, tena vata re vattabbe—\n“sekhassa asekhaṁ ñāṇaṁ atthī”ti.\nAsekhañāṇakathā niṭṭhitā."}}]}],"sourceRevision":"afdafa92450cfe7573b280da50382888323666d2","sourceUrl":"https://suttacentral.net/kv5.2/pli/ms","licence":"CC0 1.0","licenceUrl":"https://creativecommons.org/publicdomain/zero/1.0/","editionNote":"Full supplied source file; inherited abbreviations are preserved. Not a reconstructed expansion of every repetition. No Malay or Mandarin translation is implied."}